د لاسرسۍ وړ لېنکونه

تازه خبر
چهارشنبه ۷ لړم ۱۳۹۹ کابل ۰۷:۱۴

افغانستان

یاماموتو: افغان ښځې باید په ټولو برخو کې بشپړ استازیتوب ولري

د ملګرو ملتونو ځانګړی استازی تدامیچي یاماموتو

د ملګرو ملتونو ځانګړی استازی وايي، د یوې سوله‌ییزې او بشپړې ټولنې د رامنځته کېدو لپاره لازمه ده چې افغان ښځې د تعلیم، روغتیا او کار حق ولري او له ملي شورا رانیولې د سولې تر خبرو پورې د سیاسي تصمیم نیونو په ټولو برخو کې بشپړ استازیتوب ولري.

تدامیچي یاماموتو چې په افغانستان کې د ملګرو ملتونو د مرستندوی دفتر مشر هم دی، د مارچ د اتمې د ښځو د نړیوالې ورځې په مناسبت په خپل پیغام کې ویلي، په داسې حال کې چې افغان ښځو په یو لړ برخو کې د پام وړ پرمختګونه کړي، د هغوی په اړه په سیاسي او ټولنیزو برخو کې یو لړ شاتګونه هم ویني چې دا وضعیت د افغان ښځو او د یوه هېواد په توګه د افغانستان د ګټې لپاره باید بدل شي.

په افغانستان کې سږ کال د ښځو نړیواله ورځ په داسې حال کې لمانځل کېږي چې سولې ته هیلې تر بل هر وخت زیاتې شوي، خو په عین حال کې په دې باب پوښتنې پیدا شوي چې د ښځو پر لاسته راوړنو خو به معامله نه‌کېږي!؟

د ورځې تازه خبرونه دلته ولولئ

کابل کې چاودنې ۳ تنه وژلي

ارشیف

د کابل په ښار کې چاودنې درې تنه وژلي دي.

د کابل امنیه قومانداني وایي، د یولسو بجو خوا ته د ښار د لسمې امنیتي حوزې اړوند د سرای چقرک په سیمه کې پر یوه سراچه موتر نښلول شوی مقناطیسي ماین چاودلی چې درې تنه یې وژلي او لس تنه نور یې ټپیان کړې دي.

د پېښې ټول قربانیان ملکیان دي.

چا د پېښې مسوولیت نه دی منلی.

د بادغیس امنیه قومندانۍ د شهیدانو او معلولینو برخې امر وژل شوی

ارشیف

د بادغیس د چارواکو په وینا ناپېژاندو وسله والو د بادغیس د امنیه قومانداني د شهیدانو او معلولینو د برخې امر عبدالهادي وواژه.

د بادغیس والي حسام الدین شمس وایي، دا پېښه نن سهار د بادغیس په مرکز قلعه نو کې وشوه.

د والي په وینا برید کوونکي چې پر موټر سایکل سپاره وو، له سیمې تښتېدلې دي.

چا د پېښې مسوولیت نه دی منلی.

کابل کې چاودنې ۳ تنه وژلي

د کابل نقشه

کابل ښار کې چاودنې ۳ کسه وژلي او ۱۰ نور یې ټپیان کړي دي.

د کابل امنیه قوماندانۍ وايي، نن له غرمې وروسته شااوخوا ۱۱ بجې د کابل ښار د ۱۰مې امنیتي حوزې اړوند د سرای چقرک سیمه کې پر یوې سراچه ډوله موټر نښلول شوی مقناطیسي ماین چاودنه کړې چې په ترڅ کې یې ۳ تنه وژل شوي او ۱۰ نور ټپیان دي.

د پېښې ټول قربانیان ملکي وګړي دي.

لا تر اوسه د دې پېښې مسؤلیت چا په غاړه نه‌دی اخیستی.

لویه څارنوالۍ: د ښځو پر وړاندې د تاوتریخوالي ۳،۰۰۰ قضیې ثبت شوي

ارشیف

د افغانستان لویه څارنوالۍ وايي، د ۱۳۹۹ لمریز کال له پیل نه تر اوسه په ټول هېواد کې د ښځو پر وړاندې د تاوتریخوالي ۳،۰۰۰ قضیې ثبت شوي چې په تړاو یې ۲۸۷ کسان نیول شوي او د پاتې د نیولو هڅې روانې دي.

د دغې ادارې مرستیالې سینا شنا منصور نن په کابل کې خبریالانو ته وویل، په دغو قضیو کې پر ښځو او ماشومو نجونو د جنسي تېري قضیې هم شاملې دي.

مېرمن منصور وویل، په وروستیو درېیو کلونو کې د ښځو پر وړاندې د جنسي تېري پېښې څه نا څه کمې شوي، خو دا کموالی د پام وړ نه‌دی.

هغې زیاته کړه: "په وروستیو درېیو کلونو کې د ښځو پر وړاندې د جنسي تېري ۵۶۹ مورده د لویې څارنوالۍ په اداره کې ثبت شوي او رسېدنه ورته شوې ده. په ۹۷ کال کې ۱۹۵، په ۹۸ کې ۲۰۱ او په ۹۹ کال کې ۱۷۳ قضیې ثبت شوې دي."

مېرمن منصور وویل، کومې دوسیې چې لویې څارنوالۍ ته سپارل شوي، رسېدنه ورته شوې او په اړه‌یې د جزا حکمونه هم شوي دي.

د مېرمن منصور په خبره، اوس‌مهال د هېواد په ټولو ولایتونو کې د ښځو پر وړاندې د جنسي تېري د څېړلو څارنوالۍ فعالې دي او قضیې په‌کې څېړل کېږي.

ولسي جرګې ته د معرفي شویو ډېری نوماند وزیرانو اسناد څېړل شوي

د ولسمشر غني له لوري ولسي جرګې ته د معرفي شویو نوماند وزیرانو یو انځور- 21.10.2020

د افغانستان د ولسي جرګې اداري پلاوی وایي، د حکومت له لوري د معرفي شویو ډېری نوماند وزیرانو اسناد څېړل شوي دي.

د دغې جرګې دوهم منشي حجت الله خردمند د سې شنبې په ورځ ازادي راډيو ته وویل چې د یو شمېر معرفي شویو وزیرانو تحصیلي اسنادو کې ستونزې شته او هغه به هم ژر حل شي.

د نوموړي په خبره د هغوی ور معرفي شویو وزیرانو چې ستونزې یې د حل وړ نه وي د کمېسیونو له لوري به ردېږي او پاتې نورو ته به د رایو صندوقونه کېښودل شي څو ورته د ولسي جرګې د غړو له لوري د باور رایې ورکړل شي.

ټاکل شوې تر سبا (چهارشنبه) د ولسي جرګي د فرهنګي چارو، د دیني چارو، کورني امنیت، د نړیوالو اړیکو،د چارو او عدلي او قضایي کمېسیونونه د ولسمشر له لوري د ورمعرفي شویو وزیران د اسنادو څېړل پای ته ورسوي.

لا معلومه نه ده چې نویو معرفي شویو وزیرانو ته د ولسي جرګې له لوري کله رایه اچونه ترسره کېږي.

مسافر: د کندهار-ارزګان پر لار د خښ شویو ماینونو له امله سفر نه‌شو کولای

د کندهار-ارزګان لويه لار

د کندهار-ارزګان د لويې لارې مسافر او موټر چلوونکي وايي پر عمومي لارو د خښ شویو ماینونو او جګړو له امله په ډاډه زړه سفر نه‌شي کولای او مجبور دي چې پر فرعي لارو تګ راتګ وکړي.

د دوی په وینا دا ستونزه د دې لامل شوې چې د سفر وخت‌يې له یوې ورځې دوو او درېیو ورځو ته اوږد شي او د لارې کرایه هم لوړه شي.

امین‌الله او د هغه لسګونه نور ملګري چې د کندهار-ارزګان پر لویه لار موټر چلوي وايي عمومي لارې د جګړې او ماینونو له امله ډېر وخت تړلې وي او دوی مجبور دي چې پر اوږدو فرعي لارو تګ راتګ وکړي.

په عین وخت کې د ارزګان اوسېدونکی محمد زمان وايي د عمومي لارو د تړل کېدو سره سم د موټرو د لارو کرایه او ارزګان ولایت کې د خوراکي توکو بیې هم لوړې شوي.

د کندهار والي حیات‌الله حیات وايي وسله‌والو طالبانو په تېرو څو میاشتو کې د کندهار-ارزګان د لويې لارې ډېرې برخې تخریب کړي چې رغول‌یې وخت ته اړتیا لري.

د نوموړي په وینا د دغه لارې د شاهراه کنډک د امنیتي ځواکونو د تشکیل کموالی بله هغه ستونزه ده چې له امله‌یې لار ناامنه وي.

پکتیا کې ځیني محلي پولیس له روزنې وروسته ملي پولیسو کې ادغام شول

ارشیف، بدخشان کې محلي پولیس

د پکتیا محلي چارواکي وايي په ملي پولیسو کې د محلي پولیسو د ادغام پروسه په چټکۍ روانه ده.

پرون هم نږدې ۴۰ تنه محلي پولیس تر روزل کېدو وروسته په ملي پولیسو کې مدغم شول.

د پکتیا د والي ویاند عبدالرحمن منګل پرون ناوخته ازادي راډیو ته وویل: "د پکتیا ولايت په احمدخېلو ولسوالۍ کې ځیني سیمه‌ییز پولیس تر یو میاشتنۍ روزنې وروسته د ملي پولیسو په لیکو کې مدغم شول. دغه پولیس به د یادې ولسوالۍ د امن تأمینولو په برخو کې په دنده وګمارل شي."

د کورنیو چارو سرپرست وزیر مسعود اندرابي درې اوونۍ مخکې ویلي وو چې تر درېیو میاشتو پورې به په افغانستان کې د محلي پولیسو ۲۴ زره کسیز تشکیل ختم شي.

د محلي پولیسو پر تشکیل او د فعالیتونو پر څرنګوالي له تېرو ۱۰ کلونو راهیسې انتقادونه شوي دي.

دفاع وزارت: د کندهار-هلمند لویه لار له طالبانو تصفیه شوه

افغان ځواکونه

د افغانستان دفاع وزارت له طالبانو، د کندهار-هلمند د لویې لارې د تصفیې خبر ورکړ.

د دغه وزارت مرستیال ویاند فواد امان تېر ماښام ازادي راډیو ته وویل، اوس خلک کولای شي په ډاډه زړه پر دې لار تګ راتګ وکړي.

هغه زیاته کړه: "د افغانستان امنیتي او دفاعي ځواکونو د خلکو د ساتنې د مسؤلیت په چوکاټ کې د کندهار-هلمند پر لار پوځي عملیات وکړل او دغه لار یې په بشپړ ډول تصفیه کړه. د دې لارې په اوږدو کې په لسګونه ماینونه کشف او شنډ کړای شول."

وسله‌والو طالبانو د دغو عملیاتو په اړه څه نه‌دي ویلي.

پر هلمند د وسله‌والو طالبانو له تازه ډله‌ییزې حملې وروسته د کندهار-هلمند د لویې لارې ځینې برخې ناامنه شوې وې.

د پاکستان سوداګرۍ وزارت یو تخنیکي هیئت له افغان سوداګرو سره ګوري

پاکستان ته د افغانستان د سوداګرۍ وزارت تللی پلاوی

په پام کې ده نن سې شنبه، د پاکستان د سوداګرۍ وزارت یو تخنیکي هیئت د افغانستان او پاکستان د سوداګرو د ستونزو پر حل خبرې وکړي.

د افغانستان د سوداګرۍ او صنایع خونې مرستیال خانجان الکوزی چې دا مهال په اسلام‌اباد کې دی، ازادي راډیو ته پرون وویل: "اوس د پاکستان د صدراعظم صاحب له هدایت سره سم‌یې خپل اقتصادي سلاکار ته هدایت ورکړ چې د سې شنبې د سهار پر ۱۰ بجو به یوه تخنیکي ډله د پاکستان په سوداګرۍ وزارت کې سره وګوري، د اوس وخت لپاره به په کراچۍ او نورو بندرونو کې د راغلې ستونزې په اړه بحث کوي."

پاکستان ته د ولسي جرګې د یوه هیئت تر سفر وروسته موافقه وشوه چې د سوداګرۍ او صنایعو خونو یو هیئت په تجارتي برخه کې د پرتو ستونزو پر حل د خبرو لپاره پاکستان ته لاړ شي.

روغتیا سازمان: افغانستان کې به نږدې ۱۰ میلیونه ماشومان پولیو واکسین شي

ارشیف

په افغانستان کې د روغتیا نړیوال سازمان وايي، په پام کې ده نږدې ۱۰ میلیونه ماشومان چې عمرونه‌یې تر ۵ کلونو کم دي د ګوزڼ یا پولیو پر ضد واکسین شي.

دغه سازمان پرون ناوخته په ټویټر کې لیکلي چې د پولیو یا ګوزڼ ضد واکسین لومړی کمپاین د کرونا ویروس یا 'کووېډ-۱۹' ناروغۍ له کبله ځنډېدلی و.

په افغانستان کې د ګوزڼ له‌منځه وړلو ملي پروګرام د عامه پوهاوي مسؤل میر جان راسخ ازادي راډیو ته ویلي چې په افغانستان کې د روان میلادي کال له پیله د ګوزڼ ۵۳ مثبتې پېښې ثبت شوې دي.

د روغتیا نړیوال سازمان وايي اوس ۹ میلیونه او ۹ لکه ماشومان په تازه کمپاین کې واکسین کوي او له ټولو اړخونو یې غوښتنه کړې چې د کمپاین په عملي کولو کې همکاري وکړي.

اشرف غني پر کوثر دانش ښوونیز مرکز د ترورېستي برید د څېړنې امر وکړ

ولسمشر اشرف غني

د افغانستان جمهوري ریاست په کابل کې پر "کوثر دانش" ښوونیز مرکز د وروستۍ بمي حملې د هر اړخیزې څېړنې امر وکړ.

د کابل په ۱۳مه حوزه کې پر دغه مرکز د شنبې په ورځ په ځانمرګي برید کې ۲۴ کسان ووژل شول او نږدې ۶۰ تنه نور ټپیان شول.

د جمهوري ریاست مرستیال ویاند دوا خان مینه‌پال ازادي راډیو ته وویل، د ولسمشر محمد اشرف غني په مشرۍ پرون ناوخته په هغه غونډه کې د دې حملې د څېړنې سپارښتنه وشوه چې د امنیتي ادارو مشران او د قربانیانو د کورنۍ غړي په‌کې حاضر وو.

هغه زیاته کړه: "ولسمشر اړوندو ارګانونو ته لارښوونه وکړه چې پر کوثر روزنیز مرکز ترورېستي برید په هر اړخیزه توګه وارزوي او د دغه ترورېستي برید شبکې او عاملان دې وپېژندل شي او له‌منځه دې یووړل شي، همدارنګه دې د دشت برچي سیمې د امن د ټینګښت په اړه لا زیات کار وشي."

پر کوثر دانش د وروستۍ حملې مسؤلیت د داعش ډلې منلی دی.

په خوست کې چاودنه شوې

ارشیف

په خوست ښار کې نن مازیګر یوه چاودنه شوې ده.

د امنیه قومندانۍ ویاند عادل حیدر ازادي راډیو ته وویل چې چاودېدونکي مواد په یوه موټرسایکل کې ځای پر ځای شوي و او څلور کسان یې ټپیان کړي دي.

چاودنه په خوست ښار کې د بې پولې ډاکترانو زیږنتون ته څېرمه شوې.

چا د دې بمي چاودنې مسوولیت په غاړه نه دی اخیستی.

چارواکي: د هرات ښاروال او ۷ همکاران یې د بډې اخیستلو په تور نیول شوي

ارشیف

د هرات ښاروال غلام حضرت مشفق او د هغه ۷ همکاران د اداري فساد او بډې اخیستلو په تور ونیول شول.

د کورنیو چارو وزارت ویاند طارق آرین نن د دغو کسانو د نیولو خبره اعلان کړه.

د هرات ولایت یوه سیمه ییز چارواکي د نوم د نه ښودلو په شرط ازادي راډیو ته وویل چې مشفق او د هغه ملګري باالفعل د کورنیو چارو وزارت د درنو جرمونو د پلاوي له خوا ونیول شول.

تر دې دمخه د هرات په ښاروالۍ کې د فساد راپورونه ورکړل شوي وو.

ښاغلي مشفق ته نږدې کسانو تر دې دمه په دې اړه څه نه دي ویلي.

پرون بیا د افغانستان د لویې څارنوالۍ ویاند جمشید رسولي ازادي راډیو ته وویل چې د درنو جرمونو څارنوالي د هرات د والي، د ولایتي شورا د دریو غړیو او د روغتیا د رییس په شمول د ۲۱ چارواکو دوسیې چې د کرونا ویروس د بودیجې په برخه کې په فساد تورن دي تکمیل او محکمې ته سپارلي دي.

عمران خان: هند به د افغانستان خاوره د پاکستان پر ضد وکاروي

د پاکستان صدراعظم عمران خان

د پاکستان صدراعظم عمران خان ویلي هېواد یې اندېښمن دی چې هندوستان به د افغانستان له خاورې د پاکستان د بې ثباته کولو لپاره کار واخلي.

هغه دا خبرې نن په اسلام اباد کې د افغانستان او پاکستان د پانګونې او سوداګرۍ د فوروم (مجمع) په پرانیست غونډه کې وکړې.

هغه زیاته کړه: "په پاکستان کې یوه اندېښنه شته چې هندوستان به په زموږ په هېواد کې د ګډوډۍ د رامنځته کولو او د بې ثباتۍ لپاره افغانستان وکاروي، خو موږ دلته پرېکړه کړې څه چې د افغانستان خلک غواړي موږ یې ملاتړ کوو، ښې اړیکې ورسره جوړوو، ځکه د دې سیمې راتلونکې د افغانستان او پاکستان په اړیکو، همکارۍ او سوداګریو تړلې ده."

عمران خان او پاکستاني چارواکو مخکې له دې هم داسې ادعاوې کړي چې هندوستان د افغانستان له خاورې د پاکستان د بې ثباتۍ لپاره هڅې کوي.

افغان چارواکو او یا د هندوستان حکومت تازه د عمران خان د څرګندونو په تړاو څه نه دي ویلي خو پخوا افغان چارواکو ویلي و چې هیڅوک د افغانستان خاوره د بل چا پر ضد نه کاروي او نه دوی اجازه ورکوي.

په کابل کې د رګبي سیالۍ پیل شوې

آرشیف

په کابل کې د رګبي د ۸ لوبډلو ترمنځ سیالۍ پیل شوې.

د افغانستان د رګبي فدراسیون رئیس حارث رحماني نن ازادي راډيو ته وویل، چې په یادو سیالیو کې دوه لوبډلې له کابل او پاتې نورې له لغمان، غزني، پنجشیر، کاپیسا، پروان او بامیانو دي.

ښاغلی رحماني وايي، یادې سیالۍ د افغانستان د رګبي ملي لوبډلې لپاره د غوره لوبغاړو د پېژندلو په هدف ترسره کېږې.

د نوموړي په وینا چې دغه سیالۍ د ۴ ورځو لپاره روانې وې چې له منځه يې ۳۰ لوبغاړي د رګبي ملي لوبډلې لپاره غوره شول.

نور راوښيه

XS
SM
MD
LG