د لاسرسۍ وړ لېنکونه

تازه خبر
جمعه ۹ کب ۱۳۹۸ کابل ۰۵:۱۸

نړۍ

عراق کې د اعتراض کوونکو پر وړاندې تاوتریخوالو امریکا غوسه کړې

ارشیف

د امريکا د متحدو ايالتونو د بهرنيو چارو وزير وايي واشنګټن په عراق کې د مظاهره چيانو په وړاندې د شوي تاوتريخوالي له کبله په غوسه دى.

که څه هم په لومړيو کې پاپوليست الصدر د دغو مظاهرو ملاتړ کاوه، خو په وروستيو څو ورځو کې يې له دغو مظاهره چيانو خپله لار جلا کړې او محمد توفيق علوي يې تاييد کړى، چې په وروستيو کې د عراق د صدراعظم په توګه ټاکل شوى دى.

مقتصدا الصدر مخکې ويلي وو، د عراق په چارو کې د هر ډول بهرنۍ مداخلې مخالفت کوي او ځان يې په وروستيو مياشتو کې هغو ګوندونو ته ډېر نږدې کړ، چې ايران يې ملاتړ کوي.

ايران د عراق پر ډېرى شيعه وګړو پراخ نفوذ لري او په عراق کې د پياوړو ملېشه ډلو ملاتړ کوي.

د عراق په صدر ښار کې دا د خپل ډول له مخې وروستۍ خونړۍ شخړې دي.

د حکومت ضد مظاهره چيان له څو مياشتو راهيسې په عراق کې د بهرنۍ مداخلې پاى ته رسېدل غواړي.

دوى د هغه څه چې له قدرت څخه د بانفوذه کسانو ليرې کولو هڅه ده، پاى ته رسېدل هم غوښتي دي.

د امريکا د بهرنيو چارو وزير مايک پامپيو په اعلاميه کې ويلي د تېر کال له اکتوبر مياشتې راهيسې سوله ييز مظاهره چيان لارو کوڅو ته راوتلي او په حکومت کې د اصلاحاتو غوښتنه لري.

د پامپيو په خبره، دغه مظاهره چيان ګواښل شوي، سخت تاوتريخوالى او سختې حملې ورباندې شوې دي.

پامپيو په خپله اعلاميه کې ويلي چې د دغو مظاهرو پر مهال تر ٦٠٠ زيات کسان وژل شوي او په زرګونو نور ټپيان شوي دي.

د امريکا د بهرنيو چارو وزير د عراق له حکومته غوښتنه کړې چې په نجف او نورو ښارونو کې ژر تر ژره له ملېشه وو، اوباشانو او نورو ډلو سره حساب کتاب وکړي، چې د عراق د هغو وګړو په وړاندې يې حملې کړي، چې د خپل حق لپاره سوله ييزې مظاهرې کوي.

د ورځې تازه خبرونه دلته ولولئ

په بلاروس او لیتوانیا کې د کرونا وایروس نوې مثبتې پېښې

ارشیف

په بلاروس کې د کرونا وایروس لومړۍ مثبته پېښه ثبت شوه.

د بلاروس حکومت پرون د فبرورۍ په ۲۷مه وویل چې په کرونا وایروس اخته سړی یو ایرانی محصل دی او تېره اوونۍ له ایرانه ورغلی و.

د بلاروس روغتیايي چارواکو ویلي چې ناروغ محصل قرنطین شوی او د رغېدو په حال کې دی.

په لیتوانیا کې هم یوه ښځه په کرونا وایروس اخته پېژندل شوې ده.

د لیتوانیا چارواکو ویلي چې هغه په وروستیو کې ایټالیا ته په سفر تللې وه.

په ايټالیا کې د کرونا وایروس د نورو اروپايي هېوادونو په پرتله ډېر خپور شوی دی.

ایټالوي چارواکو ویلي چې د کرونا وایروس له امله تر اوسه ۱۷ تنه مړه شوي دي.

په ایټالیا کې په کرونا وایروس د اخته وګړو شمېر ۳۵۰ ښودل شوی دی.

قریشي: سبا د افغانستان او افغانانو لپاره یوه لویه ورځ ده

د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر شاه محمود قریشي د طالبانو او امریکا ترمنځ د سولې د توافق لاسلیک په افغانستان کې د سولې لپاره مثبت ګام بللی دی.

امریکا او طالبان به سبا د فبرورۍ په ۲۹مه، د سولې موافقه لاسلیک کړي.

شاه محمود قریشي هم په دې اړه په مراسمو کې د ګډون لپاره په دوحه کې دی.

هغه پر فېس‌بوک په وېډیويي پیغام کې ویلي: "سبا د افغانستان او افغانانو لپاره یوه لویه ورځ ده. له دې سره به افغانستان د سولې او روغې پر لور حرکت پیل کړي او بین‌الافغاني خبروته به لار خلاصه کړي."

د افغانستان د سولې لپاره په روانو هڅو کې پاکستان مکرراً د همکارۍ ادعا کړې، خو واشنګټن په ۲۰۱۹ میلادي کال کې یو راپور خپور کړ او ویې‌ویل چې د حقاني شبکه او د طالبانو رهبران په پاکستان کې امن ځایونه لري.

په ادلب کې بمبار ۳۳ ترکي سرتېري وژلي

په سوریه کې مېشت ترکي پوځیان

د ترکیې حکومت ویلي چې ۳۳ عسکر یې د سوریې د حکومتي ځواکونو په بمباري کې وژل شوي دي.

د ترکیې عسکر د سوریې په شمالي ښار، ادلب کې وژل شوي دي.

له دې امله د انقرې او دمشق ترمنځ کړکېچ زیات شوی دی.

د سوریې پر پوله د ترکیې دهتاي ولایت والي رحمي دوګان نن د فبرورۍ په ۲۸مه، وویل چې ۳۲ زخمي عسکر د درملنې لپاره روغتون ته وروړل شوي دي.

د ترکیې ولسمشر رجب طیب اردوغان ویلي چې د حملې ځواب به ورګړي.

اردوغان ویلي چې د سوریې د حکومت پر پوځي اهدافو به ځمکنۍ او هوايي حملې جاري وي.

په سوریه کې د جګړې د څارنې یوې ادارې ویلي چې د ترکیې له لوري په حملو کې د سوریې ۱۶ عسکر وژل شوي دي.

ترکي ځواکونو په ادلب کې انتقامي بریدونه کړي

ارشیف، په سوریه کې بریدونه.

ترکیه وايي، د روسیې ملاتړ لرونکي د سوریې پر حکومتي ځواکونو یې وروسته له هغې انتقامي بریدونه کړي چې په ادلب کې په هوايي بریدونو کې لږترلږه ۳۳ ترکي سرتېري ووژل شول.

ناټو د دې کار له کبله دمشق او مسکو غندلي او او دا یې په سیمه کې له توپیر پرته ړنده بمباري بللې ده.

د ترکیې د ولسمشر رجب طیب اردوغان د ارتباطاتو مسؤل فحریتین التون (Fahrettin Altun) د پنجشنبې په ورځ په یو بیان کې ویلي "د سوریې د رژیم پېژندل شوي اهداف له ځمکې او هوا تر بریدونو لاندې راغلي او دا به دوام وکړي."

التون ویلي "موږ پر نړیوالې ټولنې غږ کوو چې د سوریې حکومت د بشریت په وړاندې له جنایاتو راوګرځوي."

د ترکیې د د انادولو خبري اژانس ویلي، د دې هېواد د بهرنیو چارو د وزیر مولود چاووش اوغلو له دې بریدونو وروسته د ناټو له عمومي منشي ینس سټولټنبرګ سره د ټیلیفون له لارې خبرې کړې دي.

د ناټو یو ویاند ویلي چې په دې ټیلیفوني خبرو کې سټولټنبرګ دا په ادلب ولایت کې د سوریې د رژیم او روسي ملاتړو له‌خوا یې بې‌توپیره (ړنده) هوايي بمباري بللې او ترې یې غوښتي چې سمدستي دې دا عملیات ودروي، نړیوال قانون ته دې درناوی وکړي او د سوله‌ییزې حل‌لارې لپاره دې بېرته د ملګرو ملتونو هڅو سره یوځای شي.

د ناټو د ویاند په وینا، سټولټنبرګ په ټولو خواوو غږ کړی چې د دې خطرناک وضعیت ترینګلتیا دې راکمه کړي او په سیمه کې دې لا دمخه وېروونکی بشري وضعیت نور نه‌خرابوي.

امریکا: ایران ته د بشري مرستو د استولو کانال فعال شوی

د امریکا د خزانې وزیر سټیفن منوچین

د امریکا متحده ایالات وايي، په سویس کې رامنځته شوی د بشري سوداګرۍ نوی کانال په بشپړه توګه فعال شوی.

دا چینل کمپنیو ته اجازه ورکوي چې ایران ته خواړه، درمل او نور حیاتي مواد پرته له دې چې د امریکا له بندیزونو سرغړاوی وکړي، واستوي.

د امریکا د خزانې وزیر سټیفن منوچین د پنجشنبې په ورځ په یو بیان کې وویل "د سویس د بشري سوداګرۍ هوکړه‌لیک به مرسته وکړي چې د ایران خلکو ته بشري مواد پرته له دې چې رژیم ترې ناسمه استفاده وکړي ورسېږي."

د سویس د بشري راکړې ورکړې هوکړه د جنورۍ په وروستیو کې په ازمایښتي توګه وکارول شوه. منوچین وايي، اوس د سوداګرۍ فعالیت ته اجازه ورکړل شوې او دا په دې معنی چې دا سیستم په بشپړه توګه فعال شوی.

دا سیستم ډاډمنوي چې د دې هوکړې له مخې د کېدونکې سوداګرۍ هېڅ عواید او ګټه ایراني رژیم ته ولاړه نه‌شي. امریکا پر ایران تور لګوي چې د راکړې ورکړې دا ډول چینلونه د درغلیو او ترهګرۍ د ترویج لپاره کاروي.

ایران تل دا تورونه رد کړي دي.

د روغتیا نړیوال سازمان: اوس هم د کرونا مخه نیول کېدای شي

د روغتیا نړیوال سازمان مشر تدروس ادهانوم ګبریاسوس

د روغتیا نړیوال سازمان مشر تدروس ادهانوم ګبریاسوس «Tedros Adhanom Ghebreyesus» وايي چې که د کرونا وایروس د کنټرول لپاره جدي اقدامات وشي، نو نړۍ اوس هم د دې ناروغۍ د خپراوي مخه نیولای شي.

ښاغلي ګبریاسوس پرون په ژنیو کې خبریالانو ته وویل چې موږ په یوه ټاکونکي حالت کې یو ځکه دا وایروس د سرایت وړتیا لري.

تر دې مهاله د نړۍ په شااوخوا ۴۰ هېوادونو کې له ۸۲ زره زیات کسان په کرونا وایروس اخته شوي دي چې اکثر په چین کې دي او تر دې دمه‌یې په ټوله نړۍ کې له ۲۷۰۰ زیات کسان وژلي دي.

د منځني ختیځ په هېوادونو کې هم د دې ناروغۍ له ۳۵۰ د زیاتو پېښو راپور ورکړل شوی چې ډېری اخته کسان د مذهبي مراسمو لپاره ایران ته تللي دي. په همدې حال کې سعودي عربستان پرون پنجشنبه خپلې پولې د هغو خلکو پر مخ بندې کړې دي چې د عمرې حج په مقصد دې هېواد ته ځي او همداراز د ۲۵ هېوادونو سیلانیانو ته‌یې ویزې بندې کړې دي چې د کرونا وایروس نښې په‌کې موندل شوې دي.

که څه هم په سعودي عربستان او قطر کې د دې ناروغۍ موارد نه‌دي لیدل شوي، خو په کوېټ او بحرین کې په ترتیب سره ۴۳ او ۳۳ کسان په دې ناروغۍ اخته شوي دي.

ایران کې نن د جمعې لمونځ نه‌کېږي

ارشیف، په قم کې یو زیارت

ایراني چارواکو اعلان کړی چې نن به د کرونا وایروس د سرایت له وېرې په تهران کې د جمعې لمونځ نه‌کېږي.

ایراني چارواکو تأیید کړې چې په دې هېواد کې په کرونا وایروس د نویو اخته کسانو شمېر له سلو اوښتی چې د ښځو او کورنۍ په چارو کې د ایران د ولسمشر مرستیاله معصومه ابتکار هم په‌کې شامله ده.

د ایرنا خبري اژانس د راپور له مخې اوس به د مېرمن ابتکار ټول همکاران معاینه کېږي چې دا ویروس لري کنه.

مېرمن ابتکار د روغتیا له مرستیال وزیر ایرج هریرشي وروسته دوهمه جګپوړې چارواکې ده چې په کرونا وایروس اخته شوې.

په همدې حال کې د ایران د عامې روغتیا وزارت ویاند کیانوش جهانپور پرون تأیید کړه چې د تېرو ۲۴ ساعتونو په اوږدو کې د کرونا وایروس له کبله د مړینو شمېره ۲۶ ته لوړه شوې چې دا له چین څخه بهر په دې ناروغۍ له کبله د مړینې تر ټولو لوړه شمېره ده.

جهانپور تأیید کړه چې په ایران کې ټول ۲۴۵ کسان په دې وایروس اخته شوي دي.

ایران کې د کرونا له امله د مړو شمېر ۲۶ ته ورسېد

په ایران کې په کرونا وایروس اخته کس د قرنطین پر مهال.

په ایران کې چارواکو وویل چې په تېرو ۲۴ ساعتونو کې په هغه هېواد کې د کرونا وایروس له امله د مړو شمېر ۲۶ ته لوړ شوی دی.

د ایران د روغتیا وزارت ویاند کیانوش جهانپور نن د فبرورۍ په ۲۷مه، رسنیو ته وویل چې په ایران کې د کرونا وایروس ۲۴۵ مثبتې پېښې ثبت شوې دي.

کرونا وایروس په ډسمبر کې د چين په ووهان ښار کې خپور شو.

له هغه راهیسې زرهاوو کسان په دې وایروس اخته شوي دي.

له چینه بهر د کرونا وایروس له امله تر ټولو زیات وګړي په ایران کې مړه شوي دي.

په ایران کې د کرونا وایروس لومړۍ پېښه د قُم په ښار کې ثبت شوه.

کوسوو سره د مرستې په اړه د امریکا ژمنه

د امریکا د بهرنیو چارو وزیر مایک پومپیو او د کوسوو ولسمشر هاشم تاچي.

لوړ رتبه امریکايي چارواکو د کوسوو ولسمشر هاشم تاچي ته ډاډ ورکړی چې واشنګټن‌یې د هېواد د خپلواکۍ او د خاورې د بشپړتیا درناوی کوي او په دې برخه کې مرستې ته متعهد دي، خو له کوسوو غواړي چې د صربیا د مالونو پر وارداتو ۱۰۰ فیصده تعرفه لیرې کړي.

هاشم تاچي په واشنګټن کې دی.

د امریکا د بهرنیو چارو وزیر مایک پومپیو پرون د فبرورۍ په ۲۶مه، له تاچي سره په کتنه کې وویل چې امریکا او کوسوو ګډو ارزښتونو ته متعهد دي.

کوسوو په ۲۰۰۸ میلادي کال کې له صربیا خپلواکي اعلان کړه. واشنګټن له هغه راهیسې د کوسوو له کلکو ملاتړکوونکو دی.

د امریکا لوی درستیز: د طالبانو په اړه ټولو اندېښنو ته مو پام دی

د امریکا د وسله‌والو ځواکونو لوی درستیز مارک میلي

د امریکا د وسله‌والو ځواکونو لوی درستیز وایي، د طالبانو په اړه ټولو اندېښنو ته‌یې پام دی او له دې ډلې سره د سولې د یوه تړون د لاسلیک کېدو پلوي کوي.

جنرال مارک میلي چې پرون‌یې د امریکا د کانګرس په یوه استماعیه غونډه کې خبرې کولې، وویل دی په دې چې طالبان څومره وړتیا لري پوه دی، خو بیا هم ورسره د سولې د یوه تړون د لاسلیک کېدو ملاتړ کوي.

خو جنرال میلي دا هم وویل چې دی به هېڅکله د دې ملاتړ ونه‌کړي چې ورسره استخباراتي معلومات شریک شي.

تر دې مخکې د امریکا ولسمشر ډونالد ټرمپ له طالبانو سره یوې هوکړې ته د رسېدو په صورت کې له افغانستانه د یو شمېر امریکایي ځواکونو د ایستلو په اړه په څرګندونو کې ژمنه کړې چې امریکا به په دې هېواد کې قوي استخباراتي حضور ولري ترڅو له خاورې یې په نړیواله کچه د حملو لپاره د اډې په توګه کار وانه‌خیستل شي.

له طالبانو سره د یوه تړون له مخې چې په پام کې ده بل سبا د شنبې په ورځ د دواړو لورو ترمنځ په قطر کې لاسلیک شي، له افغانستانه امریکایي سرتېري چې په اوس وخت کې یې شمېر شااوخوا ۱۲ زره دی، په تدریجي ډول وځي.

د افغانستان د بیارغونې لپاره د امریکا سرمفتش جان سوپکو په وروستي راپور کې ویلي چې د جګړې په څېر په ټولنه کې د وسله‌والو د ادغام پروسه هم پېچلې او هم اوږده ده.

هغه خبرداری ورکړ چې امریکا باید په افغانستان کې د ادغام یو پراخ پروګرام تمویل کړي کنه د سولې له بهیر سره د طالبانو د یوځای کېدونکو ۶۰ زره وسله‌والو یو شمېر به‌یې بېرته شخړو او بغاوت ته مخه کړي.

شمالي مقدونیې او ګرجستان کې د کرونا وایروس پېښې ثبت شوې

راپورونه وايي چې تر ۲۷۰۰ زیات وګړي په دې وایروس د اخته کېدو له امله مړه شوي دي.

شمالي مقدونیې او ګرجستان پرون د فبرورۍ په ۲۶مه، د کرونا وایروس د ثبت خبر ورکړ.

د شمالي مقدونیې حکومت پرون وویل چې یوه ښځه چې يوه میاشت‌یې په ایټالیا کې تېره کړې په دې وایروس اخته پېژندل شوې ده.

د اروپا د نورو هېوادونو په پرتله په ايټالیا کې ډېر خلک په کرونا وایروس اخته شوي دي.

تر دې یوه ورځ وړاندې د کروېشیا حکومت وویل چې هلته هم یو وګړی په کرونا وایروس اخته پېژندل شوی دی.

د ګرجستان حکومت هم پرون وویل چې یو وګړی چې له ایرانه ورستون شوی و په کرونا وایروس اخته پېژندل شوی دی.

د ګرجستان حکومت ویلي چې دا سړی ۵۰ کلن دی او تر سختې طبي څارنې لاندې دی.

دا وایروس په ډسمبر کې د چین له ووهان ښاره راولاړ شو. په ټوله نړۍ کې تر ۸۰ زره زیات وګړي په دې وایروس اخته شوي دي.

راپورونه وايي چې تر ۲۷۰۰ زیات وګړي په دې وایروس د اخته کېدو له امله مړه شوي دي.

اوکراین له روسیې سره د کریمیا د جبري الحاق په اړه مراسم جوړوي

د اوکراین ولسمشر ولادیمیر زلنسکي

د اوکراین ولسمشر ولادیمیر زلنسکي یو نوی فرمان لاسلیک کړ چې پر اساس به‌یې د فبرورۍ ۲۶مه نېټه، هغه ورځ چې په ۲۰۱۴ میلادي کال کې روسیې په زوره د کریمیا ټاپو وزمه له اوکراینه جلا او له ځان سره الحاق کړه، په ځانګړو مراسمو یادېږي.

د اوکراین د ولسمشر د فرمان له مخې د فبرورۍ ۲۶مه، د روسیې له‌خوا د کریمیا او سویستوپول د اشغال په وړاندې د اوکراین د خلکو د مقاومت ورځ بلل شوې ده.

په هغه ورځ د کریمیا په مرکز سویستوپول کې د روسیې د لاسوهنې پر ضد تر ټولو لویه مظاهره وشوه.

د روسیې دا کار د نړۍ ۱۰۰ هېوادونو غیر مشروع بللی دی.

د روسیې حکومت له ۲۰۱۴ میلادي کال راهیسې د اوکراین په ختیځ کې د هغو بېلتون غوښتونکو ملاتړ کړی چې له اوکراینه جلايي غواړي.

په دې جګړه کې تر اوسه تر ۱۳ زره زیات اوکراینیان وژل شوي دي.

امریکا د کتائب حزب‌الله ډلې مشر یو نړیوال ترورېست ونوماوه

د کتائب حزب‌الله ډلې یو شمېر جنګیالي

د امریکا متحده ایالاتو په عراق کې د ایران ملاتړې د کتائب حزب‌الله ډلې مشر د یوه نړیوال ترورېست په توګه ونوماوه.

دغې ډلې په دې وروستیو کې په عراق کې دېره پر امریکایي او نورو بهرنیو سرتېرو د یو شمېر حملو مسؤلیت اخیستی دی.

د امریکا د بهرنیو چارو وزارت پرون وویل چې متحده ایالات د دغې ډلې د وسله‌والې څانګې مشر احمد الحمیداوي د ځانګړو نړیوالو ترورېستانو په فهرست کې شامل کړ.

د دغه اقدام له مخې په امریکا کې د هغه شتمني، که وي، کنګل کېږي او ورسره مالي راکړه ورکړه جرم ګڼل کېږي.

د کتائب حزب‌الله ډله په ۲۰۰۹ م کال یوه ترورېستي ډله نومول شوې ده.

ټرمپ: په کرونا د امریکایانو د اخته کېدو خطر ډېر لږ دی

د امریکا ولسمشر ډونالد ټرمپ په یوه خبري کنفرانس کې د خبرو پر مهال.

د امریکا متحده ایالاتو ولسمشر وایي، پر کرونا وایروس د امریکایانو د اخته کېدو خطر ډېر لږ دی او هغه اقدامات چې حکومت کړي، په نړیواله کچه له دغه خپاره شوي وایروس څخه‌یې د امریکا له خوندي کولو سره مرسته کړې ده.

ډونالد ټرمپ چې پرون‌یې په یوه خبري کنفرانس کې خبرې کولې، وویل چې امریکا د دغه وایروس په وړاندې د واکسین په جوړولو کې په چټکۍ پرمختګ کوي.

هغه وویل، لومړیتوب‌یې د امریکایانو روغتیا او خوندیتوب دی. ټرمپ له هغو سیمو پر مسافرت د بندیزونو لګول د اساسي اقداماتو په توګه یاد کړل چې کرونا وایروس په‌کې خپور شوی دی.

د امریکا د روغتیا او د بشري خدمتونو د وزارت د راپور له مخې په متحده ایالاتو کې د کرونا وایروس ۵۹ مثبتې پېښې ثبت شوي چې ۴۲یې هغه مسافر دي چې د ډایموند پرنسېس په نوم له جاپاني تفرېحي کښتۍ څخه امریکا ته انتقال شوي دي.

درې تنه هم د چین له ووهان ښاره چې د کرونا وایروس اصلي سرچینه ده، امریکا ته ستانه کړای شوي دي.

سعودي عربستان د عمرې حج د ادا کوونکو په مخ پولې وتړلې

د حرا غار

سعودي عربستان د کرونا وایروس د خپرېدو له وېرې مکې ته د عمرې حج د ادا کولو او په مدینه کې د اسلام د ستر پیغمبر جومات ته د ورتلو لپاره د زیارت کوونکو په مخ په موقت ډول خپلې پولې تړلې دي.

د سعودي عربستان چارواکو دغه‌راز د هغو هېوادونو سیلانیان هم په موقت ډول خپلې خاورې ته له ننوتو منع کړي چې په‌کې د کرونا وایروس خپور شوی دی.

د سعودي عربستان د بهرنیو چارو وزارت وویل چې دغه اقدامات‌یې د خپلو وګړو، په دې هېواد کې د استوګنو او د ورتلونکو سیلانیانو د خوندیتوب لپاره کړي دي.

سعودي عربستان په دې هېواد کې د کرونا وایروس د مثبتې پېښې راپور نه‌دی ورکړی، خو ګاونډ کوېټ یې ویلي چې د سعودي یو تبعه په دې هېواد کې د کرونا پر وایروس اخته شوی دی.

هر کال د عمرې حج د ادا کولو لپاره له اسلامي هېوادونو په لسګونه زره زیارت کوونکي سعودي عربستان ته ورځي.

تر اوسه دا هم نه‌ده څرګنده چې د کرونا وایروس خپرېدل به د حج په سږنیو مراسمو چې شااوخوا پنځه میاشتې وروسته ترسره کېږي، اغېز وکړي.

په سیمه کې ایران تر ټولو زیات د کرونا وایروس ځپلی چې د دې هېواد چارواکو یې له امله د ۱۹ کسانو د مړینې خبر ورکړی دی.

دغه‌راز د خلیج په دوو هېوادونو، کوېټ او بحرین کې هم په دې وروستیو ورځو کې د کرونا وایروس نورې مثبتې پېښې ثبت شوي دي.

نور راوښيه

XS
SM
MD
LG