کابل چاپ ډېری ورځپاڼو په افغانستان کې د کرونا ویروس او د افغان سیاستوالو ترمنځ د سیاسي کړکېچونو په اړه لیکنې او تبصرې کړي.
- هشت صبح
هشت صبح ورځپاڼې تر دې عنوان لاندې چې حکومت باید د جوماتونو په وړاندې جدي اقدام وکړي، په خپله سرمقاله کې لیکلي په دې سربېره چې حکومت اعلان کړی چې جوماتونه رخصت دي، خو بیا هم د جمعې په ورځ په ډېری جوماتونو کې لمونځ ادا شو.
ورځپاڼه ټینګار کوي، څه ډول چې د کورنیو چارو وزارت ښارونو کې په تګ راتګ سخت بندیزونه لګولي، باید ټول جوماتونه هم تعطیل شي.
ورځپاڼې د ولسمشر د دوهم مرستیال په حواله لیکلي، که چېرې اوس سخت بندیزونه ولګول شي او وضعیت همداسې دوام پيدا کړي، د دې احتمال شته چې د کرونا ویروس په لومړۍ مرحله کې درې لکه کسان مړه شي، خو که تدابیر جدي ونهنیول شي، د دې احتمال هم شته چې یو میلیون انسانان په افغانستان کې د (کووېډ-۱۹) له امله مړه شي.
هشت صبح خبرداری ورکړی، که جوماتونه تعطیل نهشي، د تلفاتو شمېر به زیات شي، ورځپاڼه استدلال کوي کله چې عربستان مکه او مدینه تعطیل کوي نور دلیل نهپاتې کېږي چې په کابل کې جوماتونه پرانیستي وي.
- ویسا
د ویسا ورځپاڼې د سرمقالې عنوان دی، "له کرونا سره شعاري چلند مهکوئ."
وړاندې په سرمقاله کې راغلي، دا ویروس له کابل او هرات سربېره په نورو ولایتونو کې هم د خپرېدو په حال کې دی، خو د لیکوال په اند چارواکي ادعا لري چې له شرایطو سره سم ترتیبات نیول کېږي.
د لیکوال د معلوماتو له مخې له ۵۰ فیصده زیات افغانان د بېوزلۍ تر کرښې لاندې ژوند کوي، حکومت له مرستې پرته نهشي کولای دغه بېوزلې په کور کېنوي.
د سرمقالې لیکوال ټینګار کوي چې حکومت باید عملاً د خوراکي موادو د وېش په پروګرام کې مرسته وکړي.
د لیکوال په باور حکومتي سیاستوال او حتی مدني فعالان په سیاسي کړکېچونو کې مصروف دي او د عامې روغتیا وزارت په یوازې توګه له دې ناورین سره مبارزه نهشي کولای.
- ملي ارمان
ملي ارمان ورځپاڼې لیکلي، په داسې حال کې چې کرونا ویروس افغانان سخت اندېښمن کړي، د سیاسي رهبرانو ترمنځ د واک په سر جنجالونو د خلکو دغه ستونزې نورې هم زیاتې کړې.
لیکوال زیاتوي، که څه هم ځینې سیاستوال هڅه کوي چې د ولسمشر غني او عبدالله عبدالله ترمنځ اختلافونه ختم کړي، خو د ورځپاڼې په باور د دوی خودخواهي د دې لامل شوې چې دغه هڅې پایلې ورنهکړي.
سرمقاله لیکونکی خبرداری ورکوي، که غني او عبدالله د یوې سیاسي ادارې په تشکل سره جوړ نهشي او یو ټولشموله حکومت رامنځته نهکړي، امریکا به خپل ټول ځواکونه له افغانستان نه وباسي.
