د لاسرسۍ وړ لېنکونه

تازه خبر
دوشنبه ۱۱ کب ۱۳۹۹ کابل ۰۲:۲۶

افغانستان

چارواکي: بلخ کې هوايي حملې تر ۱۰ زیات وسله‌وال طالبان وژلي

ارشیف، هوايي حمله

د بلخ ولایت امنیتي چارواکي وايي د ملي اردو په یوه هوایي حمله کې تر ۱۰ زیات وسله‌وال طالبان وژل شوي دي.

د بلخ امنیه قوماندان سمونوال اجمل فائز نن سهار ازادي راډیو ته وویل، دغه حمله تېره شپه د بلخ ولسوالۍ په غونډان سیمه کې شوې ده.

امنیه قوماندان وايي په پېښه کې ۱۱ نور وسله‌وال طالبان ټپیان شوي هم دي.

ښاغلی فائز وايي، په دې حمله کې هغه درې ملکیان هم وژل شوي چې له طالبانو سره‌یې همکاري کوله.

ذبیح‌الله مجاهد چې ځان د وسله‌والو طالبانو ویاند معرفي کوي، په یوه اعلامیه کې ویلي، دغه حمله د قومي مشرانو پر یوه جلسه شوې او ادعا لري چې په پېښه کې ۱۶ ملکیانو ته مرګ‌ژوبله اوښتې ده.

د ازادي راډیو خبریال وايي په بلخ ولسوالۍ کې په لسګونه کسان په اعتراض راغونډ شوي او ادعا لري چې د ملي اردو په دې هوايي حمله کې د طالبانو ترڅنګ ۹ تنه ملکیان هم وژل شوي دي.

د ورځې تازه خبرونه دلته ولولئ

زلمي خلیلزاد کابل کې له افغان چارواکو سره لیده کاته پيل کړل

د افغانستان د ملي مصالحې عالي شورا مشر عبدالله عبدالله او د افغان سولې لپاره د امریکا ځانګړي استازي زلمي خلیلزاد نننۍ لیدنه

د افغانستان د سولې لپاره د امریکا ځانګړی استازی زلمی خلیلزاد کابل ته رسېدلی او له افغان چارواکو سره‌یې لیده کاته پيل کړي دي.

د ملي مصالحې عالي شورا مشر عبدالله عبدالله ویلي، ده له خلیلزاد او د هغه له ټیم سره د سولې پر بهیر، د دوحې پر مذاکراتو، د امریکا پر روانې بیاکتنې او راتلونکو ګامونو خبرې کړې دي.

عبدالله څو شېبې وړاندې پر خپله ټویټرپاڼه ولیکل "موږ د تاوتریخوالي د بېړني پای ته رسولو او د سولې خبرو ته د سرعت ورکولو غوښتنه بیا وکړه".

د امریکا د بهرنیو چارو وزارت په یوه خبرپاڼه کې ویلي، ښاغلی خلیلزاد به دوحې او یو شمېر نورو پلازمېنو ته هم سفر وکړي.

خلیلزاد یو کال وړاندې له طالبانو سره په دوحه کې افغانستان ته د سولې راوستلو تړون لاسلیک کړ.

افغان دولت د دوحې هوکړه ګټوره نه‌بولي او ویلي یې دي، دغې هوکړې له وخت ضایع کولو پرته افغانانو ته بل څه نه‌‍دي ورکړي.

طالبان بیا دا هوکړه ګټوره بولي او وایي، امریکایي لوری باید پرې ودرېږي.

زلمی خلیلزاد دوحې، کابل او یو شمېر نورو ښارونو ته تازه سفر پيلوي

د افغان سولې لپاره د امریکا ځانګړی استازی زلمی خلیل‌زاد

د افغانستان د سولې لپاره د امریکا ځانګړی استازی زلمی خلیلزاد دوحې، کابل او یو شمېر نورو ښارونو ته تازه سفر پيلوي.

دا خبره د امریکا د بهرنیو چارو وزارت پرون په یوه خبرپاڼه کې کړې ده.

خبرپاڼه کې راغلي، خلیلزاد به له افغان چارواکو، مشرانو، طالب استازو او د هغو هېوادونو له چارواکو سره خبرې له سره پيل کړي چې د افغانستان په عادلانه او دوامداره سیاسي جوړجاړي او دایمي او هر اړخیز اوربند کې یې ګټې نغښتې دي.

خلیلزاد یو کال وړاندې په دوحه کې د طالبانو له مرستیال او د سیاسي دفتر له مشر ملا عبدالغني برادر سره (افغانستان ته د سولې راوستلو) په نوم د دوحې هوکړه لاسلیک کړه.

د نوموړي دا سفر داسې مهال پیلېږي چې افغان دولت د دوحې هوکړه ګټوره نه‌بولي او ویلي یې دي، دغې هوکړې له وخت ضایع کولو پرته افغانانو ته بل څه نه‌دي ورکړي.

طالبان بیا دا هوکړه ګټوره بولي او وایي، امریکایي لوری باید پرې ودرېږي.

چین له افغانستان سره د کرونا ضد دوه لکه دوزه نور واکسین مرسته کوي

د چین کرونا ویروس ضد سینوفارم واکسین

د افغانستان عامې روغتیا وزارت وایي، چین پرون ورسره د نورو کرونا ضد دوه لکه دوزه واکسین د مرستې ژمنه وکړه.

دا خبره د دې وزارت مرستیال ویاند میرویس عليزي تېره شپه ازادي راډیو ته وکړه او ویې‌ویل: "د چین سفیر چې د افغانستان د عامې روغتیا له وزیر سره ناسته درلوده، له افغانستان سره‌یې د ۲۰۰ زره نورو واکسینو د مرستې ژمنه وکړه چې په دې سره د هغو واکسینو چې چین‌یې له افغانستان سره د مرستې ژمنه کوي، څلور لکه دوزو ته رسېږي."

له دې مخکې د کواکس نړیوال ائتلاف هم له افغانستان سره د درې ملیون دوزه واکسین د مرستې ژمنه کړې ده.

د علیزي په وینا تر اوسه پورې یې له اتو زرو زیاتو کسانو ته د کرونا ضد واکسین لومړي دوزه ورکړي دي.

دا د استرازینیکا د واکسین هغه پنځه لکه دوزه دي چې هند له افغانستان سره مرسته کړې ده.

ترکیه او افغانستان د خپلو ډیپلوماتیکو اړیکو سلمه کلیزه لمانځي

د افغانستان او ترکیې بیرغونه

ترکیه او افغانستان په خپلو کې د ډیپلوماتیکو اړیکو سلمه کلیزه لمانځي.

د هغې اعلامیې له مخې چې د ترکیې د بهرنیو چارو وزارت پرون یکشنبې خپره کړې، ویل شوي چې د ترکیې د بهرنیو چارو وزیر مولود چاوش اوغلو به نن دوشنبه په انقره کې د افغانستان له سفیر امیر محمد رامین سره په ګډه د دې سفارت په انګړ کې نیالګي چې د دواړو هېوادونو د ملګرتیا سمبول دی، کېنوي.

د ترکیې د انادولیا خبري اژانس د راپور له مخې اوغلو به له هغې وروسته د وېډیو کنفرانس له لارې له کابل سره په دې مناسبت جوړو شویو مراسمو ته چې د هغه سیال د افغانستان د بهرنیو چارو وزیر حنیف اتمر به هم په‌کې ګډون کوي، وینا وکړي.

د افغانستان او ترکیې ترمنځ ډیپلوماتیکې اړیکې د ۱۹۲۱ کال د مارچ په لومړۍ نېټه د دواړو هېوادونو ترمنځ د یوه ائتلاف د تړون په لاسلیک کېدو سره ټینګې شوې.

ترکیه هم لومړنی هېواد و چې په ۱۹۱۹ کال د افغانستان له خپلواکۍ وروسته‌یې په کابل کې سفارت پرانیست.

د راپور له مخې افغانستان هم دوهم هېواد دی چې هغه مهال چې ترکیې د خپلواکۍ لپاره جګړه مخ ته وړله د ترکیې عالي ملي اسامبله‌یې په رسمیت پېژندلې وه.

د ښځو عالي شورا خپله لومړۍ غونډه په ارګ کې وکړه

ارګ کې د ښځو عالي شورا لومړۍ غونډه

د ښځو د عالي شورا لومړۍ غونډه پرون یکشنبه په ارګ کې جوړه شوه.

د ولسمشرۍ ماڼۍ په یوه ټویټ کې ویلي چې په دې غونډه کې چې ولسمشر اشرف غني او د هغه مېرمنې رولا غني حضور درلود، د دې شورا د فعاليتونو د څرنګوالي، د سولې پروسې او له جمهوريت څخه د ملاتړ په اړه له ښځو سره د مشورتي ناستو راپور وړاندې شو.

په دې اړه نور جزئیات نه‌دي ورکړل شوي، خو تر دې څه موده وړاندې د ولسمشرۍ ماڼۍ په خپله وېب‌پاڼه کې ویلي وو، د ښځو عالي شورا به ۲۶ دايمي غړي لري چې دولتي ادارې، د ښځو د حقونو مدافع بنسټونه، مدني ټولنې او نور د ښځو چارو اړوند لوري به په‌کې شامل وي.

د جمهوري ریاست په وینا په افغانستان کې د ښځو د عالي شورا له رامنځته کېدو هدف دا دی چې د یو لړ نورو مسایلو په ګډون چې د ښځو په ژوند کې بدلون راوستی شي، ښځې پیاوړې شي، حقونه‌یې خوندي او پراختیا ورکړل شي.

د افغانستان کرکټ ملي لوبډله سبا له زېمبابوې سره د لوبو لړۍ پيلوي

ارشیف، د افغانستان د کرکټ ملي لوبډله

د افغانستان د کرکټ ملي لوبډله به سبا سې شنبه د زېمبابوې د کرکټ له ملي لوبډلې سره د دوو ټېسټ لوبو او درې ۲۰ اووره لوبو مسابقې پیل کړي.

د افغانستان کرکټ بورډ وايي د دغو لوبو لپاره‌یې ښه چمتووالی نیولی دی.

د کرکټ بورډ ویاند فرید هوتک ازادي راډیو ته وویل: "د افغانستان او زېمبابوې د کرکټ ملي لوبډلو ترمنځ به په متحده عرب اماراتو کې د افغانستان په کوربه‌توب دوه ټېسټ لوبې وشي. د ویلو ده چې د دغو لوبو لپاره د افغانستان د کرکټ ملي لوبډله پوره چمتووالی لري."

د افغانستان او زېمبابوې ترمنځ به لومړۍ ۲۰ اووره مسابقه د مارچ میاشتې پر ۱۷مه وشي.

غزني کې چاودنې یو کس وژلی او ۷ نور یې ټپیان کړي

ارشیف، عکس تئزیني بڼه لري

د غزني چارواکي وايي، یوې چاودنې نن یکشنبه (د کب ۱۰مه) یو کس وژلی او ۷ نور یې ټپیان کړي دي.

د والي ویاند واحدالله جمعه زاده ازادي راډیو ته وویل، چادونه نن تر غرمې وروسته د لومړۍ امنیتي حوزې اړوند په کلا سبز سیمه کې شوې ده.

هغه زیاته کړه چې د سړک غاړې دې ماین چاودنه کې وژل شوی کس ملکي وګړی دی او د ۷ ټپيانو په منځ کې دوه پوځیان او پاتې نور ملکیان دي.

جمعه زاده وویل، ښايي د مرګ ژوبلو شمېر ځکه لوړ لاړ شي چې شااوخوا د کورونو او ودانیو ښېښې ماتې شوي دي.

د پېښې پړه لا تر اوسه کومې وسله والې ډلې نه ده منلې.

په جوزجان کې د ۱۴ پرمختیایي پروژو کار بشپړ شو

د افغانستان په نقشه کې د جوزجان ولایت

په جوزجان کې د ۲۱.۴ میلیونه افغانیو په ارزښت د ۱۴ پرمختیایې پروژو کار بشپړ شو.

د کلیو بیارغونې او پراختیا وزارت ویاند محمد رفیق جنبش نن یکشنبه (د کب ۱۰مه) ازادي راډیو ته وویل چې د دغو پراختیایي پروژو په پلي کېدو سره سلګونو تنو ته د کار زمینه برابره شوې ده.

نوموړي وویل چې دې پروژو کې د ۶.۴۵ کیلومتره ښاري برېښنا د شبکې غځول، ۴.۱ کیلومتره د اوبو رسولو یوه شبکه، ۲۶ د اوبو ویشونکي، د څښاک د اوبو ۷ څاه ګانو کیندل شامل دي.

دغه وزارت وایې، له دغو پروژو ۴۳۲۸ کورنۍ برخمنې شوي.

نوموړي همدارنګه وویل چې د ۲.۱ متره استنادي دیوال جوړول، د ۸.۲ کیلومتره درېیمې درجې سړک جوړول. ۲ د برېښنا ټرانسفرمرونه لګول او د څښاک د اوبو د دوو زېرمو جوړول هم په دې پروژه کې شامل دي.

دوبۍ کې د ګلفوډ نندارتون پای ته ورسېد

دوبۍ

د متحده عربي اماراتو په دوبۍ کې د ګلفوډ نندارتون د څه باندې ۱۷۱ میلیونه ډالرو په ارزښت د کرنیزو محصولاتو د تړونونو په ترلاسه کولو پای ته ورسېد.

د کرنې او مالدارۍ وزارت ویاند اکبر رستمي نن یکشنبه (د کب ۱۰مه) ازادي راډیو ته وويل چې د تړونونو ډېره برخه له هندوستان سره دي چې ټولیزارزښت یې ۱۰۰ میلیونه ډالرو ته رسېږي.

په دغو تړونونو کې د څه باندې ۱۰۷ میلیونه ډالرو په ارزښت د وچې مېوې، د څه باندې ۴۳ میلیونه ډالرو په ارزښت مغزيات، د څه باندې ۱۳ میلیونه ډالرو په ارزښت طبي بوټي او دغه شان د تازه مېوو او شاتو په برخو کې بېلابېل تړونونه له سعودي عربستان، اماراتو او نورو هېوادونو سره شوي دي.

دغه څلور ورځنۍ نندارتون نن پای ته ورسېد.

په تېرو کلونو کې هم د «ګلفوډ» له کلني نندارتونه افغان سوداګر په ټولیزه توګه د نږدې ۱۰۰ میلیونه ډالرو په ارزښت تړونونه ترلاسه کړي وو، خو د کرونا وبا ترڅنګ سږ کال افغانستان لپاره د دغو تړونونو په کچه کې د پام وړ زیاتوالی راغلی دی.

افغاني الاصل سعیدي د جرمني د سوک وهنې د اتلولۍ کمربند ترلاسه کړ

یما سعیدي

یما سعیدي د جرمني د سوک وهنې د اتلولۍ کمربند ترلاسه کړ. دغه افغاني الاصله سوک وهونکي بېګا په لسو رونډونو کې خپل سیال تومي زیلنتون مات کړ.

سعیدي تر بریا وروسته په خپله فیسبوک پاڼه دا پیغام خپور کړ: "شکر خپله لوبه مې وګټله. د جرمني نړیواله اتلولي مې د بې ډې بې په سازمان کې ترلاسه کړه. ډېره هیجاني لوبه وه. لس رونډه لوبه مې وکړه. ډېر ښه سیال مې درلود. یوه نړۍ مننه ستاسو له دعاوو او له دې چې تل زما ملاتړ کوئ. بیا مو وکولای شوای چې د افغانستان بیرغ اوچت کړو او بریالي شو."

دا د سعیدي شلمه مسلکي لوبه وه.

لوبه د جرمني د حرفه يي سوک وهنې د سازمان بي ډي بي تر څار لاندې په برلین کې ترسره شوه.

سعیدي تر دې مخکې هم د جرمني او اروپا په کچه اتلولۍ ترلاسه کړي دي.

د امریکا او طالبانو تر منځ د دوحې د تړون یو کال پوره شو

په دوحه کې د امریکا او طالبانو ترمنځ شوی تړون

نن یکشنبه (د کب ۱۰مه) د امریکا او طالبانو تر منځ د دوحې د تړون یو کال پوره شو.

په دغه تړون کې په ځینو نورو مهمو مسئلو سربېره امریکا له افغانستانه د بهرنیو ځواکونو د ایستلو ژمنه ورکړې او په بدل کې یې له طالبانو غوښتي چې له ترهګرو سره اړیکې پرې کړي.

د امریکا نوې ادارې ویلي چې له طالبانو سره د ۲۰۲۰میلادي کال د فبروري ۲۹ تړون ارزوي او ګوري چې طالبان څومره په خپلو ژمنو ولاړ دي.

وسله والو طالبانو بیا د یوې اعلامیې په خپرولو سره ویلي چې دوی د دوحې تړون ته ژمن پاتېږي او له امریکا هم غواړي چې په خپلو ژمنو ودریږي.

هاخوا د افغانستان د ملي مصالحې د عالي شورا مرستیال عزیزالله دین محمد وايي، د همدغه تړون پر اساس د افغانانو تر منځ خبرې پيل شوې.

افغان حکومت او ځینو امریکايي چارواکو طالبان تورن کړي چې د دوحې د تړون پر خلاف یې په افغانستان کې بریدونه زیات کړي دي.

دفاع وزارت: بغلان کې د طالبانو د پوځي کمېسیون مرستیال وژل شوی

ارشیف، بغلان کې افغان امنیتي ځواکونه د عملیاتو پر مهال

د افغانستان دفاع وزارت په بغلان ولایت کې د طالبانو د پوځي کمېسیون د مرستیال د وژلو ادعا وکړه.

دغه وزارت نن یکشنبه(د کب ۱۰مه) په یوه اعلامیه کې ویلي چې د قاري زاهد الله په نوم د طالبانو د پوځي کمېسیون مرستیال چې د طالبانو د ګمرک مسوول هم و، پرون له دوو نورو وسله والو سره په نهرین ولسوالۍ کې د افغان امنیتي ځواکونو په هدفي حملو کې وژل شوي دي.

په دغو حملو کې د څلورو نورو وسله والو د ټپي کېدو، د دوی د یوې اندازې وسلې او مهماتو د تخریب خبر هم ورکړل شوی دی.

وسله والو طالبانو د دې پېښې په اړه تبصره نه ده کړې.

د روسیې د امنیت شورا: افغانستان کې د 'امارت' بېرته راتګ د منلو نه دی

ارشیف، ننګرهار یو شمېر طالب وسله وال

د روسیې د امنیت شورا منشي ویلي، په افغانستان کې "د امارت بېرته راتګ د منلو نه دی او دا له وخته مخکې ده چې د طالبانو نومونه له تورلېسته ووځي."

نیکولای پاتروشیوف دا خبرې د افغانستان د بهرنیو چارو له وزیر محمد حنیف اتمر سره د لېدو پر مهال په مسکو کې کړي دي.

د افغانستان د بهرنیو چارو وزارت د خبرپاڼې له مخې ښاغلي پاتروشیوف ویلي، تر هغو چې د سولې خبرو کې پرمختګ ونه شي، له وخته مخکې ده چې د طالبانو نومونه د ملګرو ملتونو له تور لېسته ووځي.

د پاتروشیوف دا خبرې د افغانستان لپاره د روسیې د ځانګړي استازي ضمیر کبلوف له وروستیو خبرو سره په ټکر کې دي، هغه ویلي و، طالبان له امریکا سره د دوحې تړون ته سل په سله ژمن پاتې شوي دي او باید امریکا له دې تړون په شا نه شي.‌

نوموړي همدا راز طالبان افغانستان کې یوه "ملي ډله" بللې او ادعا یې کړې چې د افغانستان تر نیمایي زیاته خاوره یې په کنټرول کې ده.

د کبلوف دغو خبرو چې له سپوټنیک خبري اژانس سره یې کړې وې د افغان حکومت غبرګون پارولی و.

جنرال سکاټ مېلر: د افغان ځواکونو لاسته راوړنې به له لاسه ونه وځي

په افغانستان کې د نړیوالو ځواکونو قوماندان جنرال سکاټ مېلر

په افغانستان کې د نړیوالو ځواکونو قوماندان وايي، د افغان امنیتي او دفاعي ځواکونو لاسته راوړنې به له لاسه ونه وځي.

جنرال سکاټ مېلر پرون شنبه(د کب ۹مه په یوه ویډیويي پیغام کې افغان ځواکونو ته د دوی د ملي ورځې د مبارکۍ په پيغام کې کړې ده.

نوموړي وویل: "زه غواړم ستاسې له هغو هڅو مننه وکړم چې د افغانستان اسلامي جمهوریت لپاره او په تېره بیا د افغانستان د خلکو لپاره یې کوی، ستاسې قربانۍ به له لاسه ونه وځي، د هېواد شاوخوا ته د سفر پر مهال اکثره اورم چې خلک پر تاسو څومره ویاړ کوي."

په افغانستان کې د نړیوالو ځواکونو عمومي قوماندان ویلي، دوی به د افغان ځواکونو ملاتړ ته دوام ورکوي.

پرون د کب پر نهمه د کابل په ګډون د افغانستان په ګڼو ولایتونو کې د سرتیري ملي ورځ ولمانځل شوه.

په لومړي ځل یوې پیلوټې له کابله هرات ته پرواز ترسره کړ

د افغانستان هوایي چلند ادارې په تاریخ کې د لومړي ځل لپاره کام ایر شرکت الوتنه، چې د الوتکې ټوله عمله ښځو ترسره کړه کابل_ هرات ته وشوه.

د افغانستان د ملکي هوایي چلند اداره وایي، د لومړي ځل لپاره یوې ښځینه پیلوټې له کابله هرات ته پرواز ترسره کړ.

دغې ادارې پرون شنبه(د کب ۹مه) په یوه خبرپاڼه کې ویلي چې دا پيلوټه محدثه میرزایي نومېږي او د کام ایر شرکت الوتکه یې د ښځینه عملې په ملتیا له کابله تر هراته بوتله.

دوی وایي، د اتیا دقیقو دغه هوایي مزل په بشپړ ډول د ښځو له خوا مدیریت شو.

د افغانستان هوایي چلند دا کار په دغه سکټور کې د ښځو پرمختګ یاد کړی او ویلي یې دي چې دوی دې برخه کې نورو کارونو ته هم ژمن دي.

نور راوښيه

XS
SM
MD
LG