د لاسرسۍ وړ لېنکونه

تازه خبر
جمعه ۱۷ زمری ۱۳۹۹ کابل ۰۲:۵۶

خبرونه

د مونشن امنيتي کنفرانس نن پيلېږي

د شا و خوا ٣٥ دولتونو او حکومتونو امنيتي رهبران او ډيپلوماتان نن د مونشن په امنيتي کنفرانس کې برخه اخلي.

د فرانسې ولسمشر ايمانويل مکرون، د کاناډا صدراعظم جسټين ترودو او د ناټو سرمنشي ينس سټولټنبرګ به هم په کنفرانس کې برخه اخلي، چې تر يکشنبې دوام کوي.

په عالي رتبه ډيپلوماتانو کې د امريکا د بهرنيو چارو وزير مايک پامپيو، د چين د بهرنيو چارو وزير وانګ ي او د ايران د بهرنيو چارو وزير محمد جواد ظريف شامل دي.

دغه کلنى کنفرانس نن په داسې حال کې پيلېږي، چې د امريکا او اروپا ترمنځ اړيکې ترينګلي شوي دي.

دغه اړيکې په ٢٠٠٣م کال کې هم د عراق د جګړې پر سر د بحثونو پر مهال ترينګلي شوې وې.

د افغانستان ولسمشر محمد اشرف غني هم د مونشن په امنيتي کنفرانس کې د ګډون لپاره جرمني تللى دى.

جمهوري رياست ويلي چې ولسمشر به د کنفراسن په څنډه کې د نورو برخوالو هېوادونو له چارواکو سره د افغانستان پر سوله، امنيت او نورو موضوعاتو خبرې وکړي.

د ورځې تازه خبرونه دلته ولولئ

د فرانسې ولسمشر بېروت ته ورسېد

د فرانسې ولسمشر امانوئل مکرون

د فرانسې ولسمشر امانوئل مکرون نن د لبنان پلازمېنې بېروت ته ورسېد.

نوموړي د وړمې ورځې د درنې چاودنې ځپل شویو لبنانیانو ته په وینا کې وویل چې هېواد به‌یې له لبنان سره خپلو همکاریو ته دوام ورکړي، خو د دې هېواد پر چارواکو یې ټینګار وکړ چې د فساد مخه ونیسي او اصلاحاتو ته زمینه برابره کړي.

د نویو راپورونو له مخې د بېروت د وړمې ورځې په چاودنه کې چې د بېروت بندر په یوه ډیپو کې د امونیم نایتریت کیمیاوي سرې له کبله شوې ده، د وژل شویو کسانو شمېر ۱۳۷ تنو ته رسېدلی، شاوخوا ۵،۰۰۰ کسان ټپیان دي او لسګونه کسان لا هم تري تم دي.

د رسنیو د راپور له مخې، شاوخوا ۲،۷۰۰ ټنه امونیم نایتریت چې د چاودنې وړتیا لري، احتمالاً کلونه مخکې دغه بندر کې له یوې بېړۍ نیول شوي وو او په ناخوندي ډول ساتل کېدل.

د بېروت حکومت وایي په دې پېښه کې ۳۰۰ زره کسان بې‌کوره شوي او د زیان کچه‌یې شاوخوا درې میلیارده ډالره ته رسېږي.

هڅې روانې دي چې د دې چاودنې اصلي علت پیدا شي.

پاکستان: افغان ځواکونو زموږ پر پوستو بریدونه کړي

یو پاکستانی سرتېری

پاکستان ادعا کوي چې افغان سرحدي پولیسو له ډیورند کرښې هاخوا د پاکستاني ځواکونو پر پوستو بریدونه کړي، یو پاکستاني سرتېری یې وژلی او دوه نور یې ټپیان کړي دي.

د پاکستان د بهرنیو چارو وزارت په یوې اعلامیه کې ویلي چې دا پېښه د چهارشنبې په ماسپښین د خیبر پښتونخوا د کوز دیر په بنشاهي سیمه کې شوې ده.

اعلامیه زیاتوي چې دا ډول اقدامات د دواړو هېوادونو ترمنځ همکاري او همغږي زیانمنوي.

تر اوسه افغان حکومت د دې ادعا په اړه څه نه‌دي ویلي، خو تر دې وړاندې افغان حکومت برعکس پاکستاني ځواکونه په ورته اقداماتو او د افغان حکومت د مخالفو وسله‌والو ‌ډلو په ملاتړ تورن کړي دي چې اسلام‌اباد رد کړي.

پکتیا، کاپیسا او بدخشان کې ۱۹ تنه وژل شوي

ارشیف، د افغان ځواکونو عملیات

لږ تر لږه ۱۹ تنه په پکتیا، کاپیسا او بدخشان ولایتونو کې د طالبانو په بریدونو او له حکومتي ځواکونو سره په نښتو کې وژل شوي دي.

په وژل شویو کې وسله‌وال طالبان، پولیس او ملکي وګړي شامل دي.

د پکتیا امنیه قوماندانۍ وایي نن سهار په احمدخېلو ولسوالۍ کې لومړی د ماین چاودنه وشوه او بیا د افغان ځواکونو او طالبانو ترمنځ نښتو کې ۷ طالبان وژل شوي دي.

د دغې سرچینې په خبره اووه نور طالبان نن د پکتیا په څمکنیو ولسوالۍ کې د جګړې پر مهال ووژل شول. پولیس او عامو وګړو ته په دې جګړو کې زیان نه‌دی رسېدلی.

له کاپیسا څخه ا منیتي سرچینو نن ازادي راډیو ته تأیید کړه چې طالبانو د ملي پاڅون د یوه سیمه‌ییز قوماندان پر کور یرغل وروړوی، په خپله قوماندان سیف‌الدین له خپلو درېیو ساتونکو او هم د کورنۍ درې ښځینه غړي یې وژل شوي دي.

ویل کېږي په متقابلو نښتو کې طالبانو ته هم مرګ‌ژوبله اوښتې، خو دقیق شمېر یې معلوم نه‌دی. هاخوا له بدخشانه هم راپورونه وایي چې افغان ځواکونو په جرم ولسوالۍ کې پر امنیتي پوستو د طالبانو د بریدونو مخه ونیوله او د جګړو پر مهال یو طالب وژل شوی، درې نور ټپیان شوي دي.

د ټولو پېښو په اړه طالبانو تبصره نه‌ده کړې.

د ننګرهار د بهسودو کرکټ لوبغالي د رغونې کار پیل شو

ارشیف

افغان کرکټ بورډ وايي د ننګرهار د بهسودو کرکټ لوبغالي د رغونې کار پیل شو.

د افغان کرکټ بورډ سرپرست اجرائیه رئیس نظیم جار عبدالرحیمزي په یو خبري کنفرانس کې وویل چې د دغه لوبغالي د لومړني پړاو رغنیزې چارې درې میاشتې وخت نیسي.

ښاغلي عبدالرحیمزي وویل: "د دغه لوبغالي په لومړي پړاو کې د لوبغالي د ډکون چارې شاملې دي چې اړوند شرکت به‌یې د نقشې ایستلو چارو له پای ته رسولو وروسته د درې میاشتو په موده کې بشپړ کړي او د ډکون چارې به‌یې پای مومي. همدارنګه باید وویل شي چې دوهم پړاو چارې به‌یې هم ډېر ژر د تدارکاتي لړۍ له بشپړېدو وروسته پیل شي چې په‌کې د دېوال او لوبغالي د چمن او نورې اړوند کارونه شامل وي."

د ننګرهار د بهسودو د کرکټ لوبغالی چې د ځمکې د انتقال په برخه کې يې ستونزې موجودې وې کرکټ بورډ وايي اوس‌يې له ډېرو هلو ځلو وروسته د ځمکې د انتقال پروسه پای ته ورسېده او ډېر ژر به د یاد لوبغالي ټولې چارې بشپړې شي.

دا په داسې حال کې ده چې کرکټ بورډ دوه ورځې وړاندې په ميدان وردګ ولایت کې هم د کرکټ د یوه لوبغالي د جوړولو چارې پیل کړې دي.

په دې اړه د کرکټ بورډ په یوه خپره شوې اعلامیه کې راغلي دي چې یاد لوبغالی په ۲۲ جریبه ځمکه کې جوړېږي چې د نورو اسانتیاوو ترڅنګ به د نږدې ۴ زره نندارچیانو د ځایېدو ظرفیت هم ولري.

هرات کې د کانکور ازموینه پیل شوه

هرات کې د کانکور ازموینې لړۍ

نن په هرات کې د کانکور ازموینه پیل شوه.

د افغانستان د ازموینو د ملي کمېټې مسؤلین وایي په دې ازموینه کې څه باندې ۱۳ زره زده‌کوونکي برخه لري.

د افغانستان د ازموینو د ملي ادارې سرپرست عبدالقدیر خموش ډاډ ورکړی چې د بایومتریک سیستم په کارولو سره تر ډېره د تقلب‌کاریو مخه نیول شوې ده.

له سیمې د ازادي راډیو خبریال له مسؤلینو سره تر خبرو وروسته وویل چې په هرات کې په دې ازموینه کې د کرونا وبا د خطر په پام کې نیولو سره ځانګړي روغتیایي تدابیر په پام کې نیول شوي.

په ټول افغانستان کې د کانکور ازموینې سږکال د کرونا ویروس د خورېدو د مخنیوي له کبله ځنډنۍ شوې.

تر اوسه یوازې په ۱۷ ولایتونو کې دا ازموینه اخیستل شوې ده.

د افغانستان د ازموینو د ملي ادارې د شمېرو له مخې په ټول هېواد کې تر ۲۰۰ زره ډېر زده‌کوونکي په کانکور ازموینه کې ګډون کوي چې له دې څخه ۱۲۵ زره کسان د لوړو زده‌کړو مؤسسو ته جذبېږي.

نړیوال بانک د افغانستان لپاره د خوراکي خوندیتوب بودجه تصویب کړه

نړیوال بانک

د افغانستان کرنې او مالدارۍ وزارت وايي، د بېړنیو حالاتو لپاره د خوراکي خوندیتوب بودجه د نړيوال بانک له‌خوا منظور شوه.

د دې وزارت وياند اکبر رستمي نن ازادي راډيو ته وويل، دغه تصويب شوې بودجه ۱۰۰ ميلیونه ډالره ده چې په راتلونکو دوو کلنو کې به د افغانستان په ګڼ شمېر ولايتونو کې د کرنيزو پروژو له لارې مصرف شي.

د ښاغلي رستمي په خبره، د دې کرنيزو پروژو يو مهمه هغه د غنمو د توليد په برخه کې د اصلاح شويو تخمونو وېش دی.

نوموړی وايي، د غنمو د ښه توليد ترڅنګ به د دې پيسو يوه برخه د اوبو لګونې د ښه مدیریت په برخه کې هم ولګول شي.

تېره ورځ نړیوال بانک په یوه خبرپاڼه کې ویلي چې د دې بانک مدیره پلاوي د افغانستان 'ملي دسترخوان' او 'کروندګرو سره د بېړني حالت او خوراکي موادو تأمین' پروژو لپاره د ۳۸۰ میلیونه ډالرو مرسته تصویب کړې ده.

په خبرپاڼه کې راغلي دي چې له افغانستان سره نوې وړيا مالي مرستې به پر بې‌وزلو کورنيو د 'کووېډ-۱۹' ناروغۍ اغېزې کمې او خوراکي خوندیتوب پياوړی کړی.

پومپیو: امریکا پر ایران د وسلو بندیز په اړه د ملګرو ملتونو غونډه بولي

د امریکا د بهرنیو چارو وزیر مایک پومپیو

د امریکا متحده ایالاتو د بهرنیو چارو وزیر وايي، واشنګټن په پام کې لري راروانه اوونۍ پر ایران د وسلو د بندیز د تمدید په اړه د ملګرو ملتونو د امنیت شورا د رای ورکولو غونډه راوبولي.

مایک پومپیو پرون خبریالانو ته وویل: "ځیني هېوادونه شته چې غواړي وسلې خرڅې کړي او دا کار به منځنی ختیځ بې‌ثباته کړي، اسرائیل او اروپا په خطر کې واچوي."

ښاغلي پومپیو وویل، د امریکا متحده ایالات به پرې نه‌ږدي چې داسې وشي.

امریکا پر ایران د وسلو د نړیوال بندیز د تمدید لپاره د پرېکړې مسوده ترتیب کړې ده.

په پام کې وه دغه بندیز د ملګرو ملتونو د مخکېني پرېکړه‌لیک له مخې د اکټوبر له ۱۸مې راکم شي.

پاکستان کې د لاریون پر مهال چاودنې لسګونه کسان ټپیان کړل

ارشیف

په پاکستان کې پر یوه لاریون د لاسي بمب د حملې په نتیجه کې په لسګونه کسان ټپیان شول.

دا په داسې حال کې ده چې په پاکستان کې د هندوستان له‌خوا د کشمیر د ځانګړي موقف د ختمولو د پرېکړې د کال د پوره کېدو په مناسبت لاریونونه وشول.

پرون په کراچۍ کې د یوې افراطي مذهبي ډلې له‌خوا په تنظیم شوي لاریون کې لږترلږه ۳۹ کسان ټپیان شول.

په حمله کې د ځینو ټپیانو وضعیت د اندېښنې وړ دی او مسؤلیت‌یې یوې بېلتون غوښتونکې ډلې، سندهو دېش انقلابي پوځ منلی، هغه ډله چې په وروستیو میاشتو کې ډېره فعاله شوې ده.

دا حمله په داسې حال کې وشوه چې پرون د پاکستان په عمده ښارونو کې لاریونونه وشول او سیاسي مشرانو، تجارتي اتحادیو، د وکیلانو شوراګانو او د بشري حقونو فعالانو په‌کې برخه واخیسته.

دوی د هند تر ولکې لاندې د کشمیر د ځانګړي موقف ختمول وغندل او دا یې د هندوستان ځپونکې پرېکړه بللې ده.

د ټېنس لوبو اتل: د کرونا وبا له کبله د ۲۰۲۰ کال لوبو کې برخه نه‌اخلم

د ټېنس لوبو اتل رافایل نادال

د ټېنس لوبو اتل رافایل نادال چې لا هم له خپلې اتلولۍ دفاع کوي وایي، د کرونا وبا له کبله د ټېنس د ۲۰۲۰ کال په پرانیستو لوبو کې برخه نه‌اخلي.

هغه د دغې سیالۍ پر مهالوېش انتقاد کړی او هغه‌یې وحشیانه جدول بللی دی.

ده پر خپل ټویټرپاڼه لیکلي، له ډېر فکر وروسته‌یې پرېکړه وکړه چې د امریکا په سږنۍ پرانیستې یا (US Open) کې ګډون نه‌کوي.

ده ویلي، د ټولې نړۍ په کچه د کرونا ویروس وضعیت پېچلی دی او د ده په ټکو لا هم دغه ویروس نه‌دی قابو شوی.

د نادال سیال راجر فیدرر لا له وړاندې سږنیو لوبو کې خپل ګډون رد کړی، خو د هغه د نه‌ګډون لامل د زنګون ټپ ښودل شوی.

بلاروس کې د وروستیو ولسمشریزو انتخاباتو ناظرین توقیف شوي

ارشیف

په بلاروس کې هغه خپلواک ناظرین توقیف شوي چې هلته‌یې د وروستیو ولسمشریزو انتخاباتو څارنه کوله.

دا وروسته تر دې چې د بلاروس د ټاکنو له قانون نه د بې‌شماره سرغړونو راپورونه مستند شول.

د رښتینو خلکو په نوم پر ټاکنو د څار یوه بنسټ پرون وویل، د دوی څارونکو د ټاکنو پر مهال په مېنسک او نورو ښارونو کې د ټاکنو په لومړۍ ورځ ۲،۰۵۶ سرغړونې ثبت کړې دي.

د بشري حقونو ملاتړو هم ویلي چې پولیسو دغلته پرون خپلواک څارونکي د لاسوهنې په تور نیولي دي.

په نیول شویو څارونکو کې یو شمېر مدني فعالان هم شته.

د ټاکنو څارونکو بیا ویلي، په مېنسک او نورو ښارونو کې د دوی څارونکو ته اجازه نه‌ده ورکول شوې چې د ټاکنو څارنه وکړي.

بېروت کې د چاودنې له امله د وژل شویو شمېر ۱۳۵ ته ورسېد

بېروت کې چاودنه

د لبنان په پلازمېنه بېروت کې د سې شنبې په ورځ د چاودنې له امله د وژل شویو کسانو شمېر ۱۳۵ تنو ته ورسېد.

د لبنان د روغتیا وزیر پرون چهارشنبه یوه محلي ټلوېزیون ته وویل، شااوخوا پنځه زره کسان په چاودنه کې ټپيان شوي او لسګونه نور تري تم دي.

چاودنه وړمه ورځ د بېروت بندر په یوه انبار خونه کې رامنځته شوې ده.

چارواکي وایي، چاودنه د امونیم نایتریت کیمیاوي سرې له کبله رامنځته شوې، دا مواد له څو کلونو راهیسې په ناخوندي ډول بندر ته نږدې یوه ګدام کې ساتل کېدل.

د رسنیو د راپور له مخې، دغه اندازه امونیم نایتریت چې د چاودنې وړتیا لري، احتمالاً کلونه مخکې دغه بندر کې له یوې بېړۍ نیول شوي وو.

د لبنان حکومت پرون د بېروت بندر چارواکي په کورونو کې نظربند کړل.

د ننګرهار زندان لپاره نوی مشر وټاکل شو

د ننګرهار محبس

په ننګرهار کې د هغه زندان مشر نوی شو چې څو ورځې وړاندې داعش وسله‌والو پرې ډله‌ییزه او موټر بم حمله وکړه.

د والي ویاند عطاالله خوګیاڼي ازادي راډیو ته وویل، سمونوال صالح محمد شېرزی د جلال‌اباد زندان د نوي مدیر په توګه ټاکل شوی دی.

د ښاغلي خوګیاڼي په خبره، د زندان پخوانی مدیر څارنوالۍ ته معرفي شوی دی.

هغه زیاته کړه: "د زندان پخوانی مدیر عبدالولي حصارک د خپل مسؤلیت د نه ادا کولو لپاره لویې څارنوالۍ ته معرفي شوی، له هغه څېړنې کېږي چې پر محبس د برید اړخونه روښانه شي."

پر دغه زندان برید کې د ملکیانو، امنیتي ځواکونو او زندانیانو په ګډون ۲۵ تنه ووژل شول او نږدې ۵۰ نور ټپیان شول.

ویل کېږي چې له برید وروسته شااوخوا ۲۰۰ زندانیان هم لادرکه شوي دي.

نیمروز کې ماین چاودنې ۷ ملکیان وژلي

د نیمروز نقشه

د نیمروز په خاشرود ولسوالۍ کې د ماین چاودنې ۷ ملکیان ووژل.

د نیمروز ولایت د مطبوعاتي دفتر سرپرست بهرام‌خېل ازادي راډیو ته وویل، دغه کسان پرون له غرمې وروسته د خاشرود پر لاره روان و چې موټر یې پر خښ شوي ماین وخوت.

نوموړی زیاتوی، چاودنه کې یو کس ټپي شوی هم دی.

د نیمروز مسؤلین وایي، دا ماین طالبانو ایښی و، خو طالبانو لا په دې اړه څه نه‌دي ویلي.

افغان چارواکي: د لویې جرګې لپاره چمتووالی ډېر ښه روان دی

ارشیف

افغان چارواکي وایي، کابل کې د سبانۍ لویې جرګې لپاره چمتووالی ډېر ښه روان دی.

د دغې جرګې د عامه اړیکو د کمېټې یوه غړي غفور احمد جاوېد ازادي راډیو ته وویل، رابلل شوي ډېر مېلمانه رارسېدلي او پاته نور به تر نن ماښامه راورسېږي.

هغه زیاته کړه: "د جرګې چمتووالی تر دې مهاله ډېر ښه روان دی، له ډېرو ولایتونو د جرګې غړي چې د پخوانۍ جرګې غړي هم وو، رارسېدلي دي، دا د سولې مشورتي لویه جرګه ده، د سولې د لارې نقشه د دوی په مشوره جوړېږي، دا چې یو شمېر کسانو مخالفتونه کړي، مهم نه‌دي، ځکه د افغانانو اراده مهمه ده."

د جرګې له جوړېدو سره طالبانو او په دولت کې دننه د ولسي جرګې مشر مخالفت کړی دی.

پر جرګې دا انتقاد هم شته چې ۳۳۰ میلیونه افغانۍ چې څلورنیم میلیونه ډالر کېږي، لګښت پرې راځي، خو مسؤلین‌یې وايي، د جګړې لګښتونو ته په پام دا کم لګښت دی او دوی یې حساب کتاب ته چمتو دي.

دا جرګه شااوخوا درې زره ګډونوال لري او درې ورځو لپاره پلان شوې ده.

تاجکستان له افغانستان سره پر پوله پوځي مانور وکړ

د افغانستان او تاجکستان ترمنځ پوله

تاجکستان له افغانستان سره پر خپله پوله پراخ پوځي مانور وکړ.

د دې پوځي مانور هدف له افغانستان څخه تاجکستان ته د ترورېستانو او د مخدره موادو د چاقاقبرو د ننوتو مخنیوی بلل شوی دی.

د تاجکستان دولتي ټلوېزیون ویلي چې دا مانور چې دوه ورځې وړاندې (د اسد ۱۵) د افغانستان د بدخشان او د تاجکستان د کورواک بدخشان ترمنځ ساحه کې پیل شوه، نن چهارشنبه پای ته ورسېده.

نور راوښيه

XS
SM
MD
LG