د لاسرسۍ وړ لېنکونه

تازه خبر
سه شنبه ۸ کب ۱۴۰۲ کابل ۰۶:۵۸

خبرونه

'روان کال له ۱۳۶ زره زیاتو متقاعدینو ته حقوق ورکول شوي'

ارشیف، انځور تزئیني بڼه لري.
ارشیف، انځور تزئیني بڼه لري.

د افغانستان د مالیې وزارت د تقاعد د خزینې ریاست وایي، په روان کال کې یې له ۱۳۶ زره زیاتو متقاعدینو ته حقوق ورکړي.

د دغه ریاست مشر عمر دراني د پنجشنبې په ورځ «۱۳۹۸ کال د سلواغې ۱۰» یوه خبري ناسته کې وویل چې د دې پروسې د شفافیت لپاره د بایومټریک بهیر هم پیل شوی چې له دې لارې به شفافیت رامنځته او د فساد مخه ډب کړای شي.

د ښاغلي دراني په خبره، دا مهال د ټول هېواد په کچه ۱۵۴ کسان دولتي متقاعدین دي چې دوی ته به د روان کال تر پایه حقوق‌یې ورکړل شي.

له دې سره یو شمېر متقاعدین شکایت لري چې په میاشتو میاشتو نه‌شي کولای خپل حقوق ترلاسه کړي او د تقاعد د اخیستو پروسه پېچلې ده.

د ورځې تازه خبرونه دلته ولولئ

کریملین د کییف متحدانو ته خبرداری ورکړی

په بروکسل کې د ناټو پر مرکزي دفتر د دې ایتلاف بیرغ
په بروکسل کې د ناټو پر مرکزي دفتر د دې ایتلاف بیرغ

کریملین د کییف متحدانو ته خبرداری ورکړی چې که اوکراین ته خپل سرتېري واستوي نو له ناټو سره جګړه به د روسیې ناچاري وي.

دا خبرداری وروسته له هغه ورکول کېږي چې د فرانسې ولسمشر ایمانویل مکروز وویل په اوکراین کې د روسیې د بریا د مخنیوي لپاره باید د اوکراین په ملاتړ دې هېواد ته د سرتېرو د استولو په ګډون هېڅ امکان له پامه ونه غورځول شي.

د کریملین ویاند دیمیتري پیسکوف نن د فبروري ۲۷مه د مکرون د څرګندونو په ځواب کې وویل چې اوکراین ته د ناټو د غړو له لوري د پوځي قطعو د لېږلو احتمال به یوه ډېره مهمه نوې کیسه وي.

کریملین وویل: "موږ باید د روسیې او ناټو ترمنځ د جګړې د احتمال نه بلکې د جګړې د ناچارۍ خبره وکړو."

مکرون پرون د فبروري په ۲۶مه په پاریس کې د اروپايي مشرانو له سرمشریزې وروسته وویل د دوی په غونډه کې په دې اړه چې د اوکراین په ګټه نور سمدستي اقدامات وشي پراخه اجماع وه.

د دې غونډې ګډونوالو موافقه وکړه چې د روسیې د یرغل پر وړاندې د مقابلې لپاره باید اوکراین ته د منځني او لیرې واټن ویشتونکو توغنديو او بمونو د ورکولو لپاره یو ایتلاف رامنځ ته کړي.

ایران: ۱۱۳۶ تنه افغانان د حبس د پاتې مودې د تېرولو لپاره افغانستان ته لېږل شوي

ارشیف: د ایران د یوه زندان څنډه
ارشیف: د ایران د یوه زندان څنډه

ایراني چارواکي وايي، له زرو زیات افغان بندیان په تېر یوه کال کې د ایران له محبسونو څخه افغانستان ته سپارل شوي دي.

ایسنا خبري آژانس د ایران د عدلیې وزارت د محکومانو د لېږد د څانګې په حواله خبر ورکوي چې ایران ته د طالبانو د حکومت د څارنوالۍ د پلاوي له سفر وروسته په تېره یوه کال کې د ایران له زندانونو څخه ۱۱۳۶ تنه افغانان د حبس د پاتې مودې د تېرولو لپاره افغانستان ته لېږل شوي دي.

د ایسنا د خبر له مخې د ایران د عدلیې وزارت یوه چارواکي عسکر جلالیان په تهران کې د افغان سفارت له سرپرست سره په کتنه کې ویلي چې د دواړو هېوادو ترمنځ د محکومانو د انتقال، د مجرمانو د سپارلو او د مدني او جنایي چارو په قضايي برخه کې د همکارۍ موافقه لاسلیک شوې.

د خبر له مخې له ۱۳۹۲ کال راهیسې ۳۰۱۵ تنه افغان بندیان په ګډ سرحد کې افغان چارواکو ته سپارل شوي دي.

نژدې یوه میاشت مخکې د طالبانو د حکومت کابینې د بهرنیو چارو وزارت ته دنده وسپارله چې له نورو هېوادونو سره خبرې وکړي او له زندانونو د افغان بندیانو دخلاصون لارې چارې ولټوي.

په شل اوریزو سیالیو کې د چټکې سلیزې ریکارډ مات شو

د نامیبیا کیڼ لاسي توپ وهونکي جان نیکول د یوې درې اړخیزې لوبلړۍ پرمهال د نيپال پر وړاندې په ۳۳ توپونو سلیزه وهلې ده.
د نامیبیا کیڼ لاسي توپ وهونکي جان نیکول د یوې درې اړخیزې لوبلړۍ پرمهال د نيپال پر وړاندې په ۳۳ توپونو سلیزه وهلې ده.

د نامیبیا کیڼ لاسي توپ وهونکي جان نیکول د یوې درې اړخیزې لوبلړۍ پرمهال د نيپال پر وړاندې په ۳۳ توپونو سلیزه وهلې ده.

دا په شل اوریزو سیالیو کې تر ټولو چټکه سلیزه ده.

۲۲ کلن نیکول چې په ۵م نمبر توپوهنې ته راښکته شوی و په ۳۳ توپونو یې ۱۰۰ منډې پوره کړې دي.

هغه ۸ شپږیزې او ۱۱ څلوریزې ووهلې.

تر نوموړي وړاندې دا ویاړ د نیپال د لوبغاړي کوشال مالا په نوم و چې په ۳۴ توپونو یې د نامیبیا خلاف سلیزه وهلې وه.

دا سیالي د فبرورۍ په ۲۷مه نېټه نن سه شنبه په نیپال کې ترسره شوه چې د ۲۰ منډو په توپیر نامیبیا وګټله.

د نیوزیلینډ د ټېسټ کرکټ مخکښ توپ اچونکي تقاعد اعلان کړ

نیل واګنر د خپل هېواد لپاره ۶۴ ټېسټ سیالۍ ترسره کړي، په ۱۲۲ پاڼیو کې یې ۲۶۰ وېکټې اخستې وې.
نیل واګنر د خپل هېواد لپاره ۶۴ ټېسټ سیالۍ ترسره کړي، په ۱۲۲ پاڼیو کې یې ۲۶۰ وېکټې اخستې وې.

وروسته له هغې چې د اسټرالیا پر وړاندې د راتلونکو دوو ټېسټ سیالیو لپاره کیڼ لاسی چټک توپ اچونکی نیل واګنر غوره نه‌شو، هغه هم په سمدستي توګه له نړیوال کرکټ تقاعد اعلان کړ.

ټاکل شوې چې د راتلونکې پنجشنبې په ورځ د فبرورۍ په ۲۹مه نېټه د اسټرالیا او نیوزیلینډ ترمنځ د دوه ټېسټ سیالیو لوبلړۍ پیل شي.

واګنر د یوه رسنیز کنفرانس پرمهال وویل، ورته سخته ده چې د تقاعد پرېکړه کوي، خو وی ویل: "فکر کوم نور د دې وخت نږدی شوی چې له نړیوال کرکټ لاس په سر شم او نويو ځوانانو ته د لوبېدو موقع ورکړم."

۳۷ کلن واګنر چې د رسنیز کنفرانس پر مهال یې له سترګو اوښکې روانې وې وویل، تېره اوونۍ یې د نیوزیلینډ له مشر روزونکي سره ډېرې خبرې وکړې، خو مثبت ځواب یې ترلاسه نه کړ.

د نوموړي په خبره، مشر روزونکي ورته ویلي چې نور د نیوزیلینډ د ټېسټ کرکټ په ۱۱ کسیزه لوبډله کې ورته ځای نه‌شته.

نیل واګنر د خپل هېواد لپاره ۶۴ ټېسټ سیالۍ ترسره کړي، په ۱۲۲ پاڼیو کې یې ۲۶۰ وېکټې اخستې وې.

د هغه د توپ اچونې اوسط ۲۷.۵۷ و.

نوموړي په یوه پاڼۍ کې یې ۷ لوبغاړي سوځولي وو او ۹ ځل یې د ټېسټ کرکټ په یوه پاڼۍ کې ۵ لوبغاړي سوځولي وو.

نیل واګنر یوازېنی لوبغاړی و چې په هېڅ نړیواله یو ورځنۍ سیالۍ کې یې د لوبېدو چانس ترلاسه نه کړ.

د افغانستان په ځینو سیندیزو حوزو کې د اوبو زیاتیدو او سېلابونو اټکل شوی

تصویر له ارشیفه
تصویر له ارشیفه

د هواپېژندنې ادارو له سبا چارشنبې نیولې د جمعې تر ورځې د هېواد په ځینو سیندیزو حوزو کې د اوبو د کچې د لوړېدو او سېلابونو اټکل کړی.

د طالبانو د حکومت د اوبو او انرژۍ وزارت پر ایکس پاڼه په یوه بیان کې خبرداری ورکړی چې په ځینو سیمو کې د نسبتا تېزو بارانونو او واورو د ورېدو له کبله ښايي سېلابونه راووځي.

د بیان له مخې، د ورښتونو او سېلابونو اټکل تر ډېره د فراه، هلمند، ارغنداب، خاشرود، ترنک، غزني، پکتیا، پکتیکا، لوګر، میدان، غوربند، پنجشیر، لغمان او کونړ سیندونو په اوږدو کې کېږي.

نوموړي وزارت د دې سیمو له خلکو غوښتي چې د سېلابونو پرمهال د سیندونو له غاړو لیرې شي او د کوزنیو سیمو خلکو ته هم پر وخت خبرداری ورکړي.

اوکراین د روسیې د ۱۱ بې پيلوټه الوتکو د ویشتو خبر ورکړ

له ارشیفه د یوه اوکرایني پوځي تصویر
له ارشیفه د یوه اوکرایني پوځي تصویر

د اوکراین پوځي چارواکي وايي چې نن سهار یې د روسیې له ۱۳ بې پیلوټه الوتکو څخه ۱۱ ویشتلي او راغورځولې دي.

د اوکراین هوايي ځواک نن په یوه بیان کې همداراز وویل چې د روسیې له شپږو کروز توغندیو څخه یې هم دوه له منځه وړي دي.

د اوکراین پوځ وايي چې دا بې پیلوټه الوتکې او توغندي د خارکییف، سوُمي، دنیپروپیتروفسک او څو نورو سیمو په فضا کې په نښه شول.

له بلې خوا د فرانسې ولسمشر ایمانویل مکرون وايي چې د اروپايي ټولنې مشرانو په خپله سرمشریزه کې د داسې یوه ایتلاف پر جوړولو موافقه کړې چې د روسیې د یرغل پر وړاندې د مقابلې لپاره اوکراین ته د منځني او اوږده واټن ویشتونکي توغندي او بمونه ورکړي.

له مکرون سره په دې غونډه کې چې تر بیګا ناوخته پورې یې دوام وکړ د جرمني صدراعظم اولاف شولڅ، د پولنډ ولسمشر اندری دودا او د بالتیک د حوزې د هېوادونو مشران هم شامل وو.

ملګري ملتونه: د افغانستان لپاره د ځانګړي استازي ټاکلو کوم مهالوېش نه دی اعلان شوی

په نیویارک کې د ملګرو ملتونو ودانۍ
په نیویارک کې د ملګرو ملتونو ودانۍ

ملګري ملتونه وايي چې د افغانستان لپاره د دې سازمان د ځانګړي استازي د ټاکلو لپاره تراوسه کوم مهالوېش نه دی اعلان شوی.

د ملګرو ملتونو امنیت شورا تېر ماښام د تړلو دروازو تر شا غونډه وکړه او د دې شورا دوره یي مشرې د ګیانا استازې کارولین ردودریګوز له غونډې مخکې وویل د افغانستان لپاره د ځانګړي استازي ټاکل د غونډې په اجنډا کې شامله ده.

د ملګرو ملتونو ویاند ستیفان دوجاریک بېګا ناوخته خبریالانو ته وویل چې د ځانګړي استازي د ټاکلو مسئله په جدي ډول تعقیبېږي او کار پرې روان دی.

داسې ښکاري چې ملګرو ملتونو د افغانستان د ځانګړي استازي په توګه تراوسه څوک نه دي نومولي، خو دوجاریک وویل چې کله کوم څوک غوره شو نو اعلان به شي.

طالبانو د ملګرو ملتونو د ځانګړي استازي له ټاکلو سره مخالفت کړی او ویلي یې دي چې د افغانستان لپاره د ملګروملتونو د مرستندوی دفتر یوناما په شتون کې د دې سازمان د بل ځانګړي استازي ټاکلو ته اړتیا نه شته.

د امنیت شورا ۱۱ غړو د ښځو پر وړاندې د طالبانو ځپونکي سیاستونه وغندل

د ملګرو ملتونو سازمان لوګو
د ملګرو ملتونو سازمان لوګو

د ملګرو ملتونو د امنیت شورا څه باندې دوه پردرېیمې برخې غړیو د دوشنبې په ورځ له طالبانو وغوښتل چې د ښځو او نجونو په وړاندې له شپږم ټولګي پورته د نجونو پرزده کړو بندیز او د ښځو د کار او ازاد تګ راتګ د حق په ګدون ټول ځپونکي او تبعیضي سیاستونه او فرمانونه لغوه کړي.

په هغې کې اعلامیه کې چې د امنیت شورا بېګا د افغانستان په اړه د بندو دروازو ترشا له غونډې وروسته خپره کړې، د دې شورا له پنځلسو غړیو یوولسو یې د ۲۰۲۱ کال په اګست کې واک ته د طالبانو له رسیدو راهیسې پرښځو او نجونو د دوی له لوري ځپنه غندل شوي او یو ځل بیا یې په عامه، سیاسي، اقتصادي، کلتوري او ټولنیز ژوند کې؛ په ځانګړې توګه د افغانستان په اوسنۍ واکمنۍ کې چې د نړیوال تعامل د زیاتوالي لټه کوي، د پرېکړې کولو په ټولو سطحو کې د هغوی پرمساوي مشارکت ټینګار کړی دی.

په دغه اعلامیه کې د امنیت شورا یوولسو غړیو، اکوادور، فرانسې، ګیانا، جاپان، مالتا، سیریلییون، سلوینیا، جنوبي کوریا، سویس، برېتانیا او متحدو ایالتونو یادونه کړې چې په افغانستان کې یواځې هغه وخت تلپاتې سوله ټینګېدای شي چې دا هېواد یو ټول شموله سیاست مخ ته یوسي او د ښځو او نجونو په ګډون د ټولو افغانانو د بشري حقونو درناوی وکړي.

بایډن: که حماس د یرغمل شویو کسانو خلاصون ومني اسراییل به روژه کې جګړه ودروي

د امریکا د متحدو ایالتونو ولسمشر جوبایډڼ
د امریکا د متحدو ایالتونو ولسمشر جوبایډڼ

د امریکا د متحدو ایالتونو ولسمشر جوبایډڼ وایي،که له حماس سره د برمته شویو یو شمېر کسانو د خلاصون موافقه وشي؛ اسراییل به د را روانې روژې میاشتې په جریان کې په غزه کې جګړه بنده کړي.

د امریکا متحده ایالتونه او اروپایي ټولنه حماس ډله یوه ترهګره ډله ګڼي.

د متحده ایالاتو، مصر او قطر مذاکره کوونکي د یوې موافقې پرطرحې کارکوي چې له مخې به یې حماس د یوشمېر فلسطیني بندیانو د خوشې کولو او د شپږو اونیو لپاره د جګړې د درولو په بدل کې په لسګونو یرغمل شوي کسان خوشې کړي.

سخت دریځې حماس ډلې د اوکتوبر پراومه پراسراییل له برید سره شاوخوا ۱۲۰۰ کسان ووژل او ۲۴۰ نور یې یرغمل کړل.

د مخکیني لنډ مهاله اوربند په ترڅ کې د اسراییل له زندانونو د یوشمیرفلسطیني بندیانو د خوشې کیدو په بدل کې په لسګونو یرغمل آزاد شوي، خو ویل کیږي چې ترسلو زیات کسان لاهم یرغمل دي.

د امریکا د بهرنیو چارو وزیر د افغان ښځو د اقتصادي مقاومت په نوم یوه ایتلاف ته نن وینا کوي

د امریکا د بهرنیو چارو وزیر انتوني بلېکین
د امریکا د بهرنیو چارو وزیر انتوني بلېکین

ټاکل شوې چې د امریکا د بهرنیو چارو وزیر انتوني بلېکین د افغان ښځو د اقتصادي مقاومت په نوم د یوه ایتلاف AWERغونډې ته نن وینا وکړي.

د امریکا د بهرنیو چارو وزارت د ویندوی له دفتره بېګا ناوخته په یوه خپره شوې اعلامیه کې ویل شوي چې دا غونډه نن د افغانستان په وخت د ماښام په اوو بجو په بهرنیو چارو وزارت کې د بوستون پوهنتون او ددې وازرت په ګډ کوربه توب جوړیږي.

د اعلامیې له مخې، د دغه ایتلاف دې غونډې ته د خصوصي سکتور، مدني ټولنې، پوهنتونونو او حکومتونو استازي بلل شوي او دوی به د دغه ایتلاف د نویو نوښتونو او دا چې هغه له نورو لوبغاړو او شریکانو سره په څه ډول پرمخ وړل کېدای او ګډ هدفونه ترلاسه کیدای شي، خبرې وکړي.

د بهرنیو چارو وزارت په وینا، د بهرنیو چارو وزارت او د بوستون پوهنتون ترمنځ دغه خصوصي ایتلاف چې په ۲۰۲۲ کال کې د ښاغلي بلېنکین له خوا رامینځته شوی، هدف یې زده کړې، کار او خصوصي سوداګرۍ ته د افغان ښځو او نجونود لاسرسي ملاتړ او په دې برخه کې د نوښتونو او همکاریو زیاتوالی ښودل شوی.

په افغاني ټولنه کې د افغان ښځو او نجونو د فعال ګډون په هدف دا غونډه داسې مهال جوړیږي چې په افغانستان کې د طالبانو د واکمنۍ په څه باندې دوه نیم کلنه موده کې نجونې له شپږم ټولګي پورته زده کړومنع شوي او ښځې هم په نادولتي موسسو او یو شمېر دولتي ادارو کې له کار کولو راګرځول شوې دي.

نور راوښيه

XS
SM
MD
LG