د لاسرسۍ وړ لېنکونه

تازه خبر
چهارشنبه ۷ لړم ۱۳۹۹ کابل ۱۰:۲۶

نړۍ

د کلیفورنیا والي د دې ایالت خلکو ته کوم امر کړی؟

د کلیفورنیا والي ګاوین نیوسم 

د امریکا د متحدو ایالتونو د کلیفورنیا والي د دغه ایالت ټولو ۴۰ ملیونه وګړو ته امر کړی، چې له کورونو دې، نه راوځي.

والي ویلي د کرونا وایروس د خپرېدو د مخنیوي په هدف دې خلک، تر هغو چې ضروري کار ونه لري، په کورونو کې پاتې وي.

ګاوین نیوسم پرون وویل، د ایالت په سطحه دا امر د شپې له نیمايي د تطبیق وړ دی.

خلک به د قدم وهلو او سپورټ په نیت له کوره د راوتلو اجازه ولري او کولای شي چې خوراکي توکي رانیسي یا روغتيايي خدمات ترلاسه کړي.

رستورانتونه هم کولای شي خپلو مشتریانو ته خوراکونه ورسوي.

د کلیفورنیا والي وویل، فکر نه کوي چې پولیس به د دغه وضعیت څارلو ته مجبوره شي، خو احتمالاً به د صادر شوي امر تطبیق د ټولنیزو تماسونو له لارې کنټرولېږي.

د لاس انجلس ټایمز ورځپاڼې په حواله په دغه ایالت کې په کرونا ویروس تر زرو زیاتې پېښې ثبت شوي او ۱۹ کسان په دې وایروس مړه شوي دي.

په ټوله امریکا کې په کرونا ویروس د اخته کسانو شمېر تر ۱۴زرو اوښتی دی.

د ورځې تازه خبرونه دلته ولولئ

امریکا په نګورنو قره باغ کې د اوربند رعایتول غوښتي

نګورنو قره باغ کې د روانو نښتو یو انځور

ارمنستان او اذربایجان یو او بل د امریکا د متحدو ایالتونو په منځګړیتوب له نافذ شوي اوربنده په سرغړونه تورنوي.

دا په داسې حال کې ده، چې د ایران پولې ته څېرمه پر لانجمنه سیمه نګورنو قره باغ د یوې میاشتې جګړه سخته شوې ده.

د امریکا د بهرنیو چارو وزیر مایک پامپیو پرون د ارمنستان او اذربایجان له رهبرانو د اوربند د رعایتولو غوښتنه وکړه.

خو پرون دوشنبه دغه اوربند تر نافذېدو لنډه شېبه وروسته مات شو.

د روسیې د بهرنیو چارو وزیر بالکان حوزې ته خپل سفر نیمګړی پرېښود

سرګي لاوروف

د روسیې د بهرنیو چارو وزیر وروسته له هغې بالکان حوزې ته خپل سفر نیمګړی پرېښود، چې معلومه شوه، په کویډ۱۹ ناروغۍ له یوه اخته کس سره له نږدې په تماس کې پاتې شوی دی.

د روسیې د بهرنیو چارو وزارت پرون وویل، چې ۷۰ کلن سرګي لاوروف که څه هم د بهترۍ احساس کوي، خو بیا یې هم احتیاطاً ځان په خپله نورو خلکو منزوي کړی دی.

لاوروف د دوشنبې په ورځ له یونان څخه روسیې ته ستون شو.

هغه غوښتل نن چهارشنبه او سبا پنجشنبه بوسنیا هرزګوینا او سربیا ته هم لاړ شي.

د هند کرکټ غوره لیګ سیالۍ؛ حیدراباد لوبډلې ډیلي ته ماتې ورکړه

د حیدراباد لوبډله

د هندوستان د کرکټ د غوره لیګ سیالیو په لړ کې سنرایزرز حیدراباد ټیم وتوانېد ډیلي کاپیټلز ټیم ته ماتې ورکړي.

لوبه سنرایزرز حیدراباد پیل کړه، چې په شلو اوورونو کې یې د ۲ لوبغاړو په سوځېدو سره مقابل ټیم ته د ۲۲۰ منډو هدف وټاکه.

ډیلي کاپیټلز ټیم چې ټول لوبغاړي یې په نولسم اوور کې وسوځېدل یوازې د ۱۳۱ منډو په کولو بریالی شو.

په دغې سیالۍ کې تر ټولو ښه توپ اچونه د افغان لوبغاړي راشد خان وبلل شوه، چې په څلورو اوورونو کې یې ۳ لوبغاړي وسوځول او یوازې ۷ منډې یې ورکړې.

نن د ممبۍ انډیانز او رویال چلنجرز بنګلور لوبډلو ترمنځ مسابقه کېږي.

ممبۍ انډیانز ټیم د ۱۴ نومرو په لرلو سره د جدول په سر کې دی.

چک جمهوریت کې د کرونا ویروس د خپرېدو مخنیوي لپاره نوې پرېکړه شوې

آرشیف

چک جمهوریت د کرونا ویروس د خپرېدو د مخنیوي لپاره نوې پرېکړې کړي دي.

سبا له نیمې شپې وروسته به په چک جمهوریت کې د شپې له نهو د سهار تر پنځو بجو ګرځبندیز وي.

دا بندیز به د نومبر تر دریمې ادامه ولري.

د چک جمهوریت د سوداګرۍ او ترانسپورت وزیر کارل هفل چیک د پلورلو او پیرودلو په اړه هم د بندیز خبر ورکړ.

هغه وویل: "په وړو پلورنځیو کې به د یکشنبې په ورځ پلورل بند وي او په نورو ورځو کې به له دوشنبې تر شنبې، د شپې له اتو بجو د سهار تر پنځو بجو پیر او پلور بند وي."

په چک جمهوریت کې د دوشنبې د ورځې د شمېرو له مخې د څلورویشت ساعتونو په ترڅ کې په کرونا ویروس لس زره دوه سوه درې اویا کسان اخته شوې دي چې له دې سره په کوویډ۱۹ ناروغۍ د اخته کسانو شمېر دوه لکه اته شپېته زره درې سوه اویا ته ورسېد.

د کرونا ویورس د قربانیانو شمېر تر اوسه په چک جمهوریت کې دوه زره درې سوه پنځه شپېتو ته رسېږي.

د ای پي ایل سیالۍ؛ نن حیدراباد او ډیلي سره لوبه کوي

آرشیف

د هند د کرکټ د غوره لیګ لوبو په ترڅ کې نن سنرایزرز حیدراباد له ډیلي کپیټل سره لوبه کوي.

ډیلي کپیټل په جدول کې دوهم ځای لري او سنرایز حیدراباد اووم ځای.

په سنرایزرز حیدراباد کې د افغانستان دوه لوبغاړي لوبه کوی، راشد خان او محمد نبي.

د هند غوره لیګ کرکټ لوبې د سپټمبر په نولسمه په متحد عربي اماراتو کې پیل شوې او د نومبر تر لسمې به دوام وکړي.

د ارمنستان صدراعظم: په نګورنو قره باغ کې ملکیان وژل شوي

نګورنو قره باغ کې د جګړو له امله د ویجاړیو یو انځور

ارمنستان او اذربایجان یو ځل بیا یو بل له اوربند څخه په سرغړونه تورن کړي دي.

د ارمنستان صدراعظم نیکول پاشنیان په ټویټر کې لیکلي دي چې د نګورنو قره باغ په سیمه کې د اذربایجان د ډزو پرمهال یو شمېر ملکیان وژل شوي او یو شمېر ټپیان شوي دي.

بل لور ته د اذربایجان دفاع وزارت نن ادعا وکړه چې ارمنستان له اوربند څخه سرغړونه کړې ده.

د اذربایجان او ارمنستان ترمنځ د نګورنو قره باغ په سیمه کې له یوې میاشتې راهیسې جګړه پیل شوې ده، تر اوسه درې ځله د دوی ترمنځ اوربند شوی دی او هرځل مات شوی دی.

وروستی اوربند د یکشنبې په ورځ د امریکا د بهرنیو چارو د وزارت په منځګړیتوب وشو.

د روغتیا نړیوال سازمان مشر د کرونا د دوامداره کېدو خبرداری ورکړ

د «WHO» مشر تدروس ادهانوم ګبریاسوس

په داسې حال کې چې په ټوله نړۍ کې د کرونا د مثبتو پېښو موارد په زیاتېدو دي، د روغتیا نړیوال سازمان مشر د دې وبا د دوامداره کېدو په اړه خبرداری ورکړی.

د «WHO» مشر تدروس ادهانوم ګبریاسوس پرون د اکټوبر په ۲۶مه، په ژنیو کې خبریالانو ته وویل چې د ځمکې د شمالي نیم کرې په ډېرو هېوادونو کې د 'کووېډ-۱۹' ناروغۍ له کبله په روغتونونو کې د خلکو د بستر کېدو پېښې زیاتې شوې دي.

هغه زیاته کړه چې د جدي مراقبت څانګې، په تېره د اروپا او شمالي امریکا په ګډون په ځینو ځایونو کې نوي ناروغان نه‌شي منلی ځکه ځای نه ورته لري.

د جانز هاپکنز پوهنتون د شمېرو له مخې له ۴۳ میلیونو زیات انسانان په ټوله نړۍ کې په دې ناروغۍ اخته شوي او له ۱۱ لکو زیات کسان مړه شوي دي.

امریکا پر ایران نوي بندیزونه ولګول

د امریکا بیرغ

متحده ایالاتو پر ایران نوي بندیزونه لګولي دي او دا ځل‌یې د دې هېواد د تېلو په سکټور کې فعال شرکتونه، مؤسسې او افراد په نښه کړي.

په نویو بندیزونو کې د ایران د پټرولیم وزارت، د ایران د تېلو ملي کمپنۍ او د ایران د ټانکرونو ملي شرکت شامل دي.

د امریکا د خزانې وزارت پرون د اکټوبر په ۲۶مه نېټه په یوه بیان کې وویل، هغوی چې بندیزونه پرې لګېدلي، د ایران د سپاه پاسداران اړوند قدس ځواک ملاتړ کوي. په بیان کې د خزانې د وزیر ستیفن منوچین له قوله ویل شوي دي چې د ایران رژیم د قدس ځواک د ورانکارو فعالیتونو د تمویل لپاره د تېلو له سکټور څخه کار اخلي.

بیان زیاتوي چې د ایران حکومت د خپلو خلکو د ملاتړ پر ځای د ترورېستي ډلو او د خپل اټمي پروګرام ملاتړ ته لومړیتوب ورکوي.

د امریکا سنا امي کوني باریټ د سترې محکمې غړیتوب لپاره تأیید کړه

 امي کوني باریټ

د امریکا سنا د سترې محکمې د غړیتوب لپاره د امي کوني باریټ نوماندي تأیید کړه.

له دې سره د سترې محکمې انډول ۳-۶ د محافظه‌کارانو په ګټه بدل شو چې دا د ولسمشر ډونالد ټرمپ لپاره یوه سیاسي بریا ګڼل کېږي.

د امریکا د مشرانو جرګې چې اکثریت په‌کې جمهوري‌پال دي، پرون د اکټوبر په ۲۶مه، د ۴۸ مخالفو رایو پر وړاندې په ۵۲ موافقو رایو ۴۸ کلنې باریټ ته رایې ورکړې.

د سترې محکمې څوکۍ تېره میاشت وروسته له هغه تشه شوه چې په امریکا کې د عدالت مخکښه لبرال څېره روت بادېر ګینسبورګ مړه شوه.

ډیموکراتانو په سنا کې د باریټ لپاره د رأی اخیستو سره مخالفت کړی و او ویلي یې و، د نوماندې د معرفي کولو او هغې ته د رأی ورکولو بهیر دې د ولسمشرۍ له انتخاباتو وروسته چې د نومبر په درېیمه نېټه کېږي، ترسره شي.

د کارګرانو، محصلانو او متقاعدانو مظاهرې؛ لوکاشینکا دې استعفا وکړي

بلاروس کې مظاهره‌چیان

کارګران، محصلان او متقاعدان پرون دوشنبه د بلاروس د پلازمېنې مېنسک لارو سړکونو ته راووتل او له الکساندر لوکاشینکا یې د استعفا غوښتنه وکړه.

دوی شعار ورکاوه چې لوکاشینکا له واکه د لیرې کېدو لپاره د اکټوبر میاشتې د ۲۵مې نېټې ټاکل شوي مهلت ته پام نه‌دی کړی.

اعتراض کوونکو وویل، لوکاشینکا نه‌یوازې له واکه لیرې نه‌شو، بلکې پر اعتراض کوونکو یې د امنیتي تدابیرو په سختولو سره فشارونه لا زیات کړي دي.

راپورونه وايي پولیسو پرون په مېنسک کې د لسګونه زره اعتراض کوونکو په وړاندې رابړي مرمۍ وکارولې او په سلګونه کسان ونیول شول.

په بلاروس کې د اګسټ میاشتې د نهمې د ولسمشرۍ تر ټاکنو وروسته د لوکاشینکا پر ضد پراخ ولسي اعتراضونه روان دي.

الکساندر لوکاشینکا ځان د دغو ټاکنو ګټونکی بولي، خو اعتراض کوونکي وايي په دغو ټاکنو کې په پراخه پیمانه درغلۍ او سرغړونې شوې دي.

لاوروف: د نړیوالو مسایلو حل کې به له ترکیې سره همکارۍ ته دوام ورکړو

د روسیې د بهرنیو چارو وزیر سرګي لاوروف

د روسیې د بهرنیو چارو وزیر وايي هېواد به‌یې د نړیوالو مسایلو په حل کې له ترکیې سره خپلې همکارۍ ته دوام ورکړي.

سرګي لاوروف پرون په اتن کې له خپل یوناني سیال نیکوس دنیا سره تر کتنې وروسته وویل: "که څه هم په ځینو قضیو کې زموږ کړنلار سر نه سره خوري، خو موږ کولای شو له انقرې سره ځیني ګډ ټکي پیدا کړو."

سرګي لاوروف زیاته کړه، روسیه که څه هم له ترکیې سره ښې اړیکې لري، خو له ستونزو تشې نه‌دي.

د روسیې د بهرنیو چارو وزیر وویل، د هېوادونو ترمنځ هر ډول ولاړې شوې ستونزې باید د ډیالوګ له لارې حل شي او د یونان او ترکیې ترمنځ هم ښايي ځیني ستونزمن مسایل وي.

د یونان او ترکیې ترمنځ وروسته له هغې کړکېچ راغی چې انقرې پرېکړه وکړه، لانجمنو اوبو ته خپلې تحقیقاتي کښتۍ ولېږي.

دې مسئلې د سمندري حدودو او د تطبیقاتو د حقونو پر سر د ناټو د دغو دوو غړو هېوادونو ترمنځ کړکېچ رامنځته کړ.

د ای پي ایل سیالیو دوام؛ نن کلکته او پنجاب لوبه کوي

ای پي ال سیالیو کې د پنجاب لوبډلې د لوبغاړی راهول یو انځور

د هند د ای پي ایل سیالیو په دوام نن شپه شپږ نیمې بجې د کلکتې نایټ رایډرز او کینګز ایلیون پنجاب ترمنځ لوبه کېږي.

د تېرې شپې په لوبه کې بیا چنای سوپر کېنګز رایل چلنجرز بنګلور لوبډلې ته په ۸ ویکټو ماتې ورکړه.

چنای سوپر کېنګز د ۶ لوبغاړو په له لاسه ورکولو ۱۴۶ منډې وکړې او مقابله لوبډله بیا د ۲ لوبغاړو په سوځېدو په ۱۹ اور کې ۱۵۰ منډې وکړې.

همدارنګه ممبيي انډينز د پنځو لوبغاړو په سوځېدو ۱۹۶ منډې وکړې او راجستان رایلز بیا ټاکلی هدف د دوو لوبغاړو په سوځېدو په ۱۹ اور کې پوره کړ.

د لومړي پړاو لوبې به د نوومبر تر درېیمې دوام وکړي.

تیخانوفسکایا نن په بېلاروس کې د عمومي اعتصاب غوښتنه کړې

د بېلاروس د سیاسي مخالفانو مشرې سویتلانا تیخانوفسکایا

د بېلاروس د سیاسي مخالفانو مشرې سویتلانا تیخانوفسکایا نن په دغه هېواد کې د عمومي اعتصاب غوښتنه کړې ده.

د سویتلانا دا غوښتنه په الکساندر لوکاشینکا باندې د فشار راوړلو لپاره ده څو له جمهوري ریاسته لاس واخلي.

د بېلاروس د سیاسي مخالفانو مشرې وروسته له هغه د عمومي اعتصاب غوښتنه وکړه چې لوکاشینکا د واک د پرېښودو لپاره د اکتوبر پنځه ویشتمې ضرب الاجل ته پام ونه کړ او پر ځای یې امنیتي ځواکونه د مظاهره چیانو پر ضد مارش کړل.

لوکاشینکا د اګست نهمې ولسمشرۍ ټاکنو ګټونکی اعلان شوی خو سیاسي مخالفین بیا سویتلانا تیخانوفسکایا د انتخاباتو مشروع ګټونکې بولي.

د امریکا سنا د سترې محکمې غړیتوب لپاره 'امي کاني بریټ' ته رایه ورکوي

امي کاني بریټ

د امریکا سنا جرګه به نن د سترې محکمې د غړیتوب لپاره د ولسمشر ډونالډ ټرمپ کاندیدې امي کاني بریټ ته رایه ورکړي.

تمه یې ده چې بریټ د سنا جرګې باور خپل کړي ځکه د دې جرګې اکثریت د جمهوري غوښتونکو په لاس کې دی.

ډیموکراټان اوس وخت چې انتخاباتو ته کمې ورځې پاتې دي د سترې محکمې د غړیتوب لپاره د امي کاني بریټ له نوماندۍ سره مخالفت کوي او وايي چې د نومبر درېیمې تر ټاکنو وروسته باید د سترې محکمې غړې معرفي شي.

امي کاني بریټ د سترې محکمې د یوې وتلې غړې روت بادر ګینسبورګ پر ځای معرفي کیږي.

مېرمن ګینسبورګ د سپټمبر په اتلسمه وفات شوې ده.

که چېرته سنا جرګه نن د ولسمشر ټرمپ کاندیدې ته رایه ورکړي په دې سره به د امریکا په ستره محکمه کې د محافظه کارانو شمېر شپږو ته ورسېږي چې په مقابل کې به یې دری تنه پاتې وي.

همداراز به د امي کاني بریټ بریا د سترې محکمې د څو لسیزو تشکیل له ایډیالوژیک نظره بدل کړي.

د ارمنستان او اذربایجان ترمنځ په نګورنو قره باغ کې اوربند ټینګ شوی

د ارمنستان او اذربایحان ترمنځ جګړه

د ارمنستان او اذربایجان ترمنځ په نګورنو قره باغ لانجمنه سیمه کې بشردوستانه اوربند ټینګ شوی دی.

که څه هم پرون یکشنبه بریدونو دوام درلود، خو د امریکا د بهرنیو چارو وزارت او د اذربایجان او ارمنستان حکومتونو په ګډه اعلامیه کې وویل چې دواړه لوري اوربند ته ژمن دي.

دغلته د څلورو اونیو راهیسې شخړې پيل شوي او دا دریم ځل دی چې د پای ته رسېدو لپاره یې اوربند اعلانېږي.

دا ګډه اعلامیه وروسته له هغه خپرېږي چې د امریکا د بهرنیو چارو وزیر مایک پومپیو د جمعې په ورځ واشنګټن کې د ارمنستان او اذربایجان د بهرنیو چارو له وزیرانو سره وکتل.

د امریکا ولسمشر ډونالډ ټرمپ پر ټویټر د دغه اوربند مبارکي ورکړې او لیکلي یې دي: "د ارمنستان صدر اعظم نیکول پاشینیان او د اذربایجان ولسمشر الهام عليیف ته د اوربند د مراعاتولو د هوکړې مبارکي وایم."

د نګورنو قره باغ لانجمنې سیمې پر سر جګړه شاوخوا میاشت وړاندې ونښته چې تراوسه په کې دواړو خواوو ته نږدې زر کسان وژل شوي دي.

نور راوښيه

XS
SM
MD
LG