د لاسرسۍ وړ لېنکونه

تازه خبر
پنجشنبه ۱۰ سلواغه ۱۳۹۸ کابل ۰۱:۲۴

نړۍ

د نسکورې شوې الوتکې د قربانیانو درناوي لپاره نن اوکراین کې ملي ماتم و

د هغې اوکراینۍ الوتکې د قربانیانو په درناوي نن په دغه هېواد کې د ملي ماتم ورځ ولمانځل شوه چې تېره ورځ د ایران په پلازمېنه تهران کې راولوېده او ټولې ۱۷۶ سپرلۍ یې ووژل شوې.

د اوکراین هوايي شرکت ۷۳۷ ډوله بوینګ الوتکه کې د ۱۱ اوکراینیانو ترڅنګ د ایران، افغانستان، کاناډا، بریتانیا، سوېډن او جرمني اتباع سپاره وو.

الوتکه د تهران د امام خمیني له هوايي ډګر څخه اوکراین ته روانه وه چې له پورته کېدو لږ وروسته نسکوره شوه.

د اوکراین ولسمشر ولادیمیر زېلینسکي خپل ملت ته په وینا کې وویل چې دولت يې د هغو کسانو د کورنیو مرستې ته چمتو دی چې په دې پېښه کې یې غړي ووژل شول.

تراوسه د الوتکې د رالوېدو علت نه دی په ډاګه شوی، که څه هم په ایران کې د اوکراین سفارت ویلي و چې د الوتکې انجن له کاره لوېدلی و، خو وروسته یې خپله اعلامیه بېرته واخیسته.

د پېښې علت به د الوتکې د تور بکس چې د پرواز مهال ټول معلومات او د پیلوټانو غږ پکې ثبتېږي، تر ارزولو وروسته څرګند شي.

د ورځې تازه خبرونه دلته ولولئ

د امریکا په سنا کې د ټرمپ د استیضاح د محاکمې نهمه ورځ

د امریکا قاضي‌القضات جان رابرټس د ولسمشر ډونالد ټرمپ د محاکمې بهیر اداره کوي.

د امریکا متحده ایالاتو د ولسمشر ډونالد ټرمپ د استیضاح د محاکمې نهمه ورځ نن د واشنګټن په وخت د ماسپښین په یوه بجه په سنا جرګه کې ترسره کېږي.

سناتوران تر دوو ورځو وخت لري چې خپلې لیکلې پوښتنې د ټرمپ د محاکمې په بهیر کې د استازو جرګې له‌خوا ټاکل شویو اووه تنو مدیرانو او هم د ولسمشر ټرمپ مدافع وکیلانو ته وسپاري.

د امریکا قاضي‌القضات جان رابرټس د ولسمشر ډونالد ټرمپ د محاکمې بهیر اداره کوي.

د پوښتنو تر سپارلو وروسته تمه کېږي چې سناتوران په دې اړه رایه ورکړي چې ایا شاهدان شهادت ته وروغواړي که نه.

سنا وروسته له هغه د ولسمشر ټرمپ استیضاح پیل کړه چې د امریکا استازو جرګې ټرمپ له واک څخه په ناوړه استفاده او د کانګرس په مخ کې د خنډونو په ایجادولو تورن کړ او د هغه د استیضاح دوسیه‌یې سنا ته واستوله.

په ټرمپ دا تورونه د اوکراین له ولسمشر ولادیمیر زلنسکي سره د هغه د یوې ټیلیفوني مکالمې په تړاو دي.

په ټرمپ تور دی چې په زلنسکي یې فشار راوړی څو د خپل سیاسي سیال جوبایډن او د هغه د زوی هنټر بایډن په اړه پلټنې وکړي.

بایډن او زوی یې هنټر بایډن په اوکراین کې د انرژۍ په سکټور کې څه وخت کار کړی و.

جوبایډن د امریکا د ۲۰۲۰ میلادي کال په ولسمشرۍ ټاکنو کې له ډیموکرات ګونده د ټرمپ یو اصلي سیال بلل کېږي.

په سنا جرګه کې له سلو څوکیو ۵۳ د جمهوري غوښتونکو په لاس کې دي او تقریباً واضح ده چې ټرمپ به برائت حاصل کړي ځکه له واکه د هغه د لیرې کولو لپاره د سنا جرګې دوه ثلثه رأیې په کار دي.

چین کې د کرونا ویروس له امله د مړو شویو شمېر ۱۳۲ کسانو ته ورسېد

تر چین بهر هم په اروپا، شمالي امریکا او د اسیا په څو نورو هېوادونو لکه جاپان، منګولیا، ویتنام کې لسګونه کسان په دې وژونکي ویروس اخته شوي.

په چین کې د کرونا ویروس له امله د مړو شویو کسانو شمېر ۱۳۲ ته رسېدلی او شپږ زره کسان پرې اخته شوي.

دا خبره د چین د روغتیا ملي کمېسیون نن تأیید کړې او ویلي یې دي چې نږدې ۱۰ زره نور ناروغه کسان هم تر معاینې لاندې دي.

تر چین بهر هم په اروپا، شمالي امریکا او د اسیا په څو نورو هېوادونو لکه جاپان، منګولیا، ویتنام کې لسګونه کسان په دې وژونکي ویروس اخته شوي.

کرونا ویروس تنفسي سیستم کمزوری کوي او په خطرناکه حالت کې یې ان د انسان په مرګ تمامېږي.

لومړی دا ویروس د چین په ووهان ښار کې د ډسمبر په میاشت کې کشف شو او ویل کېږي چې ښايي له ککړو سمندري خواړو یا ناروغه ژویو انسانانو ته انتقال شوي وي.

د چین ووهان ښار او د هوبای ولایت ۱۷ نور واړه او لوی ښارونه د دولت له‌خوا تړل شوي او بهرنیان هڅه کوي له دې ښاره ووځي.

شاوخوا ۵۰ میلیونه کسان د چین په هوبای کې ایسار پاتې دي.

یوې الوتکې نن سهار وختي له ووهانه د امریکا الاسکا ته سفر پیل کړ چېرته چې سورلۍ به‌یې امریکا ته په رسېدو دقیق معاینه شي.

بله الوتکه له ووهانه د جاپان پلازمېنې توکیو ته ولاړه.

د روغتیا نړیوال سازمان د کرونا ویروس له امله په چین کې بېړنی روغتیايي وضعیت اعلان کړی، خو په نړیواله کچه‌یې دا کار نه‌دی کړی.

عراق کې د زیانمنو شویو امریکايي سرتېرو شمېر ۵۰ ته ورسېد

ارشیف

د امریکا متحده ایالاتو پوځ د درېیم ځل لپاره د هغو عسکرو شمېر زیات کړ چې په عراق کې د ایران د راکټي بریدونو پر مهال‌یې ماغزو صدمه لیدلې ده.

د امریکا د دفاع وزارت پنټاګون د ویاند ډګرمن توماس کمپبل په حواله اسوشیټډ پرس اژانس ویلي چې تازه ۱۶ نور عسکر هم معاینه شوي چې ماغزو یې صدمه لیدلې.

په دې سره د ټولو زیانمنو شویو سرتېرو شمېر ۵۰ ته رسېدلی دی.

امریکا مخکې ویلي و ۳۴ عسکر یې زیانمن شوي.

وروسته له هغه چې د جنورۍ په درېیمه امریکا د بغداد په نړیوال هوايي ډګر کې د ایران د قدس ډلې قوماندان قاسم سلیماني او د هغه ملګري په هوايي برید کې ووژل، ایران‌یې په غچ کې د جنورۍ په اتمه په عراق کې دوه امریکايي اډې په راکټونو وویشتلې.

امریکا لومړی ویل چې عسکرو ته‌یې د ایران په راکټي بریدونو کې زیان نه‌دی اوښتی، خو د وخت په تېرېدو یې اعلان وکړ چې یو شمېر عسکر یې زیانمن شوي او د درملنې لپاره کوېټ او جرمني ته استول شوي.

د پښتون ژغورنې غورځنګ ۲۹ غړي او پلویان خوشې شول

د پاکستان پوليسو ګڼ کسان په اسلام‌اباد کې د مطبوعاتي کلب مخې ته د لاريون پر مهال نيولي وو.

د پښتون ژغورنې غورځنګ يوه مخکښه غړې وايي، د پاکستان امنيتي ځواکونو د دوى د غورځنګ ٢٩ نيول شوي غړي او پلويان خوشې کړل.

ثنا اعجاز تېره شپه ناوخته ازادي راډيو ته وويل، په نيول شويو کسانو کې محسن داوړ او نور مهم کسان شامل وو.

هغې زیاته کړه: "له محسن داوړ سره ټول نيول شوي کسان خوشې شول، دوى ٢٩ کسان وو چې صرف په اسلام‌اباد کې نيول شوي وو."

د پاکستان پوليسو ګڼ کسان په اسلام‌اباد کې د مطبوعاتي کلب مخې ته د لاريون پر مهال نيولي وو.

د غورځنګ بل مخکښ غړي او د پاکستان په ملي اسامبلۍ کې د جنوبي وزيرستان استازي علي وزير ويلي چې دى په يوه خوندي ځاى کې دى.

د پښتون ژغورنې غورځنګ يا (PTM) په پلوۍ په افغانستان، پاکستان او نورو هېوادونو کې وروسته له هغې تازه لاريونونه پيل شول چې د غورځنګ مشر منظور پشتین د دوشنبې سهار د پېښور په تهکال کې د پولیسو له‌خوا ونیول شو.

ایرانی رپ سندرغاړی 'امير تتلو' په ترکیه کې ونیول شو

د ايران د رپ موسيقۍ سندرغاړى امير تتلو

د ايران د رپ موسيقۍ هغه سندرغاړى چې د ايران د فرهنګ او اسلامي ارشاد وزارت له‌خوا غير مجاز اعلان شوى، په ترکيه کې ونيول شو.

ايراني چارواکو پرون سې شنبه وويل، امير تتلو د ايران تر غوښتنې وروسته په استانبول کې نيول شوى دى.

د ايران خبري اژانسونو د ايران د پوليسو د وياند احمد نوريان خبرې را اخيستي چې ويلي يې دي: "تتلو چې اصلي نوم‌يې امير حسين مقصودلو دى، وروسته له هغې د ترکيې د پوليسو له‌خوا ونيول شو چې لومړى نړيوالو پوليسو يا انټرپول د هغه په اړه «جدي خبردارى» خپور کړ."

نوريان وايي د ايران قضايي چارواکو د دغه سندرغاړي د نيولو غوښتنه ځکه وړاندې کړې چې ده د ايران وګړي، په ځانګړي ډول ځوانان نشه‌يي توکو او د رواني درملو کارولو ته هڅول او فساد يې خپراوه.

د ترکيې چارواکو سم دلاسه د دې پېښې په اړه تبصره نه‌ده کړې، نړيوالو پوليسو د ازادي راډيو د تماس په ځواب کې د دغه سندرغاړي د نيول کېدو خبر رد يا تأیيد کړى نه‌دى.

د ايراني پوليسو د نړيوالې څانګې مشر هادي شېرزاد د ايران نيمه دولتي اژانس ايسنا ته ويلي، انټرپول د ايران تر غوښتنې وروسته د تتلو په اړه جدي يا سور خبردارى خپور کړ.

امریکا له چین نه د کرونا ویروس په اړه روڼوالی وغوښت

په چين کې په کرونا ويروس تر ١٠٠ زيات کسان مړه شوي او تر ٤٥٠٠ نور کسان ورباندې اخته شوي دي.

د امريکا متحده ايالاتو لوړ رتبه روغتيايي چارواکو له چين څخه غوښتنه وکړه چې نور هم روڼوالی او همکاري خپله کړي.

دا په داسې حال کې ده چې د کرونا په نوم وژونکى ويروس په چين کې په خپرېدو دى او د نړۍ په څو هېوادونو کې نور خلک هم ورباندې اخته شوي دي.

د امريکا د روغتيا وزير اليکس ازر پرون دغه‌راز وويل، واشنګټن له پیکېنګ سره همکارۍ ته چمتو دى.

په چين کې په کرونا ويروس اخته تر ١٠٠ زيات کسان مړه شوي او تر ٤٥٠٠ نور کسان ورباندې اخته شوي دي.

دغه ويروس لومړى د چين په مرکزي ښار ووهان کې کشف شو.

د روغتيا نړيوال سازمان په حواله په څه باندې ۱۰ نورو هېوادونو کې هم د کرونا ويروس څه باندې ٤٥ پېښې ثبت شوې دي.

ازر په واشنګټن کې وويل: "له چين څخه غواړو د لا مؤثر اقدام لپاره نوره همکاري او شفافيت ډېر مهم ګامونه دي."

تاجکستان د اخوان‌مسلمین ډلې ۱۱۳ مشکوک غړي نیولي

د تاجکستان نقشه

د تاجکستان پولیسو د اخوان‌مسلمین ډلې ۱۱۳ مشکوک غړي نیولي دي.

په تاجکستان کې د اخوان‌مسلمین ډلې پر فعالیت بندیز دی.

د تاجکستان لوی څارنوال، یوسف رحمان نن د جنورۍ په ۲۸مه، خبریالانو ته وویل چې په مشکوکو کسانو کې د پوهنتونونو ۲۰ ښوونکي او کارکوونکي، دوه بهرني وګړي او یو د تاجکستان دولتي چارواکی دی.

یوسف رحمان رسنیو ته ویلي چې د اخوان‌مسلمین حزب هدف دا دی چې په زور حکومت نسکور کړي، یو اسلامي دولت رامنځته کړي.

اخوان‌مسلمین په ډېرو هېوادونو کې ممنوع‌الفعالیت اعلان شوی او افراطي ډله بلل کېږي.

تر اوسه کرونا ویروس چین کې ۱۰۶ کسان مړه کړي

د چین په ووهان کې یو روغتون چې په کرونا اخته ناروغانو درملنه کوي.

په چین کې د کرونا ویروس د خپرېدو له وجې د مړو شمېر ۱۰۶ ته لوړ شو.

چیني چارواکو نن همداراز په دې ویروس د اخته کسانو د ۱۷۷۱ نویو مواردو راپور ورکړ.

د چین د ملي روغتیايي کمېسیون د اعلان له مخې د جنورۍ ۲۷مې پورې په ټول چین کې د دې ناروغۍ پېښې له څلورنیم زرو واوښتې.

منګولیا، قرغزستان او شمالي کوریا له چین سره د خپلو سرحدونو بندول اعلان کړي او هانګ کانګ، مالیزیا او فیلیپین د هوبای په نوم د چین د هغه ولایت اوسېدونکو ته د ویزو ورکول بند کړي چې دا ویروس لومړی ځل په‌کې وموندل شو.

له بلې خوا له چین څخه بهر د کرونا ویروس ناروغۍ د ۴۸ مواردو راپور ورکړل شوی چې تقریباً ټول یا چیني سیلانیان دي او یا هغه کسان چې په دې وروستیو کې د چین ووهان ښار ته تللي دي.

جرمني پرون په دې هېواد کې د دې ناروغۍ د لومړني مورد راپور ورکړ، خو مخکې په کمبودیا، سریلانکا، مالیزیا، جنوبي کوریا، تایوان، ټایلنډ، نیپال، سنګاپور، ویتنام، جاپان، کاناډا، فرانسه، سعودي عربستان، متحده ایالاتو او اسټرالیا کې هم په دې ویروس اخته کسان ثبت شوي دي.

امریکا په سوریه کې د سمدستي اوربند غوښتنه کړې

ارشیف

متحده ایالاتو د سوریې د شمال لوېدیځ پر روان وضعیت اندېښنه ښودلې او په دې سیمه کې یې د سمدستي اوربند غوښتنه کړې.

د راپورونو له مخې د روسیې او ایران نیابتي وسله‌والو او حکومتي ځواکونو په ادلب او حلب ولایتونو کې پوځي عملیات پیل کړي دي.

د امریکا د بهرنیو چارو وزیر مایک پامپیو پرون د جنورۍ په ۲۷مه په یوه بیان کې وویل، دا عملیات به بشري کړکېچ رامنځته کړي او په ادلب ولایت کې چې د وسله‌والو یاغیانو وروستی سنګر دی پر سلګونه زره ملکي وګړو ناوړه اغېز کولای شي.

پامپیو ویلي دي چې دا ځواکونه بې‌حده هوايي حملې او ځمکني پوځي عملیات کوي چې په نتیجه کې یې زرګونه ملکي وګړي له دې سیمې څخه تېښتې ته اړوتي دي.

د ۱۶ هېوادونو سفیرانو عراق کې د معترضینو په وړاندې ځواک‌کارول وغندل

عراق کې اعتراضونه

په عراق کې د دوشنبې په ورځ هم د حکومت ضد اعتراضونو دوام درلود.

اعتراض کوونکي وايي د بې‌کارۍ د زیاتوالي، د خدماتو پر کموالي او په پر پراخو اداري درغلیو اعتراض لري.

دوی په عراق کې د نوي حکومت او نوي پارلمان د جوړېدو غوښتنه کوي.

دا اعتراضونه تېر کال د اکټوبر په میاشت کې پیل شول.

له هغه وخت راهیسې تر اوسه د اعتراض کوونکو او د عراق د امنیتي ځواکونو ترمنځ نښتو کې لږ تر لږه ۵۰۰ کسان وژل شوي.

ډېر وژل شوي اعتراض کوونکي دي.

د دوشنبې په ورځ په عراق کې د ۱۶ هېوادونو سفیرانو په یو شریک بیان کې د اعتراض کوونکو په وړاندې د عراقي چارواکو له‌خوا د زیات ځواک کارول وغندل.

دوی د عراق له حکومت وغوښتل چې پرېږدي عراقیان په بغداد او د دې هېواد په جنوب کې ازاد اعتراضونه وکړي.

که څه هم د دې اعتراضونو له کبله د عراق صدراعظم عادل عبدالمهدي له خپلې دندې استعفا کړې، خو نوموړی لا هم د سرپرست په توګه خپلې دندې ته دوام ورکوي.

ډونالد ټرمپ د منځني ختیځ د سولې طرحه نن اعلانوي

ښاغلي ټرمپ سپینه ماڼۍ کې د اسرائیلو له صدراعظم بینیامین نتانیاهو سره په یوه ګډه خبري غونډه کې د دې طرحې د اعلانولو خبره وکړه.

د امریکا ولسمشر ډونالد ټرمپ ویلي، د منځني ختیځ د سولې طرحه به نن سې شنبه اعلان کړي.

د دې طرحې اعلان د ډېرې مودې راهیسې ځنډېدلی دی.

د فلسطیني مشرانو پر مخالفت سربېره ټرمپ پرېکړه کړې چې دا طرحه اعلان کړي.

فلسطیني مشرانو د منځني ختیځ د سولې د پلان اعلان د یو خپلواک فلسطیني دولت د جوړېدو د مخنیوي دسیسه بللې ده.

ښاغلي ټرمپ سپینه ماڼۍ کې د اسرائیلو له صدراعظم بنیامین نتانیاهو سره په یوه ګډه خبري غونډه کې وویل: "دا طرحه د منځني ختیځ لپاره ډېره مهمه ده. مخکې له دې چې تاسو رښتیا هم منځني ختیځ کې سولې ته ورسېږئ، اسرائیل او فلسطینیان باید سوله وکړي. خلکو پر دې طرحه کلونه کار کړی، کلونه. او زه فکر کوم چې موږ تقریباً د کار پای ته نږدې یوو، خو موږ باید نور خلک هم وهڅوو چې توافق وکړي."

ولسمشر ټرمپ زیاته کړه، د منځني ختیځ د سولې دا پلان د فلسطینیانو لپاره ډېر ښه دی.

نوموړي وویل، ښايي فلسطینیان په لومړیو کې دا طرحه ونه‌مني، خو فکر کوم اخر کې به‌یې ومني.

فلسطینیان وېره لري چې د ټرمپ د سولې په دې پلان کې به پر لوېدیځه غاړه د اسرائیلو د مالکیت دعوه په رسمیت وپېژندل شي.

اسرائیلو لوېدیځه غاړه په ۱۹۶۷ میلادي کال د اسرائیلو او عربو د جګړې پر مهال نیولې ده.

د هند کرکټ لوبډلې ته د پاکستان کرکټ بورډ خبرداری

د پاکستان کرکټ بورډ

د پاکستان د کرکټ بورډ مرستيال وسيم خان وايي، که هندۍ لوبډله د اسيا کپ پر مهال په پاکستان کې لوبو ته زړه ښه نه‌کړي، نو د دوی لوبډله به هم د ۲۰۲۱ میلادي کال ۲۰ اوريز نړيوالو لوبو لپاره هندوستان ته ولاړه نه‌شي.

وسيم خان نن په لاهور کې خبريالانو ته وويل، پاکستان چمتو دی چې په ډاډمنه فضا کې نړيوال کرکټ ترسره کړي.

په همدې حال کې بیا د افغانستان کرکټ بورډ وايي، که چېرې د کرکټ اسیايي شورا پرېکړه وکړي چې دغه کپ په پاکستان کې ترسره شي، نو افغان لوبډله به په دغو سیالیو یې کې ګډون وکړي.

د هندوستان کرکټ بورډ لا تر اوسه په دې اړه څه نه‌دي ويلي، خو د دواړو هېوادونو د سياسي او ډيپلوماتيکو اړيکو د ترینګلتیا له کبله هند او پاکستان يوازې په ليګونو او ټورنمنټونو کې سره مخ کېږي.

هندۍ لوبډله تر ۲۰۰۸ میلادي کال وروسته د ټسټ لوبو لپاره پاکستان ته نه‌ده تللې.

د امریکا ولسمشر او پخواني ملي امنیت سلاکار ترمنځ نوې لانجه

د امریکا ولسمشر ټرمپ او د هغه د ملي امنیت پخوانی سلاکار جان بولتون.

د امریکا د ملي امنیت پخواني سلاکار جان بولتون ادعا کړې چې ډونالد ټرمپ اوکراین ته د خپل سیاسي سیال په اړه د څېړنو نه‌کولو په غبرګون کې د مرستو د کنګلېدو ویلي دي.

د نیویارک ټایمز د راپور له مخې ښاغلي بولتون دغه تور په خپل هغه کتاب کې لیکلی چې لا چاپ شوی نه‌دی.

په دې کتاب کې ښاغلي بولتون ادعا کړې چې ډونالد ټرمپ ورته ویلي، له اوکراین سره هغه سلګونه میلیونه ډالره امنیتي مرسته به وځنډوي تر هغو چې څېړنو کې ورسره مرسته ونه‌کړي.

په دې څېړنو کې د ټرمپ د پخواني مرستیال جوبایډن او د هغه د زوی په اړه تحقیقات هم شامل و.

د ښاغلي ټرمپ حقوقي ټیم له دې وړاندې په وار وار ټینګار کړی چې ټرمپ هېڅکله د اوکراین مرستې په څېړنو پورې نه‌دي تړلي.

د بخښنې نړیوال سازمان: پاکستان دې ژر 'منظور پشتین' خوشې کړي

د پښتون ژغورنې غورځنګ مشر منظور پشتین

د بخښنې نړیوال سازمان د پښتون ژغورنې غورځنګ د مشر منظور پشتین د ژر تر ژره او بې‌قید او شرطه خوشې کېدو غوښتنه کړې ده.

دغه سازمان ویلي، منظور پشتین د بیان ازادۍ له حقه دفاع کوله او بې‌موجبه نیول شوی دی.

منظور پشتین تېره شپه په پېښور کې له یوه کوره پولیسو نیولی دی.

د پښتون ژغورنې غورځنګ د پاکستان پوځ په سلیقوي چلند تورن کړی او ویلي دي چې دغه پوځ ځیني کسان نیسي، خو د هغو ډلو ملاتړ کوي چې افغانستان کې جنګېږي.

پشتین د پاکستان پر پوځ او طالبانو نیوکې کولې او څو ځله‌یې د پاکستان د پوځ د کړنو پر ضد پراخ اعتراضونه رهبري کړي دي.

له دې وړاندې افغان حکومت او امریکا هم د پاکستان په حکومت نیوکې کړي چې د ترهګرو ملاتړ کوي، خو د پښتون ژغورنې غورځنګ لومړنی ځایي حرکت دی چې د پاکستان په حکومت تندې نیوکې کوي.

پاکستان حکومت د پښتون ژغورنې غورځنګ مشر 'منظور پشتین' نیولی

د پښتون ژغورنې غورځنګ مشر منظور پشتین

د پاکستان پولیسو د پښتون ژغورنې غورځنګ مشر منظور پشتین نیولی دی.

د هغه د کورنۍ غړو ویلي چې نوموړی تېره شپه په پېښور کې په خپل کور کې و چې پولیسو پرې چاپه ووهله.

پشتین د پاکستان پر پوځ او طالبانو نیوکې کولې او څو ځله‌یې د پاکستان د پوځ د کړنو پر ضد د پراخو اعتراضونو مشري کړې ده.

له دې وړاندې افغان حکومت او امریکا هم د پاکستان په نظام نیوکې کړي چې د ترهګرو ملاتړ کوي، خو د پښتون ژغورنې غورځنګ لومړنی ځایي حرکت دی چې د پاکستان په حکومت تندې نیوکې کوي.

نور راوښيه

XS
SM
MD
LG