د لاسرسۍ وړ لېنکونه

تازه خبر
یکشنبه ۱۸ غبرګولی ۱۳۹۹ کابل ۰۱:۰۸

نړۍ

اېف‌بي‌ای: تکزاس کې د سمندري ځواکونو پر اډې پرونی برید ترهګرو کړی

تکزاس کې د حملې سیمه

د امریکا فدرالي تحقیقاتي اداره (اېف‌بي‌ای) وایي، دې نتیجې ته رسېدلي چې په تکزاس کې د سمندري ځواکونو پر اډې پرونی برید ترهګرو کړی دی.

په دې پېښه کې په یوه امنیتي پوسته کې د پلې سمندري ځواکونو یوه ښځینه عسکره ټپي شوې ده. برید کوونکی په سرعت د موټر په واسطه د اډې دروازې ته داخل شوی او ساتونکی د دې سربېره چې ټپي شوی دی الکترونیکي موانع‌یې فعاله کړې دي او اډې ته‌یې د هغه د داخلېدو مخه نیولې ده.

د 'اېف‌بي‌ای' په وینا، دغه وسله‌وال د پېښې په ځای کې ساه ورکړې او ټپي شوې مېرمن روغتون ته انتقال شوې ده.

'اېف‌بي‌ای' د برید کوونکي په اړه نور جزئیات نه‌دي ورکړي، خو دا خبره‌یې کړې ده چې دا یوه ترورېستي حمله وه.

د متحده ایالاتو د عدلیې وزارت په خبرپاڼه کې راغلي چې له 'اېف‌بي‌ای' سره یوځای کار کوي ترڅو دا موضوع روښانه شي.

د ورځې تازه خبرونه دلته ولولئ

پاکستان د افغانستان لپاره یو ډیپلومات خپل ځانګړی استازی وټاکه

د افغانستان لپاره د پاکستان ځانګړی استازی محمد صادق خان

د پاکستان حکومت د محمد صادق خان په نوم یو ډیپلومات د افغانستان لپاره ځانګړی استازی مقرر کړی دی.

د پاکستان راډیو د راپور په حواله، د پاکستان د بهرنیو چارو وزیر شاه محمود قریشي له محمد صادق سره کتلي او ورته ویلي یې دي چې په سیمه کې پرمختګ په افغانستان کې له دوامدارې سولې او ثبات سره تړاو لري.

د پاکستان د بهرنیو چارو وزیر ویلي چې دوي دا مسئله خپل ګډ مسئولیت ګڼلی او صادقانه یې رغونکی رول لوبولی او دا هڅې یې په نړیواله کچه ستایل شوې هم دي.

د پاکستان د بهرنیو چارو وزیر ویلي، دوي هیله لري چې د محمد صادق خان په څېر پوخ ډیپلومات به په افغانستان کې په دې حساس وخت کې د دواړو هېوادونو اړیکې لا پیاوړي کړي.

محمد صادق خان څو کاله مخکې په افغانستان کې د پاکستان د سفیر په توګه هم دنده ترسره کړې ده.

قزاقستان کې د دوو سیاسي ډلو لسګونه پلویان نیول شوي

د قزاقستان ډیموکراتیک ګوند او د قزاقستان ډیموکراتیک انتخاب ګوند د هغه هېواد په لویو ښارونو ، نورسلطان او الماتې کې د مظاهرو پلان درلود.

په قزاقستان کې د اپوزېسیون د دوو سیاسي ډلو لسګونه پلویان نن، د جون په ۶مه، ونیول شول.

د اپوزېسیون دوو ډلو چې یوه یې د افراطي ګروپونو په ډله کې تر بندیزونو لاندې ده، غوښتل چې نن، د جون په ۶مه، د دې هېواد په دوو لویو ښارونوکې مظاهرې وکړې او د ډیموکراتیکو اصلاحاتو غوښتنه وکړي.

د قزاقستان ډیموکراتیک ګوند او د قزاقستان ډیموکراتیک انتخاب ګوند د هغه هېواد په لویو ښارونو ، نورسلطان او الماتې کې د مظاهرو پلان درلود.

خو چارواکو په دې نوم چې د کرونا ویروس پر ضد د مبارزې لپاره دوا پاشي کوي، هلته لويې لارې او سرکونه بند کړل.

واشنګټن کې یوه ودانۍ 'د تور پوستو ژوند هم مهم دی' په نوم ونومول شوه

ارشیف، امریکا کې د تور پوستي جورج فلوید له وژنې وروسته مظاهرې

د واشنګټن ډي سي ښاروال یوه ودانۍ په دې هیواد کې د ولسي اعتراض په نوم نومولې ده.

د راپورونو له مخې د واشنګټن ښاروال موریل بوسر، په امریکا کې د وروستیو اعتراضونو څخه د ملاتړ په خاطر یوه پلازه "د تورو پوستو ژوند مهم دی" په نوم نومولې ده.

په عین حال کې یو شمېر اعتراض کوونکو، دا شعار د واشنګټن د ښار پر بیرغ ترسیم کړی دی.

د یو سپین پوستي پولیس له‌خوا د تور پوستي جورج فلوید تر وژل کېدو وروسته، په امریکا کې د هغه څه پر ضد چې د تور پوستو سره د پولیسو ناسم چلند ګڼل کېږي، پراخ اعتراضونه راپورته شول.

په یوه وېډیو کې چې له دې پېښې وروسته لاس په لاس کېږي، پولیس په‌کې ښکاري چې د لاس تړلي او پړمخي غورځول شوي جورج فلوید پر غاړه‌یې زنګون ایښی. فلوید وروسته د ساه بندېدو له کبله روغتون کې ومړ.

ویل کېږي چې دې پېښې، د کرونا ویروس خپرېدو او د میلیونونو کسانو له بېکاره کېدو سره یوځای، د امریکا ولسمشر ډونالد ټرمپ د نومبر د ولسمشرۍ له انتخاباتو څو میاشتې مخکې له لویې ننګونې سره مخ کړی دی.

ټرمپ د جون د میاشتې په لومړیو کې خبرداری ورکړی چې د اعتراضونو د مهارولو لپاره به د امریکا پوځ ځای پر ځای کړي.

ډونالد ټرمپ زرګونه امریکايي سرتېرو ته له جرمني د وتلو امر کړی

د جرمني په یوه پوځي اډه کې امریکايي پوځیان

د امریکا ولسمشر ډونالد ټرمپ امر کړی چې د دې هېواد زرګونه سرتېري دې له جرمني ووځي.

د وال سټریټ ژورنال ورځپاڼې د جمعې په ورځ په یو راپور کې ویلي، په جرمني کې د امریکايي ځواکونو شمېر به له ۳۴،۵۰۰ څخه ۹،۵۰۰ ته راکم شي.

له بلې خوا د جرمني شپیګل انلاین ورځپاڼې خبر ورکړی چې دا پرېکړه به د دې کال په مني کې عملي شي او په جرمني کې به د امریکايي سرتېرو شمېر د ۵،۰۰۰ او ۱۵،۰۰۰ ترمنځ یو شمېر ته راکم شي.

ډونالد ټرمپ پرله‌پسې پر جرمني انتقاد کړی چې په ناټو کې یې دوه په سلو کې د مالي ونډې ژمنه نه‌ده پر ځای کړې.

د روېټرز خبري اژانس د امریکايي چارواکو له قوله چې نومونه‌یې نه‌دي یاد شوي، راپور ورکړی چې د دې هېواد یو شمېر ځواکونه به له جرمني پولنډ او نورو متحدو هېوادونو ته واستول شي. د روېټرز په وینا یو شمېر به بېرته امریکا ته ستانه شي.

د هغې هوکړې پر بنسټ چې په ۱۹۵۴ م کال کې لاسیک شوه، امریکا او د ناټو اوو نورو هېوادونو د دې اجازه ترلاسه کړه چې په جرمني کې دایمي پوځي اډې ولري.

تر اوسه پنټاګون یا د جرمني د دفاع وزارت د امریکايي سرتېرو د کمېدو په اړه تبصره نه‌ده کړې.

د افریقا په شمال کې د القاعدې مشر ووژل شو

د افریقا په شمال کې د القاعده مشر امیر عبدالملک دروکدل

د فرانسې دفاع وزیره فلورینس پارلي وايي، په شمالي افریقا کې د القاعده شبکې مشر په مالي کې د عملیاتو پر مهال وژل شوی دی.

مېرمن پارلي پر ټویټر په یوه بیان کې لیکلي چې د فرانسې پوځي ځواکونو د خپلو متحدانو په ملاتړ په اسلامي مغرب کې د القاعده امیر عبدالملک دروکدل او د هغه څو تنه نږدې ملګري د مالي په شمال کې وژلي دي.

دروکدل چې په الجزایر کې زېږېدلی و د توارېګ توکمو وسله‌والو جهادي ډلو په هغو عملیاتو کې ګډون درلود چې د مالي شمال له درېیو دوه برخې یې ونیولې چې وروسته بیا د فرانسې پوځ مداخله وکړه او دا وسله‌وال یې په ۲۰۱۳ کال کې له سیمې وایستل.

خو دا وسله‌وال وروسته بیا سره یوځای شول او د خپل نفوذ ساحه‌یې بیا پراخه کړه.

د اسلامي مغرب القاعده د مالي په شمال او همداراز په نایجر، موریتانیا او الجزایر کې فعالیت کوي.

'د ایران له لوري غني شوي یورانیم له ټاکلې اندازې اته ځلې زیاته ده'

د اصفهان ولایت په نطنز ښار اټمي دستګاه کې نوي "ای‌ار-۸" سانترفیوژونو

د ملګرو ملتونو د اټمي انرژۍ د څار اداره (IAEA) وايي، ایران د غني شویو یورانیمو د زېرمو زیاتولو ته تر هغې کچې چې په ۲۰۱۵ کال کې ورته ټاکل شوې وه، په زیات توپیر دوام ورکوي.

دې ادارې په خپل نوي راپور کې چې پرون خپور شو، ویلي دي چې د مې میاشتې له ۲۰مې نېټې راهیسې په ټیټه کچه د ایران د غني شویو یورانیمو کچه ۱،۵۷۱ اعشاریه ۶ کیلوګرامو ته رسېږي چې د ۲۰۱۵ کال په اټمي موافقه کې له ټاکلې اندازې څخه اته ځلې زیاته ده.

په دې موافقه کې ایران منلې وه چې د نړیوالو بندیزونو د نرمولو په بدل کې به خپل اټمي فعالیتونه محدودوي، خو امریکا په ۲۰۱۸ کال کې له دې موافقې ووتله او پر دې هېواد یې بیا بندیزونه ولګول.

د اټمي انرژۍ نړیوالې ادارې په یوه جلا راپور کې، له دې کبله چې تهران خپلو دوو اټمي تأسیساتو ته د نړیوالو مفتشانو ورتګ ته اجازه نه‌ده ورکړې اندېښنه ښودلې ده.

دا هغه ساحې دي چې د اټمي انرژۍ نړیواله اداره وايي ایران ښايي هلته هغه اټمي مواد زېرمه کړي وي چې نړیوالو څارونکو ته‌یې اعلان کړي نه‌دي.

د امریکايي او پولنډي سرتېرو پوځي تمرینات پیل شول

ارشیف، پولنډي سرتېري د پوځي تمریناتو پر مهال.

زرګونه امریکايي او پولنډي پوځیانو پرون ګډ پوځي تمرینات پیل کړل.

دا تمرینات اصلاً د مې میاشتې لپاره پلان شوي وو، خو د کرونا ویروس د خپرېدو له کبله تر اوسه ځنډېدلي وو.

په دې تمریناتو کې چې د پولنډ په شمال کې روان دي او د جون میاشتې تر ۱۹ مې نېټې پورې به دوام وکړي شاوخوا څلور زره امریکايي او دوه زره پولنډي سرتېري ګډون لري.

د دواړو هېوادونو پوځي چارواکو په یوه انلاین خبري غونډه کې د خبرو پر مهال وویل، د امریکا او پولنډ ګډ پوځي تمرینات له ډېرو اړخونو اهمیت لري، خو تر ټولو زیات اهمیت‌یې په دې کې دی چې ښيي د ناټو متحدان د 'کووېډ-۱۹' ناروغۍ د سرایت په شرایطو کې د خوندي تمریناتو وړتیا لري.

چک جمهوریت د روسیې د سفارت دوه کارکوونکي د «نامطلوبو» اشخاصو په توګه اعلان کړل

د چک صدراعظم اندري بابیش

د چک جمهوریت صدراعظم وايي حکومت یې په پراګ کې د روسیې د سفارت دوه کارکوونکي د نامطلوبو اشخاصو په لیست کې شامل کړل.

اندري بابیش نن په پراګ کې یوه خبري کنفرانس ته وویل، دا اقدام د مسمومولو د هڅو له کبله شوی دی.

خو وروسته دا یو ناسم خبر وبلل شو، چې علت یې د سفارت د کارکوونکو ترمنځ اختلافات وبلل شول.

د چک صدراعظم اندري بابیش وویل:

«په پراګ کې د روسیې د سفارت دوه کارکوونکي د نامطلوبو اشخاصو په توګه اعلان کړای شول.»

لومړی د چک جمهوریت په رسنیو کې دا خبر داسې خپور شو، چې د روسیې د سفارت د ساینس او کلتور د مرکز مشر اندري کونچاکوف له روسیې څخه د راسین په نوم زهرجن مواد راوړي دي.

په راپورونو کې ویل شوي وو، چې په پام کې وه، په دغو موادو د مارچ میاشتې په نیمايي کې د پراګ ښاروال زدینیک هژیب او د ښاروالۍ دوه نور مهم چارواکي مسموم کړای شي.

مسکو دا پېښه، چې د دواړو هېوادونو ترمنځ یې کړکېچ رامنځته کړی، جعلي خبر بللی دی.

په امریکا کې د جورج فلوید د وژل کېدو په اعتراض مظاهرې روانې دي

امریکا کې مظاهرې

د مدني حقونو فعالان، سیاستوال او پېژندل شوي شخصیتونه پرون د درېیم وار لپاره د مړه شوي تور پوستي جورج فلوید په یاد راغونډ شول.

۴۶ کلن فلوید د مې میاشتې پر ۲۵مه په میناسوتا ایالت کې د پولیسو په توقیف کې ساه ورکړه چې دې مسئلې د امریکا په متحده ایالاتو کې د نژادي تبعیض او د پولیسو د ظلمونو پر خلاف مظاهرې وپارولې.

مدني فعال ريویریند الشارپټُن (Reverend Al Sharpton) د میناسوتا ایالت په مینیاپولیس ښار کې جوړې شوې یاد غونډې ته وویل، جورج فلوید نړۍ بدله کړه.

هغه زیاته کړه: "هغه څه چې پر فلوید پېښ شول، هره ورځ د امریکا په تعلیم او روغتیایي خدماتو، دغه‌راز د امریکايي ژوند په هره برخه کې پېښېږي. اوس د دې وخت راغلی چې ټول د جورج په نوم راولاړ شو او ووايو چې خپل زنګون زموږ له غاړو لیرې کړئ."

په نیویارک کې د جورج فلوید ورور تیرینس فلوید (Terrence Floyd) د خلکو ډلې ته په وینا کې د دوی د ملاتړ مننه وکړه.

په امریکا کې وروستۍ مظاهرې د ولسمشر ډونالد ټرمپ د ولسمشرۍ په دوره کې تر ټولو شدید بحران ګڼل کېږي.

دا په داسې حال کې ده چې په پام کې ده، په نومبر میاشت کې په امریکا کې د ولسمشرۍ ټاکنې وشي او له بلې خوا کرونا ویروس هم په میلیونونو کسان وزګاره کړي او اقتصاد یې زیانمن کړی دی.

روسیې د یوه برېښناکوټ مسؤل ونیوه

روسي چارواکو په سایبریا کې د حرارتي برېښنا د یوه برېښناکوټ یو مسؤل نیولی دی.

دا اقدام وروسته له هغې وشو چې تېره جمعه د دغه برېښناکوټ ۲۰ زره لیتره ډیزل ځمکې، یوه سمندرګي او دوو سیندونو ته توی شول.

دغه پېښه صنعتي ښار نورېلسک ته څېرمه شوې ده.

د کراسنو یارسک کرای محلي محکمې پرون امر وکړ چې د برېښناکوټ مسؤل، ویاچیسلاف ستاروستین دې د جولای میاشتې تر ۳۱مې نېټې تر محاکمې مخکې په توقیف کې وساتل شي.

دی د ژوند چاپېریال له مقرراتو په سرغړونې او ناغېړۍ تورن شوی دی.

د روسیې ولسمشر ولادیمیر پوتین د دې پېښې د عواقبو د څېړنې لپاره په سیمه کې اضطراري حالت اعلان کړی دی.

په قرغزستان کې نوی اتحاد تشکیل شو

په قرغزستان کې ګڼو سیاسي ګوندونو او غورځنګونو د «نوې ساه» په نوم نوی اتحاد تشکیل کړ.

دوی په پام کې لري، په ګډه په هغو پارلماني ټاکنو کې برخه واخلي چې اکټوبر میاشت ته پلان شوې دي.

د پلار وطن، سپین باز، لبرال ډیموکرات، سوسیال ډیموکرات د ځوانانو انجمن او زرغون اتحاد ترمنځ د دغه ستراتېژیک شراکت تفاهم‌لیک نن جمعه لاسلیک شو.

د تفاهم‌لیک تر لاسلیک وروسته د دغو ګوندونو سیاستوالو وویل، د اتحاد عمده هدف‌یې له ټولو سیاسي ګوندونو او مدني ټولنې سره همکاري ده.

قرغزستان په منځنۍ اسیا کې یوازنی هېواد دی چې انتخابات په‌کې په ډیموکراتیک ډول ترسره کېږي.

د قرغزستان سوسیال ډیموکرات ګوند چې دا مهال په پارلمان کې اکثریت څوکۍ لري، په وروستیو کې سره پاشل شوی او اپوزېسیون ته‌یې لاره پرانیستې چې په ټاکنو کې لاسته راوړنې ولري.

امریکا کې د وژل شوي جورج فلوید په یاد مراسم

د جورج فلوید د یاد مراسم

په امریکا کې مدني فعالانو، سیاستوالو او هنرمندانو د پنجشنبې په ورځ (د جون په څلورمه نېټه) د جورج فلوید، د یاد په مراسمو کې ګډون وکړ.

۴۶ کلن فلوید هغه تور پوستی امریکايي وو چې تېره اوونۍ د پولیسو په توقیف کې مړ شو او له هغه راهیسې په دې هېواد کې د نژادي بې‌عدالتۍ پر وړاندې پراخ لاریونونه پيل شول.

فلويد د مینیسوتا ایالت په مینیاپولیس ښار کې د مې په ۲۵مه مړ شو او د پنجشنبې ورځې یادغونډه‌یې هم په همدې ښار کې جوړه شوه.

د فلويد د کورنۍ مدافع وکیل ویلي چې په درې ایالتونو کې به شپږ ورځې د ده په یاد کې مراسم جوړ شي. د مراسمو لپاره دوه نور ایالتونه شمالي کارولینا او تکزاس یاد شوي دي.

د فلوید د مړینې پر ضد ځيني مظاهرې په تاوتریخوالي اووښتي، خو د جون په درېيمه سوله‌ییز لاریونونه وشول.

په مینیسوتا ایالت کې محکمې درې نور پولیس افسران هم په دوهمه درجه قتل کې په مرسته کولو تورن کړي.

د دې قضیې پر مرکزي تورن، ديریک چاوین د دوهمې درجې قتل تور دی چې په نتيجه کې يې په ۴۰ کاله بند محکومېدای شي.

چک جمهوریت کې په کرونا ویروس د اخته کسانو شمېر ۹،۴۴۱ ته رسېدلی

ارشیف

د چک جمهوريت د روغتیا وزارت ویلي چې په دې هېواد کې کرونا ویروس د ټولو اخته کسانو شمېر ۹،۴۴۱ دی. په دغو کې ۲،۳۶۵ کسان اوس هم په کرونا ویروس اخته دي او ۶،۷۵۲ رغېدلي دي.

د روغتیا وزارت د پنجشنبې په ورځ د دغو معلوماتو ترڅنګ دا هم وویل چې په چک جمهوریت کې په کرونا ویروس اخته ۳۲۴ کسان مړه شوي دي.

د دې هیواد د روغتیا وزارت وویل چې له اروپايي ټولنې هېوادونو به چک اتباعو ته اجازه وي چې د جون له ۱۵مې وروسته پرته له محدودیته خپل هېواد ته سفر وکړای شي، خو هغه کسان چې له بریتانیا او سویډنه بېرته چک جمهوریت ته ستنېږي، باید د کرونا ویروس منفي معاینات په لاس کې ولري.

د بلاروس ولسمشر د دفاع په برخه کې پخوانی چارواکی صدراعظم وټاکه

د بلاروس صدراعظم ۴۶ کلن رامان ګولوف چینکو

د بلاروس ولسمشر الکساندر لوکاشینکا د دفاع په برخه کې پخوانی چارواکی د صدراعظم په توګه ټاکلی دی.

لوکاشینکا دا اقدام تر ولسمشریزو انتخاباتو دوه میاشتې وروسته کړی.

۴۶ کلن رامان ګولوف چینکو (Raman Golovchenko) پخوانی ډیپلومات دی چې د دولت د نظامي صنعتي کمېټې مشر وو او د جون په څلورمه نېټه د صدراعظم په توګه وټاکل شو.

دا یوه ورځ وروسته له هغه چې مخکېنی صدراعظم سیارهې روماس (Syarhey Rumas) له خپلې دندې ګوښه کړای شو.

کارپوهان وايي چې د دفاع په برخه کې د تجربه لرونکي پخواني چارواکي د ټاکنې هدف د لوکاشینکا د واک ټینګول دي.

ویل کېږي لوکاشینکا به د شپږم ځل لپاره د اګسټ د شپږمې انتخابات هم وګټي. دغه ۶۵ کلن بلاروسي مشر پر بلاروس له تېرو ۲۵ کالونو راهیسې واکمني کړې ده.

د ده منتقدین وايي چې حکومت‌یې خپلواکې رسنۍ نه‌زغمي او له ۱۹۹۴م کال راهیسې چې ده واک ترلاسه کړ، هېڅ انتخابات له لوېدیځو معیارونو سره سم نه‌دي ترسره شوي.

د بشر حقونو پلویان هانګ کانګ کې د تیانمین قتل عام یاد مراسم جوړوي

هانګ کانګ

د بشري حقونو او ډیموکراسۍ یو شمېر پلویان او فعالان په هانګ کانګ کې نن د جون ۴مه، د تیانمین څلور لارې د قتل عام په یاد په مختلفو سیمو کې ځانګري مراسم جوړوی.

په تېرو ۳۱ کلونو کې به دا اول وار وي چې د تیانمین څلور لارې د قتل عام په یاد عمومي مراسم لغوه کېږي.

په چین کې یو شمېر کارګرانو، محصلانو او زده‌کوونکو په ۱۹۸۹ میلادي کال کې د پیکېنګ په تیانمین څلور لارې کې د ډیموکراتیکو بدلونونو او په ادارو کې د فساد د مخنیوي لپاره مظاهره وکړه او په ټول چین کې یې د مظاهرو څپه راپورته کړه، خو تر اووه اوونیو مظاهرو وروسته، د چین کمونېست رژیم د تیانمین څلور لارې ته ټانکونه، عسکر او زغره‌وال موټر ورواستول او اور یې ورباندې بل کړ.

داسې ګڼل کېږي چې د جون په درېیمه او څلورمه پر مظاهره‌چیانو په ډزو کې زرګونه کسان وژل شوي دي.

خو په چین کې خلک د دې پېښې په اړه د خبرو اجازه نه‌لري او د چین حکومت دا ورځ رسماً نه‌یادوي.

نور راوښيه

XS
SM
MD
LG