د لاسرسۍ وړ لېنکونه

تازه خبر
جمعه ۱۷ زمری ۱۳۹۹ کابل ۰۲:۲۳

نړۍ

د جاپان په قرنطین شوې بیړۍ کې د کرونا ویروس ۴۱ پيښې ثبت شوي

صدراعظم شینزو ابي ویلي چې جاپان به د بلې بیړۍ بهرنیو مسافرو ته د ورتلو اجازه ورنه کړي.

جاپان نن په قرنطین شوې بیړۍ کې د کرونا ویروس ۴۱ نوې پيښې ثبت کړي.

په همدې حال کې په چین کې د دې ویروس له کبله د وژل شویو شمېر ۶۳۶ ته لوړ شو.

په ویروس اخته مړو شویو کې هغه ډاکتر هم شامل دی چې د دې ناروغۍ په اړه یې په لومړي سر کې خلکو ته خبرداری ورکړی و.

تر ۴۱ تائید شویو پيښو مخکې شل مسافر ټوکیو ته نږدې له دې بیړۍ و ایستل شول.

شا او خوا درې زره اووه سوه کسان په دې بیړۍ کې بند پاته دي.

صدراعظم شینزو ابي ویلي چې جاپان به د بلې بیړۍ بهرنیو مسافرو ته د ورتلو اجازه ورنه کړي، دا ځکه چې په یوه بله بیړۍ کې چې له هانګ کانګ څخه د جاپان پر لور روانه ده، په ویروس د احتمالي اخته شویو خبر ورغلی.

ابي ویلي چې دا پالیسي به سر له ننه عملي شي.

د ووهان په روغتون کې ډاکتر لي وین لیانګ هم په دې ویروس اخته شو او نن وختي مړ شو.

ده ویلي وو چې د ووهان پولیسو یوه میاشت مخکې نیولی و چې ولې د مرګوني ویروس په اړه اوازې خپروي.

د ورځې تازه خبرونه دلته ولولئ

د فرانسې ولسمشر بېروت ته ورسېد

د فرانسې ولسمشر امانوئل مکرون

د فرانسې ولسمشر امانوئل مکرون نن د لبنان پلازمېنې بېروت ته ورسېد.

نوموړي د وړمې ورځې د درنې چاودنې ځپل شویو لبنانیانو ته په وینا کې وویل چې هېواد به‌یې له لبنان سره خپلو همکاریو ته دوام ورکړي، خو د دې هېواد پر چارواکو یې ټینګار وکړ چې د فساد مخه ونیسي او اصلاحاتو ته زمینه برابره کړي.

د نویو راپورونو له مخې د بېروت د وړمې ورځې په چاودنه کې چې د بېروت بندر په یوه ډیپو کې د امونیم نایتریت کیمیاوي سرې له کبله شوې ده، د وژل شویو کسانو شمېر ۱۳۷ تنو ته رسېدلی، شاوخوا ۵،۰۰۰ کسان ټپیان دي او لسګونه کسان لا هم تري تم دي.

د رسنیو د راپور له مخې، شاوخوا ۲،۷۰۰ ټنه امونیم نایتریت چې د چاودنې وړتیا لري، احتمالاً کلونه مخکې دغه بندر کې له یوې بېړۍ نیول شوي وو او په ناخوندي ډول ساتل کېدل.

د بېروت حکومت وایي په دې پېښه کې ۳۰۰ زره کسان بې‌کوره شوي او د زیان کچه‌یې شاوخوا درې میلیارده ډالره ته رسېږي.

هڅې روانې دي چې د دې چاودنې اصلي علت پیدا شي.

پاکستان: افغان ځواکونو زموږ پر پوستو بریدونه کړي

یو پاکستانی سرتېری

پاکستان ادعا کوي چې افغان سرحدي پولیسو له ډیورند کرښې هاخوا د پاکستاني ځواکونو پر پوستو بریدونه کړي، یو پاکستاني سرتېری یې وژلی او دوه نور یې ټپیان کړي دي.

د پاکستان د بهرنیو چارو وزارت په یوې اعلامیه کې ویلي چې دا پېښه د چهارشنبې په ماسپښین د خیبر پښتونخوا د کوز دیر په بنشاهي سیمه کې شوې ده.

اعلامیه زیاتوي چې دا ډول اقدامات د دواړو هېوادونو ترمنځ همکاري او همغږي زیانمنوي.

تر اوسه افغان حکومت د دې ادعا په اړه څه نه‌دي ویلي، خو تر دې وړاندې افغان حکومت برعکس پاکستاني ځواکونه په ورته اقداماتو او د افغان حکومت د مخالفو وسله‌والو ‌ډلو په ملاتړ تورن کړي دي چې اسلام‌اباد رد کړي.

پومپیو: امریکا پر ایران د وسلو بندیز په اړه د ملګرو ملتونو غونډه بولي

د امریکا د بهرنیو چارو وزیر مایک پومپیو

د امریکا متحده ایالاتو د بهرنیو چارو وزیر وايي، واشنګټن په پام کې لري راروانه اوونۍ پر ایران د وسلو د بندیز د تمدید په اړه د ملګرو ملتونو د امنیت شورا د رای ورکولو غونډه راوبولي.

مایک پومپیو پرون خبریالانو ته وویل: "ځیني هېوادونه شته چې غواړي وسلې خرڅې کړي او دا کار به منځنی ختیځ بې‌ثباته کړي، اسرائیل او اروپا په خطر کې واچوي."

ښاغلي پومپیو وویل، د امریکا متحده ایالات به پرې نه‌ږدي چې داسې وشي.

امریکا پر ایران د وسلو د نړیوال بندیز د تمدید لپاره د پرېکړې مسوده ترتیب کړې ده.

په پام کې وه دغه بندیز د ملګرو ملتونو د مخکېني پرېکړه‌لیک له مخې د اکټوبر له ۱۸مې راکم شي.

پاکستان کې د لاریون پر مهال چاودنې لسګونه کسان ټپیان کړل

ارشیف

په پاکستان کې پر یوه لاریون د لاسي بمب د حملې په نتیجه کې په لسګونه کسان ټپیان شول.

دا په داسې حال کې ده چې په پاکستان کې د هندوستان له‌خوا د کشمیر د ځانګړي موقف د ختمولو د پرېکړې د کال د پوره کېدو په مناسبت لاریونونه وشول.

پرون په کراچۍ کې د یوې افراطي مذهبي ډلې له‌خوا په تنظیم شوي لاریون کې لږترلږه ۳۹ کسان ټپیان شول.

په حمله کې د ځینو ټپیانو وضعیت د اندېښنې وړ دی او مسؤلیت‌یې یوې بېلتون غوښتونکې ډلې، سندهو دېش انقلابي پوځ منلی، هغه ډله چې په وروستیو میاشتو کې ډېره فعاله شوې ده.

دا حمله په داسې حال کې وشوه چې پرون د پاکستان په عمده ښارونو کې لاریونونه وشول او سیاسي مشرانو، تجارتي اتحادیو، د وکیلانو شوراګانو او د بشري حقونو فعالانو په‌کې برخه واخیسته.

دوی د هند تر ولکې لاندې د کشمیر د ځانګړي موقف ختمول وغندل او دا یې د هندوستان ځپونکې پرېکړه بللې ده.

د ټېنس لوبو اتل: د کرونا وبا له کبله د ۲۰۲۰ کال لوبو کې برخه نه‌اخلم

د ټېنس لوبو اتل رافایل نادال

د ټېنس لوبو اتل رافایل نادال چې لا هم له خپلې اتلولۍ دفاع کوي وایي، د کرونا وبا له کبله د ټېنس د ۲۰۲۰ کال په پرانیستو لوبو کې برخه نه‌اخلي.

هغه د دغې سیالۍ پر مهالوېش انتقاد کړی او هغه‌یې وحشیانه جدول بللی دی.

ده پر خپل ټویټرپاڼه لیکلي، له ډېر فکر وروسته‌یې پرېکړه وکړه چې د امریکا په سږنۍ پرانیستې یا (US Open) کې ګډون نه‌کوي.

ده ویلي، د ټولې نړۍ په کچه د کرونا ویروس وضعیت پېچلی دی او د ده په ټکو لا هم دغه ویروس نه‌دی قابو شوی.

د نادال سیال راجر فیدرر لا له وړاندې سږنیو لوبو کې خپل ګډون رد کړی، خو د هغه د نه‌ګډون لامل د زنګون ټپ ښودل شوی.

بلاروس کې د وروستیو ولسمشریزو انتخاباتو ناظرین توقیف شوي

ارشیف

په بلاروس کې هغه خپلواک ناظرین توقیف شوي چې هلته‌یې د وروستیو ولسمشریزو انتخاباتو څارنه کوله.

دا وروسته تر دې چې د بلاروس د ټاکنو له قانون نه د بې‌شماره سرغړونو راپورونه مستند شول.

د رښتینو خلکو په نوم پر ټاکنو د څار یوه بنسټ پرون وویل، د دوی څارونکو د ټاکنو پر مهال په مېنسک او نورو ښارونو کې د ټاکنو په لومړۍ ورځ ۲،۰۵۶ سرغړونې ثبت کړې دي.

د بشري حقونو ملاتړو هم ویلي چې پولیسو دغلته پرون خپلواک څارونکي د لاسوهنې په تور نیولي دي.

په نیول شویو څارونکو کې یو شمېر مدني فعالان هم شته.

د ټاکنو څارونکو بیا ویلي، په مېنسک او نورو ښارونو کې د دوی څارونکو ته اجازه نه‌ده ورکول شوې چې د ټاکنو څارنه وکړي.

بېروت کې د چاودنې له امله د وژل شویو شمېر ۱۳۵ ته ورسېد

بېروت کې چاودنه

د لبنان په پلازمېنه بېروت کې د سې شنبې په ورځ د چاودنې له امله د وژل شویو کسانو شمېر ۱۳۵ تنو ته ورسېد.

د لبنان د روغتیا وزیر پرون چهارشنبه یوه محلي ټلوېزیون ته وویل، شااوخوا پنځه زره کسان په چاودنه کې ټپيان شوي او لسګونه نور تري تم دي.

چاودنه وړمه ورځ د بېروت بندر په یوه انبار خونه کې رامنځته شوې ده.

چارواکي وایي، چاودنه د امونیم نایتریت کیمیاوي سرې له کبله رامنځته شوې، دا مواد له څو کلونو راهیسې په ناخوندي ډول بندر ته نږدې یوه ګدام کې ساتل کېدل.

د رسنیو د راپور له مخې، دغه اندازه امونیم نایتریت چې د چاودنې وړتیا لري، احتمالاً کلونه مخکې دغه بندر کې له یوې بېړۍ نیول شوي وو.

د لبنان حکومت پرون د بېروت بندر چارواکي په کورونو کې نظربند کړل.

'بېروت کې چاودېدلي امونیم نایتریت له یوې ضبط شوې کښتۍ راښکته شوي و'

بېروت کې شوې چاودنه

رسنۍ وايي هغه امونیم نایتریت سره چې د بېروت د بندر په ګودام کې تېره شپه وچاودېدل، احتمالاً کلونه وړاندې له یوې ضبط شوې بېړۍ راښکته شوي وه.

راپورونه وايي چې روسی سوداګر ایکور ګریچشینکین د دې بېړۍ خاوند و.

د لبنان د کورنیو چارو وزیر محمد فهیم یوه ځايي ټلوېزیون ته وویل چې په چاودنه کې تر ۱۰۰ ډېر کسان وژل شوي او زرګونه نور ژوبل دي.

ظاهراً دا پېښه د ۲ زره ۷۰۰ ټنه امونیم نایتریت سرې د چاودنې په نتیجه کې شوې ده.

فهیمي همداراز وویل، دا خطرناکه چاودېدونکې سره په ۲۰۱۴ م کال له یوې باري بېړۍ څخه تر ضبط کېدو وروسته د ساحلي بندر په ګودام کې ساتل کېده.

په همدې منځ کې د لبنان صدراعظم حسن دیاب وویل، شاوخوا ۲ زره ۷۰۰ ټنه امونیم نایتریت په ګودام کې له ۶ کلونو راهیسې په داسې حالت کې ساتل کېده چې د خوندیتوب لپاره‌یې تدابیر په پام کې نه‌و نیول شوي.

د ایران خراسان رضوي ولایت کې د ښځو پر بایسکل چلولو بندیز ولګېد

په ایران کې د ښځو بایسکل چلول

د ایران د خراسان رضوي په شمال ختیځ ولایت کې په عامو ځایونو کې د ښځو پر بایسکل چلولو وروسته له دې بندیز ولګول شو چې د دغه ولایت د امر باالمعروف کمېټې په دې اړه پرېکړه وکړه.

د دې ولایت په مرکز مشهد کې د شیعه‌ګانو د اتم امام زیارت موقعیت لري.

د دغه ښار د جمعې د لمانځه امام ایت‌الله احمد علم‌المهدي چې په سختدریځۍ مشهور دی، پخوا لا د ښځو له بایسکل چلولو سره مخالفت کړی و.

امریکا: په لیبیا کې د تاوتریخوالو پر زیاتېدو سخت خواشیني یو

ارشیف، لیبیا

امریکا وايي، په لیبیا کې د تاوتریخوالو پر زیاتېدو سخته خواشینې ده او له بهرنیو قدرتونو غواړي چې په دغه هېواد کې خپله نیابتي جګړه پای ته ورسوي.

د سپینې ماڼۍ د ملي امنیت سلاکار رابرت اوبراین پرون په یوه بیان کې ویلي چې امریکا په لیبیا کې د ټولو خواوو له لوري د ملېشو او خصوصي قراردادي ځواکونو د کارولو په شمول د بهرنیانو د پوځي لاسوهنې کلکه مخالفه ده.

د امریکا پوځ مسکو تورن کړی چې په لیبیا کې د نفوذ لپاره دغه هېواد ته وسلې او وسله‌وال لېږي.

روسیه د لیبیا په ختیځ کې د خلیفه حفتر د ملي پوځ ملاتړ کوي چې د ملګرو ملتونو د يېژندل شوي حکومت پر ضد جنګېږي.

جمو او کشمیر په اړه د هند د تېر کال پرېکړه؛ پاکستان کې لاریونونه وشول

د پاکستان ولسمشر عارف علوي لاریونوالو ته د وینا پر مهال.

د هند له لوري د جمو او کشمیر د ځانګړي امتیاز د پای ته رسولو او له نوي ډېلي سره د دې لانجمنې سیمې د یوځای کولو له لومړۍ کالیزې سره په یو وخت د پاکستان په لویو ښارونو کې نن زرګونه کسانو د اعتراض په دود لاریونونه وکړل.

په دغو لاریونونو کې سیاستوالو، مدافع وکیلانو، د بشري حقونو فعالانو او د سوداګرۍ اتحادیو غړو د هند اقدام ځپونکی وباله او هغه‌یې وغانده.

د پاکستان ولسمشر عارف علوي او د بهرنیو چارو وزیر شاه محمود قریشي تر ټولو په لوی لاریون کې چې په پلازمېنه اسلام‌اباد کې وشو، ګډون وکړ.

د دې لاریون ګډونوالو د هند پر ضد شعارونه ورکړل او پر نړیوالو قدرتونو یې غږ وکړ چې د هند تر کنټرول لاندې کشمیر د اوسېدونکو له لوري په دې قضیه کې مداخله وکړي.

د هند حکومت د تېر کال په همدې ورځ اعلان وکړ چې د خپلې خوا د کشمیر حقوقي دریځ بدلوي.

د پاکستان نوې نقشه؛ د هند کنټرول لاندې کشمیر د پاکستان خاوره یاده شوې

ارشیف

د پاکستان حکومت د دغه هېواد یوه نوې سیاسي نقشه ترتیب کړې چې په‌کې د هند تر کنټرول لاندې کشمیر د پاکستان خاوره یاده شوې ده.

د پاکستان صدراعظم عمران خان سې شنبه د بهرنیو چارو له وزیر شاه محمود قریشي سره په لیدنه کې خلکو ته ویلي چې نوې ملي نقشه د کابینې له‌خوا تصویب شوې او له دې وروسته به د یاد هېواد نوې رسمي نقشه وګرځي.

دا کار د جمو کشمیر د نیمه کورواکۍ د ورختمولو په اړه د هند د حکومت د پرېکړې د یو کلن کېدو په مناسبت شوی.

هند د ۲۰۱۹ کال د اګسټ په پنځمه د جمو کشمیر سیمې او لداخ سره جلا کړې او واک‌یې نوې ډهلي ته وسپاره.

دا کار په کور دننه د کشمیر د خلکو او د هند د مخالفو ګوندونو له غبرګون او په بهر کې هم د پاکستان، بنګله‌دېش او یو شمېر نورو هېوادونو له کلک مخالفت سره مخ شو.

هندوستان د پاکستان له‌خوا د یوې نوې سیاسي نقشې ترتیب یو بې‌ځایه کار بللی دی.

هندي چارواکو ویلي د پاکستان دا کار نه قانوني اعتبار لري او نه نړیوالو ته د منلو وړ دی.

د ایران پولیس: ۱۹ تنه د طالبانو د بیرغ ښکاره کولو په خاطر ونیول شول

د طالبانو بیرغ

د ایران پولیس وايي چې وروسته له هغه‌یې ۱۹ کسان نیولي چې د تهران یوه پارک ته‌يې له ځان سره د طالبانو بیرغ وړی وو.

د تهران د پولیسو رئیس حسین رحیمي ایسنا خبري اژانس ته وویل، دا کسان د جمعې په ورځ ملت پارک ته د اختر په ورځ د طالبانو له بیرغ سره تللي وو.

ده وویل: "له بده مرغه یو شمېر کسانو په دې ځای کې د طالبانو د بیرغ ښکارولو اقدام وکړ."

رحیمي وویل چې افغانان هر کال د اختر مراسم په دې پارک کې لمانځي.

د ایران پولیسو ویلي چې له نیول شویو څخه پنځو کسانو بیرغونه جوړ کړي وو او عکسونه او وېډيوګانې يې رسنیو ته ایستلې وې.

ایران پاته کسان غیر قانوني کډوال یاد کړي او په وینا یې له ایرانه د ایستل کېدو په حال کې دي.

ملګري ملتونه: شمالي کوریا د اټومي وسلې د جوړولو پروګرام پراخ کړی

ارشیف

د ملګرو ملتونو د یوه نوي پټ راپور له مخې شمالي کوریا د اټومي وسلې د جوړولو لپاره خپل پروګرام پراخ کړی او ځینې هېوادونه باور لري چې پیونګ یانګ کوچنۍ اټومي وسلې جوړې کړې دي.

د دې راپور له مخې چې د څېړونکو یوې خپلواکې ډلې برابر کړی او په موقتي ډول پټ یا محرم بلل شوی، شمالي کوریا احتمالا داسې واړه اټومي بمونه جوړ کړي چې د بالستیک توغندیو په سروکو کې ځایېدای شي.

رویټرز او د جرمني خبري آژانسونو چې لومړی یې د دې څېړنې خبر ورکړی وايي، دا راپور پرون د ملګرو ملتونو امنیت شورا ته چې پنځلس غړي لري وړاندې شوی او څېړنې یې د دې شورا د یوه غړي هېواد د اطلاعاتو پر بنسټ ولاړې دي.

شمالي کوریا تر اوسه شپږ اټومي ازموینې کړي چې وروستۍ یې د ۲۰۱۷ کال په سېپټېمبر میاشت کې وه.

ملګرو ملتونو له ۲۰۰۶میلادي کال راهیسې د اټومي فعالیتونو په خاطر پر شمالي کوریا څو ځلې بندیزونه لګولي دي.

ټرمپ: ممکن افغانستان کې نږدې ۵۰۰۰ پورې خپل سرتېري راکم کړو

ډونالډ ټرمپ

د امریکا د متحدو ایالتونو ولسمشر وايي احتمالاً تر نومبر میاشتې پورې به په افغانستان کې د امریکايي ځواکونو شمېر د څلوروزرو او پنځو زرو ترمنځ شمېر ته راکم شي.

ډونالډ ټرمپ له اکسیوز خبري شبکې سره په هغه مرکه چې پرون له ایچ. بي. او خپره شوه وویل: "په لنډه موده کې به زموږ د پوځیانو شمېر ۸۰۰۰ ته راکم شي، بیا به دا شمېر څلورو زرو ته راکم شي، دا مهال پر دې موضوع په خبرو اترو بوخت یو، موږ د ۱۹ کلونو لپاره په افغانستان کې وو."

کله چې خبریال پوښتنه وکړه، په نومبر میاشت کې چې په امریکا کې د ولسمشرۍ ټاکنې کېږي، په افغانستان کې د امریکايي پوځیانو شمېر به دقیقاً څو ته راکم شي؟

ولسمشر ټرمپ وویل، چې احتمالاً دغه شمېر به د ۴۰۰۰ او ۵۰۰۰ ترمنځ ته راکم شوی وي.

په افغانستان کې د امریکايي پوځیانو شمېر مخکې ۱۲۰۰۰ ښوول شوی و، خو د امریکا او طالبانو ترمنځ د موافقې له مخې په افغانستان کې د امریکايي پوځیانو شمېر په کمېدو دی.

یوه امریکايي جنرال په جون میاشت کې ویلي وو، د امریکايي پوځیانو شمېر ۸۶۰۰ ته راکم شوی دی.

نور راوښيه

XS
SM
MD
LG