د لاسرسۍ وړ لېنکونه

تازه خبر
شنبه ۱۰ غبرګولی ۱۳۹۹ کابل ۱۲:۵۸

نړۍ

د امریکا مرستیال ولسمشر او مېرمن‌یې د کرونا ویروس معاینات کوي

د امریکا متحده ایالاتو مرستیال ولسمشر مایک پنس او مېرمن‌یې

د امریکا متحده ایالاتو مرستیال ولسمشر مایک پنس وايي، وروسته له هغې چې د ده دفتر یو غړی په کرونا ویروس اخته وبلل شو، دا او میرمن‌یې د (کووایډ-۱۹) کرونا ویروس معاینات کوي.

مایک پنس پرون په سپینه ماڼۍ کې وویل، د سپینې ماڼۍ معالج ډاکتر په دې باور نه‌دی چې دا دې په ویروس اخته شوی وي او په دې اړه دې معاینه ضرور وي.

خو نوموړي وویل، د هغه ځانګړي موقعیت په خاطر چې د ولسمشر د مرستیال په توګه‌یې لري او د کرونا ویروس سره د مبارزې مشري کوي، نو دا او مېرمن‌یې ځانونه معاینه کوي.

د جان هاپکنز پوهنتون د شمېرو له مخې په متحده ایالاتو کې نږدې ۲۰ زره تنه تر اوسه په کرونا ویروس اخته بلل شوي او دا شمېر په زیاتېدو دی.

تر دې مخکې ولسمشر ټرمپ هم د کرونا ویروس معاینه کړې وه چې پایله‌یې منفي وه.

د ورځې تازه خبرونه دلته ولولئ

امریکا: لیبیا کې د روسیې ۱۴ جیټ الوتکې ځای پر ځای شوي

ارشیف

په افریقا کې د امریکا د پوځ د قومندې مرکز د مسکو هغه ادعا رد کړې چې وايي، د دې هیواد جنګي جیټ الوتکې په لیبیا کې نه دي ځای پر ځای شوي.

د دې مرکز مرستیال ګریګوري هاډفیلډ ویلي، د متحده ایالاتو د څارنې پر بنسټ د روسیې ۱۴ جنګي جیټ الوتکې چې په کې میګ ۲۹ او سو ۲۴ شامل دي، له روسیې څخه تر الوتنې وروسته د لیبیا په الجُفره هوايي ډګر کې ښکته شوي دي.

دا اډه دا مهال د خلیفه حفتر د وسله وال ځواک مهم مرکز بلل کېږي.

په افریقا کې د امریکا د قومندې د مرکز مرستیال د جمعې په ورځ د خبریالانو یوې وړې ډلې ته وویل، په لیبیا کې د روسیې فعالیتونه او د خلیفه حفتر له ځواکونو څخه د مسکو ملاتړ ” اندېښمنونکی “ دی.

د امریکا متحده ایالتونه او نړیواله ټولنه د لیبیا هغه حکومت په رسمیت پېژني چې د خلیفه حفتر د ځواکونو سره په جګړه کې ښکېل دی.

بل خوا داسې راپورونه خپاره شوي چې مسکو د خلیفه هم حفتر د ځواکونو ملاتړ کوي.

خو روسیه وايي، د لیبیا د کورنۍ جګړې له ټولو ښکېلو اړخونو سره تماس کې دي څو د دې هېواد کړکېچ د خبرو له لارې هوار شي.

د تور پوستي امریکايي د وژنې په تور پولیس نیول شوی

د دې پېښې پر ضد درې شپې په پرله پسې ډول د امریکا په مینیا ښار کې خلکو مظاهرې کولې او د پېښې له قرباني سره دي انصاف وشي نارې یې وهلې.

هغه سپین امریکايي پولیس چې د یوه تور پوستي امریکايي پر غاړه یې ځنګون ور ايښې او هغه یې مړ کړی و، نیول شوی او د قتل تور ورباندې لګېدلی دی.

تورن پولیس، ډېرېک چاوین نومېږي.

هغه د مې په ۲۶مه نېټه د جورج فلوید په نوم یو تور پوستی امریکايي سړی نیولی و، لاسونو ته یې ولچکونه ور اچولي او بیا یې هغه پرځمکه غورځولی و.

دا صحنه په سیمه کې یوه ولاړ سړي په ويډیو کې ثبت کړې وه چې پر انټرنټ تر خپرېدو وروسته په ټوله نړۍ کې ډېرو خلکو ولیده.

په ویډیو کې لیدل کېږي چې ۴۶ کلن فلوید په مکرر ډول له پولیسه غوښتنه کوي چې له غاړي یې ځنګون لرې کړي او ورته وايي چې ساه نه شي اخیستلای، خو پولیس د هغه د خبرو پروا نه کوي.

فلوید تر دې پېښې وروسته په روغتون کې مړ شو.

د دې پېښې پر ضد درې شپې په پرله پسې ډول د امریکا په مینیا ښار کې خلکو مظاهرې کولې او د پېښې له قرباني سره دي انصاف وشي نارې یې وهلې.

د مینیسوتا ایالت والي ټیم والز پرون وویل چې په وروستیو مظاهرو کې چور او چاپول او نور غیر قانوني کارونه شوي له دې کبله د ملي ګارد ځواکونه په دنده ګومارل شوي او غږ یې وکړ چې مظاهرې باید بندې شي.

ټېم والز وايي: "دا د مینیسوتا په وروستي تاریخ کې له ډېرو سختو اوونیو وه، ښايي زموږ په ټول تاریخ کې ډېره سخته اوونۍ وه، زموږ ولس، په ځانګړي ډول زموږ د تور پوستو ټولنه داسې خوږ شوې چې په خبرو کې یې نه شم ویلای، په مینیا پولېس او سنټ پاول کې اور بل دی."

تورن پولیس او له هغه سره درې نور همکاران له دندې شړل شوي او د امریکا د استخباراتو فدرالي اداره له ایالتي پولیسو سره په ګډه د پېښې په اړه څېړنې کوي.

د اوکراین او هنګري چارواکو پر دوه اړخیزو اړیکو خبرې کړي

د اوکراین او هنګري د بهرنیو چارو وزیران

د اوکراین او هنګري د بهرنیو چارو وزیرانو پرون، د مې په ۲۹مه، پر دوه اړخیزو اړیکو خبرې وکړې.

اوکراین هڅه کوي چې د ناټو غړی شي خو د رپوټونو په حواله، هنګري په اوکراین کې پر اقلیت ژبو د بندیز د قانون له کبله د دې کار مخنیوی کوي.

هنګري د ناټو غړی هېواد دی.

د اوکراین په لویدیځ کې د زاکراپاتیا په نوم سیمه کې د هنګریانو اقلیت اوسېږي.

په اوکراین کې میشت اقلیتونه د هغه هېواد د نفوس لس فیصده جوړوي.

د اوکراین حکومت په وروستیو کې یو نوی قانون تصویب کړ چې په هغه هېواد کې يې له میشتو اقلیتونو دا حق واخیست چې په خپلو سیمو کې خپلې ژبې دود کړي.

د اروپا پارلماني شورا پردې قانون انتقاد کړی او ویلي یې دي چې په قانون کې په واضح ډول د رسمي ژبې او د اقلیتونو د مليتي ژبو ترمنځ سم توپير نه دی شوی.

د هنګري د بهرنیو چارو وزیر ویلي چې دوي د ناټو په تړون کې د اوکراین د غړیتوب لپاره د خنډ جوړولو هڅه نه کوي بلکه یوې موافقې د رسېدو په لټه کې دي.

ځینو اروپایي هېوادونو کې د کرونا ویروس له امله لګيدلي بندیزونه نرمېږي

ارشیف

په یو شمېر اروپايي هېوادونو کې د کرونا ویروس د مثبتو پېښو د کمېدو له کبله ځیني حکومتونه د بندیزونو د لا زیات نرمېدو پر لور ګامونه پورته کوي.

د بریتانیا حکومت پرېکړه کړې چې له راتلونکې اوونۍ څخه به یو شمېر زده کونکي بېرته ښوونځيو ته د تګ اجازه لري او دوکانونه به هم پرانیستل شي.

د فرانسې حکومت رسټورانټونو ته اجازه ورکړه چې د جون د میاشتې له دوهمې نېټې کولای شي چې خلکو ته په انګړونو او خلاصو ځایونو کې ډوډۍ ورکړي.

موزیمونه به هم راتلونکې اونۍ پرانیستل شي خو خلک به مجبور وي چې ماسک واغوندي.

د بریتانیې او ایتالیا د کورني فوټبال چارواکو ویلي چې د جون میاشتې په نیمايي کې به سیالي هم ولري خو خلکو ته به اجازه نه ورکوي چې د نندارې لپاره په لوبغالي کې را غونډ شي.

خو په روسیه کې وضعیت نازک دی او په نړۍ کې درېیم هېواد دی چې ډېر وګړي په کرونا ویروس اخته شوي دي.

په دې هېواد کې پرون د مثبتو پېښو شمېر درې لکه او اتیا زرو ته رسېدلی و.

په مسکو کې روغتیايي چارواکو پرون وویل چې د کوېډ-۱۹ ناروغۍ له کبله یوازې د اپرېل په میاشت کې لږترلږه ۱۵۶۱ تنه مړه شوي وو.

د مسکو پولیسو لږترلږه ۳۲ کسان نیولي

دا کسان د پېژندل شوي روسي ژورنالیست، اییا اذر د نیول کېدو پر ضد داعتراض لپاره را وتلي وو. 

په مسکو کې پولیسو لږترلږه ۳۲ تنه چې د دوما یو غړی، د ښاروالۍ د شورا یو شمېر استازي او ژورنالیستان هم په کې شامل دی، نیولي دي.

دا کسان د پېژندل شوي روسي ژورنالیست، اییا اذر د نیول کېدو پر ضد داعتراض لپاره را وتلي وو.

ایلیا اذر ۳۵ کلن دی او د نوایا ګزیتا په نوم ورځپاڼې سره یې د ازاد ژورنالیست په توګه کار کاوه.

هغه په روسیه کې د مظاهرو له قانونه په مکرر ډول د سرغړونې له کبله تېره اوونۍ په ۱۵ ورځو زندان محکوم شو.

ایلیا او پلویانو یې په انفرادي مظاهره کې په روسیه کې د کرونا ویروس د لا خپرېدو د مخنیوي لپاره د لګېدلو بندیزونو پر ضد مظاهره کړې وه.

دا معلومات په روسیه کې د څار یوې خپلواکې ادارې، پرون، د مې په ۲۹مه، خپاره کړي دي.

دې ادارې ویلي چې ۸ تنه مدني فعالان هم نیول شوي دي.

دا کسان د روسیې په دوهم لوی ښار، سنت پیترس برګ کې پولیسو نیولي دي.

خو ډېر کسان بېرته خوشې شوي دي.

تاجکستان کې پر یوه خبریال بریدونه شوي

عبدالله غربتي

په تاجکستان کې په یوه خبریال باندې دوه وار په وروستیو څو ورځو کې بریدونه شوي.

عبدالله غربتي د اشیا پلس په نوم یوه ازاد خبري اژانس ته کار کوي چې وروستي کارونه یې په تاجکستان کې د ځمکې د ښووېدو په پېښه باندې د راپورونو جوړول و.

عبدالله غربتي ازادي راډیو ته ویلي چې دریو کسانو نن جمعه پرې لاس پورته کړی او تورن کړی یې دی چې دی خلک پاروي.

غربتي په ختلون سیمه کې د ځمکې ښوویدو په هغې پېښه راپور جوړ کړی و چې پکې دوه کسان مړه شوي و.

دری اوونۍ مخکې هم عبدالله غربتي په پلازمینه دوشنبه کې وهل شوی و او وايي چې له بېلابېلو ځایونو ورته ګواښوونکي پیغامونه لېږل کېږي.

په تاجکستان او په ټوله منځنۍ اسیا کې خبریالان په خپلواکه توګه خبرونه او راپورونه نه شي جوړولای او تل په داسې چارو کې له خنډونو سره مخ کېږي چې په خرابه وضعه کې ان د خبریال په وهل ټکولو، شکنجې، حبس او وژلو تمامېږي.

د ازادې اروپا راډیو تاجکي سرویس څانګې خبریالان هم له ځینو کاري محدودیتونو سره مخ وي او دولت یې وخت په وخت د کار جوازونه په یوه او بله پلمه نه تمدیدوي.

د اروپايي ټولنې او منځنۍ اسیا چارواکو ترمنځ ویډیويي کنفرانس

اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

د اروپايي ټولنې چارواکو پرون د منځنۍ اسیا او افغانستان د بهرنیو چارو د وزارتونو له مرستیالانو سره په سیمه کې د کرونا ویروس د خپرېدو په وضیعت او یو لړ نورو مسئلو د ویډیويي کنفرانس له لارې خبرې کړي دي.

د افغانستان د بهرنیو چارو وزارت په یو بیان کې ویلي چې د پنجشنبې په ورځ په دې کنفرانس کې په سیمه کې د کرونا ویروس پر ضد د شریکې مبارزې او د منځنۍ اسیا هېوادونو او افغانستان سره د اروپايي ټولنې د اړیکو په لرلید تفصیلي بحث وشو.

له بلې خوا د اروپايي ټولنې د بهرنیو اقداماتو د ادارې مشرې ماریا هلګا چې دا غونډه یې تنظیم کړې وه، پر خپل ټویټر لیکلي چې اروپايي ټولنه د خپلو شریکانو سره د کویډ - ۱۹ویروس په وړاندې مبارزه کې ولاړه ده.

نوموړې زیاته کړې، اړتیا ده چې د سیمه ایزو او نړیوالو ننګونو او افغانستان کې د سولې په اړه ګډ کار دوام وکړي.

په دې کنفرانس کې د اروپايي ټولنې د یو شمیر لوړپوړو ډیپلوماټانو سربېره د افغانستان او منځنۍ اسیا د پنځو نورو هېوادونو د بهرنیو چارو د وزارتونو مرستیالانو برخه درلوده.

د مسکو یوې محکمې یو مخکښ ژورنالیست په بند محکوم کړی

محکمې ۳۵ کلن سیمه ییز استازی او د نووایا ګزیته ژورنالیست د اعتراضونو په اړه د روسیې له سخت قانون څخه په مکرر سرغړاوي مجرم وباله.

د مسکو یوې محکمې یو مخکښ ژورنالیست په ۱۵ ورځې بند محکوم کړ.

له بلې خوا پولیسو یو شمېر هغه کسان نېولي چې د دې ژورنالیست په ملاتړ یې اعتراض کړی و.

محکمې ۳۵ کلن سیمه ییز استازی او د نووایا ګزیته ژورنالیست د اعتراضونو په اړه د روسیې له سخت قانون څخه په مکرر سرغړاوي مجرم وباله.

د او وي ډي-انفو په نوم د یوې خپلواکې ویبپاڼې د معلوماتو پر بنسټ چې د سیاسي اعتراضونه پر مهال نیونې څاري، ۶ هغه ژورنالیستان هم نیول شوي چې د ازر سره د یو والي د ښودلو په خاطر د پولیسو د مرکزي دفتر مخې ته راټول شوي وو.

ازر د سه شنبې په ورځ د ویلادیمیر ورونڅوف څخه د ملاتړ په خاطر د یو کسیز اعتراض پر مهال نیول شوی و.

ورونڅوف د روسیې د قانون پلي کونکو ادارو د سرغړاویو د افشا هڅه کوله.

نوموړی چې د پولیسو پخوانی افسر دی، د مې د میاشتې لومړیو کې د باج اخیستلو په تور ونیول شو او وروسته پرې نور تورونه هم ولګول شول.

نوموړې پر ده لګیدلي تورونه رد کړي دي.

د بخښنې نړیوال سازمان د ازر نیونه د منتقدانو د غلي کولو یوه بزدلانه هڅه بللې ده.

د کاسوو اساسي قانون محکمې د نوي صدراعظم د ګمارلو فرمان قانوني وباله

د کورتي او ملاتړې یې د نویو پارلماني انتخاباتو غوښتنه کوي.

د کاسوو د اساسي قانون محکمې د ولسمشر هاشم تاچي هغه فرمان قانوني وباله چې د سرپرست صدراعظم البین کورتي پر ځای یې نوی صدراعظم ګمارلی دی.

تمه کېږي چې د پنجشنبې په ورځ ناوخته د محکمې دا پرېکړه به د کیڼ اړخي نیشنلیست ګوند ویتیویندوسۍ په ملاتړ مظاهرې راوپاروي.

دا ګوند تر وخت مخکې د عمومي انتخاباتو د ترسره کېدو غوښتنه کوي.

د محکمې تر پریکړې مخکې، د دې ګوند څو زره ملاتړو د پلازمېنې پریستینا په مرکزي سیمه کې په باران کې (تمریني) اعتراض جوړ کړی و او ویل یې دوی په دې اعتراض کې ځکه برخه اخیستې څو په هغه صورت کې چې د محکمې پرېکړه د دوی په خوښه نه وي لویو مظاهرو ته چمتو اوسي.

د دې لپاره چې د کرونا ویروس محدودیتونه یې مراعت کړي وي، اعتراض کونکو له یو بل د واټن ساتلو، ماسکونو او دستکشونو اغوستو اصول په پام کې نیولي وو.

تاچي د اپریل په ۳۰ مه د کاسوو د منځني ښي اړخي ډیموکرات لیګ عبدالله هوتي د کورتي پر ځای صدراعظم ونوموه.

خو د کورتي د ویتیویندوسۍ ګوند دا فرمان غیرې قانونې وباله او د اساسي قانون په محکمه کې یې ددې فرمان د ننګولو لپاره شکایت ثبت کړ.

د کورتي او ملاتړې یې د نویو پارلماني انتخاباتو غوښتنه کوي.

د بې سرحده ژورنالیستانو سازمان: پاکستان دې د وژل شوي خبریال په اړه څېړنې وکړي

ذولفقار مندراني

د بې سرحده ژورنالیستانو نړیوال سازمان د پاکستان په سند ایالت کې د یو وژل شوي ژورنالیست د قتل د قضیې د څېړنې لپاره د ځانګړې او خپلواکې ډلې د څېړنې غوښتنه کړې ده.

د کاوش او کوشش په نوم د سندي ژبې د ورځپانو د خبریال ذولفقار مندراني مړی د مې په ۲۶ مه نېټه د پاکستان د سند ایالت په دوداپور ښارګوټي کې وموندل شو چې شکنجه شوی او په سر په ‌ډزو وژل شوی و.

په همدې ورځ په نژدې ښار لړکانه کې پولیسو ددې قتل په تور د دوو کسو د نیولو اعلان وکړ او د نوموړې وژنه یې یوه ناموسي قضیه وبلله.

خو د بې سرحده ژورنالیستانو سازمان د اسیا پاسفیک د برخې مشر ډانیل باسټارډ ویلي، د ځايي پولیسو ددې ادعا په اړه چې د مندراني وژنه یې د غیرت په نوم وژنه بللېد شک ډیر دلایل شته.

د دې ژورنالیست پلار د خپل زوی د قتل په اړه له پولیسو سره شکایت درج کړې چې په کې د یو پولیس افسر په ګډون څو نور مشکوک کسان په ګوته شوې دي چې د نشه يي موادو د یو سیمه ییز قاچاقبر سره یې تړاو درلود.

د وژل شوي ژورنالیست پلار وايي، زوی د دې قاچاقبر د فعالیتونو په اړه څېړنې کولې.

د بې سرحده ژورنالیستانو د سازمان د اسیا پاسفیک د برخې مشر د پاکستان د سند ایالت له اعلی وزیر غوښتي چې ددې قضیې د څیړنې لپاره دې سېمې ته یو خپلواک څیړونکی پلاوی واستوي.

دا د روان میلادي کال د پیل راهېسې دویم ژورنالیست دی چې د پاکستان په سند ایالت کې وژل کېږي.

محمد باقر قالیباف د ایران پارلمان مشر وټاکل شو

محمد باقر قالیباف

د ایران پارلمان د تهران پخوانی ښاروال محمد باقر قالیباف د پارلمان د مشر په توګه وټاکه.

قالیباف چې د فبرورۍ پارلماني انتخاباتو کې یې تر ټولو ډېرې رایې له پلازمېنې تهران څخه ترلاسه کړې وې، یو وخت د سپاه پاسداران د هوایي ځواکونو د قوماندان په توګه هم پاتې شوی دی.

د ایران د پارلمان موقت مشر رضا تقوي نن د ښاغلي قالیباف ټاکنه داسې اعلان کړه: "محمد باقر قالیباف د ۲۳۰ رایو په اخیستلو سره د یوه کال لپاره د پارلمان د مشر په توګه وټاکل شو."

ویل کېږي نوموړی له دې کبله چې د ایران ستر مذهبي مشر ایت‌الله علي خامنه‌یي ته ډېر وفادار دی، نو دې ته لار پرانیستل شوه چې د پارلمان مشر شي.

امریکا کې د کرونا ویروس له کبله د مړو شمېر تر ۱۰۰ زرو واوښت

ارشیف

په امریکا متحده ایالاتو کې د کرونا ویروس له کبله د مړو شمېر تر ۱۰۰ زرو واوښت.

سره له دې چې په امریکا کې د کارونو د بیا پرانیستلو او لګېدلي محدودیتونو د کمېدو چارې دوام لري، خو دغه ویروس له تېرو درېیو میاشتو راهیسې دغه هېواد سخت ځپلی دی.

د جانز هاپکنز پوهنتون شمېرې ښیي چې د چهارشنبې په ورځ په امریکا کې یو میلیون او ۷۰۰ زره کسان په کرونا ویروس اخته شوي او له همدې ویروس څخه تر پرون پورې ۱۰۰ زره او ۴۷ تنه مړه شوي دي.

د رسمي شمېرو له مخې دا مهال په امریکا کې د کرونا ویروس د قربانیانو شمېر په کوریا او ویتنام کې د دې هېواد د جګړو تر تلفاتو ډېر دی.

په همدې حال کې د امریکا ولسمشر ډونالد ټرمپ چې په لومړي سر کې یې د دې ویروس شدت او اهمیت کم ښوده، اوس د محدودیتونو پر کمولو ټینګار کوي.

دا مهال د امریکا په ټولو ۵۰ ایالتونو کې په بېلابېلو سطحو محدودیتونه کم شوي او کارونه بېرته پرانیستل شوي دي.

په ټوله نړۍ کې په کرونا ویروس د اخته کسانو شمېر ۵ میلیونه او ۶۵۰ زره تنه دي همدې ویروس تر اوسه په نړۍ کې ۳۵۰ زره کسان مړه کړي دي.

پومپیو: له ایران سره د ملکي اټمي همکاریو معافیت پای ته رسېږي

د امریکا د بهرنیو چارو وزیر مایک پومپیو

د امریکا بهرنیو چارو وزیر وایي، له ایران سره د روسیې، چین او اروپایي کمپنیو د ملکي اټمي همکاریو پر سر وضع شوی معافیت پای ته رسېږي.

مایک پومپیو پرون د مې په ۲۷مه وویل، ایران د اټمي پروګرام په اړه خپلې یو شمېر ژمنې ماتې کړي، نو ځکه پرې د دې معافیت دوام توجیه کېدای نه‌شي.

دا د نړۍ له قدرتونو سره د ایران د اټمي تړون وروستۍ لاسته راوړنې دي چې د له‌منځه تلو په حال کې دي.

ښاغلي پومپیو ویلي، د ایران اټمي هڅې به پر دغه هېواد فشارونه زیات کړي او دغه رژیم به له نړیوالې ټولنې نه نور هم منزوي یا ګوښه شي.

د ایران لپاره د امریکا ځانګړي استازي براین هوک خبریالانو ته ویلي، ایراني چارواکي دوه لارې مخته لري، دوی به یا له امریکا سره خبرو ته رامخته کېږي او یا به هم د خپلې اقتصادي ماتې غم خوري.

د امریکا استازو جرګې پر چینايي چارواکو د بندیز لګولو لایحه تصویب کړه

د امریکا د استازو جرګه

د امریکا د استازو جرګې په مطلق اکثریت داسې لایحه تصویب کړه چې له ډونالد ټرمپ نه غواړي د اویغور مسلمانانو د ځپلو لپاره په چینایي چارواکو بندیزونه ولګوي.

دغه لایحه چې د همدې میاشتې په سر کې سنا هم پاس کړې، پر هغو چینایي چارواکو د بندیزونو غوښتنه کوي چې د لږکیو اویغور مسلمانانو د ځورولو تورونه پرې پورې دي.

د استازو جرګې مشرې نانسي پلوسي ویلي، د بېجنګ دا وحشیانه کړنې چې د اویغور مسلمانانو په ضد یې کوي، د ټولې نړۍ جمعي وجدان ته بې‌احترامي ده.

د امریکا د استازو جرګې دا لایحه اوس د ولسمشر ډونالد ټرمپ توشېح ته وړاندې کېږي، هغه له دې وړاندې ویلي چې پر چین د دې لپاره د بندیزونو پر لګولو غور کوي چې په هانګ کانګ کې یې د ملي امنیت اړوند خپل قانون تحمیل کړی دی.

ملګرو ملتونو او د بشري حقونو ملاتړو بنسټونو چین تورن کړی چې شااوخوا یو میلیون اویغور مسلمانان او نور لږه‌کي یې د اجباري کارونو یوه کمپ کې راټول کړي، خو چین له دوی نه د ناوړه ګټې اخیستنې تورونه رد کړي دي.

د چچنیا مشر د خپل روغتیايي وضعیت په اړه خپاره شوي راپورونه رد کړل

د چچنیا مشر رمضان قدیروف

د چچنیا مشر رمضان قدیروف وایي، صحت‌یې لکه څرنګه چې راپورونه خپاره شوي هغسې نه‌دی، بهتره دی.

قدیروف په کرونا ویروس اخته شوی دی. ده پرون په یوه مرکه کې چې په انستاګرام کې یې په ژوندۍ بڼه له خپل مرستیال احمد دوداییف سره کوله وویل چې دی بېخي ښه دی.

تر دې یوه ورځ مخکې په پلازمېنه ګروزني کې د غونډې پر مهال د قدیروف پر ښي لاس په ټلوېزیون کې د پیچکارۍ کنول ښکارېده.

تېره اوونۍ روسي رسنیو وویل چې ۴۳ کلن قدیروف مسکو ته راغلی دی او د کرونا ویروس له امله بستر شوی دی.

قدیروف ولسمشر ولادیمیر پوتین ته ډېر وفاداره دی او دی د قفقاز په شمال کې له بشري حقونو څخه په پراخو سرغړونو تورن دی.

نور راوښيه

XS
SM
MD
LG