په پاکستان کې د کرونا وایروس ۵۰ تازه مثبتې پېښې ثبت شوې دي.

د پاکستان حکومت وايي، د دې هېواد په سند ایالت کې د کرونا وایروس ۵۰ مثبتې پېښې ثبت شوي چې په دې سره په ایالت کې د ټولو مثبتو پېښو شمېر ۷۶ ته ورسېد.

پاکستاني رسنیو د سند ایالت ویاند مرتضی وهاب له قوله لیکلي، له دې کسانو ډېر شمېر یې په کراچۍ ښار کې دي.

پاکستاني رسنۍ وايي، له دې وایروس په سند ایالت کې دوه تنه له رغېدو وروسته بېرته کورونو ته لېږل شوي دي.

په دې سره په ټول پاکستان کې په کرونا وایروس د اخته کسانو شمېر ۹۴ ته ورسېد چې ۷۴یې په سند، ۱۰یې په بلوچستان، ۴ ګلګت بلتستان او ۱یې په لاهور کې دی.

د متحدو ایالاتو ولسشمر ډونالد ټرمپ هند سره د یوې نوې تجارتي هوکړې خبر ورکړ.

دهوکړې یوه برخه کې داهم شامل دي چې هند به له روسيې نفت نه پیري.

ټرمپ د دوشنبې په ورځ خپله خواله رسنۍ «تروث سوشال» کې ولیکل چې دهوکړې په اساس به متحد ایالات په هندي محصولاتو خپله تعرفه له ۲۵ سلنې ، ۱۸ سلنې ته را کوزه کړي.

ټرمپ زیاتوي چې د هند صدراعظم نریندرا مودي سره دغه هوکړه دیوې تلفوني مکالمې په ترځ کې شوې او مودي منلې چې له روسیې څخه د نفتو پیرل به دروي او په ځای به یې له امریکا یا احتمالا ونزویلا څخه نفت رانیسي.

ولسمشر ټرمپ وايي دهند صدراعظم ژمنه کړې چې د ۵۰۰ ملیارډو ډالرو په بیه د انرژۍ ، تکنالوجی او کرنیزو محصولاتو په شمول امریکايی محصولات پیري او واردوي او په امریکايی اقلامو تعرفه هم صفر ته رسوي.

بلخوا دهند صدراعظم خپله ایکسپاڼه کې د ټرمپ څخه په مننې لیکلي دي چې په دې خوشحاله دی چې هندي محصولات لدې وروسته په ۱۸ سلنه تعرفه کې شاملیږي.

دهند صدراعظم د متحدو ایالاتو ولسشمر سره د نږدې همکاري لپاره هیله څرګنده کړې.

وروسته لدې چې دامریکا ولسمشر ډونالډ ترمپ ګواښ وکړ چې که موافقه ترلاسه نشي نو"بد څه به وشي" ، د ایران ولسمشر مسعود پیزشکیان نن د سې شنبې په ورځ تایید کړه چې متحده ایالاتو سره د اټومي خبرو اترو د پیل لارښوونه یې کړې.

تردې مخکې ، د اکسیوس رسنۍ د دوشنبې په ورځ رپوټ ورکړ چې د ایران بهرنیو چارو وزیر عباس عراقچي او دامریکا ځانګړی استازی سټیف ویټکاف به د راتلونکې جمعې په ورځ په استانبول کې سره وویني.

پیزشکیان د ایکس په یوه پوسټ کې وویل: "ما خپل د بهرنیو چارو وزیر ته لارښوونه کړې، په دې شرط چې یو مناسب چاپیریال شتون ولري - یو له ګواښونو او غیر معقول تمو څخه پاک - عادلانه او مساوي مذاکرات تعقیب کړي."

واشنګټن د ایراني چارواکو لخوا د حکومت ضد لاریونونو ته د مرګوني ځواب وروسته چې تیره میاشت یې کچه لوړه شوه، منځني ختیځ ته د الوتکو وړونکو بیړیو یوه ډله واستوله.

د متحده ایالاتو ولسمشر ډونالډ ټرمپ ویلي چې هیله مند دی چې واشنګټن به له ایران سره "یو څه حل کړي"، مګر د دوشنبې په ورځ یې خبرداری ورکړ چې که کومه موافقه ونه شي نو "بد څه به پیښ شي".

تهران ټینګار کړی چې ډیپلوماسي غواړي خو د هر ډول تیري په وړاندې سخت ځواب ته ژمن دی.

ایران په مکرر ډول ټینګار کړی چې خبرې اترې باید یوازې په اټومي موضوع متمرکزې وي او د خپلو توغندیو دپروګرام یا دفاعي وړتیاو په اړه خبرې یې رد کړي دي.

د ایران د بهرنیو چارو وزیر عباس عراقچي د دوشنبې په ورځ له CNN سره په یوه مرکه کې وویل چې له امریکا سره اټومي تړون امکان شته دی.

بریتانیې د دوشنبې په ورځ دایران په لسو چارواکو او یو امنیتي ارګان بندیزونه ولګول.

اعلامیې وویل چې دغه بندیزونه د «بشري حقوقو څخه د جدي سرغړونو» لکه دبیان د ازادۍ او د سوله ایزو لاریونونو دځپلو او په ځینو مواردو کې د ژوند د حق څخه د محرومولو له کبله دایران په یو شمیر چارواکو او د امنیتي ځواکونو په قوماندانۍ ولګول شول.

د کورنیو چارو وزیر اسکندر مومني او پانګوال او سوداګر بابک زنجاني د بندیزونو په لیست کې شامل دي.

اعلامیه زیاتوي چې دغه تنبیهي اقداماتو کې د پانګو کنګل او دویزو بندیز شامل دي.

لندن مخکې خبرداری ورکړی وو چې که دبشري حقوقو څخه سرغړونې دوام وکړي نو په ایران باندې خپلو بندیزونو ته به زور ورکړي.

د کرکټ نړیوالې شورا پاکستان ته خبرداری ورکړی چې په راتلونکي نړیوال جام کې له هند سره نه لوبېدل به ژورې پایلې ولري.

دا وروسته له هغه چې د پاکستان حکومت پرون په یوه بیان کې ویلي د پاکستان ټیم ته اجازه ورکوي چې نړیوال جام کې ګډون وکړي خو د فبروري په ۱۵مه به د هند په وړاندې د لوبې لپاره ډګر ته نه ځي.

د کرکټ نړیوالې شورا د پاکستان دا پرېکړه د سپورټ له روحیې او سپیڅلتیا سره په ټکر کې بللې او ویلي یې دي چې د نړۍ ګوټ ګوټ او پاکستان کې دننه د میلیونونو خلکو په خیر به نه وي.

دې شورا ویلي یې لا یې د پاکستان له کرکټ بورډه په دې تړاو رسمي مکتوب نه دی ترلاسه کړی.

د پاکستان کرکټ بورډ لا د خپلې پرېکړې دلایل هم نه دي وړاندې کړي سره له دې چې د پاکستان د ټیم ټولې ګروپي لوبې په سریلانکا کې پلان شوي.

تر دې مخکې هم بنګله دیش په هند کې له لوبو کولو انکار اعلان کړی چې ورسره د کرکټ نړیوالې شورا د بنګله دیش ځای سکاټلنډ ته ورکړ او دا ټیم یې د نړیوال جام د لوبو له جدول بهر کړ.

بنګله دېش ادعا کړې چې په هند کې یې لوبغاړي خوندي نه دي نو ځکه دې د دوی لوبې په سرېلنکا کې وشي. هند او د کرکټ نړیوالې شورا دا ادعا او غوښتنه رد کړې وه.

د شل اووره کرکټ نړیوال جام په هند او سرېلنکا کې کېږي.

د کرکټ نړیوال جام د فبروري په اوومه د پاکستان او هالنډ تر منځ په لوبې سره پیلیږي چې تمه ده د سریلانکا په پلازمینه کولمبو کې وشي.

د آسیا د فوټسال جام سیالیو په دوام، نن دوشنبه (۱۳ دلو) هم دوه لوبې ترسره کېږي.

لومړی لوبه د کویټ او لبنان ترمنځ ده او دوهمه هم د قرغیزستان او د جنوبي کوریا د لوبډلو ترمنځ ترسره کیږي.

د افغانستان د فوټسال لوبډلې په څلورم ګروپ کې پرون یکشنبې د ایران پر وړاندې ۵-۲ ماتې وخوړه.

تر دې مخکې، افغانستان د مالیزیا او سعودي عربستان لوبډلو پر وړاندې بریاوې ترلاسه کړې وې.

د آسیا د فوټسال جام سیالۍ د شپاړسو لوبډلو په ګډون د دلو میاشتې په ۷مه نېټه د اندونیزیا په کوربتوب پیل شوې دي.

اوکرایني چارواکي وایي، د دې هیواد په جنوب ختیځ دنیپروپیتروفسک سیمه کې د روسیې د یکشنبې د ورځې په دوو جلا بریدونو کې لږترلږه اولس کسان وژل شوي او لږترلږه اوه تنه نور ټپیان دي.

د چارواکو په خبره په پاولوهراد سیمه کې یو ډرون د کارګرانو یوه بس ته نژدې ولګېد چې په نتیجه کې یې ۱۵ کان ‌کیندونکي ووژل شول، او دوه تنه نور هم د سیمې په مرکز دنیپرو ښار کې پر یوه شخصي کور د بل برید په نتیجه کې ووژل شول.

په همدې حال کې چارواکو وویل چې په زاپوریژیا ښار کې پریو زېږنتون د روسیې په برید کې ۶ تنه ټپیان شوي او هم روغتون ودانۍ زیانمنه شوې ده. دا بریدونه په داسې حال کې شوي چې ټاکل شوې د کییف او مسکو ترمنځ د سولې د خبرو یو نوی پړاو دا اونۍ پیل شي.

د اوکراین ولسمشر ولودیمرزیلینسي کې وویل چې د خبرو دغه پړاو به د متحده عربي اماراتو په دوبی ښارکې د فبرورۍ د میاشتې له ۴ نه تر ۵ پورې ترسره شي. زیلینسکي پرټلګرام چینل ولیکل،" موږ لېواله یو چې ډاډ ترلاسه کړو چې پایله یې موږ د جګړې رښتینې او باعزته پای ته نږدې کړي."

د پاکستان په بلوچستان ایالت کې د شنبې د ورځې تر خونړیو پېښو ورسته، نن هم د دغه ایالت د مرکز کويټې په ګډون په بېلابیلو ښارونو کې د جدي امنیتي وضعیت خبره کېږي.

یو شمېر سیمه ییز خبریالانو د موضوع د حساسیت له امله خپل او د رسنۍ د نوم نه ښودلو په شرط ازادي راډیو ته وویل، یکشنبه د دلوې دولسمه هم د کویټې په ګډون په بیلا بیلو ښارونو کې ګرځبندیز نافذ او هیچاته له کورونو د وتلو اجازه نه ورکول کیږي.

په خیبر پښتونخوا کې د افغان کډوالو سرتاسري شورا وايي، انټرنیټي او ټلیفوني خدمتونه هم تر اوسه په بشپړ ډول قطع دي او اندېښنه څرګندوي چې په یاد ایالت په ځانګړي ډول کویټه کې به میشت افغانان له جدي ستونزو سره مخ وي.

د دې شورا مسول بریالي میاخیل ازادي راډيو ته وویل:

هغه زیاته کړه: « دلته په پښتونخوا کې د افغانانو ژوند له ډېر سخت کړاو سره مخ دی او بیا په بلوچستان کې خو حالت جنګي دي نو هلته خو به بیخي وضعیت غیر نور مال وي، ځکه د پاکستان حکومت ته خو د دغه ډول پېښو په وخت افغانان ښه لاس پاک وي او ټوله پړه پر دوی اچوي.»

پرون شنبه د دلوې یولسمه بلوچستان یوه نارامه ورځ تېره کړه او د مرکز کوټې په شمول په ۱۲ ښارونو او ښارګوټو کې همغږي وسله وال خونړي بریدونه او چاودنې وشوې.

سیمه ییزو خبریالانو ازادي راډیو ته وویل، اوس مهال که څه هم وضعیت د امنیتي ځواکونو په کنترول کې ښکاري خو د خلکو تر منځ ویره لا هم موجوده ده.

مرګژوبله

د بلوچستان اعلی وزیر میرسرفزار بګټي د ولوې په دولسمه نېټه په کوټه کې خبري غونډي ته وويل چې په "تېرو ۴۰ ساعتونو کې" له وسلوالو سره په نښتو کې "۱۷ امنيتي سرتېري" او ۳۱ ولسي وګړي وژل شوي دي.

نوموړي دغه شان ویلي، چې د وسله والو پر ضد په عملیاتو کې ۱۴۵ وسله هم وژل شوي دي.

فرانس پرېس او رویټرز خبري اژانسونو په خپلو راپورونو کې ویلي بلوڅ ازادي غوښتونکې ډلې بلوڅ لېبرېشن ارمي (بي اېل اې) چې امریکا یې د ترهګرې ډلې په توګه پېژنې د دغه حملو مسولست منلي او په حملو کې یې د پاکستان "۸۴ امنیتي سرتېرو د وژنې" دعوه کړې ده.

ډیورنډ کرښې ته څېرمه د کندهار د سپین بولدک ولسوالۍ د ویش بازار یو شمېر دوکانداران وايي که څه هم له سیمې تازه حال نه لري خو په خبره یې پرون وضعیت ډېر خونړی وو.

د ویش بازار یو دوکاندار میرویس ازادي راډيو ته وویل:

«پرون خو هاغاړه وضعیت ډېر خراب وو، که څه هم اوس هلته انټرنیټ بند او ټلیفوني شبکې بندې دي او هیچا سره اړیکه نه نیول کیږي، خو پرون چې ما خبرې کړي دي، څو درنې درنې چاودنې شوي دي په کویټه او د بلوچستان په لس پنځلس ځایونو کې جنګ روان وو، اوس هیڅ تازه مالومات نه لرم چې هلته څّ کیسه روانه ده.»

د دې ولسوالۍ یوه بل اوسېدونکې هم د نوم د نه ښودلو او غږ بدلون په شرط ازادي راډيو ته وویل:

«له پرون راهیسي په کویټه کې انټرنیټ کار نه کوي زما هلته د کاکا زامن دي، ډېر مو ورته تشویش او اندېښنه ده، ځکه پرون هلته ډېر سخت جنګ وو، موږ له خپلوانو هیڅ احوال نه لرو چې د هغوی وضعیت به څنګه وي، ویل کیږي چې نن هم په ټوله کویټه کې د خلکو په ګرزېدو بندیز دی او هیچاته له کورونو نه د وتلو اجازه نه ورکول کیږي.»

که څه هم په وروستیو کې د بلوچستان له بیلابیلو سیمو نه په ګڼ شمېر کې افغان کډوال په جبري ډول افغانستانه ته ایستل شوي خو د راپورونو له مخې لا هم د کویټې په ګډون په یو شمېر سیمو کې ځیني افغان کډوال میشت دي.

بلوچستان له افغانستان او ایران سره ګډه اوږده پوله لري له لسیزو راهیسې د ناکراریو شاهد دی.

د پاکستان امنیتي چارواکي تور لګوي چې د بلوچستان په وروستیو ناکراریو او بریدونو کې د هند له ملاتړ برخمنې وسله والې ډلې چې دوی یې "فتنة الخوارج" او "فتنة الهندوستان" یادوي لاس لري.

هغه ادعا چې هندي چارواکو رد کړې ده.

د بلوچستان اعلی وزير میر سرفراز بګټي ادعا کوي چې امنيتي ځواکونو په تېرو نژدې دوو ورځو کې د دې ایالت په بېلابېلو برخو کې د عملیاتو او جګړو پر مهال ۱۴۵مشکوک وسله وال وژلي دي.

ښاغلي بګټي نن په کوټه کې خبریالانو ته وويل، په تېرو ۴۰ ساعتونو کې له وسله والو سره په نښتو کې ۱۷ امنيتي سرتېري هم وژل شوي دي.

د هغه په وینا پرون شنبې په وسله والو حملو کې د وژل شویو ولسي وګړو شمېر ۳۱ ته رسېدلی دی. بګټي زیاته کړه چې په ګوادر کې د یوې کورنۍ پنځه مېرمنې او درې ماشومان چې ټول د خضدار سیمې اوسېدونکي بلوڅان وو، وژل شوي دي.

د بلوچستان په مرکز کوټه، مستونګ، نوشکي، دالبندین، خاران، پنجګور، تمپ او ګوادر سیمو کې له وسله والو حملو وروسته چې پړه یې بلوڅ بېلتونپالو ومنله، د پاکستان پوځ پرون وویل چې په ځوابي عملیاتو کې یې ۹۲ تنه مشکوک وسله وال وژلي دي.

د پوځ عامه اړیکو څانګې وویل چې د وسله والو په حملو کې ۱۸ ولسي وګړي او ۱۵ پوځیان وژل شوي دي.

د ایران د پارلمان مشر د هغو هېوادونو پوځونه تروریستي ډلې بللي چې د ایران سپاه پاسداران یې تروریستي ډله اعلان کړې ده.

محمدباقر قالیباف نن د پارلمان غونډې ته په وینا کې وویل د ایران د قوانینو له مخې هغوی چې سپاه تروریستي ډله بولي، خپل پوځونه یې تروریستي ډلې دي.

هغه زیاته کړه چې اروپایانو د سپاه په هدف ګرځولو سره خپلې پښې په تبر ووهلې او ثابته یې کړه چې یوځل بیا یې په ړندو سترګو د امریکا اوامر ومنل.

اروپايي ټولنې د پنجشنبې په ورځ د یو سیمبولیک اقدام په ترڅ کې د ایران سپاه پاسداران انقلاب ځواک د یوه تروریستي سازمان په توګه اعلان کړ. د اروپايي ټولنې غړو دا اعلان وروسته له هغه وکړ چې دې ځواک په ایران کې د خلکو پراخ اعتراضونه په کلکه وځپل.

دا لاریونونه چې ساری یې د ۱۹۷۹ کال له اسلامي انقلاب راهیسې لږ لیدل شوی د ډسمبر په ۲۸ مه د ایراني ریال د ارزښت د رالوېدو او ګرانۍ په وړاندې د تهران له بازاره پیل شول چې وروسته نورو ولایتونو ته وغځیدل او د رژیم پر وړاندې د پراخو اعتراضونو بڼه یې غوره کړه.

د ایران په بندرعباس او اهواز کې دوه چاودنې شوي چې یو شمېر کسانو ته یې مرګژوبله اړولې ده.
د هرمزګان ولایت د بیړنیو چارو د کنټرول ادارې ویلي چې شنبه په بندرعباس ښار کې په یوه هستوګنیزه ودانۍ کې چاودنې لږ تر لږه ۱ کس وژلی او ۱۴ نور یې ژوبل کړي دي.

چارواکو ویلي چاودنه د ګازو د لیک کېدو له امله شوې.

اخوا په اهواز کې هم چارواکو تایید کړې چې په کیانشهر سیمه کې د ګازو د چاودنې له امله لږ تر لږه پنځه کسان وژل شوي او دوه نور ټپیان دي.

د چاودنو تر راپورونو وروسته د ایران سپاه پاسداران ځواکونو د ایران د سمندري ځواک د قومندان علیرضا تنګسیري د وژنې خبره رد کړه.
اسراییلي چارواکو هم ویلي چې دوی په ایران کې د شنبې ورځې په چاودنو کې لاس نه لري.

دا وروستۍ څو ورځې پر ایران د امریکا د پوځي اقدام امکان د کورنیو او نړیوالو رسنیو یوه مهمه موضوع ګرځیدلې.

په ګڼو رسنیو کې راغلي چې متحده ایالتونو په لویو پوځي جنګي بیړیو سربېره ګڼې جټ او تېل وړونکې الوتکې په سیمه کې ځای پر ځای کړی.

د امریکا لویه پوځي جنګي الوتکې وړونکې بیړۍ یو اس اس ابراهام لینکلن هم منځني ختیځ کې لنګر اچولی.