د لاسرسۍ وړ لېنکونه

تازه خبر
یکشنبه ۲۹ مرغومی ۱۳۹۸ کابل ۰۹:۲۸

نړۍ

د سلیماني د تدفین مراسم وځنډول شول؛ لسګونه کسان ګڼه ګوڼه کې مړه شوي

انلاین خپرو شویو ویډیوګانو کې ښکاري چې  بې ساه خلک د سړک پر غاړه پراته دي او نور ناري وهي او هڅه کوي چې له ټپیانو سره مرسته وکړي.

د وژل شوي ایراني جنرال قاسم سلیماني د تدفین مراسم وروسته له هغې وځنډېدل چې د نوموړي په پلرنۍ سیمه کرمان کې د جنازې په مراسمو کې د ګڼې ګوڼې له کبله ګڼ کسان تر پښو لاندې شول چې لږ تر لږه ۳۲ تنه ووژل شول.

د ایران دولتي تلویزون د ایران د بیړنیو طبي خدمتونو د ادارې رییس پیرحسین کولیوند له خولې ویلي، نږدې ۲۰۰ نور کسان ټپیان شوي دي.

د ایسنا نیمه دولتي خبري اژانس وايي، چارواکو وروسته د ګڼې ګوڼې د ډېرېدو له وېرې د سلیماني د تدفین مراسم وځنډول. په خبر کې نه دي ویل شوي چې د امریکا په هوايي برید کې د قدس د ځواک دا وژل شوی مشر به کله خاورو ته وسپارل شي.

انلاین خپرو شویو ویډیوګانو کې ښکاري چې بې ساه خلک د سړک پر غاړه پراته دي او نور ناري وهي او هڅه کوي چې له ټپیانو سره مرسته وکړي.

زرګونه ماتم کوونکي په تورو جامو کې د سه شنبې په ورځ د کرمان په مرکزي څلورلارې کې راټول شول چې ورسره د سلیماني له عکسونو جوړ شوي بنرونه وو.

د ایران د قدس ځواک قومندان جنرال قاسم سلیماني د جنورۍ په درېیمه په بغداد کې د امریکا په هوايي برید کې ووژل شو. نوموړي له ایران بهر د ایران د ملاتړو ملیشو په تمویل، ملاتړ او تنظیم کې مهم رول درلود.

د ورځې تازه خبرونه دلته ولولئ

اردوغان: که اروپا لیبیا کې د کړکېچ حل غواړي د ترکیې د هڅو ملاتړ دې وکړي

اردوغان دا څرګندونې په هغه کالم کې کړي چې نن په پولیټیکو ویبپاڼه کې خپور شوی.

د ترکیې ولسمشر رجب طیب اردوغان پر اروپا غږ کړی چې که غواړي په لیبیا کې کړکیچ پای ته ورسیږي، په دې هېواد کې دې د ترکیې د هڅو ملاتړ وکړي.

ترکیه په لیبیا کې د طرابلس حکومت ته چې په نړیواله کچه په رسمیت پیژندل شوی، پوځي ملاتړ برابروي.

اردوغان دا څرګندونې په هغه کالم کې کړي چې نن په پولیټیکو ویبپاڼه کې خپور شوی. دا د یکشنبې په ورځ په برلین کې تر هغې سرمشریزې مخکې دی چې په کې د لیبیا د ثبات هڅه کیږي.

د ډیپلوماتانو له څرګندونو او د یوې اعلامیې له مسودې ښکاري چې په دې غونډه کې به جرمني او ملګري ملتونه په لیبیا کې له ښکېلو لورو وغواړوي چې د سولې په لور د لومړي ګام په توګه پر اوربند او د څارنې پر یو مکانیزم سلا شي.

ترکیه په لیبیا کې د فایض السراج د طرابلس میشتي حکومت ملاتړ کوي او دده مخالف خلیفه حفتر چې د لیبیا په ختیځ کې د لیبیا د ملي پوځ په نوم د ځواکونو مشري کوي کودتاچي بولي.

اردوغان ویلي: "موږ به د لیبیا ځواکونه وروزو او ورسره به مرسته وکړو چې د ترهګرۍ، انساني قاچاق او نړیوالې ټولنې ته د نورو جدي ګواښونو پر ضد مبارزه وکړي."

ټاکل شوې حفتر او سراج دواړه برلین کې د ترکیې، روسیې، مصر او نورو لویدیځو او عربي هېوادونو له مشرانو سره یوځای دې غونډه کې برخه واخلي.

عراق کې دوه لاریون کوونکی وژل شوي او ۲۴ ټپیان دي

ارشیف

د عراق د امنیتي ځواکونو او اعتراض کوونکو د اخ و ډب پر مهال لږ تر لږه دوه مظاهره چیان وژل شوي او ۲۴ تنه نور ټپیان شوې دي.

په پلازمېنه بغداد کې پرون د مطرح سیاستوالو او اداري فساد پرضد مظاهره وشوه.

امنیتي ځواکونو له اوښکي بهوونکي ګاز څخه استفاده وکړه چې پرې نه ږدي اعتراض کوونکي پر هغه پله واوړي چې د بغداد زرغونې سیمې ته تېر شوی دی.

په عراق کې تېر میلادي کال د عراق د حکومت او ایران پرضد مظاهرې وشوې چې درې میاشتې یې دوام وکړ، په دې اعتراضونو کې په سلګونو کسان ووژل شول او شاوخوا پنځه ویشت زره نور ټپیان شول.

د ایران ستر مذهبي مشر ایت الله خامنه اي ته د ډونالد ټرمپ خبرداری

خامنه اي پرون د جمعې د لمانځه په خطبه کې ټرمپ مسخره وباله.

د امریکا متحده ایالتونو ولسمشر ډونالد ټرمپ د ایران ستر مشر ایت الله علي خامنه اي ته خبرداری ورکړ چې له خپلو خبرو سره پام وکړي.

خامنه اي پرون د جمعې د لمانځه په خطبه کې ټرمپ مسخره وباله.

ولسمشر ټرمپ په ټویټر کې لیکلي، د ایران د ستر مشر په نوم منسوب چې په وروستیو کې ډېر ستر هم نه دی پاتې شوی، د متحده ایالتونو او اروپا په برخه کې ناوړه خبرې کړې دي.

ټرمپ زیاتوي چې د دوی اقتصاد د له منځه تلو په حال کې دی خلک یې ځوریږي او باید له خپلو خبرو سره ډېر پام وکړي.

خامنه اي په خپلو خبرو کې پر فرانسې، جرمني او بریتانیا هم انتقاد وکړ. دغو درېیو هېوادو ایران تورن کړی چې د ۲۰۱۵ کال اټمي تړون ژمنې یې سمې نه دي عملي کړي. د ایران مشر وویل چې مخکې یې لا دا خبره کړې وه چې پر دغو هېوادو باور نه لري، "دوی د امریکا په خدمت کې دي."

د اوکراین ولسمشر د دغه هېواد د صدراعظم استعفی ونه منله

د اوکراین صدراعظم الکسي هونچاروک

د اوکراین جمهور رئيس ولادیمیر زېلېنسکي پرون د خپل صدراعظم داستعفی لیک رد کړ.

زېلېنسکي وویل چې صدراعظم الکسي هونچاروک پرون، د جنورۍ په ۱۷مه، د خپلې استعفی لیک ور استولی و.

خو زېلېنسکي پرون له هغه سره تر غونډې وروسته وویل: "زه له تا سره په ګډه غواړم چې کابینه پیاوړې کړم، له دې امله، درڅخه غواړم چې کمزوري ټکي معلوم کړې، په وزارتونو کې چارواکي د هغوی د مسلکي وړتیا پر اساس بدل کړې."

په وروستیو کې د صدراعظم هونچاروک د یوې ټیلفوني مکالمې یوه برخه پر ټولنیزو رسنیو خپره شوه چې په هغه کې یې پر اقتصادي چارو د جمهور رئيس پوهه کمه بللې وه.

تر هغه وروسته صدراعظم هونچاروک پر فېس بوک ولیکل چې په وروستیو کې د حکومت دننه له غونډو او خبرو نیمګړې برخې پر ټولنیزو رسنیو افشا کېږي او د دې لپاره چې ولسمشر ته خپل درناوی او پر هغه خپل باور ثابت کړي، د صدراعظم له چوکۍ استعفی کوي.

امریکا د ایران سپاه پاسداران انقلاب ځواکونو پر یوه لوړپوړي جنرال بندیزونه ولګول

د امریکا متحده ایالاتو د ایران د پوځ پر یوه لوی جنرال حسن شاهورپور بندیزونه ولګول.

د امریکا د بهرنیو چارو وزارت پرون، د جنورۍ په ۱۷مه وویل چې پر حسن شاهورپور بندیزونه د دې لپاره لګول شوي چې هغه د نومبر میاشت کې د ایران د حکومت پرضد پر ولسي مظاهرو خونړی بندیز لګولی و.

د ایران د سپاه پاسداران انقلاب ځواکونو دا جنرال امریکا ته له سفره منع شوی دی.

د ایران لپاره د امریکا د بهرنیو چارو وزارت خاص استازي برایان هوک پرون وویل، جنرال شاهورپور په ماهشهر کې د مظاهره چیانو پرضد په عمل کې پر بشري حقونو سخت تېری کړی دی. هغه د تېرکال په نومبر میاشت کې د ۱۴۸ بې پناه ایرانیانو د قتل عام ننداره وکړه.

جنرال شاهورپور د هغو ډلو مشر و چې په ماهشهر کې یې پر مظاهرچیانو خونړۍ حملې وکړې او ویې ځپل.

د ایران حکومت په دې اړه چې په ماهشهر کې له مظاهره چیانو سره ظلم شوی د امریکا او د بشري حقونو د څارنې دنړیوالو ادارو رپوټونه بې اساسه بللي دي. خو منلې یې ده چې په دې سیمه کې یې یوشمېر وسله وال بېلتون غوښتونکي ځپلي دي.

د پاکستان یوې محکمې ۸۶ کسان هریو په ۵۵ کاله زندان محکوم کړل

ټول هغه کسان چې محکمې د زندان حکم ورباندې کړی په پاکستان کې د تحریک لبیک ګوند کارکوونکي یا ملاتړ کوونکي دي.

د پاکستان یوې محکمې ۸۶ کسان هر یو په ۵۵ کاله زندان محکوم کړل. دوی د یوې عیسوۍ ښځې، اسیه بي بي د ازادۍ د خبر تر خپرېدو وروسته په له تشدده ډکو مظاهرو کې د ګډون په جرم په زندان محکوم شوي دي.

په راولپنډۍ کې د تروریزم ضد محکمې د جنورۍ په ۱۶مه، وروستی حکم اعلان کړ.

د هغوی د محاکمې جریان تر یوه کال زیات وخت ونیوه.

پر اسیه بي بي اسلام ته د سپکاوي تور پورې شوی و خو کله چې پر هغې لګېدلي تورونه بې اساسه ثابت شول، محکمې یې د خوشې کولو حکم وکړ.

ټول هغه کسان چې محکمې د زندان حکم ورباندې کړی په پاکستان کې د تحریک لبیک ګوند کارکوونکي یا ملاتړ کوونکي دي.

تحریک لبیک پاکستان یوه سخت دريځه اسلامپاله ډله ده. دې ډلې په ۲۰۱۸ میلادي کال کې د اسیه بي بي د ازادۍ د حکم پر ضد په ټول پاکستان کې له تشدده ډکې مظاهرې وکړې.

د اوکراین صدراعظم له خپلې دندې استعفا ورکړه

اولکسي هونخاروک

د اوکراین صدراعظم اولکسي هونخاروک له خپلې دندې استعفا وړاندې کړې ده.

دا وروسته له هغه چې شک کېږي ده په یوه ثبت شوي غږ کې ویلي، چې دی پخپله او ولسمشر ولودومیر زلنسکي په اقتصادي موضوعاتو ډېر نه پوهېږي.

د جنورۍ په اوولسمه نېټه هانخاروک پر فیسبوک ولیکل چې په وروستیو ورځو کې پر ټولنیزو رسنیو ځینې خبرې افشا شوي چې د حکومتي غونډو له ثبتي بڼې ایستل شوي دي.

د ولسمشر زلینسکي دفتر ومنله چې د هونخاروک استعفا ورغلې خو ویې ویل چې وروسته به د دې وضعیت په اړه څرګندونې وکړي.

خامنه اي: لویديځ هېوادونه دومره قدرت نه لري چې ایرانیان مات کړي

خامنه اي له خپلو هېوادوالو وغوښتل چې یو مټی شي.

د ایران مشر ایت الله علي خامنه اي په اتو کلونو کې لومړی ځل نن د جمعې د لمانځه په خطبه کې خبرې وکړې.

ده له خپلو هیوادوالو وغوښتل چې یو مټی شي.

ده وویل چې لویديځ هېوادونه دومره قدرت نه لري چې ایرانیان مات کړي.

خامنه ايي زیاته کړه: "یو ځواک او یو ملت دومره قدرت او روحي توان لري چې د نړۍ یو زورواکی متکبر قدرت په څپېړه ووهي، دا د الهي قدرت ښکارندويي کوي."

خامنه اي په خپله وینا کې وویل چې د اوکرایني الوتکې سقوط یوه ترخه پېښه وه.

د اوکراین نړیوال هوايي شرکت الوتکه د جنورۍ په درېيمه نېټه لس ورځې مخکې د امام خمیني هوايي ډګره پورته شوه خو څو شیبې وروسته ولوېده او ټول ۱۷۶ مسافر يې ووژل شول.

۶ هېوادونه ایران کې د ویشتل شوې الوتکې د څېړنې لپاره متخصیصین نوموي

ارشیف

اوکراین له شپږو هېوادونو غوښتي چې په ایران کې د ویشتل شوي الوتکې په اړه تحقیقاتو کې د مرستې لپاره دې خپل متخصصین ونوموي.

دا هېوادونه کاناډا، فرانسې، سویډن، جرمني، بریټانيا او ایران یاد شوي.

د اوکراین د لوی څارنوال دفتر د پنجشنبې په ورځ وروسته له هغه دا غوښتنه لېږلې چې په لندن کې د ویشتل شوي الوتکې په اړه د بهرنیو چارو وزیرانو غونډه جوړه شوه.

دا خبرپاڼه په داسي حال کې ده چې د کاناډا د بهرنیو چارو وزیر فرانسوا فلیپ شامپین وویل چې کاناډا، افغانستان، برتانيه، سویډين او اوکراین له تهرانه غواړي چې د جنورۍ د اتمې په غمیزه کې د وژل شویو کورنیو ته دې تاوان ورکړي.

دوی همداراز وغوښتل چې ایران باید خپلواک او شفاف نړیوال تحقیقات پر مخ یوسي.

د اوکراین یوه مسافر وړونکي الوتکه د جنورۍ په اتمه په تهران کې له نړیوال هوایي ډګره له پورته کېدو څو شیبې وروسته وویشتل شوه.

ایران ومنله چې دوی دا الوتکه ویشتلې ده خو وروسته یې وویل چې دا یوه تېروتنه وه.

چارواکي: لوګر کې د طالبانو ۲ مشران وژل شوي

د لوګر مرکز پل علم

په لوګر کې د طالبانو دوه ډلمشران وژل شوي او دوه نور ژوندي نیول شوي.

د لوګر امنیتي چارواکي وایي، چې تېره شپه ګډو ځواکونو د دې ولایت د څرخ ولسوالۍ اړوند په نوې کلا سيمه کې عمليات ترسره کړي چې په وینا یې د وسله والو طالبانو دوه مهم ډلمشران وژل شوي دي..

د لوګر امنیه قوماندانۍ ویاند شاپور احمدزي نن د جمعې په ورځ له غرمې مخکې ازادي راډیو ته وویل، چې په يادو عملياتو کې د وسله والو طالبانو دوه مهم کسان هم نیول شوي دي.

دی وایي، په علمیاتو کې د وسله والو طالبانو یو پټنځای چې چاودېدونکي توکي او وسلې په کې ساتل کېدل هم په بشپړه توګه له منځه وړل شوی دی

تر اوسه وسله والو طالبانو ددې پېښې په اړه تبصره نه ده کړې.

فرانسه خپله الوتک لېږدونکي بیړۍ منځني ختیځ ته استوي

ارشیف

فرانسه خپله یوازینۍ الوتک لېږدونکي بیړۍ منځني ختیځ ته استوي، څو دغلته د داعش پر ضد د ایتلاف د ځواکونو په عملیاتو کې برخه واخلي.

دا خبره د فرانسې ولسمشر ایمانویل مکرون کړې ده.

مکرون د نوې کال په وینا کې د خپل هیواد پوځیانو ته وویل، د دې هېواد الوتک لیږدونکي بیړۍ به د روان میلادي کال له جنورۍ تر اپریل پورې په منځني ختیځ کې د چمل په نوم عملیاتو کې برخه واخلي او وروسته به د اطلس سمندر او شمالي بحیرې ته ولاړه شي.

دا امریکا په مشرۍ دا عملیات د داعش د وسله والې ډلې پر ضد دي.

د فرانسې ولسمشر ویلي، د چارلز دوګل په نوم دا فرانسوي الوتک لیږدونکي بیړۍ به د جرمني، بیلجیم، هالنډ، هسپانیا، پرتګال او یونان د وړو کښتیو له خوا بدرګه کېږي.

مکرون د دې بیړۍ د دقیق ماموریت به اړه توضیحات نه دي ورکړي خو دا فرانسوي بیړۍ به د داعش پر ضد د بریدونو د ایتلاف برخه وي او فرانسه په سیمه کې زر تنه سرتېري لري.

د مغزي صدمې له کبله د ۱۱ امریکايي سرتېرو درملنه شوې

ارشیف

د امریکا پوځ وايي، د جنورۍ په اتمه په عراق کې د امریکا پر پوځي اډو د ایران له برید وروسته د کمې مغزي صدمې له کبله د یولس امریکايي سرتېرو درملنه شوې ده.

تر دې مخکې د امریکا ولسمشر ډنالډ ټرمپ ویلي وو، په دې پېښه کې هیڅ امریکايي ته زیان نه دی رسیدلی.

د امریکا د پوځ د مرکزي قومندانۍ ویاند بیل اربن د پنجشنبې په ورځ په یو بیان کې وویل ” په داسې حال کې چې پر الاسد هوايي اډې د جنورۍ په اتمه نېټه د ایران په برید کې هیڅ امریکايي سرتیری نه دی وژل شوی، د مغزې صدمې د علایمو له کبله د څو تنو درملنه شو، او لا هم تر ارزونې لاندې دي. “

نوموړې زیاته کړې چې د برید څخه په وروسته ورځو کې یو شمیر سرتیري د ډیر احتیاط له کبله د الاسد له پوځي اډې څخه په جرمني او کویټ کې د امریکا پوځي طبي مرکزونو ته د نورو معایناتو لپاره انتقال شول.

د امریکا د پوځ ددې ویاند په وینا کله چې دا سرتیري د دندې لپاره چمتو وبلل شي نو تمه ده چې له معایناتو وروسته به بیرته عراق ته ستانه شي.

د برید پر مهال په الاسد پوځي اډه کې شا او خوا 1500 سرتیري و چې ډیرو د ایران د توغندیو د برید له خبرداري وروسته د توغندیو د لګیدو پر مهال په خوندي مورچلو کې پناه اخیستې وه.

ایران وروسته له هغې په عراق د امریکا پر پوځي اډو توغندي وویشتل چې امریکايي ځواکونو د بغداد هوايي ډګر ته نژدې د ایران د قدس ځواک پیاوړی جنرال قاسم سلیماني په یو هوايي برید کې وواژه.

پومپیو د لیبیا په اړه نړیوال کنفرانس کې ګډون کوي

په پام کې ده چې د متحدایالاتو د بهرنیو چارو وزیر مایک پومپیو

په پام کې ده چې د متحدایالاتو د بهرنیو چارو وزیر مایک پومپیو راتلونکې اونۍ د لیبیا په اړه په یوه نړیوال کنفرانس کې د ګډون لپاره جرمني ته ولاړ شي.

د امریکا د بهرنیو چارو وزارت پرون د جنوري په ۱۶مه وویل چې پامپیو د شنبې په ورځ برلین ته روانېږي او د یکشنبې په ورځ به د ملګروملتونو له خوا د لیبیا په اړه په جوړ شوي کنفرانس کې ګډون وکړي.

وروسته له دې چې په طرابلس کې د نړیوالو له خوا د پېژندل شوي حکومت رییس فایض السراج په دې کنفرانس کې د ګډون ژمنه وکړه د حکومت مخالف ځواکمن پوځي قوماندان خلیفه حفتر هم پرون- پنجشنبې په اصولو کې موافقه وکړه چې د سولې په دې کنفرانس کې ګډون وکړي.

دا کنفرانس په داسې حال کې جوړېږي چې پر پلازمېنه طرابلس د جنرال حفتر د ځواکونو د حملو له پیلېدو نهه میاشتې وروسته نړیوالو قدرتونو په لیبیا کې د یوه دوامداره اوربند د ټینګولو لپاره هڅې چټکې کړې دي.

په دې جګړو کې د جګړې د ښکېلو اړخونو دوه زره جنګیالي او له ۲۸۰ زیات ملکي وګړي وژل شوي دي.

مسکو او تاشکند د دوه اړخیزو اړیکو پر پراختیا ټینګار وکړ

د روسیې د بهرنیو چارو وزیر او د ازبکستان ولسمشر

د روسیې د بهرنیو چارو وزیر پرون په تاشکند کې د ازبکستان له ولسمشر شوکت میرضیایف او د بهرنیو چارو له وزیر سره وکتل.

د ازبکستان د جمهوري ریاست مطبوعاتي دفتر وايي چې لاوروف او میرضیایف د تاشکند او مسکو ترمنځ د دوه اړخیزو اړیکو او همکاریو په اړه خبرې وکړې.

د دې دفتر له خوا د ورکړل شویو معلوماتو له مخې میرضیایف د دې کتنې پرمهال د دوه اړخیزو اړیکو پر پراختیا او د ستراتیژیک مشارکت او یووالي پر اړتیا ټینګار وکړ او لاوروف په ځواب کې د ازبکستان ولسمشر ته د ولسمشر ولادیمیرپوتین د درناوي مراتب ورسول.

د ازبکستان د جمهوري ریاست مطبوعاتي دفتر همداراز ویلي چې په دې کتنه کې مسکو او تاشکند ته د دواړو هېوادونو د چارواکو د راتلونکو سفرونو په اړه هم بحث وشو.

د اور لګېدو له امله رومانیا کې ۴ ماشومان مړه شوي

ارشیف

د رومانیا په جنوب ختیځ ښار تیمي سوارا کې څلور ماشومان چې په یوه کور کې بند پاتې وو، د اور لګېدنې په پېښه کې مړه شوي دي.

د رومانیا د بېړنیو حالاتو اداره وايي، د اطفایي کارکوونکو د دې ماشومانو مړي چې لوی یې ۶ کلن او کوچنی یې یوازې ۴ میاشتنی و، په کور کې دننه موندلي دي.

د دې ماشومانو ۱۴ کلن ورور چې هغه هم په کور کې و، د لوګي یا دود د تنفس په خاطر روغتون ته لېږدول شوی خو سوځېدلی نه دی.

د بېړنیو حالاتو د ادارې چارواکي وايي، اور ښايي د شپې له خوا په هغه اجاق کې لګېدلی وي، چې لرګي په کې سوځېدل.

د چارواکو په وینا د اور لګېدو پرمهال د دې ماشومانو مور او د کورنۍ غړي د ودانۍ په یوه بله برخه کې و.

په رومانیا کې د ۲۰۱۰ او ۲۰۱۲ میلادي کلونو ترمنځ ۱۵۲ ماشومان د اور لګېدو په پېښو کې مړه شوي دي خو دا شمېره په ۲۰۱۸ میلادي کال کې یوازې اتو ته راولوېده.

نور راوښيه

XS
SM
MD
LG