د لاسرسۍ وړ لېنکونه

تازه خبر
سه شنبه ۱۳ غبرګولی ۱۳۹۹ کابل ۰۹:۱۱

افغانستان

پاکستان د تورخم دروازه وتړله

تورخم دروازه

د ننګرهار چارواکي وایي چې پاکستاني لوري نن د کرونا وایروس د مخنیوي په هدف د تورخم لویه لار وتړله.

د ننګرهار د والي ویاند د دوشنبې په ورڅ ازادي راډيو ته د تورخم لارې تړل تأیید کړل او په خبره‌یې چې دغه لاره د هر ډول مسافرینو او بار وړونکو موټرو پر مخ تړل شوې ده.

که څه هم تر دې وړاندې ویل کېدل چې د تورخم لاره به یوازې د مسافرینو پر مخ تړل شوې وي، خو نن سهار وختي د بار وړونکو موټرو پر مخ هم تړل شوې ده.

دا چې دا لاره به تر څه وخته بنده وي، د ننګرهار چارواکو په دې اړه څه نه‌دي ویلي.

تر دې وړاندې داسې راپورونه وو چې پاکستان له افغانستان سره ټولې لارې د کرونا وایروس د مخنیوي په موخه د مارچ له ۱۶مې د دوو اوونیو په مخه تړي.

دا په داسې حال کې ده چې تېره ورځ د سارک غړو هېوادونو مسؤلینو په وېډیویي کنفرانس کې هم د پاکستان د روغتیا وزیر په خپلو خبرو کې وویل چې پاکستان غواړي چې له خپلو ګاونډیو هېوادونو سره د کرونا د مخنیوي لپاره ټولې لارې د تګ راتګ په وړاندې وتړي.

د ورځې تازه خبرونه دلته ولولئ

فراه کې ۱۵ ډاکتران په کرونا ویروس اخته شوي

ارشیف

د فراه ولایتي روغتون ۱۵ ډاکتران په کرونا ویروس اخته شوي دي.

د فراه د عامې روغتیا رئیس عبدالجبار شایق ازادي راډیو ته وویل: "له نېکه مرغه هغه ډاکتر صاحبان چې په کرونا اخته دي، جدي علایم نه‌لري. کورنۍ قرنطین مراعتوي او که خدای کول تر قرنطین وروسته به بېرته دوهمه معاینه ورکړل شي."

د فراه ولایت د عامې روغتیا رئیس له خلکو غوښتي چې د کرونا ناروغۍ څخه د ځان ژغورنې لپاره دې د ډاکترانو سپارښتنې په نظر کې ونیسي.

د فراه د روغتیايي چارواکو په وینا په دې ولایت کې په کرونا د اخته کسانو شمېر ۱۷۴ تنو ته رسېدلی چې ۱۸ تنه‌یې رغېدلي او یو تن وفات شوی دی.

کندز کې ماین چاودنې ۷ کارګران وژلي او ۶ ټپیان دي

د کندز نقشه

د کندز په خان‌اباد ولسوالۍ کې د یو ماین چاودنې اووه کارګران وژلي او شپږ نور یې ټپیان کړي دي.

د کندز د والي ویاند عصمت‌الله مرادي نن سې شنبه ازادي راډیو ته وویل، دا مرګ‌ژوبله هغه مهال اوښتې چې تېره ورځ ماښام د خان‌اباد ولسوالۍ د جنګل باشي سیمه کې د کارګرو پر یو زرنج موټر د طالبانو له‌خوا خښ شوی ماین وچاودېده.

نوموړي زیاته کړه، د ۴ تنو ټپیانو روغتیايي وضعیت ښه نه‌وي او د درملنې لپاره د کندز حوزوي روغتون ته انتقال شوي دي.

هغه زیاته کړه چې د خان‌اباد د جنګل باشي سیمه د وسله‌والو طالبانو کنټرول کې ده او طالبانو د خان‌اباد ښار ته پر غځېدلو فرعي سړکونو ماینونه خښ کړي.

په مړو او ټپیانو کې هغه مزدورکاران شامل دي چې کلیو او بانډو ته په کروندو کې د کار او مزودرۍ لپاره روان و.

طالبانو په دې اړه تبصره نه‌ده کړې. دا وسله‌واله ډله ډېر کله د هغو چاودنو مسؤلیت پر غاړه نه‌اخلي چې په‌کې ولسي خلکو ته مرګ‌ژوبله اوړي.

فراه کې به روان کال د هندواڼو حاصلات څه باندې ۶۸۹ زره ټنو ته ورسېږي

ارشیف

روان کال به په فراه ولایت کې د هندواڼو حاصلات څه باندې ۶۸۹ زره ټنو ته ورسېږي.

د دغه ولایت د کرنې رئیس عبدالمنان متین ازادي راډيو ته وویل، وړاندوینه دا ده چې روان لمریز کال به د فراه ولایت د هندواڼو حاصلات ۶۸۹ زره ۴۰۰ مټریک ټنو ته ورسېږي.

د نوموړي په وینا اوس‌مهال په دغه ولایت کې په ۱۹ زره ۱۵۰ هکټاره ځمکه کې هندواڼې کرل شوي.

تېر کال هم په همدې ولایت کې ۱۸ زره ۴۰ هکټاره ځمکه کې هندواڼې کرل شوې وې چې ۶۵۰ زره ۲۶۸ مټریک ټنه هندواڼې یې کړې وې.

د ښاغلي متین په خبره د تېر کال په پرته روان کال د فراه کرنیز محصولات په سلو کې ۶ سلنه زیات شوي.

د متین په وینا سږ کال د هنډوانو د ضایع کېدو د مخنیوي او پلور لپاره‌یې ځانګړي تدابیر نیول شوي.

د یادولو ده چې تېر کال په فراه ولایت کې د ستونزو له امله د دغه ولایت هندواڼې خرابې شوې وې.

د اقتصاد عالي شورا د غالیو د صادراتو لپاره ۶ سلنه سبسایډي ورکوي

ارشیف

د افغانستان د اقتصاد عالي شورا د هوايي دهلېزونو له لارې د غالیو د صادراتو لپاره شپږ سلنه سبسایډي په پام کې نیولې ده.

د افغانستان د پانګې اچونې او سوداګرۍ خونې د عامه اړیکو مرستیال جان اقا نوید نن ازادي راډیو ته وویل چې دغه اقدام د وطني غالیو د صادراتو د زیاتوالي او د ګاونډیو هېوادونو له لارې د غالیو د قاچاق د مخنیوي په هدف ترسره شوی.

ښاغلی نوید زیاتوي دغه کار افغان سوداګر هڅوي چې با کیفیته غالۍ تولید او صادرې کړي، د افغاني غالیو سکټور چې د کیفیت له امله په ګرده نړۍ کې لومړی و او دا مهال له ستونزو سره مخ دی یو ځل بیا په نړۍ کې پخوانی بازار او شهرت خپل کړی.

د جان اقا نوید په خبره تېر کال د هوايي دهلېزونو له لارې افغاني غالۍ صادرېږي، خو د کرونا ویروس د خپراوي د مخنیوي په هدف دغه صادرات درول شوي دي.

ویل کېږي چې افغاني غالۍ تر ډېره اسټرالیا، جرمني، انګلستان او امریکا ته صادرېږي.

دا په داسې حال کې ده چې اوس‌مهال زرګونه متره افغاني غالۍ ګاونډیو هېوادونو په ځانګړې توګه پاکستان ته وړل کېږي او په هغه هېواد کې له پروسس وروسته په پاکستاني نوم او نښان نورو هېوادونو ته صادرېږي.

تخار کې د وسلو او مهماتو دوه قاچاقبران نیول شوي

د تخار ولایت نقشه

د تخار امنیه قوماندانۍ د وسلو او مهماتو د دوو قاچاقبرانو د نیولو خبر ورکوي.

د تخار امنیه قوماندان سمونوال سید معراج‌الدین سادات نن رسنیو ته وویل، د جنايي جرایمو پر ضد د مبارزې پولیسو د تالقان ښار په تنګي فرخار سیمه کې دوه کسان چې د وسلو او مهماتو د لویو قاچاقبرانو له ډلې دي، نیولي دي.

ښاغلی سادات وايي دا قاچاقبران چې د تخار ولایت د چایاب (چاه آب) ولسوالۍ اوسېدونکي دي په داسې حال کې ونیول شول چې یوه اندازه وسلې او مهمات‌یې په یوه تونس موټر کې چایاب ولسوالۍ ته وړل.

د تخار امنیه قوماندان وايي چې له تورنو کسانو څخه تحقیقات روان دي.

اشرف غني له پومپیو سره د افغانستان د سولې په اړه خبرې وکړې

د افغانستان ولسمشر محمد اشرف غني او د امریکا د بهرنیو چارو وزیر مایک پومپیو

ولسمشر محمد اشرف غني د امریکا د بهرنیو چارو له وزیر مایک پومپیو سره د وېډیو کنفرانس له لارې د افغانستان د سولې د بهیر په اړه خبرې وکړې.

د امریکا د بهرنیو چارو وزیر مایک پومپیو وویل: "د امریکا اساسي هدف د اوږدمهاله او ستراتېژيکو اړیکو د دوام په چوکاټ کې یو موټي، خپلواک، ډموکراتيک او باثباته افغانستان دی او دې هدف ته د رسېدو لپاره به‌يې هېواد له افغان حکومت سره یو ځای کار وکړي."

په همدې حال کې د افغانستان د سولې لپاره د امریکا ځانګړي استازي زلمي خلیل‌زاد د دوشنبې په ورځ د انټرنټ له لارې خبریالانو ته وویل چې د افغانستان د سولې په برخه کې پرمختګ شوی دی او امریکا د افغان حکومت او طالبانو ترمنځ د بندیانو د خلاصون په برخه کې مرسته کوي.

ده هیله څرګنده کړه چې د تاوتریخوالي کچه به ټيټه پاته شي چې بین‌الافغاني خبرې پيل شي.

د امریکا او طالبانو ترمنځ د موافقې له مخې ټاکل شوې وه د مارچ تر ۱۰مې پورې طالبان د افغان حکومت زر بندیان او افغان حکومت د طالبانو پنځه زره بندیان راخوشې کړي چې بین‌الافغاني خبرې پیل شي، خو د بندیانو د مبادلې بهیر تر اوسه نه‌دی بشپړ شوی.

د ژغورنې نړیواله کمېټه: افغانستان له یو بشري ناورین سره مخ دی

ارشیف

د ژغورنې نړیواله کمېټه وايي، افغانستان له بشري ناورین سره مخامخ دی چې د کرونا ویروس پېښې پرته له تشخیصه مخ پر زياتېدو دي.

د دې کمېټې د اعلاميې له مخې چې د دوشنبې په ورځ خپره شوه، په افغانستان کې په مې میاشت کې د کرونا ویروس پېښې ۶۸۴ فیصده زیاتې شوې او ډېرې نورې پېښې بې‌تشخیصه پاته دي.

دا په داسې حال کې ده چې د افغانستان عامې روغتیا وزارت ویلي چې هر ورځ یوازې د دوه زره کسانو د معایناتو ظرفیت لري، خو له ۱۰ زرو څخه تر ۲۰ زرو پورې سمپلونه ورته ورځي.

د ژغورنې نړیوالې کمېټې په راپور کې راغلي چې دا په دې معنی ده چې ۸۰ او ۹۰ فیصده احتمالي پېښې پرته له تشخصیه پاته کېږي.

دې کمېټې ویلي چې په افغانستان کې د جګړې ترڅنګ د کرونا ویروس له کبله ۱۱ میلیونه کسان د خوړو له کمښت سره مخامخ دي.

د ژغورنې نړیوالې کمېټې له نړیوالو هېوادونو غوښتي چې په افغانستان کې دې له مرستندویه ادارو سره په دې برخه کې مالي مرسته وکړي چې د خلکو ژوند وژغورل شي.

اتمر د اذربایجان له بهرنیو چارو وزیر سره د سولې په اړه خبرې وکړې

د افغانستان د بهرنیو چارو سرپرست وزیر محمد حنیف اتمر

د افغانستان او اذربایجان د بهرنیو چارو وزیرانو د افغانستان د سولې پر پروسه خبرې وکړې.

د اذربایجان تریند خبري اژانس نن د دغه هېواد د بهرنیو چارو وزارت په حواله خبر ورکړی چې محمد حنیف اتمر او ایلمار محمدیاروف په وېډیو کنفرانس کې بحث وکړ.

د خبر له مخې د اذربایجان د بهرنیو چارو وزیر د افغانستان د سولې په پروسه کې له خپله اړخه د همکارۍ ژمنه کړې ده.

د کوچني اختر په درېیو ورځو کې نافذ شوي اوربند د افغانستان د سولې پروسې چټکتیا ته هیلې زیاتې کړې دي.

د حکومت او طالبانو ترمنځ د بندیانو تبادله هم زیاته شوې چې دواړو لورو د یو بل په لسګونه بندیان خوشې کړي دي.

په پام کې ده حکومت د طالبانو ۵،۰۰۰ او طالبان د حکومت ۱،۰۰۰ تنه بندیان خوشې کړي.

د بندیانو تبادله د بین‌الافغاني مذاکرو د پیل لپاره اساسي شرط ګڼل کېږي.

چارواکي: ننګرهار کې د دولت ۱۶ مخالف وسله‌وال وژل شوي

ارشیف

د ننګرهار چارواکي وايي په حصارک ولسوالۍ کې د دولت ۱۶ مخالف وسله‌وال وژل شوي دي.

ویل شوي، دغه وسله‌وال وروسته له هغې ووژل شول چې اول‌یې تېره شپه د امنیتي ځواکونو پر پوستو ډله‌ییز بریدونه پیل کړل چې وروسته وسله‌واله نښته وشوه.

د والي ویاند عطاالله خوګیاڼي نن رسنیو ته وویل چې په دې نښته کې سیمه‌ییزو پولیسو ته هم مرګ‌ژوبله اوښتې ده.

هغه وویل: "متأسفانه د دوی په ډله‌ییزو بریدونو کې ۳ سیمه‌ییز پولیس شهیدان شوي او یو بل ټپي شوی دی. د دغو ترورېستي بریدونو په ځواب کې امنیتي ځواکونو ۱۶ مخالف وسله‌وال وژلي او ۹ تنه نور یې ټپیان کړي چې په وژل شویو کې د عباس او ادریس په نوم د دوی دوه سرګروپان هم شامل دي."

د والي ویاند وایي تر پېښې وروسته سیمې ته تازه دمه امنیتي ځواکونه لېږل شوي دي.

د دولت کومې مخالفې ډلې د دې پېښې په اړه څه نه‌دي ویلي.

د کاپیسا د ټرافیکو مدیر نن د نامعلومو وسله‌والو په حمله کې ووژل شو

د کاپیسا نقشه

د کاپیسا د ټرافیکو مدیر نن د نامعلومو وسله‌والو په حمله کې ووژل شو.

چارواکي وايي سید منیر له کوره دفتر ته روان و چې نن سهار د کاپیسا مرکز په قلعه سید خان سیمه کې ووژل شو.

د دې پېښې مسؤلیت تر اوسه چا نه‌دی منلی.

بدخشان کې نامعلومو وسله‌والو ۴ تنه ملکیان په ډزو وژلي

د بدخشان ولایت نقشه

نامعلومو وسله‌والو کسانو په بدخشان ولایت کې تېره شپه ۴ تنه ملکیان په ډزو وژلي دي.

د بدخشان د امنیه قوماندانۍ ویاند ثناالله روحاني نن ازادي راډیو ته وویل، دغه کسان د ارغنج‌خواه ولسوالۍ په شېوه سیمه کې وژل شوي.

هغه زیاته کړه: "د ناپېژانده وسله‌والو کسانو له‌خوا څلور تنه ملکیان وژل شوي او تر اوسه د دې وژنې دلیل او انګېزه معلومه نه‌ده. پولیسو د قاتلانو د پېژندنې لپاره اقدام کړی دی."

د دې پېښې مسؤلیت تر اوسه چا نه‌دی منلی.

افغانستان کې په کرونا ویروس د اخته کسانو شمېر ۱۵،۷۵۰ ته ورسېد

افغان-جاپان روغتون کې ډاکتران په کرونا ویروس اخته ناروغ ته د لارښوونې پر مهال.

د افغانستان روغتیا وزارت وايي په تېرو ۲۴ ساعتونو کې په هېواد کې د کرونا ویروس ۵۴۵ نورې پېښې ثبت شوې دي.

د دغه وزارت معین وحید مجروح نن رسنیو ته په یوه لېږلي وېډیويي پیغام کې وویل، په دې موده کې په دې ویروس ۸ کسان مړه شوي او ۱۰۰ تنه نور روغ شوي دي.

ښاغلي مجروح له خلکو د دې وبا په مخنیوي کې د همکارۍ غوښتنه وکړه: "د کرونا وبا د کنټرول په برخه کې یوازنۍ هیله او فکټور د خلکو مرسته ده چې دوی د ګڼه ګوڼې ځایونو ته لاړ نه‌شي، په جبري توګه ماسک وکاروي او دوه متره ټولنیز واټن وساتي، د ورځې له ۲۰ تر ۳۰ وارې خپل لاسونه ومینځي."

په افغانستان په کرونا ویروس د اخته کسانو شمېر ۱۵ زره ۷۵۰ ته رسېدلی دی.

له دې جملې تر ۱،۴۰۰ زیات کسان روغ شوي هم دي.

بل‌خوا د جمهوري ریاست لومړي مرستیال د جرمني له هېواد څخه د کرونا ویروس د ټسټونو لپاره د وسایلو د مرستې غوښتنه وکړه.

امر الله صالح دا غوښتنه نن په کابل کې د جرمني له سفیر پیټر پروګل (Peter Prügel) سره په کتنه کې مطرح کړه.

بدخشان کې له سېلاب‌ځپلو سره ۱۰ میلیونه افغانۍ مرسته وشوه

ارشیف

د افغانستان حکومت په بدخشان کې له سېلاب‌ځپلو سره ۱۰ میلیونه افغانۍ مرسته وکړه.

د دغو مرستو د رسولو لپاره پېښو ته د رسېدو په چارو کې د دولت وزیر غلام بهاوالدین جیلاني پرون بدخشان ته تللی و.

دی وايي: "موږ مرستې نغد له ځانه سره راوړي. نورې مرستې به هم په څو راتلونکو ورځو کې د بدخشان د بېړنیو حالاتو ادارې ته ورسېږي. مرستې باید لومړی هغو کسانو ته چې واقعاً ډېر زیان‌یې لیدلی وسپارل شي."

د بدخشان چارواکو ویلي چې په یمګان، شهدا، بهارک، شکی، ارګو او فیض‌اباد ښار کې د سېلابونو راوتلو تر اوسه درې کسان مړه کړي او شااوخوا ۲۰۰ کورونه‌یې وران کړي دي.

په بدخشان کې هر کال د سېلابونو د راوتلو او د ځمکې د ښویېدو په پېښه کې لسګونه کسان مړه شوي چې یوه تر ټولو لویه پېښه د ۱۳۹۳ کال د غويي میاشت په ارګ ولسوالۍ کې شوې وه.

هغه کال په ارګو کې اب باریک کلی د غره د ښویېدو په پېښه کې تر خاورو او ډبرو لاندې شو او دوه نیم زره کسان په‌کې مړه شول.

افغانستان کې د جرمني سفیر: د سولې هڅو کې د افغانانو ترڅنګ ولاړ یو

په افغانستان کې د جرمني سفیر پیټر پروګل

په افغانستان کې د جرمني سفیر پیټر پروګل وایي چې هېواد به‌یې له ترهګرۍ سره د مبارزې او د سولې په هڅو کې د افغانانو ترڅنګ ولاړ وي.

هغه دا خبره د جرمني سفارت ته نږدې د ۲۰۱۷ کال د مې ۳۱مه د خونړي برید د درېیم کال د پوره کېدو په مناسبت کړې.

پروګل یکشنبه په خپل ټویټر لیکلي چې په سفارت کې یې دننه د دې برید د قربانیانو یاد غونډه جوړه کړې وه.

درې کاله وړاندې د کابل په یوه ډیپلوماټیکه ساحه کې د جرمني سفارت ته نږدې موټر بم چاودنه وشوه چې په‌کې له ۱۵۰ زیات کسان مړه او تر ۴۰۰ نور ډېر کسان ټپیان شول.

په وژل شویو کې د جرمني سفارت یوه ډیپلوماټه او یو افغان ساتونکی او په ټپیانو کې د جرمني او جاپان د سفارتونو یو شمېر کارکوونکي شامل و.

په دغه لوی برید کې ۹۰ فیصده مرګ‌ژوبله ملکیانو ته اوښتې وه.

دغه برید د جرمني د سفارت د ودانۍ زیاته برخه ورانه کړې وه او له امله‌یې جرمني په کابل کې خپل قونسلي خدمات بند کړل. افغان چارواکو دا برید د حقاني شبکې کار بللی و.

احمد جواد عثماني د افغانستان عامې روغتیا وزارت سرپرست وټاکل شو

ډاکتر احمد جواد عثماني د عامې روغتیا وزارت نوی سرپرست او نوماند وزیر

د افغانستان جمهوري ریاست ډاکتر احمد جواد عثماني د عامې روغتیا وزارت نوی سرپرست او نوماند وزیر ټاکلی.

دا خبره د جمهوري ریاست د چارو ادارې له‌خوا د یکشنبې په شپه په یوه اعلامیه کې یاده کړې ده.

د عثماني د مقررۍ تر اعلان څو ساعته مخکې فېروزالدین فېروز چې شااوخوا پنځه کاله د افغانستان عامې روغتیا وزیر و د خپلې دندې د پای ته رسولو اعلان وکړ.

هغه خپل مأموریت بریالی ارزولی دی.

د افغانستان عامې روغتیا وزارت کې دا بدلون داسې وخت راغلی چې کرونا ویروس د افغانستان خلک له جدي ګواښ سره مخ کړي.

د فېروزالدین فېروز د لیرې کېدو او پر ځای يې د ډاکتر عثماني د مقررۍ عوامل نه‌دي په ډاګه شوي، خو ښاغلی فېروز په افغانستان کې د کرونا ویروس له پیله د رسنیو او خلکو د توجه وړ ګرځېدلی و او ځینو خلکو دی او ټیم‌یې د کرونا ویروس سره د مبارزې په چارو کې په کم‌کاریو تورنول.

په افغانستان کې تر یکشنبې ناوخته څه باندې ۱۵ زره کسان ( ۱۵،۲۰۴) په کرونا ویروس اخته شوي چې له ډلې یې ۲۵۷ تنه مړه دي.

له دې ډلې یوازې ۱،۳۵۰ کسان بېرته ښه شوي، خو هره ورځ د څه باندې ۶۰۰ نویو قضیو راپورونه تأییدېږي.

نور راوښيه

XS
SM
MD
LG