د لاسرسۍ وړ لېنکونه

تازه خبر
سه شنبه ۲۱ زمری ۱۳۹۹ کابل ۱۲:۲۶

افغانستان

ارګ او ملي دفاع وزارت د زابل په پېښه کې وسله وال طالبان ښکېل وبلل

ارګ

د افغانستان جمهوري ریاست او دفاع وزارت، وسله وال طالبان په زابل کې پر افغان امنیتي ځواکونو په خونړي برید تورن کړل.

د جمهوري ریاست ویاند صدیق صدیقي نن مازیګر په ټویټر کې لیکلي، چې د طالبانو د حملو دوام، تاوتریخوالي او د سولې پروسې ته د دې ډلې د مخالفت تعهد څرګندوي.

تر دې مخکې د زابل والي رحمت اله یارمل ازادۍ راډیو ته ویلي وو، چې د نفوذي کسانو په حمله کې ۲۴ امنیتي پوځيان وژل شوي دي.

بلخوا د افغانستان دفاع وزارت په یوه اعلامیه کې ویلي چې طالبانو د خپلو نفوذي کسانو په مرسته په دې حمله کې د ملي اردو ۱۱ سرتېري او ۶ پولیس وژلي دي.

د اعلامیې په حواله، دفاعي او امنیتي ځواکونه به دغه حمله بې ځوابه نه پرېږدي.

دا له کله چې امریکا له طالبانو سره د سولې موافقه لاسلیک کړې، پر افغان پوځیانو تر ټولو خونړۍ حمله بلل کېږي.

وسله والو طالبانو لا د دې حملې په اړه څه دي ویلي.

د ورځې تازه خبرونه دلته ولولئ

دفاع وزارت: زابل کې ۱۶ طالبان وژل شوي او ۳ نور ټپیان دي

ارشیف

د افغانستان دفاع وزارت وايي چې په زابل ولایت کې د طالبانو د حملو د شنډولو په عملیاتو کې ۱۹ تنه طالبان مړه او ټپیان شوي دي.

دفاع وزارت په یوه بیان کې چې نن سهار خپور شو ویلي چې طالبانو غوښتل تېره شپه د میزانې ولسوالۍ پر ځینو سیمو حملې وکړي، خو افغان ځواکونو یې مخه ونیوله چې په ځوابي حملو کې ۱۶ طالبان وژل شوي او درې نور ټپیان دي.

طالبانو د دفاع وزارت د دې ادعا په اړه تر اوسه څه نه‌دي ویلي.

خیرخانه کې چاودنې یو تن وژلی او ۲ کسان ټپي دي 

د افغانستان نقشه

د کابل امنیه قومانداني د کابل ښار په ۱۱مه حوزه کې په یوه چاودنه کې د یوه تن د مړینې او دوو کسانو د ټپي کېدو خبر ورکوي.

د امنیه قوماندانۍ ویاند فردوس فرامرز په یوه بیان کې وايي پېښه نن سهار وختي د خیرخانه مېنې د نوې پروژې پر سړک هغه مهال وشوه چې پر یوه پېک اپ موټر مقناطیسي بم وچاودېد.

ښاغلی فرامرز وايي چې د پېښې په اړه څېړنې پیل شوي.

کورنیو چارو وزارت: یوه اوونۍ کې ۱۷۵ ملکي وګړو ته مرګ‌ژوبله اوښتې

د افغانستان د کورنیو چارو وزارت

د افغانستان د کورنیو چارو وزارت وایي په وروستۍ یوه اوونۍ کې په بېلابېلو بریدونو کې ۱۷۵ ملکي وګړو ته مرګ‌ژوبله اوښتې ده.

د کورنیو چارو وزارت ویاند طارق ارین تېر ماښام د اګسټ ۱۰مه ازادي راډیو ته وویل چې دا تلفات د طالبانو په بریدونو کې اوښتي او له دې ډلې یې وغوښتل چې د تاوتریخوالي د کمېدو په اړه خپلې ژمنې پوره کړي.

هغه زیاته کړه: "له اوربند وروسته او د تېرې یوې اوونۍ په لړ کې د طالبانو د بریدونو په ترڅ کې زموږ ۱۷۵ ملکي هېوادوالو ته مرګ‌ژوبله اوښتې. ۸۰ تنه شهیدان شوي او ۹۵ نور ټپيان دي. د تاوتریخوالي کموالی د خلکو له اساسي غوښتنو دی او طالبان باید دې غوښتنې ته په عمل کې ځواب ووايي."

د تاوتریخوالي کموالی د امریکا او طالبانو ترمنځ د فبرورۍ د ۲۹مې د موافقې له عمده برخو څخه وو، خو افغان حکومت او طالبان دواړه یو بل په پاروونکو اقداماتو تورنوي.

وسله‌والو طالبانو تر اوسه د کورنیو چارو وزارت د تازه شمېرو په اړه تبصره نه‌ده کړې.

د بین‌الافغاني خبرو پیل په اړه له غني او عبدالله سره د سټولټنبرګ خبرې

ارشیف، ولسمشر غني، عبدالله عبدالله او ینس سټولټنبرګ

د ناټو سرمنشي وایي د افغانستان له ولسمشر او د مصالحې عالي شورا مشر سره‌یې د بین‌الافغاني خبرو د پیل په اړه خبرې کړې دي.

ینس سټولټنبرګ د دوشنبې په ماښام پر خپل ټویټر ولیکل چې محمد اشرف غني او عبدالله عبدالله سره په خبرو کې یې د سولې مذاکراتو هرکلی کړی.

د نوموړي په خبره ټول اړخونه باید له رامنځته شوي تاریخي فرصت څخه استفاده وکړي.

سټولټنبرګ دغه‌راز ټینګار کړی چې د ناټو د ترورېزم پر وړاندې مبارزه کې د افغانستان ترڅنګ درېږي او خپل حضور به د افغانستان د سولې بهیر څخه د ملاتړ لپاره تنظیم کړي.

مشورتي لویې جرګې د یکشنبې په ورځ د پاتې ۴۰۰ طالب بندیانو له خوشې کېدو سره موافقه وکړه. تر دې وروسته ولسمشر اشرف غني پرون د دغو زندانیانو د خوشې کېدو فرمان لاسلیک کړ.

د سولې په چارو کې د دولت وزارت وایي د اګسټ له ۱۸ تر ۲۰مې نېټې پورې راتلونکې اوونۍ به بین‌الافغاني خبرې په قطر کې پیل شي.

طالبانو هم ویلي چې هر وخت د دوی بندیان خوشې شي په څو ورځو کې به له حکومت سره خبرو ته کېني.

ملي امنیت شورا: د پاته ۴۰۰ طالب زندانیانو راخوشې کول نه‌دی پیل شوی

د افغانستان ولسمشر محمد اشرف غني

د افغانستان د ملي امنیت شورا چارواکي وايي، تر اوسه د پاته ۴۰۰ طالب زندانیانو د راخوشې کولو بهیر نه‌دی پیل شوی، خو وروسته له هغه چې ولسمشر په دې اړه فرمان لاسلیک کړي، د بندیانو د خلاصون بهیر به پیل شي.

دا خبره په ملي امنیت شورا کې د ملکیانو د خوندیتوب او د پخلاینې د چارو مشر انتظار خادم ازادي راډيو ته وکړه.

ښاغلی خادم زیاتوي: "ولسمشر فرمان لاسلیک کوي او د لارښوونې پر اساس به‌یې بندیان راخوشې کړو. تر اوسه خلاصون نه‌دی پیل شوی. خو موږ ژمن یو او پلان هم ورته لرو."

د افغانستان ولسمشر اشرف غني پرون د لویې مشورتي جرګې په پای کې د جرګې د ګډونوالو سلا ومنله چې ۴۰۰ طالب بندیان خوشې کړي.

هلمند کې ۳۰۰ مېرمنو ته د کار زمینه برابره شوه

ارشیف

د افغانستان د کرنې او مالدارۍ وزارت په هلمند کې ۳۰۰ مېرمنو ته د کار زمینه برابره کړې ده.

د دغه وزارت ویاند اکبر رستمي نن ازادي راډیو ته وویل چې دغه مېرمنې د دې ولایت په مرکز او ناوې ولسوالۍ کې په کروندو کې په کار بوختې دي.

دغه کاري فرصتونه مېرمنو ته د بېلابېلو مېوو او سبو د کرکېلې لپاره د کورنیو باغچو په جوړولو سره برابرې شوې دي.

کومې مېرمنې چې اوس په دې ولایت کې د سبو او مېوو د کرکېلې په برخه کې فعالیت لري، تر دې وړاندې په کورونو کې اوزګاره وې.

د کرنې وزارت د بشري مرستو برابرولو خیریه مؤسسې په همکارۍ دغو مېرمنو ته د کورنیو باغچو په جوړولو سره پر دوی د سبو ۱۰ ډوله تخمونه او کیمیاوي سرې هم وېشلې دي.

د دې پروژې د پلي کولو موخه په دې ولایت کې د کورنیو باغچو وده او پراختیا او د بې‌وزلو کورنیو اقتصادي ملاتړ دی.

کندهار کې چاودنو ۱۰ ملکي کسان وژلي

د کندرهار ولایت نقشه

د کندهار په ارغستان ولسوالۍ کې په دو جلا جلا ماین چاودنو کې ۱۰ ملکي کسان وژل شوي.

د کندهار د امنیه قوماندانۍ ویاند جمال ناصر بارکزي ازادي رادیو ته وویل چې دواړه چاودنې یکشنبه ماسپښین شوې دي.

هغه د پېښې جزئیات داسې بیان کړل: "یو ماین د ارغستان ولسوالۍ د شنه نري په سیمه کې د ملکي خلکو په موټر چاودېدلی چې اته کسان په‌کې شهیدان شوي دي. دویم ماین د برج کلي په سیمه کې په دوو پليو کسانو چاودېدلی چې دا دوه کسان هم شهیدان شوي. دا دواړه ماینونه وسله‌والو مخالفینو کېنولي و."

د دې پېښو مسؤلیت تر اوسه چا نه‌دی منلی.

ارغستان د کندهار یوه لیرې پرته او سرحدي ولسوالۍ ده چې امنیتي وضعه‌یې ډېره ښه نه‌بلل کېږي.

چارواکي: پکتیکا کې ۱۵ تنه طالبان وژل شوي

ارشیف

د پکتیکا امنیتي چارواکي وایي پرون‌یې وسله‌والو مخالفینو ته درنه مرګ‌ژوبله اړولې ده.

د دغه ولایت امنیه قوماندان سمونوال نثار احمد عبدالرحیم‌زي رسنیو ته په یوه پيغام کې وویل چې یکشنبه ماسپښين افغان پولیسو په سروبي ولسوالۍ کې ۱۵ وسله‌وال بریدګر ووژل او ۶ نور یې ټپیان کړل.

هغه وویل: "د سروبي په ولسوالۍ کې د موږ پولیس چې هلته په ګزمه وتلي و له مخالفینو سره مخ شول. په نتیجه کي يې د مخالفینو ۱۵ تنه مړه او شپږ نور یې ټپیان دي. په جسدونو کې یو تن احمدشاه نومېږي چې د سروبي ولسوالۍ نظامي مسؤل و. ده په تېرو وختونو کې په خلکو ډېر ظلمونه کړي و."

نوموړي رسنیو ته دا هم ویلي په تېر یوه شپه او ورځ کې یې د کشفي معلوماتو پر اساس پولیسو په مرکز ښرنه، جاني‌خېلو او یحیی‌خېلو ولسوالیو کې ۶ وسله‌وال هم نیولي دي.

وسله‌والو طالبانو په پکتیکا کې د دې پېښې او یا دا چې دوی ته مرګ‌ژوبله اوښتې که څنګه څه تبصره نه‌ده کړې.

د سلیمان لایق جنازه له جرمني کابل ته راورسېده

سلیمان لایق

نن دوشنبه د اکاډمیسین سلیمان لایق جنازه له جرمني څخه کابل ته راورسېده.

سلیمان لایق د اختر په لومړۍ ورځ د جرمني هېواد په یو روغتون کې د ژوند پور پرې کړ.

دی تېر ۲۰۱۹ کال په یوه ځانمرګي برید کې ټپي شوی و.

د افغانستان د علومو اکاډمۍ سرپرست څېړنوال عبدالظاهر شکېب ازادي راډيو ته وویل تمه وه یکشنبه د ارواښاد لایق جنازه کابل ته ورسېږي، خو په پروازونو کې د ستونزو له امله دا کار په یوه ورځ ځنډ کېږي.

د اروښاد لایق زوی غرزي لایق هم ازادي راډیو ته تأیید کړه چې جنازه به سهار مهال د کابل هوايي ډګر ته ورسېږي او په کابل کې به خاورو ته سپارل کېږي.

وار له مخه د اکاډمیسین سلیمان لایق د اعزاز او تدفین کمېسیون او علومو اکاډمۍ په کابل ښار کې د ښاغلي لایق تصویرونه او ملي اشعار د کابل په واټونو کې نصب کړي دي.

اکاډمیسین غلام مجدد سلیمان لایق د افغانستان یو مطرح شاعر، لیکوال او څېړونکی و چې په پښتو او دري ژبو یې ګڼ اثار چاپ شوي.

کابل کې چاودنې ۲ تنه وژلي او ۵ نور ټپیان دي

د افغانستان په عمومي نقشه کې کابل ولایت

د کابل امنیه قوماندانۍ وايي، په کمپنۍ سیمه کې یوې بمي چاودنې دوه ملکي وګړي چې یوه مېرمن هم په‌کې وه، وژلي او پنځه امنیتي سرتېري یې ټپیان کړي دي.

د کابل د امنیه قوماندانۍ ویاند فردوس فرامرز نن یکشنبه په یوه خبرپاڼه کې وویل، ماین د کمپنۍ په بازار کې په یوه کراچۍ کې ایښودل شوی و او امنیتي ځواکونو کشف کړی و، خو هغه مهال چې د ساحې د کلابندولو او د دې ماین د شنډولو هڅه‌یې کوله وچاودېده.

د دې حملې مسؤلیت تر اوسه کومې ډلې نه‌دی منلی.

طالبان: مذاکرات به د بندیانو له خوشې کېدو وروسته یوه اوونۍ کې پیل شي

په قطر کې د ملا برادر په مشرۍ د طالبانو د سیاسي دفتر غړي

طالبان وايي چې بین‌الافغاني خبرې به د ۴۰۰ طالب بندیانو له خوشې کېدو وروسته د یوې اوونۍ په بهیر کې پیل شي.

په قطر کې د طالبانو د سیاسي دفتر ویاند سهیل شاهین له اسوشیټډ پرس خبري اژانس سره په خبرو کې د ۴۰۰ طالب بندیانو د خوشې کولو په اړه د لویې جرګې پرېکړه مثبته وبلله، خو ویلي یې دي چې طالبان له امریکا سره د سولې موافقې ته ژمن دي او د اوربند په اړه بحث به د همدې موافقې له مخې په بین‌الافغاني خبرو کې وشي.

ولسمشر اشرف غني د ۴۰۰ طالب بندیانو د خوشې کولو په اړه د مشورتي لویې جرګې غوښتنه تأیید کړه او ژمنه‌یې وکړه چې د دې بندیانو د خلاصون حکم به نن لاسلیک کړي.

د سولې مشورتي لویې جرګې نن په خپله درېیمه او وروستۍ غونډه کې په خپل پرېکړه‌لیک کې د سولې د ټینګښت لپاره د ۴۰۰ طالب بندیانو د خوشې کېدو غوښتنه وکړه. ښاغلي غني جرګې ته په وینا کې وویل چې د جرګې پرېکړه د ملت پرېکړه ده او حکومت‌یې په تطبیقولو مکلف دی.

هغه زیاته کړه: "په پرېکړه‌لیک کې همداراز ټینګار شوی چې د دې بندیانو له خوشې کېدو سره سم باید له کومې پلمې پرته د مستقیمو خبرو ژر تر ژره پیل یقیني شي."

جرمني د افغان سولې ټینګښت کې د فعال رول لوبولو ته چمتووالی وښود

د افغانستان لپاره د جرمني ځانګړی استازی مارکُس پوتزل

جرمني په افغانستان کې د سولې د ټینګښت په پروسه کې د فعال رول لوبولو ته چمتووالی ښودلی دی.

د افغانستان لپاره د جرمني ځانګړي استازي مارکُس پوتزل په یوه خبرپاڼه کې چې د سولې د مشورتي لویې جرګې د پرېکړه‌لیک له خپرېدو وروسته خپره شوه ویلي د ۴۰۰ طالب بندیانو د خوشې کېدو د فرمان له لاسلیک سره دواړه لوري باید د بین‌الافغاني خبرو پیل ته چمتو شي.

ښاغلی پوتزل وايي چې له دې خبرو سره په یوه وخت کې باید د ټول هېواد په کچه اوربند ټینګ شي.

پاکستان د ۴۰۰ طالب بندیانو د خوشې کېدو پرېکړه وستایله

د افغان حکومت له لوري یو شمېر خوشې شوي طالب بندیان

پاکستان د ۴۰۰ طالب بندیانو د خوشې کېدو په اړه د ولسمشر اشرف غني پرېکړه ستایلې او هیله‌یې څرګنده کړې چې له دې سره به بین‌الافغاني خبرې ژر تر ژره پیل شي.

د پاکستان د بهرنیو چارو وزارت په یوه بیان کې ویلي دي چې نړیواله ټولنه باید د افغانانو ترمنځ د خبرو د بریا او په افغانستان کې د خبرو له لارې د دایمي سولې او ثبات د ټینګښت ملاتړ وکړي.

'فاریاب کې د یوه سرتېري له لوري پر یوې ماشومې د تېري څېړنه پیل شوه'

د افغانستان په عمومي نقشه کې فاریاب ولایت

شاهین قول اردو د فاریاب په بلچراغ ولسوالۍ کې د ملي اردو د یوه سرتېري له‌خوا پر یوې ماشومې د جنسي تېري د ادعا په اړه د څېړنو د پیل خبر ورکوي.

د بلچراغ ولسوال عبدالجمیل صدیقي ازادي راډیو ته وویل چې پرون مازیګر د ملي اردو یوه سرتېري خپلې پوستې ته پر لاره پر یوې اووه کلنې ماشومې جنسي تېری کړی دی.

ښاغلی صدیقي زیاتوي: "د ملي اردو یوه سرتېري چې خپلې پوستې ته روان و، له دې اووه کلنې ماشومې سره مخامخ شوی او د زنا عمل‌یې ورسره کړی دی."

ولسوال وايي چې ماشومه په روغتون کې ده او روغتیايي حالت‌یې ښه دی.

د شاهین قول اردو ویاند حنیف رضايي نن یکشنبه ازادي راډیو ته وویل چې دا ادعا نه‌تأییدوي او نه‌یې ردوي، خو نوموړی زیاتوي چې یو پلاوی په دې اړه د څېړنو لپاره نن سیمې ته واستول شو.

شاهین قول اردو: شمال کې ۷ طالبان وژل شوي او ۷ نور ټپیان دي

ارشیف

شاهین قول اردو په تېرو ۲۴ ساعتونو کې په شمال کې د افغان ځواکونو په ځوابي حملو کې د ۱۴ طالبانو د مرګ‌ژوبلې خبر ورکوي.

۲۰۹ شاهین قول اردو په یوه خبرپاڼه کې چې نن خپره شوه وايي، طالبانو د بلخ ولایت په شولګرې، د فاریاب په ګرزیوان، د جوزجان په فیض‌اباد او د سرپل په صیاد ولسوالیو او د سرپل په مرکز کې پر افغان ځواکونو د حملو پلان لاره، خو په ځوابي حملو کې اووه تنه طالبان وژل شوي او اووه نور ټپیان دي.

د تندر او شاهین قول اردوګانو د دې ادعاوو په اړه طالبانو څه نه‌دي ویلي.

نور راوښيه

XS
SM
MD
LG