د لاسرسۍ وړ لېنکونه

تازه خبر
چهارشنبه ۳۰ سلواغه ۱۳۹۸ کابل ۰۲:۲۰

نړۍ

بحرین کې د پښتون ژغورنې غورځنګ یو غړی نیول شوی

د پاکستان او بحرین حکومتونو تر اوسه په دې اړه څه نه دي ویلي.

د پښتون ژغورنې غورځنګ یوه لوړپوړي غړي عبدالله ننګیال پر ټويټر پاڼه تایید کړې چې انټرپول د دوی یو فعاله غړی ګیلامان وزیرستانی په بحرین کې نیولی دی.

ده انتقاد کړی چې د پاکستان حکومت په بهر کې هم د پي ټي ایم غړي د نیولو لپاره هڅې کوي.

د پاکستان او بحرین حکومتونو تر اوسه په دې اړه څه نه دي ویلي.

په همدې حال کې د پښتون ژغورنې غورځنګ یو مسوول وايي چې د "جعلي قضیو" پر وړاندې به یې قانوني مبارزه روانه وي.

دا خبره د یاد غورځنګ یوه مشر او د پاکستان د پارلمان غړي محسن داوړ نن پر خپله ټويټر پاڼه لیکلې ده.

د پښتون ژغورنې غورځنګ مشر منظور پښتین او څو نور نږدې ملګري یې د پاکستان د قوانینو د ماتولو او پر ادارو د تور پوري کولو په قضیه کې په زندان کې شپې ورځې تېروي.

د ورځې تازه خبرونه دلته ولولئ

روس‌پلوه بېلتون غوښتونکو سره شخړه کې یو اوکراینی سرتېری وژل شوی

په دونیڅک کې اوکرایني سرتېري.

د اوکراين دفاع وزارت وايي د دغه هېواد په ختيځ کې يې له روس‌پلوه بېلتون غوښتونکو سره په تازه شخړه کې يو سرتېرى وژل شوى او ٤ نور ټپيان شوي دي.

وزارت په يوه اعلاميه کې ويلي چې شخړه نن سهار په لوهانسک کې زولوتې ښارګوټي ته څېرمه شوې ده.

د اوکراين ولسمشر ولادیمير زلنسکي دا تازه شخړې د سولې د پروسې د ګډوډولو هڅه بللې او ويلي يې دي، د ورځې ناوخته به د امنيت شورا يوه غونډه راوبولي.

د اوکراين په ختيځ کې د دونيڅک او لوهانسک ځينې سيمې چې دونباس‌يې بولي، د ٢٠١٤م کال له اپرېل راهيسې د روس‌پلوه بېلتون غوښتونکو په کنټرول کې دي.

د اوکراين په ختيځ کې په روانه شخړه کې تر ١٣٠٠٠ زيات کسان وژل شوي دي.

ایران کې د چاپېریال ساتنې ۸ فعالان په بند محکوم شول

په تهران کې محکمه.

د ايران قضائيه قوه وايي د چاپېريال ساتنې د اتو فعالانو په اړه‌يې د بند حکم صادر کړى دى.

په محکومو شويو کسانو کې هغه ايرانى وګړى شامل دى چې د امريکا تابعيت هم لري او امريکا ته په جاسوسۍ تورن دى.

دوه فعالان مراد طهباز او نيلوفر بياني ته د ۱۰ کلونو بند سزا اورول شوې ده. طهباز هغه ايرانى دى چې د امريکا او بريتانيا تابعيتونه هم لري.

طهباز او بياني ته امر شوى، هغه پيسې چې د ايراني چارواکو په ادعا دوى د امريکا له حکومته د خدماتو په بدل کې ترلاسه کړي، بېرته ورکړي.

د ايران د قضائيه قوې وياند غلام حسين اسماعيلي ويلي، د ايران استېناف محکمې نن د دغو قضيو په اړه خپل نهايي حکم صادر کړى دى.

ايران د خپلو وګړو دوهم او تر دې اضافي تابعيتونه په رسميت نه‌پېژني.

يعنې هغه ايراني وګړي چې په ايران کې د چارواکو له‌خوا نيول کېږي، له نورو هېوادونو چې دوى يې تابعيت لري، قونسلي خدمات نه‌شي ترلاسه کولاى.

اوکراين له چين نه کیف ته خپل وګړي لېږدوي

دوه تنه اوکرایني وګړي چې مخکې له چین څخه خپل هېواد ته راستانه شوي. بوریسپیل نړیوال هوايي میدان February 4, 2020

اوکراين تر يوې اوونۍ ځنډ وروسته نن په پام کې لري چې چين ته يوه الوتکه ولېږي چې خپل ۴۹ وګړي او ٢٥ بهرنيان را انتقال کړي.

په کيف کې د اوکراين د روغتيا وزير ويکتور لياشکو پرون وويل چې دغه مسافر به د هوبې ولايت له مرکز ووهان ښار څخه ولېږدول شي.

ووهان د کرونا وايروس د خپرېدو عمده مرکز دى.

چينايي چارواکي وايي په دې وايروس ١٨٨٦ نور کسان اخته شوي او ٩٨ نور کسان‌يې په نتيجه کې مړه شوي دي.

له دې سره د چين په قلمرو کې د کرونا وايروس له امله د مړو شمېر ١٩٠٠ او په دې وايروس د اخته کسانو تأييد شوې پېښې ٧٢ زره ٥٠٠ ته ورسېدې.

لياشکو ويلي يوازې هغه وګړي انتقالېږي چې د کرونا وايروس نښې په‌کې ونه‌ليدل شي.

ده وويل چې دغه کسان به اوکراين ته تر ستنېدو وروسته د ۱۴ ورځو لپاره قرنطين وي.

د اوکراين د روغتيا وزير ويلي، ضرورت نه‌شته چې خلک وارخطا شي يوازې به روغ کسان اوکراين ته راوستل کېږي.

په چين کې د اوکراين سفارت له تېرې سې شنبې د مسافرو د انتقال اعلان کړى و، خو په تېرو اوو ورځو کې دا پروسه دوه وارې وځنډېده.

د ژورنالېستانو خوندیتوب کمېټه د عزیز میمون وژونکو ته سزا غواړي

د پاکستان وژل شوی ژورنالېست عزیز میمون

د ژورنالېستانو د خونديتوب نړيوالې کمېټې له پاکستاني چارواکو غوښتنه وکړه چې د يوه ژورنالېست د وژنې عاملانو ته سزا ورکړي.

د عزيز ميمون مړى چې غاړه‌يې په مزو تړل شوې وه، تېره يکشنبه د سند ايالت په مهرپور سيمه کې وموندل شو.

په لومړنيو راپورونو کې ويل شوي وو چې دغه ژورنالېست اول خفک شوى، بيا يې مړى يوه کانال ته اچول شوى دی.

په نيويارک کې دېره د ژورنالېستانو د خونديتوب کمېټې په خپله پرونۍ اعلاميه کې ويلي په‌کار ده د دغه قتل په باب په چټکۍ عدالت تأمين شي.

د اعلاميې په حواله د پاکستان چارواکي په وار وار د خبريالانو په باب د عدالت په تأمين کې پاتې راغلي دي.

وژل شوي ژورنالېست کاوش ټلوېزيوني شبکې او کاوش ورځپاڼې ته کار کاوه چې په سندي ژبه خپرونې کوي.

د بې‌سرحده خبريالانو د ادارې په حواله، ميمون روان ميلادي کال لومړى ژورنالېست دى چې په پاکستان کې وژل کېږي.

دغه اداره وايي تېر کال څلور پاکستاني ژورنالېستان او بلاګ‌ګران د دوى د راپورونو په تړاو وژل شوي دي.

خېبر پښتونخوا کې چاودنې یو پولیس وژلی

د خېبر پښتونخوا نقشه

پاکستاني چارواکي وايي په خېبر پښتونخوا کې نن د سړک غاړې بم په چاودنه کې يو پوليس وژل شوى او ٣ نور ټپيان شوي دي.

ويل شوي چې د دې بمي چاودنې هدف د پوليسو يو موټر و.

دغه پوليس د دې لپاره ګمارل شوي وو چې په سيمه کې د ګوزڼ يا پوليو ضد واکسين د کمپاين امنیت وساتي.

چاودنه د خېبر پښتونخوا په کالوچي ښارګوټي کې شوې ده چې ډيورند کرښې ته څېرمه پروت دى.

که څه هم د دې چاودنې مسؤليت چا نه‌دى منلى، خو طالبان زيات وخت د ګوزڼ ضد واکسين پر کارکوونکو دا ډول حملې کوي.

دوى ادعا لري چې دغه واکسين د کوچنيانو د شنډولو لپاره د غرب يوه توطئه ده.

د پوليسو يوه افسر واحد خان رسنيو ته ويلي امنيتي ځواکونه په سيمه کې په حمله کوونکو پسې تلاشي کوي.

د هغه په خبره د چاودنې په وخت کې د واکسين د کمپاين کوم کارکوونکى له پوليسو سره مل نه‌و.

بېلېنګکټ: د چچنیايي بېلتون‌پالو مخکېنی مشر روسیې وژلی

د چچنیايي بېلتون‌پالو پخوانی قوماندان زلیم خان خانګوشویلي

د څېړنیز ژورنالیزم ډله 'بېلېنګکټ' وايي په برلین کې د چچنیايي بېلتون‌پالو د پخواني قوماندان زلیم خان خانګوشویلي د قتل په اړه د دوی څېړنې ښيي چې دا برید د روسیې د امنیتي خدماتو فدرال ادارې کړی دی.

بېلېنګکټ له یوې میاشتې څېړنو وروسته په یو راپور کې ویلي دي چې د دوی د موندنو له مخې د خانګوشویلي د قتل د تیاريو څارنه د روسیې د امنیتي خدماتو فدرال ادارې د افسرانو لپاره د خیریه ټولنې مشر ادوارد بیندرسکي کوله.

خانګوشویلي د ۲۰۱۹ کال د اګسټ په ۲۳مه نېټه په رڼا ورځ د برلین په یوه پارک کې ووژل شو او وروسته له دې چې د جرمني حکومت وویل د شواهدو پر بنسټ د دې وژنې امر یا د روسیې حکومت او یا د چچنیا سیمه‌ییزو چارواکو ورکړی، نو د برلین او مسکو په اړیکو کې کړکېچ راغی او دواړو هېوادونو د ځوابي اقداماتو په ترڅ کې د یو بل ډيپلوماتانو ته د وتلو امر وکړ.

مسکو د نوموړي په وژنه کې لاس لرل رد کړي دي، خو یو شمېر شنونکي د خانګوشویلي او د بریتانیا په سالزبري ښار کې د روسیې د استخباراتو پر پخواني غړي سرګي سکریپال د ۲۰۱۸ کال کیمیاوي حمله دواړه د روسیې د امنیتي خدماتو فدرال ادارې ​کار بولي.

له البانیا سره د نړیوالو مرستندویانو له یو میلیارد ډالرو زیاته ژمنه

د اروپایي کمېسیون مشره اورزولا فن دیرلاین

د اروپایي کمېسیون مشره وایي نړیوالو مرستندویانو له البانیا سره د تېر کال د قوي زلزلې د ورانیو د رغولو لپاره د یو میلیارد او ۲۵۰ میلیونه ډالرو مرستې ژمنه کړې ده.

اورزولا فن دیرلاین پرون په بروکسل کې د مرستندویه نړیوال کنفرانس په پای کې په یوه ټویټ کې دا د البانیا د خلکو لپاره ښه خبر وباله ویې‌ویل چې دغه مرستې له هغې اندازې چې دوی د البانیا د بیارغونې لپاره هدف ټاکلی و، زیاتې دي.

هغې وویل، د دغو مرستو ۴۳۳ میلیونه ډالره‌یې د اروپایي ټولنې غړو ژمنه کړې ده.

د تېر کال په نومبرکې په البانیا کې یوې زورورې زلزلې د دې هېواد د ادریاتیک سمندرګي د سواحلو ودانۍ په بشپړه توګه ونړولې چې له امله‌یې ۵۱ کسانو خپل ژوند له لاسه ورکړ او شاوخوا ۱۷ زره کسان هم بې‌کوره شول.

البانیا اټکل کړی و چې دغې زلزلې به څه باندې یو میلیارده ډالره زیان پېښ کړی وي.

روغتیا نړیوال سازمان په چین کې پر کرونا د اخته کسانو شمېر تأیید کړ

په چین کې په کرونا وایروس یو شمېر اخته کسان

د روغتیا نړیوال سازمان مشر په چین کې پر کرونا وایروس د اخته شویو کسانو شمېر چې پرون‌یې چینایي چارواکو خبر ورکړی و، تأیید کړ.

"تِدروز ادهانم گبریأسوس" دوشنبې په جنوا کې په یوه خبري غونډه کې وویل چې په چین کې ۷۰ زره او ۶۳۵ کسان په دغه وایروس اخته شوي او ۱۷۷۲ تنه‌یې هم له امله مړه شوي دي.

هغه له چین څخه بهر پر کرونا وایروس د اخته شویو کسانو د شمېر په اړه وویل: "له چين څخه بهر د روغتیا نړیوال سازمان په ۲۵ هېوادونو کې د دغه وایروس د ۶۹۴ مثبتو پېښو او د ۳ تنو د مړه کېدو راپورونه ترلاسه کړي دي."

په عین حال کې جاپاني چارواکو پرون اعلان وکړ چې په «ډایموند پرنسېس» تفریحي کښتۍ کې نور ۹۹ کسان پر کرونا وایروس اخته شوي چې په دې سره په دغه کښتۍ کې چې د جاپان په سواحلو کې ولاړه ده، دننه پر دغه وایروس د اخته کسانو شمېر ۴۵۴ ته رسېدلی دی.

د دغې کښتۍ سورلۍ او عمله په قرنطین کې دي.

کیف په ایران کې د غورځېدلې الوتکې د قربانیانو یاد څلی جوړ کړ

په کیف کې د قربانیانو لپاره جوړ شوی یاد څلی.

اوکرایني چارواکو د کیف په نړیوال هوایي ډګر کې د اوکراین د هوایي شرکت د را غورځېدلې الوتکې د قربانیانو په یاد له یوه یادګاري څلي پرده پورته کړه.

د دې شرکت بوینګ ۷۳۷ الوتکه د جنورۍ په ۸مه د تهران له هوایي ډګره له پورته کېدو څو دقیقې وروسته د ایران د ځواکونو پر توغندیو رانسکوره شوه او ټوله ۱۷۶ سورلۍ یې ووژل شوې.

ایراني چارواکو له دغې غمیزې درې ورځې وروسته دا ومنله چې ځواکونو یې سهواً دغه الوتکه په ډزو رانسکوره کړې ده.

د کیف په نړیوال هوایي ډګر کې د دغه یاد څلي د پرانیستلو په مراسمو کې د دې پېښې د قربانیانو د کورنیو غړو او د اوکراین د بهرنیو چارو وزیر او یو شمېر نورو جګپوړو چارواکو ګډون کړی و.

د افغانستان، بریتانیا، کاناډا، جرمني، ایران او سویډن چې اتباع‌یې په دې پېښه کې وژل شوي، استازو هم په دې مراسمو کې برخه اخیستې وه.

تر اوسه د دغې پېښې په اړه څېړنه نه‌ده بشپړه شوې او ایراني چارواکو هم له دې ډډه کړې چې د دغې الوتکې د معلوماتو د ثبتولو توربکس د څېړنې لپاره اوکراین یا کوم بل هېواد ته وسپاري.

هانګ کانګ کې غلو د تشناب کاغذ غلا کړي

په چین کې د تشناب کاغذ

په چړو سمبالو غلو په هانګ کانګ کې د تشناب کاغذ یوه لویه پنډه غلا کړې ده.

دا په داسې حال کې ده چې دغه ښار کې د کرونا وایروس د خپرېدو له وېرې په مارکېټونو کې د سودا اخیستل ستونزمن شوي او دکانداران هم نه‌شي کولای خلکو ته د اړتیا وړ توکي برابر کړي.

پولیسو ویلي، دغو درې غلو د ۲۶۰ ډالرو په ارزښت ۶۰۰ لولې کاغذ تشناب غلا کړي چې وروسته‌یې دوه کسان نیول شوي او غلا شوي توکي بېرته ترې اخیستل شوي دي.

په هانګ کانګ کې چې د کرونا وایروس ۵۷ مثبتې پېښې ثبت شوي، خلک هڅه کوي چې د اړتیا وړ توکي لکه کاغذ تشناب، وریجې، په ډبیو کې ساتل شوي خواړه، وچ توکي او د لاس وینځلو مایع زېرمه کړي.

دغلته د مارچ تر نیمایي ښوونځي رخصت شوي او اکثره مأمورین له کورونو کار کوي.

په کرونا وایروس د اخته کسانو شمېر له ۷۱ زرو واوښت

په چین کې په کرونا وایروس اخته کسان

د نړۍ په کچه په کرونا وایروس د اخته شویو کسانو شمېر له ۷۱ زرو نه واوښت.

یوازې په چین کې چې د دې وایروس سرچینه ده، ۷۰ زره کسان په دې ناروغۍ اخته شوي او تر اوسه ۱۷۷۰ کسان مړه شوي دي.

په چین کې وروستیو درېیو ورځو کې د کرونا وایروس خپرېدا کمه شوې وه، خو تېرو ۲۴ ساعتونو کې دا ګراف بېرته پورته تللی او دې موده کې د څه باندې دوه زره مثبتو پېښو راپور ورکول شوی.

بل‌خوا جاپاني چارواکو په یوه قرنطین شوې بېړۍ کې په کرونا وایروس د ۷۰ نورو کسانو د اخته کېدو راپور ورکړی دی.

په دې بېړۍ کې چې د جاپان ساحل ته نږدې قرنطین شوې ۳۷۰۰ عمله او مسافر سپاره دي. بېړۍ کې د کرونا د مثبتو پېښو شمېر ۳۵۵ ته ورسېد.

ټرمپ په ادلب کې پر روان تاوتریخوالي اردوغان ته اندېښنه ښودلې

د امریکا ولسمشر ډونالد ټرمپ او د ترکیې ولسمشر رجب طیب اردوغان.

د امریکا ولسمشر ډونالد ټرمپ له خپل ترکي سیال رجب طیب اردوغان سره د خبرو پر مهال د سوریې په ادلب کې پر روان تاوتریخوالي اندېښنه ښودلې.

سپینې ماڼۍ ویلي، دې ټیلیفوني خبرو کې ښاغلي ټرمپ پر روسیې غږ کړی چې د سوریې رژیم د (بې‌رحمیو) ملاتړ پای ته ورسوي.

ډونالد ټرمپ د سوریې نهه کلنې جګړې پای ته رسېدو لپاره په سیاسي حل‌لارې ټینګار کړی.

دا خبرې داسې مهال کېږي چې ټاکل شوې یوه ورځ وروسته انقره او مسکو بیا خپلو کې خبرې وکړي، ترکیه د سوریې رژیم د مخالفانو او روسیه بیا د بشارالاسد د حکومت پلوي کوي.

د روسیې په هوایي ملاتړ سوري ځواکونو په الیپو ولایت کې د پام وړ پرمختګ کړی او د مخالفانو د وروستي سنګر ډېرې برخې یې نیولې دي.

ترکیه چې د بشارالاسد د مخالفو اورپکو ملاتړ کوي، روسیې ته خبرداری ورکړی چې ادلب کې خپل بریدونه ودروي.

ترکي چارواکو ویلي، که د سوریې ځواکونه د همدې میاشتې تر پایه له ادلب ونه‌وځي، ترکیه‌یې ممکن د ایستو لپاره پوځي لاره خپله کړي.

سعودي عربستان کې اوس ښځې هم قطعې کوي

قطعې یا پرې

د لومړي ځل لپاره په سعودي عربستان کې ۲۰ تنو ښځو د قطعو یا پرو په لوبه کې برخه اخیستې.

هغوی له زرګونه نارینه‌وو سره لوبه کوي او هر چا چې وګټله د څه باندې نیم میلیون ډالرو جایزه ترلاسه کوي.

قطعه بازي د سعودي عربستان په دودیزه ټولنه کې یوازې سړیو کوله.

اوس ښځې هم کولای شي دا لوبه وکړي او خپل بخت وازمايي.

د اذربایجان پولیسو له ۱۰۰ زیات فعالان نیولي

د اذربایجان پولیس د مظاهره‌کونکو د نیولو په حال کې.

د اذربایجان پولیسو په باکو کې د مظاهرو پر مهال څه باندې ۱۰۰ تنه فعالان نیولي دي.

دا مظاهرې په اذربایجان کې د تېرې اوونۍ تر پارلماني ټاکنو وروسته پیل شوې.

په ټاکنو کې اکثرې څوکۍ حاکم ګوند ګټلې دي.

د اذربایجان پارلمان ۱۲۵ څوکۍ لري چې ۷۲یې د ولسمشر الهام علي‌اف وفاداره (نوي اذربایجان) ګوند ګټلي او پاتې څوکۍ هم وړو ګوندونو او خپلواکو کاندیدانو ترلاسه کړي دي.

د اپوزېسیون یوازې یوه کاندید په دې ټاکنو کې بریا خپله کړې ده.

په اذربایجان کې له کله چې دغه هېواد خپلواکي ګټلې د الهام علي‌اف په مشرۍ هېڅ انتخابات له درغلیو خالي نه‌دي بلل شوي او تل ترې د انتخاباتي څارونکو د وهل ټکولو راپورونه رارسېږي.

جاپان کې د قرنطین شوې کښتۍ په کرونا اخته سورلیو شمېر له ۳۵۰ واوښت

په چاپان کې قرنطین شوې کښتۍ

د جاپان په ساحلونو کې د ولاړې قرنطین شوې کښتۍ څو نورې سورلۍ هم په کرونا ویروس اخته شوي.

د امریکا د الرژۍ او انتاني ناروغیو د ملي انسټټیوټ رئیس انتوني فوچي پرون سي بي اس ته ویلي په کرونا ویروس په اخته شویو کسانو کې ۴۰ امریکایان شامل دي.

د دې قرنطین شوې کښتۍ له نږدې ۴۰۰۰ سورلیو ۴۰۰ امریکايي اتباع دي.

اخوا جاپاني چارواکو اعلان وکړ چې په دې کښتۍ کې په کرونا ویروس د اخته سورلیو شمېر له ۳۵۰ اوښتی دی.

کرونا ویروس د چین له ووهان ښاره له تېر ډسمبر پیل او په چټکۍ د نړۍ لسګونه هېوادونو ته وغځېد.

د چین چارواکو ویلي چې یکشنبه د دې ویروس له امله د وژل شویو کسانو شمېر ۱۶۶۵ ته رسېدلی او تر اوسه څه باندې ۶۸ زره کسان په دې ویروس اخته شوي دي.

نور راوښيه

XS
SM
MD
LG