د لاسرسۍ وړ لېنکونه

تازه خبر
جمعه ۲ کب ۱۳۹۸ کابل ۰۳:۱۰

نړۍ

امریکا کې ۲ لوړپوړي چارواکي له دندو ګوښه شوي

ګوښه شوی چارواکی الکساندر وینډمن

د امریکا د متحد ایالتونو دوه جګپوړي چارواکي وروسته تر دې له دندو ګوښه شول چې دوی په سنا کې د ولسمشر د استیضاح د محکمې پرمهال شاهدي ورکړې وه.

الکساندر وینډمن چې د ولسمشر ټرمپ او د اوکراین د ولسمشر ترمنځ یې د ټیلیفوني مکالمې شاهدي ورکړې وه، پرون د امریکا د ملي امنیت په شورا کې د اوکراین د چارو د متخصص په توګه له دندې ګوښه شو.

د وینډمن مدافع وکیل وویل چې دا یو انتقام و چې واخیستل شو.

په ورته وخت کې ګورډن سونډلاند چې په اروپایي ټولنه کې د امریکا سفیر دی، ویلي دي چې ده ته ویل شوې دي چې بیرته امریکا ته ورشي.

ګورډن سولاند هم په استازیو جرګه کې د ټرمپ پرضد شهادت ورکړی و.

د امریکا په سنا کې د چهارشنبې په ورځ ولسمشر ټرمپ له لګیدلو تورونو برائت ترلاسه کړ.

د ورځې تازه خبرونه دلته ولولئ

رسنۍ: روسیه غواړي چې د امریکا په ولسمشرۍ ټاکنو کې لاسوهنه وکړي

ارشیف

امريکايي رسنيو راپور ورکړى چې استخباراتي چارواکو ويلي روسيه غواړي د امريکا د ٢٠٢٠ میلادي کال د ولسمشرۍ په ټاکنو کې لاسوهنه وکړي.

استخباراتي چارواکو د کانګرس غړو ته ويلي چې روسيه دا کار د ولسمشر ډونالډ ټرمپ له کمپاين سره د مرستې لپاره کوي.

نيويارک ټايمز او واشنګټن پوسټ ورځپاڼو او اسوسېشټېډ پريس خبري اژانس پرون په جلا- جلا راپورونو کې ويلي، چې دا خبردارى د فبرورۍ پر ديارلسمه د تړلو دروازو شاته په جلسه کې ورکړل شوى دى.

دغو سرچينو دا راپور د دوو چارواکو په حواله چې له دې جلسې خبر وو او د نوم نه ښوولو په شرط يې خبرې کړې دي.

د نيويارک ټايمز ورځپاڼې په حواله ولسمشر ټرمپ په دې جلسه خواشينى شوى او ويلي يې دي، چې ډيموکراتان به له دغو معلوماتو د ده پرضد استفاده وکړي.

د امريکا استخباراتي چارواکو ويلي چې روسيې د ٢٠١٦میلادي کال د ولسمشرۍ په ټاکنو کې هم د ټولنيزو شبکو د کمپاينونو په مرسته مداخله کړې وه.

د دوى په خبره روسيې د ډيموکرات ګوند د ايميلونو په هک کولو سره د ټرمپ د کمپاين له پياوړتيا سره مرسته کړې ده، څو د هغه د سيالې هېلري کلېنټن د ګټلو چانس زيانمن کړي.

ایران کې نن پارلماني ټاکنې کېږي

د ایران د نګهبان شورا په دې انتخاباتو کې د شاو او خوا ۹ زره کسانو د کاندیدو غوښتنه رد کړې ده.

ایرانیانو نن د دې هیواد د پارلمان د غړیو د ټاکلو لپاره رایې ورکول پیل کړي دي.

په دې انتخاباتو کې د ایران د پارلمان د ۲۹۰ څوکیو لپاره له ۱۶ زره زیاتو کسانو نومونه ثبت کړي وو خو د پیاوړې نګهبان شورا له خوا یوازې ۷۱۴۸ کاندیدان تایید شوې دي.

د ایران د نګهبان شورا په دې انتخاباتو کې د شاو او خوا ۹ زره کسانو د کاندیدو غوښتنه رد کړې ده.

د اوسني پارلمان ۹۰ تنه غړي هم د نګهبان شورا له خوا په ننیو انتخاباتو کې له کاندیدو محروم شوي دي.

د امریکا متحده ایالاتونو د ایران نګهبان شورا تورنه کړې چې په دې انتخاباتو کې یې د هغو کسانو د کاندیدو مخه نیولې چې د ایران د ستر مشر ایت الله علي خامنه يي د پالیسیو پیروي نه کوي.

متحده ایالتونو د ایران ددې انتخاباتو په درشل کې د احمد جنتي سربیره د انتخاباتو پر پنځو چارواکو بندیزونه لګولي دي. جنتي چې د ایران په رژیم کې ځواکمن ملا دی ددې هیواد د نګهبان شورا مشري کوي.

د ایران لپاره د امریکا ځانګړي استازی براین هوک ویلي دا بندیزونه په دې خاطر دي چې دې کسانو د یو شمیر کاندیدانو په مخنیوي د ایران د خلکو لپاره د ازادو او عادلانه انتخاباتو مخه نیولې.

د امریکا د بهرنیو چارو وزیر مایک پمپیو په یو بیان کې ویلي: ”د جنتي په څېر ملایانو په تیرو ۴۱ کلونو کې د ایران خلک د رایو ورکولو پر مهال له خپل ريښتیني انتخاب بې برخې کړي دي.“

د نوموړې په وینا د ایران خلک پرته له دې چې څنډې ته شي او یا په ډله ایزه توګه ووژل شي، د خپل نظر د څرګندولو حق لري.“

مسکو او دمشق د سوریې په جګړه کې نور هم ښکېل شوي

ارشیف

د روسیې د هوايي ځواک او ترکي ځواکونو په مرسته د سوریې د حکومتي ځواکونو او وسله والو یاغیانو ترمنځ جګړو مسکو او دمشق د سوریې په کورنۍ جګړه کې نور هم ښکېل کړي دي.

د سوریې د بشري حقونو د څارونکې ډلې د راپور له مخې پرون د فبروري په شلمه نېټه د سوریې شل دولتي سرتېري د یاغیانو تر ولکې لاندې سیمه کې ووژل شوي دي.

روسي او ترکي چارواکو تایید کړې چې د ادلیب په شمال لویدیځ کې په دې جګړه کې ۱۱ حکومت پلوي سرتېري، ۱۴ د ترکیې پلوي وسله وال او ۲ ترکي سرتېري وژل شوي.

په روسیه کې د جګړې د اړخونو د پخلاینې مرکز په یوه راپور کې ویلي چې په دې جګړو کې د روسیې د هوايي ځواک سو ۲۴ ډوله الوتکو هم برخه درلوده او ترکیې چې د وسله والو یاغیانو ملګرې ده، هم ځوابي حملې کړې دي.

د ترکیې دفاع وزارت ادعا کړې چې د سوریې ۵۰ دولتي سرتېري په دې حملو کې وژل شوي. دواړه خواوې ادعا کوي چې په پرونۍ جګړه کې یې یوبل ته ماتې ورکړې ده.

عراق او کویټ د ایرانيانو پر وړاندې دروازې وتړلې

د ایران او عراق ترمنځ سرحد

وروسته له دې چې په ایران کې د کرونا ویروس د مواردو راپور ورکړل شو عراق او کویټ له دې هېواد سره خپل سرحدونه بند کړل.

عراق له دې مخکې ایران ته الوتنې هم بندې کړې وې.

ایراني چارواکو پرون د فبروري په شلمه نېټه راپور ورکړ چې درې نور کسان په قم ښار کې په کرونا ویروس اخته شوي دي.

په قم کې له دې یوه ورځ مخکې دوه کسان- چې په کرونا ویروس اخته شوي وو، مړه شول.

د ایران دولتي خبري آژانس ایرنا راپور ورکړی چې په دې ښار کې د دیني مدرسو په ګډون ټول ښوونځي او پوهنتونونه تړلي دي.

د ایران د روغتیا وزارت پرون د چارشنبې په ورځ وویل، په دې ناروغۍ چې لومړی په ډېسېمبر میاشت کې د چین په مرکزي ولایت هوبای کې څرګنده شوه او د روغتیا نړیوال سازمان یې د COVID-19 په نوم یادوي پنځه کسان اخته شوي دي.

په دې کې هغه دوه زاړه کسان هم شامل دي چې د چارشنبې په ورځ د دې ناروغۍ له کبله مړه شول.

د کويت بندري چارواکو هم تر بلې خبرتيا پورې د خلکو پر تګ راتګ او له ايران څخه د خلکو پر ورننوتو محدوديت لګولى دى.

پومپیو له سعودي چارواکو سره پر ایران غږېدلی

د پومپیو او د سعودي چارواکو د کتنې انځور

د متحدایالاتو د بهرنیو چارو وزیر مایک پومپیو پرون پنجشنبې په ریاض کې د سعودي عربستان له پاچا ملک سلمان او ولیعهد سره په کتنه کې د سعودي د سیال- ایران په اړه خبرې وکړې.

پومپیو د شهزاده سلطان هوايي اډې ته چې د ایران پر وړاندې د مقابلې د پراخو هڅو په ترڅ کې څو زره امریکايي پوځیان پکې دېره دي هم ولاړ.

پومپیو له دې اډې څخه د لیدنې پرمهال وویل چې هلته دېره ځواکونه دفاعي خصوصیت لري او یوازې د ایران د احتمالي اقداماتو د مخنيوي لپاره هلته ځای پرځای شوي دي.

پومپیو د ملک سلمان له زوی ځواکمن ولیعهد محمد بن سلمان او د بهرنیو چارو له وزیر فیصل بن فرهان سره هم وکتل.

پومپیو ریاض ته له رسېدو مخکې ویلي و، چې دی به له سعودي چارواکو سره په سعودي عربستان کې د بشري حقونو پر اړوندو مسایلو او له هغې ډلې په دې هېواد کې د بندي امریکايي وګړو او د هغو امریکايانو په اړه هم خبرې وکړي چې له سعودي عربستان څخه ممنوع الخروج اعلان شوي دي.

چین: پر کرونا وایروس د اخته کېدونکو کسانو شمېر خورا کم شوی

د چین په یوه روغتون کې پر کرونا وایروس باندې د اخته کس درملنه

چین وايي چې پر کرونا وایروس د اخته کېدونکو کسانو شمېر خورا کم شوی او ورسره هیلې پیدا شوي چې دا ساري ناروغي ممکن کنټرول شي.

د چین د روغتیا ملي کمېسیون نن پنجشنبه اعلان وکړ چې ۶۲۸ نوې قضیې یې ثبت کړي.

دا کمېسیون همداراز وايي چې ۴۵ نورې قضیې یې د چین په نورو برخو کې ثبت کړې دي.

دا په نږدې یوه میاشت کې په هوبې ولایت او په ځانګړي ډول په ووهان ښار کې تر ټولو کم شمېر قضیې دي چې ثبت کېږي.

په مجموع کې تر اوسه پورې ۲ زره ۱۱۸ تنه په کرونا وایروس مړه شوي دي.

په چین کې تر ۷۴ زره ډېر کسان په کرونا وایروس اخته شوي.

همداراز په ۳۰ نورو هیوادونو کې سلګونه کسان په دې وایروس اخته شوي دي.

د ارمنستان مخکېنی ولسمشر سرژ سرکسیان محاکمه کېږي

د ارمنستان مخکېنی ولسمشر سرژ سرکسیان

د ارمنستان مخکېنی ولسمشر سرژ سرکسیان به د فبرورۍ په ۲۵مه، محاکمه شي.

هغه تورن دی چې په پراخه کچه‌یې په اداري فساد کې لاس درلود.

په ارمنستان کې د ځانګړو تحقیقاتو ادارې د ډسمبر په میاشت کې پر هغه تور پورې کړ چې تر یو میلیون ډالر زیاتې پیسې يې له هغې پانګې غلا کړي چې په ۲۰۱۳ میلادي کال کې بزګرانو ته د ډیزل تېل د سبسایډۍ لپاره ټوله شوې وه.

دې ځانګړې ادارې د سرکسیان د حکومت پنځه لوړ رتبه چارواکي هم په اداري فساد کې په لاس درلودلو تورن کړي دي.

خو ټولو تورونه رد کړي دي.

سرژ سرکسیان ویلي چې پر هغه لګېدلی تور سیاسي اړخ لري.

سرکسیان له ۲۰۰۸ تر ۲۰۱۸ میلادي کاله د ارمنستان ولسمشر و.

هغه د نومبر په میاشت کې په کروېشیا کې د اروپا د خلکو پارلمان ته په وینا کې، د پاشینیان حکومت تورن کړ چې ډموکراسي ته‌یې ګواښ پېښ کړی او سیاسي مخالفان ځپي.

په ایران کې په کرونا وایروس اخته کسان مړه شول

ارشیف، په چین کې په یوه لابراتوار کې د کرونا وایروس په اړه څېړنې.

د ایران په قُم ښار کې دوه وګړي چې په کرونا وایروس اخته پېژندل شوي وو، مړه شوي دي.

د ایران د روغتیا وزیر، کیانوش جهانپور پرون د فبورۍ په ۲۰مه، دا خبر تأیید کړ.

خو د قُم د طبي زده‌کړو د پوهنتون مشر تر دې پېښې یوه ورځ مخکې د ایران خبري اژانس مهر ته خبر ورکړی و چې دوه وګړي په کرونا وایروس اخته شوي وو.

ایراني چارواکو ویلي چې دواړو وګړو د تنفسي ناروغۍ له امله ساه ورکړې ده.

د ایران د روغتیا وزیر ایسنا خبري اژانس ته ویلي چې په هغه هېواد کې د کرونا وایروس مثبتې پېښې په وروستیو دوو ورځو کې ثبت شوې دي.

کیانوش جهانپور ویلي چې روغتیايي کارکوونکي قُم ته استول شوي او مشکوک کسان قرنطین شوي دي.

د ایران حکومت د هغه هېواد په نړیوالو هوايي ډګرونو کې ځانګړي معاینه کوي څو هغه هېواد ته په کرونا وایروس د اخته کسانو د ورتګ مخنیوی وشي او مثبتې پېښې یې وپېژندل شي.

د امریکا پوځ وايي ایران د یمن حوثي یاغیانو ته پرمختللې وسلې ورکوي

د امریکايي سمندري ځواکونو له‌خوا نیول شوې ایرانۍ وسلې.

د امریکا پوځ وایي، ایران په یمن کې د سعودي له ملاتړه برخه‌من حکومت په وړاندې د جګړې په ترڅ کې د یمن حوثي یاغیانو ته پرمختللې وسلې ورکوي.

دا خبره د امریکا په مرکزي قوماندانۍ کې په منځني ختیځ کې د امریکایي ځواکونو مسؤل تورن بیل اوربان پرون په پنتاګون کې خبریالانو ته وکړه.

هغه د یو شمېر ضبط شویو وسلو تصویرونه ښکاره کړل او ویې‌ویل چې دغه وسلې د حوثیانو لپاره له ایرانه راغلې دي.

اوربان وویل دا هغه وسلې دي چې د امریکا د سمندري ځواکونو نورماندي بېړۍ څه باندې یوه اوونۍ مخکې ضبط کړې دي. په دغو وسلو کې ۱۵۰ د روسیې رهبري کېدونکې د ټانک ضد توغندیو ایراني ساخت توغندي او له ځمکې هوا ته ایراني ساخت درې توغندي شامل دي.

دا دوهم وار دی چې په تفریحي وړو کښتیو کې چې بیرغونه نه‌لري، امریکایي ځواکونه دا ډول وسلې نیسي.

مخکې بله ورته پېښه کې د تېر کال په نومبر کې شوې وه، خو ایران دا ردوي چې ګواکې حوثي شیعه ملېشو ته وسلې ورکوي.

ټرمپ د پنټاګون د پالېسۍ مرستیال له دندې لیرې کړ

د امریکا متحده ایالاتو ولسمشر ډونالد ټرمپ

د امریکا متحده ایالاتو ولسمشر ډونالد ټرمپ ویلي چې د دفاع وزارت، پنټاګون د پالېسۍ د برخې لوړ رتبه چارواکی، جان روډ تر دوو کلونو وروسته له خپلې دندې لیرې شوی دی.

د امریکا په سنا کې د جمهور رئیس ډونالد ټرمپ د استیضاح تر بحث وروسته د ټرمپ د حکومت د لوړ رتبه چارواکو د لیرې کېدو لړۍ روانه ده.

د امریکا ولسمشر پرون د فبرورۍ په ۲۰مه، پر ټویټر له جان راده مننه وکړه چې امریکا ته‌یې ښه خدمت وکړ.

خو بلومبرګ خبري اژانس د پټو سرچینو په حواله ویلي چې جان روډ دا باور بایللی و چې د جمهور رئيس اجنډا سمه پر مخ بيولائ شي او له دې امله تر فشار لاندې و چې استعفا وکړي.

جان روډ په ۲۰۱۸ میلادي کال کې د امریکا د دفاع وزارت د پالېسۍ مرستیال ټاکل شوی و.

هغه د مې په میاشت کې کانګرس ته اشاره ورکړه چې ۲۵۰ میلیونه ډالر له اوکراین سره د پوځي مرستو لپاره بېلولائ شي.

دا مرستې باید اوکراین ته د دې لپاره چې په ختیځ کې د روسي پلوه بېلتون غوښتونکو پر ضد مبارزه وکړي، ورکړل شوې وی، خو وروسته د سپینې ماڼۍ په حکم له اوکراین سره دا مرسته وځنډېډه او د جمهور رئيس ډونالد ټرمپ د استیضاح د بحث د پیل یو اساسي دلیل همدا ټکی و.

جرمني کې وسله‌والو ۸ تنه په ډزو وژلي

په جرمني کې د پېښې سیمه.

د جرمني پولیس وایي، فرانکفورت ته نږدې د هاناو په ښار کې د ډزو په دوو پېښو کې اته تنه وژل شوي دي.

تر اوسه د دغو ډزو انګېزه نه‌ده څرګنده او امنیتي ځواکونه د هغو مشکوکو کسانو په لټه کې دي چې د پېښې له ځایه د یوه موټر په ذریعه تښتېدلي دي.

د سیمه‌ییزو رسنیو د راپورونو له مخې وسله‌والو د دې ښار په دوو رستورانتونو کې پر خلکو ډزې کړې دي.

په دې پېښه کې څو تنه نور ټپیان شوي دي.

د جرمني بیلډ ورځپاڼې ویلي چې حمله کوونکو لومړی په دې رستورانتونو کې پر خلکو ډزې وکړې او وروسته‌یې د ښار په یوه واټ خلک په نښه کړل.

لاوروف: هیله ده د افغانستان ولسمشرۍ ټاکنو پایله پر سولې اغېز ونه‌کړي

د روسیې د بهرنیو چارو وزیر سرګي لاوروف د افغانستان د ولسي جرګې له مشر میر رحمان رحماني سره د لیدنې پر مهال.

د روسیې د بهرنیو چارو وزیر سرګي لاوروف ویلي حکومت‌یې هیله لري چې په افغانستان کې د ولسمشرۍ ټاکنو د پایلو اعلان به د سولې لپاره په روانو هڅلو ځلو منفي اغېز نه‌کوي.

د افغانستان د جمهوري ریاست د ټاکنو پایلې د روانې اوونۍ د سې شنبې په ورځ اعلان شوې.

د روسیې د دولتي خبري اژانس، انترفکس په حواله، لاوروف پرون د فبرورۍ په ۲۰مه په مسکو کې د افغانستان د ولسي جرګې له مشر میر رحمان رحماني سره کتلي دي.

لاوروف رحماني ته ویلي: "موږ یو وار بیا جدي او تر ډېره حده له خوشبینۍ ډک معلومات ترلاسه کوو چې تمه ده بین‌الافغاني خبرې پیل شي او هغه ټولې مهمې مسئلې په پام کې به ونیول شي چې روسیه‌یې د ملاتړ لپاره تیاره ده."

د روسیې دبهرنیو چارو وزیر همداراز ویلي چې په افغانستان کې د وضعیت له نورمال کېدو سره به‌یې حکومت د هغو پروژو چې د پخواني شوروي په وخت کې جوړې شوې وې، د بیارغونې له لارې همکاري جاري وساتي.

لیونل مسي د ۲۰۱۹ میلادي کال د غوره ورزشکار جایزه ګټلې

لیونل مسي

د بارسلونا کلب او ارجنټاین هېواد د فوټبال ملي لوبډلې تکړه فوټبالر او لوبډلمشر لیونل مسي د ۲۰۱۹ میلادي کال د غوره ورزشکار جایزه وګټله.

دا جایزه د لاروس په نوم یادېږي.

لیونل مسي تېره شپه د دې جایزې له ترلاسه کولو وروسته رسنیو ته وویل خوشحاله دی چې د لومړي ځل لپاره دا جایزه‌یې ترلاسه کړه.

د لاروس دا جایزه تېر کال د نوواک جوکویچ په نوم یوه تکړه او نړیوال ټېنس لوبغاړي ته ورکړل شوې وه.

لیونل مسي تېر ۲۰۱۹ میلادي کال خورا په بریالیتوب سره پای ته ورساوه.

هغه په تېر کال کي وتوانېد چې شپږم د سرو زرو توپ او شپږم د سرو زرو بوټ ترلاسه کړي.

په چین کې د بند پاتې شویو اوکراینیانو د لېږد هڅې

چین کې اوکراینی وګړی

د چین په ووهان کې د بندو پاتې شویو اوکراینیانو لېږد ته چارتر شوې الوتکې له پلان شوي وخته درې ساعته ناوخته چین ته حرکت وکړ.

دا الوتکه چې کیف ته نږدې له هوایي ډګره پورته شوې، د قزاقستان په الماتا کې تر دمې وروسته د چین ووهان ښار ته ځي، کومه سیمه چې د کرونا وایروس سرچینه بلل کېږي.

په چین او یو شمېر نورو هېوادونو کې د کرونا وایروس مثبتې پېښې نږدې ۷۵ زرو ته ورسېدې او له دې امله د مړو شویو کسانو شمېر هم له ۲۰۰۰ واوښت.

د اوکراین تللې الوتکه به په ځایي وخت سبا سهار اته بجې بېرته کیف ته راستنه شي چې ۴۹ اوکراینیان او ۲۵ بهرني اتباع به له چین نه راوباسي.

دغه کسان به د ۱۴ ورځو لپاره په اوکراین کې قرنطین شي.

د ۵ چینايي رسنیو پر وړاندې د امریکا تازه اقدامات

ارشیف

د امریکا د بهرنیو چارو وزارت د چین پنځه مهمې دولتي رسنۍ چې امریکا کې هم دفترونه لري، د بهرني مأموریت په ډله کې شاملې کړې.

امریکا دغه رسنۍ د چین د کمونېست حزب د رهبري شویو تبلیغاتي بنسټونو په کتار کې راوستې دي.

د دې ګام له مخې، امریکا به دغو پنځو رسنیو سره د سفارتونو په توګه چلند کوي او رسنۍ اړې دي چې امریکا کې خپل ملکیتونه له بهرنیو چارو وزارت سره ثبت کړي.

د امریکا د بهرنیو چارو وزارت یوې سرچینې د نوم نه‌ښودو په شرط ویلي، دا رسنۍ د چین د دولت دي او د چارو کنټرول‌یې له هماغه ځایه کېږي.

خو د چین د بهرنیو چارو وزارت د امریکا د بهرنیو چارو له وزارته غوښتي چې د سړې جګړې د وخت فکرونه له سره لیرې کړي.

دوی ویلي، چین د امریکا دې ګام ته د غبرګون حق لري.

نور راوښيه

XS
SM
MD
LG