د لاسرسۍ وړ لېنکونه

تازه خبر
چهارشنبه ۲ سلواغه ۱۳۹۸ کابل ۰۷:۳۷

نړۍ

ایران کې د لوېدلې اوکرایني الوتکې ټوله ۱۷۶ سورلۍ وژل شوي

دا لا نه‌ده معلومه چې په الوتکه کې د کومو کومو هېوادونو اتباع ناست و.

په تهران کې د لوېدلې اوکرایني الوتکې ټوله ۱۷۶ سورلۍ وژل شوې ده.

دا خبره د ایران دولتي خبري اژانس ایرنا د ایراني چارواکو په حواله لیکلې ده.

د ایران د هوايي چلند ادارې ویاند رضا جعفرزاده وویل چې نن سهار په پاو باندې پنځو بجو د تهران له امام خمیني نړیوال هوايي ډګره د اوکراین نړیوال هوايي شرکت یوه بویینګ «۸۰۰-۷۳۷» د کیف په مقصد والوته، خو له پرواز لږ وروسته ولوېده.

لومړی د پېښې علت تخنیکي عوامل یاد شوي وو.

د اوکراین ولسمشر ولادیمیر زلنسکي د اوکراینۍ الوتکې د ټولو سورلیو د وژل کېدو خبره تأیید کړې او د وژل شویو له کورنیو سره‌یې خپله خواخوږي ښودلې ده.

دا لا نه‌ده معلومه چې په الوتکه کې د کومو کومو هېوادونو اتباع ناست و.

د ورځې تازه خبرونه دلته ولولئ

چین کې یوې محکمې د انټرپول مخکېنی مشر محاکمه کړ

د محکمې له لوري په یوه بیان کې لیکل شوي چې مینګ هوي ویلي چې د استېناف محکمې ته تګ نه‌غواړي.

د چین یوې محکمې د نړیوالو پولیسو یا انټرپول یو مخکېنی مشر مینګ هونګوی د رشوت اخیستلو او له صلاحیته د ناوړه کار اخیستلو په تور محاکمه کړ.

محکمې نن د جنورۍ په ۲۱مه پر هغه د دریالس نیم کاله زندان او ۲۹۰ زره ډالرو جریمې حکم وکړ.

د محکمې له لوري په یوه بیان کې لیکل شوي چې مینګ هوي ویلي چې د استېناف محکمې ته تګ نه‌غواړي.

د چین محکمې ویلي چې مینګ له ۲۰۰۵ تر ۲۰۱۷ میلادي کاله د انټرپول د ریاست پر مهال د دوه میلیارده ډالرو په ارزښت جایدادونه رشوت اخیستي او نوره سوء استفاده‌یې هم کړې ده.

انټرپول چې مرکز یې په فرانسه کې دی، دوه کاله مخکې ویلي و چې د مینګ ښځې خبر ورکړی چې مېړه‌یې چین ته تللی او هلته بې‌درکه شوی دی.

د برازیل لیګ یو لوبغاړي ته د ۷.۵ میلیونه ډالرو وړاندیز

ارشیف

د برازیل لیګ یو لوبغاړي ته د ۷.۵ میلیونه ډالرو وړاندیز شوی.

برازیلي رسنیو راپور ورکړی چې د سائوپائولو کلپ دغه نامتو لوبغاړي ته د اماراتو لیګ له لوري په کلني ډول ۴.۵ میلیونه ډالر معاش وړاندیز هم شوی.

د اماراتو له دغه کلپ سربېره یو قطري او یو چیني کلپ هم د الکساندر پاتو د راجلبولو هوډ کړی.

خو نوموړي تر اوسه دغو غوښتنو ته ځواب نه‌دی ورکړی.

دغه لوبغاړي د برازیل په سږني فصل کې ۵ ګولونه وهلي دي.

تهران کې د اوکراینۍ الوتکې د نسکورېدو په اړه تازه جزئیات

په تهران کې د ویشتل شوې اوکراینۍ الوتکې ټوټې

د ایران د ملکي هوايي چلند ادارې تأیید کړه چې د اوکراین د نړیوالې هوايي کرښې الوتکه چې د جنورۍ په ۸مه نېټه له تهرانه تر پرواز لنډ وخت وروسته راوغورځېده، په دوو مزائیلو ویشتل شوې وه.

د ایران دې ادارې د پېښې په اړه په دوهم ابتدايي راپور کې ویلي چې لا هم د پېښې په اړه څېړنې کوي.

د اوکراین د نړیوالې هوایې کرښې په الوتکه کې ۱۷۶ کسان ووژل شول.

د ایران د ملکي هوايي چلند ادارې په خپل راپور کې ویلي چې الوتکې ته دوه "تور ام ون" مزائیل ورویشتل شوي وو.

دا د لنډ واټن ویشتلو مزائيل دي چې په پخواني شوروي اتحاد کې به جوړېدل.

دا مزائیل په اساسي ډول د الوتکو او کروز مزائیلو د په نښه کولو لپاره جوړ شوي دي.

د ایران تر راپور مخکې، نیویارک ټایمز په یوه راپور کې چې وېډیو هم ورسره خپره شوې وه، ویلي و چې الوتکې ته دوه مزائيل ورویشتل شوي وو.

کاناډا او اوکراین چې په الوتکه کې یې وګړي وژل شوي وو، د ایران له حکومته غوښتنه کړې وه چې د الوتکې د پرواز د ثبت ماشینونه "بلک باکس" او د غږ د ثبت وسایل د څېړنې لپاره بهرنیو کارپوهانو ته وسپاري.

افغانستان، اوکراین، بریتانیا، کاناډا او سویډن چې اتباع‌یې په پېښه کې ووژل شول، په یوه ګډ بیان کې په دې اړه د خپلواکو او بې‌پرې څېړنو غوښتنه کړې ده.

د روسیې په تومسک کې اور لګېدنې ۱۱ کسه وژلي

کور یوې چینايي کمپنۍ کرایه کړی و او څوارلس تنه د چین، تاجکستان او ازبکستان اتباع په کې اوسېدل.

د روسیې د سایبریا په تومسک سیمه کې په یوه کور کې د اور لګېدو له امله ۱۱ کسه وژل شوي او دوه نور ټپیان دي.

دا خبر په سایبریا کې د بېړنیو خدماتو وزارت نن د جنورۍ په ۲۱مه خپور کړی دی.

اور د لرګي په یو کور کې د شپې لګېدلی او په لنډ وخت کې لمبې تقریباً ۲۸۰ متر مربع سیمې ته خپرې شوې وې.

د اور لګېدو له امله کور پر هغو کسانو چې هلته اوسېدل رانړېدلی او مرګ ژوبله‌یې پېښه کړې ده.

کور یوې چینايي کمپنۍ کرایه کړی و او ۱۴ تنه د چین، تاجکستان او ازبکستان اتباع په‌کې اوسېدل.

په نووسېبېرسک کې د ازبکستان قونسلګرۍ، د روسیې تاس خبري اژانس ته ویلي چې هغه ۱۱ تنه چې وژل شوي د ازبکستان اتباع دي.

د امریکا په مشرانو جرګه کې د ټرمپ د استیضاح بهیر بیاپیلېږي

د امریکا د مشرانو جرګې د تالار انځور-ارشیف

په پام کې ده چې نن د جنورۍ په ۲۱مه نېټه د امریکا په مشرانو جرګه کې د ولسمشر ډونالد ترمپ د استیضاح بهیر بیا پیل شي.

د ټرمپ د استیضاح بهیر به په اوونۍ کې شپږ ورځې دوام وکړي او سناتوران به یوازې د هرې یکشنبې په ورځ رخصتي کوي.

پرون دوشنبې د ټرمپ مدافع وکیلانو د ډیموکراتانو پر ضد چې غواړي د اوکراین پر وړاندې د چلند په خاطر ټرمپ محکوم او له دندې لیرې کړي د دفاع مفصله طرح وړاندې کړه.

د استازو په جرګه کې ډیموکراتانو پر ښاغلي ټرمپ تور لګولی چې د امریکا په ټاکنو کې د لاسوهنې لپاره‌یې له واک څخه ناوړه استفاده کړې او د اوکراین پر حکومت‌یې فشار راوستی دی.

بغداد کې د امریکا سفارت ته نږدې توغندي توغول شوي

ارشیف

د عراق امنیتي چارواکي وايي، نن سه شنبې د پلازمېنې بغداد د مرکز په امنیتي کمربند کې دننه چې دولتي ودانۍ او نړیوالې مؤسسې په‌کې دېره دي، درې کاتیوشا ډوله توغندي ولګېدل.

د عراقي پولیسو سرچینو روېټرز خبري اژانس ته وویل، دا توغندي بغداد ته نږدې له زعفرانیه ناحیې څخه توغول شوي وو او د امریکا سفارت ته نږدې لګېدلي دي.

یوه سیمه‌ییز ټلوېزیوني چینل راپور ورکړی چې په برید کې هېڅوک نه‌دي ټپیان شوي او یوازې مالي زیان‌یې اړولی دی.

نن سهارنی برید یوه ورځ وروسته له هغه کېږي چې په عراق کې د حکومت پر ضد د اعتراضونو لړۍ بیا پیل شوه او په دې ترڅ کې په بغداد او نورو ښارونو کې د ۲ پولیس افسرانو په ګډون شپږ کسان مړه او لسګونه نور ټپیان شول.

د روسیې اساسي قانون کې د تعدیل طرحه پارلمان ته وړاندې شوه

د روسیې ولسمشر ولادیمیر پوتین

د روسیې ولسمشر ولادیمیر پوتین د دې هېواد په اساسي قانون کې د تعدیل یوه ټولګه پارلمان ته وړاندې کړې ده.

ښاغلي پوتین د جنورۍ په ۱۵مه خپل ولس ته په وینا کې د روسیې په اساسي قانون کې د پراخو اصلاحاتو د راوستلو غوښتنه کړې وه.

د دې وړاندیز شویو اصلاحاتو لایحه پرون دوشنبه د روسیې د پارلمان په وېب‌پاڼه خپره شوه. د دې لایحې پر بنسټ په روسیه کې د یو شخص د ولسمشرۍ دوره دوه پړاونو ته راکمېږي او پارلمان دا واک ترلاسه کوي چې صدراعظم وټاکي.

تمه کېږي چې د روسیې د استازو جرګه یا دوما به له نن سې شنبې څخه پر دې وړاندیز شوې ټولګې بحثونه پیل کړي.

د ولسمشر پوتین د تېرې اوونۍ وینا د دې سبب شوه چې د روسیې صدراعظم دمیتري مدودف له خپلې دندې استعفا وکړي او ځای یې میخایل میشوستین ونیسي.

کرملېن همدارنګه اعلان وکړ چې د روسیې لوی څارنوال یوري چایکا له ۱۴ کلونو وروسته له خپلې دندې استعفا کوي.

د بې‌پولې ژورنالېستانو سازمان اظهار الحق وحید خوشې کېدل غوښتي

د بې‌پولې ژورنالېستانو سازمان له پاکستانه غوښتي چې سمدستي دې دغلته یو نیول شوی خبریال خوشې کړي.

د راپورونو له مخې اظهار الحق وحید څلور ورځې مخکې د هغه څه په خاطر چې پر ټولنیزو رسنیو د پاکستان د دولت ضد مطالبو خپرول بلل شوي، په لاهور ښار کې ونیول شو.

د یوې سیمه‌ییزې محکمې قاضي د دوشنبې په ورځ د هغه د خوشې کولو غوښتنه رد کړه او د بندي کولو امر یې وکړ.

د بې‌پولې خبریالانو نړیواله ټولنه وايي، ښاغلي وحید له "چینل ۵" ټلوېزیوني شبکې او خبرین ورځپاڼې سره کار کاوه او ښايي درې کاله په بند محکوم شي.

د بې‌پولې خبریالانو د سازمان بیان کې همدارنګه ویل شوي، د دې پاکستاني خبریال نیول د هغو خبریالانو د وېرولو د ښکاره هڅې څرګندونه کوي چې له سانسوره سرغړاوی کوي.

د بې‌سرحده ژورنالېستانو په بیان کې د اظهار الحق د مدافع وکیل له خولې ویل شوي، مؤکل‌یې ځکه له سزا سره مخ دی چې نوموړي د محکمې د هغه حکم په اړه چې څو ورځې مخکې یې پروېز مشرف له اعدام معاف کړ انتقادي مطلب خپور کړی و.

پاکستان د بیان د ازادۍ له پلوه د نړۍ د ۱۸۰ هېوادونو په منځ کې ۱۴۲ ځای لري.

په یمن کې د یوه راکټي برید د قربانیانو شمېر ۱۱۶ تنو ته ورسېد

ارشیف

په یمن کې د یوه راکټي برید د قربانیانو شمېر ۱۱۶ تنو ته ورسېد.

د راپورونو له مخې دا توغندی د شنبې په شپه د مارب په ښار کې پر یوې مدرسې لګېدلی دی.

توغندی په داسې حال کې په دې مدرسه ولګېد چې د یمن ولسمشر ته وفادار ځواکونه هلته موجود وو.

چارواکو همدارنګه ویلي چې ۱۴۷ کسان تر دې مهاله ټپیان دي چې د ځینو روغتیايي وضعیت خراب دی.

د سعودي عربستان د بهرنیو چارو وزارت دا برید یو ترورېستي برید او د ایران پلوه حوثي ملېشو کار بللی دی.

تر دې مخکې د ملګرو ملتونو سازمان هم دا برید غندلی و.

یمني حوثي یاغیانو چې د ایران رژیم‌یې ملاتړ کوي، د دې برید مسؤلیت نه‌دی منلی.

ایران ته په جاسوسۍ تورن افغان جرمني کې محکمې ته حاضر شو

د جرمني ملي بیرغ

یو افغان ترجمان چې د جرمني له پوځ سره‌یې کار کاوه، پرون ایران ته د جاسوسۍ په تور د جرمني په یوه محکمه کې حاضر شو.

"عبدال س" چې ۵۱ کاله عمر لري، د دوشنبې په ورځ د خیانت او د دولتي اسرارو څخه د سرغړاوي په ۱۸ مواردو تورن شو.

دا کس د ۲۰۱۹ میلادي کال په جنورۍ میاشت کې له خپلې ۴۰ کلنې مېرمنې "اسیه س" سره یوځای نیول شوی وو.

"عبدال س" تورن دی چې د ۶۰ زرو یورو په بدل کې یې د چاودېدنکو موادو په شمول، د جرمني د پوځ اسرار د ایران له استخباراتو سره شریک کړي دي.

که نوموړی مجرم وبلل شي، په ۱۵ کاله زندان محکومېږي. د "عبدال س" پر مېرمن که جرم ثابت شي، ښايي د ۱۱ کلونو په مخه زندان ته واستول شي.

تر اوسه پورې دې ښځې او خاوند د هغو تورونو په اړه چې پرې لګېدلي څه نه‌دي ویلي.

د بریتانیا صدراعظم: روسیه دې بیا په بریتانیا کې کیمیاوي برید نه‌کوي

د بریتانیا صدراعظم بورېس جانسون د روسیې له ولسمشر ولادیمیر پوتین سره په خپله لومړنۍ رسمي لیدنه کې.

د بریتانیا صدراعظم بورېس جانسون د روسیې له ولسمشر ولادیمیر پوتین سره په خپله لومړنۍ رسمي لیدنه کې هغه ته ویلي چې روسیه دې بیا کوم کیمیاوي برید ونه‌کړي.

روسیې په ۲۰۱۸ میلادي کال کې د بریتانیا په سالزبري ښار کې په یوه پخواني روسي جاسوس د کیمیاوي ګازو په واسطه برید کړی و.

د بریتانیا د صدراعظم بورېس جانسون دفتر په یوه بیان کې ویلي چې جانسون د برلین د ناستې په يوه څنډه کې یکشنبه ماښام پوتین ته وویل: "تر څو چې روسیه خپلو بې‌ثباته کوونکو فعالیتونو ته دوام ورکوي د لندن او مسکو اړیکې به عادي نه‌شي."

د دې اعلامیې له مخې جانسون پوتین ته دا هم ویلي د سالزبري ښار د پېښې په اړه چې روسیې د بریتانیا په خاوره کې د خلکو د ظالمانه وژنې کوښښ کړی و د بریتانیا دریځ نه‌دی بدل شوی.

کرملېن د بریتانیا تورونه بې‌ځایه بللي و چې ګواکې د روسیې د پوځي استخباراتو یو پخوانی جاسوس سرګي سکريپال په ۲۰۱۸ میلادي کال کې له خپلې لور سره یوځای د نوویچوک په نوم د وژونکي کیمیاوي ګاز په واسطه بې‌سده شوي وو.

سکریپال او لور یې یولیا تر دې برید وروسته ډېر وخت په روغتون کې په کوما حالت کې و او اوس د بريتانیا د دولت له لوري کوم نامعلوم ځای کې مېشت کړای شوي.

په ایران کې د وژل شویو ۱۱ اوکراینیانو مړي کیف ته رسېدلي

مړي په یوه پوځي الوتکه کې کیف ته ورسول شول او هلته د شپې ناوخته پورې د درناوي مراسم روان و.

په ایران کې د اوکراینۍ الوتکې د نسکورېدو په پېښه کې د ۱۷۶ وژل شویو له ډلې د ۱۱ اوکرایني اتباعو مړي پرون کیف ته ورسېدل.

مړي په یوه پوځي الوتکه کې کیف ته ورسول شول او هلته د شپې ناوخته پورې د درناوي مراسم روان و.

له ۱۱ وژل شویو اوکراینیانو نهه د اوکراین ایرلاین د بوینګ الوتکې پیلوټان او کارکوونکي و.

د جنورۍ په اتمه د سپاه پاسداران د هوايي ځواک په یوه راکټ باندې د اوکراین ایرلاین الوتکه سهار وختي نسکوره او ټوله سورلۍ یې ووژل شوه.

په وژل شویو کې ۱۳ افغانان هم شامل و.

ایران څو ورځې وروسته ومنله چې د دوی د انساني تېروتنې په سبب اوکرایني الوتکه د ایران د هوايي ځواک په راکټ لګېدلې.

ریال ماډریډ ۲ د ۱ پر وړاندې سویاته لوبډلې ته ماتې ورکړه

ارشیف

د اسپانیا لالیګا لیګ د ۲۰مې اونۍ په سیالیو کې تېره شپه ریال ماډریډ ۲ د ۱ پر وړاندې سویاته لوبډلې ته ماتې ورکړه.

دا سیالي تېره شپه ترسره شوه.

په یاده لوبه کي د ریال ماډریډ لپاره دواړه ګول وهني کاسمیرو د لوبې په ۵۷ مه او ۶۹ مه دقیقه کې ترسره کړې.

د سویا لپاره بیا یوازینی ګول لوک ډي جانګ د لوبي په ۶۴تمه دقیقه وواهه.

د دې لیګ په یوه بله مهمه لوبه کي نن شپه ۱۲:۳۰ دقیقې بارسلونا د ګراناډا فوټبال ټيم سره لوبیږي.

دا لوبه د بارسلونا په کورني لوبغالي نیو کمپ کي ترسره کېږي.

بارسلونا به نننۍ لوبه د نوي روزونکي کیکه سټين تر روزوني لاندي د لومړي ځل لپاره ترسره کړي.

کیکه سټین بارسلونا تېره اونۍ کي د والوردې پر ځای وټاکه.

بارسلونا کلب والووردې د ورستیو ماتو له امله لرې کړي.

یمن کې حوثي یاغیانو لسګونه دولتي سرتېري وژلي

ارشیف

د یمن د حوثي یاغیانو په یوه برید کې د دغه هېواد لسګونه دولتي سرتېري ووژل شول.

د سعودي عربستان د دولتي د ټلویزیون د راپور له مخې، په دې توغندويي برید کې چې پرون (شنبه) په مارب ښار کې د عبدربه منصور هادي د حکومتي ځواکونو پر یوه اډه وشو، ۶۰ تنه وژل شوي دي.

اسوشیټیډ پریس خبري اژانس وايي، لږترلږه ۲۵ تنه وژل شوي خو یمني چارواکي وايي چې ښايي د وژل شویو کسانو شمېر تر دې واوړي.

د جرمني ډي پي اې خبري اژانس وايي چې لږترلږه ۴۰ یمني سرتېري وژل شوي او ۵۰ نور ژوبل دي.

خو رویټرز د سعودي عربستان د الاخباریه دولتي تلویزیون په قول ویلي چې د مارب ښار په اډه کې ۶۰ تنه وژل شوي دي.

الاخباریه د بې نومو سرچینو په قول دا هم ویلي چې دا برید د بالسټیک توغندي او بې پېلوټه الوتکو په وسیله شوی دی.

مارب د یمن یو مرکزي ولایت دی چې مرکز یې هم مارب نومېږي.

ټرمپ د امریکا او جاپان ترمنځ د امنیتي تړون ۶۰ مه کالیزه ولمانځله

د امریکا ولسمشر ډونالډ ترمپ

د امریکا ولسمشر ډونالډ ترمپ د متحدو ایالتونو او جاپان ترمنځ د امنیتي تړون شپېتمه کالیزه ولمانځله.

پخوا پر دې تړون انتقادونه شوي او د دوو پخوانیو متحدانو ترمنځ د لا ژور ايتلاف غوښتنه شوې ده.

ټرمپ پرون (شنبه) په یوه بیان کې وویل«په داسې حال کې چې امنیتي چاپېریال د خرابېدو په لور روان دی او نوې ننګونې سر راپورته کوي، ضروري ده چې زموږ ايتلاف لا غښتلی او ژور شي.»

ده همداراز ویلي، ډاده دی چې په راتلونکو میاشتو او کلونو کې به په دوه اړخیز امنیت کې د جاپان ونډه زیاته شي او ايتلاف به نوره وده وکړي.

جاپان او امریکا لومړی په ۱۹۵۱ میلادي کال تړون لاسلیک کړ خو په ۱۹۶۰ میلادي کې، د جاپان د اوسني صدراعظم شینزو ابې نیکه د صدارت او همداراز د نوبوسوکي کیشي د صدراعظمۍ په دورو کې پرې بیا کتنې وشوې.

نور راوښيه

XS
SM
MD
LG