د لاسرسۍ وړ لېنکونه

تازه خبر
دوشنبه ۲۶ غویی ۱۴۰۱ کابل ۰۹:۵۳

افغانستان

خلیل‌زاد د داعش سره د طالبانو د مبارزې هرکلی وکړ

د افغانستان د سولې لپاره د واشنګټن ځانګړی استازی زلمی خلیل‌زاد.

د افغانستان د سولې لپاره د واشنګټن ځانګړي استازي زلمي خلیل‌زاد د داعش له وسله‌والې ډلې سره د طالبانو د مبارزې هرکلی کړی.

زلمي خلیل‌زاد تېره شپه پر خپل ټویټر د داعش پر ضد د طالبانو د وروستۍ اعلامیې او په کونړ کې د داعش ډلې پر ضد د طالبانو د عملیاتو یادونه کړې.

زلمي خلیل‌زاد د طالبانو وروستۍ اعلامیې ته په اشارې ویلي، د دې اعلامیې چې د داعش غندنه کوي او په افغانستان کې د داعش د استخدام، تمویل یا روزنې د هڅو د مخنیوي ژمنه کوي، هرکلی كوي.

د زلمي خلیل‌زاد په وینا دا د القاعدې او نورو ټولو هغو ډلو پر ضد چې متحده ایالاتونه یا متحدین‌یې ګواښي، د طالبانو د هغې عامه ژمنتیا څرګندونه کوي چې موږ سره‌یې توافق کې کړي.

زلمي خلیل‌زاد زیاته کړې موږ تمه لرو چې طالبان به خپلې ژمنې ترسره کړي.

د نوموړي په وینا "د امریکا له‌خوا په موافقتنامه کې د شویو ژمنو پوره کول به د طالبانو له لوري په ژمنو عمل کولو پورې تړلي وي."

د امریکا متحده ایالاتونو د فبروۍ په ۲۹مه نېټه له طالبانو سره افغانستان ته د سولې د راوستلو تړون لاسلیک کړ چې له مخې یې امریکايي سرتېري له افغانستان څخه وځي او طالبان به د خپل واک لاندې سیمو کې له هغو ترهګرو سره مبارزه کوي چې امریکا او متحدانو ته‌یې ګواښ پېښوي او همدارنګه به بین‌الافغاني خبرې پیلوي.

که څه هم د هوکړې له مخې باید د مارچ په ۱۰ بین‌الافغاني خبرې پیل شوې وې، خو تر اوسه نه‌ده څرګنده چې دا خبرې، به کله او چېرې پیل شي.

د ورځې تازه خبرونه دلته ولولئ

په کندز کې د مضره ملخانو د له منځه وړلو کمپاین پیل شوی

د کندز په یوه کرونده کې ملخان

په کندز ولایت کې د مضره ملخانو د له منځه وړلو کمپاین پیل شوی دی.

د کندز د کرنې، اوبو لګونې او مالدارۍ د ریاست چارواکي وايي، دوی د دې ولایت په علي آباد، چهاردرې، خان آباد، قلعه زال، دشت ارچي، اقتاش، امام صاحب او کلباد ولسوالیو کې د مضره ملخانو د له منځه وړلو کمپاین پیل کړی دی.

د دغه ریاست رییس مولوي امان الله حسن ازادي راډیو ته وویل، په پورته یادو شویو ولسوالیو کې د کروندو، باغونو او څړځایونو د خوندي ساتلو په هدف یې د حمل له میاشتې راهیسې په ملخ لرونکو سیمو کې د دوا شیندلو لړۍ پیل کړې ده.

هغه زیاته کړه: "ملخانو پر وړاندې د مجادلې کمپاین عملاً روان دی. په امام صاحب، ارچي، خان آباد او اقتاش ولسوالیو کې کار عملاً روان دی او تراوسه پورې ۷۵۰ هکتار ځمکه د ملخانو له موجودیت څخه پاکه شوي ده."

هغه زیاتوی، که چېرې د کرنې وزارت له ملخانو سره د مبارزې په برخه کې له دوی سره پر وخت مالي او د امکاناتو مرسته ونه کړي نو ښايي مضره ملخان کروندګرو ته درانه زیانونه واړوي.

ویل کېږي، چې د پسرلي په موسم کې ملخان له تاجکستانه د افغانستان خاورې ته رااوړي او که چېرې دغه هېواد پر وخت د ملخانو پر وړاندې جدي مبارزه وکړي نو کندز به د ملخانو له شره په امن کې پاتې شي.

کندز په شمال ختېځ زون کې د افغانستان له مهمو کرنیزو ولایتونو څخه شمېرل کېږي.

د معلوماتو له مخې د دې ولایت ۸۵ سلنه اوسېدونکي پر کرنې او مالدارۍ بوخت دي او د خلکو عواید هم له همدې درکه دی.

پکتیکا کې د پاکستان حکومت پلاوي او ټي ټي پي ترمنځ غونډې شوي

آرشیف

د پاکستان حکومت د دغه هېواد د مخالفو وسله والو تحریک طالبان پاکستان له ډلې سره د خبرو لپاره یوه جرګه ګمارلې.

دې جرګې له دې جمعې راهیسې خپلې هڅې پيل کړي او څو ناستې یې هم ترسره کړي دي.

د ازادې اروپا د مشال راډیو او د امریکا غږ ډېوې راډيو راپور ورکړی چې د مسیدو د جرګې څه باندې دېرش کسیزې ډلې د پکتیکا په برمل کې د پاکستاني طالبانو له مشر مفتي نورولي سره کتلي.

پرون یکشنبه هم د سویلي وزیرستان په مکین کې یوه بله ناسته پلان شوې وه.

که څه هم د پاکستان پوځ رسماً له ټي ټي پي سره د جرګې د هڅو په اړه څه نه دي ویلي خو سرچینو تایید کړې چې جرګه د پوځ ملاتړ له ځانه سره لري.

تحریک طالبان پاکستان د اختر په مناسبت اوربند اعلان کړی و او د راپورونو له مخې لا دا اوربند جاري دی.

د طالبانو حکومت که څه هم مخکې په افغانستان کې د پاکستاني طالبانو او نورو وسله والو فعالیت او موجودیت رداوه خو د وروستیو تحولاتو په اړه یې څه غبرګون نه دی ښودلی.

د مرکزي اسیا د اتلولۍ سیالۍ؛ نن افغانستان او تاجکستان لوبډلې لوبه کوي

د افغانستان تر شپاړس کلنو کم عمره د فوټبال ملي لوبډله

د افغانستان تر شپاړس کلنو کم عمره د فوټبال ملي لوبډله نن دوشنبه د تاجکستان له لوبډلې سره مخ کېږي.

د افغانستان د فوټبال فدراسیون په خپل فیسبوک لیکلي، چې دا لوبه د شپې په اته نیمو بجو د دوشنبې د فوټبال په سټډيوم کې پيلېږي.

تر شپاړس کلنو کم عمره افغان فوټبالرانو د مرکزي اسیا په اتلولیو جام کې لومړۍ لوبه له قرغزستان سره ۱-۱ مساوي کړه خو دویمه لوبه یې ازبکستان ته شپږ – صفر وبایلله.

د مرکزي اسیا د اتلولۍ سیالۍ د تاجکستان په دوشنبې ښار کې روانې دي، چې د افغانستان ترڅنګ د قرغزستان، تاجکستان، ازبکستان او ایران لوبډلو ګډون په کې کړی دی.

پنجشېر: له دره ولسوالۍ د طالبانو ځواکونه وتلي

طالب جنګیالي

په پنجشېر کې د طالبانو محلي چارواکي تاییدوي، چې د دوی لېږل شوي ځواکونه د دره ولسوالۍ له دره عبدالله خېل سیمې وتلي دي.

د پنجشېر لپاره د طالبانو ویاند، ابوبکر صدیق له ازادۍ راډیو سره په خبرو کې له دې سیمې د لېږل شویو ځواکونو وتل تایید کړل.

د سیمې اوسېدونکي ازادۍ راډیو ته ویلي، دغه تازه دمه ځواکونه په بېلابېلو سپکو او درنو وسلو سمبال وو، چې له تګ سره یې دغې سیمې پوځي بڼه خپله کړې وه.

د طالبانو چارواکي وايي په دره ولسوالۍ کې له وروستیو شخړو وروسته د طالبانو ځینې ځواکونه هلته ځای پر ځای شول.

افغانستان بانک: ټولې صرافۍ او د پولي خدمتونو مرکزونه فعاله دي

د افغانستان بانک

د افغانستان بانک هغه راپورونه رد کړل چې په ويل شوي د صرافانو ټولنې په ټول هېواد کې خپل فعاليتونه ځنډولي دي.

د افغانستان بانک وياند صابر مومند په هغه ويډيويي پيغام کې چې نن يې رسنيو ته لېږلی ويلي، ټولې صرافۍ او د پولي خدماتو وړاندې کولو مرکزونه فعال دي.

د‌ مومند په خبره يوازې هغه صرافۍ او د پولي خدماتو وړاندې کولو مرکزونه تړل شوي چې د ده په وينا کاري جوازونه يې نه لرل.

مخکې د کابل د شهزاده سرای د صرافانو د ټولنې ویاند عبدالرحمان ځیرک ادي راډیو ته ویلي وو، تر کومه چې د طالبانو حکومت مشران د صرافانو د جوازونو موضوع د طالبانو له مالیې وزارت او د افغانستان بانک سره حل نه کړي د دوی فعالیت به په ټول افغانستان کې بند وي.

ننګرهار: د ګاز ډبې د چاودنې له امله درې کسانو ته مرګ ژوبله اوښتې

د افغانستان په عمومي نقشه کې د ننګرهار ولايت موقعيت

د ننګرهار اطلاعاتو او فرهنګ ریاست مسؤلينو ازادي راډیو ته په راستول شویو معلوماتو کې ویلي چې نن غرمه مهال د ښېوې ولسوالۍ اړوند مرکزي مندوي سیمه کې په یوه سوزکي موټر کې د ګازو ډبې چاودنه کړې چې له امله یې یو تن وژل شوی او دوه نور ټپیان دي.

ځایي مسؤلان د ټپیانو روغتیایي وضعیت د ډاډ وړ ښيي.

د یادونې ده چې هر کال د اوړي د موسم په راتګ سره ننګرهار کې د ډېرې ګرمې هوا له کبله دا ډول پېښې او اورلګېدنې رامنځته کېږي چې له امله یې ګڼ شمیر خلکو ته مرګ ژوبله او مالي زیانونه اوړي.

افغانستان کې صرافانو کار‌ بنديز اعلان کړ

يو شمېر صرافان

د افغانستان د صرافانو ټولنې ویاند ازادي راډیو ته په یو استولي ویډيوي پیغام کې ویلي، تر کومه چې د طالبانو حکومت د مالیې وزارت او د افغانستان بانک د صرافانو د جوازونو ستونزه نه وي هواره کړي د دوی فعالیتونه به په ټول افغانستان کې بند وي.

عبدالرحمن ځیرک ازادي راډیو ته دا هم وویل، چې دا پرېکړه پرون د افغانستان د ټولو ولایتونو د صرلافانو د ټولنې د مشرانو په یوې حضوري ناسته کې شوې ده.

خو نوموړي دا هم وویل، چې دا موضوع په هیڅ ډول د طالبانو له حکومت سره د مخالفت په مانا نه ده، بلکې دا د هر صراف حق دی چې د خپل کار وبار لپاره یې دا شرایط وړاندې کړي دي.

د ښاغلي ځیرک په خبره، پر صرافانو وضع شوي شرایط دا دي، چې هر صراف باید د خپل فعالیت په بدل کې، پنځه ميلیونه افغانۍ تضمین د افغانستان بانک ته ورکړي، دوه لکه افغانۍ د کاغذي جواز بیه تحویل کړي او پنخوس ميلیونه افغانۍ د خپل کار او بار لپاره پانګه وښيي.

يو شمېر صنعتکاران خپلو توليداتو ته بازار غواړي

د يوې صنعتي فابريکې انځور

د سوداګرۍ او صنعت وزارت پر خپله فېسبوک پاڼه لیکلي دي، چې د فابریکو خاوندانو تېره ورځ ناوخته د دې وزارت له سرپرست سره په لیدنه کې ویلي دي، د دوی فابریکې مرمر تيږې، خوراکي او د وینځلو توکي تولیدوي خو سره له دې چې تولیدات یې په هېواد کې ښه بازار نه لري، بهر ته هم نه صادرېږي.

د فابریکو خاوندانو وویل، که یې تولیداتو ته بازارموندنه و نه شي، دوی تاوان کوي او فابریکې به یې سقوط شي.

د مسولانو په وینا، د ارغندۍ په پارک کې ۸۵ فابریکې له اساسي معیارونو سره په ۳۰۰ جریبه ځمکه کې فعالیت کوي چې په هره فابریکه کې له ۵۰۰ تر ۷۰۰ زره امریکايي ډالرو پانګونه شوې ده.

په خبرپاڼه کې ویل شوې چې د سوداګرۍ او صنعت وزارت سرپرست نورالدین عزیزي د ارغندې صنعتي پارک د فابریکو له مسولانو سره ژمنه کړې چې ستونزې به یې حل کړي او په هغو برخو چې دوی تولیدات کوي، هڅه به وکړي چې واردات را کم کړي.

ننګرهار کې د شفتالو حاصلات ډېر شوي

ارشيف

ننګرهار کې د طالبانو د کرنې رياست ویاند اجمل سبحاني نن ازادي راډيو ته وویل، تر اوسه ۱۰ زره ټنه شفتالو په ننګرهار کې تولید شوي چې د کال تر پایه به دا شمېر نور هم لوړ شي.

نوموړي زیاته کړه چې سږ کال به د شفتالو د محصولاتو عواید ۲۷۰ میلیونه افغانیو ته ورسېږي.

ښاغلي سبحاني وویل چې تېر کال ۶۵۰۰ ټنه د شفتالو حاصلات را ټول شوي وو چې له دې درکه بڼوالو ۲۰۰ میلیونه افغانۍ عواید درلودل.

د نوموړي په خبره، د شفتالو باغونه د ننګرهار ولایت په ۱۳ ولسوالیو اچین، شېرزادو، خوږياڼیو، روداتو، سره رود، کامې، بهسودو، ګوشتې، کوز کونړ، لعل پورې او چپرهار ولسوالیو په ۳۰۰ زره جریبه ځمکه کې جوړ شوي دي.

د یادونې ده، چې د ننګرهار شفتالو د هېواد د نورو ولایتونو ترڅنګ پاکستان او هند ته هم صادرېږي.

ګوتريش د جګړه ځپلو والدينو او ماشومانو په اړه اندېښمن دی

Moldova UN Guterres

د ملګرو ملتونو سرمنشي انتونیوګوتریش نن د مې ۱۵مه د کورنۍ نړیواله ورځې په مناسبت په خپله ټویټرپاڼه لیکلي، دی لا هم د هغو والدینو او ماشومانو په اړه فکر کوي چې په خپلو وروستیو سفرونو کې یې وسره لیدلي او ژوند یې جګړې ځپلی دی.

ښاغلی ګوتریش وايي، دی به تر هغې خپلې هڅې روانې وساتي چې ټولې کورنۍ یو ځل بیا په سوله کې ژوند وکړي.

افغانستان یو له هغو هېوادونو دی چې کورنۍ یا فامیل په کې د ژوند یو بنسټ بلل کېږي، خو د تېرو لسیزو اوږدو جګړو دا بنسټونه له ډېر زیان سره مخ کړي او ان کورنۍ یې د پاشل کېدو تر درشل رسولي.

ننګرهار روغتيايي مسؤلين: هره ورځ لسګونه ځوانان په خپله خوښه وينې ورکولو ته ورځي

د ننګرهار روغتون انځور

د ننګرهار مرکزي روغتون مسؤلين وايي، په ورځ کې ۱۲۰ ځوانان په خپله خوښه د وینې ورکولو ته ورځي.

د دغه روغتون د وینې بانک مسوولانو پرون رسنیو ته ویلي، چې دغه وینه په اوسط ډول په تلسیمیا او نورو ناروغیو ۵۰ اخته کسانو ته ورکول کېږي.

تلسیمیا د وینې د کموالي هغه ناروغي ده، چې ورباندې اخته کس باید په منظم ډول تازه وینه ځان ته ولګوي.

ملګري ملتونه: افغانستان کې له ۱۹ ميليونو ډېر خلک له لوږې سره مخ دي

ارشيف

د ملګرو ملتونو یوه اداره وايي په افغانستان کې د روان کړکېچ له کبله د پوهنې برخه له خلکو هېره شوې ده.

د کډوالو په چارو کې د ملګرو ملتونو لویې کمېشنرۍ پرون په یوه ټویټ کې ویلي، دا مهال تر ۱۹ ميلیونو ډېر افغانان د لوږې له ستونزې کړېږي.

دغې ادارې د بامیان په تاجک کلي کې د هغو ماشومانو عکسونه هم خپاره کړي، چې د دوی له خوا ورسره د ښوونځیو د بستو/ بکسونو مرسته شوې ده.

په پنجشېر کې د دوو ماشومانو مړي موندل شوي

ارشیف: د پنجشېر ولایت یوه څنډه

په پنجشېر ولایت کې د هغو دوو ماشومانو مړي موندل شوي چې د وژنې تور یې پر طالبانو پورې شوی.

د طالبانو امنیتي چارواکو د درې ولسوالۍ په تندخوی سیمه کې د دې ماشومانو د مړیو موندل تایید کړي دي.

د سیمې اوسېدونکي وايي دا دوه ورڼه چې یو یې ۱۶ کلن او بل ۱۴ کلن وو کرزی او عین الله نومېدل، د مقاومت جبهې او طالبانو ترمنځ د تېرې اونۍ د جګړې پرمهال غره ته تښتېدلي وو، چې مړي یې نن شنبې موندل شوي دي.

په پنجشېر کې د طالبانو امنیه قوماندان مولوي دادمحمد بتار له آزادۍ راډیو سره په خبرو کې دا خبر تایید کړ او ویې ویل: "دوی له مولوي ورا سره غره ته تښتېدلي وو چې د جګړې پرمهال ووژل شول. دا هلکان چا په لوی لاس نه دي وژلي او هدف دوی نه وو، خو د جګړې په وخت کې وژل شوي."

د پنجشېرولایت پر درې ولسوالۍ د طالبانو د تېرې اونۍ له برید وروسته سلګونه کورنۍ د غرونو خوا ته تښتېدلي او اوس هلته د سړې هوا او د خوړو د نشتوالي له ستونزو سره مخامخ دي.

طالبانو د ۱۴۰۱ لمریز کال بودیجه اعلان کړه

د مالیې وزارت

د طالبانو حکومت د ۱۴۰۱ لمریز کال بودیجه اعلان کړه.

د طالبانو د حکومت د مالیې وزارت نن په یو بیان کې وویل، چې د ۱۴۰۱ مالي کال بودیجه ۲۳۱ میلیارده افغانۍ ده چې ۲۰۳ میلیارده یې عادي او ۲۷،۹ میلیارده یې پراختیايي بودیجه ده.

په بیان کې راغلي دي، چې دا بودیجه له کورنیو عوایدو ترتیب شوې او له بهره هېڅ ملاتړ نه دی ورسره شوی.

په بیان کې په سږنۍ بودیجه کې د ۴۴ میلیارده افغانۍ کسر یادونه هم شوې ده.

د تېر حکومت د وروستۍ بودیجې اندازه د اوسنۍ بودیجې تقریباً دوه چنده یعنې ۴۷۳ میلیارد افغانۍ وه چې ۳۱۱ میلیارده یې عادي او ۱۶۱ میلیارده یې پراختیايي بودیجه وه.

هغه مهال د دولت د بودیجې زیاته برخه د نړیوالې ټولنې له مرستو برابرېدله.

طالبانو د زرګونه افغان ښځینه او نارینه ښوونکو د استخدام لړۍ پیل کړې

ارشیف: ارزګان کې د یوه ښوونځي نجونې

د طالبانو د حکومت د پوهنې وزارت د هېواد په اتو ولایتونو کې د شاوخوا اوه زره ښځینه او نارینه ښوونکو د استخدام لړۍ پیل شوې.

په هغه بیان کې چې نن د پوهنې وزارت د بشري سرچینو له خوا خپور شو راغلي دي چې په هرات، فراه، غور، بادغیس، ننګرهار، لغمان، کونړ او نورستان ولایتونو کې د نږدې اوه زره ښوونکو او اداري تشو بستونو د استخدام لپاره اعلان شوی دی.

د بیان له مخې له دې ډلې ۲۷۷۷ بستونه د ښځو لپاره ځانګړي شوي دي.

په بیان کې دا یادونه هم شوې چې دې بستونو ته کسان د آزادې سیالۍ له لارې جذبېږي.

معلومه نه ده چې د دې اعلان هدف د منځنیو ښوونځیو او لېسو د زده کوونکو نجونو لپاره د ښځینه ښوونکو استخدام دی او که به د ځوانونو نجونو د تعلیم مسئله بیاهم لاینحله پاتې شي.

طالبانو پر افغانستان له واکمنېدو وروسته له شپږم د لوړو ټولګیو د زده کوونکو نجونو لپاره د ښوونځیو دروازې بندې کړې خو ویلي یې دي چې د ځانګړو مقرراتو له عملي کولو وروسته به دې نجونو ته هم د زده کړو اجازه ورکړي.

نور راوښيه

XS
SM
MD
LG