د افغانستان د عامې روغتیا وزارت وايي، د عبدالعلي مزاري د تلین پر مراسمو ډزو له پېښې لږ تر لږه ۲ مړي او ۱۸ټپیان روغتونونو ته وړل شوي دي.
د عامې روغتیا وزارت ویاند وحید مایار دا څرګندونې ازادي راډیو ته وکړې.
د افغانستان د کورنیو چارو وزارت ویاند نصرت رحیمي بیا د ټپیانو شمیر ۱۸ تنه بللې او د مړو په اړه یې څه نه دي ویلي.
نوموړې پر خپله فیسبوک پاڼه زیاته کړی چې دا لومړنۍ شمېرې دي.
په هغو معلوماتو او خبرونو کې چې له سیمې څخه په ټولنیزو رسنیو خپاره شوې د مړو او ټپیانو شمېر تر دې زیات ښودل شوی دی.
د افغانستان د کورنیو چارو وزارت وايي په غونډه کې راټول شوي ټول لوړ پوړي چارواکي او سیاستوال په خوندي توګه له سیمې وتلي دي.
تر اوسه د پېښې څرنګوالی څرګند نه دی خو عیني شاهدان وايي، د کابل په لویدیځ کې د عبدالعلي مزاري د ۲۵م تلین پر مراسمو کې هغه مهال ناڅرګنده وسله والو ډزې پیل کړې کله چې د حزب وحدت اسلامي د ګوند مشر کریم خلیلي غونډې ته وینا کوله.
ښاغلي خلیلي له پېښې وروسته ازادي راډیو ته وویل: "د غونډې د پیل څخه نیم ساعت تېر شوی و، تازه زه خبرو ته ودریدلی وم څو دقیقې خبرې مې کړې وې چې د دریځ په لور ډزې پیل شوې، غونډه ګډه وډه شوه، هلته راټول شوي مشران د غونډې له ځایه سلامت ووتل، زه تقریباً وروستی وم چې د غونډې له ځایه ووتلم، د خلکو په اړه اندېښمن یوو، هیله من یم چې هغوی هم له پېښې روغ وتلي وي، که څه هم دا ډول پېښې تل تلفات لري."
خلیلي وویل، طالبانو په دې برید کې لاس لرل رد کړي، د نوموړې په وینا بل چاته هم ګوته نه نیسي او د بریدګرو د هویت معلومول یې د امنیتي ادارو کار وباله.
د حزب وحدت اسلامي افغانستان ګوند مشر کریم خلیلي ازادي راډیو سره په خبرو کې وویل، د عبدالعلي مزاري د ۲۵ م تلین په مراسمو د وسله والو کسانو په ډزو کې ۲۳ کسان وژل شوي او ۳۳ ټپیان دي خو په خبره یې ممکن د پېښې تلفات له دې واوړي.
هغه زیاته کړه، د پېښې ټپیان روغتون کې تر درملنې لاندې دي.
افغان چارواکي وايي، کابل کې د عبدالعلي مزاري د ۲۵ م تلین پر مراسمو ننني برید کې لږ تر لږه ۲۷ کسان وژل شوي او تر ۲۹ زیات نور ټپیان دي.
د کورنیو چارو وزارت ویاند نصرت رحیمي رسنیو ته په یو استولي پیغام کې ویلي چې په دې برید کې تر اوسه ۲۷ کسان وژل شوي او ۲۹ تنه نور ټپیان دي.
د رحیمي په وینا دا وروستۍ شمېرې نه دي او بدلون په کې راتلی شي.
د کورنیو چارو وزارت همدارنګه وايي چې سیمې ته د پولیس ځانګړې قطعات د تصفیې لپاره رسیدلې.
د حزب وحدت ګوند چې د تلین دا مراسم یې جوړ کړي و، مشر یې کریم خلیلي وايي، یوازې د محمد علي جناح روغتون ته د پېښې له ځایه پ۲۳ جسدونه او له ۳۳ ټپیان وروړل شوي دي.
نوموړي چې یو ساعت مخکې یې له ازادي راډیو سره خبرې کولې وویل، جګړه لا هم په سیمه کې روانه ده او وضیعت ډیر مبهم دی.
هغه زیاتوي: "یوازې د محمد علي جناح په روغتون کې تر اوسه د ۲۳ شهیدانو راپور ورکړل شوی او ۳۳ نور ټپیان بلل شوې دي، له نورو روغتونونو څخه لا هم معلومات نه شته چې هلته څومره ټپیان او مړه وړل شوي دي، وضیعت همداسې ګونګ او ناڅرګند دی."
په کابل کې د محمد علي جناح له روغتون سره د ازادي راډیو اړیکه ټینګه شوه، خو هغوی د مړو او ټپیانو د شمير په اړه د جزییاتو له ورکولو ډه ډه وکړه.
په ټولنیزو رسنیو کې په خپرو شویو تصویرونو کې د محمد علي جناح په روغتون کې ګڼ شمير مړه او ټپیان لیدل کېږي.
په غونډه کې راټول شوي چارواکي او سیاسي مشران له پېښې روغ وتلي.
د کورنیو چارو وزارت د چارواکو په وینا په مړو کې ښځې او ماشومان شامل دي.
د کورنیو چارو وزارت ویاند نصرت رحیمي وايي، کابل کې د عبدالعلي مزاري د ۲۵ تلین پر مراسمو د بریدګرو له ډلې ۱تن د ځانګړو پولیسو له لوري ووژل شو.
هغه زیاته کړه، د نورو بریدګرو د وژنې په اړه هڅې روانې دي.
نوموړی وايي، ټول هغه کسان چې سیمه کې وو بل امن ځای ته لېږدول شوي دي.