د لاسرسۍ وړ لېنکونه

تازه خبر
چهارشنبه ۱۴ غبرګولی ۱۳۹۹ کابل ۱۱:۳۲

نړۍ

روسیه کې نن د کرونا ویروس ۷۱ نوې پېښې ثبت شوې

ارشیف

روسیې نن د مارچ ۲۳مه په دې هېواد کې د کرونا ویروس ۷۱ نوې پېښې ثبت کړې.

په دې سره په روسیه کې د رسمي شمېرو له مخې په کرونا ویروس د اخته کسانو شمېر ۴۳۸ تنو ته ورسېد.

دا خبر داسې مهال خپور شو چې روسیې پر نړیوالو الوتنو بندیز لاپراخ کړ.

د روسیې صدراعظم میخایل میشوستین نن وویل چې حکومت‌یې له وزارتونو، ادارو او سیمو څخه شمېرې څاري او د دې ویروس د خپرېدو د مخنیوي لپاره اقدامات کوي.

د روسیې دولتي اژانس روساویا وویل، د دغو نویو اقداماتو له مخې به د روسیې هوایي شرکتونه یوازې د مسکو له هوایي ډګر څخه هغه هم یوازې د نړۍ د نیویارک په څېر لویو ښارونو او د هېوادونو پلازمېنو ته الوتنې کوي.​

دغه‌راز روسیه به په استثنایي توګه هغو چارټر الوتنو ته هم اجازه ورکوي چې په بهر کې بند پاتې شوي د دې هېواد اتباع انتقالوي.

تر اوسه شااوخوا دوه لکه روسان له هغو هېوادونو چې کرونا په‌کې ډېره خپره شوې، بېرته خپل هېواد ته لېږدول شوي دي.

تر اوسه په روسیه کې د دغه ویروس له‌امله د مړه کېدو خبر نه‌دی ورکړل شوی.​

د ورځې تازه خبرونه دلته ولولئ

برلین کې د روسیې او اوکراین ترمنځ د لانجې په تړاو خبرې شوي

دیمیتري کولیبا او د هغه جرمنی سیال هایکو ماس د پاریس د تړون په هر څه ژر تطبیق سلا شوي.

د اوکراین د بهرنیو چارو وزیر دیمیتري کولیبا پرون برلین ته تللی و او هلته یې له روسیې سره د اوکرایین په لانجه او نورو مسایلو خبرې کړي.

دیمیتري کولیبا او د هغه جرمنی سیال هایکو ماس د پاریس د تړون په هر څه ژر تطبیق سلا شوي.

د پاریس تړون د روسیې او اوکراین د کړکېچ د سړولو په هدف تېر ډېسېمبر د جرمني او فرانسې په منځګړیتوب لاسلیک شو.

روسیې کریمیا ټاپووزمه چې د اوکراین د خاورې برخه وه له ځان سره الحاق کړه او اوس هم روس پلوه بیلتون پال د اوکرایین په ختیځ کې له اوکراییني عسکرو سره جنګ کوي.

د پاریس له تړون سره سره بیا هم د روسې او اوکرایین د اړیکو د ښه کېدو څرک نه لیدل کېږي.

د اوکراین په ختیځ کې له ۲۰۱۴ میلادي کال راهیسې چې د جګړو په نتیجه کې شاوخوا ۱۳ زره کسان وژل شوي دي.

یواځې د سږ کال په ۶ میاشتو کې پنځوس اوکراییني عسکر وژل شوي.

امریکا یو ایرانی ساینسپوه له دې هېواده شړلی

ایرانی ساینسپوه سیروس عسګري

ایراني چارواکي وايي ایرانی ساینسپوه سیروس عسګري د امریکا له متحدو ایالتونو اخراج او ایران ته روان شوی دی.

دوی دا نه مني، چې د عسګري خوشې کېدل دې د واشنګټن او تهران ترمنځ د بندیانو د تبادلې د موافقې یوه برخه وي.

عسګري چې د ایران د شریف صنعتي پوهنتون استاد دی، په امریکا کې نیول شوی و.

هغه په ۲۰۱۶ میلادي کال کې د امریکا د اوهایو ایالت د پوهنتون له یوې تحقیقاتي پروژې د تجارتي اسرارو د پټولو په هڅې تورن کړای شو.

نهه پنځوس کلن عسګري، چې پر ځان لګول شوي تورونه رد کړي، په نومبر میاشت کې له تورونو سپین اعلان شو.

د ایران د بهرنیو چارو وزیر محمد جواد ظریف پرون سې شنبه د خپل انسټاګرام په حساب کې د عسګري خوشې کېدل یو ښه خبر وباله.

هغه د امریکا متحد ایالتونه د څو نورو ایراني ساینسپوهانو په برمته کولو هم تورن کړ.

بلخوا د ایران د بهرنیو چارو وزارت ویاند عباس موسي ویلي، ټاکل شوې عسګري نن چهارشنبه (د جون درېیمه) ایران ته ورسېږي.

د امریکا متحدو ایالتونو د تېر کال په ډېسېمبر میاشت کې د یوه چینايي اصله امریکايي څېړونکي ژیائو وانګ په بدل کې د مسعود سلیماني په نوم یو ایرانی ساینسپوه تبادله کړی و.

د خبریالانو خوندیتوب کمېټه: امریکا دې د رسنیزو فعالانو نښه کول ودروي

له تېرې جمعې د امریکا په متحدو ایالتونو کې د مطبوعاتو له ازادۍ لږ تر لږه ۱۲۵ سرغړونې ثبت شوي دي.

د خبریالانو د خوندیتوب کمېټې له امریکايي چارواکو غوښتنه کړې، چې د اعتراضونو په اړه د راپور ورکولو پر مهال د ژورنالیستانو او د رسنیو د کارکوونکو په نښه کول بند کړي.

دغې کمېټې له امریکايي چارواکو دا هم غوښتي چې د ګرځ بندیز پر مهال دې رسنۍ مستثنی وګڼل شي.

له تېرې جمعې د امریکا په متحدو ایالتونو کې د مطبوعاتو له ازادۍ لږ تر لږه ۱۲۵ سرغړونې ثبت شوي دي.

په نیویارک کې دېره د خبریالانو د خوندیتوب کمېتې ویلي، دا سرغړونې د هغو ژورنالیستانو په وړاندې شوي، چې د یوه تورپوستي سړي جورج فلوید د مړینې په اعتراض د روانو مظاهرو په اړه یې راپورونه ورکول.

د کمېټې د پروګرامونو مشر کارولس مارتینز دي لا سیرنا وویل، د دندې پر مهال د خبریالانو په وړاندې د پولیسو له خوا سختو او کله- کله د تاوتریخجنو اقداماتو دوام ډارولي یو.

د هغو دوو فوټوژورنالیستانو یادونه هم کړې، چې په لاس انجلس کې د کار پر مهال د مې پر ۲۹مه ونیول شول.

تر خوشې کېدو یوه ورځ مخکې د ګډوډیو په پارولو تورن شوي وو.

دغه کمېټه وايي پولیسو پر لسګونو نورو ژورنالیستانو اوښلن ګاز کارولي او په ربړۍ مرمۍ یې ویشتلي دي.

روسیه: یوه نظامي پریډ کې د ګډون لپاره د امریکا دفاع وزیر بلل شوی

مارک ایسپر

د روسیې دفاع وزیر سرګي شویګو خپل امریکايي سیال مارک ایسپر ته د روسیې په یوه نظامي پرېډ کې د ګډون بلنه ورکړې ده.

د روسیې دفاع وزارت ویلي، شویګو پرون سې شنبه ناوخته له ایسپر سره په ټېلیفوني مکالمه کې هغه ته په دغو مراسمو کې د ګډون بلنه ورکړه.

د روسیې دفاع وزارت نه دي ویلي، چې ایسپر د شویګو بلنه منلې ده که څنګه.

د دویمې نړیوالې جګړې پر مهال، د نازي جرمني د ماتې د پنځه اویایمې کلیزې د لمانځنې په مناسبت پوځي پرېډ به د مسکو په سره میدان کې جوړ شي.

که څه هم روسیه هر کال دغه مراسم د مې میاشتې پر نهمه جوړوي، خو سږ کال د کورونا وبا له کبله په ځنډ جوړېږي.

د ایران پارلمان یو غړی: د نومبر میاشتې په مظاهرو کې ۲۳۰ تنه وژل شوي

د ایران د پارلمان د ملي امنیت او بهرنیو چارو د کمېټې مشر مجتبی ذالنور

د ایران پارلمان یو مهم غړي څرګنده کړې چې د نومبر په میاشت کې په دې هېواد کې د حکومت ضد مظاهرو پر مهال ۲۳۰ کسان وژل شوي دي.

دا خبر د ایرنا دولتي خبري اژانس ورکړی دی. دا لومړنی ځل دی چې د ایران د پارلمان یو غړی د تېرو اعتراضونو پر مهال د مرګ‌ژوبلې شمېرې وړاندې کوي.

د تېر کال د نومبر په میاشت کې په ایران کې د تېلو د بیو لوړېدل د حکومت پر ضد د پراخو اعتراضونو سبب شول.

په ایران کې کې د ۱۹۷۹ میلادي کال د اسلامي انقلاب راهیسې، د تېر کال د نومبر څلور ورځني اعتراضونه تر ټولو پراخ او له تاوریخوالي سره مل ګڼل کېږي.

د ایرنا خبري اژانس د راپور په حواله د ایران د پارلمان د ملي امنیت او بهرنیو چارو د کمېټې مشر مجتبی ذالنور ویلي، په دې اعتراضونو کې ۲۳۰ کسان وژل شوي چې په پنځو کې یو یې د امنیتي ځواکونو غړی و.

د نوموړي په وینا په وژل شویو کې له څلورو یو تن له لارویانو و چې اعتراضونو کې یې لاس نه‌درلود او یو شمېر یې له نږدې واټن څخه په سر او سینې په مردکیو لګېدلي وو.

ذالنور ادعا کړې چې امنیتي ځواکونو له اعتراض کوونکو څخه ډیر واټن درلود او دا کسان د امنیتي ځواکونو په ډزو نه‌دي لګېدلي.

نوموړی وايي، یو زیات شمېر کسان پر داسې مردکیو لګېدلي چې په ایران کې یې کارول معمول نه‌دي.

په دې اعتراضونو کې تر ۲،۰۰۰ زیات کسان ټپیان شوي هم وو.

د بخښنې نړیوال سازمان د دې اعتراضونو پر مهال د وژل شویو شمېر ۳۰۴ تنه بللی دی او هغوی چې له مسئلې خبر دي وايي، د ۱۲ ماشومانو په شمول په دې اعتراضونو کې ۴۰۰ کسان وژل شوي دي.

امریکا بیا د وژل شویو کسانو شمېر زر تنه بللی دی.

ټرمپ او پوتین د ۷ سترو صنعتي هېوادونو د جوړېدو په اړه خبرې وکړې

د امریکا ولسمشر ډونالډ ټرمپ او د روسیې ولسمشر ولادیمیر پوتین

کرملېن وايي د امریکا ولسمشر ډونالد ټرمپ پرون دوشنبه له خپل روسي سیال ولادیمیر پوتین سره په ټلیفوني خبرو کې د سږني کال په وروستیو کې د روسیې په ګډون د اووه سترو صنعتي هېوادونو د پراخې سرمشریزې د جوړېدو لپاره د خپل وړاندیز په اړه معلومات ورکړل.

په داسې حال کې چې ټوله نړۍ د کرونا له وبا سره لاس او ګرېوان ده، ټرمپ تېره اوونۍ وویل، د 'G7' سرمشریزه به چې د راروانې جولای میاشتې لپاره‌یې پلان کړې وه، د روان کال تر مني پورې وځنډوي او په دې غونډه کې به روسیې، اسټرالیا، جنوبي کوریا او هند ته هم د ګډون بلنه ورکړي.

کرملېن په یو بیان کې ویلي چې ټرمپ پوتین ته د خپلو نظریو یادونه وکړه، خو په دې اړه‌یې نور جزئیات نه‌دي ورکړي او دا یې هم نه‌دي ویلي چې پوتین د ټرمپ بلنه ومنله که نه.

سپینې ماڼۍ د ټرمپ او پوتین ټیلیفوني خبرې تأیید کړي او ویلي یې دي چې دواړو مشرانو د 'G7' د سرمشریزې د جوړېدو پر څرنګوالي خبرې وکړې.

د عدلي طب پایلې: جورج فلوید د خفه کېدو په نتيجه کې مړ شوی

ارشیف

د تور پوستي امریکايي جورج فلوید د عدلي طب نتیجه ښيي چې دی د غاړې خفه کېدو په نتيجه کې مړ شوی.

د دې سړي مړینې په ټوله امریکا کې له تېرو شپږ ورځو راهیسې اعتراضونه راپارولي دي.

مایک بایډن له امریکايي ډاکترانو یو دی چې د جورج فلوید د مړي معاینات‌یې کړي. ده د دوشنبې په ورځ په یوه خبري کنفرانس کې وویل چې دا سړی پر غاړې او ملا د فشار په نتيجه کې د منیاپولیس ښار د پولیسو له لاسه مړ شوی دی.

پولیسو ۴۶ کلن جورج فلوید د میناسوتا ایالت په منیاپولیس ښار کې د یوه دکان مخې ته توقیف کړی وو. د مې په ۲۵مه نېټه اخیستل شوې وېډیو ښکاروي چې فلوید پړ مخې پر ځمکه پروت دی او سپین پوستي پولیس افسر ډيریک شاوین د فلويد پر غاړه خپل ځنګون ايښی دی.

فلوید وايي چې ساه نه‌شي اخیستلی او زارۍ کوي چې پولیس‌یې له غاړې ځنګون لیرې کړي.

۴۴ کلن شاوین له هغه وروسته په قتل تورن وپېژندل شو.

د فلوید د مړینې په اعتراض کې پراخ لاریونونه پيل شول چې په ځينو ځایو کې په تاوتریخوالي واوښتل.

له هنده د ۲ پاکستاني ډیپلوماتانو ایستلو په اړه د اسلام‌اباد اعتراض

د پاکستان ملي بیرق

پاکستان د هندوستان د هغه اقدام پر وړاندې اعتراض کړی چې په نوې ډېلي کې يې دوه کارکوونکي د جاسوسۍ په تور له هندوستانه ایستل شوي وو.

د هندوستان د بهرنیو چارو وزارت د شنبې په ورځ (د مې په ۳۰مه) د پاکستان د سفارت دوه چارواکي د جاسوسي فعالیتونو په تور ونیول او وروسته‌یې هغوی ته ۲۴ ساعته وخت ورکړ چې له هندوستانه ووځي.

پاکستان د دې اقدام په اعتراض کې د دوشنبې په ورځ په اسلام‌اباد کې د هند سفارت شارژدافیر احضار کړ او هغه ته‌یې وویل چې د نوې ډېلي تورونه بشپړه بې‌اساسه دي.

د پاکستان د بهرنیو چارو وزارت په اعلامیه کې د هند دا اقدام له ډیپلوماتيکو معیارونو ښکاره سرغړونه یاده شوې.

پاکستان همداراز خپل سفیر له نوې ډېلي ورغوښتی او په اسلام‌اباد کې يې د هند استازی خپل هېواد ته لېږلی دی.

د ایران په خوزستان کې د ښځو د سوک‌وهنې پر لوبو بشپړ بندیز ولګېد

ارشیف، انځور تزئیني بڼه لري.

خوزستان د ایران لومړی ولایت دی چې په‌کې د ښځینه سوک‌وهنې پر لوبو بشپړه بندیز دی.

د نیمه رسمي خبري اژانس ایسنا د راپور له مخې د خوزستان د ښځينه سوک‌وهنې بورډ رئیس حمید زنګانه منش، د یکشنبې په ورځ (د مې په ۳۱مه) نېټه ویلي چې په دې ورزش کې د ښځو ډول فعالیتونه ځنډول شوي دي.

د دې چارواکي په وینا د ایران ولسمشر د دې ورزش فدراسیون ته د ښځو د سوک‌وهنې د ورزش د ځنډولو په خاطر لیک لېږلی چې په نتيجه کې يې په خوزستان کې د دې ورزش زده‌کړه، تمرین او حتی د څرګندونو ټولګي تړل شوي دي.

تر اوسه د دې اقدام لامل نه‌دی واضح شوی او معلومه نه‌ده چې له دې امره سرغړوونکي به څه ډول مجازات کېږي.

په ایران کې د ښځو ډېری ورزشي فعالیتونه ممنوع شوي دي او د دې وضعیت توجیه نه‌ده ورکړل شوې.

مایک پومپیو: ایران ته به اجازه ورنه‌کړو چې اټمي وسلې ترلاسه کړي

مایک پومپیو

د امریکا د بهرنیو چارو وزیر وايي، هېواد یې په ټوله نړۍ کې له خپلو شریکانو سره کار کوي چې د ایران مخه ونیسي چې دا هېواد اټمي وسلې جوړې نه‌کړي.

مایک پومپیو د امریکا له تجارتي شرکتونو انسټټیوت سره د دوشنبې په ورځ د (۲۰۲۰ د جون ۰۱) نېټه په خپرو شویو خبرو کې همداراز ویلي چې د ایران په راکټي پروګرام کې د دې هېواد د توان محدودول د امریکا او متحدانو له لومړیتوبونو څخه دی.

ښاغلی پومپیو زیاتوي: "د ایران جمهوري اسلامي تهدیدونه همغسې دوام لري. دې هېواد څو ځلې په لاسلیک کړي توافق کې له خپلو ژمنو سرغړونه کړې ده. موږ به خپلې مبارزې ته دوام ورکړو."

ایران د ۲۰۱۵م کال په جون میاشت کې له امریکا، بریتانیا، فرانسې، جرمني، روسیې او چین سره موافقه لاسلیک کړه چې د اټمي فعالیتونو محدودولو په بدل کې دې پر دې هېواد بندیزونه کم شي.

خو دوه کاله مخکې امریکا له دې توافقه ووته او پر تهران‌یې نوي بندیزونه ولګول.

ایران په تکراري توګه ویلي چې د دې هېواد د اټمي پروګرام هدف د انرژۍ تولید دی او نه‌غواړي اټمي وسلې جوړې کړي.

پومپیو: د جرمونو نړیوالې محکمې ته به د تحقیق اجازه ورنه‌کړو

د امریکا د بهرنیو چارو وزیر مایک پومپیو

مایک پومپیو په امریکا کې په امیرکن انټرپرایز انسټټیوت کې د دوشنبې په ورځ په خبرو کې وویل چې نه‌یوازې د امریکا د بهرنیو چارو وزارت، بلکې نورې امریکايي ادارې به هم د هغه څه پر وړاندې اقدامات وکړي چې نړیواله جنايي محکمه‌یې هڅه کوي.

پومپیو د دوشنبې په ورځ وویل: "نړیواله جنايي محکمه په اداري فساد اخته ده او د امریکا هغه ځوان سړي او ښځې په نښه کوي چې له قانون سره سم‌يې د نړۍ د یوه لوی مدنیت لپاره جګړه کړې ده. موږ به هېڅکله دوی دې کار ته پرېنږدو."

د امریکا دې لوړپوړي ډیپلومات په داسې حال کې خبرداری ورکړی چې نړیوالې جنايي محکمې خپلو څارنوالانو ته په افغانستان کې د طالبانو، افغان ځواکونو او امریکا د استخباراتي ادارې د احتمالي جنګي جنایتونو په اړه د پلټنو اجازه د روان کال په مارچ میاشت کې ورکړه.

د جورج فلوید د وژنې په غبرګون اعتراضونه نورو هېوادونو ته وغځېدل

د جرمني پلازمېنه برلین کې اعتراضونه

د پولیسو له‌خوا د تور پوستو د وژنو په اعتراض د امریکا د ګڼو ښارونو مظاهرې نورو هېوادونو ته وغځېدې.

زرګونه کسان نن د نیوزیلنډ په څو ښارونو کې په اعتراض راووتل او په امریکا کې یې د جورج فلوید په نوم د یوه تور پوستي تر وژنې وروسته د نژادي بې‌عدالتۍ پر دوام اعتراض وکړ.

فلوید چې کومه وسله‌یې نه‌درلوده، تېره دوشنبه د میناسوتا ایالت په مینیاپولیس ښار کې په داسې حال کې چې یوه سپین پوستي پولیس‌یې پر غاړه زنګون ایښی و، ساه ورکړه.

د نیوزیلنډ په پلازمېنه اوکلنډ کې اعتراض کوونکو د امریکا د قونسلګرۍ مخې ته مظاهره وکړه او په شعارونو کې یې لیکلي وو 'ساه نه‌شم اخیستلی او واقعي ویروس نژادي تبعیض دی'.

د جرمني او بریتانیا په پلازمېنو دغه‌راز د کاناډا په مونتریل او د برازیل په ریو دي ژنیرو کې هم اعتراض کوونکو له امریکایي مظاهره‌چیانو سره خپل پیوستون څرګند کړ.

په ایران او چین کې هم د امریکا د تاوتریخجنو اعتراضونو په وړاندې د امریکا د امنیتي ځواکونو پر اقدام اعتراض وشو.

که څه هم امریکايي چارواکو د فلوید د وژنې په تړاو څلور پولیس افسران له دندو لیرې کړي او د هغه پولیس پر ضد یې جنايي تورونه لګولي چې د قضیې اصلي اړخ دی، خو اعتراضونه کرار شوي نه‌دي.

پرون هم د امریکا په ۷۵ ښارونو کې پراخې مظاهرې شوې وې.

د قرغزستان-ازبکستان د اوسېدونکو سرحدي شخړه کې لسګونه کسان ټپيان شول

آرشیف

د قرغزستان او ازبکستان د اوسېدونکو ترمنځ په تازه سرحدي شخړه کې په لسګونه کسان ټپیان شوي دي.

د قرغزستان روغتیا وزارت نن وویل چې په دې شخړه کې د قرغزستان ۲۵ تنه اتباع هم ټپیان شوي دي.

د وزارت په حواله ۴ تنه ټپیان بستر شوي چې د دوو روغتیایي وضعیت خراب دی.

خو د سیمې اوسېدونکو ازادي راډیو ته ویلي چې په دغو شخړو کې د سیمې ۱۶ اوسېدونکي هم ټپیان شوي دي.

خو د ازبکستان رسمي سرچینو دا موضوع تأیید کړې نه‌ده.

دغه شخړې پرون په سوخ ساحه کې شوي، د ازبکستان هغه سیمه چې د قرغزستان په قلمرو کې ده.

د ازادۍ راډیو خبریال وايي، څرنګه چې په دواړو خواوو ځینو کورونو ته اور اچول شوی، د دواړو خواوو وګړو پر یوه او بل د ډبرو ګوزارونه کول.

په ۱۹۹۱م کال کې د پخواني شوروي اتحاد تر سقوط وروسته، د پخواني شوروي اتحاد زیات جمهوریتونه سرحدي لانجې لري.

ونزوئلا ته د لازیاتو تېلو د صادراتو لپاره د ایران تابیا

ونزوئلا کې د ایران یوه تېل وړونکې بېړۍ

د ایران د بهرنیو چارو وزارت وايي، که ونزوئلا وغواړي تهران به ورته د تېلو صادرات جاري وسات.

د دغه وزارت ویاند عباس موسوي نن په هغه اوونیز کنفرانس کې دا خبره وکړه چې له دولتي ټلوېزیونه په ژوندۍ بڼه خپرېده.

پر ایران او ونزوئلا دواړو د امریکا متحده ایالاتو له‌خوا بندیزونه لګول شوي دي.

واشنګټن هڅه کوي چې ونزوئلا ته د ایران د تېلو د صادراتو مخه ونیسي.

ایران په وروستیو کې ونزوئلا ته په تېلو بار پنځه کښتۍ لېږدولې دي.

د امریکا د جنوب دغه هېواد چې یو وخت د تېلو له عمده تولیدوونکو و، د اقتصادي بحران له کبله د پټرولو له قحطۍ سره مخامخ دی.

د امریکا متحده ایالاتو، حکومتونو، ټرانسپورتي ادارو او بیمه کوونکو ته خبرداری ورکړی، د ایران د تېلو له انتقالوونکو کښتیو سره د همکارۍ په صورت کې به له بندیزونو سره مخامخ شي.

د لمونځ کوونکو پرمخ عربستان او بیت المقدس کې د جوماتونو پرانیستل

په سعودي عربستان کې چې شاوخوا نهه سوه جوماتونه چې د کرونا ویروس د خپرېدو له امله له دوو میاشتو راهیسې تړل شوي و، پرون د لومړي ځل لپاره بېرته پرانستل شول.

په سعودي عربستان او بیت المقدس کې جوماتونه بیرته د لمونځ کونکو پرمخ پرانستل شول او په بریتانیا کې بیا هغو په سلګونو اعتراض کونکو چې په امریکا کې یې له مظاهرو سره خپل ملاتړڅرګنداوه، خپرې شوې د کرونا وبا ته په نه پاملرنې ټولنیز واټن مراعات نه کړ.

په سعودي عربستان کې چې شاوخوا نهه سوه جوماتونه چې د کرونا ویروس د خپرېدو له امله له دوو میاشتو راهیسې تړل شوي و، پرون د لومړي ځل لپاره بېرته پرانستل شول.

په بیت المقدس کې لوی د الاقسا جومات هم د لمونځ کونکو پرمخ بېرته پرانستل شو.

په لندن کې بیا په سلګونو اعتراض کونکو پرلویو غونډو د لګول شویو بندیزونو پام ونه کړاو د امریکا د سفارت په مخکې یې په متحدو ایالتونو کې د یوه سپین پوستي پولیس له خوا د هغه تورپوستې کس د وژل کېدو په اعتراض کې لاریون وکړ چې د امریکا په ګڼو ښارونو کې یې قهرجنې مظاهرې راپارولې دي.

په عین حال کې په ډېرو هېوادونو کې چې د کرونا ویروس د خپرېدو له امله یې بیساري بندیزونه لګولي، د دغو بندیزونو د نرمولو بهیر دوام لري.

د وروستیو شمېرو له مخې په ټوله نړۍ کې پر کرونا ویروس د اخته شویو کسانو شمېر پرون یکشنبې له شپږ میلیون او دوه نیم لکه کسانو واوښت او د دغه کرونا ویروس له امله د مړو شویو شمېر هم نژدې ۳۷۴ زره کسانو ته رسېدلی دی.

نور راوښيه

XS
SM
MD
LG