د لاسرسۍ وړ لېنکونه

تازه خبر
پنجشنبه ۲۱ وری ۱۳۹۹ کابل ۰۶:۱۸

افغانستان

د سولې ولسي حرکت: طالبانو لا هم 'نظري' نه دی خوشې کړی

د سولې ولسي حرکت یو انځور- ارشیف

د سولې ولسي حرکت وايي، په ارزګان ولایت کې د دوی د یوه مخکښ غړي د تښتول کېدو ۲۰ ورځې پوره شوې خو لا نه دی خوشې شوی.

د دې حرکت ویندوی بسم الله وطندوست ازادي راډیو ته وویل چې نظر جان نظري د امریکا او طالبانو ترمنځ د فبروۍ په ۲۹ د سولې د موافقې د لاسلیک په ورځ د طالبانو تر کنټرول لاندې سیمې ته تللی و چې د دې ډلې له لوري ونیول شو.

بسم الله وطندوست له طالبانو وغوښتل چې د دوی غړی ښاغلی نظري ژر تر ژره خوشې کړي.

وطندوست همداراز وویل چې له طالبانو سره یې تر اوسه د نظري د خلاصون په اړه څو ځلې خبرې کړي او هغوی له ژمنې سره سره نه دی خوشې کړی.

طالبانو تر دې پخوا هم په ځلونو د سولې د ولسي حرکت غړي نیولي خو له څه مودې وروسته یې بېرته خوشې کړي دي.

د ورځې تازه خبرونه دلته ولولئ

فضل محمود فضلي د چارو ادارې د لوی رئیس په توګه وټاکل شو

فضل محمود فضلی

د افغانستان جمهور رئیس محمد اشرف غني د یوه فرمان په صادرولو فضل محمود فضلي د چارو ادارې د لوی رئیس په توګه ټاکلی دی.

دا خبره د ولسمشر ویاند صدیق صدیقي په خپله ټویټر لیکلې ده.

فضل محمود فضلي په سیاسي چارو کې د افغان ولسمشر ستر سلاکار و.

افغان ولسمشر داسې وخت ښاغلی فضلي د چارو ادارې د لوی رئیس په توګه ټاکلی چې تېره یکشنبه‌یې د نوې کابینې د مقرریانو لړۍ د پنځو ورځو په مخه درولې وه څو له عبدالله عبدالله سره سیاسي خبرې مخته ولاړې شي.

داعش ډلې پر بګرام هوايي ډګر د راکټي حملې مسؤلیت واخیست

هغه موټر چې پر بګرام هوايي ډګر ورڅخه راکټي حمله شوې وه.

د بګرام په هوايي ډګر د نن سهار راکټي بریدونو مسؤلیت داعش یا اسلامي دولت ډلې په غاړه اخیستی دی.

دې ډلې په یوه بیان کې ادعا کړې چې د بګرام په پوځي اډه کې یې د هیلیکوپټرو د ناستې ساحه یا هیليپډ هدف ګرځولی دی.

اخوا په افغانستان کې د ناټو د غوڅ ملاتړ مأموریت په خپله ټویټر پاڼه تأیید کړې چې په بګرام هوايي اډه نن سهار پنځه راکټونه لګېدلي دي.

په دې ټوېټ کې ویل شوي چې چاته په دې راکټي بریدونو کې زیان نه‌دی اوښتی او د افغانستان امنیتي او دفاعي ځواکونه پېښه څېړي.

داعش یا اسلامي دولت ډلې داسې وخت په بګرام هوايي اډې چې د امریکايي ځواکونو تر ټولو لویه پوځي اډه په‌کې ده د راکټي بریدونو مسؤلیت ومانه چې د اسلامي دولت د خراسان څانګې یا ای اس کې مشر اسلم فاروقي او ګڼ ملګري یې څو ورځې مخکې د افغانستان د ملي امنیت له‌خوا نیول شوي.

د پروان د پولیسو ویاند هارون مبارز هم ازادي راډیو ته مخکې تأیید کړې وه چې د بګرام هوايي اډې ته نږدې له جان قدم کلي نه راکټونه توغول شوي و چې دوه‌یې په هوايي اډه کې دننه او درې یې دېوال ته نږدې لګېدلي و.

هغه ویلي و چې څوک په دې بریدونو کې نه‌دي ژوبل، خو مالي تاوان‌یې اړولی دی.

د طالبانو ویاند ذبیح‌الله مجاهد څو ساعته مخکې په خپل ټویټر لیکلي چې په بګرام هوايي ډګر توغندیز برید دوی نه‌دی کړی.

په بګرام هوايي ډګر تر دې مخکې هم ډېر داسې بریدونه شوي چې اکثر یې مسؤلیت طالبانو ته راجع شوی.

وروستی وار د ۲۰۱۹ کال د ډسمبر په ۱۱ سهار وختي طالبانو په دوو موټربم او یوه ځانمرګي بریدګر په دې هوايي ډګر برید وکړ چې ډګر ته نږدې د هستوګنو ملکیانو له ډلې دوه کسان ووژل شول او ۸۰ نور ټپيان شول.

افغانستان کي د کرونا ویروس ۴۰ نوې مثبتې پېښې ثبت شوې

افغانستان کې د کرونا ویروس د پېښو شمېر ۴۸۴ ته رسېدلی دی

د افغانستان عامې روغتیا وزارت وايي چې په تېرو ۲۴ ساعتونو کې د کرونا ویروس ۴۰ نوې مثبتې پېښې ثبت شوي.

دا خبره د یاد وزارت ویاند وحیدالله مایار نن په یوه اعلامیه کې کړې ده.

د هغه په خبره په دې سره په ټول افغانستان کې د کرونا ویروس د مثبتو پېښو شمېر ۴۸۴ ته رسېدلی دی.

تازه پېښې ۱۰ په کابل، ۱۴ په نیمروز، ۷ په کندهار، ۴ په پکتیا، ۲ په بامیان، ۲ په بلخ او یوه په لوګر کې ثبت شوې دي.

د عامې روغتیا وزارت د څرګندونو له مخې یوازې یو کس په ۲۴ ساعتونو کې بېرته روغ شوی او په ټول هېواد کې د هغو کسانو شمېر چې درملنه‌یې شوې او روغ شوي ۳۲ ته رسېږي.

د کرونا ویروس له لاسه په افغانستان کې د مړو شمېر ۱۵ ته رسېدلی دی.

د افغانستان د کورنیو چارو وزارت د کرونا ویروس د مخنیوي په هدف په کابل کې تدابیر جدي کړي او نن‌يې ویلي چې که په ښار کې څوک بې‌موجبه ګرځېده نیسي يې.

ملي امنیت شورا: د طالبانو ۱۰۰ نور زندانیان به نن ازاد شي

د چهارشنبې په ورځ خوشې شوي طالب بندیان

د افغانستان د ملي امنیت شورا دفتر وایي چې نن به هم ۱۰۰ نور طالب بندیان ازاد شي.

د دې شورا ویاند جاوېد فیصل ازادي راډيو ته وویل: "د جمهور رئيس غني د لومړۍ ګڼې فرمان سره سم به نن ۱۰۰ تنه نور طالب بنديان د بګرام له زندان څخه د هغوی سن، روغتیایي وضعیت او د بند مودې ته په پام سره ازاد شي."

پرون هم ۱۰۰ طالب بندیان د حکومت له‌خوا خوشې شوي وو.

د ملي امنیت شورا ویاند جاوېد فیصل زیاتوي چې د پرونیو ازادو شویو بندیانو له ډلې ځيني خپل کورونو ته هم رسېدلي دي.

خو طالبان د خوشې شویو او خوشې کېدونکو بندیانو په اړه وایي چې د دوی او امریکا ترمنځ د هوکړې له مخې د تأیید وړ نه‌دي.

د امریکا او طالبانو په هوکړه کې راغلي چې تر پنځه زره طالب بندیان به خوشې کېږي هغه څه چې افغان حکومت‌یې په یو وار د منلو وړ نه‌بولي، بلکې وايي چې په تدریجي شکل به د سولې د مذاکراتو د پروسې د یوې برخې په توګه خوشې کېږي.

'میدان وردګ کې هوايي حملې د طالبانو نومول شوی والي وژلی'

د افغانستان په عمومي نقشه کې میدان ورګ

د میدان وردګ ولایت سیمه‌ییز چارواکي وايي چې هلته په یوه هوايي برید کې د طالبانو نومول شوی والي او څلور نور وسله‌وال کسان وژل شوي دي.

په دې اړه د میدان وردګ ولایت له مقامه ازادي راډيو ته په استول شوې خبرپاڼه کې راغلي چې د طالبانو نومول شوی والي ملا ولي جان مشهور په حمزه او څلور نور کسان‌یې تېره ورځ د سیداباد ولسوالۍ پټان‌خېلو کلي کې د وسله‌والو مخالفینو پر یوه قرارګاه په هوايي برید کې وژل شوي او اته تنه نور وسله‌وال ټپیان دي.

د میدان وردګ ولایت په خبرپاڼه کې راغلي دي چې په دغه بريد کې د وسله‌والو مخالفینو د یوه پټن‌ځای سربېره د دوی یو شمېر وسلې او مهمات هم له‌منځه تللې دي.

وسله‌والو طالبانو تر اوسه په دې اړه څه نه‌دي ویلي.

کندهار، غزني او پکتیا کې د کرونا ۱۴ نوې پېښې تأیید شوې

ارشیف، د کرونا ویروس د تشخیص لابراتوار

د افغانستان په ځینو ولایتونو له هغې ډلې کندهار، غزني او پکتیا کې د کرونا ویروس ۱۴ نویو پېښو تأیید شوی دی.

د کندهار د عامې روغتیا رئیس محمد اشرف نادري ازادي راډیو ته وویل چې په تېرو ۲۴ ساعتونو کې په دغه ولایت کې د کرونا ویروس ۹ مثبت پېښې ثبت شوي چې په دې سره کندهار کې د کرونا ویروس د مثبتو پېښو شمېر ۳۲ ته ورسېد.

د غزني د عامې روغتیا رئیس ظاهر شاه نېکمل هم ازادي راډیو ته تأیید کړه چې په غزني کې یوه بله مثبته پېښه ثبت شوې.

د هغه په خبره له دې سره په غزني کې په کرونا ویروس د اخته کسانو شمېر شپږو ته ورسېد.

اخوا په پکتیا کې د والي ویاند عبدالله حسرت ازادي راډیو ته وویل چې د دوی روغتیايي ټیمونو هم ۴ نورې مثبتې پېښې ثبت کړې دي.

په افغانستان کې په کرونا ویروس د اخته خلکو شمېر نږدې ۴۵۰ ته رسېدلی چې له ډلې‌یې د ۱۴ کسانو مړینه تأیید شوې او د ۳۱ کسانو درملنه هم شوې.

د افغانستان د کورنیو چارو وزارت د کرونا ویروس د مخنیوي په هدف په کابل کې تدابیر جدي کړي او نن‌يې ویلي چې په ښار کې د بې‌موجبه ګرځېدو مخه نیسي.

پر بګرام هوايي ډګر ۵ راکټونه توغول شوي

پر بګرام هوایي ډګر له دغه موټر شوی برید

د پروان ولایت امنیتي چارواکي وایي چې نن سهار د بګرام هوايي ډګر په لور ۵ راکټونه توغول شوي وو.

د پروان د امنیه قوماندانۍ ویاند محمد هارون مبارز ازادي راډيو ته وویل چې دا راکټونه له جان قدم کلي د هوايي ډګر په لور فیر شوي.

د هغه په خبره دوه راکټونه په هوايي ډګر لګېدلي چې مالي زیان‌یې اړولی، خو څوک‌یې نه‌دي ژوبل کړي.

درې نور راکټونه د بګرام هوايي ډګر دېوال ته نږدې لګېدلي دي.

د دې راکټي بریدونو مسؤلیت چا نه‌دی اخیستی.

د طالبانو ویاند ذبیح‌الله مجاهد تازه په خپل ټویټر لیکلي چې په بګرام هوايي ډګر توغندیز برید دوی نه‌دی کړی.

په بګرام هوايي ډګر تر دې مخکې هم ډېر داسې بریدونه شوي چې د ډېرو مسؤلیت‌یې طالبانو ته راجع شوی.

وروستی وار د ۲۰۱۹ کال د ډسمبر په ۱۱ سهار وختي طالبانو په دوو موټر بم او یوه ځانمرګي بریدګر په دې هوايي ډګر برید وکړ چې ډګر ته نږدې د هستوګنو ملکیانو له ډلې دوه کسان ووژل شول او ۸۰ نور ټپيان شول.

د طالبانو-امریکا تړون کې د بشري حقونو نه‌یادېدو په اړه اندېښنه

د بشري حقونو په چارو کې د افغانستان د دولت وزیره سیما سمر

د بشر حقونو په چارو کې د افغانستان د دولت وزیره سیما سمر وايي د طالبانو او امریکا متحده ایالاتو په تړون کې د بشري حقونو د نه‌یادېدو په اړه اندېښمنه ده.

دا تړون د فبرورۍ په ۲۹مه د قطر پلازمېنه دوحه کې لاسلیک شوی و.

اغلې سمر پرون په دې اړه ازادي راډیو ته وویل: "زه د یوې ښځې او د دې هېواد د یوې اوسېدونکې په صفت سخته اندېښمنه یم چې د متحده ایالاتو او طالبانو په موافقتنامه کې د بشري حقونو او د افغانستان اسلامي جمهوریت په اړه یوه کلمه هم نه‌ده ویل شوې."

له دې مخکې د امریکا د استازو جرګې د څار او سمون کمېټې مشرې کارولین بي. مالوني ویلي و له دې ډېره اندېښمنه ده چې د ولسمشر ډونالد ټرمپ د ادارې او طالبانو ترمنځ د سولې په تړون کې د افغان ښځو او نجونو د حقونو د خوندیتوب لپاره یوه کلمه هم نه‌ده راغلې.

دې او همکارانو یې دا خبره د افغانستان د بیارغونې لپاره د امریکا د مرستو د سرمفتش جان سوپکو تر څرګندونو وروسته وکړه.

سوپکو ویلي و دا لا معلومه نه‌ده چې امریکا له افغانستانه د خپلو پوځیانو تر ایستلو وروسته د افغان ښځو او نجونو د حقونو ملاتړ ته څنګه دوام ورکولای شي.

پکتیا کې د قرنطین له امله هټیو ته هم د خرڅلاو اجازه نه‌ورکول کېږي

پکتیا ولایت

د پکتیا ولایت سوداګرۍ او پانګونې خونې مشر وایي چې دې ولایت کې د قرنطیني مقرراتو له امله د خوراکي موادو هټیو ته هم د خرڅلاو اجازه نه‌ورکول کېږي.

نصیر عالم‌یار نن ازادي راډیو ته وویل چې دا کار د دې لامل شوی چې خلک له جدي ستونزو سره مخ او بیې هم لوړې شوې دي.

هغه وویل چې د ولسمشرۍ ماڼۍ د حکم پر بنسټ، درملتونونه، مېوه، سبزي او خوراکي مواد دا درې برخې باید پرانیستې وي.

هغه زیاته کړه چې دې ولایت کې د دغه حکم خلاف کار شوی او د خوراکي او لومړنیو توکو خرڅوونکو ته د فعالیت اجازه نه‌ورکول کېږي.

هغه اندېښمن دی که د ډنډ پټان لار د سوداګرو پر مخ خلاصه نه‌شي د پکتیا ولایت به له لا ډېرو اقتصادي ستونزو سره مخ شي.

د چمن او تورخم لارو خلاصېدل د افغانستان په بازار مستقیم اغېز لري

تورخم لار

د افغانستان سوداګرۍ او پانګونې خونه وایي په اوونۍ کې درې ورځې د بار وړونکو افغان موټرو پر وړاندې د چمن او تورخم لارو خلاصېدل د افغانستان په بازار مستقیم اغېز لري.

د دې خونې ویاند جان اقا نوید نن ازادي راډیو ته وویل چې اوسنیو شرایطو کې د داسې ګام اخیستل کولای شي چې د وارداتي موادو په انتقال او بازار کې د موادو د بیو په کنټرول کې مرسته وکړي.

له دې وړاندې د تورخم او چمن لارو تړل کېدلو له امله د افغان سوداګرو د سوداګریز مالونو نږدې ۱۰ زره کانټینره په هغه هېواد کې بند پاتې و، د ښاغلي نوید په وینا له دې وروسته به هغه ټول افغانستان ته را انتقال شي.

دا په داسې حال کې ده چې د پاکستان بهرنیو چارو وزارت اعلان کړی چې دغه هېواد به د افغانستان د بار وړونکو موټرو پر مخ د تورخم او چمن لارې د محدود وخت لپاره پرانیزي.

پاکستان د بهرنیو چارو وزارت ویاندې عایشې فاروقي په خپله ټویټر پاڼه کې لیکلي چې د پاکستان دولت د افغانستان باربري موټرو ته اجازه ورکوي چې اوونۍ کې درې ورځې د تورخم او چمن له لارې خپل سوداګریز مالونه افغانستان ته وارد کړي.

د سالنګ لویه لاره بند شوه

د سالنګ بنده شوې لاره

د سالنګ لویه لاره له غره د ډبرو د رالوېدو له امله د ټرافیکو پر مخ بنده شوې ده.

د سالنګونو د حفظ او مراقبت ادارې رئیس محمد ضمیر عمرخېل نن سهار ازادي راډیو ته وویل چې تېره نیمه شپه د هیجان په سیمه کې ډبرې راوښویېدې چې په نتیجه کې‌یې دوه موټره ویجاړ او یو موټر چلوونکی ټپي شو.

ښاغلي عمرخېل ویلي چې د واورو د اورېدو دوام او توپانونو ته په پام د دې خطر شته چې نورې ډبرې هم له غره راوښوېږي، نو ځکه‌یې د مسافرو د خوندیتوب لپاره دغه لاره د ټرافیکو پر مخ تړلې ده.

هغه همداراز ویلي چې له لارې د ډبرو د لیرې کېدو لپاره ځانګړو عملیاتو لکه چاودنو ته اړتیا ده، خو ورسره د دې خطر هم شته چې د پېښې ځای ته نږدې وارداتي برښنا یوې پایې ته زیان ونه‌رسېږي.

د سالنګونو د حفظ او مراقبت ادارې رئیس ویلي نه‌شي ویلی چې کله به دغه لاره بېرته د ټرافیکو پر مخ پرانیزي. تر دې مخکې ډېر ځلې د واورو د ښویېدو او توپانونو له امله دغه لاره بنده شوې ده.

د تورخم او سپین بولدک دروازې د تجارتي لاریو پر مخ پرانیستل کېږي

د تورخم لار

د پاکستان حکومت اعلان کړی چې افغانستان ته د تجارتي لاریو او کانټینرونو د لېږد لپاره به د تورخم او سپین بولدک دروازې پرانیزي.

د پاکستان د بهرنیو چارو وزارت ویاندې عایشه فاروقي تېر ماښام پر ټویټر لیکلي چې دغه لارۍ به د اپرېل له ۱۰مې او په اوونۍ کې درې ورځې (دوشنیه، چهارشنبه او جمعه) افغانستان ته ولاړې شي.

په اسلام‌اباد کې د افغانستان سفیر عاطف مشعل پر خپل ټویټرپاڼه د دې پرېکړې هرکلی کړی او لیکلي‌یې دي دا ډول همکاري د دواړو هېوادونو ترمنځ د اړیکو د لا ښه کولو لپاره له ګډو هڅو سره مرسته کوي.

په همدې حال کې د کندهار د والي ویاند بهیر احمدي تېر ماښام ازادي راډیو ته په دې اړه وویل: "یوازې په چمن کې تر دوه زره پورې موټر ولاړ دي. دغه‌راز شاوخوا ۱۳۰۰۰ په کراچۍ کې ولاړ دي. تمه کېږي د سبا ورځې له پیل سره چې کومه هوکړه شوې د سوداګریزو موټرو پر مخ به دروازه پرانیستل شي، نو په لومړي سر کې هغه موټر چې په ډبلیو اف پي (د خوړو نړیوال سازمان) پورې مربوط دي، د افغانستان خاورې ته داخل شي."

پاکستان د تېرې مارچ میاشتې په نیمایي کې اعلان وکړ چې د کرونا وېروس په تړاو د اندېښنو له کبله به له افغانستان سره د تګ راتګ لارې د مسافرو او ټرانزیت پر مخ تړي.

د تېرې دوشنبې پر ورځ پاکستان د مسافرو لپاره د تورخم او سپین بولدک لارې پرانیستلې او په تېرو ۳ ورځو کې زرګونه افغانان بېرته افغانستان ته ستانه شوي دي.

د افغانستان کورنیو چارو وزارت پر پلي ګرځېدونکو محدودیت ډېروي

ارشیف، کابل کې پولیس

د افغانستان کورنیو چارو وزارت سر له نن پنجشنبه څخه په کابل ښار کې پر پلي ګرځېدونکو کسانو محدودیتونه او پوښتنې ډېروي.

د کورنیو چارو سرپرست وزیر مسعود اندرابي تېر ماښام پر خپله ټویټرپاڼه دا خبره کړې ده.

ښاغلي اندرابي لیکلي چې په کابل کې د چهارشنبې په ورځ د پولیسو تدابیر ډېر وو. نوموړي په دې برخه کې د خلکو او هم د امنیتي ځواکونو له همکارۍ څخه مننه کړې ده.

د کورنیو چارو سرپرست وزیر لیکلي سر له نن څخه به پلي ګرځېدونکي کسان وپوښتل شي.

ښاغلي اندرابي پرون په کابل کې وویل چې ۱۶۰۰ افراد او ۴۰۰ موټر یې مؤظف کړي چې په کابل کې پرته له هغو کسانو چې اجازه ورته شته د خلکو تګ او راتګ ودروي.

روغتیایي کارکوونکي، امنیتي ځواکونه، رسنۍ، د بانکونو کارکوونکي او د مخابراتي شبکو کارکوونکي او د خوراکي موادو پلورونکي له دې بندیز څخه مستثنی شوي دي.

ښاغلي اندرابي په ماښامني ټویټ کې یو ځل بیا ویلي چې په دې لېست کې شامل کسان مستثنی دي.

حکومت د مارچ په ۲۸مه، په کابل کې د کرونا ویروس د خپرېدو د مخنیوي په هدف د درېیو اوونیو لپاره ګرځ‌بندیز اعلان کړی وو چې تر ډېره خلکو ترې سرغړونې کړې دي.

هرات چارواکي د کرونا ویروس د ټسټ موادو په تمه دي

هرات کې د کرونا ویروس لپاره ځانګړی شوی روغتون

په هرات کې چارواکي وايي چې د کرونا ویروس د ټسټ لپاره ضروري موادو ته په تمه دي.

د هرات د عامې روغتیا ریاست ویاند محمد رفیق شېرزي نن د اپرېل په ۸مه، ازادي راډیو ته وویل چې دوی ۵۰ روغتیايي متخصصانو ته هم اړتیا لري.

په هرات کې د کرونا ویروس د معاینې او تشخیص یو مرکز فعال دی.

د افغانستان عامې روغتیا وزارت پرون ویلي وو چې د کرونا ویروس د ټسټ لپاره د اړتیا مواد به نن هرات ته ورسېږي.

شېرزي وویل چې د تخصصي موادو د کموالي له امله، له پرون راهیسې د کرونا ویروس د تشخیص پروسه بنده ده.

د افغانستان عامې روغتیا وزارت د امیري کمپلېکس فعالیت وځنډاوه

د کرونا ویروس د ټسټ کولو په اړه د امیري کمپلېکس اعلان

د افغانستان عامې روغتیا وزارت په یو تازه اقدام کې په کابل کې د امیري کمپلېکس په نوم د شخصي روغتون فعالیتونه له دې امله وځڼدول چې د یاد روغتون ډېری کارکوونکي په کرونا ویروس اخته شوي دي.

د عامې روغتیا وزارت ویاند وحیدالله مایار د چهارشنبې په ورځ «۱۳۹۹ کال د وري ۲۰» په کابل کې یوې خبري غونډې ته وویل چې د دغه روغتون ۶،۲۵ سلنه پرسونل په کرونا ویروس اخته شوي دي.

دا څرګندونې وروسته له هغې کېږي چې وړمه ورځ د حنیف‌الله حنیف په نوم د دغه روغتون یو ډاکتر چې په دغه ویروس اخته و، مړ شو.

د افغانستان عامې روغتیا وزارت وايي، د دغه روغتون ډېری کارکوونکي ځکه په کرونا ویروس اخته شوي چې د دغه ویروس ټستونه‌یې کول.

د امیري روغتون رئیس میروس امیري بیا وايي چې د دوی سمپلونه اخیستل شوي، خو نتیجه‌یې نه‌ده ورکړل شوې.

نوموړی په امیري روغتون کې د کرونا ویروس د ټستونو کولو موضوع ردوي، خو وايي د دوی کېټونه د عامې روغتیا وزارت له‌خوا مهر او لاک شوي.

د افغانستان عامې روغتیا وزارت مخکې له دې شخصي روغتونونه او لابراتوارونه د دغه ټسټ له کولو منع کړي و.

د افغانستان د عامې روغتیا وزارت د معلوماتو له مخې تر اوسه په ټول افغانستان کې ۴۲۳ کسان په کرونا ویروس اخته شوي چې له دې شمېر ۱۴ کسان مړه شوي دي.

نور راوښيه

XS
SM
MD
LG