د لاسرسۍ وړ لېنکونه

تازه خبر
دوشنبه ۱۰ لیندۍ ۱۳۹۹ کابل ۱۲:۴۱

افغانستان

د افغانستان دفاع وزارت د بهرنیو ځواکونو وتل د اندېښنې وړ نه‌بولي

د افغانستان دفاع وزارت د ودانۍ ګرافیکي بڼه.

د افغانستان دفاع وزارت د بهرنیو ځواکونو وتل د اندېښنې وړ نه‌بولي.

د دفاع وزارت مرستیال ویاند فواد امان نن د مارچ ۳مه، ازادي راډیو ته وویل چې د افغانستان پوځ دا توان لري چې په خپله له افغانستانه دفاع وکړي.

فواد امان وویل، اوس‌مهال په سلو کې ۹۴ عملیاتونه د افغان ځواکونو له لوري، طرح، پلان او پلي کېږي او په ډېرو کمو مواردو کې افغان ځواکونو له بهرنیو ځواکونو مرسته غوښتې.

د امریکا دفاع وزیر مارک اسپر پرون د امریکا په دفاع وزارت کې یوې خبري غونډه کې له افغانستانه د امریکايي ځواکونو وتل تأیيد کړی دی.

اسپر خبریالانو ته وویل چې متیقن نه‌دی چې د وتلو پروسه به پیل شوې وي، خو باید له طالبانو سره د موافقې پر بنسټ په ۱۰ ورځو کې دا کار پیل شی.

اوس‌مهال په افغانستان کې تقریباً ۱۳۰۰۰ امریکايي عسکر مېشت دي.

د امریکا حکومت له طالبانو سره د سولې په موافقه کې منلې چې په ۱۳۵ ورځو کې به د امریکايي ځواکونو شمېر ۸۶۰۰ ته راکم شي او بیا به د افغانستان د وضعیت د ارزونې لپاره دا پروسه ودرول شي.

امریکا منلې چې په ۱۴ میاشتو کې به ټول عسکر له افغانستانه باسي.

له افغانستان نه د بهرنیو ځواکونو د وتلو له پرېکړې سره سم اوس کومې پوښتنې چې مطرح دي، هغه دا دي چې دوی له کومو سیمو وتل پيلوي، ایا تجهیزات، تخنیکي وسایل او امکانات له ځان سره وړي او که نه افغان ځواکونو ته‌یې سپاري؟

په افغانستان کې د غوڅ ملاتړ مأموریت قوماندانۍ د سې شنبې په ورځ ازادي راډیو ته وویل دوی په دې اړه څه نه‌شي ویلی چې د بهرنیو ځواکونو وتل به له کومو سیمو پیلېږي.

د ورځې تازه خبرونه دلته ولولئ

په افغانستان کې سږکال د کبانو د روزنې ۳۵۰ فارمونه جوړ شوي

آرشیف

په افغانستان کې سږ لمریز کال د کبانو د روزنې ۳۵۰ نوي فارمونه جوړ شوي دي.

د کرنې او مالدارۍ وزارت ویاند اکبر رستمي نن ازادي راډیو ته وویل، چې دغه فارمونه د کرنې وزارت او خصوصي سکټور له لارې د هېواد په ۳۴ ولایتونو کې جوړ شوي دي.

د کرنې وزارت وايي، د دغو ٣٥٠ فارمونو ترڅنګ د بڼوالۍ او مالدارۍ ملي پروژه د کب روزنې ۱۰۰ نوي فارمونه چې په کې د کبانو د بچیو دوه تولیدي فارمونه هم شامل دي د کونړ، بلخ، بغلان، لغمان، کندهار، خوست او هرات په ولایتونو کې جوړ کړي دي.

دغه فارمونه د کبانو د ۲.۷ میلیونه بچیانو د تولید وړتیا او تکثیري فارمونه یې د کبانو د دوه میلیونه او ۴۰۰ زره بچیانو د تکثیر وړتیا لري.

وزارت وایي، سږکال د کبانو د تولید کچه د تېرکال په پرتله یوزر او ۵۰۰ ټنه زیاته شوې ده.

دا په داسې حال کې ده، چې تېرکال د کبانو د تولید کچه نږدې ۱۰ زره ټنو ته رسېده.

افغان چارواکي: لاهم له پاکستان سره ټرانزیټي ستونزې نه دي هوارې شوي

آرشیف، تورخم

د افغانستان د سوداګرۍ او صنعت وزارت وایي، لاهم له پاکستان سره ټرانزیټي ستونزې نه دي هوارې شوي.

د سوداګرۍ او صنعت وزارت ویاند فواد احمدي نن ازادي راډیو ته وویل، چې د سوداګرۍ او صنعت وزارت هڅه کوي، چې له پاکستان سره په سوداګریزو چارو کې د خصوصي سکتور ټول خنډونه له مخې لرې کړي.

دغه وزارت وايي، لوړه تعارفه، په کرښه د سوداګریزونو مالونو درول او د لارو بندېدل د خصوصي سکټور پر وړاندې لویې ستونزې او ننګونې دي.

د سوداګرۍ وزارت چارواکو زیاته کړې، چې یو افغان پلاوی به په نږدې راتلونکي کې له پاکستانیو چارواکو سره د سوداګریزو اړیکو په اړه د خبرو لپاره پاکستان ته سفر وکړي.

افغانستان او پاکستان د یو میلیارد ډالرو پر ارزښت سوداګري لري، خو افغان چارواکي هیله من دي، چې راتلونکي کال به پاکستان ته د افغانستان صادرات ۴۰۰ میلیونه ډالرو ته لوړ شي.

له دې مخکې د افغانستان او پاکستان ترمنځ سوداګري درې میلیارد ډالرو پر ارزښت وه.

چارواکي: د فراه پشترود ولسوالۍ کې ۴ وسله‌وال طالبان وژل شوي

ارشیف، افغان امنیتي ځواکونه

د فراه امنیه قومانداني وايي په پشترود ولسوالۍ کې د پوځي عملیاتو په نتیجه کې ۴ وسله‌وال طالبان وژل شوي دي.

د فراه د امنیه قوماندانۍ ویاند محب‌الله محب ازادي راډیو ته وویل، د ګډو ځواکونو دغه عملیات پرون یکشنبه وشول: "د دغو عملیاتو په نتیجه کې ۴ طالب ترورېستان ووژل شول، یو موټر یې د امنیتي او دفاعي ځواکونو له‌خوا تخریب کړای شوی دی."

د ښاغلي محب په خبره اووه ماینونه هم کشف او شنډ کړای شوي دي.

وسله‌والو طالبانو د دغو پوځي عملیاتو په اړه تبصره نه‌ده کړې.

"د افغانستان لوېدیځ کې ۴۰ سلنه ماشومان له پولیو ضد واکسین بې‌برخې دي"

ارشیف، افغانستان کې د پولیو ضد واکسین کمپاین

د افغانستان په لوېدیځ کې روغتیايي چارواکي وايي په دغه حوزه کې ۴۰ سلنه ماشومان له ګوزڼ یا پولیو ضد واکسین نه بې‌برخې دي.

په لوېدیځه حوزه کې د کتلوي معافیت د پروګرام مسؤل عبدالوحید رحماني ازادي راډیو ته وویل د دولت وسله‌وال مخالفان تر خپلې ولکې لاندې سیمو کې ماشومانو ته د کور په کور واکسین اجازه نه‌ورکوي.

ښاغلی رحماني زیاتوي: "په لوېدیځه حوزه کې مو هدف تر پنځو کلونو کم عمره یو میلیون او یو لک ماشومانو ته واکسین ورکول دي، خو له بده مرغه د دوی ۴۰ فیصده‌یې له کمپاین څخه بې‌برخې پاتې کېږي. د دولت وسله‌وال مخالفان اجازه نه‌ورکوي چې کور پر کور دا واکسین تطبیق کړو. په ناامنو سیمو کې کمپاین په کلینیکونو او روغتیايي مرکزونو کې عملي کوو."

د افغانستان په لوېدیځو ولایتونو کې ماشومانو ته د ګوزڼ ضد واکسین ورکړه نن دوشنبه پیلېږي.

چارواکي: ارزګان کې تېرو دوو میاشتو کې تر ۳۰۰ زیات طالبان وژل شوي

ارشیف، افغان امنیتي ځواکونه

د ارزګان محلي چارواکي وايي، په تېرو دوو میاشتو کې تر ۳۰۰ زیات وسله‌وال طالبان وژل شوي دي.

د دغه ولایت امنیه قوماندان مل پاسوال محمد خطاب خنجري ازادي راډیو ته وویل، دغه وسله‌وال په ګېزاب او دهراوود ولسوالیو کې د جګړو پر مهال وژل شوي.

ښاغلی خنجري زیاتوي: "۲۹۳ تنه دښمنان په دهراوود ولسوالۍ کې وژل شوي او په ګېزاب ولسوالۍ کې هم موږ طالبانو ته درانه تلفات واړول، دوه شپې مخکې طالبانو غوښتل چې هلته پر یوې امنیتي پوستې برید وکړي، د افغان ځواکونو په ځوابي برید کې ۱۳ تنه یوځای ووژل شول او ۱۳ تنه نور بل ځای ووژل شول او سلګونه‌يې نور ټپیان دي."

خپلواکو سرچینو د وژل شویو وسله‌والو دغه شمېر تأیید کړی نه‌دی.

په دهراوود او ګېزاب ولسوالیو کې په وروستیو کې سختې جګړې شوي چې ځینې ساحې د وسله‌والو طالبانو لاس ته ورغلې دي.

نی: د الیاس داعي د وژنې په تړاو یو مشکوک کس نیول شوی

محمد الیاس داعي

د ازادو رسنیو د ملاتړ اداره وايي، امنیتي ادارو ورته ویلي چې د ازادي راډیو د خبریال محمد الیاس داعي د وژنې په تړاو یو مشکوک کس نیول شوی دی.

د دې ادارې اجرائیه مشر مجیب خلوتګر برايي ازادي راډیو ته دا خبره وکړه: "موږ ته داسې معلومات راکړل شوي، یو کس چې د طالبانو جګپوړی چارواکی دی چې په هلمند کې نیول شوی دی. د دولت نظر دا دی چې دغه کس د داعي په قتل کې لاس درلود."

وسله‌والو طالبانو چې پر الیاس داعي یې د چاودنې مسؤلیت نه‌دی منلی، د دغه مشکوک کس د نیول کېدو په اړه تر اوسه کومه تبصره نه‌ده کړې.

د ازادي راډیو خبریال محمد الیاس داعي د لړم/ عقرب میاشتې پر ۲۹مه په مرکز لښکرګاه کې ظاهراً د ده په موټر پورې د نښلول شوي مقناطیسي ماین په چاودنه کې ووژل شو.

د ملي امنیت عمومي ریاست: د طالبانو د ماين ايښولو ډله ونيول شوه

ارشيف

د ملي امنیت عمومي ریاست وايي د وسله‌والو طالبانو هغه ډله‌یې نیولې چې د ماینونو په ایښوولو کې یې لاس درلود.

دغه ریاست د یکشنبې په ورځ په یوه اعلامیه کې وویل، د نقیب‌الله په نوم دغه کس په پروان ولایت کې وسله‌والو طالبانو ته ۱۴ وارې د امنیتي او دفاعي ځواکونو د تګ راتګ په اړه اطلاع ورکړې وه.

اعلامیه وايي دغه شخص د ماین خښولو د درېیو ډلو مشري کوله چې تر ډېره‌یې پر موټرو د ماینونو چاودنې کولې.

د ملي امنیت عمومي ریاست ادعا کړې چې وسله‌وال طالبان د کوټې شورا په امر هڅه کوي چې د ګڼه ګوڼې په ساحو کې ترورېستي حملې وکړي.

وسله‌والو طالبانو د دغو تحولاتو او ادعاوو په اړه څه نه‌دي ویلي.

"ایراني چارواکو سره د ناقانونه کډوالو د طرحې په اړه خبرې پیل شوي"

د افغانستان د بهرنیو چارو وزارت

د افغانستان د بهرنیو چارو وزارت وايي، چې د ایران د پارلمان د ځینو استازیو له خوا د ناقانونه کډوالو د طرحې په تړاو يې له ایراني چارواکو سره خپلې اندېښنې شریکې کړي دي.

د دغه وزارت مرستیال ویاند حامدتهذیب نن رسنیو ته ویلي، چې په تهران کې افغان سفیر عبدالغفور لېوال د ایران د پارلمان له رییس محمد باقرقالي باف سره خبرې کړي او له هغه یې غوښتي چې د افغان کډوالو او افغان دولت د اندېښنو په هواري کې همکاري وکړي.

هغه زیاته کړه: "په هغه لیدنه کې چې په تهران کې د افغانستان سفیر د ایران د پارلمان له رییس ښاغلي قاليباف سره درلوده د دې طرحې د تصویب او عملي کېدو په تړاو یې د افغانستان اندېښنې ورسره شریکې کړي او د دغو اندېښنو د هواري په برخه کې یې د لازمو همکاریو غوښتنه وکړه، زموږ جدي هڅې روانې دي چې دغو اندېښنو ته له ډیپلوماټیکو لارو بشپړه رسېدنه وشي."

د ایران د پارلمان څه باندې دېرشو استازیو یوه تازه طرحه جوړه کړې چې که تصویب شي له مخې به یې په دغه هېواد کې د ناقانونه کډوالو پر وړاندې تدابیر لا پسې سخت شي.

په دې طرحه کې راغلي که چېرته بهرنیان په ناقانونه توګه ایران ته ننوځي په ۲۵ کاله بند او زیاتې نغدي جرمې محکومېږي.

دې طرحې هغه اته لکه افغانان چې په ایران کې له اسنادو پرته اوسي اندېښمن کړي.

د کرکټ نړیواله شورا: راشد خان په کمو سیالیو کې زیاتې وېکټې اخیستي

راشد خان

د کرکټ نړیواله شورا وايي، د افغانستان د کرکټ ملي لوبډلې لوبغاړي راشد خان په کمو شل اوریزو سیالیو کې له نورو توپ اچونکو زیاتې وېکټې اخیستي دي.

دغه شورا د نومبر په ۲۸ مه په خپله فیسبوک پاڼه خلک تشویق کړي، چې د لسیزې د غوره لوبغاړي په توګه راشد خان ته رایه ورکړي.

یادې شورا ویلي، چې راشد خان د لسیزې یوازینی بالر دی، چې په شل اوریزو لوبو کې یې په کمو لوبو کې تر نورو ډېرې وېکټې اخیستي دي.

یادې شورا لیکلي، چې راشد خان د لسیزې د یو ښه توپ اچوونکي په صفت ۸۹ وېکټې ترلاسه کړي، چې په لږ وخت کې یې لږ تر لږه خپل اوسط ۱۲ اعشاریه ۶۳ ته لوړ کړی دی.

یادې شورا په خپله فیسبوک پاڼه لیکلي، چې د بالرانو په منځ کې خان یواځینی هغه دی، چې په دې وروستیو کې یې ۵۰ وېکټې پوره کړي او د ټولو شل اوریزو لوبو په کېریر کې یې ۸۹ وېکټې خپلې کړي دي.

کابل کې د فوټسال غوره لیګ سیالۍ ترسره کېږي

آرشیف

نن د کابل د فوټسال غوره لیګ سیالۍ وروستی پړاو ترسره کېږي.

د افغانستان فوټبال فدراسیون د مسوولینو په وینا، د فوټسال غوره لیګ سیالیو دا پړاو د لسو لوبډلو ترمنځ ترسره کېږي.

د افغانستان فوټبال فدراسیون ویاند فېروز مشعوف ازادي راډیو ته وویل، د دې سیالیو پرانیستې مراسم نن د ټولو لسو لوبډلو په برخې اخیستنې ترسره شول.

په کابل کې د "پینګ پانګ" لوبې پای ته ورسېدې

آرشیف

په کابل کې پینګ پانګ ټاکنیزې لوبې پای ته ورسېدې.

د افغانستان د پینګ پانګ د فدراسیون سرپرستې لینا کاکړ نن ازادي راډیو ته وویل، دا لوبې د قوس په ۶ د بدنې روزنې عمومي ریاست جمنازیوم کې پیل او د شپږو ورځو پورې یې دوام درلود.

د اغلې کاکړ په خبره، په دې لوبو کې د کابل په ګډون له له ۱۵ ولایتونو ۱۶۵ لوبغاړو ګډون ګړی و.

هغه زیاتوي، یادې لوبې د مختلفو عمرونو او کټګوریو، د ځوانانو تر منځ د پینګ پانګ ملي لوبډلې لپاره د غوره څېرو ټاکلو په موخه ترسره شوې.

د دې لوبو پای کې لومړي، دوهم او دریم مقام ګټونکو لوبغاړو ته په ملي ټیم کې غړیتوب او اړوند فدراسیون لخوا کپ او ستاینلیکونه ورکړل شول.

د غزني ننني بريد په اړه د سولې وزارت غبرګون وښود

منصور نادري

د سولې په چارو کې د دولت وزیر او له طالبانو سره د مذاکراتي ټیم غړي سیدسعادت منصور نادري ویلي، چې د غزني نننی برید د جامع او بېړني اوربند د ټینګښت اړتیا لا ډېروي.

دا خبره نن د سولې په چارو کې د دولت د وزارت له ټوېټر د ښاغلي نادري په حواله خپره شوې.

ښاغلي نادري په غزني کې نننی موټر بم برید چې په کې لسګونه افغان سرتېرو ته مرګژوبله اوښتې ټکان ورکوونکی او بشر ضد بللی دی.

د برښنا شرکت بيا د برښنا پوروړو ته خبردارى ورکړ

آرشیف

د افغانستان برښنا شرکت یو ځل بیا پر هغو کسانو، چې د برښنا د لګښت پیسې یې نه دي ورکړي غږ وکړ چې که د خپلو لګښتونو پیسې دغه شرکت ته ورنه کړي نو برښنا به یې پرې شي.

د افغانستان د برښنا شرکت سلاکار مصطفی اریا له ازادي راډیو سره په خبرو کې وویل، دمګړی یو شمېر داسې دولتي ادارې، افراد او اشخاص شته چې کلونه کلونه کېږي د برښنا د لګښت پیسې یې نه دي ورکړي.

هغه زياتوي: "نه یوازې په مرکز، بلکې په ولایتونو کې زورواکي شته چې برښنا یې اخیستې خو د لګښت پیسې یې نه دي ورکړي، موږد برښنا د لګښت ټول پوروړي پیدا اولستونه مو جوړ کړل، پلاوي مو ورولېږل، يو څه پیسې راټولې شوي، قسطونه مو ورسره وکړل او وروستی ګام دا دی چې که دوی پر وخت پیسې ورنه کړي، برښنا پرې قطع کوو."

ښاغلي اريا وویل، دمګړی دولتی ادارې، افراد او اشخاص څه باندې څلور میلیارده افغانۍ پوروړي دي، چې دغو پورونو د برښنا شرکت پر مالي سیستم ناوړه اغېزه کړې.

ده داهم وویل، دولتي ادارو تراوسه ۵۰ او افرادو او اشخاصو ۲۰ سلنه پورونه ورکړي دي.

چارواکي: په میدان وردګ کې د مڼو ۷۱ سړې خونې جوړېږي

آرشیف

په میدان وردګ ولایت کې د مڼو ۷۱ سړې خونې جوړېږي.

د میدان وردګو ولایت د کرنې اوبو لګونې او مالدارۍ مسوولین وايي، د مڼو د سارک موډل صفر انرژۍ ۷۱ سړې خونو کارونه ۷۰ سلنه بشپړ شوي.

د دوی په وینا دا خونې د کرنیزو محصولاتو مدیریتي طرحې په چوکاټ کې جوړېږي.

د میدان وردګ ولایت د کرنې او مالدارۍ ریيس ولید احمد تسل وايي، د دې سړو خونو د جوړېدو لګښت ۱۷۴ میلیون او ۶۰۰ زره افغانۍ دی، چې ۹۰ سلنه بودیجه یې د کرنې وزارت او پاتې نوره د ګټه اخیستونکو بڼوالو له لورې ورکول کېږي.

نوموړی زیاتوي، چې یادې سړې خونې د کرنیزو محصولاتو د ساتنې او د بڼوالو د اقتصادي پیاوړتیا په موخه جوړېږي.

دا په داسې حال کې ده چې له دې وړاندې دوه سړې خونې د ۵۰۰ ټنو ظرفیت درلودونکي د میدان وردګو ولایت په میدان ښار او سیداباد کې جوړې شوې وي.

"امریکا او اروپا ته د انارو جوس او د انارو د صابون صادرات ډېر شوي"

د کندهار انار

د افغانستان د سوداګرۍ او صنعت وزارت وایي، کندهار کې د انارو د حاصلاتو له زیاتېدو سره امریکایي او اروپایي هېوادونو ته د انارو د جوس او د انارو د صابون صادرات ډېر شوي دي.

د دې وزارت ویاند جواد دبیر وایي، روان لمریز کال کې په کندهار ولایت کې د انارو د جوس محصولات څه د پاڅه ۱۰ ټن او همدا شان د انارو صابون تولیدات نږدې ۸ ټنو ته رسېږي.

د ښاغلي دبیر په وینا، په همدې موده کې کې د انارو جوس، صابون ترڅنګ د یادې میوې ۶۰۰ټن دانې هم چې روغتیايي او د سینګار محصولاتو کې کارول کېږي بهرنیو هېوادونو ته لېږدول شوي.

نوموړی زیاتوي، اوسمهال کندهار کې د انارو جوس او د صابون تولیداتو کارخانو ډېرېدو سره دغلته لسګونه کسانو ته د کار زمینه برابره شوې ده.

د سوداګرۍ او صنعت وزارت د معلوماتو له مخې د تېر په پرتله په نړیوال بازار کې د کندهار انار و ښه بازار موندلی او د وزارت رهبرۍ کار کوي څو دا پروسه لا وغځوي.

نور راوښيه

XS
SM
MD
LG