د لاسرسۍ وړ لېنکونه

تازه خبر
سه شنبه ۷ سلواغه ۱۳۹۹ کابل ۰۴:۵۱

نړۍ

د اسلام د عالمانو عالي شورا: خلک دې په خپلو کورونو کې لمونځ وکړي

ارشیف

د اسلام د عالمانو عالي شورا د کرونا ویروس د مخنیوي په هدف په خلکو غږ کړی چې د روژې په میاشت کې دې په خپلو کورونو کې لمونځ وکړي او جوماتونو ته دې نه ورځي.

د سعودي عربستان دولتي اژانس پرون د یادې شورا له قوله راپور خپور کړی چې مسلمانان باید له غونډو ډډه وکړي ځکه د طبي راپورونو په اساس غونډې د کرونا ویروس د خپرېدو یو عمده دلیل بلل کېږي.

د نړۍ ارتودوکس مسیحیان هم چې تر کاتولیکانو لږ څه په ځنډ خپل اختر یا ایستر لمانځي پرون دا مراسم د ټلویزیون او انټرنېټ له لارې په انلاین شکل وکتل.

د جان هاپکنز پوهنتون د شمېرو له مخې کرونا ویروس په ټوله نړۍ کې دوه میلیون او درې لکه او دوه اتیا زره کسان نیولي او څه باندې ۱۶۵ زره یې مړه کړي.

امریکا چې د نړۍ یو پر درېیمه برخه په کرونا ویروس اخته خلک پکې دي پرون د ویروس د خپرېدو د یو څه کمېدو خبره وکړه.

د نیویارک والي اندریو کومو وویل چې په نیویارک کې د دې ویروس ګراف مخ په ځوړ دی.

نیویارک د کرونا ویروس له لاسه په ټوله امریکا او ښايي ټوله نړۍ کې ډېر ځپل شوی ښار دی.

ترکیې هم پرون ځینې تازه ارقام خپاره کړل چې دا هېواد یې په کرونا ویروس د اخته خلکو د شمېر په لحاظ څو پلې پورته یووړ.

هلته د تازه شمېرو له مخې شپږ اتیا زره کسان په کرونا اخته دي.

د ورځې تازه خبرونه دلته ولولئ

جوبایډن په روسیه کې د اعتراضونو پر ځپلو اندېښنه څرګنده کړې

د روسي ځواکونو له لوري د اعتراض کوونکو د ځپلو يوه صحنه

د امریکا ولسمشر جوبایډن په روسیه کې د اپوزیسیون د مشر الکسي ناوالني او د حکومت ضد اعتراضونو پر ځپلو اندېښنه څرګنده کړې.

په ټوله روسیه کې د ناوالني د نیول کېدو پرضد له پراخو اعتراضونو وروسته بایډن پرون- دوشنبې وویل، چې له دې کبله خورا اندېښمن دی خو هغه زیاته کړه چې امریکا او روسیه د اټومي وسلو د کنټرول په چاره کې همکارۍ ته اړتیا لري.

د راپورونو له مخې د دې اعتراضونو پرمهال د ناوالني له ۳۷۰۰ زیات پلویان نیول شوي دي.

اروپايي ټولنې هم د کرېملېن پرضد د اعتراضونو ځپل غندلي دي.

د دې ټولنې د بهرنیو اړیکو د شورا مشر ژوزیپ بورېل پرون په بروکسل کې خبریالانو ته وویل: "د ناوالني نیول او د هغه د پلویانو ځپل د اروپايي شورا لپاره د منلو وړ نه دي. اروپايي شورا د اونۍ په پای کې د خلکو ډله ییز نیول او د پولیسو بېرحمي وغندله. موږ پر روسيې غږ کوو چې ښاغلی ناوالني او نور نیول شوي کسان خوشې کړي."

په روسیه کې د حکومت ضد اعتراضونه وروسته له هغه پیل شول، چې د اپوزیسیون مشر الکسي ناوالني تېره اونۍ له جرمني تر راستنېدو وروسته په هوايي ډګر کې ونیول شو.

ناوالني په زهري مواد له مسمومېدو وروسته د علاج لپاره جرمني ته تللی و.

"جنېت یلین" د امریکا د خزانې د وزیرې په توګه تایید شوه

جنېت یلین

د امریکا سنا پرون د رایو په اکثریت جنېت یلین د خزانې د وزیرې په توګه تایید کړه.

د امریکا په تاریخ کې دا لومړی ځل دی چې یوه مېرمن پر دې دنده ګومارل کېږي.

مېرمن یلین د ۱۵ منفي رایو پر وړاندې په ۸۴ مثبتو رایو تایید شوه.

نوموړې ته به په امریکا کې چې د څو لسیزو له ترټولو سخت اقتصادي بحران سره مخامخ ده د اقتصادي ثبات د راوستو دنده ور له غاړې وي.

مېرمن یلین مخکې له دې د فدرال حکومت د زېرمو د مشرې او د سپینې ماڼۍ د اقتصادي سلاکارانو د شورا د مشرې په توګه دنده ترسره کړې ده.

د امریکا سنا ته د ډونالډ ټرمپ د استیضاح وړاندیز وشو

ډونالډ ټرمپ

د امریکا د استازو جرګې پرون د ډونالډټرمپ د استیضاح وړاندیز سنا ته وړاندې کړ او له دې سره یې په سنا کې د پخواني ولسمشر د دوهم ځل محاکمې لپاره اقدام وکړ.

په دې سند کې چې پرون د سنا په غونډه کې ولوستل شو، ټرمپ د پاڅون په پارولو تورن شوی دی.

له دې مخکې د استازو جرګې د استیضاح مسوولو چارواکو دا سند د کانګرس په هغو سالونونو کې وګرځاوه چې د جنوري په شپږمه د ټرمپ پلویانو یرغل پرې وکړ.

ټرمپ د همدې پېښې په تور چې په نتیجه کې یې د یوه پولیس افسر په ګډون پنځه کسان ووژل شول، په سنا کې استیضاح او محاکمه کېږي.

د مقرراتو له مخې د استیضاح بهیر باید سنا ته د دې سند له رسېدو سره سم پیل شي، خو د سنا مشرانو په دې مقرراتو کې پر بدلون موافقه وکړه او دا کار یې د فبروري په اتمه نېټه تر پیلېدونکې اونۍ پورې وځنډاوه.

د کریمې بلوچ مړی په بلوچستان کې خاورو ته وسپارل شو

د کریمه بلوچ انځور

د بلوڅانو یوه فعاله چې د دغه اقلیت لپاره یې مبارزه کوله، پرون په بلوچستان ایالت کې خاورو ته وسپارل شوه.

پرون د پلوچستان په تُمپ سیمه کې د کریمې بلوچ د مړي د ښخولو لپاره کلک امنیتي تدابیر په پام کې نیول شوي وو.

هغه چې په کاناډا کې اوسېدله د ډسمبر پر ۲۱ مه په تورنتو ښار کې لادرکه شوه یوه ورځ وروسته یې مړی وموندل شو.

د کریمې بلوچ ملاتړي ادعا کوي، چې هغه د پاکستان د استخباراتي ادارې له خوا وژل شوي، خو پاکستاني چارواکو دا تور نه دی تایید کړی.

کریمه بلوچ چې د کریمې محراب په نامه هم پېژندل کېدله، په پاکستان کې د ورکو بلوڅانو لپاره یو کمپاین چلاوه.

ایران د سګنال په نوم د پیغامونو استولو اپلکېشن او سایټ فلټر کړی

ارشیف

د پیوست په نوم د ایران یوې خپرونې راپور ورکړی چې ایران د سګنال په نوم د پیغامونو استولو اپلکېشن او سایټ فلټر کړی دی.

دغې میاشتنۍ خپرونې پرون راپور ورکړ، چې اوس خلک په ایران کې له فلټرماتوونکو سافټویرونو پرته د سګنال په نوم اپلکېشن او ویبسایټ نه شي کارولی.

پرون تر دې مخکې د انټرنټي شبکو یوې څارونکې ډلې ویلي وو، داسې ښکاري چې ایران د سګنال اپکېشن بندول پیل کړي دي.

د ایران چارواکو د سګنال اپ د بندولو د پرېکړې په اړه په عامه څرګندونې نه دي کړي.

وروسته له هغې چې د واټس اپ د محرمیت په پالیسۍ کې یو لړ بدلونونه راغلل او له مخې یې واټس اپ په حقوقي لحاظ اجازه لري د استفاده کوونکو معلومات له اړوند شرکت فېسبوک سره شریک کړي، ګڼو ایرانیانو د پیغامونو استولو د بل اپلکېشن سګنال کارولو ته مخه کړه.

د ګوګل کمپنۍ کارکوونکي په ټوله نړۍ د کارګرانو اتحادیه جوړوي

ګوګل

د ګوګل کمپنۍ کارکوونکي په ټوله نړۍ کې د کارګرانو اتحادیه جوړوي.

دا اقدام وروسته له هغې کېږي چې د ګوګل او د هغه بل اړوند شرکت الفابت ځینو څانګو څو اوونۍ مخکې د امریکا د متحدو ایالتونو او کاناډا د دفترونو لپاره د کارګرانو یو اتحادیه جوړه کړه.

د الفا ګلوبل په نوم دغه اتحادیه د UNIپه نوم له نړیوالې کارګري اتحادیې سره په هغږۍ ایجاد شوې، چې د نړۍ په سطحه د شا و خوا ۲۰ ملیونه کارګرانو استازیتوب کوي.

UNIوايي، د امریکا تر څنګ، د جرمني، سویس، سویس او بریتانیا کارګري اتحادیې هم په کې شاملې دي.

د دې اتحادیې سرمنشي مېرمن کریستي هوفمن وویل، په الفابت شرکت کې ستونزې چې د همدې شرکت زېږنده دي، په یوه هېواد پورې نه محدودېږي، بلکې په نړیواله سطحه یې باید په وړاندې اقدام وشي.

الفابت شرکت د دغو څرګندونو په اړه تبصره نه ده کړې.

نړیوالې کارګري اتحادیې پر ګوګل تور لګولی چې پر جنسي ځورونو او نورو ناوړه استفادو سترګې پټوي.

د بې پولې خبریالانو ټولنې د پاکستاني چارواکو وروستى بربنډ سانسور غندلی

آرشیف

د بې پولې خبریالانو ټولنې د پاکستاني چارواکو هغه بربنډ سانسور غندلی چې په نتیجه کې یې بي بي سي له یوه خصوصي پاکستاني ټلویزیوني چینل سره په اردو ژبه د خبرونو خپرېدل درولي دي.

بي بي سي ویلي، چې چارواکو د دوی په خپرونو کې مداخله کوله.

د بې پولې خبریالانو د آسیاپسفیک د څانګې مشر ډانیل بسټارډ نن په یوه خپاره کړي بیان کې وویل چې له AAJ ټلویزیون سره د بي بي سي د قرارداد د لغوه کولو پرېکړه دا مانا لري چې بي بي سي له دې ډډه کړې چې پر دغه چینل د پاکستاني چارواکو له خوا لګول شویو بندیزونو ته په ګونډو شي.

هغه د پاکستان پرحکومت غږ وکړ، چې د خبري رسنیو د ایډیټوریال په چارو کې له مداخلې لاس واخلي او زیاتوي دا ډول مداخله د ډیموکراتیکو اساسي اصولو خلاف او هغه په پاکستان کې د پوځي د یکتاتورۍ دورو د تجربې ښکارندويي کوي.

اکسفام: د خپرې شوې کرونا وبا له امله په نړۍ کې ١٠ کسان شتمن شوي

د فیسبوک موسس مارک زاکربرګ

اکسفام چې په نړۍ کې له بېوزلۍ سره مبارزه کوي، وایي، د خپرې شوې کرونا وبا له برکته په نړۍ کې لس کسان دومره شتمن شوي چې پیسې یې د ټولې نړۍ وګړو ته د کوویډ۱۹ ناروغۍ ضد واکسین له پېرلو هم زیاتې دي.

دغې نړیوالې مرستندویه ټولنې په یوه راپور کې چې نن یې خپور کړی، د ډېرو شتمن شویو کسانو په ډله کې د امازون د کمپنۍ مشرجیف بیزوس، د فیسبوک موسس مارک زاکربرګ او د تیسله کمپنۍ موسس ایلون مسک ښودلي چې د دغې وبا له برکته یې ټوله شتمني ۵۴۰ ملیارډ ډالره زیاته شوې ده.

اکسفام دغه راز ویلي، دا دومره شتمني ده چې د نړۍ وګړو ته د کوویډ ۱۹ ناروغۍ ضد واکسین د برابرولو ترڅنګ دا مسله یقیني کولای شي، چې هیڅوک د دغې وبا له امله له بېوزلۍ سره مخامخ نه شي.

اکسفام اټکل کړی، چې په نړۍ کې د دغې وبا د خپرېدو په نتیجه کې د هغو کسانو چې په بېوزلۍ کې ژوند کوي، نور پنځه سوه ميليونه ور اضافه شوي دي.

په عربستان کې ښځینه موډلانو د جامو ننداره وړاندې کړه

آرشیف

د سعودي عربستان موډلانو پرون د دې هېواد په پلازمېنه ریاض کې د بلجیم د سفارت په انګړ کې د لامبو د یوه حوض په غاړه د جامو یوه ننداره یا فیشن شو اجراکړه.

دغه موډلانې چې دودیزې عبایا جامې یې په تن وې، په نوې بڼه د یوې عصري مېرمنې لپاره د دغو جامواغوستل یې نندارې ته وړاندې کړل.

د بلجیم د سفارت له خوا تنظیم شوې دغه ننداره کې د سعودي د ملکې صفیه حسین له خوا ډیزاین شوې جامې چې د سعودي د کلتور تر نفوذ لاندې د لویدیځ د مختلفو ډولونو یوګډ ترکیب دی، وښودل شوې.

د سعودي عربستان د ولیعهد شهزاده محمد بن سلمان له خوا پر ښځو د موټرچلولو د بندیز د لیرې کولو په ګډون ټولنیز چټکو بدلونونو چې په دې وروستیو کلونو کې عملي شوي، په دې هېواد کې د ښځو له خوا د جامو دا ډول نندارې ته لاره پرانیستې ده.



په بېلاروس کې لسګونه اعتراض کوونکي نیول شوي

د بېلاروس امنیتي ځواکونه د اعتراض کوونکو د نيولو پر مهال

په بېلاروس کې د الکساندر لوکاشينکا پر ضد د اعتراضونو په دوام د تیرې ورځې په اعتراضونو کې نږدې ۱۶۰ کسان نیول شوي دي.

دغه اعتراضونه په اګست میاشت کې د ولسمشرۍ د شپږمې دورې لپاره د لوکاشينکا د بیا ټاکل کېدو په وړاندې په بېلاروس کې پیل شوي دي.

معترضان ادعا کوي، چې په دغو انتخاباتو کې درغلي شوې ده.

د بېلاروس چارواکو د دغو اعتراضونو په ترڅ کې په زرګونو کسان نیولي دي.

اندونیزیا د تېلو یو ایرانی ټانکر او د پاناما یوه بېړۍ ضبط کړي

اندونیزیا کې نیول شوې ایرانۍ او د پانامه بېړۍ

اندونیزیا وایي، د دې هېواد په جنوب ختیځو اوبو کې یې د تېلو یو ایرانی ټانکر او د پاناما یوه بېړۍ چې په غیر قانوني توګه‌یې تېل لیږدول، ضبط کړي دي.

له دې مخکې ایران تورن شوی چې پر دې هېواد د امریکا له‌خوا له لګول شویو بندیزونو څخه د ځان تېر ایستلو لپاره د تېل وړونکو بېړیو د رادار سیستمونه غیر فعال کوي.

د اندونیزیا د سمندري چارو د امنیت ادارې نن وویل چې د اومه تېلو دغه سترې لېږدونکې کښتۍ یې چې پر یوې د ایران بیرغ او پر بلې د پاناما بیرغ رپېده، یوه ورځ مخکې د کالمانتان ولایت په سواحلو کې ضبط کړي.

دې ادارې ویلي چې په دې اړه پلټنه پیل شوې. د دغو کښتیو ۶۱ عمله هم نیول شوې ده.

د ایران د بهرنیو چارو وزارت ویاند سعید خطیب زاده په تهران کې په یوه خبري غونډه کې وویل چې د اندونیزیا له چارواکو یې غوښتي دي چې د ضبط شویو کښتیو په اړه ورسره نور جزئیات شریک کړي.

کوبیا له متحدانو سره د اړیکو اعاده کېدو په اړه د بایډن د څرګندونو هرکلی وکړ

د افغانستان لپاره د اروپایي ټولنې ځانګړی استازی رولاند کوبیا

د افغانستان لپاره د اروپایي ټولنې ځانګړي استازي رولاند کوبیا د امریکا د نوي ولسمشر جو بایډن د هغو څرګندونو هرکلی کړی چې د لوړې په مراسمو کې یې په نړۍ کې له خپلو متحدانو سره د اړیکو د بېرته اعاده کېدو په اړه کړې وې.

کوبیا پرون په یوه ټویټ کې د بایډن دې خبرې ته چې ویلي یې دي موږ به خپل ائتلافونه بېرته ترمیم کړو ويلي، دا به په افغانستان کې نړیوالې هڅې چې د دې هېواد د وګړو د ښه ملاتړ لپاره د ګډو پرېکړو او په عملي چارو کې د همغږۍ لپاره ورته اړتیا ده، له سره تنظیم کړي.

ښاغلی کوبیا دا څرګندونې داسې مهال کوي چې نړیوالې ټولنې تېر کال د جنیوا په کنفرانس کې د افغانستان له حکومت سره تر۲۰۲۴ کال پورې د څه باندې ۱۰ میلیارده ډالرو نویو مرستو چې ځینې مشروط دي، ژمنې وکړې.

په عین حال کې د پوځي هڅو په ترڅ کې ټاکل شوې ناټو د راتلونکې فبرورۍ میاشت کې د دفاع وزیرانو په غونډه کې په دې اړه چې ایا دا تړون په افغانستان کې خپل حضور ته دوام ورکړي او که‌یې پای ته ورسوي، پرېکړه وکړي.

د هالند دوو ښارونو کې د کرونا له کبله د لګول شویو بندیزونو ضد مظاهرې وشوې

هالند کې مظاهرې او د پولیسو او معترضانو اخ‌وډب

د هالند په دوو ښارونو کې پرون خلکو د کرونا له کبله د لګول شویو بندیزونو پر ضد مظاهره وکړه او له پولیسو سره ونښتل.

د جنوبي ښار ایندهوون (Eindhoven) مرکز کې سلګونه مظاهره‌چیانو اورونه بل کړل او پولیس‌یې په ډبرو ویشتل.

پولیسو د مظاهرې د تیت او پرک کولو لپاره اوښکې بهوونکی ګاز او د اوبو توپونه وکارول او لسګونه مظاهره‌چیان یې ونیول.

د ټول‌بند پر ضد د هالند پلازمېنه امستردام کې هم مظاهره وشوه چې څه باندې ۱۰۰ تنه ترې ونیول شول.

دا مظاهرې یوه ورځ وروسته تر دې وشوې چې چارواکو د پخوانیو بندیزونو په دوام دغلته د شپې له نهو د سهار تر څلور نیمو بجو ګرځ‌بندیز اعلان کړ.

د اروپا په یو شمېر نورو هېوادونو کې هم د کرونا له کبله لګول شوي بندیزونه جدي شوي دي.

فرانسه له خپلو ګاونډیو ورتلونکو کسانو نه د کرونا منفي معاینه غواړي او سویډن ویلي، له ناروې د خلکو ورتګ بندوي، ځکه چې اوسلو کې د کرونا ویروس د نوې بڼې پېښې لیدل شوې دي.

امریکا له اقلیمي بدلون سره د مبارزې په تړاو د نړۍ له مشرانو سره غونډه کوي

د امریکا ولسمشر جو بایډن او د جان کري په شمول ځیني نور چارواکي

امریکا به له اقلیمي بدلون سره د مبارزې هڅو ته بېرته ستنېدل، نن (د جنورۍ په ۲۵مه) په همدې تړاو د لوړې کچې یوې غونډه کې د ګډون له لارې وښيي.

د امریکا د بهرنیو چارو پخوانی وزیر جان کري به چې د اقلیم په برخه کې د ځانګړي استازي په دنده ګمارل شوی، د اقلیم د بدلون په اړه د نړۍ د یو شمېر مشرانو په غونډه کې ګډون وکړي.

دغې غونډه کې د چین مرستیال صدراعظم هن ژینګ، د جرمني صدراعظمه انګلا مېرکل، د فرانسې ولسمشر امانوئل مکرون، د بریتانیا صدراعظم بورېس جانسون او یو شمېر نور مشران برخه اخلي.

په انلاین ډول د دغې جوړېدونکې غونډې هدف دا ښودل شوی چې تر ۲۰۳۰ کال پورې د اقلیم بدلون ته د مبارزې لپاره عملي لارې چارې ومومي.

له دې غونډې مخکې د نوبل جایزې د پنځو ګټونکو په ګډون څه باندې درې زره ساینس‌پوهانو د نړۍ له مشرانو غوښتي چې د ځمکې د کرې له تودېدو خلک خوندي کړي.

دوی ویلي، نړۍ لا له مخکې د وچکالۍ، اورونو، تودو څپو او سېلابونو له کبله لویې ویجاړۍ تجربه کوي.

د ملګرو ملتونو کارکوونکو ته خبرداری: پاکستان کې راجستر الوتکو کې سفر مه‌کوئ

ارشیف، د پاکستان د نړیوال هوايي شرکت الوتکه

ملګرو ملتونو خپلو کارکوونکو ته اطلاع ورکړې چې په پاکستان کې د راجستر شویو هوايي شرکتونو په الوتکو کې دې سفرونه نه‌کوي.

دا خبرداری په داسې حال کې ورکول کېږي چې اندېښنې شته د پاکستان د هوايي شرکت ځیني پیلوټان ښايي د الوتنو پر شرایطو برابر نه‌وي.

د ملګرو ملتونو د امنیتي مدیریت ادارې په هغه یادښت کې چې د شنبې په ورځ پاکستاني رسنیو ته هم یوه کاپي په لاس ورغلې ویلي: "د پیلوټانو د مشکوکو جوازونو په اړه د روانې څېړنې له کبله په پاکستان کې راجستر شویو الوتکو کې د سفر لپاره د احتیاط سپارښتنه کېږي."

دا لا معلومه نه‌ده چې ملګرو ملتونو دغه اطلاعیه کله خپلو کارکوونو ته خپره کړې ده.

پاکستان په جون میاشت کې اعلان وکړ چې د ۲۶۲ پیلوټانو دندې یې تر پلټنې وروسته ځنډولې دي.

دا پرېکړه په مې میاشت کې د یوې الوتکې تر نسکورېدو وروسته وشوه چې په نتیجه کې یې ۹۷ کسان مړه شول.

نور راوښيه

XS
SM
MD
LG