د لاسرسۍ وړ لېنکونه

تازه خبر
یکشنبه ۲۹ مرغومی ۱۳۹۸ کابل ۰۹:۵۲

افغانستان

کندز کې خلکو د وسله والو غلاوو او ځورونو ډېرېدو له امله مظاهره وکړه

اعتراض کوونکو ویل، له څو کلونو راهېسې په دې ولایت کې د طالبانو د امنیتي ګواښونو سربېره د جنایتکارو ډلو له خوا له وسلوالو غلاوو، هدفي وژنو، باج اخیستې او ځورونو سره مخ دي.

د کندز لسګونو استوګنو نن ددغه ولایت په مرکز کې د وسلوالو غلاوو او جنايي جرمونو پر زیاتیدو د اعتراض په توګه مظاهره وکړه.

اعتراض کوونکو ویل، له څو کلونو راهېسې په دې ولایت کې د طالبانو د امنیتي ګواښونو سربېره د جنایتکارو ډلو له خوا له وسلوالو غلاوو، هدفي وژنو، باج اخیستې او ځورونو سره مخ دي.

د عبدالغفور په نوم یوه اعتراض کوونکي ازادي راډیو ته وویل، په دې وروستیو کې کندز ښار کې وسلوالې غلاوې او هدفي وژنې اوج ته رسېدلي او امنیتي ځواکونه یې مخنیوي کې پاتي راغلي دي.

ونه توانیدو چې پر دې اعتراض د کندز ولایتي چارواکي د تبصرې لپاره ومومو.

کندز استوګنو تر دې مخکې هم دغلته د زیاتېدونکو جنايي جرمونو پر ضد اعتراضونه کړي دي.

د ورځې تازه خبرونه دلته ولولئ

"طالبان باید د افغانستان له حکومت سره د رسمي مذاکرو د پيل لپاره اوربند ومني"

د سولې په چارو کې د دولت وزارت ویانده ناجیه انوري

د سولې په چاروکې د دولت وزارت وايي، د اوربند اعلان داسې شرط دی چې طالبان یې باید د افغانستان له حکومت سره د رسمي مذاکرو د پیل لپاره ومني.

د دې ادارې ویاندې ناجیه انوري پرون د جنورۍ په ۱۸مه، ازادي راډیو ته په مرکه کې وویل چې د افغانستان حکومت دا شرط ددې لپاره ایښې چې د بې ګناه خلکو د قتل او د هغوث پر ضد د تشدد لړۍ بنده شي.

اغلې انوري وویل: "موږ بیا تاکید کوو چې زموږ شرط له طالبانو سره د مذاکرو لپاره اوربند دی. پردې چې ګویا طالبان د تشدد کمول مني، زموږ موقف دا دی چې د افغانستان دولت او خلک یې نه مني."

یوشمېر خبري رسنیو تېره اوونۍ په قطر کې د طالبانو د سیاسي دفتر په حواله وویل چې طالبانو په معین وخت کې، د تشدد د کمولو سره موافقه کړې ده.

د رپوټونو پر اساس، د امریکا د حکومت ځانګړی استازی او په قطر کې د وسله والو طالبانو د سیاسي دفتر غړي د یوې موافقې لاسلیک ته نږدې شوي دي.

فراه کې د ایراني ریالو پرځای د افغانۍ دودولو هڅې پیل شوې

فراه په څلورو ولسوالیو کې د ایراني ریال پر ځای د افغانۍ د دودولو لپاره مبارزه پیل شوه.

د فراه والي محمد شعیب پرون، د جنورۍ په ۱۸مه، ازادي راډیو ته وویل چې د انار درې، شیب کوه، قلعه کاه او لاش جوین ولسوالیو خلکو چې له ایران سره پر ګډه پوله پرتې دي، په بازارونو کې د ایراني ریال د کاروبار د بندولو نیت کړی دی.

محمد شعیب وویل چې په دې ولسوالیو کې په سلو کې نوي کاروبار د افغانیو پر ځاي په ایراني ریال کېږي.

محمد شعیب د فراه د څلورو ولسوالیو له یوشمېر خلکو سره په ګډه غونډه کې وویل: "تاسو ته معلومه ده چې ایرانی تومان (ریال) ورځ په ورځ په کښته روان دی، دا تاسو ته هم تاوان دی او افغانۍ خپل حیثیت ساتلی دی. تاسو ولیدل چې په جنوبي او ختیځو ولایتونو کې خلکو په خپله یودم کلداره بنده کړه او افغانۍ یې ترویج کړې او اوس د کلدارې ارزښت د افغانۍ په مقابل کې تر دوه برابره ټيټ دی."

د افغانستان په یوشمېر ختيځو او جنوبي ولایتونو کې د پاکستانۍ کلدارې د بندولو لپاره پراخ کمپاینونه وشول ​

هرات کې حکومتي چارواکي د ۲۰ طالبانو د وژلو ادعا کوي

د هرات سیمه ییز چارواکي په دې ولایت کې د ۲۰ وسلوالو طالبانو د وژل کېدو ادعا کړې.

د هرات د والي ویاند جیلاني فرهاد نن ازادي راډیو ته وویل، طالبانو ته زیاته مرګه ژوبله په کوه زور ولسوالۍ کې اوښتې ده.

"د چشت او کوه زور ولسوالیو کې د هوايي توپخانې په دوه بریدونو کې شل تنه وسلوال طالبان وژل شوي، چې ۱۵ په کوه زور او ۵ تنه په چشت کې وژل شوي دي".

ښاغلي فرهاد زیاته کړه چې دا بریدونه پرون جمعه له غرمې وروسته شوي دي.

وسلوالو طالبانو تر اوسه په دې اړه څه نه دي ویلي.

په افغانستان کې د روانې جګړې په ترڅ کې حکومتي او طالب لوری پرلپسې یو بل ته د مرګ ژوبلې اړولو ادعاوې کوي چې ډېر کله یې په خپلواکه توګه سپیناوی ستونزمن وي.

سهیل شاهین: هیله مند یو د جنورۍ ترپایه امریکایانو سره هوکړې ته ورسېږو

د طالبانو د قطر دفتر ویاند سهیل شاهین یوې پاکستانۍ ورځپاڼې ته ویلي، دوی هیله لري چې د جنورۍ میاشتې تر پایه به له امریکايي مرکچیانو سره یوې هوکړې ته ورسیږي.

پاکستانۍ ډان ورځپاڼې نن د ښاغلي شاهین دا څرګندونې وروسته له هغې خپري کړي چې د زلمي خلیلزاد په مشرۍ امریکايي پلاوي په قطر کې له طالب استازو سره تازه دوه ورځنۍ خبرې کړې دي.

ښاغلي شاهین ددې دوه ورځنیو خبرو په اړه پر خپلې ټویټرپاڼې ویلي، د جنورۍ په ۱۶مه او ۱۷ مه دا خبرې ګټورې وې. نوموړي ویلي، خبرې د سولې د هوکړې لاسلیکولو په مراسمو متمرکزې وې، خو نور جزییات یې نه دي ورکړي.

د زلمي خلیلزاد په مشرۍ امریکايي هیئت ددې خبرو په اړه په عامه توګه څه نه دي ویلي، خو رویټرز خبري اژانس د دوو سرچینو له قوله لیکلي، طالبان چمتو دي چې له امریکايي ځواکونو سره لس ورځنی اوربند وکړي، همدارنګه له افغان ځواکونو سره تاوتریخوالي راکم کړي او که هوکړه وشي، د افغانستان له دولتي چارواکو سره خبرې پیل کړي.

په ډان ورځپاڼه کې د ښاغلي شاهین په تازه څرګندونو کې ویل شوي، طالبان چمتوي دي چې له امریکايي لوري سره ددې هوکړې تر لاسلیک مخکې وسلوال بریدونه ودروي.

فراه کې پوځي چارواکي په یوه هوايي برید کې د ۴ طالبانو د وژلو ادعا کوي

په فراه کې د ملي اردو چارواکي وايي، دغلته په یوه هوايي برید کې څلور وسله وال طالبان وژل شوي دي.

په فراه ولایت کې د ملي اردو د دویمې لېوا ویاند حشمت الله احمدي ازادي راډیو ته وویل، دا هوايي برید د جمعې په ماښام د فراه ښار په کاریز سیمه کې شوی دی.

"تېره ورځ د افغان ځواکونو په همکارۍ د ناټو د قاطع ملاتړ ماموریت ځواکونو په هوايي برید کې څلور تنه طالب وسله وال وژل شوي دي".

د ښاغلي احمدي په وینا په دې هوايي برید کې یو وسلوال ټپي شوی هم دی.

طالبانو تر اوسه په دې برید کې د خپلې مرګ ژوبلې په اړه څه نه دي ویلي.

په سیمه کې د ازادي راډیو خبریال وايي، وسله وال طالبان د فراه ولایت په زیاتو سیمو کې فعالیتونه لري.

طالبانو په روان میلادي کال او تېر کال کې دوه ځلې پر فراه ښار پراخ بریدونه کړي وو.

خوست کې د طبیعي ځنګلونو خوندي کولو او بیارغولو هڅې پیل شوي

د خوست د کرنې، اوبولګولو او مالدارۍ ریاست وايي، د دې ولایت د طبیعي ځنګلونو د خوندي کولو او بیا رغولو لپاره یې هلې ځلې پیل کړې دي.

د خوست د کرنې رییس حفيظ الله شاه نوري نن ازادي راډیو ته وویل، په همدې هدف د دې ولایت په پنځو ولسوالیو کې د جلغوزیو او چهارمغزو د دوه میلیونه او ۱۶۰ زره نیالګیو د تولید له پاره ۳۶۰ بزګرانو ته کورنۍ قوریې جوړې شوې دي.

نوموړي وویل، هر یوه قوریه د شپږ زره نیالګیو د تولید وړتیا لري او دوه زره او ۷۰۰ هکټاره ځمکه به پر ځنګل وپوښل شي.

د دې پروژې ټولیز لګښت ۱۴.۵ میلیونه افغانۍ ده چې په ترڅ کې یې هر قوریه دار ته د جلغوزې دوه کیلو تخم، د چهارمغزو ۳۰ کیلو تخم او دغه شان ۲۵ کیلو ګرامه سپېنې او تورې سرې ورکړل شوي دي.

د خوست د کرنې رییس وویل، ددې پروژې په لومړي پړاو کې خلکوته عامه پوهاوی، دویم پړاو کې روزنیز پروګرامونه او درېیم پړاو کې د بزګرانو ۲۰ سیمه ییز ښوونځي جوړول شامل و چې بشپړ شوي دي.

خوست ولایت د جلغوزیو او چارمغزو ډېر څنګلونه لري، خو د دغو ځنګلونو یوه برخه له منځه تللې.

د سوداګرۍ او صنایعو خونه: سر له ننه به د ګازو په بیه کې د پام وړ کموالی راشي

د افغانستان د سوداګرۍ او صنایعو خونه وايي، سر له نن شنبې به په کابل ښار کې د ګازو په قیمت کې د پام وړ کموالی شي.

د دې خونې ویاند جان اقا نوید نن ازادي راډيو ته وویل: "په کابل ښار کې د عمده پلورونکو خصوصي شرکتونو له لوري له نن شنبې یو کیلو ګاز له ۵۶ افغانیو ښکته خرڅيږي. هغه وطنوال چې اړتیا لري کولای شي چې له دغو شرکتونو څخه ګاز واخلي."

نوموړي وویل، د ګازو بیه د سوداګرۍ خونې په همکارۍ راټېټه شوې او دوی له ټولو خصوصي شرکتونو هم غوښتي چې د ګازو بیې راټېټې کړي.

په ورته وخت کې د افغانستان د نفتو او ګازو تصدۍ مسوولین وايي، د دوی کارکوونکي په بازار کې څارنه کوي او که چا له ټاکل شوي قیمت په لوړه بیه ګاز وپلورل، نو ورسره به قانوني چلند وشي.

دا په داسې حال کې ده چې په کابل ښار کې د هوا په سړېدو سره د یو کیلو ګازو بیه ۱۱۵ افغانیو ته پورته شوې چې د کابل ښاریانو اندېښنې یې زیاتې کړې دي.

د امریکا او پاکستان د بهرنیو چارو وزیرانو د افغانستان پر سولې او ثبات خبرې کړي

قریشي او پامپيو په واشنګتن کې سره کتلي دي.

د امریکا د بهرنیو چارو وزیر مایک پامپیو ویلي چې د افغانستان د سولې او ثبات په اړه یې د پاکستان د بهرنیو چارو له وزیر شاه محمود قریشي سره خبرې کړې دي.

پامپیو په خپل ټویټر کې لیکلي چې پرون یې له قریشي سره وکتل، خو ده په دې اړه نور توضحیات نه دي ورکړي.

قریشي او پامپيو په واشنګتن کې سره کتلي دي.

د پاکستان د بهرنیو چارو وزیر بیا په ټویټر کې لیکې چې هېواد یې په ټوله سیمه کې د سولې د ټینګېدو لپاره خپلو هڅو ته ادامه ورکوي.

تر دې مخکې افغان او امریکایي چارواکو د پاکستان پر پوځیانو انتقاد کاوه چې په خپله خاوره کې د ترهګرو د پټنځایونو په له منځه وړلو کې له زړه هڅې نه کوي، خو اسلام اباد تل دا انتقادونه رد کړې دي.

د امریکا سفارت د افغانستان برښنا شرکت پر قراردادي کارکوونکو وروستی برید غندلی

په کابل کې د امریکا سفارت د افغانستان برښنا شرکت پر قراردادي کارکوونکو وروستۍ حمله په شدت غندلې ده.

د امریکا سفارت په دې اړه پر تویټر په یوه پیغام کې پرون د جنورۍ په ۱۷مه لیکلي چې د برښنا شرکت کارکوونکو د افغانستان د حکومت او د امریکا د نړیوالو پراختیايي مرستو ادارې په ګډه پروژه کې د میلیونونه انسانو د ژوند د ښه کولو لپاره کار کاوه.

د افغانستان د برښنا شرکت تائید کړې چې د پنج شنبې په ورځ یې پنځه کارکونکي په زابل کې د برښنا د مزو د ترمیم لپاره د کار په وخت د ماین په چاودنه کې ووژل شول.

په چاودنه کې د برښنا شرکت یو کارکوونکی زخمي شوی دی.

د هغوی موټر د کلات او کندهار پر سرک، د شهر صفا ولسوالۍ په سوخت پل سیمه کې په ماین الوتی و.

په افغانستان کې د امریکا سفارت ټويټ کړی چې د برښنا شرکت کارکونکي په داسې وخت کې وژل شوي چې خلکو ته یې د برق رسولو او د هغوی د ژوند د ښه کولو هڅه کوله.

د افغانستان تر ۱۹ کلنو کم عمره لوبډلې افریقا ته ماتې ورکړه

افغان لوبډله د راتلونکي چارشنبې او جمعې په ورځو د متحده عربي اماراتو او کاناډا له ټیمونو سره لوبې کوي

تر نولسو کلونو کم عمر کرکټ ټیمونو ترمنځ د یو ورځنیو نړیوالو سیالیو په لړ کې افغانستان خپلې سیالې د سویلي افریقا لوبډلې ته ماتې ورکړه.

لوبه افریقا پیل کړه او په دېرشم اور کې د ټولو لوبغاړو په سوځېدو ۱۲۹ منډې وکړې او افغانستان ته یې د ۱۳۰ منډو هدف وټاکه.

په ځواب کې افغانستان دغه هدف په پنځه ویشتم اور کې د دریو لوبغاړو په سوځېدو پوره کړ.

افغان لوبغاړو ابراهیم ځدران او عمران نیمه سلیزې ووهلې او شفیق الله غفاري بیا په توپ اچونه کې ښه وځلېد او د افریقا شپږ لوبغاړي یې وسوځول.

د افغانستان د کرکټ بورډ ویاند نن ازادي راډیو ته وویل چې افغان ټیم د لوبې لپاره بشپړه چمتووالی لري.

د افغانستان تر نولسو کلونو کم عمره ټيم بشپړه چمتووالی لري او شپږم ځل په نړیوال جام سیالیو کې ګډون کوي.

د هوتک په وینا، د افغانستان تر نولس کلنو کم عمره کرکټ ټیم د راتلونکي چارشنبې او جمعې په ورځو د متحده عربي اماراتو او کاناډا له ټیمونو سره لوبه کوي.

د جنوبي افریقا په کوربه توب د نولس کلنو کم عمر کرکټ نړیوال جام سیالۍ د شپاړسو هېوادونو په ګډون کیږي.

چارواکي: د عملیاتو پرمهال هلمند او بلخ کې ۸ طالبان وژل شوي

ارشیف

چاراکي وايي، په هلمند او بلخ کې د عملیاتو پرمهال ۸ طالبان وژل شوي دي.

د دفاع وزارت څخه په خپره شوې اعلامیه کې راغلي چې په هلمند کې په نهر سراج ولسوالي کې هوايي حمله شوې او شپږ طالبان يې وژلي.

اعلامیه لیکي چې د دغو عملیاتو پر مهال له طالبانو یې د وسلو یوه ډیپو او مهمات هم ترلاسه کړي دي.

وسله والو طالبانو تر اوسه په دې اړه رسنیو ته څه نه دي ویلي.

په همدې حال کې د ۲۰۹ شاهین قول اردو په اعلامیه کې راغلي چې په بلخ ولایت کې د چاربولک ولسوالۍ په رحمت اباد او نوارید کلیو کې د طالبانو او امنیتي ځواکونو تر منځ نښته شوې ده.

د خبرپاڼې په وینا په دې نښته کې دوه طالبان وژل شوي او د ملي اردو یو سرتېری ټپي شوی دی.

طالبانو په دې اړه هم تر اوسه رسنیو ته څه نه دي ویلي.

چارواکي: لوګر کې د طالبانو ۲ مشران وژل شوي

د لوګر مرکز پل علم

په لوګر کې د طالبانو دوه ډلمشران وژل شوي او دوه نور ژوندي نیول شوي.

د لوګر امنیتي چارواکي وایي، چې تېره شپه ګډو ځواکونو د دې ولایت د څرخ ولسوالۍ اړوند په نوې کلا سيمه کې عمليات ترسره کړي چې په وینا یې د وسله والو طالبانو دوه مهم ډلمشران وژل شوي دي..

د لوګر امنیه قوماندانۍ ویاند شاپور احمدزي نن د جمعې په ورځ له غرمې مخکې ازادي راډیو ته وویل، چې په يادو عملياتو کې د وسله والو طالبانو دوه مهم کسان هم نیول شوي دي.

دی وایي، په علمیاتو کې د وسله والو طالبانو یو پټنځای چې چاودېدونکي توکي او وسلې په کې ساتل کېدل هم په بشپړه توګه له منځه وړل شوی دی

تر اوسه وسله والو طالبانو ددې پېښې په اړه تبصره نه ده کړې.

غني: کابل ښاروالۍ دې ژر تر ژره د عامه ملکیتونو د غاصبانو نوملړ خپور کړي

افغان ولسمشر محمد اشرف غني

ولسمشر اشرف غني کابل ښاروالۍ ته امر کړی د عامه ملکیتونو د غاصبانو نوملړ ژرترژره خپور کړي.

د ولسمشرۍ ماڼۍ په یوه خبرپاڼه کې وايي ولسمشر غني پرون- پنجشنبې په ارګ کې د کابل ښار له یو شمېر استازو سره په کتنه کې وویل، هغه کسان چې د دې پرېکړې پر وړاندې خنډ جوړوي باید ممنوع الخروج اعلان او د قانون پنجو ته وسپارل شي.

د ارګ په خبرپاڼه کې راغلي چې په غونډه کې د کابل ښار د بېلابېلو ناحیو اوسېدونکو ولسمشر غني ته خپلې ستونزې او وړاندیزونه واورول.

خبرپاڼه زیاتوي، د ځمکو غصب او د زده کوونکو نجونو ځورول هغه ستونزې وې چې کابل ښاریانو یې د جدي مخنیوي غوښتنه وکړه.

د خبرپاڼې له مخې ولسمشر د کابل امنیه قوماندان ته امر وکړ چې د پلازمېنې- کابل د نجونو د ښوونځیو په شاوخوا او نورو عامه ځایونو کې د نجونو زده کوونکو د ځورولو د مخنیوي لپاره لازم اقدامات ترلاس لاندې ونیسي.

قریشي: طالبانو د تاوتریخوالي کمولو ته لېوالتیا ښودلې

د پاکستان د بهرنیو چارو وزیر، شاه محمود قریشي

د پاکستان د بهرنیو چارو وزیر شاه محمود قریشي نن د جنورۍ په ۱۶مه وویل چې طالبانو د تشدد کمولو ته لېوالتیا ښودلې او دا یو مثبت پرمختګ دی.

قریشي په یوه وېډیويي پیغام کې چې د پاکستان د بهرنیو چارو وزارت پر وېب‌پاڼه خپور شوی، ویلي چې له طالبانو دا غوښتنه کېده چې تاوتریخوالی راکم کړي او دا د امریکا او طالبانو د استازو ترمنځ د موافقې لپاره یو ګام و.

شاه محمود قریشي زیاتوي: "د امریکا او طالبانو خبرې له یوې مودې راهیسې روانې دي، پاکستان غوښتل چې د امن پر لور حرکت وشي، افغانستان او پاکستان امن ته اړتیا لري، نن یو ښه پرمختګ شوی، طالبانو څرګنده کړې چې د تاوتریخوالي د کمولو د غوښتنې منلو ته تیار دي."

په دوحه کې د وسله‌والو طالبانو یوې سرچینې د خپل هویت د پټ پاتې کېدو په شرط ازادي راډیو ته وویل چې د تاوتریخوالي د کمولو پر موافقه کار کېږي.

وروسته، اسوشیټډ پرس خبري اژانس د وسله‌والو طالبانو د سرچینو په حواله وویل چې هغوی په دې اړه د خپل وړاندیز سند پرون د امریکا پلاوي ته سپارلی دی.

خو د سولې په چارو کې د افغانستان د دولت وزیر سلام رحیمي نن په کابل کې خبریالانو ته وویل چې د تاوتریخوالي کمول بې‌مفهومه خبره ده او دوی اوربند غواړي.

زابل کې ماین چاودنې د برېښنا شرکت ۵ کارکوونکي وژلي

ارشیف

د زابل چارواکي وايي، د ماین چاودنې د برېښنا شرکت ۵ کارکوونکي وژلي دي.

دغه چارواکي زیاتوي دا ماین د کندهار-زابل پر لویه لار د زابل د شهر صفا ولسوالۍ په مربوطاتو کې د کندهار برېښنا شرکت د کارکوونکو پر مازدا موټر چاودېدلی دی.

د زابل د والي ویاند ګل اسلام سیال ازادي رادیو ته وویل چې دغه پېښه نن غرمه هغه مهال رامنځته شوې کله چې د برېښنا شرکت د قراردادي کارکوونکو موټر د عمومي سړک څخه فرعي سړک ته اوښتی او پر خښ شوي ماین برابر شوی دی.

تر اوسه د دې پېښې مسؤلیت چا پر غاړه نه‌دی اخیستی.

نور راوښيه

XS
SM
MD
LG