د لاسرسۍ وړ لېنکونه

تازه خبر
چهارشنبه ۳۰ سلواغه ۱۳۹۸ کابل ۰۳:۲۵

افغانستان

کابل کې د 'کرونا ویروس' د کنټرول څانګه پرانیستل شوه

د عامې روغتیا وزارت وايي، هڅه کوي چې افغانستان ته د دغه ویروس د راتګ مخه ونیسي، خو د مخنیوي په اړه‌یې بشپړ ډاډ نه‌شي ورکولای.

د کابل په افغان-جاپان روغتون کې د "کرونا ویروس" د احتمالي پېښو د کنټرول لپاره ځانګړې څانګه پرانیستل شوه.

که څه هم د افغانستان د عامې روغتیا وزارت چارواکي وايي، تر اوسه په افغانستان کې د کرونا ویروس کومه پېښه نه‌ده ثبت شوې، خو د احتمالي پېښو د کنټرول لپاره تدابیر نیول شوي دي.

دغه وزارت د سې شنبه په ورځ «۱۳۹۸ کال د سلواغې ۱۵» د کابل په افغان-جاپان روغتون کې د دغه ویروس د احتمالي پېښو د کنټرول لپاره یو ۱۰۰ بستریزه څانګه پرانیستله.

د عامې روغتیا وزیر فیروزالدین فیروز د سې شنبې په ورځ د دغه څانګې د پرانیستلو پر مهال خبریالانو ته وویل، که اړتیا ولیدل شوه دا څانګه به پراخه شي.

هغه زیاته کړه: "دا برخه د هغو ناروغانو لپاره ده چې تشخیص شي چې کرونا ویروس لري، هغه کسان چې د ویروس شک پرې کېږي موږ د قرنطین لپاره جلا ځای جوړ کړی دی او دا ځای یوازې هغو کسانو ته دی چې دا ویروس په‌کې تشخیص شوی وي، دا ناروغان به همدلته ساتل کېږي ځکه بهر لېږدول‌یې د ویروس د خپرېدو ګواښ پېښوي."

دغې څانګې ته ۲۰ متخصص ډاکتران او ۳۰ روغتیايي کارکوونکي "نرسان" مؤظف شوي دي.

د یادې څانګې د جوړولو لپاره د نړیوال روغتیايي سازمان او جاپان هېواد له‌خوا ۵۰ میلیونه افغانۍ مرسته شوې ده.

د عامې روغتیا وزیر وايي، ډېر ژر به د ننګرهار، هرات او مزار شریف په روغتونونو کې هم د دغه ویروس د احتمالي پېښو د کنټرول لپاره ځانګړې څانګې جوړې شي.

د افغانستان د عامې روغتیا وزارت وايي، دوی هڅه کوي چې افغانستان ته د دغه ویروس د راتګ مخه ونیسي، خو د مخنیوي په اړه‌یې بشپړ ډاډ نه‌شي ورکولای.

د راپورونو پر بنسټ تر دې دمه په چین کې نږدې ۲۱ زره کسان په کرونا ویروس اخته شوي او له ۴۰۰ زیات مړه شوي دي.

د چین ترڅنګ په یو شمېر نورو هېوادونو کې هم په دغه ویروس اخته کسان پېژندل شوي دي.

د یادونې ده چې د چین په ووهان ښار کې چېرې چې دا ویروس ګډ دی ۴۱ افغان محصلان او د دوی کورنۍ ژوند کوي.

د افغانستان د عامې روغتیا وزارت وايي، هیله‌من دي چې راتلونکې اوونۍ له چینه دغه افغان محصلین هېواد ته راولېږدوي.

د ورځې تازه خبرونه دلته ولولئ

کابل کې معترضین: روسیه دې د ترهګرو له ملاتړه لاس واخلي

د افغانستان په عمومي نقشه کې کابل ولایت.

په کابل کې یو شمېر مدني فعالانو د روسیې د 'علم او فرهنګ خونې' مخې ته په یوې اعتراضیه غونډه کې، له ترهګرو ډلو سره د هغه هېواد پر ملاتړ انتقاد وکړ.

دغه اعتراض کوونکي ادعا کوي چې په افغانستان کې ترهګرې ډلې د روسیې له‌خوا تمویلېږي.

اعتراض کوونکو په داسې حال کې چې د روسيې پر ضد یې شعارونه ورکول، د افغانستان په کورنیو چارو کې ېې د هغه هېواد لاسوهنه وغندله.

دغه مدني فعالان د یوې اعلامیې په ترڅ کې د ملګرو ملتونو له امنیت شورا غواړي چې د ترهګرو په ملاتړو هېوادونو په تېره پر روسیې زور واچوي چې له دې کاره لاس واخلي.

مخکې له دې روسیې بیا بیا په افغانستان کې د لاسوهنې او له ترهګرو سره د ملاتړ موضوع رد کړی ده.

په ورته وخت کې د سیاسي چارو یو شمېر پوهان وايي، د افغانستان اوسنیو حساسو شرایطو ته په کتو، دا شان اعتراضونه د سولې بهیر ته زیان رسولی شي.

دا په داسې حال کې ده چې مخکې له دې هم ځیني ګاونډي هېوادونه د افغانستان په کورنیو چارو کې پر لاسوهنو او له ترهګرو سره په مرستو تورن شوي دي.

کندز کې پر یو کور د هاوان لګېدو ۱ تن وژلی او ۹ نور ټپیان دي

د افغانستان په عمومي نقشه کې کندز ولایت.

په کندز ښار کې پر يوه کور د هاوان مرمۍ د لګېدو له کبله يو ماشوم وژل شوى او ٩ نور کسان ټپيان شوي دي.

د والي وياند عصمت‌الله مرادي نن سې شنبه ازادي راډيو ته وويل، دا پېښه پرون شوې ده.

ښاغلی مرادي زیاتوي: "په پېښه کې يو تن ٧ کلن ماشوم شهيد شوى او په دغه کور کې ٩ تنه نور ټپيان شوي چې ښځې او ماشومان هم په‌کې شامل دي."

ښاغلي مرادي زیاته کړه چې په ټپیانو کې ۴ ښځي، یو نارینه او ۴ تنه ماشومان شامل دي.

که څه هم د والي وياند وايي دغه هاوان د وسله‌والو طالبانو له‌خوا توغول شوى و، خو وسله‌والو طالبانو په دې اړه څه نه‌دي ويلي.

په افغانستان کې د انټرنټ په بیو کې ۳۰ سلنه کموالی

آرشیف

د افغانستان د مخابراتو وزارت د هېواد د انټرنټ په بیه کې د ۳۰ فیصده کموالي خبر ورکوي.

د مخابراتو سرپرست وزیر محمد فهیم هاشمي وايي، له شرکتونو سره‌یې خبرې روانې دي چې د انټرنټ په بیو کې کموالی راولي.

د مخابراتو سرپرست وزیر محمد فهیم هاشمي د سې شنبې په ورځ په کابل کې یوې خبري ناستې ته وویل: "له نېکه‌مرغه نن د افغان ټیليکام شرکت له‌خوا د انټرنت په بیو کې د ۳۰ فیصده کموالي شاهدان یو. دغه شرکت مخکې له دې یو اېم بي انټرنټ په ۴۳ ډالرو پلورلو او اوس دغه بیه ۳۰ ډالرو ته ټیټه شوې ده."

ښاغلی هاشمي وايي، سلام مخابراتي شرکت د یو حکومتي شرکت په توګه په دې برخه کې تر نورو مخکې شوی او د هرې جي بي انترنټ بیه‌یې له ۱۱۵ افغانیو نه ۹۹ افغانیو ته ټیټه کړې ده.

ښاغلی هاشمي هیله مند دی چې ډیر ژر د خصوصي مخابراتي شبکو د انټرنټ په بیو کې هم کموالی راشي .

دا په داسې حال کې ده چې په دې وروستیو کې د انټرنټ د بیو د لوړوالي له امله اعتراضونه ډېر شوي دي.

یو شمېر مدني فعالانو د سې شنبې په ورځ هم په دې تړاو د افغانستان د څار بنسټ د دفتر مخې ته یوه اعتراضیه غونډه جوړه کړې وه.

د ملکي تلفاتو د دوام په اړه د میدان وردګ د مشرانو خبرداری

په کابل کې د میدان وردګ یو شمېر مشرانو اعتراضیه غونډه.

د میدان وردګو قومي مشران د ملکي تلفاتو دوام ته په کتو په دې برخه کې د حکومت د پاملرنې غوښتونکي شول.

دغه یو شمېر قومي مشران په جګړه کې ملکي تلفات "د بشریت په وړاندې جنایت" بولي او خبرداری ورکوي، که حکومت‌یې مخنیوی ونه‌کړي خلک به لاس په کار شي.

دوی د سې شبنې په ورځ «۱۳۹۸ کال د سلواغې ۲۹» په کابل کې په یوه اعتراضیه غونډه کې د جګړې ښکېلې خواوې د ملکي تلفاتو مسؤل وبلل.

یو تن اعتراض کوونکی رحیم ستار وايي: "نور بمبار بس دی، د خدای روی ته وګورئ، دلته یوازې حکومت نه، بلکې په طالبانو هم غږ کوو چې نور د خلکو صبر پای ته رسېدلی، په دې اړه مو څو ځله ولسمشر سره خبرې کړي، منلې یې ده چې د ملکیانو وژل جنایت دی، نو ولې مخنیوی نه‌کوي."

د میدان ورګ ولایت دغو اعتراض کوونکو مشرانو وویل، په دغه ولایت کې د جګړو زیاتره قربانیان ښځې او ماشومان دي.

دا اعتراضیه غونډه داسې مهال کېږي چې په افغانستان کې د ملګرو ملتونو مرستندویه ادارې (یوناما) هم په افغانستان کې د ملکیانو ژوند ته د نه‌پاملرنې له امله اندېښنه ښودلې ده.

په ورته وخت کې د افغانستان دفاع وزارت د ملکي تلفاتو لامل طالبان بولي او وايي، طالبان ملکي خلک سپر ګرځوي او دا کار د ملکي کسانو د خوندیتوب په برخه کې د دغه وزارت د نوې طرحې د عملي کېدو په وړاندې لوی خنډ دی.

خو طالبانو تل دا ادعاوې رد کړې دي.

دبۍ کې د افغانستان د کرنیزو محصولاتو نندارتون

دبۍ کې د افغانستان د کرنیزو محصولاتو د نندارتون یوه څنډه

په دبۍ کې د افغانستان د کرنیزو محصولاتو نندارتون پرانیستل شو.

د کرنې او مالدارۍ وزارت ویاند اکبر رستمي نن ازادي راډيو ته وویل، په دې نندارتون کې چې تېره ورځ ناوخته پیل شوی ۱۵۰ هېوادونو ګډون کړی.

نوموړي وویل، افغانستان په یاد نندارتون کې د افغاني محصولاتو ۲۶ غرفې لري.

هغه زیاته کړه: "له نېکه‌مرغه افغانستان په دې نندارتون کې فعاله حضور لري، دغه نندارتون درې ورځې نور هم دوام کوي، د ګلفوود نندارتون د کرنې وزارت د امریکايي پراختیايي ادارې او د سوداګرۍ وزارت په مرسته جوړ شوی."

په دې درې ورځني نندارتون کې د افغانستان کرنیزې توکي طبي بوټي، وچې او تازه مېوې او غالۍ نندارې ته اېښودل شوي دي.

د کرنې وزارت وايي، له دې نندارتون څخه هدف دا دی څو افغاني تولیداتو ته نړیوال بازار پیدا کړي.

ارګ: ولسمشر د سولې په تړاو پوځي او ملکي چارواکو سره بحثونه پیل کړي

ولسمشر غني له والیانو سره به بحث کې.

ارګ د ولسمشر اشرف غني له‌خوا له پوځي او ملکي چارواکو سره د سولې په اړه د سلامشورو د پیل خبر ورکوي.

ارګ پرون ماښام په یوه خبرپاڼه کې وویل چې ولسمشر غني د جرمني په مونیخ ښار کې په نړیواله امنیتي غونډه کې له ګډون وروسته له راستنېدو سره سم د سولې د فرصتونو او د هغې پر وړاندې د پرتو ګواښونو په اړه د هېواد له والیانو سره خبرې وکړې.

خبرپاڼه د ولسمشر غني له قوله وايي، افغانستان د یوې نوې پروسې پر لور پر مځ ځي څو دایمي سولې ته د رسېدو فرصتونه برابر شي.

ولسمشر غني والیانو ته ویلي چې د افغان امنیتي دفاعي ځواکونو وړتیاوې پیاوړې شوي او په تعرضي حالت کې دي.

ښاغلی غني زیاتوي چې د سولې د هڅو مشري افغان حکومت کوي او د حکومت مرکچي پلاوی به له طالبانو سره په خبرو کې د ټولو افغانانو اساسي حقونه په پام کې وساتي.

ارګ په یوه جلا خبرپاڼه کې د قول اردوګانو له قوماندانانو سره پر همدې موضوع د ولسمشر غني د خبرو جزئیات هم ورکړي.

افغان ولسمشر په دې غونډه چې تېر ماښام په ارګ کې جوړه شوه د پوځ قوماندانانو ته وویل، د افغان ځواکونو د سرښندنو په نتیجه کې طالبان د تشدد کمولو ته چمتو شول او زیاته‌یې کړه، افغان ځواکونه دا توان لري چې د سولې د احتمالي خطرونو مخه ونیسي.

چارواکي: کندهار او ارزګان کې ۶ وسله‌والو ته مرګ ژوبله اوښتې

ارشیف

په کندهار او ارزګان کې له افغان ځواکونو سره په جګړو کې شپږو وسله‌والو ته مرګ ژوبله اوښتې ده.

په کندهار کې د ملي اردو د ۲۰۵ اتل قول اردو ویاند خواجه يحيی علوي ازادي رادیو ته وویل د ملا هارون د ګروپ دوه غړي تېره شپه د کندهار د میوند ولسوالۍ د جرخشک په سيمه کې وژل شوي دي او يو بل‌یې ټپي دی.

د اتل قول اردو ویاند همدراز وایي چې پرون له افغان ځواکونو سره په نښته کې د ارزګان ولایت د دهراوود ولسوالۍ په زرتاله سيمه کي هم يو وسله‌وال وژل شوی او دوه نور ټپيان دي.

ښاغلي علوي په دې عملیاتو کې افغان ځواکونو ته د اوښتو زیانونو یادونه ونه‌کړه او طالبانو هم تر اوسه په دې اړه څه نه‌دي ویلي.

افغانستان کې د واورو له امله د بندو لارو د پرانیستو هلې ځلې

چارواکي وايي غزني، دایکنډي او غور کې ځینې لارې تر اوسه بندې دي.

د افغانستان د ټرانسپورټ وزارت وایي، د هغو لارو د پرانیستو لپاره‌یې هلې ځلې چټکې کړي چې په دې وورستیو کې د واورو له امله بندې شوې دي.

د دې وزارت مرستیال ویاند محمد اشرف حق‌شناس تېر ماښام ازادي راډیو ته وویل چې عملیاتي ټیمونو یې ډېرې لارې پرانیستي، خو په غزني، دایکنډي او غور کې ځینې لارې تر اوسه هم بندې دي.

نوموړي دغه‌راز وویل چې په غور کې د دولت وسله‌والو مخالفینو د دوی عملیاتي ټیمونو د هڅو مخه ډب کړې ده.

هغه زیاته کړه: "وسله‌وال مخالفین زموږ عملیاتي او د واورې د توږلو ټیمونو ته اجازه نه‌ورکوي چې لویه لاره پاکه کړي، د دې ولایت مخورو له مخالفینو سره غونډه لرله ترڅو هغوی ته قناعت ورکړي چې پرېږدي زموږ ټیمونه د غور ولایت دغه لویه لاره له واورو پاکه کړي."

ښاغلي حق‌شناس دغه‌راز وویل چې د سالنګ لویه لاره چې په دې وروستیو کې د واورو له امله بنده وه، اوس د ټرافیکو پر مخ بېرته پرانیستل شوې ده.

د هرات د انجیل ولسوالۍ د محکمې رئیس وژل شوی

د افغانستان په عمومي نقشه کې هرات ولایت.

د هرات امنیتي چارواکي وایي، د دې ولایت د انجیل ولسوالۍ د محکمې رئیس تېر ماښام ناپېژانده وسله‌والو په ډزو وواژه.

د هرات د امنیه قوماندانۍ ویاند عبدالاحد ولي‌زاده ازادي راډیو ته وویل چې دا پېښه تېر ماښام شاوخوا شپږ نیمې بجې د انجیل ولسوالۍ په شیدایي سیمه کې شوې ده.

هغه زیاته کړه: "د انجیل د محکمې رئیس عبدالرحیم جومات ته د لمانځه لپاره تللی و چې کله راوځي ناپېژانده وسله‌وال چې پر موټرسایکل سپاره وو، پرې ډزې کوي چې په خواشینۍ سره هغه په شهادت رسېږي."

تر اوسه د دې پيښې مسؤلیت چا یا کومې ډلې نه‌دی اخیستی.

د هرات امنیه قوماندان جنرال امین‌الله امرخېل وايي چې د ترلاسه شویو استخباراتي او کشفي معلوماتو له مخې د دولت وسله‌والو مخالفینو د دې ولایت د څارنوالۍ او محکمې د کارکوونکو په وړاندې ګواښونه زیات کړي چې دوی یې د مخنیوي لپاره د اقداماتو په ترڅ کې مسؤل قضایي چارواکي هم خبر کړي چې له احتیاطه کار واخلي.

ټاکنو کمېسیون: په ۳-۴ ورځو کې د ټاکنو وروستۍ پایلې اعلانوو

که د ټاکنو لومړنۍ پایله په خپل حال پاتې شي، اشرف غني به د بلې پنځه کلنې دورې لپاره د ولسمشر په توګه وټاکل شي.

د افغانستان د ټاکنو خپلواک کمېسیون وایي د جنجالي رایو د بیا تفتیش او شمېرلو بهیر بشپړ شوی او په درې یا څلورو ورځو کې به د ولسمشرۍ د ټاکنو وروستۍ پایله اعلان کړي.

د دې کمېسیون ویاند ذبیح‌الله سادات تېر ماښام ازادي راډیو ته وویل چې د ټاکنو خپلواک کمېسیون د ټاکنیزو شکایتونو پرېکړې، د شکایتونو د کمېسیون د همکارانو، د سیاسي ګوندونو، څارونکو بنسټونو او د ټاکنیزو ټیمونو په حضور کې عملي کړې او د دې کمېسیون دارالانشأ په خپل وروستي راپور کار کوي.

هغه زیاته کړه: "د ټاکنو خپلواک کمېسیون دارالانشأ ته دنده وسپارل شوه چې خپل راپور د دې کمېسیون له مشرتابه سره شریک کړي او ان‌شاءالله تر درې څلورو راتلونکو ورځو پورې به د افغانستان د ولسمشرۍ د ټاکنو وروستۍ پایله اعلان شي."

د دغو ټاکنو د لومړنۍ پایلې له مخې افغان ولسمشر محمد اشرف غني په سلو کې څه باندې ۵۰ رایې ګټلي او ورپسې د هغه سیال اجرائیه رئیس عبدالله عبدالله دی چې په سلو کې یې څه کم ۴۰ رایې خپلې کړې دي.

که د ټاکنو لومړنۍ پایله په خپل حال پاتې شي، اشرف غني به د بلې پنځه کلنې دورې لپاره د ولسمشر په توګه وټاکل شي.

افغان ریفري عبدالصبور عمري د داورۍ نړیوال سند ترلاسه کړ

افغان ریفري عبدالصبور عمري

د تکواندو نړیوال فدراسیون افغان ریفري عبدالصبور عمري ته د داورۍ لومړۍ درجه نړیوال سند ورکړی دی.

دا خبر د افغانستان د تکواندو ملي فدراسیون نن په خپله فېسبوک‌پاڼه خپور کړی.

د خبرپاڼې له مخې ښاغلي عمري ته د لومړۍ درجې داورۍ سند د تکواندو د نړیوال فدراسیون د عمومي رئیس ډاکتر چونګ ونګ چوی په لاسلیک ورکړل شوی.

عبدالصبور عمري د افغانستان د تکواندو د ملي فدراسیون مسلکي مرستیال دی او له څو کلونو راهیسې په نړیوالو لوبو کې د ریفري دنده مخته وړي.

د تکواندو د نړیوال فدراسیون د معلوماتو له مخې په ټوله اسیا کې شاوخوا ۴۰ ریفریان لومړی درجه سند لري.
تر عمري مخکې یوازې یوه بل افغان ریفري سید صادق هاشمي د داورۍ لومړی درجه نړیوال سند ترلاسه کړی دی.

د ملي اردو یوې پوځي الوتکې په نیمروز کې بېړنۍ ناسته کړې

د کندز نقشه

د افغانستان دفاع وزارت وایي چې د ملي اردو یوې پوځي الوتکې په نیمروز ولایت کې بېړنۍ ناسته کړې.

د دغه وزارت مطبوعاتي دفتر ویلي چې دا 'MD530' بېړنۍ ناسته نن له غرمې مخکې په خاشرود ولسوالۍ کې د تخنیکي ستونزې له کبله شوې.

د دغه دفتر په خبرپاڼه کې راغلي، پېښه کې یوازې پیلوټ سرسري ټپي شوی دی او دوی دغه پېښه څېړي.

ګوترش: د افغانستان د سولې لپاره فرصت باید له لاسه ورنه‌کړو

د ملګرو ملتونو عمومي منشي انتونیو ګوترش په پاکستان کې د افغان کډوالو په اړه جوړې شوې غونډې ته د وینا پر مهال.

د ملګرو ملتونو عمومي منشي ټینګار کوي چې د افغانستان د سولې لپاره رامنځته شوی فرصت باید له لاسه ونه‌وځي.

انتونيو ګوترش په پاکستان کې د افغان کډوالو په اړه جوړې شوې غونډې ته په وینا کې وویل نړیواله ټولنه، ګاونډیان او خپله افغان چارواکي باید له زړه کار وکړي چې سوله ټینګه شي.

هغه زیاته کړه: "د سولې اوسنی فرصت له لاسه نه‌شو ورکولی، موږ دا حق هم نه‌لرو چې دا موقع له لاسه ورکړو، که دا هدف ترلاسه نه‌شي، هېڅ افغان به موږ ونه‌بخښي. په اصل کې مهمه دا ده چې ټول افغان مشران او نړیواله ټولنه د امکان تر کچې کار وکړي چې سوله په واقعیت بدله کړي."

ګوترش په نړیوالو غږ وکړ چې افغانستان کې له سولې وروسته پانګونه وکړي چې پرمختګ او د کډوالو بېرته ستنېدو ته زمینه برابره شي.

نوموړي د افغان کډوالو د کوربه‌توب په برخه کې د پاکستان (مهرباني) وستایله او ویې‌ویل چې دغه هېواد افغان کډوالو ته خپلې پولې او ان د کورونو دروازې پرانیستې دي.

عبدالله: د طالبانو او امریکا ترمنځ د سولې هوکره لاسلیک ته چمتو ده

د افغان حکومت اجرائیه مشر عبدالله عبدالله

د افغان حکومت اجرائیه مشر عبدالله عبدالله وایي د طالبانو او امریکا ترمنځ د سولې هوکړه ورستۍ شوې او لاسلیک ته چمتو ده.

ښاغلي عبدالله نن د وزیرانو شورا په غونډه کې وویل د هوکړې لاسلیک په دې پورې تړلی چې په ۷ ورځو کې طالبان تاوتریخوالی کموي او که نه؟

هغه زیاته کړه: "افغانستان کې د سولې لپاره مثبت ګامونه اوچت شوي د امریکا او طالبانو ترمنځ هوکړه وروستۍ شوې ده، د هوکړې لاسلیک په دې پورې مشروط دی چې طالبان ۷ ورځو کې تاوتریخوالی کموي او که نه؟ د تاوتریخوالي داسې کمښت چې اوربند او بین‌الافغاني خبرو او تل‌پاتې سولې ته لاره هواره کړي."

که څه هم ولسمشرۍ ماڼۍ پخوا ویلي و چې د طالبانو له‌خوا د تاوتریخوالي کمول دوی ته معنی نه‌لري، خو اوس ښاغلی عبدالله وایي، دوی د تاوتریخوالي له کموالي هرکلی کوي او ګټور ګام‌یې بولي.

لوېدیځو رسنیو راپور ورکړی چې د طالبانو او امریکا ترمنځ د تاوتریخوالي د عملي کولو هوکړه سر له نن نه د عملي کېدو په حال کې ده.

دفاع وزارت: د کندز په شوره‌خاک سیمه د طالبانو برید په شا وتمبول شو

ارشیف، کندز کې د افغان ځواکونو پوځي عملیات

د افغانستان دفاع وزارت وایي چې د کندز ښار په یوه څنډه (شوره‌خاک) سیمه‌یې د طالبانو برید په شا تمبولی دی.

د دغه وزارت خبرپاڼه وایي له برید سره هم‌مهاله سیمې ته تازه دمه ځواکونه ورسېدل چې هوایي ملاتړ هم ورسره و.

په خبرپاڼه کې راغلي چې برید کې د ملي اردو پنځه سرتېري وژل شوي او درې نور ټپيان دي او د دوی په خبره طالبانو ته هم درنه مرګ ژوبله اوښتې.

د کندز د ولایتي شورا مرستیال صفي‌الله امیري بیا ازادي راډیو ته ویلي چې دې برید کې د ملي اردو ۱۵ سرتېري وژل شوي دي.

د طالبانو ویاند ذبیح‌الله مجاهد برید کې خپلو ملګرو ته د اوښتې مرګ‌ژوبلې په اړه څه نه‌دي ویلي، خو ادعا یې کړې چې ۱۹ سرتېري یې وژلي دي.

نور راوښيه

XS
SM
MD
LG