د لاسرسۍ وړ لېنکونه

تازه خبر
سه شنبه ۱۲ وری ۱۳۹۹ کابل ۰۰:۱۵

نړۍ

د نړۍ په کچه د کرونا وایروس د مخنیوي لپاره تازه اقدامات اعلان شوي

چین ویلي چې پرون په کرونا وایروس د خلکو د اخته کېډو یوازې ۱۶ پېښې ثبت شوې دي.

د نړۍ په بېلابېلو هېوادونو کې د کرونا یا کووید ۱۹ وایروس د کنټرول لپاره تازه اقدامات اعلان شوي دي.

په نړۍ کې په دې ساري ناروغۍ د اخته کسانو شمېر تر ۱۵۶زرو اوښتی او تر ۵۸۰۰ زیات کسان یې په نتیجه کې مړه شوي دي.

د کرونا وایروس د خپرېدو د مخنیوي په هدف په اروپا کې ګڼ هېوادونه ورځ په ورځ د خلکو پر ګرځېدو راګرځېدو او نړيوالو سفرونو محدودیتونه لګوي.

فرانسې له ورته اقداماتو سره نن محلي انتخاباتو ته چمتووالی نیسي او ویلي یې دي، دغه ټاکنې د دې هېواد د ډیموکراتیکې بقا لپاره مهمې دي.

د امریکا متحدو ایالاتونو د بریتانیا او ایرلنډ په ګډون له ۲۶ اروپايي هېوادونو سفرونه منع کړي، چې په هوايي ډګرونو کې یې بحران رامنځته کړی دی.

دغه وایروس چې د روغتیا نړیوال سازمان وبا ته ورته ناروغي بللې، په تېره ډېسېمبر میاشت په چین کې کشف شو او بیا نورې نړۍ ته خپور شو.

په چین کې چارواکي وايي په کرونا د خلکو د اخته کېدو شمېر کم شوی، خو دغه هېواد هغو کسانو چې نړیوال سفرونه کوي، د معاینې تازه طرزالعملونه نافذ کړي دي.

چین ویلي چې پرون په کرونا وایروس د خلکو د اخته کېډو یوازې ۱۶ پېښې ثبت شوې دي.

د ورځې تازه خبرونه دلته ولولئ

ایران کې د کرونا ویروس له کبله د مړو شمېر ۲۷۵۷ ته ورسېد

په ایران کې د یاد ویروس د مثبتو پېښو رسمي شمېره هم ۴۱۴۹۵ تنو ته لوړه شوې ده.

په ایران کې د کرونا ویروس له کبله په تېرو ۲۴ ساعتونوکې ۱۱۷ کسان مړه شوي دي.

په دې سره په دې هیواد کې د کرونا ویروس له کبله د مړو شمېر ۲۷۵۷ تنو ته ورسېد.

د ایران د روغتیا وزارت ویاند کیانوش جهانپور نن د مارچ دیرشمه د ایران دولتي ټلویزیون ته وکړه.

د جهانپور په خبره په ایران کې د یاد ویروس د مثبتو پېښو رسمي شمېره هم ۴۱۴۹۵ تنو ته لوړه شوې ده.

ښاغلي جهانپور وایې په تیرو ۲ ساعتونو کې په دې هیواد کې ۳۱۸۶ نوي پیښي ثبت شوي دي.

نوموړي له ایرانیانو یو ځل بیا وغوښتل کې په کورونو کې پاتې شي.

ایران د نړۍ له هغو هیوادونو کې چې کرونا ویروس سخت ځپلی دی.

ازبکستان د هوایي ډګرونو فعالیتونه ځنډولي

دا محدودیت هم د هوایي ډګرونو د بند پاتې کېدو تر مودې پوري په پام کې نیول شوی دی.

ازبکستان د دې هېواد د ټولو هوایي ډګرونو فعالیتونه وځنډول څو د کرونا ویروس د خپریدو د مخنیوي سره مرسته وشي.

د ازبکستان د بهرنیو چارو وزارت په یوې اعلامیې کې ویلي چې ټول هوایي ډګرونه دې سر له نن څخه د اپریل تر ۲۰ پوري خپل فعالیتونه ودروي.

د دې هېواد یوه حکومتي کمېسیون له وړاندې د ازبکستان د ښارونو او ښارګوټو ترمنځ د وسایطو پر تګ راتګ محدودیت لګولی.

دا محدودیت هم د هوایي ډګرونو د بند پاتې کېدو تر مودې پوري په پام کې نیول شوی دی.

د ازبکستان د روغتیا چارواکو په خبره په دې هېواد کې په کرونا ویروس د اخته کسانو شمېر ۱۴۵ تنو ته رسېدلی چې ۲ تنه په کې مړه شوي.

د دې په ګاونډي قرغزستان کې د کورنیو چارو وزارت نن د مارچ دیرشمه ویلي چې پولیسو ۱۰۸۷ کسان د ګرځبندیز د سرغړوني له کبله نیولي دي.

په دې هېواد کې پنځه ورځې وړاندې اعلان وشو چې د شپې له اتو بجو د سهار تر ۷ ټول افراد او نقیله وسایط له ګرځېدو منع دي.

په قرغزستان کې د کرونا ویروس ۸۴ پېښې ثبت شوي دي.

په قزاقستان کې نن دوشنبه د مارچ دیرشمه د کرونا ویروس لس نوي پېښې ثبت شوي چې د دې ویروس د ناروغان شمېر ورسره ۲۹۴ ته ورسېد.

یو تن یې له دې ویروسه مړ شوی دی.

د منځنۍ آسیا په دوو نورو هېوادونو تاجکستان او ترکمنستان کې تر اوسه د کرونا ویروس کومه پېښه رسماً نه ده ثبت شوې.

ائتلافي ځواکونو په عراق کې 'کې-۱' اډه خوشې کړه

عراق د متحده ایالاتو سرتیري د تاجي په اډه کې ګرځي

د امریکا په مشرۍ ائتلافي ځواکونه یکشنبه د عراق په شمال کې له هغې پوځي اډې ووتل چې تېر ډسمبر د ایران له‌خوا په راکټونو ویشتل شوې وه.

ایران دا بریدونه د امریکا په لاس د دغه هېواد د یوه لوړپوړي پوځي جنرال قاسم سلیماني د وژلو په غبرګون کړي و.

د امریکا په مشرۍ ائتلاف په یوه اعلامیه کې ویلي چې په کرکوک شمالي ولایت کې (کې-۱) اډه خوشې کوي.

د دې پوځي اډې پوځي وسایل چې ارزښت‌یې یو میلیون ډالرو ته رسېږي عراقي پوځیانو ته منتقل شوي.

په دې پوځي اډې د ۲۰۱۹ کال په ډسمبر کې د ایران په راکټي بریدونو کې یو امریکایي قراردادي چې د داعش پر ضد یې عراقي پوځیان روزل، وژل شوی و.

پاکستان کې پر کرونا ویروس د اخته کسانو شمېر له ۱۵۰۰ واوښت

پاکستان

په پاکستان کې په کرونا ویروس د اخته خلکو شمېر له یو نیم زرو واوښت.

د پاکستان د روغتیا وزیر ظفر میرزا یکشنبه وویل چې شنبه او یکشنبه‌یې ۱۲۱ تازه پېښې ثبت کړې دي.

د هغه په خبره په پاکستان کې د کرونا ویروس ۷۰ فیصده مثبتې پېښې د هغو کسانو دي چې له ایرانه دغه هېواد ته ورستانه شوي دي.

په پاکستان کې تر دې دمه د کرونا ویروس له لاسه ۱۴ کسان مړه شوي دي.

د دغه هېواد په لویو او وړو ښارونو کې ګرځ‌بندیز وضع شوی دی.

د پاکستان د روغتیا وزارت وايي شاوخوا ۱۳۰۰۰ مشکوکې پېښې هم شته چې له ډلې یې اته زره کسان په قرنطین کې دي.

ایران په ګڼ‌مېشتو محبسونو کې د بندیانو د خلاصون موده غځوي

ارشیف

ایراني چارواکي وایي د دغه هېواد په ګڼ‌مېشتو محبسونو کې د کرونا ویروس د مخنیوي لپاره د بندیانو د خلاصون موده نوره هم غځوي.

د چارواکو په خبره په غځېدلې موده کې ټول‌ټال ۱۵ زره بندیان موقتاً ازادېږي چې ورسره به د ازادو شویو بندیانو شمېر یو لکو ته ورسېږي.

د ایران د قضائیه قوې ویاند غلام حسین اسماعیلي پرون دولتي ټلوېزیون ته وویل چې بندیان به د اپرېل تر ۱۹مې په موقته توګه خوشې شي.

د ایران د روغتیا وزارت ویاند کیانوش جهانپور پرون په یوه خبري کنفرانس کې د تازه مړو شویو شمېر اعلان کړ.

هغه زیاته کړه: "متأسفانه، موږ په تېرو ۲۴ ساعتونو کې ۱۲۳ نور کسان هم په روغتونونو کې له لاسه ورکړل."

ایران په نړۍ کې د کرونا ویروس له لاسه په ۱۰ ډېرو ځپل شویو هېوادونو کې دی.

د (کوویډ-۱۹) یا کرونا ویروس له لاسه د مړو شویو ۲۶۴۰ کسانو په لحاظ ایران په څلورم مقام او په ویروس د اخته څه باندې ۳۸ زرو له پلوه ایران په ټوله نړۍ کې په اووم مقام ولاړ دی.

شنونکي وايي په ایران کې په دې ویروس د اخته او د مړو شمېر تر دې ډېر لوړ دی ځکه چارواکي حقایق پټوي.

روحاني: ایران کې ښايي د ژوند نوې طریقه ډېر وخت دوام وکړي

حسن روحاني

ولسمشر حسن روحاني وايي چې د کرونا ویروس د خپرېدو له کبله په ایران کې د ژوند نوې طریقه ښايي ډېر وخت دوام وکړي.

ولسمشر روحاني نن یکشنبې د کابینې په غونډه کې وویل، ایرانیان باید تر هغه مهاله د ژوند له دې نوې طریقې سره عادت وکړي چې د کویډ- ۱۹ ناروغۍ لپاره واکسین یا علاج موندل کېږي، په داسې حال کې چې دا کار تر اوسه نه دی شوی.

ښاغلی روحاني دا څرګندونې داسې مهال کوي چې د ایران د روغتیا د وزیر سلاکار علي رضا وهابزاده نن پر ټویټر په یوه بیان کې وویل چې په دې هېواد کې په کویډ- ۱۹ ناروغۍ د اخته کېدو له کبله د مړو شمېره ۲۶۴۰ ته او په کرونا ویروس د اخته کسانو ټول شمېر ۳۸۳۰۹ ته لوړه شوې ده.

ډونالډ ټرمپ: نیویارک به نه قرنطین کېږي

ډونالډ ټرمپ

ولسمشر ډونالډ ټرمپ د سیاستوالو د فشارونو په نتیجه کې پرون د مارچ په ۲۸مه پرېکړه وکړه چې نیویارک به نه قرنطین کېږي.

ښاغلي ټرمپ ویلي چې دا پرېکړه د کرونا ویروس پرضد د مبارزې د ځانګړې کمیټې د سپارښتنې په نتیجه کې شوې ده.

متحدایالات په نړۍ کې په دې ناروغۍ د اخته کسانو تر ټولو لوړه شمېره لري.

په متحدایالاتو کې تر نن- یکشنبې پورې له ۱۲۴ زرو زیات خلک په کرونا ویروس اخته شوي دي.

ټرمپ مخکې ویلي و، چې ښايي نیویاک قرنطین شي خو هغه پرون پر ټویټر په یو پیغام کې ولیکل چې د قرنطین پرځای به د ناروغیو د وقایې او کنټرول د ادارو له خوا خلکو ته په نیویارک، نیوجرسي او کونیتیکت ایالتونو کې د مسافرت په اړه خبرداری ورکړل شي.

په همدې حال کې د نیویارک او نیوجرسي والیانو ویلي چې دا اقدام به د خلکو د وېرې او د ونډو په بازارونو کې د نور زیان باعث شي.

په ټوله نړۍ کې د کرونا ویروس له کبله د مړو شمېر له ۳۰ زرو لوړ شو

په نړۍ کې په کویډ- ۱۹ ناروغۍ د اخته کسانو شمېر له ۶۷۰ زرو واوښت.

په ټوله نړۍ کې په کرونا ویروس د اخته کېدو له کبله د مړو شمېر نن له ۳۰ زرو لوړ شو.

اسپانیا چې د دې ویروس د خپرېدو له کبله د سختو ځپل شویو هېواد له ډلې دی وویل نن ۸۳۸ کسان مړه شوي دي چې تر دې دمه په یوه ورځ په دې ناروغۍ د مړو تر ټولو لوړه شمېره ده.

له دې سره په اسپانیا کې په دې ناروغۍ د مړو شمېره له شپږنیم زرو واوښته.

خو تر اسپانیا د ایټالیا تلفات چې له لس زرو اوښتي، زیات دي.

د امریکا د جانز هاپکنیز پوهنتون د احصاییو له مخې نن په نړۍ کې په کویډ- ۱۹ ناروغۍ د اخته کسانو شمېر له ۶۷۰ زرو واوښت.

د المپیک د پلان شویو نړیوالو لوبو لپاره نوې نېټه ټاکل کېږي

آرشیف

د راپورونو له مخې د المپیک نړیواله کمېټه او جاپاني تنظیموونکي په سږني دوبي کې د المپیک د پلان شویو نړیوالو لوبو لپاره د نوې نېټې په اړه غور کوي.

د جاپاني رسنو د راپور له مخې تنظیموونکي پردې غور کوي چې دا لوبې له ټاکلې نېټې څخه په یوه کال ځنډ راتلونکی کال ترسره کړي.

په دې راپور کې چې نن خپور شو، راغلي، د توکیو لوبې چې تېره اوونۍ د کرونا ویروس د خپرېدو له کبله وځنډول شوې ښايي د ۲۰۲۱ کال د جولای په ۲۳مه پیل او د پای مراسم یې د اګست په اتمه ترسره شي.

د سږنیو لوبو لپاره پلان دا و، چې د جولای په ۲۴مه پیل شي او د اګست تر ۹مې پورې دوام وکړي.

د معاصر المپیک په ۱۲۴ کلن تاریخ کې دا لومړی ځل دی چې د دې لوبو نېټه د یوې ساري ناروغۍ له کبله بدلېږي خو دا لوبې د جګړو له کبله کله ناکله ځنډېدلي چې یو مثال یې په ۱۹۴۰ کال د توکیو د المپیک ځنډېدل و.

سویلي کوریا: شمالي کوریا د سمندر پر لور ۲ بالستیک توغندي توغولي

ارشیف

سویلي کوریا نن وروسته له هغه پر شمالي کوریا انتقاد وکړ چې دوه مشکوک بالستیک توغندي یې د سمندر پر لور وتوغول.

سیول دا کار په داسې حال کې چې ټوله نړۍ د کرونا ویروس د مخنیوي لپاره هڅه کوي یو ناسم کار بللی دی.

د سویلي کوریا پوځي چارواکو نن د مارچ په ۲۹ مه، نېټه راپور ورکړ چې د لنډ واټن ویشتونکي توغندي د شمالي کوریا له سواحلو څخه توغول شوي او د ۳۰ کیلومترو په لوړوالي ۲۳۰ او د ۲۳۰ کیلومتره په واټن په سمندر کې غورځېدلي دي.

د جاپان دفاع وزارت وايي، ښکاري چې دا بالستیک توغندي وو، خو د جاپان په اوبو یا ځانګړي اقتصادي زون کې نه‌دي راپرېوتلي.

د دې میزایلونو توغول د پیونګ یانګ د هغو اقداماتو یو برخه ده چې له واشنګټن سره د بې نتیجې خبرو له پای ته رسېدو وروسته یې له څو اوونیو راهیسې پیل کړي دي.

سویلي کوریا په پیل کې د کرونا ویروس د سرایت له کبله سخت زیانمن شو خو داسې ښکاري چې د دې ناروغۍ د مخنیوي په برخه کې یې ښه پرمختګ کړی دی.

تر نن ورځې پورې په جنوبي کوریا کې نږدې ۱۰ زره کسان په (کوویډ ۱۹) اخته شوي او ۱۴۴ کسان د دې ناروغۍ له کبله مړه شوي دي.

پر سعودي عربستان د بالستیک توغندیو برید شوی

ارشیف

سعودي عربستان پوځ پر دې هېواد د دوو بالستیک توغنديو د برید د شنډولو خبر ورکوي او وایي چې له دې دوو یو یې د پلازمېنې ریاض پر سر له منځه یوړل شو.

د سعودي هوايي ځواک نن یکشنبې وویل لومړی توغندی تېره شپه ناوخته د توغندیو د امریکايي دفاعي سیسټم پاتریوت په وسیله د ریاض پر سر شنډ شو او دوهم یو له یمن سره پر پوله د سعودي عربستان د جیزان ښار په هوا کې له منځه یوړل شو.

د سعودي د هوايي ځواک ویاند ترکي المالکي وویل چې له دې کبله تر دې دمه د تلفاتو راپور نه‌دی ورکړل شوی.

هغه زیاته کړه چې د توغندیو د چاودنې له کبله په دواړو ښارونو کې ځینې چرې د خلکو د استوګنې پر سیمو راپریوتې دي.

د دې حملو مسؤلیت تر اوسه چا نه‌دی منلی خو له دې مخکې د ایران پلوي حوثي یاغي ډلې، چې په یمن کې د سعودي پوځ پرضد جګړه کوي د سعودي پر خاوره سلګونه میزایلونه توغولي دي.

د چین په ووهان ښار کې ژوند د عادي کېدو په حال کې دی

خلک په پارک کې د کرونا ویروس د مخنیوي لپاره په خیمه کې خواړه خوري.

د چین په ووهان ښار کې چې د کرونا ویروس اصلي ټاټوبی بلل کېږي، ژوند د عادي کېدو په حال کې دی.

دې ښار تقریباً دوه میاشتې تر قرنطین لاندې تېرې کړې، خو په نوره نړۍ کې خلک له دې ویروسه کړېږي.

په ووهان کې پرون د مارچ په ۲۸مه، ټرانسپورتي خدمات بېرته پېل شوي او سرحدونه‌یې هم پرانیستل شوي دي.

په چين کې د کرونا ویروس له امله تر اوسه ۳۲۹۹ تنه مړه شوي چې ۳۱۷۷ زره‌یې په هوبې ولایت کې وو.

د چین حکومت په هوبې کې سخت بندیزونه لګولي و، سرحدونه تړلي او ټول ټرانسپورتي خدمات په ټپه درېدلي وو.

خو د چین د حکومت سختګیرانه اقداماتو نورې نړۍ ته د دې ویروس خپرېدو مخنیوی ونه‌کړائ شو.

د چین چارواکو پرون وویل چې ۵۴ نوې پېښې یې ثبت کړې، خو ټول له بهره ورغلي کسان دي.

د روسیې روسنفټ شرکت په ونزوئلا کې حپله پانګه پلوري

ارشیف، د روسنفټ شرکت یوه برخه.

د روسیې د تېلو تر ټولو ستر شرکت روسنفټ اعلان وکړ چې په ونزوئلا کې خپل فعالیت بندوي او خپله ټوله پانګه پر یوه شرکت چې د روسیې حکومت‌یې خاوند دی، خرڅوي.

روسانفټ پرون د مارچ په ۲۸مه، وویل چې له یوه شرکت سره چې سل په سلو کې په حکومت پورې تړاو لري، موافقې ته رسېدلي دي، ټول خپله برخه‌یې پرې خرڅه کړې او په ونزوئلا کې خپل فعالیت بندوي.

د روسیې حکومت په ونزوئلا کې د نیکولاس مادورو د حکومت ملاتړ ته دوام ورکړی او دې تازه اقدام ته په دې سترګه کتل کېږي چې ښايي د امریکا له بندیزونو د روسنفټ د ژغورلو لپاره شوی وي.

د امریکا متحده ایالاتو تر دې وړاندې د روسنفټ پر دوو شریکانو چې په ژنیو کې يې فعالیت کاوه او پر اروپايي هېوادونو یې خام نفت خرڅول، بندیز لګولی دی.

له هند نږدې ۲۵۰۰ افغانان بېرته افغانستان ته راستنېږي

کام‌ایر شرکت له نوې ډېلي کابل ته د ستنېدو لپاره د یوه ټکټ بیه ۳۸۰ ډالره ټاکلې.

له هنده د نږدې ۲۵۰۰ افغانانو د بېرته ستنېدو لړۍ روانه ده.

هند کې د افغانستان سفارت شارژدافیر پرون د مارچ په ۲۸مه، پر ټویټر لیکلي چې هغه افغانان به چې د پروازونو د لغو کېدو له امله هلته پاتې وو، په څو پروازونو کې افغانستان ته ولېږدول شي.

د هند حکومت تېره اوونۍ کام‌ایر هوایي شرکت ته اجازه ورکړه چې په پنځو پروازونو کې افغان مسافر له هنده کابل ته ولېږدوي.

کام‌ایر شرکت ویلي چې له نوې ډېلي کابل ته د ستنېدو لپاره د یوه ټکټ بیه ۳۸۰ ډالره ټاکل شوې ده.

د افغانستان د بهرنیو چارو وزارت پرون وویل چې د دوبۍ له نړیواله هوايي ډګره هم یو شمېر افغانان کابل ته ولېږدول شول.

په افغانستان کې د کرونا ویروس لومړۍ پېښه په هرات کې چې له ایران سره پوله لري، ثبت شوه.

ایران د نړۍ له هغو هېوادونو دی چې کرونا ویروس سخت ځپلی.

ایران کې د کرونا ویروس له امله د مړو شمېر ۲۵۰۰ کسانو ته ورسېد

ایران کي د کرونا زر نوې پیښې ثبت شوې چې هلته د پيښو شمېر نژدې پنځه دیرش نیم زرو ته ورسېد.

ایران نن وویل چې تېرو ۲۴ ساعتونو کې دغه هېواد کې ۱۳۹ تنه د کرونا ویروس له کبله مړه شول.

له دې سره په ایران کې د کرونا ویروس له کبله د مړینې شمېر څه باندې۲۵۰۰ شو.

د ایران د روغتیا وزارت ویاند کیانوش جهانپور نن شنبه په یوې ټلویزیوني وینا کې وویل چې تېرو ۲۴ ساعتونو کې هغلته د کرونا څه باندې زر نوې پیښې ثبت شوې چې ورسره په ټول هېواد کې د کرونا د پيښو شمېر نژدې پنځه دیرش نیم زره شو.

په همدې حال کې د ایران ولسمشر حسن روحاني ټینګار کړی چې ایراني چارواکي به راتلونکو دوو اونیو کې د کرونا ویروس د خپرېدو مخنیوی وکړي.

نور راوښيه

XS
SM
MD
LG