د لاسرسۍ وړ لېنکونه

تازه خبر
جمعه ۱۶ غبرګولی ۱۳۹۹ کابل ۰۶:۱۷

افغانستان

امنیتي چارواکي: بلخ کې ۴ طالبان وژل شوي

ارشیف

شاهین قول اردو د بلخ ولایت په چاربولک ولسوالۍ کې په یو هوايي برید کې د ۴ طالب وسله والو د وژل کېدو خبر ورکوي.

د ۲۰۹ شاهین قول اردو ویاند حنیف رضايي رسنیو ته په استولي غږیز پیغام کې ویلي چې دا برید پرون ماسپښین شوی.

هغه ویلي: "د چاربولک ولسوالۍ په خان آباد سیمه کې د ترهګرو طالبانو پر سنګرونو یوه هوايي حمله هغه مهال وشوه چې دوی غوښتل هلته تروریستي فعالیتونه ترسره کړي."

وسله والو طالبانو تراوسه د دې ادعا په دې اړه رسنیو ته څه نه دي ویلي.

د ورځې تازه خبرونه دلته ولولئ

په فراه ولایت کې ۱۶ وسله‌وال طالبان په وسله‌واله نښته کې وژل شوي

ارشیف

د فراه ولایت امنیتي چارواکي وايي په وسله‌واله نښته کې ۱۶ وسله‌وال طالبان وژل شوي دي.

د امنیه قوماندانۍ ویاند محب‌الله محب نن جمعه ازادي راډیو ته وویل: "د دولت وسله‌والو مخالفانو چې ډېری یې د طالبانو د سرې قطعې غړي وو، تېره شپه شاوخوا یوه بجه غوښتل د مرکز په مربوطاتو کې د امنیتي ځواکونو پر پوستو ډله‌ییز بریدونه وکړي. له نېکه مرغه د افغانستان امنیتي او دفاعي ځواکونو د هوايي ځواک په مرسته د طالبانو سنګرونه ویشتلي په نتیجه کې یې ۱۶ طالبان وژل شوي او ۵ تنه‌یې ټپیان شوي دي."

د امنیه قوماندانۍ ویاند وايي په وژل شویو کې د طالبانو یو مهم قوماندان مولوي راز محمد هم شامل دی.

محب‌الله محب وايي په دغه نښته کې ملکیانو او امنیتي ځواکونو ته زیان نه‌دی اوښتی.

وسله‌والو طالبانو د دې پېښې په اړه څه نه‌دي ویلي.

افغانستان کې تېرو ۲۴ ساعتونو کې تر ۹۰۰ زیات کسان په کرونا اخته شوي

افغان-جاپان روغتون کې په کرونا ویروس اخته کس

د افغانستان روغتیا وزارت وايي په تېرو ۲۴ ساعتونو کې په هېواد کې په کرونا ویروس د ۹۱۵ نورو کسانو د اخته کېدو راپور ورکړل شوی دی.

دغه وزارت نن په یوه معلوماتي پاڼه کې ویلي، په دې موده کې ۹ کسان مړه شوي او ۱۷۸ تنه نور روغ شوي دي.

له دې سره په افغانستان کې په کرونا ویروس د اخته کسانو شمېر نږدې ۱۹،۰۰۰ ته رسېدلی دی. په افغانستان کې په ټوله کې له کرونا ویروس څخه ۱،۷۶۳ تنه روغ شوي دي.

د روغتیا وزارت مرستیال ویاند توحید شکوهمند نن سهار ازادي راډیو ته وویل، په هېواد کې د کرونا ویروس مثبتې پېښې په زیاتېدو دي.

د روغتیا وزارت د معلوماتو له مخې د کرونا ویروس ډېری مثبتې پېښې په کابل کې ثبت شوې دي.

راپورونه وايي په هرات ولایت کې هم د کرونا ویروس پېښې په زیاتېدو دي.

د دغه ولایت د روغتیا ریاست نن په یوه اعلامیه کې وویل چې په تېرو ۲۴ ساعتونو کې په هرات کې د کرونا ویروس ۲۰۰ نورې مثبتې پېښې ثبت شوې دي.

له دې سره په هرات کې په کرونا ویروس د اخته کسانو شمېر تر ۳،۴۰۰ زیات شوی دی.

په زابل کې تر ۱۰ زیات پولیس وژل شوي

د افغانستان نقشه کې زابل ولایت

د زابل ولایت په مرکز کلات ښار کې نن سهار د وسله‌والو طالبانو په کمین کې تر ۱۰ زیات پولیس وژل شوي دي.

د زابل د امنیه قوماندانۍ یوه امنیتي سرچینه چې نه‌غواړي نوم‌یې خپور شي ازادي راډيو ته په دغه پېښه کې د ۱۵ پولیسو د وژل کېدو خبر تأییدوي.

بل‌خوا د زابل د ولایتي شورا رئیس عطا جان حق‌بیان د وژل شویو پولیسو شمېر ۱۰ تنه یاد کړ او ویې‌ویل پولیسو غوښتل د سړک وضعیت وارزوي.

ښاغلی حق‌بیان زیاتوي: "هغوی د سړک د چک او امنیت لپاره راوتلي وو چې د طالبانو له کمین سره مخامخ شول، دوه هاموې موټرونه‌یې سوځول شوي او زموږ ۱۰ سرتېري شهیدان شوي دي."

حق‌بیان وايي په دغه پېښه کې وسله‌والو طالبانو ته هم تلفات رسېدلي، خو دقیق شمېر یې نه‌دی معلوم.

وسله‌والو طالبانو تر اوسه په دې اړه څه نه‌دي ویلي.

امریکايي ځواکونه وايي پر طالبانو یې دوه هوايي حملې کړي

ارشیف

په افغانستان کې امریکايي ځواکونه وايي پر افغان قواوو یې د وسله‌والو طالبانو د تنظیم شویو حملو د شنډولو لپاره ۲ هوايي حملې کړې دي.

د امریکايي ځواکونو ویاند ساني لګېت نن په ټویټر کې لیکلي چې وسله‌والو طالبانو پرون غوښتل د افغان امنیتي او دفاعي ځواکونو پر پوستو حمله وکړي.

په بیان کې د پېښې د دقیق ځای او اوښتې مرګ‌ژوبلې په اړه څه نه‌دي ویل شوي.

د ښاغلي لګېت په خبره وسله‌وال طالبان باید د هغې موافقې له مخې چې له امریکا سره‌یې لاسلیک کړې، خپل تاوتریخوالی کم کړي او پرې دې ږدي چې د سولې پروسه پر مخ لاړه شي.

د امریکايي ځواکونو ویاند وايي دا د کوچني اختر په درېیو ورځو کې تر اوربند وروسته د طالبانو پر ضد د دوی لومړۍ هوايي حملې دي.

د بهرنیو چارو وزارت وايي په ایران کې د افغان کډوالو مرګ‌ژوبله څېړي

راپورونه وايي تر پېښې وروسته هغه موټر چې افغان وګړي په‌کې روان وو، اور اخیستی دی.

د افغانستان د بهرنیو چارو وزارت وايي په ایران کې د ټرافیکي پېښې په نتیجه کې افغانانو ته د اوښتې مرګ‌ژوبلې موضوع څېړل کېږي.

دغه وزارت نن په یوه اعلامیه کې ویلي چې د ایران لپاره د افغانستان سفیر عبدالغفور لېوال د ایران په یزد کې د پېښې ځای ته روان شوی چې د ټپیانو د پوښتنې ترڅنګ د موضوع په اړه خپل تحقیقات پوره کړي.

په یزد کې وړمه ورځ په یوه ټرافیکي پېښه کې ۳ افغان وګړي مړه شوي او ۴ تنه نور ټپیان شوي دي.

راپورونه وايي تر پېښې وروسته هغه موټر چې افغان وګړي په‌کې روان وو، اور اخیستی دی.

مچ مک‌کانل: امریکا باید افغانستان کې کافي حضور ولري

مچ مک‌کانل

د امریکا په سنا جرګه کې د اکثریت جمهوري غوښتونکو مشر مچ مک‌کانل وايي، امریکا باید له ترورېزم سره د مبارزې لپاره په افغانستان کې کافي حضور ولري.

مچ مک‌کانل دا خبره پرون د پنجشنبې په ورځ (د جون په څلورمه نېټه) د خپل هېواد سنا جرګې ته وکړه.

ده زیاته کړه: "موږ باید په افغانستان کې کافي حضور ولرو چې د داعش، القاعده او حقاني شبکې پر ضد خپله ستراتېژیکه پياوړتیا خوندي وساتو. موږ باید په افغانستان کې کافي حضور، ځکه هم ولرو چې هلته د عراق او سوریې برخلیک تکرار نه‌شي."

ښاغلي مک‌کانل زیاته کړه: "پر طالبانو باور نه‌شي کېدای چې له القاعده شبکې او نورو ترورېستي ډلو سره به اړیکې قطع کړي. ده وویل، امریکا باید له افغان حکومت سره مرسته وکړي چې که طالبان خپلې ژمنې عملي نه‌کړي، حکومت‌یې له پایلو سره مخامخ کړي."

د امریکا او طالبانو ترمنځ د فبرورۍ په ۲۹مه نېټه د لاسلیک شوې موافقې له مخې به طالبان له القاعده او نورو ترورېستي ډلو سره خپلې اړیکې قطع کوي. همدارز به امریکا په افغانستان کې د جولای میاشتې تر نیمايي پورې د خپلو ځواکونو شمېر ۸،۶۰۰ ته کموي او د ۲۰۲۱ م کال تر مې میاشتې پورې به خپل ټول ځواکونه له افغانستان باسي، خو د ناټو او امریکايي چارواکو په وینا، امریکا له مخکې لا په افغانستان کې د خپلو ځواکونو شمېر ۸،۶۰۰ ته کم کړی دی.

دا په داسې حال کې ده چې په افغانستان کې د طالبانو او داعش ډلې حملې دوام لري، په وروستي مورد کې د کابل پر یوه جومات په حمله کې د جومات د مولوي په ګډون دوه کسان ووژل شول او اته نور ټپیان شول.

د دې حملې مسؤلیت پرون د پنجشنبې په ورځ داعش ډلې ومانه.

ناروې: د افغان سولې خبرو ته د زمینې برابرولو په برخه کې هڅې کوو

(ښی) د ناروې د بهرنیو چارو وزیره اینه اریکسون سوریده او (کین) د افغانستان د بهرنیو چارو سرپرست وزیر محمد حنیف اتمر

د ناروې د بهرنیو چارو وزیرې اینه اریکسون سوریده د افغانستان د سولې له بهیر سره د خپل هېواد پر ملاتړ ټينګار کړی.

د افغانستان د بهرنیو چارو سرپرست وزیر محمد حنیف اتمر پرون د پنجشنبې په ورځ د وېډيو کنفرانس له لارې له مېرمن سوریده سره خبرې وکړې.

مېرمن سوریده وویل چې هېواد به‌یې په هر ډول حالاتو او شرایطو کې له افغانانو سره ولاړ پاته شي.

د دې په وینا ناروې د سولې خبرو ته د زمینې برابرولو په برخه کې هڅې کوي.

د افغانستان د بهرنیو چارو وزارت سرپرست محمد حنیف اتمر د سولې په بهیر کې د نړیوالې ټولنې د رول او د بین‌الافغاني خبرو د پیل په اړه هیله څرګنده کړې ده.

د امریکا او طالبانو ترمنځ د فبرورۍ میاشتې د موافقې له مخې ټاکل شوې وه بین‌الافغاني خبرې د مارچ په ۱۰مه پیل شي، خو طالبانو دا مذاکرات د افغان حکومت له زندانونو د پنځو زرو طالب بندیانو له خلاصون سره تړلي دي.

تر دې مخکې د افغانستان د سولې لپاره د امریکا ځانګړي استازي زلمي خلیل‌زاد په یوه ټویټ کې ویلي و چې ناروې د مذاکراتو د تسهیل په برخه کې مخکښه ده او دا هېواد کولای شي سولې ته په رسېدو کې له افغانستان سره مرسته وکړي.

حشمت فنايي خاورو ته وسپارل شو

په افغانستان کې د سینما او تیاتر پېژندل شوی هنرمند حشمت فنايي

په افغانستان کې د سینما او تیاتر پېژندل شوی هنرمند حشمت فنايي نن د جون په ۴مه، خاورو ته وسپارل شو.

هغه پرون مړ شوی و.

د هغه زوی، مسعود فنايي له ازادي راډیو سره په مرکه کې وویل چې پلار یې د 'کووېډ-۱۹' ناروغۍ له کبله مړ شوی دی.

د افغانستان د تیاتر او سینما زیاتو کارکوونکو د فنايي پر مړینه خواشیني څرګنده کړې ده.

هغه په ډېرو فلمونو او تیاتري نندارو کې کار کړی و.

امر‌الله صالح: زما د کورنۍ او دفتر تر نیمايي زیات غړي کرونا نیولي

د افغانستان ولسمشر لومړی مرستیال امر الله صالح

د افغانستان د ولسمشر مرستیال امرالله صالح پر خلکو غږ وکړ چې د کرونا ویروس دې بابېزه نه‌ګڼي.

امرالله صالح نن د جون په ۴مه، پر فېس‌بوک په یوه پیغام کې لیکلي چې د افغانستان حکومت د کرونا ویروس پر ضد د مبارزې لپاره له خپلو ټولو سرچینو کار اخلي، خو له دې ویروسه هېڅ‌څوک هم په امن کې نه‌دي.

امرالله صالح لیکلي چې د خپلې کورنۍ او دفتر تر نیمايي زیات غړي یې کرونا ویروس نیولي دي.

د افغانستان عامې روغتیا وزارت مکرراً پر خلکو غږ کوي چې له کرونا ویروسه د ځان ساتلو لپاره دې له نورو خلکو لیرې واوسي، د امکان تر حده دې له کورونو نه‌وځي او لاسونه دې مکرراً په صابون پرېمینځي.


قره‌باغ ولسوالۍ کې چاودنې ۱ ملکي وګړی وژلی او ۵ تپیان دي

ارشیف

د کابل په قره‌باغ ولسوالۍ کې د ماین په چاودنه کې یو ملکي وګړی نن د جون په ۴مه، ووژل او پنځه ملکي وګړي زخمیان شوو.

د قره‌باغ ولسوال محمد حنیف صدیقي ازادي راډیو ته وویل چې ماین پر بایسکل ايښی او د ریموټ کنټرول په وسیله د ولسوالۍ په بازار کې چاودلی دی.

پولیسو په دې اړه څېړنې پيل کړي او د قره‌باغ ولسوال ویلي چې هدف‌یې نه‌دی څرګند او مسؤلیت‌یې هم چا نه‌دی اخیستی.

کابل کې نن د مولوي ایاز نیازي د جنازې مراسم ترسره کېږي

مشهور افغان دیني عالم مولوي محمد ایاز نیازی کابل کې د بمي چاودنې له امله ووژل شو

په کابل کې نن د جون ۴مه، د مولوي ایاز نیازي د جنازې مراسم ترسره کېږي.

مولوي ایاز نیازی د وزیر محمد اکبر خان مېنې د جومات ملا و.

هغه د سې شنبې په ماښام تر لمانځه وروسته، له جوماته د وتلو په وخت کې په چاودنه کې ووژل شو.

په چاودنه کې یو شمېر نور ملکي وګړي هم چې جومات ته د لمانځه لپاره ورغلي وو، ووژل او زخمیان شوو.

د مولوي ایاز نیازي قتل وسله‌والو طالبانو غندلی او یو جنایت‌یې بللی دی.

د حملې مسئولیت لا کومې ډلې نه‌دی اخیستی.

د هرات حوزوي روغتون ۶۰ سلنه کارکوونکي په کرونا ویروس اخته شوي

ارشیف

د هرات حوزوي روغتون مسئولان وایي، د دوی ۶۰ په ۱۰۰ کې کارکوونکي په 'کووېډ- ۱۹' ناروغۍ اخته شوي دي.

د روغتون سرطبیب محمد عارف جلالي وایي، له همدې کبله دوی د روغتیایي کارکوونکو له کمښت سره مخ شوي او که د کرونا پیښې زیاتې شي، روغتیایي خدمتونه به ټکني شي.

د هرات حوزوي روغتون شااوخوا زر تنه کارکوونکي لري.

د دغه روغتون د سوځېدنې څانګې ټول کارکوونکي کرونا نیولي، حال دا چې د مسؤلینو په خبره د انتاني څانګې سم نیمایي او د داخلې او جراحي څانګو ۳۰ سلنه پرسونل دا ویروس لري.

د هرات روغتیایي مسؤلان اوس لاس په کار شوي چې په رضاکاره ډول روغتیایي کارکوونکي وګماري.

چین له افغانستان سره د روغتیایي وسایلو او خوراکي موادو مرسته کوي

حنیف اتمر سره په کابل کې د چین سفیر لیدنه

چین ژمنه وکړه چې له افغانستان سره به د کرونا ویروس د مبارزې په خاطر د روغتیایي وسایلو او خوراکي موادو مرستې وکړي.

دا ژمنه په کابل کې د چین سفیر وانګ یوو د افغانستان د بهرنیو چارو له سرپرست وزیر محمد حنیف اتمر سره پرون د کتنې پر مهال په کابل کې وکړه.

پیکنګ دا ژمنه په داسې حال کې کړې ده چې په افغانستان کې د کرونا ویروس مثبتې پېښې تر ۱۷ زرو اوښتې دي.

د عامې روغتیا وزارت مرستیال وحید مجروح پرون په کابل کې رسنیو ته د تېرو ۲۴ ساعتونو په ترڅ کې د مثبتو پېښو په اړه معلومات ورکړل.

دی وايي: "۷۵۸ مثبت واقعیات تثبیت شوي ۲۴ وطنوالو ژوند له لاسه ورکړی او ۷۸ تنه جوړ شوي دي. په مجموعي توګه تر اوسه په افغانستان کې ۱۷،۲۶۱ مثبتې پېښې لرو، ۲۹۴ وفات شوي او ۱،۵۲۲ جوړ شوي دي."

تېره میاشت په افغانستان کې د کرونا مثبتې پېښې تر زرو لږ اوښتې وې چې د چین د ۷۰۲ ټنه روغتیایي وسایلو مرسته کابل ته ورسېده.

د چین سفیر ونه‌ویل چې د پیکنګ نوې مرسته به څومره وي او کله به کابل ته رسېږي.

غني د عامې روغتیا، ښار جوړولو او ښځو وزارتونو سرپرستان معرفي کړل

د افغانستان ولسمشر محمد اشرف غني

د افغانستان ولسشر محمد اشرف غني د عامې روغتیا، ښار جوړولو او ښځو چارو وزارتونو ته سرپرستان رسماً معرفي کړل.

محمود کرزی د ښارو جوړولو د سرپرست وزیر په توګه، محمد جواد عثماني د عامې روغتیا سرپرست وزیر په توګه او حسینه ساپۍ د ښځو چارو سرپرست وزیرې په توګه معرفي شوي دي.

دا کسان پرون ناوخته معرفي شول او په ورته وخت کې اجمل احمدي د افغانستان بانک رئیس وټاکل شو.

وروسته تر دې چې د مارچ په ۹مه، اشرف غني د ولسمشر په توګه د لوړې مراسم ترسره کړل، له بل کاندید عبدالله عبدالله سره اختلافات د دې باعث شول چې د وزیرانو ټاکنه وځنډېږي.

له ډاکتر عبدالله سره د مې په ۱۷مه د سیاسي توافق تر لاسلیک وروسته دا د څو سرپرست وزیرانو د رسمي معرفي لومړی ګام دی.

د کابل امنیت لپاره د ګډو ځواکونو عمومي قومانداني پرانیستل شوه

ارشیف

د کابل د امنیت لپاره د ګډو ځواکونو عمومي قومانداني د چهارشنبې په ورځ پرانیستل شوه.

په دې قوماندانۍ کې د امنتي او دفاعي ځواکونو ارګانونه شامل دي چې د کورنیو چارو د وزارت، د ملي دفاع وزارت او د ملي امنیت د عمومي ریاست یو یو استازی به‌یې د مرستیال په توګه چارې مخته وړي، مشر یې د کابل امنیه قوماندان امان‌الله واحدي ټاکل شوی دی.

چارواکي وایي چې ګډه قومانداني به د امنیت د ټینګښت او د قانون د تنفیذ لپاره هڅې کوي او له جرمونو سره به مبارزه کوي.

دا عمومي قومانداني په داسې وخت کې جوړه شوې ده چې د کابل په ښار کې جرمونه زیات شوي او خلک شکایت لري.

نور راوښيه

XS
SM
MD
LG