د لاسرسۍ وړ لېنکونه

تازه خبر
سه شنبه ۱ تله ۱۳۹۹ کابل ۰۲:۵۷

نړۍ

د خبریالانو خوندیتوب کمېټه: امریکا دې د رسنیزو فعالانو نښه کول ودروي

له تېرې جمعې د امریکا په متحدو ایالتونو کې د مطبوعاتو له ازادۍ لږ تر لږه ۱۲۵ سرغړونې ثبت شوي دي.

د خبریالانو د خوندیتوب کمېټې له امریکايي چارواکو غوښتنه کړې، چې د اعتراضونو په اړه د راپور ورکولو پر مهال د ژورنالیستانو او د رسنیو د کارکوونکو په نښه کول بند کړي.

دغې کمېټې له امریکايي چارواکو دا هم غوښتي چې د ګرځ بندیز پر مهال دې رسنۍ مستثنی وګڼل شي.

له تېرې جمعې د امریکا په متحدو ایالتونو کې د مطبوعاتو له ازادۍ لږ تر لږه ۱۲۵ سرغړونې ثبت شوي دي.

په نیویارک کې دېره د خبریالانو د خوندیتوب کمېتې ویلي، دا سرغړونې د هغو ژورنالیستانو په وړاندې شوي، چې د یوه تورپوستي سړي جورج فلوید د مړینې په اعتراض د روانو مظاهرو په اړه یې راپورونه ورکول.

د کمېټې د پروګرامونو مشر کارولس مارتینز دي لا سیرنا وویل، د دندې پر مهال د خبریالانو په وړاندې د پولیسو له خوا سختو او کله- کله د تاوتریخجنو اقداماتو دوام ډارولي یو.

د هغو دوو فوټوژورنالیستانو یادونه هم کړې، چې په لاس انجلس کې د کار پر مهال د مې پر ۲۹مه ونیول شول.

تر خوشې کېدو یوه ورځ مخکې د ګډوډیو په پارولو تورن شوي وو.

دغه کمېټه وايي پولیسو پر لسګونو نورو ژورنالیستانو اوښلن ګاز کارولي او په ربړۍ مرمۍ یې ویشتلي دي.

د ورځې تازه خبرونه دلته ولولئ

اسټرالیا کې د لسګونه نهنګانو د ژغورنې هڅې پیل شوي

د پاتې نهنګانو د ژغورنې عملیات به احتمالاً څو ورځې وخت ونیسي.

په اسټرالیا کې نن ژغورونکي هڅه کوي، په لسګونو نهنګان چې د یوه ساحل په کم عمقه اوبو کې راګیر پاتې دي، وژغوري.

د ژغورنې دا اقدام وروسته له هغې کېږي، چې په تاسمانیا ټاپو کې په لسګونو ژوي مړه شول.

سمندري ژوندپوهان اټکل کوي، چې د ۲۷۰ نهنګونو له ډلې ۹۰ یې مړه شوي دي.

معلومه نه ده، چې دغو نهنګانو ولې ساحلي سیمو ته، چې د اوبو اندازه یې کمه ده، مخه کړې وه.

د پاتې نهنګانو د ژغورنې عملیات به احتمالاً څو ورځې وخت ونیسي.

د پیلوټ په نوم دغه نهنګان د سمندري ډولفینونو له ډلې دي، چې تر غټېدو وروسته یې اوږدوالی ۷ مټرو او وزن یې ۳ ټُنو ته رسېږي.

په ۲۰۰۹میلادي کال کې هم په ورته پېښه کې شا و خوا ۲۰۰ نهنګان په دغه ساحل کې راګیر پاتې وو.

پر بیلاروس د بندیزونو غونډه بې پایلې پای ته رسېدلې

د اروپايي ټولنې د بهرنۍ پالیسۍ مشر جوزیپ بوریل په بروکسل کې د بیلاروس د اپوزیسیون د تبعیدي مشرې سويتلانا څیخانوفسکايا سره د خبرو پرمهال.

د اروپايي ټولنې د بهرنیو چارو وزیران په بروکسل کې په خپله پرونۍ غونډه کې د بیلاروس د اپوزیسیون د تبعیدي مشرې سويتلانا څیخانوفسکايا له غوښتنې سره سره پردې هېواد د بندیزونو د لګولو په اړه موافقې ته ونه رسېدل.

قبرس د دې بندیزونو له پلان سره مخالفت وکړ او په عین حال کې یې د غونډې له اجنډا د یوې وتلې غوښتنې په ترڅ کې د ترکیې پرضد په مدیترانې سمندرګي کې د ګاز د زېرمو د پلټڼې په خاطر د اروپايي ټولنې د اقداماتو غوښتنه وکړه.

تمه ده چې پر بیلاروس د بندیزونو د مسئلې په اړه د پنجشنبې او جمعې په ورځو، د اروپايي ټولنې په سرمشریزه کې هم بحث وشي.

د اروپايي ټولنې د بهرنۍ پالیسۍ مشر جوزیپ بوریل د دې ټولنې د بهرنیو چارو د وزیرانو له پرونۍ غونډې وروسته خبریالانو ته وویل که څه هم پر بیلاروس د بندیزونو د لګولو په برخه کې واضحه اراده شته خو د ټولو رایو اجماع چې په دې برخه کې اړینه ده، ترلاسه نه شوه.

ایران له امریکا سره د بندیانو تبادلې ته چمتووالی ښودلی

د ایران د بهرنیو چارو وزیر محمدجواد ظریف

ایران له متحدایالاتو سره د بندیانو د تبادلې ته چمتووالی ښودلی.

د ایران د بهرنیو چارو وزیر محمدجواد ظریف پرون د سېپټېمبر په ۲۱مه په نیویارک کې د بهرنیو اړیکو د شورا تحقیقاتي مرکز ته په آنلاین وینا کې وویل چې هېواد یې له امریکا سره د ټولو بندیانو تبادلې ته چمتو دی.

ښاغلي ظریف دې پوښتنې ته په ځواب کې چې آیا تهران د ایراني الاصله امریکايي وګړي باقر نمازي او د هغه د زوی سیامک خوشې کولو ته چمتو دی کنه وویل، د ده لپاره یوازینۍ لاره چې قضا د امریکايانو خوشې کولو ته قانع کړي له هغو ایراني وګړو سره چې د ده په وینا امریکا په ناحقه نیولي دي د هغوی تبادله ده.

ظریف وویل چې تبادله باید یو د یوه پر وړاندې نه بلکې عمومي وي.

واشنګټن له ډېرې مودې راهیسې د باقر او سیامک نمازي د خوشې کېدو غوښتنه کړې.

دوی له ۲۰۱۶ او ۲۰۱۵ کلونو راهیسې په بند کې دي.

اروپايي ټولنې د بیلاروس پر ځینو چارواکو د بندیزونو لګولو هڅې پیل کړي

السکاندر لوکاشينکا

د اروپايي‌ ټولنې د بهرنيو چارو وزیرانو د بیلاروس د سیاسي مخالفينو له مشرې سويتلانا تیخانوفسکایا سره د دې هېواد پر ځينو چارواکو د احتمالي بندیزونو وضع کولو په اړه خبرې وکړې.

د راپورونو له مخې د بیلاروس پر مشر السکاندر لوکاشينکا هم د احتمالي بندیزونو بحث شوی دی.

د اروپايي ټولنې د بهرنيو چارو د پالیسۍ مشر جوزيپ بوریل د دوشنبې د غونډې په اړه ويلي چې د اروپايي ټولنې پر بهرنيو چارو وزیرانو د بیلاروس وګړو او په ځانګړې توګه د ښځو زړورتيا ډېره اغېز کړی دی.

بوريل همداراز د روسیې هغه تور رد کړی چې وايي اروپايي ټولنه د بیلاروس په کورنيو چارو کې لاسوهنه کوي.

په بیلاروس کې له هغه راهیسې د خلکو اعتراضونه روان دي چې د اګسټ د نهمې په ټاکنو کې الکساندر لوکاشينکا ګټونکی اعلان شو.

مخالفين وايي چې په دې ټاکنو کې سويتلانا تیخانوفسکايا بریالۍ شوې ده خو د بیلاروس د ټاکنو کمېسيون لوکاشینکا ګټونکی اعلان کړ.

د هند په ځینو سیمو کې ښوونځي بېرته پرانیستل شوي

ارشیف

په هند کې د کرونا ویروس د مثبتو پېښو پر زیاتېدو سربېره، پنځه مياشتې وروسته ښوونځي پرانیستل شول.

د هند د مرکزي حکومت د اقدام پر اساس ښوونځي بايد له دوشنبې د سېپټېمبر له ۲۱مې په داوطلبانه توګه د هغو زده کوونکو لپاره پرانیستل شوي وای چې عمرونه یې له ۱۴ څخه تر ۱۷ کلونو دي.

خو حکومت په دې اړه اخري پرېکړه محلي ادارو ته پرې ایښې ده.

د نوي ډلي، ګجرات، کرالا او اترپردېش په ګډون ځينو ايالتونو ويلي چې ښوونځي به ډېر ژر پرانیستل شي.

د روغتيا وزارت د ارقامو له مخې اوسمهال نږدې پنځه نيم ميليونه خلک په دې هېواد کې په کرونا ویروس اخته شوي دي.

د مړو شوو شمېر تر ۸۷۰۰۰ څخه لوړ شوی دی او ويل کېږي چې په اوسط ډول په ۲۴ ساعتونو کې نږدې زر تنه له دې ویروسه مري.

يو اعشاريه درې ميليارده نفوس لرونکی هند په نړۍ کې دوهم هېواد دی چې په کې ډېر خلک په کرونا ویروس اخته شوي دي.

'د اذربايجان یو سرتېری وژل شوی'

ارشیف

د اذربايجان دفاع وزارت وايي، ارمنستان یې یو سرتېری وژلی دی.

دې وزارت د دوشنبې په ورځ د سېپټېمبر په ۲۱مه په يوه خبرپاڼه کې وويل چې د دوی پر سرتېرو د همدغې ورځې په سهار په سرحدي سيمه کې برید وشو.

په خبرپاڼه کې دا حمله پاروونکې او سرغړونه بلل شوې ده.

تېره اونۍ ارمنستان اعلان کړی و چې اذربايجان یې يو سرتېری وژلی دی.

دواړه خواوې يو بل د حملې په پیلولو او د څو لسیزو پخواني اوربند څخه په سرغړونه تورنوي.

د هند کرکټ غوره لیګ؛ نن حیدراباد او بنګلور سره سیالي کوي

د حیدرآباد لوبډلې لوبغاړي

د هند د کرکټ په غوره لیګ کې به د سنرایزرز حیدراباد او رویال چلنجنرز بنګلور ټیمونه سره مخ شي.

دا لوبه د دوبۍ په نړیوال کرکټ سټډیوم کې ماښام مهال پیلېږي.

په حیدراباد لوبډله کې د افغانستان دوه وتلي لوبغاړي راشد خان او محمد نبي هم لوبېږي.

راشد خان داسې مهال لوبېږي چې پرون یې د زوکړې دوه ویشتمه کلیزه وه او سنرایزر ټیم ورته مراسم نیولي و.

د هند د کرکټ غوره لیګ سږ کال د کرونا وبا د خپرېدو په سبب د هندوستان پر ځای په متحده عربي اماراتو کې د شنبې له ورځې پیل شوی دی.

تېره شپه هم په دې لوبو کې ډهلي کپټلز ټیم د کینګز پنجاب لوبډله ماته کړه.

که څه هم افغان لوبغاړي مجیب الرحمن د کینګز پنجاب د ټیم غړی دی خو بېګا په لوبه کې چانس نه و ورکړل شوی.

امریکا د ایران د وسلو پروګرام سره په تړلیو هدفونو بندیزونه لګوي

سپینه ماڼۍ

امریکا متحده ایالتونه به نن د ورځې په اوږدو کې د ایران د وسلو له پروګرام سره په تړلیو لسګونه هدفونو بندیزونه ولګوي.

دا خبره رویټرز اژانس ته یوه لوړپوړي امریکايي چارواکي تایید کړې.

هغه ویلي څه باندې شل کسان او ادارې چې د ایران له اټومي وسلو، راکټي پروګرام او عادي (متعارف) وسلو سره تړلي دي په دې بندیزونو کې شاملېږي.

د امریکا د بهرنیو چارو وزیر مایک پومپيو هم وړمه ورځ اعلان وکړ چې د ملګرو ملتونو ټول بندیزونه یې له سره په ایران لګولي دي.

پومپيو د بندیزونو د بیا لګولو خبره سره له دې چې له ایران سره د اټومي تړون شاملو هېوادونو یې مخالفت کړی اعلان کړه.

د ایران ولسمشر حسن روحاني بیا ویلي چې که امریکا له زور کار اخلي ایران یې هم کلک ځواب وايي.

د هند ځینو سیمو کې ښوونځي بېرته پرانیستل کېږي

په ډيلي، ګجرات، کیرالا او اوترا پردیش کې ډېرو ویلي چې د ښونځیو د پرانیستو پرېکړه لا وختي ده.

په هند کې د کرونا ویروس له ډېرېدو سره سره ځینې ایالتونه سر له نن نه د ښونځیو پرانستو ته اجازه ورکوي.

دغه هېواد کې چې څه باندې یو اعشاریه درې میلیارده نفوس لري، له تېرو شاوخوا پنځو میاشتو راهیسې ښونځي بند وو.

مرکزي حکومت د ښونځیو پیل ته شین څراغ ښودلی، خو وروستۍ پرېکړه یې ایالتونو ته پریښې.

په ډيلي، ګجرات، کیرالا او اوترا پردیش کې ډېرو ویلي چې د ښونځیو د پرانیستو پرېکړه لا وختي ده.

په ورځنۍ کچه د کرونا ډېرې پېښې هم دې وروستیو کې هند کې ثبتېږي او هره ورځ سلګونه کسان ترې مړه کېږي.

دغلته اوس هره ورځ د شاوخوا یو لکو نویو پېښو راپور ورکول کېږي چې ورسره د مثبتو پېښو شمېر هم پنځه اعشاریه څلور میلیونو ته رسېدلی دی.

په ټوله نړۍ کې د کرونا د مثبتو پېښو شمېر نژدې ۳۱ میلیونو ته رسېدلی او له دې کبله د مړو شمېر هم یو میلیون ته نژدې شوی.

د هند کرکټ غوره لیګ سیالۍ؛ بېګانۍ لوبه ډهلي وګټله

ډهلي کپټلز ټیم

د هند د کرکټ په غوره لیګ کې بېګا ډهلي کپیټلز ټیم د کېنګز پنجاب لوبډلې ته ماتې ورکړه.

دا لوبه د دوبۍ په کرکټ سټډیوم کې وشوه.

لومړی بیټینګ ډهلي ټیم وکړ او په۲۰ اورونو کې یې ۱۵۷ منډې وکړې.

کېنګز پنجاب بېرته په ځواب کې ۱۵۷ مساوي منډې وکړې چې په دې اساس دواړه لوبډلې سوپر اوور ته ورغلې او په هغه کې هم ډهلي ګټونکې شوه.

که څه هم افغان لوبغاړي مجیب الرحمن د کېنګز پنجاب د ټیم غړی دی خو بېګا په لوبه کې چانس نه و ورکړل شوی.

تمه ده نن ماښام د سنرایزرز حیدراباد او رویال چلنجنرز بنګلور ټیمونه سره سیالي وکړي.

په حیدراباد لوبډله کې د افغانستان دوه وتلي لوبغاړي راشد خان او محمد نبي هم لوبېږي.

د هند د کرکټ غوره لیګ سږ کال د کرونا وبا د خپرېدو په سبب د هندوستان پر ځای په متحده عربي اماراتو کې د شنبې له ورځې پیل شوی دی.

دولتونو او مالي بنسټونو څومره د ناقانونه پیسو د لېږد مخنیوي هڅې کړي؟

ارشیف

د تحقیقي ژورنالیستانو د نړیوال کنسورتیوم تازه راپور ښيي چې د نړۍ بېلابېلو بانکونو تېر دوه لسیزې داسې دوه تریلیون ډالره یا دوه زره میلیارده ډالره ښکته او پورته کړي چې پرې شکمن و.

دغه تازه راپور دا پوښتنې او اندېښنې راولاړې کړي چې دولتونو او مالي بنسټونو څومره د ناقانونه پیسو د انتقال د مخنیوي هڅې کړي؟

د تحقیقي ژورنالیستانو د نړیوال کنسورتیوم راپور چې یکشنبه خپور شوی د امریکا د خزانې وزارت د پیسو د سپینولو د څانګې د زرګونه فاش شویو سندونو په اساس جوړ شوی دی.

راپور شيي چې د جي پي مورګن، او دویچ بانک په څېر لویو لویدیځ بانکونو څنګه د پخواني شوروي په شمول د نړۍ په ګوټ ګوټ کې له جرمي شبکو سره مرسته کړې او پیسې انتقال او پټې کړي دي.

نړیوالو مالي بنسټونو او حکومتونو تر اوسه د دغو تورونو د سپیناوي لپاره څه نه دي ویلي.

د ایران ولسمشر امریکا ته ګواښ وکړ

د ایران ولسمشر حسن روحاني

د ایران ولسمشر حسن روحاني ګواښ کړی چې که امریکا له زوره کار واخلي دوی هم کلک ځواب ورکوي.

د روحاني خبرې یکشنبه دولتي ټلویزیون خپرولې.

هغه وویل امریکا پر ایران د بندیزونو په بیا لګولو کې له ناکامۍ سره مخامخ ده.

روحاني داسې وخت دا څرګندونې وکړې چې امریکا اعلان کړی په ایران باندې ټول هغه بندیزونه بیا لګوي چې د برجام په خاطر ترې لرې شوي و.

که څه هم له ایران سره د اټومي تړون پاتې غړیو د امریکا دا کار نه دی منلی خو رویټرز اژانس راپور ورکړی چې امریکا به دوشنبه د ایران د راکټي پروګرام مرتبط لسګونه کسان په بندیزونو کې شامل کړي.

اکثر نړیوال شرکتونه د امریکا د بندیزونو له ویرې له ایران سره سوداګرۍ ته زړه نه ښه کوي.

د ایران اقتصاد د امریکا د پرله پسې بندیزونو په سبب ځپل شوی.

تازه یکشنبه د تومانو په وړاندې د ډالرو بیه ډېره پورته ولاړه او یو ډالر په ۲۷ زره او درې سوه تومانو ته پورته شو چې یو نوی ریکارډ بلل کېږي.

بلاروس کې یو ځل بیا پراخې مظاهرې پلان شوي

بلاروس کې مظاهرې

په بلاروس کې نن یو ځل بیا د حکومت پر ضد پراخې مظاهرې پلان شوې دي.

له دې یوه ورځ مخکې امنیتي ځواکونو په پلازمېنه مېنسک کې سلګونه ښځینه مظاهره‌چیانې چې د یوه لاریون په ترڅ کې یې د ولسمشر الکساندر لوکاشینکا د استعفا غوښتنه کوله ونیولې.

تمه ده چې نننۍ مظاهرې ماسپښین مهال پیل شي.

د اګسټ د نهمې له انتخاباتو وروسته چې لوکاشینکا د هغو ګټونکی اعلان شو په تېره یوه میاشت کې په بلاروس کې پراخې مظاهرې روانې دي.

د واشنګټن د وروستي اقدام پر وړاندې د ایران غبرګون

د ایران د بهرنیو چارو وزارت ویاند سعید خطیب‌زاده

تهران د واشنګټن د هغه اقدام پر وړاندې چې د ملګرو ملتونو له‌خوا پر دې هېواد ټول لګېدلي بندیزونه‌یې له خپل لوري په یو اړخیز ډول لګولي، غبرګون ښودلی.

د ایران د بهرنیو چارو وزارت ویاند سعید خطیب‌زاده نن یکشنبه په تهران کې په یوه خبري غونډه کې له نړیوالو وغوښتل چې د واشنګټن د خپل‌سرو اقداماتو پر وړاندې لاس یو کړي او په یوه غږ خبرې وکړي.

متحده ایالاتو له دې مخکې هم پر ایران د ملګرو ملتونو د بندیزونو د دوام لپاره امنیت شورا ته یوه طرحه وړاندې کړې وه، خو دې شورا ونه‌منله.

د امریکا اروپايي متحدانو پر ایران د واشنګټن د نویو بندیزونو پر اغېزمنتوب شک ښودلی، خو له دې سره سره د امریکا د بهرنیو چارو وزیر مایک پومپیو پرون شنبه پر ایران د ملګرو ملتونو بندیزونه چې ناڅاپي کلک ګوزار بلل کېږي اعلان کړل او د بندیزونو د سرغړواي په وړاندې د اقدام خبرداری یې ورکړ.

شمالي وزیرستان کې دوه پاکستاني سرتېري وژل شوي

ارشیف

د پاکستان پوځ ډیورند کرښې ته څېرمه په یوه برید کې د خپلو دوو سرتېرو د وژل کېدو خبر ورکوي.

د پاکستان د پوځ مطبوعاتي څانګې په یوه بیان کې چې نن یکشنبه خپور شو وايي، دا سرتېري د هغو عملیاتو په ترڅ کې چې پوځ په شمالي وزیرستان کې پیل کړي له وسله‌والو سره په نښته کې وژل شوي دي.

پوځ په یو بل بیان کې د بلوچستان ایالت په اواران ولسوالۍ کې پرون شنبه له پوځ سره نښته کې د څلورو وسله‌والو د وژل کېدو خبر هم ورکړی.

نور راوښيه

XS
SM
MD
LG