د لاسرسۍ وړ لېنکونه

تازه خبر
پنجشنبه ۱۲ چنګاښ ۱۳۹۹ کابل ۰۷:۱۹

خبرونه

چک جمهوریت د روسیې د سفارت دوه کارکوونکي د «نامطلوبو» اشخاصو په توګه اعلان کړل

د چک صدراعظم اندري بابیش

د چک جمهوریت صدراعظم وايي حکومت یې په پراګ کې د روسیې د سفارت دوه کارکوونکي د نامطلوبو اشخاصو په لیست کې شامل کړل.

اندري بابیش نن په پراګ کې یوه خبري کنفرانس ته وویل، دا اقدام د مسمومولو د هڅو له کبله شوی دی.

خو وروسته دا یو ناسم خبر وبلل شو، چې علت یې د سفارت د کارکوونکو ترمنځ اختلافات وبلل شول.

د چک صدراعظم اندري بابیش وویل:

«په پراګ کې د روسیې د سفارت دوه کارکوونکي د نامطلوبو اشخاصو په توګه اعلان کړای شول.»

لومړی د چک جمهوریت په رسنیو کې دا خبر داسې خپور شو، چې د روسیې د سفارت د ساینس او کلتور د مرکز مشر اندري کونچاکوف له روسیې څخه د راسین په نوم زهرجن مواد راوړي دي.

په راپورونو کې ویل شوي وو، چې په پام کې وه، په دغو موادو د مارچ میاشتې په نیمايي کې د پراګ ښاروال زدینیک هژیب او د ښاروالۍ دوه نور مهم چارواکي مسموم کړای شي.

مسکو دا پېښه، چې د دواړو هېوادونو ترمنځ یې کړکېچ رامنځته کړی، جعلي خبر بللی دی.

د ورځې تازه خبرونه دلته ولولئ

د ننګرهار سره رود ولسوالۍ اجرائیه امر په موټر چاودنې ۲ تنه ټپیان کړل

د ننګرهار ولایت د جلال‌اباد ښار یوه برخه

د ننګرهار د سره رود ولسوالۍ د اجرائیه امر په موټر چاودنې دوه تنه ټپیان کړل.

د ننګرهار د والي ویاند عطاءالله خوګیاڼي ازادي راډيو ته وویل چې نن له غرمې وروسته د جلال‌اباد ښار د لومړۍ ناحیې په مربوطاتو کې د سره رود ولسوالۍ د اجرائیه امر عبدالواسع انتظار په موټر پسې نښلول شوي ماین چاودنه وکړه چې په خبره‌یې، خپله عبدالواسع انتظار او د نوموړي یو زوی یې ټپیان کړي دي.

د خوګیاڼي په وینا، د عبدالواسع انتظار ټپونه ژور دي، خو زوی یې سر سري ټپي شوی چې دا مهال د ننګرهار په حوزوي روغتون کې تر درملنې لاندې دي.

د یادونې وړ ده چې تېره سې شنبه هم د جلال‌اباد ښار په همدې ناحیې پورې مربوط اکاخېل پلازې مخې ته په یوه موټر پسې نښلول شوي ماین چاودنه کړې وه چې د معلوماتو له مخې، د سر له زیان پرته په‌کې د دوو موټرو په ګډون مالي زیانونه اوښتي وو.

چارواکي: د کابل-جلال‌اباد پر لویه لاره د کونړ د والي په موټر برید شوی

عبدالستار ميرزکوال

د لغمان چارواکي وایي، تېر ماښام د کابل-جلال‌اباد پر لویه لاره د کونړ د والي د موټرو پر کاروان وسله‌وال برید شوی دی.

د لغمان د والي ویاند اسدالله دولت‌زي ازادي راډيو ته وویل چې پېښه تېر ماښام د کابل-جلال‌اباد د لویې لارې په اوږدو کې د سرخکانو په سیمه کې شوې ده.

ځينو سرچینو په سیمه کې د ازادي راډيو خبریال ته ویلي چې په دغه برید کې د کونړ والي ته کوم زیان نه‌دی اوښتی، خو دوه ساتونکي یې ټپیان شوي دي.

دا په داسې حال کې ده چې تېره اوونۍ پر همدغه لاره د نورستان د والي حافظ عبدالقیوم د موټرو پر کاروان برید شوی و چې دی ورڅخه روغ وتلی وو، خو ساتونکو او موټرو ته‌یې زیان اوښتی وو.

د دغو بریدونو مسؤلیت چا نه‌دی منلی.

د یادونې وړ ده چې تر نسبي امن او کرارۍ وروسته د کابل-جلال‌اباد د لارې ناامنیو خلک اندېښمن کړي او له ځایي مسؤلینو غواړي چې د لارې خوندیتوب ته جدي پام وکړي.

چارواکي: ننګرهار کې طالبانو د سرحدي پوليسو پر پوستو بريدونه کړي

ارشيف، ننګرهار کې د سرحدي پوليسو پوسته

د ننګرهار چارواکي وایي چې وسله‌والو طالبانو په خوګیاڼو ولسوالۍ کې د سرحدي پولیسو پر پوستو بریدونه کړي چې دوه پولیس په‌کې وژل شوي دي.

د ننګرهار د والي ویاند عطاالله خوګیاڼي ازادي راډيو ته وویل چې تېره شپه په خوګیاڼو ولسوالۍ کې د وسله‌والو طالبانو په ډله‌ییز برید کې د سرحدي پولیسو دوه سرتېري وژل شوي او ۹ نور ټپیان شوي دي.

د ښاغلي خوګیاڼي په خبره، افغان سرتېرو برید پر شا تمبولی او د پوستو د بېرته نیولو ترڅنګ‌یې له ۱۰ زیاتو مخالفینو ته مرګ‌ژوبله واړوله.

د خوګیاڼي په وینا په سیمه کې وضعیت ښه او د افغان ځواکونو په کنټرول کې دی.

وسله‌والو طالبانو په دې اړه څه نه‌دي ویلي.

د راپورونو له مخې، په ننګرهار کې د داعش له ماتې وروسته یو ځل بیا د دغه ولایت په لیرې پرتو سیمو کې د وسله‌والو طالبانو فعالیتونه مخ پر زیاتېدو دي.

نامعلومو وسله‌والو خوست کې دوه ځوانان ووژل

ارشيف، د خوست ښار يوه برخه

په خوست ښار کې دوه کسان د نامعلومه وسله‌والو په ډزو وژل شوي دي.

دغه دوه ځوانان نن سهار په خوست ښار کې ووژل شول.

د خوست د ولایتي شورا غړي قمر علي لکڼوال پر خپله فېس‌بوک پاڼه کې په ښار کې د ترور د وروستیو پېښو په اړه اندېښنه څرګنده کړې ده.

په دې اړه چې وژل شوي کسان څوک دي او چا دغه برید کړی، د خوست سیمه‌ییزو چارواکو څه نه‌دي ویلي او نه هم کوم چا د دې برید مسؤلیت منلی.

په يو بل خبر کې شپږ کسان د غیر قانوني وسلو ګرځولو په تور نیول شوي دي.

د خوست د پولیسو ویاند عادل حیدر ازادي راډیو ته وویل چې یاد شپږ کسان د ښار په بېلابېلو برخو کې د ناقانونه وسلو ګرځولو په تور نیول شوي دي.

حیدر وایي، په تېرو دوو اوونیو کې ۱۷ کړۍ بېلابیل ډوله ماینونه هم کشف او له‌منځه وړل شوي دي.

یوناما: ښکېلې خواوې دې تر بین‌الافغاني خبرو مخکې جګړه سړه کړي

د یوناما لوګو

په افغانستان کې د ملګرو ملتونو مرستندوی مأموریت یوناما د جګړې له ښکېلو خواو غوښتي چې دوحه کې تر بین‌الافغاني خبرو مخکې جګړه سړه کړي.

یوناما نن په یوه خبرپاڼه کې وویل چې د جګړې له کموالي سره به ملکیان خوندي او د سولې خبرو ته به چې د دوی په ټکو همدې میاشت کې پيلېږي، ښه فضا برابره شي.

په خبرپاڼه کې د افغانستان لپاره د ملګرو ملتونو د ځانګړې استازې دیبرا لاینز په حواله ویل شوي، دغه هېواد کې سولې ته زړورې پرېکړې او لوی کارونه شوي.

دې زیاته کړې، د دې لپاره چې سولې ته عملي ګامونه اوچت شي د جګړې دواړه خواوې باید ژر تر ژره تاوتریخوالی کم کړي.

یوناما ویلي، افغانستان کې د تاوتریخوالي وروستیو پېښو په ځانګړې توګه د مدني فعالانو وژنو اندېښمن کړي دي.

د امریکا استخبارات د روسیې په اړه قانون جوړوونکو ته وضاحت ورکوي

د امریکا بیرغ

ټاکل شوې د امریکا لوړپوړي استخباراتي چارواکي نن پنجشنبه د نیویارک ټایمز د هغه راپور په اړه قانون جوړوونکو ته وضاحت ورکړي چې په‌کې راغلي، روسي استخباراتو طالبانو ته د امریکایي ځواکونو د وژنې لپاره انعامونه ورکړي دي.

په دغه راپور کې چې تېره جمعه خپور شو راغلي، د روسيې د پوځي استخباراتو یوې پټې څانګې طالبانو ته دغه انعامونه ورکړي دي.

په نننۍ غونډه کې د 'سي‌ای‌اې' مشره جینا هاسپل او د امریکا د ملي استخباراتو ادارې مشر جان راتکلف برخه اخلي.

د امریکا ولسمشر ډونالد ټرمپ پرون وویل، ده ته د هغه څه په اړه معلومات نه‌دي ورکړل شوي چې ویل کېږي روسیې طالبانو ته د امریکایي ځواکونو د وژنې لپاره پیسې ورکړي.

د امریکا د قانون جوړوونکو او استخباراتي چارواکو نننۍ غونډه داسې مهال جوړېږي چې امریکا کې قانون جوړوونکو پر روسیې د بندیزونو د ډېرېدو غوښتنه کړې ده.

روسیه اوس‌مهال د دې لپاره د امریکا له یو شمېر بندیزونو سره مخ ده چې د اوکراین په ختیځ کې د روسي پلوه بېلتون غوښتونکو ملاتړ کوي.

سپینه ماڼۍ: که پر روسیې تورونه تأیید شي امریکا به سخت ځواب ورکړي

ارشیف، سپینه ماڼۍ

د سپینې ماڼۍ ویاند رابرټ اوبراین وایي، که چېرته دا راپورونه تأیید شي چې روسیې طالبانو ته د دې لپاره انعامونه ورکړي چې په افغانستان کې امریکایي ځواکونه او د هغوی متحدان ووژني، متحده ایالات به سخت ځواب ورکړي.

ښاغلي اوبراین دا خبره پرون په واشنګتن کې خبریالانو ته وکړه، خو په دې اړه‌یې نور تفصیل ورنه‌کړ.

تر دې مخکې پرون په واشنګټن کې د متحده ایالاتو د بهرنیو چارو وزیر مایک پومپیو د همدې موضوع په اړه د یوه خبریال د پوښتنې په ځواب کې وویل: "کله چې موږ داسې کره معلومات ترلاسه کړو چې روسان د امریکایانو ژوند په خطر کې اچوي، نو موږ به په جدي توګه ځواب ورکړو. لکه تاسو چې وویل، موږ به خبرداری ورکوو؟ موږ به خبرې ورسره کوو؟ زه فکر کوم چې ځواب به خامخا وي او ورکوو به‌یې."

نیویارک ټایمز ورځپاڼې تېره جمعه راپور ورکړ چې د روسې پوځي استخباراتو د امریکایانو د وژلو لپاره طالبانو ته انعامونه ورکړي او دا راپور د فبرورۍ په میاشت کې له ولسمشر ټرمپ سره شریک شوی دی، تر دې راوروسته ښاغلی ټرمپ تر فشار لاندې راغلی دی.

د سپینې ماڼۍ ویاند، اوبراین وویل چې د امریکا د مرکزي استخباراتو یوې غړې ولسمشر ټرمپ ته په دې اړه شفاهي خبره کړې وه او په لیکلې بڼه‌یې څه نه‌و وړاندې کړي.

د امریکا په متحده ایالاتو کې د روسیې سفارت دا راپورونه رد کړي او طالبانو هم ویلي دي چې دوی له روسیې انعامونه نه‌دي ترلاسه کړي.

کونړ کې د هندواڼې حاصلات سږ کال ښه بازار لري

ارشیف

د کونړ چارواکي وایي، د دغه ولایت هندواڼې په ګاونډیو ولایتونو کې سږ کال ښه بازار لري چې له دې امله به بزګران په لسګونه میلیونه افغانۍ ګټه وکړي.

د کونړ د کرنې رئیس نجیب‌الله عادل د چهارشنبې په ورځ ازادي راډیو ته وویل: "سږ کال په کونړ کې پر نږدې زر جریبه ځمکه هندواڼې کرل شوې دي چې حاصلات‌یې له ۱۰ تر ۱۲ زره ټنو ته رسېږي او مجموع عواید یې ۴۰ میلیونه افغانۍ اټکل کېږي."

د چارواکو په وینا کونړ ته د کرنې نوي ماشین الات وارد شوي او په وروستیو کلونو کې بڼوالۍ ته پاملرنه زیاته شوې ده چې د نارنج، مالټې او لیمو ترڅنګ په میلیونونو افغانۍ د چهارمغزو او شفالتو پر باغونو پانګونه شوې ده.

پنټاګون: طالبانو د القاعده سیمه‌ییزې شبکې سره خپلې اړیکې ساتلي

طالبان

د امریکا متحده ایالاتو دفاع وزارت (پنټاګون) وایي، په افغانستان کې د القاعده سیمه‌ییزې شبکې له طالبانو سره خپل اړیکې ساتلې دي.

د هغې موافقې له مخې چې د فبرورۍ په ۲۹مه، د قطر په پلازمېنه دوحه کې طالبانو له امریکایانو سره وکړه، طالبانو دا منلې وه چې دوی له القاعده سره اړیکې قطع کوي.

خو د امریکا دفاع وزارت پرون په هغه راپور کې چې د کانګرس لپاره‌یې چمتو کړی دی، وویل چې د سولې تر موافقې راوروسته هم طالبانو د القاعده شبکې له دې ډلې سره چې د هند د نیمې وچې لپاره کار کوي، اړیکې ساتلې دي.

ملګرو ملتونو هم تېره میاشت په یوه راپور کې ویلي و چې طالبان لاهم له القاعده سره نږدې اړیکې لري، طالبانو د ملګرو ملتونو راپور رد کړ، خو د امریکا دفاع وزارت د راپور په اړه‌یې تر اوسه څه نه‌دي ویلي.

ایران دوه سویډنیان د مخدره موادو د قاچاق په تور نیولي

ارشیف، د ایران امنیتي ځواکونه

دوه سویډنیان د مخدره موادو د قاچاق په تور په ایران کې نیول شوي دي. دا خبر پرون تسنیم اژانس ورکړ چې د ایران د سپاه پاسداران انقلاب مربوط ده.

دغه اژانس وایي چې چارواکو ډېره اندازه مخدره مواد او مصنوعي خطرناکه نشه‌یي مواد ترلاسه کړي دي.

په راپور کې دا نه‌دي ویل شوي چې دا مواد او دا کسان چېرته نیول شوي دي.

له افغانستانه د ایران له لارې مخدره مواد اروپا ته قاچاقېږي، خو تهران په دې تورن شوی دی چې لوېدیځوال د دې لپاره نیسي چې له هغوی څخه د مذاکراتو پر مهال د یوه امتیاز په توګه استفاده وکړي.

'امام علي رحمان دې هغه مسوده نه‌تصویبوي چې د بیان ازادۍ مخه نیسي'

د تاجکستان ولسمشر امام علي رحمان

د بشري حقونو فعالانو او د رسنیو څارونکو د تاجکستان له ولسمشر امام علي رحمان څخه وغوښتل چې هغه مسوده تصویب نه‌کړي چې د بیان د ازادۍ مخه نیسي.

د تاجکستان پارلمان تېره میاشت موافقه وکړه، که څوک د کرونا په اړه درواغ معلومات د رسنیو، انټرنټ یا ټولنیزو رسنیو له لارې خپروي هغوی به جریمه کېږي او تر ۱۵ ورځو به په توقیف کې وي.

اوس دا مسوده ولسمشر ته د تصویب لپاره استول شوې ده.

په نیویارک کې مېشتې د خبریالانو د خوندیتوب کمېټې د سې شنبې په ورځ په یوه بیان کې وویل چې په دې مسوده کې دا روښانه نه‌ده چې د 'کووېډ-۱۹' ناروغۍ په اړه درواغ معلومات به څرنګه معلومېږي او د دې قانون په مټ چارواکي دا واک ترلاسه کوي چې د دې ناروغۍ په پلمه سانسور وکړي.

د خبریالانو د خوندیتوب د ټولنې د اروپا او مرکزي اسیا همغږه کوونکې ګلنازې وویل چې ولسمشر رحمان باید د دې مسودې له تصویبه ډډه وکړي.

په پاریس کې مېشتې د بې‌پولې خبریالانو ټولنې هم ورته اندېښنه ښکاره کړې ده.

په تاجکستان کې د رسنیو د ملي خپلواکې ټولنې مشر نورالدین قرشیبایوف وویل چې دا قانون به چارواکو ته د ولسمشرۍ تر انتخاباتو مخکې د رسنیو د ځپلو لپاره ډېر واک ورکړي.

ټاکل شوې ده د روان کال په وروستیو کې په تاجکستان کې د ولسمشرۍ ټاکنې ترسره شي.

د لوګر امنیتي مسؤلینو ته د ولسمشر غني امر

افغان ولسمشر او ورسره پلاوی په لوګر کې د غونډې پر مهال

افغان ولسمشر محمد اشرف غني امنیتي مسؤلینو ته امر وکړ چې په لوګر ولایت کې د امنیت ټينګولو او حملو پر شا تمبولو په خاطر دې ژر تر ژره اقدامات وکړي.

دا خبره نن د ارګ څخه په خپره شوې اعلامیه کې راغلې ده.

ولسمشر غني نن د لوګر د امنیتي وضعیت ارزولو په هدف دې ولایت ته سفر کړی و.

د لوګر والي اجمل شاه‌پور له ولسمشر څخه د لوګر ولایت د امنیتي او دفاعي ځواکونو د لا زیات تجهیز، د ځانګړو عملیاتو ترسره کېدو، هوایي بریدونو، د اردو او پولیسو او همداراز د ولسي پاڅونونو د پرسونل د لا زیات اکمال غوښتنه وکړه.

له ولسمشر سره د جمهوري ریاست لومړی مرستیال امرالله صالح، د ملي امنیت سلاکار حمدالله محب، د ملي دفاع وزارت لوی درستیز بسم‌الله وزیري او یو شمېر نور لوړپوړي چارواکي هم تللي وو.

ولسمشر داسې مهال لوګر ته سفر کړی چې په دې وروستیو کې د لوګر ولایت امنیتي وضعیت خراب شوی.

لوګر ولایت د پلازمېنې کابل ترڅنګ موقعیت لري چې تر ډېره په‌کې وسله‌وال طالبان فعال دي.

اروپايي ټولنې د پاکستان 'پي ای اې' او 'پي وي ټي' شرکتونو جواز ځنډولی

د پاکستان د نړیوال هوايي شرکت یا 'پي ای اې' الوتکه

د اروپايي ټولنې د هوايي خوندیتوب ادارې د پاکستان د نړیوال هوايي شرکت یا 'پي ای اې' او وېژن ايیر انټرنشنل یا 'پي وي ټي' جوازونه ځنډولي دي.

دا شرکتونه به راتلونکې شپږ میاشتې د دې ټولنې په هوايي قلمرو کې پروازونه نه‌شي کولای.

دا اقدام وروسته له هغه شوی چې د پاکستان د هوايي چلند وزیر غلام سرور خان وویل چې د ۲۶۲ پیلوټانو پر جواز شک لري او د دغو کسانو دندې يې وځنډولې.

د 'پي ای اې' ویاند عبدالله حفیظ نن ازادي راډيو ته وویل چې له اروپايي ټولنې سره په دې اړه په تماس کې دي.

ښاغلی حفیظ زیاتوي: "که خدای دې نه‌کوي کومه پېښه شوې وی او د پلټنو لپاره‌یې بهرنيان راغلي وی، خبره به تر دې هم خرابه شوې وی، نو ښه شو چې اوس دا اقدامات وشول."

ټول هغه مسافر به چې پروازونه‌یې اروپايي ټولنې هېوادونو ته وو، یو انتخاب ولري چې خپل پرواز بلې وروستۍ نېټې ته وغځوي او یا بېرته خپلې پیسې واخلي.

'پي ای اې' وايي چې په موقتي توګه به اوس‌مهال خپل ټول پروازونه ودروي، خو وروسته‌یې وویل چې د دوو ورځو وقفه‌یې موندلې چې د جولای له لومړۍ تر درېيمې يې په اروپا او بریتانیا کې د الوتکو د کېناستو اجازه ترلاسه کړې ده.

تېره اوونۍ د پاکستان د هوايي چلند وزیر غلام سرور خان وویل چې د ۲۶۲ پیلوټانو جوازونه یا له وخته تېر شوي او یا ځيني تقاعد شوي دي چې په دغو کې ۱۴۱ د 'پي ای اې'، نهه د اییر بلو، ۱۰ د سیرین ايیر، او ۱۷ د شاهین ایرلاین دي.

د پاکستان د پیلوټانو ټولنې ویلي چې په دې اړه باید پلټنې وشي ځکه یو شمېر پیلوټان ډېر لوستي او تجربه لرونکي کسان دي.

هلمند کې روانه اوونۍ ۳۸ ملکیان وژل شوي او ۳۷ نور ټپيان دي

د هلمند سنګین ولسوالۍ کې وژل شوی کس

په هلمند کې په روانه اوونۍ کې ۳۸ ملکيان وژل شوي او ۳۷ نور ټپیان شوي دي.

په یاد ولایت کې د بشر حقونو کمېسیون ساحوي دفتر د اړیکو او معلوماتو مسؤل مقیم علیزي ازادي راډیو ته وویل چې یاده مرګ‌ژوبله تر ډېره د جګړو له امله اوښتې ده.

ښاغلي علیزي وویل د جګړې دواړه لوري د ملکیانو ژوند او مال ته هېڅ ډول پاملرنه نه‌کوي.

په هلمند کې تر ټولو ډېر ملکي تلفات په سنګین ولسوالۍ کې ثبت شوي. د تېرې دوشنبې په ورځ د عامو خلکو په یوه مېله بازار کې د غبرګو چاودنو په نتیجه کې ۳۰ ملکیان ووژل شول او ۲۵ نور ټپیان شول. حکومت او طالبانو پر یو بل د دې پېښې مسؤلیت واچاوه.

دغه‌راز تېره اوونۍ د هلمند په واشیر ولسوالۍ کې د ماین په یوه چاودنه کې ۸ ملکي وګړي ووژل شول او ۴ نور ټپیان شول.

حکومت هغه مهال رسنیو ته ویلي وو چې وسله‌والو طالبانو دا ماین ځای پر ځای کړی وو.

په هلمند کې د بشري حقونو د ځايي څانګې مسؤلینو د جګړې پر دواړو غاړو غږ کړی چې د جګړې پر مهال باید د ملکيانو ژوند ته پام وکړي.

تندر قول اردو: پکتیکا کې ۱۳ وسله‌وال طالبان ووژل شول

ارشیف، پکتیکا کې افغان سرتېری

له امنیتي ځواکونو سره په نښتو کې ۱۳ تنه وسله‌وال طالبان وژل شوي.

د ۲۰۳ تندر قول اردو ویاند ایمل مومند ازادي راډیو ته وویل چې تېره شپه ناوخته وسله‌والو طالبانو د پکتيکا ولايت د ګومل ولسوالۍ اړوند سيمه کې د سروبي ولسوالۍ د تور تنګي او د یحیی‌خېلو ولسوالۍ د اته خونې په سیمو کې د افغان ځواکونو پر پوستو بریدونه وکړل چې د ده په وینا په ځوابي ډزو کې ۱۳ وسله‌وال طالبان وژل شوي او ۳ نور ټپيان شوي دي.

دی وایي، په دې نښتو کې یو افغان سرتېری وژل شوی او دوه نور ټپیان شوي دي.

تر اوسه وسله‌والو طالبانو په دې اړه څه نه‌دي ویلي.

نور راوښيه

XS
SM
MD
LG