د لاسرسۍ وړ لېنکونه

تازه خبر
پنجشنبه ۲۱ وری ۱۳۹۹ کابل ۱۱:۰۶

نړۍ

تر اوسه کرونا ویروس ټوله نړۍ کې ۱۱۴۰۰ کسان مړه کړي

تر ايټالیا وروسته چین دی او هلته د کرونا ویروس له امله د مړو شمېر ۳۲۵۹ تنه ښودل شوی دی.

په نړۍ کې د کرونا ویروس له امله د مړو شمېر ۱۱۴۰۰ ته لوړ شوی او په دې ویروس د اخته کسانو شمېر ۲۷۵۰۰۰ ته لوړ شوی دی.

دا شمېر نن، د مارچ په ۲۱، د امریکا جان هاپکنز پوهنتون اعلان کړی دی.

په دې اړه ویل شوي چې ایټالیا کې د مړو شمېر د نړۍ د نورو هېوادونو په پرتله زیات دی.

په دې هېواد کې په کرونا ویروس د اخته وګړو شمېر له ۴۷۰۰۰ اوښتی او تر ۴۰۳۲ زیات وکړي مړه شوي دي.

تر ايټالیا وروسته چین دی او هلته د کرونا ویروس له امله د مړو شمېر ۳۲۵۹ تنه ښودل شوی دی.

له ایرانه رسمي شمېرې څرګندوي چې ۱۴۳۳ تنه د کرونا ویروس له امله مړه شوي خو ډير ایرانیان شک لري چې د هغه هېواد حکومت د کرونا ویروس د تلفاتو شمېر دقیق نه څرګندوي څو هلته د دې ویروس د خپرېدو اندازه کمه وښيي.

د تهران د چارواکو په وینا، په دې هېواد کې تر نن سهاره پورې د کرونا ویروس ۱۹۶۲۰ مثبتې پيښې ثبت شوې وې.

د ورځې تازه خبرونه دلته ولولئ

بخښنې نړیوال سازمان: ایران رژیم ۳۶ بندیان وژلي

د بخښنې نړیوال سازمان نن پنجشنبه دا خبره په یوه اعلامیه کې کړې ده.

د بخښنې نړیوال سازمان وايي په دې باور دی چې د ایران رژیم ۳۶ هغه بندیان وژلي چې د کرونا ویروس د مخنیوي لپاره‌یې د حکومت له‌خوا د رخصت شویو بندیانو په لېست کې نومونه نه‌و او په همدې خاطر یې غږ پورته کړی و.

د بخښنې نړیوال سازمان نن پنجشنبه دا خبره په یوه اعلامیه کې کړې ده.

د بخښنې نړیوال سازمان په اعلامیه کې راغلي چې "په څو زندانونو کې د بندیانو د ځپلو لپاره له اوښکې بهوونکي ګاز او وژونکو وسایلو کار اخیستل شوی چې په نتیجه کې یې په یوه زندان کې لږ تر لږه ۳۵ کسان مړه شوي او یو بل کس هم په یوه بل زندان کې د امنیتي ځواکونو له‌خوا وهل شوی او ساه‌یې ورکړې ده."

په دې وروستیو ورځو کې د ایران په لږ تر لږه اتو زندانونو کې بندیانو په دې خاطر چې د کرونا ویروس په سبب د رخصت شویو بندیانو په ډله کې نه‌و، غږ پورته کړی و.

د ایران قضائیه قوې دا راپور نه‌دی تأیید کړی.

ایران مخکې هم د خپلو خلکو په وژلو او ځورولو تورن دی.

تر ټولو لویه بېلګه‌یې د هغو مظاهره‌چیانو ځپل او وژل دي چې د اقتصادي بې‌وزلیو او بې‌کاریو په سبب‌یې تېر لړم میاشت غږ پورته کړ، خو د حکومت له‌خوا سخت وځپل شول.

د امریکا متحده ایالاتو ویلي چې د لړم په مظاهرو کې تر یو نیم زر ایرانیان د رژیم له‌خوا ووژل شول.

اکسفام: د نړۍ مشران دې د مرستو بشپړه بسته وړاندې کړي

د مرستو رسولو نړیواله ډله اکسفام

د مرستو رسولو نړیواله ډله اکسفام د نړۍ له مشرانو غواړي چې د مرستو بشپړه بسته وړاندې کړي.

د دې ډلې هدف دا دی چې د کرونا ویروس د منفي اقتصادي اغېزو په خاطر څه باندې نیم میلیارد خلک له بې‌وزلۍ سره مخ نه‌شي.

اکسفام نن په یوه راپور کې ویلي شتمنو هېوادونو د دې ناورین پر مهال وښودله چې د خپل اقتصاد د ملاتړ لپاره زرګونه میلیارده ډالره چمتو کولای شي.

د اکسفام په خبره دا هېوادونه باید د بې‌وزلو هېوادونو لپاره هم دا کار وکړي.

د ډې دلې په خبره اړتیا یې ده چې د کرونا ویروس د خپرېدو پر مهال د مخ پر ودې هېوادونو د ملاتړ لپاره دوه نیم ټریلیونه ډالره بېل کړي.

دا هغه اندازه پیسې دي چې د ملګرو ملتونو سازمان له‌خوا یې اټکل شوی.

د کرونا ویروس د اقتصادي زیان په اړه د سوداګرۍ نړیوال سازمان ګواښ

د سوداګرۍ نړیوال سازمان رئیس روبېرټو ازېوېډو

د سوداګرۍ نړیوال سازمان ګواښ کړی چې د کرونا ویروس له لاسه اوښتی اقتصادي زیان به د اوسنۍ زمانې تر ټولو ژور اقتصادي تاوان وي.

دا خبره د یاد سازمان رئیس روبېرټو ازېوېډو په یوه بیان کې کړې ده.

په نړۍ کې د کرونا ویروس له لاسه شااوخوا نیمايي خلک په یو ډول نه یو ډول قرنطین دي او لویې او وړې سوداګرۍ په ټپه ولاړې دي.

ځینو هېوادونو اوس دا هڅه پیل کړې چې څنګه وکولای شي د کرونا ویروس په خاطر لګېدلي محدودیتونه چې اقتصادي چارې‌یې سختې زیانمنې کړي، اسانه کړي.

د جانز هاپکنز پوهنتون د شمېرو له مخې په ټوله نړۍ کې په کرونا ویروس د اخته خلکو شمېر نږدې یو نیم میلیون او د مړو شمېر نږدې ۹۰ زرو (۸۹۷۳۳) تنو ته رسېدلی دی.

په ټوله نړۍ کې بیا د هغو خلکو له ډلې چې په کرونا اخته دي څه باندې درې لکه او ۳۷ زره کسان بېرته روغ شوي هم دي.

سوریه په دغه هېواد کې د کیماوي وسلو پر استعمال ګرمه وبلل شوه

ارشیف، سوریه کې شوې حمله

د کیماوي وسلو پر استعمال د بندیز سازمان څېړونکي ټیم په سوریه کې د کیمیاوي وسلو د استعمال په اړه خپل لومړنی راپور پرون چهارشنبه خپور کړ.

په دغه راپور کې د سوریې حکومت ګرم بلل شوی چې د ۲۰۱۷ کال په مارچ کې‌یې په مرکزي ښارګوټي اللطامنة د کلورین او سارین ګازو بمونه استعمال کړي دي.

تر دې مخکې دې سازمان یوازې ویلي و چې په سوریه کې په بریدونو کې کیمیاوي وسلې استعمال شوي، خو په زغرده‌یې کوم لوری نه‌و تورن کړی.

دغه څېړونکي ټیم ویلي چې په دې اړه چې په سیمه کې به د سوریې د هوایي ځواکونو افرادو دغه زهرجن بمونه استعمال کړي، کره او د باور وړ شواهد راټول کړي دي.

لوېدیځو هېوادونو له ډېرې مودې راهیسې د سوریې د ولسمشر بشرالاسد رژیم د دې هېواد په نهه کلنه کورنۍ جګړه کې د خپلو یاغي وسله‌والو او ملکیانو پر ضد د کیماوي وسلو پر استعمال تورن کړی دی.

روسیه او ایران چې د هغه د رژیم کلک ملاتړي دي، دغه تورونه رد کړي او یاغي وسله‌وال‌یې ګرم بللي دي.

د دغه نوې ادعا په اړه تر اوسه دمشق عکس العمل نه‌دی څرګند کړی خو په دغه سازمان کې د روسیې دایمي استازي ویلي چې دغه راپور د اعتبار وړنه‌دی.

ازبکستان کې د شکنجې دوام په اړه د ملګرو ملتونو اندېښنه

د ملګرو ملتونو لوګو

د ملګرو ملتونو د بشري حقونو کمېټه چې په ازبکستان کې د بشري حقونو وضعیت څېړي، د دې هېواد په توقیف ځایونو کې د شکنجې د دوام او د اساسي ازادیو د محدودیت په اړه اندېښنه څرګندوي.

دغې کمېټې په خپل څېړنیز راپور کې چې پرون چهارشنبه‌یې خپور کړی دا موندلې چې تر اوسه ډېر هغه اصلاحات چې د بشري حقونو په برخه کې‌یې ژمنه شوې، نه‌دي عملي شوي.

د ملګرو ملتونو د بشري حقونو د کمېټې څېړنه ښیي ازبکستان چې د بشري حقونو خورا بده سابقه لري، تر ډېره مستبد بلل کېږي.

دا له کله چې ولسمشر شوکت میرضیایف په ۲۰۱۶ کال کې واک ته رسېدلی د ملګرو ملتونو د بشري حقونو د کمېټې لومړنۍ څېړنه ده.

میرضیایف واک ته له رسېدو وروسته په دې هېواد کې د اصلاحاتو د عملي کېدو لپاره یو لړ اقدامات کړي، خو د بشري حقونو د څارنې کمېټه د بشري حقونو وضعیت تر اوسه د اندېښنې وړ بولي.

د سعودي عربستان په مشرۍ ائتلاف په یمن کې اوربند اعلان کړ

په یمن کې یو شمېر حوثي جنګیالي

د سعودي عربستان په مشرۍ ائتلاف چې په یمن کې د ایران‌پلوه شیعه حوثیانو په وړاندې جنګېږي، نن اوربند اعلان کړ.

دغه اوربند چې له نن غرمې څخه عملي کېږي، په دې هېواد کې د پنځه کلنې کورنۍ جګړې د پای ته رسېدو لپاره د ملګرو ملتونو د هڅو په ملاتړ شوی دی.

د دغه ائتلاف ویاند ډګروال ترکي ال‌مالکي پرون په یوه خپاره کړي بیان کې وویل چې دغه اوربند به دوه اوونۍ دوام وکړي، خو ښایي اوږد هم شي.

هغه همدارز وویل چې دغه اوربند ځکه اعلانوي چې په یمن کې د کرونا ویروس د خپرېدو له مخنیوي سره مرسته وکړي.

د ملګرو ملتونو عمومي منشي انتونیو ګوترش په تېره مارچ میاشت کې د یمن په ګډون د نړۍ له ټولو هغو هېوادونو او سیمو چې په‌کې جګړې او شخړې روانې دي، غوښتي و چې کرونا ویروس د لا خپرېدو د مخنیوي لپاره جګړې ودروي.

دا لا معلومه نه ده چې هوثي سخت دریځي به دغه اوربند سره موافقه وکړي.

د دوی ویاند محمد عبدالسلام ویلي، هوثیانو ملګرو ملتونو ته یو داسې جامع وړاندیز لېږلې چې د جګړې پای ته رسول هم په کې شامل دي.

عبدالسلام په ټویټرپاڼه لیکلي، د حوثیانو وړاندیز به سیاسي دیالوګ او انتقالي پړاو ته بنسټ برابر کړي.

په یمن کې چې د عربي نړۍ بې‌وزله هېواد دی وروسته له هغه تاوتریخوالی پیل شو چې ۲۰۱۴ کال کې‌یې حوثي یاغیانو هلته حکومت وپرځاوه.

وروسته سعودي او ایران هم د یمن جګړه کې په نیابتي ډول ښکېل شول، له دې سره یمن له ناوړه بشري ناورین سره مخامخ شو.

د اروپايي ټولنې هېوادونو ترمنځ د سفر د بندیز هڅې

ارشیف، په فرانسه کې یو شمېر مسافر

د اروپایي ټولنې اجرایي برخې، اروپایي کمېسیون د دې ټولنې پر غړو غږ کړی چې لږترلږه د مې تر ۱۵مې د هغو هېوادو ترمنځ چې یو بل ته له پاسپورټ پرته د سفر جواز لري، پر تګ راتګ بندیز وساتي، څو د کرونا ویروس خپرېدل ورو کړي.

د اروپایي کمېسیون مرستیال مشر مارګریتیس شیناس د اپرېل پر اتمه د یوې اعلامیې په خپرولو ویلي د اروپایې ټولنې ټولو غړو هېوادونو په بریالیتوب سره له یو بل څخه د فاصلې ساتلو اقدامات مراعات کړي دي څو د ویروس د خورېدو امکان کم شي.

هغه زیاته کړه د اروپایې ټولنې له بهرنیو پولو څخه دې اتحادیې ته د نورو هېوادونو د وګړو پر سفرونو بندیز دغه اقدامات لا بشپړولی شي.

د دې کمېسیون مسؤلین وایي له بهرنیو پولو څخه شنګن زون ته د داخلېدو په محدودیتونو کې د مهمو توکو راوړل نه‌شاملېږي لکه خوراکي مواد، درمل او تولیدي وسایل کولای شي له ځنډ پرته راشي څو خلک د خوراکي موادو له کموالي سره مخامخ نه‌شي.

برني سندرز د ولسمشرۍ انتخاباتو ډګر جوبایډن ته پرېښود

سناتور برني سندرز او جوبایدن

امریکایي سناتور برني سندرز د خپلې ولسمشرۍ لپاره کمپاین وځنډاوه او خپل سیال جوبایډن ته‌یې لار هواره کړه چې د ‌ډیموکرات ګوند له‌خوا نوماند او د ولسمشر ډونالد ټرمپ سره په ولسمشرۍ انتخاباتو کې سیالي وکړي.

۷۸ کلن سناتور سندرز په یوه وېډیویي پیغام کې د دې پرېکړې په اړه پرون خبرې کړې دي.

سندرز جوبایډن یو نېک کس بللی او ژمنه‌یې وکړه چې د هغه ترڅنګ به ودرېږي څو د روان کال په وروستیو کې ډونالد ټرمب ته ماته ورکړي.

د امریکا ولسمشرۍ انتخابات د روان کال په نومبر میاشت کې کېږي. دا دوهم ځل دی چې برني سندرز له خپلې نوماندۍ تېرېږي.

په ۲۰۱۶ کال کې هم نوموړی هېلري کلنټن ته له خپلې نوماندۍ تېر شو.

مصر د شپې ګرځېدو بندیز د دوو اوونیو لپاره غځوي

ارشیف، مصر

مصر د کرونا ویروس د مخنیوي لپاره په هغه هېواد کې د شپې ګرځېدو بندیز د دوو اوونیو لپاره غځوي.

د مصر صدراعظم مصطفی مدبولي پرون خبریالانو ته وویل چې دا ګرځ‌بندیز به د ماښام له اتو بجو د سهار تر شپږو بجو نافذ وي.

ښوونځي، پوهنتونونه، رستورانتونه او کافې به هم تړلې وي، د مصر حکومت د اپرېل میاشتې تر پایه هوایي ټرانسپورت او نور ټول سیاحتي او مذهبي ځایونه د تګ راتګ لپاره تړلي دي.

د مصر صدراعظم زیاته کړه چې د دې بندیز سرغړونکي به په څلور زره مصري پونډه چې د ۲۵۰ ډالرو معادل کېږي نغدي جریمه او حتی د حبس سزا به ورکړل شي.

نوموړي زیاته کړه چې د کابینې غړي به د درېیو میاشتو لپاره د خپلې میاشتنۍ تنخواه ۲۰ فیصده بې‌وزله کسانو ته ځانګړې کړي.

د مصر د عامې روغتیا وزارت د شمېرو له مخې، ۱۴۵۰ کسان په دې هېواد کې په کرونا ویروس اخته شوي او ۹۴ تنه ترې مړه شوي دي.

ایران له کرونا ویروس سره د مبارزې لپاره میلیاردونه ډالره پور غوښتی

د ایران ولسمشر حسن روحاني

د ایران ولسمشر حسن روحاني په خپل هېواد کې له کرونا ویروس سره د مبارزې لپاره د پیسو له نړیوال وجهي صندوقه د ملیاردونو ډالرو پور غوښتی دی.

روحاني نن د اپرېل ۸مه د خپلې کابینې په غونډه کې وویل چې د ایران په وړاندې باید په چلند کې توپیر ونه‌شي.

د ایران مرکزي بانک تېره میاشت د پیسو له نړیولې ادارې پنځه میلیارده ډالر پور غوښتی و.

ایران په ټول منځني ختيځ کې له هغو هېوادونو دی چې تر ټولو زیات وګړي په کرونا ویروس اخته شوي او له دې امله مړه شوي دي.

د ایران د روغتیا وزارت پرون وویل چې تر ۶۲۵۰۰ زیات وګړي په دې ویروس اخته دي او له ۳۸۰۰ زیات له دې ویروسه مړه شوي دي.

د بریتانیا صدراعظم لا هم په روغتون کې تر جدي څارنې لاندې دی

د بریتانیا صدراعظم

د بریتانیا صدراعظم بورېس جانسون چې په کرونا ویروس اخته دی بېګا دوهمه شپه هم په روغتون کې تر جدي څارنې لاندې تېره کړه.

بورېس جانسون د نړۍ تر ټولو لوی سیاسي مشر دی چې کرونا ویروس نیولی دی.

د هغه ویاند نن د اپرېل ۸مه، ویلي چې د صدراعظم روغتیايي وضعیت ثبات لري، خو د دې لپاره چې تر نظر لاندې وي، په ای سي یو یا د شدید مراقبت په خونه کې ساتل کېږي.

د بورېس جانسون مسئولیتونه د اوس لپاره د بریتانیا د بهرنیو چارو وزیر دومنیک راب ته سپارل شوي دي.

راب ویلي باور لري چې بورېس جانسون به له کرونا ویروس سره جنګ وګټي ځکه هغه یو جنګیالی دی.

نیویارک کې د کرونا ویروس له امله د مړو شمېر ۴۰۰۰ تنو ته لوړ شو

دا پر نیویارک ښار د سپټمبر د ۱۱مې په حملو کې تر وژل شویو وګړو نږدې ۱۰۰۰ تنه زیات دي.

د امریکا په نیویارک ښار کې د کرونا ویروس له امله د مړو شمېر ۴۰۰۰ ته لوړ شو.

دا شمېره پرون د اپرېل ۷مه خپره شوې ده.

دا پر نیویارک ښار د سپټمبر د ۱۱مې په حملو کې تر وژل شویو وګړو نږدې ۱۰۰۰ تنه زیات دي.

دا په داسې حال کې ده چې د نړۍ په ځیني سیمو کې چې د کرونا ویروس سخت خپور شوی و، خو خلک په کورونو ننوتل او د واټن ساتلو مراعت‌یې وکړ، ویروس سوکه سوکه د کمېدو په حال کې دی.

کرونا ویروس یوازې په بریتانیا کې ۵۵ زره کسان نیولي او تر ۶۲۰۰ زیات پرې مړه شوي دي.

د اروپايي هېوادونو د اقتصادي ژغورنې پر پلان بحث پیل شوی

د اروپايي ټولنې د مالیې وزیرانو پرون د وېډیو کنفرانس له لارې خبرې پیل کړې.

د اروپايي ټولنې مالیې وزیرانو نن چهارشنبه د اروپايي هېوادونو د اقتصادي ژغورنې پر پلان د اختلافاتو د حل کولو لپاره خبرې وکړې.

د دغو هېوادونو اقتصاد د کرونا وبا بد ځپلی دی.

د اروپايي ټولنې د رئيس ویاند لویس ریګو پر خپله ټویټرپاڼه لیکلي: "د «کوویډ-۱۹» په وړاندې د اروپايي ټولنې ستره اقتصادي پالېسي ښه پر مخ روانه ده، خو لا وروستۍ شوې نه‌ده."

ټاکل شوې ده چې نن سهار د مالیې وزیرانو له غونډې وروسته په یوه خبري غونډه کې خبریالانو ته جزئیات وړاندې شي.

د اروپايي ټولنې د مالیې وزیرانو پرون د وېډیو کنفرانس له لارې خبرې پیل کړې.

روسیې او قطر د فوټبال نړیوال جام په اړه وروستۍ ادعاوې رد کړ

ارشیف

روسیې او قطر د فوټبال نړیوال جام سیالیو د حق د ترلاسه کولو لپاره د میلیونونو ډالرو رشوت ورکولو تازه ادعاوې رد کړې.

د امریکا عدلیې وزارت د تازه تور پر اساس، د فیفا یا د فوټبال د نړیوال فدراسیون چارواکو د دې لپاره چې په ۲۰۱۸ کې په روسیه او په ۲۰۲۲ کې په قطر کې د فوټبال د نړیوال جام سیالیو ته رایې ورکړي، رشوت اخیستی دی.

په دواړو ځایونو کې د فوټبال له سیالیو سره د موافقې په اړه له ډېر پخوا راهیسې پلټنې او اوازې روانې دي، خو په دې تازه تور کې چې د دوشنبې په ورځ خپور شو، د دواړو جامونو په اړه نوي مستقیم او رسمي تورونه لګول شوي دي.

قطر دا ادعاوې په کلکه رد کړې او روسیې وویل چې د ۲۰۱۸ کال د فوټبال د نړیوال جام حق‌یې یو مخ له قانوني لارې ترلاسه کړی و.

ایران کې د کرونا ویروس وېره؛ پارلمان‌یې لومړۍ غونډه وکړه

د پارلمان په دې غونډه کې رئیس علي لارجاني نه‌و ځکه چې هغه تېره اوونۍ په کرونا ویروس اخته شو.

د ایران پارلمان د سې شنبې په ورځ وروسته تر دې خپله لومړۍ غونډه وکړه چې په دې هېواد کې کرونا ویروس خپور شوی دی.

تهران پرون وویل چې اوومه ده چې په پرله‌پسې توګه په کرونا ویروس د اخته کسانو شمېر په ایران کې په کمېدو دی.

د ایران پارلمان ۲۰۰ نوي غړي لري چې درېیمه برخه وکیلان دې غونډې ته حاضر شوي وو، خو د پارلمان رئیس علي لارجاني نه‌و ځکه چې هغه تېره اوونۍ په کرونا ویروس اخته شو.

د ایران پارلمان د فبرورۍ په ۲۵مه بند شو او د پارلمان لږ تر لږه ۳۱ غړي په کرونا ویروس اخته شوي دي.

د دې سربېره چې په ایران کې امر شوی دی چې خلک به سره نږدې نه‌درېږي او نه‌کېني، د پارلمان په پرونۍ غونډه کې وکیلان سره نږدې ناست وو.

په ایران کې کرونا ویروس د فبرورۍ په ۱۹مه لومړی کس نیولی و او دغه هېواد د نړۍ یو له هغو هېوادونو څخه دی چې کرونا ویروس په‌کې ډېر خپور شوی دی.

د ایران روغتیا وزارت پرون وویل چې ۳۸۷۲ تنه تر اوسه کرونا ویروس په ایران کې وژلي دي او څه باندې ۶۲۵۰۰ تنه د 'کوویډ-۱۹' په اخیستونکې او وژونکې ناروغۍ اخته شوي دي.

داسې اندېښنې شته چې په ایران کې چارواکي د دې ناروغۍ په اړه سمې شمېرې نه‌خپروي او اصلي شمېرې تر اعلان شویو ډېرې لوړې دي.

نور راوښيه

XS
SM
MD
LG