د لاسرسۍ وړ لېنکونه

تازه خبر
جمعه ۱۷ غویی ۱۴۰۰ کابل ۰۳:۲۰

نړۍ

په روسیه کې د کرونا ویروس زیاتوالی؛ پوتین خلکو ته وینا کوي

د روسیې ولسمشر ولادیمیر پوتین

په روسیه کې په کرونا ویروس د اخته کسانو په شمېر کې له زیاتوالي سره سم، کرملېن وايي چې ولسمشر ولادیمیر پوتین په څو ساعتونو کې خلکو ته وینا کوي.

تر دې اعلان مخکې، د روسیې صدراعظم میخایل میشوستین ټولو والیانو ته امر وکړ چې د کرونا ویروس له امله ناروغانو ته په روغتونونو کې چپرکټونه برابر کړي.

د روسیې حکومت نن د مارچ په ۲۵مه، وویل چې په دې هېواد کې په کرونا ویروس د اخته کسانو شمېر ۶۵۸ ته لوړ شوی دی.

که څه هم روسیه نه‌وايي چې د کرونا ویروس له امله هلته څوک مړه شوي، خو د امریکا جان هاپکنز پوهنتون په راپور کې ویل شوي چې یو وګړی په روسیه کې له دې امله مړ شوی دی.

د ورځې تازه خبرونه دلته ولولئ

د جاپان دولت په توکیو او ۳ نورو سیمو کې د بېړني وضعیت په اړه پرېکړه اعلانوي

ارشیف، د جاپان د توکیو ښار یوه څنډه

د جاپان دولت به نن په دې اړه خپله پرېکړه اعلان کړي چې د مې تر پایه په توکیو او درېیو نورو سیمو کې بېړنی وضعیت غځوي که څنګه.

د کرونا وبا د خپرېدو د مخنیوي لپاره د جاپان حکومت داسې وخت د بېړني حالت په تمدید غور کوي چې په جاپان کې پلان شوي المپیک سیالیو ته کمې میاشتې پاتې دي.

تمه ده دوبني المپیک په توکیو کې د جولای په ۲۳مه پيل شي.

یوولس زره لوبغاړي به په المپیک کې برخه واخلي.

دا سیالۍ تېر کال د کرونا وبا په خاطر ځنډول شوې وې.

جاپان له مخکې پرېکړه کړې وه چې د المپيک لپاره له بهره د ننداره‌چیانو ورتګ منع کړي.

اندېښنې شته چې په توکیو او څو سیمو کې د بېړني وضعیت دوام د المپيک لوبو برخلیک هم له ګواښ سره مخ کولای شي.

په جاپان کې که څه هم کرونا وبا د نورو هېوادونو په پرتله لږه خپره شوې، خو واکسیناسیون بیا په ځلونو شاته پاتې.

د بلاروس د اپوزېسیون مشرې له امریکا د لوکاشینکا پر رژیم نور بندیزونه غوښتي

د بلاروس د اپوزېسیون په تبعید کې مشره سویتلانا تیخانوفسکایا

د بلاروس د اپوزېسیون مشرې له امریکا غوښتي دي چې د الکساندر لوکاشینکا پر رژیم نور بندیزونه ولګوي.

سویتلانا تیخانوفسکایا چې پرون د مې په شپږمه د امریکا د کانګرس استماعیه غونډې ته وینا کوله همداراز پر واشنګټن غږ وکړ چې په بلاروس کې د روان سیاسي بحران د ختمولو په مقصد د اروپايي منځګړو پر هڅو ورګډ شي.

مېرمن تیخانوفسکایا چې په لیتوانیا کې د تبعید ژوند تېروي همداراز وویل چې متحده ایالات باید د لوکاشینکا د منزوي کولو لپاره له ډيپلوماسۍ کار واخلي.

هغې په خپل هېواد کې د بشري حقونو سرغړونو او ځپونکو اقداماتو ته اشاره وکړه او له کانګرس څخه‌یې وغوښتل چې په بلاروس کې د مدني ټولنې، خپلواکو رسنیو او په هېواد کې دننه او بهر د بشري حقونو د مدافعانو ملاتړ پراخ کړي.

سویتلانا تیخانوفسکایا ادعا کوي چې د ۲۰۲۰ کال د اګسټ په میاشت کې د ولسمشرۍ د انتخاباتو ګټونکې وه او د اپوزېسیون فعالان‌یې د خلکو پر پراخو مظاهرو د حکومت د ځپونکو اقداماتو پر وړاندې یو موټی کړي دي.

برازیل کې د مخدره موادو د قاچاقبرانو پر ضد عملیاتو کې ۲۵ کسان ووژل شول

ارشیف، یو شمېر برازیلي پولیس

په برازیل کې د مخدره موادو د قاچاقبرانو پر ضد د دولتي ځواکونو په عملیاتو کې ۲۵ کسان وژل شوي دي. دا عملیات د برازیل په لوی تجارتي مرکز ریو دې جنیرو ښار کې شوي دي.

د قاچاقبرانو او پولیسو ترمنځ دا نښته پرون د مې په لومړۍ نېټه د ریو دې جنیرو په یوه بې‌وزله سیمه کې وشوه.

د سیمه‌ییزو رسنیو د راپورونو له مخې دا جنایتکاره ډله چې د عملیاتو پر مهال‌یې پر پولیسو ډزې وکړې د مخدره موادو په قاچاق، شوکو، قتلونو او انسان تښتونو کې لاس لري.

د عملیاتو له جریانه وېډیویي تصاویرو کې ښکاري چې د دې ډلې غړي سیمې ته د پوځي ګاډو له رسېدو سره سم د بامونو له لارو تښتي.

د برازیل پولیس وايي چې په وژل شویو کسانو کې د دې ډلې مشر هم شامل دی او زیاتوي چې پولیسو لږترلږه ۱۰ مشکوک کسان نیولي دي.

د کرونا له محدودیتونو تېښته؛ په دوبۍ کې د پرتمینو ودانیو بیې لوړې شوي

د متحده عربي اماراتو په دوبۍ ښار کې یو شمېر پرتمینې ودانۍ

د متحده عربي اماراتو په دوبۍ ښار کې د پرتمینو ودانیو بیې لوړې شوي ځګه له پرمختللو هېوادونو ځیني شتمن خلک د کرونا وبا له محدودیتونو د تېښتې لپاره دې ښار ته ځي.

د دوبۍ د لوکسو ودانیو بیې پخوا تر دې رالوېدلې وې، خو د روان ۲۰۲۱ میلادي کال په لومړیو درېیو میاشتو کې د هغو بیې د تېر کال د لومړۍ ربعې پرتله په سلو کې ۲۳۰ لوړې شوې دي.

د جایدادونو د معاملو دفترونه وايي چې په تېره اپرېل میاشت کې سل او په مارچ کې ۸۴ کورونه چې د هر یوې بیه ۲،۷ ملیون ډالره وه خرڅ شوي دي، په داسې حال کې چې په ټول ۲۰۲۰ کال کې یوازې ۵۴ کورونه معامله شوي وو. ډېری دا کورونه او جایدادونه د انسان په لاس په جوړ شوي جمیره ټاپو کې دي.

د اسوشیټډ پرس خبري اژانس د راپور له مخې اکثر دا کورونه د افغانستان جنګسالاران او د نایجریا، سوریې او لبنان په څېر د نورو هېوادونو شتمن خلک او سیاستوال اخلي څو خپلې ګټلې پیسې په‌کې خوندي کړي.

د روسیې یوې محکمې د ازادي راډیو د یوې قراردادي خبریالې عریضه رد کړه

مسکو کې د ازادې اروپا/ ازادي راډیو دفتر

د روسیې د پسکوف ښار یوې محکمې د ازادې اروپا/ ازادي راډیو د قراردادي خبریالې لودمیلا ساویتس کایا هغه اعتراض او عریضه رد کړه چې د بهرنیو اجنټانو په نوم د روسیې د نویو مطبوعاتي مقرراتو په چوکاټ کې یې د خپل نوم د شاملېدو له کبله کړی و.

یادې محکمې پرون حکم ورکړ چې د عدلیې وزارت له‌خوا په دې لېست کې د ساویتس کایا د نوم لیکل، قانوني دی.

د مېرمن ساویتس کایا مدافع وکیل به د دې پرېکړې پر ضد یوې بلې لویې محکمې ته مراجعه وکړي.

د روسیې د عدلیې وزارت د خارجي اجنټانو په لېست کې د دې خبریالې د نوم لیکلو دلیل نه‌دی په ډاګه کړی.

د تاجکستان چارواکي: له قرغزستان سره د جګړو له کبله مو ۱۹ وګړي وژل شوي

د تاجکستان او قرغزستان ترمنځ جګړه کې یوه ویجاړه شوې سیمه

د تاجکستان چارواکي وایي له قرغزستان سره په پوله په یوې لانجمنې سیمه کې د جګړو له کبله د دې هېواد ۱۹ وګړي وژل شوي او ۸۷ تنه ټپیان دي.

دا لومړني رسمي ارقام دي چې د تاجکستان د حکومت له‌خوا وړاندې کېږي.

د ازادي راډیو خبریال وایي په دې سیمه کې د شخړو له کبله ۲۰ کسان وژل شوي چې ۱۱ یې پوځي کارکوونکي دي.

تر دې وړاندې قرغزي چارواکو ویلي وو چې په سرحدي لانجو کې ۳۶ تنه قرغزي وګړي وژل شوي، ۱۸۹ نور ټپیان دي او ۵۸ زره کسان له خپلو کورو څخه وتلو ته اړ شوي دي.

سپېس اېکس بالاخره 'سټارشیپ' توغندی په بریالیتوب سره وازمایه

ارشیف، د سپېس اېکس د یوه توغندي ازموینه

سپېس اېکس وتوانېد په پنځم ځل هڅې د سټارشیپ توغندی په بریالیتوب سره وازمایي.

دا د هغې فضایي بېړۍ د جوړېدو لپاره یو بل ګام دی چې په پام کې لري سپوږمۍ ته ستورمزلي واستوي.

دغه راکټ چې «SN15» نومول شوی د مې پر پنځمه په تکزاس کې د سپېس اېکس له یوې اډې بوکا چیکا څخه وتوغول شو.

دا توغندی وتوانېد په شپږو دقیقو ازمایشي الوتنه کې د شاوخوا ۱۰ کیلومتره مزل ووهي او بېرته په بریالیتوب سره ځمکې ته راشي.

د دغه توغندي پخوانۍ څلور ځله هڅې ناکامه شوې وې.

وروسته له هغه چې ناسا د سټارشیپ دا راکټ انتخاب کړ چې سپوږمۍ ته د ستورمزلو د رسولو لپاره وکارول شي، سپېس اېکس له ډېرو فشارونو سره مخامخ وو.

د سټارشیپ دا پنځمه بریالۍ ازموینه فضا ته د لومړني امریکایي الن شیپرډ د تګ له ۶۰مې کلیزې سره برابره ده.

بلېنکن اوکراین سره د واشنګټن ژمنې بیا تکرار کړې

د امریکا د بهرنیو چارو وزیر انتوني بلېنکن د اوکرایین له ولسمشر سره

د امریکا د بهرنیو چارو وزیر انتوني بلېنکن کییف ته د سفر پر مهال د اوکراین د ملي حاکمیت، ځمکنۍ بشپړتیا او خپلواکۍ برخه کې د واشنګټن ژمنې بیا تکرار کړې.

دا د ولسمشر جوبایډن د ادارې لومړنی لوړپوړی چارواکی دی چې کییف ته سفر کوي.

بلېنکن نن پنجشنبه (د غويي ۱۶مه) د اوکراین د بهرنیو چارو له وزیر دیمتري کولیبا سره ولیدل.

په داسې حال کې چې د اوکراین او روسیې ترمنځ تاوتریخوالی ډېر شوی، اوکراین ته د بلېنکن دا یو ورځنی سفر له دې هېواده د امریکا د ملاتړ قوي پیغام رسوي.

د اوکراین د بهرنیو چارو وزیر ښاغلي بلېنکن ته وویل چې کییف د مسکو پلوه بیلتون غوښتونکو سره په مقابله کې له اوکراین سره د امریکا د مرستو ستاینه کوي.

د اوکراین په ختیځ کې د اوکراین د حکومت او روس پلوه بیلتون پالو ترمنځ جګړو له جنورۍ راهیسي بیا زور اخېستی دی.

بلېنکن به په دې سفر کې د اوکرایین له ولسمشر ولودمیرزلنسکي، د دې هېواد د پارلمان او د مدني ټولنې له یو شمېر غړیو سره وګوري.

د امریکا د بهرنیو چارو وزیر د اوکراین پلازمېنې کییف ته ورسېد

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر انتوني بلېنکن د اوکراین پلازمېنې کییف ته ورسېد.

نوموړی به په دغه یوه ورځني سفر کې د دې ترڅنګ چې له ګاونډ روسیې سره په راپورته شوي کړکېچ کې د اوکراین قوي ملاتړ په ډاګه کړي، دغه راز به کییف ته د فساد پر وړاندې د مبارزې په اړه د واشنګټن پیغام هم ورسوي.

بلېنکن پرون چهارشنبې (د غويي ۱۵مه) په یوه ټویټ کې وویل، دغه سفر به یو مهم فرصت وي چې د روسیې د یرغل په اړه خبرې وکړي او هم پر دې مسئلې ټینګار وشي چې اړتیا ده زموږ اوکراینی شریک اصلاحاتو ته دوام ورکړي.

بلېنکن به د اوکراین له ولسمشر ولودمیر زلنسکي، د بهرنیو چارو له وزیرانو د اوکراین د پارلمان او د مدني ټولنې له یو شمېر غړیو سره وګوري.

زلنسکي ویلي، له واشنګټنه غواړي چې په ناټو تړون کې د اوکراین د غړیتوب د هڅو د ملاتړ برخه کې یو قوي پیغام ورکړي.

امریکا 'مینوتمن-۳' توغندی تر تجربې مخکې بېرته راښکته کړ

'مینوتمن-۳' توغندی

د امریکا پوځ وایي، د اوږده واټن بالستیک بې وسلې توغندی یې تر تجربې مخکې بېرته راښکته کړ.

د امریکا هوایي ځواک دا خبره پرون چهارشنبه (د غويي ۱۵مه) په یوه بیان کې وکړه او څرګنده یې کړه چې ټاکل شوې وه 'مینوتمن-۳' توغندی په کالیفورنیا کې له واندینبرګ هوایي اډې وتوغوي او اوس د بېرته دستي راښکته کېدو څېړنه روانه ده.

په بیان کې راغلي دي چې د دې توغندي د بیا ازموینې لپاره به وخت وټاکل شي.

په بیان کې دا هم ویل شوي دي چې د توغندیو د ازموینې لپاره د خوندیتوب په خاطر ډېرو دقیقو شیانو ته اړتیا شته چې باید هرڅه سم وي.

'مینوتمن-۳' توغندی اټمي وسلې لېږدوي.

عراق: ایراني او سعودي چارواکو د شخړو د راکمېدو په هدف ناستې کړي

د عراق ولسمشر برهم صالح

د عراق ولسمشر وایي، هېواد یې څو ځله د ایراني او سعودي عربستان د چارواکو د ګډو غونډو کوربه وو.

برهم صالح د چهارشنبې (د غويي ۱۵مه) په ورځ په یوه انلاین غونډه کې وویل، دا خبرې د دغو دوو سیالو هېوادونو ترمنځ د شخړو د راکمېدو په هدف ترسره شوي دي.

ښاغلي صالح پرته له دې چې دې برخه کې ډېر جزییات ورکړي، وویل چې دا خبرې مهمې او د پام وړ وې.

د عراق ولسمشر په داسې وخت کې دا خبره کړې ده چې په وروستیو کې ایراني او سعودي چارواکي د یوه بل پر وړاندې پسته ژبه کاروي.

کتونکي وایي، داسې ښکاري چې په واشنګټن کې د نوې ادارې له رامنځته کېدو سره ریاض په سیمه کې خپله تګلاره لږه بدله کړې ده.

واشنګټن چې د عربستان له نژدې شریکانو څخه دی، په دغه هېواد کې یې د بشري وضعیت په اړه نیوکې کړي دي، همدا راز یې په سیمه کې د دې هېواد پر تګلارو هم انتقاد کړی دی.

څېړونکو چین کې د ډایناسور پاتې شوني موندلي

ارشیف

څېړونکو د چین په جنوب لویدیځ کې د ډایناسور پاتې شوني موندلي دي.

د دې څاروي له جمجمې او هډوکو ښکاري چې ښایي یو متر او اووه سانتي به اوږد وو.

د رویټرز اژانس د راپور له مخې د چین د ساینس اکاډیمي څیړونکي وایي، ګومان کوي چې دا ډایناسور د مړینې په وخت درې کلن وو.

پوهان په دې باور دي چې دا ډول ډایناسوران شااوخوا ۲۰۰ میلیونه کاله مخکې پر ځمکه اوسېدل او تر ډېره په جنوبي امریکا او چین کې پيدا کېدل.

پاریس کې پر یوې بم چاودنې تورن ایرانی ډيپلومات په ۲۰ کاله بند محکوم شو

ارشیف، د بلجیم پولیس

په بلجیم کې د هغه ایراني ډیپلومات چې د پاریس په یوه څنډه کې د ایران د مخالفانو پر یوه لاریون‌یې بم چاودنه پلان کړې وه، د ۲۰ کلونو بند سزا وروسته له هغې تأیید شوه چې هغه د استېناف له دعوا ډډه وکړه.

د اسدالله اسدي په نوم د ویانا مېشتي دغه ایراني ډیپلومات مدافع وکیلانو نن وویل چې مؤکل‌یې پرون سې شنبه په ۲۰۱۸ کال د پاریس په لمنه کې په تبعید شوې، د ایران د مجاهدین خلق ډلې پر یوه لاریون د بمي حملې د پلانولو پر تور پر ترورېستي هڅې مجرم وپېژندل شو.

درې نورو تورنو ته هم د بند سزاوې ورکړل شوې دي. د حملې دغه پلان د فرانسې، جرمني او بلجیم د امنیتي ادارو د ګډو عملیاتو په نتیجه کې شنډ کړای شو.

جرمني د انصار انټرنېشتل اسلامي ټولنې پر فعالیت بندیز ولګاوه

ارشیف، د جرمني بیرغ

جرمني د انصار انټرنېشنل په نوم د اسلامي ټولنې پر فعالیت بندیز ولګاوه.

جرمني دغه اقدام وروسته له هغې کوي چې د دې هېواد په لسو ښارونو کې چارواکو د دې ټولنې پر دفترونو د عملیاتو په نتیجه کې د دې ټولنې ځینې وسایل ضبط کړل.

د جرمني د کورنیو چارو وزیر هورست زیهوفیر نن (د مې په ۵مه)چهارشنبې وویل، که غواړئ چې له ترورېزم سره مبارزه وکړئ نو باید مالي سرچینې یې وچې کړئ.

دغه ټولنه چې په دوزلدورف کې مېشته ده وایي، هدف یې په نړۍ کې له مسلمانانو سره مرسته کول دي.

د دې ټولنې د مشر په وینا یوازې په ۲۰۱۸ کال دې ټولنې تر لس میلیونه ایرو پورې د بسپنې په توګه راټول کړي دي.

د جرمني د کورنیو چارو وزارت ویلي، دغه مرستې په حقیقت کې د فلسطینیانو د حماس ډلې او له القاعده سره تړلو الشباب او جبهت النصره ډلو په څېر د بهرنیو ډلو د ملاتړ په هدف را ټولې شوي دي.

د جرمني د کورنیو چارو وزیر ښاغلي زیهوفیر ویلي چې انصار او ورسره همکاره ټولنه یې د بشري مرستو تر چتر لاندې په نړۍ کې د ترورېزم مالي ملاتړ کوي.

د قرغیزستان ولسمشر د اساسي قانون تعدیل توشیح کړ

د قرغیزستان ولسمشر صدر جپاروف

د قرغیزستان ولسمشر صدر جپاروف د اساسي قانون هغه تعدیل توشیح کړ چې تېره میاشت په ټولپوښتنه یا ریفرانډم کې تایید شوی و.

د جپاروف مخالفین تور پورې کوي چې د دغه تعدیل له مخې به د هغه صلاحیتونه خورا زیات شي.

د قرغیزستان وګړو د اپریل په ۱۱مه ټول پوښتنه کې د اساسي قانون د تعدیل په پلوي رایې ورکړې، خو تر اوسه دا نه ده په ډاګه شوې چې په متن کې یې څه لیکل شوي دي.

د نوي تعدیل شوي قانون له مخې د قرغیزستان د پارلمان څوکۍ په سلو کې ۲۵ یعنې نوي څوکیو ته راکمېږي او ولسمشر ته صلاحیت ورکوي چې قاضیان او د قانون د تنفیذ ادارو مشران وټاکي.

دغه راز د دغه قانون له مخې به یوه مشورتي او د چارو د همغږۍ یوه اداره جوړيږي چې د ولسمشر تر کنټرول لاندې به فعالیت کوي.

منتقدین وایي، دغه اداره به ښایي له پارلمان سره موازي چارې مخ ته وړي چې دې توګه به ولسمشر ډېر واک لري.

نور راوښيه

XS
SM
MD
LG