د لاسرسۍ وړ لېنکونه

تازه خبر
یکشنبه ۴ کب ۱۳۹۸ کابل ۰۲:۳۵

افغانستان

خوست کې چاودنې پولیسو ته مرګ ژوبله اړولې

ارشیف

په خوست ښار کې چاودنې درې پولیسو ته مرګ ژوبله واړوله.

نن د شنبې په ورځ شاوخوا لس نیمې بجې د خوست ښار د میخانیکي انسټیټوټ په خوا کې د پولیسو په رینجر موټر پسې چاودنه شوې، چې یو پولیس په کې وژل شوی او ۲ نور په کې ټپیان شوي دي.

د خوست د امنیې قوماندانۍ ویاند عادل حیدر مشال راډیو ته وویل، چې په دې چادنه کې د پولیسو موټر هم زیانمن شوی دی، خو ولسي وګړو ته په کې زیان نه دی رسېدلی.

تر اوسه کومې وسله والې ډلې په دې اړه رسنیو ته څه نه دي ویلي.

د ورځې تازه خبرونه دلته ولولئ

طالبان: دا یو عام اوربند نه دی

ارشیف

وروسته له هغې چې د تاوتریخوالي د کمولو د اونۍ د پیل وروسته هم له ځینو ولایتونو څخه د وسله والو طالبانو د بریدونو راپورونه ورکړل شول، طالب ویاند ذبیح الله مجاهد رسنیو ته په یو استولي پیغام ټینګار کړی چې دا یو عام اوربند نه دی.

نوموړې ویلي: ”د توافقنامې د لاسلیک لپاره د مناسبې فضاء په برابرولو کې د ټولو ولایاتو مرکزونه د قول اردوګانو، فرقو، غونډونو او بهرنیوقواو مرکزونه شامل دي.“

د نوموړې په وینا له دې اخوا د دوی د وسله والو هر ډز او برید باید له شوې هوکړې سرغړاوی ونه بلل شي.

د بلخ په زارع د پکتیا په ځاځي اریوب او د ارزګان په چینارتو ولسوالۍ کې تېره شپه له ۱۲ بجو وروسته بریدونه او جګړې شوې چې په ارزګان کې د ځايي چارواکو په وینا دوه افغان پولیس وژل شوي دي.

د کورنیو چارو وزارت مرستیالې ویاندې مروې امینې نن له غرمې مخکې ازادي راډیو ته وویل چې د تاوتریخوالي د کمولو هوکړه تر ډیره عملي شوې او د کوم لوی سرغړاوي راپور یې نه دی ترلاسه کړی.

یوناما د ثبات او همپالنې ټیم له لوري د چارواکو ادلون بدلون سره مخالفت څرګند کړ

ارشیف

په افغانستان کې د ملګرو ملتونو مرستندویه ماموریت یا یوناما پر هغو پېښو سخته اندېښنه ښودلې چې دې سازمان د حکومتي چارواکو ادلون بدلون بللې دی.

یوناما نن په یوې اعلامیې کې ویلي، له زورواکۍ یا نورو غیرې قانوني لارو کار اخیستل، هغه هم په داسې حال کې چې د تاوتریخوالي د کمېدو هڅې روانې دي، د سولې لپاره د افغانانو هیله له خطر سره مخ کولی شي.

یوناما په دې خبرپاڼه کې پر ټولو لورو غږ کړی چې له زغم کار واخلي، اختلاف د خبرو له لارې حل کړي او د اساسي قانون نظم ته درناوی وکړي.

بل خوا په افغانستان کې د ناټو د ملکي استازي دفتر پر خپل ټویټر ویلي: ”دا ددې وخت دی چې د افغانستان سیاسي مشران خپلو کې سره د سولې د پروسې د ملاتړ لپاره یوځای شي.“

کابل کې د ناټو د ملکي استازي نیکولاس کی په حواله په دې ټویټ کې ویل شوي چې دا مهال ” ارمۍ، ډیالوګ او جوړجاړي ته اړتیا ده – نه یو اړخیزو اقداماتو ته.“

د ناټو د ملکي استازي په وینا د سولې لپاره اوسنۍ فرصت باید له لاسه ونه وځي.

یوناما او کابل کې د ناټو ملکي استازی دا څرګندونې وروسته له هغې کوي چې د شنبې په ورځ د پنجشیر والي د عبدالله عبدالله د افغانستان منتخب ولسمشر وباله او د هغه ملاتړ یې اعلان کړ.

په سیمه کې د ازادي راډیو خبریال وايي، د پنجشیر ځايي چارواکو ددې ولایت د غونډو په تالار کې د ولسمشر اشرف غني عکس ښکته او پر ځای یې د عبدالله عکس پورته کړ.

همدارنګه داسې راپورونه هم خپاره شوي چې د ثبات او همپالنې د ټیم ملاتړو د سرپل لپاره هم له خپل لورې نوی والي معرفي کړی دی.

د عبدالله عبدالله په مشرۍ د ثبات او همپالنې ټیم د انتخاباتو د خپلواک کمېسیون له خوا د ولسمشرۍ د انتخاباتو هغه وروستي نتایج نه دي منلي، چې اشرف غني یې ګټونکی اعلان کړی او د خپل حکومت د جوړیدو اعلان یې کړې.

دې ډلې همدارنګه مخکې ویلي وو چې یو شمیر ولایتونو ته به نوي والیان معرفي کړي.

پنجشیر والي د عبدالله عبدلله له دریځه ملاتړ وکړ

د افغانستان په نقشه کې د پنجشیر ولایت

د پنجشیر والي په یوه غونډه کې د عبدالله په مشرۍ د حکومت د جوړېدو ملاتړ وکړ.

د دې ولایت د غونډو په تالار کې راټولو شویو کسانو ته کمال الدین نظامي وویل، عبدالله د ولسمشرۍ په انتخاباتو کې د پنجشیر د خلکو په ۱۰۰ کې ۹۰ رایې ګټلي، او له همدې کبله یې پریکړه وکړه چې د نوموړې په مشرتابه د اعلان شوي حکومت ملاتړ وکړي.

په دې غونډه د پنجشیر ولایت د غونډو له تالار څخه د ولسمشر اشرف غني وروستي تصویر هم لرې او پر ځای یې د عبدالله عبدالله تصویر د منتخب ولسمشر په توګه وځړول شو.

دا په داسې حال کې ده چې نن په پروان ولایت کې هم د ثبات او همپالنې د ټیم سلګونو پلویانو د هغه څه خوښي ولمانځله چې دوی په انتخاباتو کې د عبدالله عبدالله بریالیتوب باله او ویې ویل چې ډیر زر به دې ولایت ته د ښاغلي عبدالله په مشرۍ د جوړیدونکي حکومت له خوا والي معرفي کړي.

د ښاغلي عبدالله په ملاتړ دا غونډې په داسې حال کې کېږي چې د انتخاباتو خپلواک کمېسیون د ولسمشرۍ د انتخاباتو وروستۍ پایلې اعلان کړې چې په کې ولسمشر اشرف غني د انتخاباتو ګټونکی اعلان شوی.

د عبدالله په مشرۍ انتخاباتي ډلې دا پایلې رد کړي.

خو په بلخ او هرات کې بیا د ولسمشرۍ ټاکنو د پایلو له اعلانه هرکلی شوی او د کمېسیون له لوري د بریالي اعلان شوي شخص ولسمشر غني ملاتړ کوي.

بلخ او هرات کې خلکو د ټاکنو پایلو له اعلانه هرکلی وکړ

په دې غونډو کې لسګونو ښځو هم ګډون کړی و

په بلخ او هرات ولایتونو کې سلګونو خلکو په جلا جلا غونډو کې د انتخاباتو د خپلواک کمېسیون له خوا د ولسمشرۍ د انتخاباتو د وروستیو پایلو د اعلان هرکلی وکړ.

په مزار شریف ښار کې د ازادي راډیو خبریال وايي، دغلته روضې ته څېرمه سلګونه کسان راټول شوي وو، او ویل یې انتخاباتو له لارې د رامنځته شوې سیاسي مشرتابه ملاتړ کوي.

بله خوا په هرات ولایت کې د ازادي راډیو خبریال وايي، دغلته د اصلاح غوښتونکو د ټولنیز سازمان له خوا د سلګونو خلکو په یوه جوړه شوې غونډه کې برخه والو د انتخاباتو د وروستیو پایلو د اعلان هرکلی او د ولسمشر غني د بریا ملاتړ وکړ.

دوی همدارنګه د ولسمشرۍ د څوکۍ له کاندیدانو یې وغوښتل چې د انتخاباتو وروستۍ پایلې ومني او یو بل کړکیچ ته د هېواد د تلو مخه ونیسي.

تر دې دوه ورځې مخکې په هرات کې د ولسمشرۍ د څوکۍ د بل کاندید عبدالله عبدالله پلویانو د څو دقیقو لپاره د نوموړي عکس د هرات د سیمه‌ییزې ادارې په ودانۍ وځړاوه او هغه یې منتخب ولسمشر یاد کړ.

هرات کې د کاراتې سیالیو پنځم پړاو پای ته رسېدلی

ارشیف

د کاراته کیوکوشین سیالیو پنځم پړاو پای ته ورسېد.

د هرات ولایت د بدني روزنې د ریاست فني او مسلکي مدیر ضیاالحق ضیا ازادي راډيو ته وویل په دې سیالیو کې له د کیوکوشین، تاتاکای او سوکیوکوشین سبکونو له ۲۰ کلپونو ۲۴۶ لوبغاړو ګډون کړی وه.

د ښاغلي ضیا په خبره، د دغو سیالیو د جوړول موخه د کاراتې د ازادو سبکونو د همغږۍ او په ۱۳۹۹ کال کې په ملي کچه د لوبو لپاره چمتولی دی.

ښاغلی ضیا وایي په دغو سیالیو کې چې د څلور عمري کټګوریو ۱۰ کلنو، ۱۵ کلنو، ۱۸ کلنو او د ۲۲ کلنو کسانو تر منځ وشوې د ۶۶ غوره لوبغاړو ته جامونه، مډالونه او ستاینلیکونه ورکړل شول.

کاپیسا کې ۳۵۰ ټنه جلغوزي راټول شوي

ارشیف

د کاپیسا ولایت د والي ویاند وایي، په دغه ولایت کې ۳۵۰ ټنه جلغوزي راټول شوي دي.

د کاپیسا ولایت د والي ویاند قیس قادري نن ازادي راډيو ته وویل چې دا اندازه جلغوزي سږکال د دغه ولایت له دریو ولسوالیو راټول شوي، چې د تېر کال په پرتله زیاتوالی ښيي.

د ښاغلي قادري په خبره، تېر کال په کاپیسا ولایت کې له د سږنۍ اندازې نیمايي جلغوزي راټول شوي وه او لامل یې هم په تګاب، نجراب او اله سای ولسوالیو کې نا امنۍ وې.

نوموړی وايي، دا مهال په کاپیسا ولایت کې د یو کیلو جلغوزيو بیه ۲۵۰۰ افغانۍ ده او په یو کال کې له دې درکه ۹۲۲ میلیونه افغانۍ عواید راټول شوي دي.

افغانستان کې د مالدارۍ برخې د پیاوړي کولو هڅې

د چرګانو فارم

د افغانستان د کرنې او مالدارۍ وزرات وايي، راتلونکي لمریز کال کې به په بېلابېلو ولایتونو کې د مالدارۍ په برخه کې پانګونه وشي او دا برخه پیاوړې کړي.

د دغه وزارت ویاند اکبر رستمي نن ازادي راډيو ته وویل چې په دې ترڅ کې به بې وزلو مېرمنو ته د کبانو، چرګانو او غواګانو فارمونه هم جوړ شي.

ښاغلی رستمي وایي په دې سره به د خلکو او هېواد اقتصاد لاپیاوړی شي.

هغه زیاته کړه: "د مالدارانو عواید به زیات او د هېواد اقتصاد به لا پیاوړی شي، د مالدارۍ سکټور مجموعي ارزښت ۷ میلیارده ډالر دی، هر څومره چې په دې برخه کې پانګوال او حکومت کار وکړي، د تولید په ځانګړې توګه د لبنیاتو کچه لوړه شي."

د ښاغلي رستمي په خبره، یوازې په ۱۳۹۷ کال کې د وچکالۍ له امله په دغه سکټور کې ځېنې ستونزې وې خو له تېر کال را پدېخوا د مالدارۍ په برخه کې ستونزې کمې شوي او عواید لوړ شوي دي.

خو نوموړي په دې اړه چې له دې درکه اوس عواید څومره دي او راتلونکی لمریز کال به د مالدارۍ په برخه کې څومره پانګونه وشي جزئیات ورنه کړل.

طالبانو ځینو سیمو کې مخابراتي شبکو فعالیت ته بیا اجازه ورکړې

د مخابراتي شبکو انتن

د افغانستان د مخابراتو او معلوماتي ټکنالوژۍ وزارت وایي چې په اکثر ولایتونو کې چې وسله‌والو طالبانو د مخابراتي شرکتونو فعالیت ته اجازه نه ورکوله، مخابراتي شبکې فعالې شوې دي.

د مخابراتو او معلوماتي ټکنالوژۍ وزارت یوه چارواکي، نقیب الله سېلاب پرون د فبرورۍ په ۲۱مه ، ازادي راډیوته وویل: "ځنې سیمې چې لوژیستکي او تخنیکي مشکل لري، پر هغوي کار کېږي څو ټول مخابراتي سایټونه فعال شي.

وسله‌والو طالبانو د افغانستان په ډېرو لرې پرتو سیمو کې مخابراتي شبکو ته د فعالیت محدوده اجازه ورکوله او د شپې له خوا په ډېرو سیمو کې شبکو کار نه کاوه.

د مخابراتي شبکو د فعالېدو خبر تر هغه وروسته خپور شو چې په افغانستان کې د تاوتریخوالي د کمېدو اوونۍ اعلان شوه.

په دې یوه اوونۍ کې به د افغانستان حکومت، هلته مېشت بهرني ځواکونه او وسله‌وال طالبان پر یوه او بل حملې نه کوي.

چارواکي: کاپیسا کې د داعش ۱۲ غړي وژل شوي

ارشیف

په کاپيسا ولايت کې چارواکو د داعش ډلې د ١٢ غړو د وژل کېدو راپور ورکړى، چې ٢ ښځې هم په کې شاملې دي.

د کاپيسا د پوليسو وياند عبدالشايق شورش نن ازادۍ راډيو ته وويل، د داعش ډلې دغه ١٢ وسله وال د نجراب ولسوالۍ په مربوطاتو کې د ملي امنيت په عملياتو کې وژل شوي دي.

شورش وايي دغه عمليات چې تېره شپه ناوخته پيل شوي وو، په نتيجه کې يې ٣ نور وسله وال ټپيان شوي او ٦ تنه يې نيول شوي دي.

نجراب د کاپيسا له ناامنو ولسواليو ګڼل کېږي، چې د دولت وسله وال مخالفان يې پر ځينو سيمو کنټرول لري.

د کرونا ویروس مخنیوي لپاره د روغتیا نړیوال سازمان نوې غوښتنه

د روغتیا د نړیوال سازمان مشر تیدروس غبریوسس

د روغتیا نړیوال سازمان پرون د فبرورۍ په ۲۱مه، خبرداری ورکړ چې که هېوادونه په چټکۍ سره متحد نه شي او عمل ونه کړي، د کرونا ویروس د خطر د مخنیوي موقع ښايي له منځه ولاړه شي.

د روغتیا د نړیوال سازمان مشر تیدروس غبریوسس پرون ویل چې لا هم د دې موقع شته چې د کرونا ویروس د لا زیاتې خپرېدا مخنیوی وشي خو دا موقع د کمېدو په حال کې ده.

د روغتیا نړیوال سازمان په داسې وخت کې دا خبرداری ورکړی چې په منځني ختیځ او جنوبي کوریا کې هم د کرونا ویروس د خپرېدو خبرونه خپاره شوي دي.

د روغتیا د نړیوال سازمان مشر وویل چې داسې هېوادونو لکه لبنان او کاناډا ته د دې وژونکي ویروس د رسېدو خبر دا معنی لري چې د ویروس د مخنیوی موقع د ختمېدو په حال کې ده.

کرونا ویروس د ډېسېمبر په میاشت کې د چین په ووهان ولایت کې پېدا او له هغه ځایه نورې نړۍ ته خپور شو.

د چین حکومت پرون وویل چې ۱۱۸ نور کسان په دې ویروس مړه شوي دي.

د ایران حکومت پرون د کرونا ویروس له امله د ۴ وګړو مړینه تائید کړه او ویې ویل چې ۱۸ تنه په دې ویروس اخته پېژندل شوي دي.

کورنیو چارو وزارت: د سرغړونې په صورت کې له طالبانو سره پرېکنده عمل کوو

د افغانستان امنیتي ځواکونه

د افغانستان د کورنیو چارو وزارت وايي چې امنیتي ځواکونه وضعیت څاري او که چېرې وسله‌وال طالبان د تاوتریخوالي د کمېدو له پرېکړې سرغړونه کوي، پر ضد به یې پرېکنده عمل کېږي.

په افغانستان کې د تاوتریخوالي د کمولو وخت د تېرې شپې له ۱۲ بجو پېل شو.

تر راتلونکې شنبې به د افغانستان امنیتي او دفاعي ځواکونه پر وسله‌والو طالبانو او وسله وال طالبان پر کورنیو او بهرنیو ځواکونو حملې نه کوي.

د افغانستان د کورنیو چارو وزارت مرستیالې ویاندې، مروې امینتي پرون ازادي راډیو ته وویل: "موږ د افغانستان له خلکو او خاورې د دفاع لپاره بشپړ تیاری لرو، امنیتي او دفاعي ځواکونو ته لازمې لارښوونې شوې او که چېرې طالبان پر خپله ژمنه عمل ونه کړي، امنیتي او دفاعي ځواکونه به یې قاطعانه پر ضد اقدام کوي."

د امریکا د بهرنیو چارو وزیر ویلي چې که چېرې د تاوتریخوالي د کمېدو پرېکړه په بریالتوب عملي شي، د فبرورۍ په ۲۹مه به له طالبانو سره د سولې موافقه لاسلیک کړي.

د موافقې د لاسلیک په ۱۰ ورځو کې به د افغانستان حکومت له طالبانو سره خبرې کوي چې یوه اساسي موضوع به یې دایمي اوربند وي.

یوناما په افغانستان کې د تاوتریخوالي د کمښت هرکلی وکړ

ارشیف

په افغانستان کې دملګرو ملتونو د استازي دفتر، یوناما د تاوتریخوالي د کمېدو د پرېکړې هرکلی کړی دی.

د یوناما په خبرپاڼه کې چې پرون، د فبرورۍ په ۲۱مه، خپره شوه ویل شوي چې دا یوه بې سارې موقع ده چې تل‌پاتې سولې ته لاره خلاصولای شي.

یوناما ویلي چې په افغانستان کې له ټولو خواوو سره کار کوي چې د تل پاتې سولې لپاره داسې یو بهیر پرمخ بوځي چې ښځې، ځوانان، اقلیتونه او ټول افغانان برخه په کې ولري.

یوناما په افغانستان کې پر ټولو خواوو بیا هم غږ کړی چې د تاوتریخوالي د کمولو لپاره چې د ملکي خلکو ژوند ته ګواښ پېښوي کار وکړي او دایمی اوربند او هر اړخیز سیاسي جوړ جاړي پر لور ګامونه پورته کړي.

ولسمشر غني: افغان ځواکونه دې پر طالبانو بریدونه بند کړي

د افغانستان ولسمشر محمد اشرف غني

د افغانستان ولسمشر پرون، د فبرورۍ په ۲۱مه په ټول هېواد کې امنیتي او د فاعي ځواکونو ته امر وکړ چې پر وسله‌والو طالبانو حملې بندې کړي.

د امریکا او وسله‌والو طالبانو ترمنځ د موافقې له مخې، د بېګا شپې له ۱۲ بجو د فبرورۍ تر ۲۹ مې به په ټول افغانستان کې تاوتریخوالی کم وي.

محمد اشرف غني پرون په ټلویزوني وینا کې وویل چې د افغانستان امنیتي ځواکونه به په دفاعي حالت کې وي.

محمد اشرف غني زیاته کړه: "اوس چې د سولې لپاره زمینه برابره شوې، له دې فرصته موږ د خپلو خلکو برحقه غوښتنه مطرح کړه چې طالبان اوربند ومني او مذاکرات پېل شي، خو دا چې د طالبانو ډلې د تاوتریخوالي په کموالي هوکړه وکړه، داهم اوربند او پایه دارې سولې ته د رسېدو لپاره یو مهم ګام دی."

د وسله‌والو طالبانو د نظامي چارو کمېسیون هم یو بیان خپور کړی او ویلي یې دي چې تر راتلونکې شنبې به د افغانستان پر امنیتي او دفاعي ځواکونو او امریکايي قواوو حملې نه کېږي.

په خبرپاڼه کې وسله‌والو طالبانو ته ویل شوي چې دافغانستان د حکومت تر کنټرول سیمو ته له تګه ډډه وکړي.

د امریکا د بهرنیو چارو وزیر مایک پامپیو وویل چې په یوه اوونۍ کې د تاوتریخوالي د کمولو پرېکړه په بریالیتوب عملي شوه، د فبرورۍ په ۲۹مه به امریکا له طالبانو سره د سولې هوکړه لاسلیک کړي.

پومپیو: د امریکا او طالبانو ترمنځ د سولې هوکړه د فبرورۍ په ۲۹ لاسلیکېږي

قطر کې د طالب او امریکايي مرکچي پلاوي ګډ انځور

د امريکا د متحدو ايالتونو د بهرنيو چارو وزير مايک پامپيو وايي د واشنګټن او طالبانو ترمنځ به د سولې هوکړه د فبرورۍ پر ٢٩مه لاسليک شي.

د افغانستان حکومت د دې هوکړې د لاسليک په درشل کې د يوې اوونۍ لپاره د تاوتریخوالي د کمولو پرېکړه کړې.

د ملي امنيت شورا وياند جاويد فيصل وايي، د تاوتریخوالي د کمولو پرېکړه د نن شپې له ١٢ بجو عملي کېږي.

هغه زیاته کړه: "افغان دولت له سولې څخه د اعظمي ګټې اخیستنې په هدف بشپړ چمتوالی نیولی، د یوې اونۍ لپاره چې وسله والو طالبانو د تاوتریخوالی د کموالي په نوم نومولې، موږ له خپل ادرس بشپړ تیاری لرو او په دې هیله چې دغه یوه اونۍ د دې باعث شي، چې د تل پاتې اوربند خاوندان شو او افغانستان کې تل پاتې سوله راشي دا نېټه د شپې له دولسو بجو پیلیږي."

د طالبانو يوې سرچينې د نوم نه ښوولو په شرط ازادۍ راډيو ته ويلي، د تاوتريخوالي د کمېدو په وخت کې به د افغان قواوو د شپې عمليات او هوايي حملې بندېږي، په بدل کې به طالبان هم لويې حملې نه کوي.

د طالبانو يوې سرچينې د نوم نه ښوولو په شرط نن ازادۍ راډيو ته وويل، که ښکېل اړخونه خپلې ژمنې پرځاى کړي، د تشدد کمول به سر له سبا عملي شي.

'کندهار کې ۱۸ وسله وال مخالفین وژل شوي'

ارشیف

د کندهار په ښورابک ولسوالۍ کې د دولت ١٨ مخالف وسله وال وژل شوي دي.

امنيه قومانداني وايي افغان ګډو ځواکونو دغه ګډ پوځي عمليات تېره شپه د ولسوالۍ په سرو څاهانو سيمه کې کړي دي.

د تلفاتو په اړه يې د دې قوماندانۍ وياند جمال ناصر بارکزي نن ازادۍ راډيو ته وويل: ”دښمن ته يې غاښ ماتوونکى ځواب ورکړى دى. په دغو عملياتو کې ١٨ وسلوال وژل شوي او ٧ تنه نور يې مرګوني ټپيان شوي دي.“

د دغو عملياتو په اړه وسلوالو طالبانو کومه تبصره نه ده کړې.

نور راوښيه

XS
SM
MD
LG