د لاسرسۍ وړ لېنکونه

تازه خبر
سه شنبه ۸ غبرګولی ۱۴۰۳ کابل ۰۲:۱۰

افغانستان

د نړیوال بانک له‌خوا د افغانستان لپاره ۴۰۰ میلیون ډالري کڅوړه

نړیوال بانک
نړیوال بانک

ټاکل شوې چې د افغانستان ۴۰۰ میلیونه‌ ډالري تشویقې کڅوړه د منظورۍ لپاره د نړیوال بانک اجرائيوي بورډ ته وسپارل شي.

د مالیې وزارت ویاند شمروز مسجدي وايي، د نړیوال بانک له لوري د دغه تشویقي کڅوړې په تصویب سره افغانستان کولای شي چې د اصلاحي پروګرامونو د پلي کېدو لپاره ٢٠٠ میلیونه ډالر ترلاسه کړي.

نوموړي وویل چې د مالیې وزارت مالي مرستیال په دې تړاو د نړیوال بانک، د ملګرو ملتونو سازمان پراختیایي پروګرامونو او اسلامي پراختیایي بانک له استازو سره د یوې ناستې پر مهال خبرې کړې دي.

ښاغلی مسجدی وایي، په دې ناسته کې د نړیوال بانک مسؤلینو ویلي چې خپلې ټولې پروژې او پروګرامونه‌یې ارزولي او اړین پروګرامونه‌یې په پام کې نیولي دي.

د یادونې ده چې افغان حکومت ۴۰۰ میلیونه ډالره تشویقي کڅوړه د اصلاحاتو او د ٢٠٢٠ کال د ریفورمونو د تطبیق له امله په تشویقي ډول ترلاسه کړي چې د ملي بودجې له طریقه به لګول کېږي.

د ورځې تازه خبرونه دلته ولولئ

ډبلیو ایف پي: د ۳ میلیونه خوارځواکۍ ځپلو افغان ماشومانو یو میلیون سره مرسته کولای شوو

ارشیف
ارشیف

د خوړو نړیوال پروګرام WFP وايي، دا مهال درې میلیون افغان ماشومان په خوارځواکۍ اخته دي خو دوی له یوازې یو میلیون دې ماشومانو سره مرسته کولای شي.

د ملګرو ملتونو دې اړوندې ادارې نن پر خپله ایکس پاڼه ولیکل چې د افغانستان لپاره یې بودیجه تېرکال کمه شوه، خو په عین حال کې د دوی ۲۷۰۰ کلینیکونو ته د ماشومانو مراجعه هم زیاته شوې ده.

دا اداره په خپل بیان کې زیاتوي چې د دې مالي بحران ډېره برخه فشار د دې ماشومانو پر اوږد دی.

له بلې خوا د ماشومانو د ملاتړ اداره سېف دې چیلډرن وايي چې د افغانستان په هرو لسو ماشومانو کې درې یې سږکال له لوږې او سختۍ سره مخامخ دي چې ټول شمېر یې شپږنیم میلیون ته رسېږي.

یوشمېر نورو نړیوالو موسسو هم له دې مخکې په افغانستان کې د ماشومانو د وضعیت او په تېره د خوارځواکۍ د زیاتېدو له کبله اندېښنه ښودلې وه.

اوتونیایووا د دوحې د درېیمې غونډې یو شمېر بحث کیدونکي موضوعات روښانه کړي

روزا اوتونیایووا
روزا اوتونیایووا

باختر خبري آژانس چې طالبان یې اداره کوي د افغانستان لپاره د ملګرو ملتونو د ځانګړې استازې روزا اوتونیایووا له قوله خبر ورکوي چې نوموړې وايي، د دوحې په درېیمه غونډه کې به په افغانستان کې د خصوصي سکتور، بانکدارۍ او د مخدرو موادو پرضد د مبارزې پر مسایلو خبرې وشي.

په خبر کې راغلي دي چې مېرمن اوتونبایووا دا څرګندونې د طالبانو د حکومت د کرنې له سرپرست وزیر مولوي عطاالله عمري سره په کتنه کې کړې دي.

د باختر خبر زیاتوي چې ښاغلی عمري به په دوحه کې افغان بزګرانو ته د بدیل معیشت د برابرولو په چاره کې د نړیوالو موسسو د همکارۍ غوښتنه وکړي.

د افغانستان په اړه په دوحه کې راروانه غونډه په نژدې یوه میاشت کې جوړېږي.

طالبانو غور کې یوه ښځه او ۷ نارینه په دُرو ووهل

د افغانستان په نقشه کې غور ولایت
د افغانستان په نقشه کې غور ولایت

د طالبانو سترې محکمې ویلي په غور کې اته کسان چې یوه ښځه هم پکې شامله ده په دُرو وهل شوي او له ډلې یې ځینې په بند هم محکوم شوي.

دې محکمې پرون دوشنبه خبر ورکړ چې دا کسان د دوی په ټکو په زنا، لواطت او له کوره د تېښتې په جرمونو تورن وو چې د غور په مرکز فېروزه کوه ورزشي سټډیوم کې سزا ورکړل شوه.

د طالبانو سترې محکمې نه دي ویلي چې د تورونو د اثبات لپاره یې څه کړي او ایا تورنو کسانو د ځان د دفاع لپاره وخت او امکانات درلودل که څنګه؟

طالبان تورن دي چې له بیا واکمنېدو راهیسې یې لسګونو کسانو ته په بیلابیلو تورونو چې له ځینو یې په زور اقرار اخیستل شوی او مدافع وکیل ته له لاسرسي پرته په عام محضر کې سزاوې ورکړي.

طالبانو د فلسطین پر رفح ښار د اسراییل بریدونه وغندل

د افغانستان د بهرنیو چارو وزارت ودانۍ - ارشیف
د افغانستان د بهرنیو چارو وزارت ودانۍ - ارشیف

په رفح کې په ملکیانو د اسراییلو د مرګوني برید په اړه د نړیوالو غبرګونونو په دوام د طالبانو حکومت هم ویلي چې په ملکیانو د اسراییلو بریدونه په کلکه غندي.

د طالبانو د بهرنیو چارو وزارت پرون په یوه اعلامیه کې ویلي چې د اسراییلو رژيم د جګړې قوانینو ته ژمنتیا نه لري او ملګرو ملتونو او موثرو هېوادونو ته په کار ده چې مخه یې ونیسي.

په رفح باندې د اسراییلو د یکشنبې شپې په بریدونو کې لږ تر لږه ۴۵ کسان وژل شوي او د راپورونو له مخې سلګونه نور ټپيان دي.

ملګرو ملتونو، اروپايي ټولنې او عربي نړۍ دا بریدونه غندلي او له اسراییلو یې غوښتي چې په رفح کې عملیات ودروي.

د اسراییلو صدراعظم دا برید یوه غمجنه پېښه بللې او د څېړنو د پيل ژمنه یې کړې.

سیف دې چلډرن: له هرو ۱۰ افغان ماشومانو ۳ یې د ناورین د کچې لوږې سره مخ دي

بغلان کې یو شمېر سېلاب ځپلي ماشومان
بغلان کې یو شمېر سېلاب ځپلي ماشومان

د ماشومانو د ساتنې ادارې سیف دې چلډرن ویلي سږ کال په افغانستان کې له هرو لسو ماشومانو نژدې درې تنه یې د ناورین د کچې لوږې سره مخامخ دي.

دې ادارې دوشنبه په یوه اعلامیه کې ویلي د دغو ماشومانو ټول شمېر شپږنیم میلیونو ته رسیږي.

سیف دې چلډرن ویلي ماشومان د سېلونو، اوږدمهاله وچکالیو او له ګاونډیو هېوادونو د کډوالو د راستنېدو له امله سخت اغېزمن شوي.

د ماشومانو د ساتنې ادارې د بېلګې په توګه وروستیو سېلونو ته اشاره کړې چې لږ تر لږه ۴۰۰ کسان یې وژلي او یوه زیاته برخه ماشومان هم پکې شامل دي.

د روسیې د بهرنیو چارو وزیر طالبان د افغانستان "واقعي ځواک" بللی

د روسیې د بهرنیو چارو وزیر سیرګي لاوروف
د روسیې د بهرنیو چارو وزیر سیرګي لاوروف

د روسیې د بهرنیو چارو وزیر سیرګي لاوروف طالبان د افغانستان "واقعي ځواک" بللی دی.

رویټرز د روسیې د تاس خبري اژانس په حواله لیکلي، لاوروف نن دوشنبه دا هم ویلي چې مسکو ممکن طالبان د هغو سازمانونو له نوملړه لرې کړي چې د روسیې بندیزونه پرې لګېدلي دي.

د تاس په وینا، د روسیې وزیرانو ولسمشر ولادمیر پوتین ته سپارښتنه کړې چې طالبان د بندیزونو له نوملړه وباسي.

طالبان له ۲۰۰۳م میلادي کال راهیسې د روسیې له‌خوا د ترهګرو او ممنوعه ډلو په نوملړ کې دي.

د راپور له مخې مسکو طالبانو ته بلنه ورکړې چې راتلونکې میاشت په سن پیترسبورګ کې په یوه اقتصادي غونډه کې ګډون وکړي.

د ۲۰۲۱م کال په اوړي کې واک ته د طالبانو له بیا رسېدو او له افغانستانه د امریکایي ځواکونو له وتلو وروسته روسیې د طالبانو له حکومت سره د اړیکو جوړېدو هڅې کړې دي.

طالبانو د پاسپورټ ریاست د مشر عبدالکریم حسیب د توقیفېدو راپورونه رد کړي

په کابل کې د پاسپورټ ریاست یوه څنډه
په کابل کې د پاسپورټ ریاست یوه څنډه

د طالبانو د حکومت کورنیو چارو وزارت د پاسپورټ ریاست د مشر عبدالکریم حسیب د توقیفېدو راپورونه رد کړي دي.

له تېرو څو ورځو راهیسې د افغانستان ګڼو کورنیو رسنیو راپور ورکړی چې حسیب کندهار کې زنداني شوی دی.

د طالبانو کورنیو چارو وزارت نن دوشنبه رسنیو ته په لېږل شوې خبرپاڼه کې ویلي، د پاسپورټ ریاست مشر او د کورنیو او دفاع وزارتونو یو شمېر نور چارواکي کندهار ته غوښتل شوي چې د ننګرهار باریکاب کې د ځمکې پر سر د وروستیو لاریونونو په تړاو وضاحت ورکړي.

خبرپاڼه کې راغلي چې د پاسپورټ ریاست کې هیڅ کومه خبره نه‌شته او د پاسپورټ د وېش چارې عادي روانې دي.

واک ته د طالبانو له بیا رسېدو وروسته د افغانستان د پاسپورټونو وېش په یوې جنجالي او اوږدې پروسې بدل شوی او وخت نا وخت یې افغانان د پیچلي بهیر او په کې د شته ستونزو په تړاو شکایتونه کوي.

په کابل کې په زړه سوري ۱۵ ماشومان تر درملنې لاندې دي

یوه افغانه مور او ماشومه یې په یوه روغتون کې - له ارشیفه
یوه افغانه مور او ماشومه یې په یوه روغتون کې - له ارشیفه

افغاني سرې میاشتې ټولنې په کابل کې په وړیا توګه د پنځلسو هغو ماشومانو درملنه پیل کړې چې زړونه یې سوري دي.

باختر خبري اژانس چې د طالبانو تر واک لاندې دی نن دوشنبه د سرې میاشتې په حواله ویلي چې دغه ماشومان د کابل په روغتونونو کې تداوي کېږي.

د تېرې غويي میاشتې په ۲۹مه د سرې میاشتې ټولنې له قطر سره په همدې تړاو د مرستې د یوې هوکړې پر مهال ویلي وو چې په تېرو دو کلونو کې یې د څه باندې درې زره په زړه سوري ماشومانو درملنه کړې.

له قطر سره د هوکړې له مخې، دغه هېواد د زړه په ناروغیو د اخته ۱۶۹ ماشومانو د درملنې ژمنه کړې ده.

د سرې میاشتې ټولنه وایي، لا هم د زړه په ناروغیو اخته زرګونه افغان ماشومان د درملنې په تمه دي.

قطري او سویډني چارواکو د افغانستان، غزې او اوکراین په اړه خبرې کړي

د قطر بیرغ
د قطر بیرغ

د قطر د نړیوالو همکاریو وزیرې لولوه بن راشد الخاطر د سویډن د نړیوالې پراختیا او بهرنۍ سوداګرۍ له وزیر یوهان فورسیل سره د افغانستان په اړه خبرې کړي دي.

د قطر دې چارواکې په ایکس پاڼه یا پخواني ټویټر کې لیکلي چې دواړو خواوو د افغانستان، غزې او اوکراین په اړه بحثونه کړي.

دا غونډه په داسې حال کې کېږي چې ملګري ملتونه په پام کې لري چې د جون له ۳۰مې د جولای تر لومړۍ د قطر په پلازمېنه دوحه کې د افغانستان په اړه د لوړې کچې غونډه جوړه کړي.

په دې غونډه کې د افغانستان لپاره د بېلابېلو هېوادونو ځانګړي استازي ګډون کوي.

د قطر او ملګرو ملتونو چارواکو هم د طالبانو د حکومت له چارواکو سره کتلي او هغوی ته یې په دې غونډه کې د ګډون بلنه ورکړې ده.

طالب چارواکي وايي چې په دې غونډه کې د ګډون لپاره يې ځينې شرطونه وړاندې کړي دي.

د قطر د ناستې هدف له افغانستان سره په لا همغږي او منسجم ډول د نړیوالې ټولنې د تعامل زیاتوالی یاد شوی.

یونېسف هره ورځ ۲۲زرو سېلاب ځپلو افغانانو ته پاکې اوبه رسوي

یونېسف افغانستان د دې عکس په خپرولو لیکلي چې هره ورځ څه باندې ۲۲زرو کسانو ته په ټانکرونو کې پاکې اوبه وړي او هر کس ته شاوخوا ۱۵ لیتره اوبه رسېږي.
یونېسف افغانستان د دې عکس په خپرولو لیکلي چې هره ورځ څه باندې ۲۲زرو کسانو ته په ټانکرونو کې پاکې اوبه وړي او هر کس ته شاوخوا ۱۵ لیتره اوبه رسېږي.

یونېسف وايي، د ورځې ۲۲زرو کسانو ته په سېلاب ځپلو سیمو کې پاکې اوبه رسوي.

د ملګرو ملتونو د ماشومانو وجهي صندوق یا یونېسف په خپله ایکس‌پاڼه لیکلي چې په افغانستان کې وروستیو سېلابونو د اوبو رسولو ګڼې شبکې له منځه یوړلې چې ورسره ګڼې کورنۍ د څښاک پاکو اوبو، پخلي او ځان مینځلو لپاره له اوبو بې برخې شول.

یونېسف افغانستان د یوه عکس په خپرولو لیکلي چې هره ورځ څه باندې ۲۲زرو کسانو ته په ټانکرونو کې پاکې اوبه وړي او هر کس ته شاوخوا ۱۵ لیتره اوبه رسېږي.

سېلابونو د افغانستان په ګڼو ولایتونو له هغې ډلې بغلان، غور او فاریاب کې سلګونو کسانو ته مرګ‌ژوبله اړولې او لسګونه زره کسان یې اغېزمن کړي چې یوه لویه برخه له دې خلکو د څښاک پاکو اوبو او کافي خوړو ته لاسرسی نه لري.

نور راوښيه

XS
SM
MD
LG