د لاسرسۍ وړ لېنکونه

تازه خبر
پنجشنبه ۸ کب ۱۳۹۸ کابل ۰۵:۳۳

خبرونه

د سالنګ لويه لار د ټرافيکو پرمخ پرانيستل شوه

د سالنګ لويه لار چې د درنو واورو او شديدو بادونو له کبله تړل شوې وه، تېره شپه بېرته د ټرافيکو پرمخ پرانيستل شوه.

دغه لار ٢٤ ساعته تړل شوې وه، چې له کبله يې خلکو پر دې لار تګ راتګ نه شواى کولاى.

د سالنګونو د ساتنې او څارنې اجرائيه مدير سميع اله وليزاده ازادۍ راډيو ته وويل، دوى دغه لار د واورې تر پاکولو وروسته پرانيستله.

چارواکو ويلي چې د واورې ښويېدنې له کبله چا ته ځاني زيان نه دى اوښتى.

د ورځې تازه خبرونه دلته ولولئ

اروپايي ټولنې یو ځل بیا له افغان حکومت د ملاتړ د دوام اعلان وکړ

افغان ولسمشر محمد اشرف غني د افغانستان لپاره د اروپايي ټولنې له ځانګړي استازي رولاند کوبیا سره د لیدنې پر مهال.

د افغانستان لپاره د اروپایي ټولنې ځانګړي استازي یو ځل بیا د افغانستان له حکومت څخه د ملاتړ او ورسره د همکارۍ د دوام په اړه ډاډ ورکړ.

د ارګ په یوې اعلامیه کې راغلي چې رولاند کوبیا نن تر غرمې دمخه په ګلخانې ماڼۍ کې له ولسمشر اشرف غني سره د لیدو پر مهال دا خبره کړې ده.

د اعلامیې له مخې ښاغلي کوبیا د افغانستان له ټولو سیاستوالو غوښتي چې د سولې پروسې د بریالي ترسره کېدو لپاره په ګډه کار وکړي.

ولسمشر غني په دې لیدنه کې د افغانستان لپاره د اروپایي ټولنې استازي ته ویلي چې د سولې پروسې د فرصتونو او احتمالي خطرونو په اړه‌یې له بېلابېلو لورو سره سلامشورې کړي او د دغو چارو د ښه مدیریت لپاره چمتووالی لري.

د افغانستان د سولي لپاره د امریکا د بهرنیو چارو وزارت د استازي زلمي خلیل‌زاد او په قطر کې د طالبانو د سیاسي مشرانو ترمنځ تر ډېرو خبرو اترو وروسته ټاکل شوې ده د روانې فبرورۍ پر ۲۹مه د دواړو لورو ترمنځ توافق لاسلیک شي چې له مخې به‌یې له افغانستان څخه د بهرنیو ځواکونو وتلو او د افغان حکومت او طالبانو ترمنځ مخامخ خبرو ته زمینه برابره شي.

د امریکا او طالبانو ترمنځ د توافق تر لاسلیک دمخه د سولي لپاره د اعتماد فضا د رامنځته کېدو په هدف په افغانستان کې د یوې اوونۍ لپاره د تاتریخوالي د کمېدو پرېکړه شوې وه چې نن د دې اوونۍ د پیل پنځمه ورځ ده.

د افغانستان خلکو د دې پرېکړې تود هرکلی وکړ.

مصر کې د حسنې مبارک د جنازې لپاره ځانګړي مراسم جوړېږي

د مصر د پخواني مشر حسنې مبارک جنازه

مصر نن د دې هېواد د پخواني مشر حسنې مبارک د جنازې لپاره ځانګړي پوځي مراسم جوړوي.

د مصر د ولسمشر عبدالفتاح السیسي حکومت د مبارک د مړینې له کبله درې ورځې ملي ماتم اعلان کړ.

حسنې مبارک د ۹۱ کلونو په عمر پرون د قاهرې په یوه پوځي روغتون کې ومړ. د نوموړي ۳۰ کلنه واکمني په ۲۰۱۱ کال کې د عرب پسرلي له اعتراضونو سره ختمه شوه.

د مصر جنرالان او لوړ رتبه افسران نن په موشیر طنطاوي جومات کې راټول شول.

د مبارک دوه زامن جمال او آلا چې تازه د فساد له تورونو پاک راوتلي هم په دې ډله کې ول.

د حسنې مبارک مړی په یوه هلیکوپټر کې دغه جومات ته ولېږدول شو.

د پاکستان د مسلم لیګ نواز ګوند یو مشر وژل شوی

د جاوېد الله خان د جنازې مراسم

د پاکستان د مسلم لیګ نواز ګوند یو سیمه‌ییز مشر چې د تندلارۍ ضد یوې ډلې غړی هم وو د دې هېواد په شمال لوېدیځ کې په ډزو ووژل شو.

جاوېد الله خان تېره میاشت د خېبر پښتونخوا په سوات سیمه کې د اوصاف په نوم یوې ورځپاڼې د مسؤل مدیر په توګه ټاکل شوی وو.

د ده د تره زوی ممتاز خان ازادي راډیو ته ویلي چې دا د یوې کورنۍ ۱۵م غړی وو چې تر ۲۰۰۸ کال راوروسته وژل شوي دي.

ممتاز خان ویلي، "موږ سیاستوال یو او دا د دولت مسؤلیت دی چې زموږ امنیت خوندي کړي."

۳۶ کلن جاوېد الله خان تېره ورځ ناوخته د نامعلومو وسله‌والو تر برید لاندې راغی.

د ده یو ساتونکی پولیس له بریده روغ وتلی.

تر اوسه د دې پېښې مسؤلیت چا نه‌دی منلی.

مودي د هندوانو او اقلیت مسلمانانو ترمنځ د ارامتیا غوښتنه کړې

هند کې اقلیت مسلمانان

د هند صدراعظم نرېندرا مودي په دې هېواد کې د هندوانو او اقلیت مسلمانانو ترمنځ د وروستیو لانجو په تړاو له خلکو د ارامتیا غوښتنه کړې ده.

په دغو لانجو کې په پلازمېنه نوې ډېلي کې لږترلږه ۲۰ کسه وژل شوي دي.

د هند صدراعظم نن چهارشنبه پر خپله ټویټر پاڼه لیکلي، "زه په ډېلي کې له خپلو خویندو او وروڼو څخه غواړم چې هر وخت په خپلو کې سوله او ورولي وساتي."

نوموړي دا هم ویلي چې وضعیت په غور سره څاري او پولیس او نورې ادارې د ثبات او ارامتیا د ډاډمنېدو لپاره کار کوي.

د فبرورۍ پر ۲۳مه په پلازمېنه نوې ډېلي کې دا خونړۍ پېښې د هغو مظاهره کوونکو ترمنځ راپورته شوې چې د هندوستان د تابعیت د نوي جنجالي قانون په اعتراض راوتلي وو.

د نوي قانون له مخې هندوستان هغو کسانو ته تابعیت ورکوي چې مسلمانان نه‌دي او د خپل مذهب په خاطر د ځپنې له وېرې له ۲۰۱۶ کال مخکې هندوستان ته تللي.منتقدین وايي، دا قانون له مسلمانانو سره توپیري چلند کوي، خو حکومت دا خبره ردوي.

قزاقستان، ایران ته خپلې الوتنې ځنډوي

په قزاقستان کې نور سلطان نظربایف هوايي ډګر

قزاقستان ویلي چې په پام کې لري د مارچ له لومړۍ نېټې څخه ایران ته خپلې الوتنې وځنډوي.

د دې هېواد د روغتیا وزارت یوه لوړپوړي مسؤل ژانداربیک بیکشین نن یوې خبري غونډې ته ویلي چې دا اقدام په ایران کې د کرونا وایروس د خپرېدو له کبله کېږي.

نوموړي دا هم ویلي چې قزاقستان به جنوبي کوریا او نورو هېوادونو ته چې دغه وایروس ځپلي تګ راتګ کم کړي.

تر اوسه په قزاقستان کې د کرونا وایروس هېڅ پېښه نه‌ده ثبت شوې.

روسیې خپل وګړي ایټالیا، جنوبي کوریا او ایران ته له سفر منع کړي

د روسیې په یوه هوايي ډګر کې مسافر

روسیې له خپلو وګړو غوښتي چې ایټالیا، جنوبي کوریا او ایران ته چې د کرونا وایروس ځپلي دي، له سفره ‌‌ډډه وکړي.

د روسیې د مصرفوونکو د خوندیتوب ادارې یوه مسؤل نن خبرداری ورکړ چې ترڅو په دغو درېیو هېوادونو کې روغتیایي وضعیت ثبات نه‌وي پیدا کړی، روسي وګړي دې هلته سفر نه‌کوي.

مسکو تر دې وړاندې د کرونا وایروس د خپرېدو له وېرې روسیې ته د چینایي وګړو پر ورتلو بندیز لګولی وو.

د دې ناروغۍ دوه مثبتې پېښې وړاندې په روسیې کې لیدل شوې وې چې یوه‌یې په سایبریا کې په چیتا ښار او بله په تیومن سیمه کې وه. دواړه کسان تر درملنې وروسته له روغتونونو خارج شوي دي.

د نړۍ په ۳۰ هېوادونو کې د کرونا وایروس مثبتې پېښې ثبت شوي

عراق، افغانستان، بحرین، کوېټ او عمان وړمه ورځ په خپلو هېوادونو کې د کرونا وایروس د یوې پېښې تأیید وکړ.

نړۍ ۳۰ هېوادونو راپور ورکړی چې د کرونا وایروس مثبتې پېښې یې ثبت کړې دي.

تر چین وروسته چې د دې وایروس د خپرېدو اصلي ځای دی ډېرې پېښې په جاپان، جنوبي کوریا، ایټالیا او ایران کې دي.

عراق، افغانستان، بحرین، کوېټ او عمان وړمه ورځ په خپلو هېوادونو کې د کرونا وایروس یوه پېښع تأیید کړه.

کرونا وایروس په چین کې ۲۷۱۵ کسان مړه کړي او له چین بهر د وژل شویو کسانو شمېر ۴۰ ته رسېدلی.

په چین کې ۷۸۰۰۰ او د نړۍ په نورو هېوادونو کې ۲۷۰۰ کسان په دې وایروس اخته دي.

په ځینو هېوادونو کې د کرونا وایروس پېښې په هغو کښتیو کې تأیید شوي چې د چین له مسیره تېرې شوې دي.

په اوکراین کې د یوې کښتۍ ۲۵ کارکوونکو د حکومت له‌خوا له کښتۍ د کته کېدو غوښتنه رد کړه.

په دې کښتۍ کې دوه کسان په کرونا وایروس اخته و چې روغتون ته وړل شوي.

ایران سره د اټمي تړون پاتې شامل قدرتونه اتریش کې غونډه کوي

له ایران سره د ۲۰۱۵ کال د اټمي تړون پاتې شامل قدرتونه جرمني، فرانسه، بریتانیا، چین او روسیه هڅه کوي چې دا تړون خوندي کړي.

له ایران سره د اټمي تړون پاتې شامل قدرتونه نن چهارشنبه د اتریش په پلازمېنه ویانا کې غونډه کوي.

له ایران سره د ۲۰۱۵ کال د اټمي تړون پاتې شامل قدرتونه جرمني، فرانسه، بریتانیا، چین او روسیه هڅه کوي چې دا تړون خوندي کړي.

د ایران استازی هم دې غونډې ته ورځي.

د روسیې د بهرنیو چارو وزیر سرګي لاوروف ویلي دا یو چانس دی مخکې له دې چې ډېره ناوخته شي د کړکېچ مخه به ونیسو.

دا غونډه وروسته له هغه جوړېږي چې جرمني، فرانسې او بریتانیا ځیني جنجال پاروونکي پروسیجرونه منځته ته راوستل چې ښايي پر تهران د ملګرو ملتونو بندیزونه بیا پیل کړي.

امریکا په ۲۰۱۸ کال کې له ایران سره له اټمي تړونه ووته او په ایران‌یې سخت بندیزونه پیل کړل.

ایران هم د دغه تړون له رعایته سرغړونه کړې ده او د یورانیمو بډاینې ته‌یې دوام ورکړی دی.

ایران ویلي که بندیزونه ترې لیرې شي بېرته به د تړون د موادو رعایت ته ورستون شي.

پکتیا کې د ۶ میلیارده افغانیو په ارزښت ګڼې پروژې پلې شوې

د پکتیا والي شمیم خان کټوازی خبري غونډه کې د خبرو پرمهال.

په پکتیا کې د ۶ میلیارده افغانیو په ارزښت ګڼې پروژې پلې شوې دي او راتلونکې کال لپاره هم شپږ مېلیارده افغانۍ ځانګړې شوې.

د پکتیا د ولایت مقام د غونډو په تالار کې والي شمیم خان کټوازي ولس ته د حساب ورکولو غونډه کې وویل چې په روان ۱۳۹۸ مالي کال کې یې د شپږ میلیارده افغانیو په ارزښت د مرکز په ګډون په ولسوالیو کې ګڼې پروژې پلې شوي دي.

هغه زیاته کړه: "په روان کال کې مو ۶ مېلیارده افغانۍ بودیجه مصرف کړې او د راتلونکې کال لپاره مو هم ۶ مېلیارده بودیجه پیدا کړې، زموږ هڅه داده چې دا تر لسو میلیارده افغانیو ورسوو، راتلونکي کال کې مو د ۱۶۳ ښوونځيو لپاره بودیجه پیدا کړې، چې په دې سره به زموږ سل سلنه ښوونځي ودانۍ ولري."

که څه هم د پکتیا والي تر یوه مېلیارد افغانیو د ګمرک د عوایدو د رسېدو او د ۱۶۳ ښوونځیو لپاره د ودانیو د جوړېدو تر څنګ د یو شمېر نورو پروژو د بشپړېدو او پیلېدو خبره وکړه، خو د پکتیا اوسېدونکي دا کافي نه بولي او وایي، تر اوسه هېڅ داسې لویه پروژه نه ده بشپړ شوې چې د خلکو په ژوند کې یې مثبت بدلون راوستی وي.

دا په داسې حال کې ده، چې له دې وړاندې د پکتیا ولایت والي شمیم خان کټوازي یوې غونډې ته ویلي، چې د امنیتي ستونزو له امله د یو شمېر پروژو د نه تطبیق له امله نږدې دوه میلیارده افغانۍ بودیجه بېرته مرکز ته انتقال شوې ده.

د کويټ هوايي چلند ادارې سينګاپور او جاپان ته الوتنې ځنډولي

په کويټ کې د کرونا ٩ پېښې ثبت شوي.

د کويټ د ملکي هوايي چلند ادارې پرون سې شنبه اعلان وکړ، چې سينګاپور او جاپان ته يې ټولې الوتنې وځنډولې.

د کويټ خبري اژانس کُنا راپور ورکړى، چې دا اقدام د کرونا وايروس د خپرېدو له ویرې اخیستل شوى دى.

اژانس وايي دا بيان د کويټ د روغتيا وزارت له لارښوونې سره سم خپور شوى دى.

کويټ تېره شنبه د کرونا وايروس له کبله خپلې الوتنې جنوبي کوريا، ايران، ټايلنډ، ايټاليا او عراق ته هم وځنډولې.

په کويټ کې د کرونا ٩ پېښې ثبت شوي، چې چارواکي وايي په دې وايروس ټول اخته کسان له ايرانه ورغلي دي.

ایران کې د کرونا وایروس له امله د مړو شمېر ۱۶ تنو ته رسېدلی

په نړۍ کې په دې وژونکي وايروس تر ٨٠زرو ډېر کسان اخته شوي او شاوخوا ٢٧٠٠ کسان يې تر ډېره په چين کې مړه کړي دي.

په ايران کې په کرونا وايروس د ٣ نورو کسانو له مړينې سره په دې وايروس د مړو شمېر ١٦ ته ورسېد.

دا له چين د باندې، چې په دې وژونکي ډېر کسان مړه شوي، د مړينو تر ټولو لوړ شمېر دى.

د امريکا د بهرنيو چارو وزير مايک پامپيو پرون په واشنګټن کې خبريالانو ته د خبرو پر مهال د ايران له چارواکو غوښتنه وکړه، چې د دې ناروغۍ په اړه حقايق ووايي.

هغه زیاته کړه: "د امريکا متحد ايالاتونه د هغو معلوماتو له کبله سخت اندېښمن دي، چې ښيي د ايران رژيم ښايي په دغه هېواد کې د دې ناروغۍ د خپرېدو په اړه مهم جزئيات پټ کړي وي."

مايک پامپيو وويل د ايران په ګډون ټول هېوادونه دې د کرونا وايروس په اړه حقايق ووايي او له نړيوالو مرستندويو سازمانونو سره دې همکاري وکړي.

د کرونا وايروس د خپرېدو په اړه اندېښنې وروسته له هغې زياتې شوې، چې په ايران، ايټاليا او جنوبي کوريا کې په دې ويراوس د خلکو د اخته کېدو تازه پېښې زياتې شوې.

په نړۍ کې په دې وژونکي وايروس تر ٨٠زرو ډېر کسان اخته شوي او شاوخوا ٢٧٠٠ کسان يې تر ډېره په چين کې مړه کړي دي.

امریکا په افغانستان کې د خپلو سرتېرو شمېر ۸۶۰۰ ته راکموي

د امریکا د متحدو ایالاتو ولسمشر ډونالډ ټرمپ

د امریکا د متحدو ایالاتو ولسمشر ډونالډ ټرمپ پرون د فبرورۍ په ۲۵مه، وویل چې په افغانستان کې د خپلو سرتېرو شمېر به ۸۶۰۰ ته را کم کړي.

ټرمپ نن دا خبره په نوې ډیلي کې خبریالانو ته کړې ده.

هغه همدا راز ویلي چې په افغانستان کې د سولې د ټينګښت لپاره هڅې یې ستایل شوې دي.

ټرمپ نن ونه ویل چې څه وخت به د سرتېرو شمېر کموي.

د امریکا حکومت او وسله وال طالبان د تاوتریخوالي د کمولو پرېکړه عملي کوي او نن یې څلورمه ورځ ده.

د امریکا د بهرنیو چارو وزیر مایک پامپیو ویلي چې که د تاوتریخوالي د کمولو پرېکړه ښه عملي شوه، د فبرورۍ په ۲۹مه به له طالبانو سره د سولې هوکړه لاسلیک کړي.

د سولې د هوکړې تر لاسلیک وروسته به بین الافغاني خبرې پېلېږي چې په هغه کې به د دایمي اروبند پر اعلان، د امریکايي سرتېرو د کمېدو او داسې نورو مهمو مسئلو په اړه پرېکړې کېږي.

ننګرهار کې د اوبو ۳۰ بندونه جوړېږي

د افغانستان په زياتو ولايتونو کې د سيندونو اوبه ګاونډيو هېوادونو ته بهېږي.

په پام کې ده چې په ننګرهار ولايت کې د اوبو ٣٠ کوچني بندونه جوړ شي.

چارواکي وايي، د اوبو د دغو بندونو د سروې او ډيزاين چارې بشپړې شوي دي.

د والي وياند عطا الله خوږياڼي پرون ازادۍ راډيو ته په دې اړه وويل: "په ننګرهار کې د ٣٠ ډيمونو يا وړو بندونو د سروې او ډيزاين چارې بشپړې شوې دي، د عملي کار د پيل لپاره يې قرار دادونه مرکز ته لېږل شوي، چې منظور شي، له دې سره به په دې ولايت کې د اوبو په برخه کې ډېره ستونزه حل شي."

د افغانستان په زياتو ولايتونو کې خلک شکايت لري، چې د سيندونو اوبه ګاونډيو هېوادونو ته بهېږي او دوى زياته ګټه نه شي ورڅخه اخيستلاى.

سټولټنبرګ: افغانستان کې باید د کړکېچ له رامنځه کولو ډډه وشي

د ناټو سازمان سرمنشي ینس سټولټنبرګ

د ناټو سازمان سرمنشي ینس سټولټنبرګ د افغانستان په اړه په یوه تازه بیان کې ویلي چې د ټاکنیزې پروسې په اړه هره اندېښنه باید د اساسي قانون او حقوقي مقرراتو په اساس ځواب شي.

د ناټو سازمان په اعلامیه کې بیګا د سټولټنبرګ په حواله راغلي چې دی د افغانستان د ټاکنو خپلواک کمېسیون له خوا د دغه هېواد د تېر سېپټېمبر ولسمشرۍ ټاکنو د وروستۍ پایلې د اعلان په اړه خبر دی.

هغه افغانان ستایلي چې په ټاکنو کې یې برخه اخیستې او هم یې د افغان پوځيانو یادونه کړې چې په ټاکنو کې یې د خلکو امنیت نیولی و.

د افغانستان د ټاکنو خپلواک کمېسیون محمد اشرف غني د ټاکنو ګټونکی اعلان کړ خو یو شمېر نورو کاندیدانو له هغه ډلې د ښاغلي غني اصلي سیال عبدالله عبدالله د ټاکنو پایلې رد کړې او ځان یې بریالی اعلان کړ.

د ناټو د سرمنشي په حواله په اعلامیه کې افغان سیاستوالو ته سپارښتنه شوې له داسې اقداماتو ډډه وکړي چې کړکېچ لا پسې زیاتوي او سیاسي ثبات تر پوښتنې لاندې راولي.

هغه ویلي اوس یې وخت دی چې مسووله سیاسي خواوې متحدې شي او د سولې په پروسې تمرکز وکړي.

د ناټو د اعلامیې په پای کې د سټولټنبرګ په حواله راغلي چې ناټو سازمان به د اوږدې مودې لپاره د افغان امنیتي او دفاعي ځواکونو سره مرستې او همکارۍ ته دوام ورکړي.

چارواکي: پکتیا کې ١٦٨ښونځیوو ته ودانۍ جوړېږي

ارشیف

د پکتيا ولايتي چارواکي وايي، د راروان لمريز کال تر پایه پورې به يو ښونځى هم بې ودانۍ نه وي.

د والي وياند عبدالله حسرت پرون ازادۍ راډيو ته وويل، په پام کې ده په ١٣٩٩لمريز کال کې په پکتيا کې د شاوخوا ٢٧ میلیونه امريکايي ډالرو په ارزښت په لسګونو ښوونځيو ته ودانۍ جوړې شي.

هغه زیاته کړه: "د شاوخوا ٢٧ میليونه امريکايي ډالرو په لګښت ١٦٨ ښوونځيو ته ودانۍ جوړېږي، چې د ځينو چارې نيمايي ترسره شوي او پر يو شمېر نورو يې د هوا له نورمالېدو سره کار پيلېدونکى دى."

ښاغلى حسرت وايي، په دغو ١٦٨ ښوونځيو کې ١٠٣ ښوونځيو ته ودانۍ د کليو پراختيا وزارت د اقرا پروګرام، پاتې نورو ته يې ودانۍ د ښار جوړونې وزارت او نورو ادارو له خوا جوړېږي.

د پکتيا ولايتي چارواکي وايي په ١٣٩٨ل کال په دغه ولايت کې د ۶ میليارده افغانيو په ارزښت پرمختيايي بودجه لګول شوې ده.

خو د والي وياند وايي، د مچلغو بند په څېر د ځينو لويو پروژو کارونه د امنيتي ستونزو له کبله بشپړ شوي نه دي.

نور راوښيه

XS
SM
MD
LG