د لاسرسۍ وړ لېنکونه

تازه خبر
دوشنبه ۷ سلواغه ۱۳۹۸ کابل ۱۱:۲۸

افغانستان

ولسمشر غني روحاني ته د قاسم سلیماني پر وژل کېدو تسلیت ووایه

ارشیف

د افغانستان جمهور رئیس محمد اشرف غني له خپل ایراني سیال حسن روحاني سره په خبرو کې ډاډ ورکړی چې د افغانستان خاوره به د هېڅ بل هېواد پر خلاف ونه کارول شي.

د افغانستان ولسمشرۍ ماڼۍ په یوې اعلامیې کې ویلي چې دواړو مشرانو نن مازدیګر پر ټېلفون خبرې وکړې او ښاغلي غني د ایران جمهور رئیس ته د جنرال قاسم سلیماني پر وژل کېدو د "د ډاډګېرنې او غمشریکۍ مراتب وړاندې کړل."

د ارګ په اعلامیه کې ویل شوي: "د افغانستان او امریکا متحده ایالتونو ترمنځ د امنیتي موافقتنامې په اساس د افغانستان خاوره هیڅ کله د بل هېواد پر خلاف نه استعمالېږي."

سلیماني د ایران د سپاه پاسداران انقلاب د قدس ځواکونو قومندان و چې د جمعې په ورځ (جنورۍ ۳مه) د عراق د پلازمېنې بغداد په هوايي ډګر کې د امریکايي ځواکونو په هوايي برید کې ووژل شو.

پرون د ایران د بهرنیو چارو وزیر د افغانستان د حکومت له اجرائیه رئیس عبدالله عبدالله سره پر ټېلفون خبرې کړې وي او د سلیماني د وژل کېدو اړوندو موضوعاتو په اړه غږېدلي وو.

د ورځې تازه خبرونه دلته ولولئ

۱۰میلیونه افغان ماشومانو ته د پولیو ضد واکسین تطبیقېږي

ارشیف

نن ( دوشنبه) د افغانستان د عامې روغتیا وزارت د هېواد په ۳۰ ولایتونو کې د پولیو یا ګوزڼ ضد واکسین کمپاین پیل کړ.

د عامې روغتیا وزارت د پولیو ضد کمپاین د پروګرام مسول هدایت الله ستانکزي ازادي راډيو ته وویل، چې د دغه کمپاین په ترڅ کې به نږدې لس میلیونه ماشومانو ته د پولیو ضد واکسین ورکړل شي.

هغه زیاته کړه: "د دې کمپاین په ترڅ کې به نږدې لس میلیونو ماشومانو ته واکسین وشي خو له بده مرغه د دولت ضد وسله والو له لوري د هغو بندیزونو له امله چې د پولیو ضد کمپاین باندې لګول شوي او امنیتي ستونزو له کبله به یو شمېر ماشومان له دغه واکسین څخه بې برخې پاتې شي."

خو طالب ویاند ذبیح الله مجاهد ازادي راډيو ته په یو استول شوي غږیز پیغام کې ویلي، چې دوی د ګوزڼ یا پولیو ضد واکسین او کمپاین پر وړاندې ستونزې نه لري او د روغتیا نړیوال سازمان سره د خبرو او هوکړو له مخې په دې برخه کې همکار دي.

د عامې روغتیا وزارت د معلوماتو پر بنسټ په څلور ولایتونو کې غور، بامیان، دایکندي او غزني کې د ورښتونو او لارو د بندښت له امله دا واکسین اوس نه بلکې د روان میلادي کال په مارچ میاشت کې طبیقېږي.

د هدایت الله ستانکزي په خبره، په ۲۰۱۹ میلادي کال کې د ټول افغانستان په کچه د پولیو ۲۹ مثبتې پېښې ثبت شوي چې ډېری دغې پېښې د هېواد په جنوبي ولایتونو کې دي خو په ۲۰۱۸ کال کې بیا ۲۱ مثبتې پېښې ثبت شوې وې.

د عامې روغتیا وزارت د معلوماتو له مخې، دا مهال په ټول هېواد کې ۳۶۰۰ روغتیایي مرکزونه او ۷۰ زره رضا کاره واکسیناتوران روزل شوي، چې هم په په روغتیایي مرکزونه او هم کور په کور دغه واکسین افغان ماشومانو ته ورسول شي.

د افغانستان د ښځینه فوټسال لوبډلې له ازبکستان ماتې خوړلې

د افغانستان د فوټسال د ښځو ۱۹ کلنې لوبډله

د افغانستان د ښځینه فوټسال ۱۹ کلنو لوبډلې د منځنۍ اسیا د فوټسال د ۱۹ کلنو ښځینه لوبډلو په سیالیو کې، خپله درېیمه لوبه هم ازبکستان ته وبایله.

د افغانستان د فوټبال فدراسیون د خپرونو مرستیال شمس امیني نن ازادي راډيو ته وویل، افغانستان دغه لوبه ۳ د صفر په وړاندې وبایلله.

افغانستان تر دې وړاندې له ایران او قرغزستان څخه هم ماتې خوړلي.

افغان لوبډله سبا خپله څلورمه لوبه له تاجکستان سره کوي.

کابل د نجونو والیبال سیالۍ پیل شوي

تزئیني بڼه لري، ارشیف.

د هرات د نجونو د والیبال انتخابي سیالۍ پیل شوې.

د دغه ولایت د بدني روزنې ریاست مسلکي او فني مدیر ضیاالحق ضیا نن ازادي راډيو ته وویل چې دغه لوبې د دې ولایت منتخب ټیم ته د غوره لوبغاړو د پېژندلو په هدف ترسره کېږي.

یادې سيالۍ به یوه اوونۍ دوام وکړي.

د ښاغلي ضیا په خبره، په دغو سیالیو کې اته لوبډلې په دوو ګروپونو کې سیالي کوي.

کندز کې د جوګي قوم ماشومانو ته د زده‌کړو زمینه برابرېږي

کندز کې د جوګي قوم ماشومان او د دې ولایت د پوهنې سیمه‌ییز مسؤلین. 1/27/2020

د افغانستان د پوهنې وزارت وایي، کندز ښار کې به د جوګي قوم لسګونه ماشومانو ته د لومړي ځل لپاره د زده‌کړو زمینه برابره شي.

دغه وزارت په یوه خبرپاڼه کې ویلي چې په کندز ښار کې ۶۲ جوګي کورنۍ اوسي چې شااوخوا ۱۰۰ ماشومان‌یې ښوونځیو ته له تګه بې‌برخې دي.

په خبرپاڼه کې راغلي چې په ټولو ولایتونو کې د دغه قوم د ماشومانو د پېژندلو سروې پیل شوې چې ښوونځیو ته د تګ لارې چارې ورته ولټول شي.

درې میاشتې وړاندې ازادي راډیو د دغه قوم د ستونزو په اړه یو راپور جوړ کړ چې هغه مهال پوهنې وزارت له خپله اړخه د دوی د ستونزو د هواري ډاډ ورکړ.

جوګیان څه باندې ۱۰۰ کاله وړاندې د منځنۍ اسیا له هېوادونو افغانستان ته راغلل چې دا مهال په ټول افغانستان کې د دوی شااوخوا ۲۰ زره کورنۍ مېشتې دي.

پاکستان د افغان بار وړونکو موټرو پر مخ د واګې بندر تړلی

ارشیف

پاکستان په یو نوي اقدام سره د افغان بار وړونکو موټرو پر مخ د واګې بندر تړلی دی.

د افغانستان د سوداګرۍ او پانګونې خونې ویاند جان اقا نوید نن ازادي راډيو ته وویل، له تېرو درېیو ورځو راهیسې په ډېر شمېر سره موټر راګرځول شوي دي.

ښاغلی نوید وايي، دغه بار وړونکي موټر د پاکستان واګې بندر له لارې ټرانزیت کېدل چې له هغه وروسته بیا هند ته تلل.

هغه زیاتوي: "بار وړونکي موټر اړ شوي چې کارونه ودروي، دا مهال د مېوو د صادراتو فصل و چې باید ډېر صادرات شوي وی، خو د دې لپاره چې ډېری موټر له پاکستان څخه بېرته راګرځول شوي بار وړونکي موټر درېدلي دي زموږ غوښتنه دا ده چې دا ستونزه ژر تر ژره هواره شي."

د ښاغلي نوید په خبره، دا مهال ډېری مېوې خرابې شوي او که چېرې یاده ستونزه هواره نه‌شي د باغ لرونکو ترڅنګ به سوداګرو ته هم ګڼ مالي زیانونه واوړي.

د افغانستان د سوداګرۍ او پانګونې خونې د چارواکو په وینا، که څه هم دغه ستونزه له اړوندو چارواکو سره شریکه شوې، خو لاهم نه‌ده هواره شوې.

خو ښاغلی نوید وايي، پاکستان ځکه په دې اقدام لاس پورې کړی چې د افغانستان د صادراتو وخت دی دغه هېواد هڅه کوي چې یاد بهیر زیانمن کړي.

د صنعت او سوداګرۍ وزارت تر اوسه په دې هکله څه نه‌دی ویلي.

غزني کې د موسمي ناروغیو له امله د ماشومانو د مړینې زیاتوالی

د غزني د ښار یوه څنډه

په غزني کې د نورو کلونو په پرتله سږ کال د موسمي ناروغیو له امله د ماشومانو د مړینې په شمېر کې زیاتوالی راغلی دی.

حلیمه چې شااوخوا یو کلن ماشوم‌یې د غزني د ملکي روغتون په ودانۍ کې دننه د ماشومانو په واټ ته راوړی، وویل: "زه ډاکتر ته راغلې یمه، دغه نجلۍ مې ناروغه ده، ټول ماشومان مو ناروغان دي، یوه نیمه میاشت کېږي یو لېورزی مې د سینه بغل له وجې مړ شو، کوچنیان مو ټول مریضان دي."

د غزني د ملکي روغتون سرطبیب ډاکتر عبدالنصیر رامکي هم وايي چې د نورو کلونو په پرتله سږ کال د ماشومانو په موسمي ناروغیو کې زیاتوالی راغلی دي.

نوموړی زیاتوي: "دا کال د یخنۍ په خاطر موسمي ناروغۍ لکه سینه بغل او زکام په واقعیت سره هم ډېر دی، موږ ورته په روغتون کې تیاری درلود، د کوچنیانو واټ ۲۴ ساعته د ماشومانو په خدمت کې دی، ډېر ناروغان چې دلته روغتون ته راغلي دي، په ښه توګه‌یې درملنه شوې ده، هغه ناروغان چې له دې روغتونه پورته‌یې درملنې ته اړتیا وه موږ د امبولانسونو په ذریعه د کابل ملي روغتونونو ته استولي دي."

ډاکتر رامکي وايي، میندې باید خپلو ماشومانو ته د یخنۍ په موسم کې ګرم کالي ورواغوندي او ګرم کورني خواړه ورته تیار کړي.

د ده په خبره په دغه خوړو کې یخني، ښوروا، شیربرنج، ترکاریانې، دال، شور نخود او سابه ښه، ګټور او اقتصادي تمامېدای شي.

خلیل‌زاد له ارګ سره د سولې اړوند وروستي معلومات شریکوي

د افغانستان د سولې لپاره د امریکا ځانګړی استازی زلمی خلیل‌زاد.

یو جګپوړی امریکایي چارواکی وايي د امریکا او طالبانو ترمنځ د سولې د خبرو د پرمختګ په صورت کې به د افغانستان د سولې لپاره د امریکا ځانګړی استازی زلمی خلیل‌زاد له افغان حکومت سره د معلوماتو د شریکولو لپاره کابل ته ولاړ شي.

په افغانستان کې د غوڅ ملاتړ مأموریت عمومي قوماندان جنرال سکات مېلر پرون له ولسمشر اشرف غني سره په کتنه کې په دې اړه خبرې کړي.

ارګ په یوه بیان کې وايي، په دې کتنه کې په کابل کې د امریکا سفارت شارژدافیر راس وېلسون هم حاضر و.

بیان زیاتوي چې ولسمشر غني له امریکايي چارواکو سره په خبرو کې په ټول هېواد کې د اوربند د ټینګښت پر اړتیا ټینګار وکړ.

طالبانو د اوربند لپاره د حکومت پرله‌پسې غوښتنې رد کړې دي او یوازې د تاوتریخوالي د کمولو لپاره د چمتووالي خبره‌یې کړې ده.

د قطر په پلازمېنه دوحه کې د طالبانو او امریکايي چارواکو ترمنځ خبرې له څو ورځو راهیسې روانې دي.

د افغانستان د ۱۹ کلنو څخه کم عمر کرکټ لوبډله پاکستان سره لوبېږي

د افغانستان د ۱۹ کلنو څخه د کم عمره کرکټ ملي لوبغاړي

د افغانستان د ۱۹ کلنو څخه د کم عمره کرکټ ملي لوبغاړي د پاکستان پر وړاندې د لوبې لپاره چمتووالی پيل کړی.

دوی پرون یکشنبه د جَنوبي افریقا بنوني ښار ته رسېدلي چېرته چې تمه ده د جمعې په ورځ له پاکستان سره مخامخ شي.

د پاکستان او افغانستان د ۱۹ کلنو څخه د کم عمره کرکټ ملي ټیمونه د ۲۰۲۰ میلادي کال د کوارټرفاینل یا اتو غوره ټیمونو په پړاو کې لوبېږي.

د ۱۹ کلنو څخه د کم عمره ملي ټیم سر روزونکي رئیس احمدزي پرون ویلي چې د پاکستان ټیم وار له مخه د افغان ټيم له فشار سره مخ دی.

هغه زیاته کړه: "سره له دې چې پاکستان سره له دې مخکې پنځه شپږ واره د ۱۹ کلنو په سطحه مخامخ شوي یو چې په ټولو کې مو ماته ورکړې ده، زموږ توپ وهونکي چې څنګه بېټنګ کوي او زموږ بالران چې څنګه بالنګ کوي ډېر عالي دي او ظاهره خبره ده چې پاکستان باندې به ډېر فشار وي، له همدې فشاره په ګټې اخیستو به موږ د بري لپاره هڅه کوو او په یوه نارمل حالت (له فشار پرته) به میدان ته ورسره وځو."

رئیس احمدزي چې د کرکټ بورډ په فېس‌بوک‌پاڼه‌یې بشپړه مرکه خپره شوې ویلي چې تر وروستي بریده هڅه کوي افغان ټیم بري ته ورسوي.

د افغانستان د کرکټ د ۱۹ کلنو څخه کم عمره ملي لوبغاړو د ۲۰۲۰ میلادي کال په نړیوال جام کې کوربه جَنوبي افریقا، متحده عربي امارات په رسمي لوبو کې مات کړي او تر هغه مخکې یې انګلستان ته هم په تمریني لوبه کې ماته ورکړې.

افغانستان که له پاکستان لوبه وګټي په نیمه پای‌لوبه یا سیمي فاینل کې له هند یا اسټرالیا سره مخ کېږي.

ناکامورا د هند په 'پدماشري' مډال وستایل شو

تتسو ناکامورا د ۲۰۱۹ میلادي کال د ډسیمبر په څلورمه وروسته له هغه چې په جلال‌اباد ښار کې پرې ډزې وشوې د سختو ټپونو له امله ساه ورکړه.

هند د افغانستان یوه خدمتګار ډاکتر تتسو ناکامورا ته پدماشري مډال ورکړی.

پدماشري د هند د عالي ملکي مډالونو له ډلې دی چې ډاکتر تتسو ناکامورا ته د هغه د ټولنیزو خدمتونو د درنښت په سبب ډالۍ شوی.

د هند د کورنیو چارو وزارت په یوه اعلامیه کې د پدما اوارډونو د ۱۴۱ ګټونکو نومونه اعلان کړي چې په هندیانو سربېره د ۱۸ بهرنیو ګټونکو په کتار کې د ډاکتر تتسو ناکامورا نوم هم راغلی.

تتسو ناکامورا درې لسیزې د افغانستان لپاره په تېره بیا په ختیځو سیمو کې خلکو ته د روغتیا، کرنې او اوبو لګولو په برخو کې خدمت وکړ.

ده د ۲۰۱۹ میلادي کال د ډسیمبر په څلورمه وروسته له هغه چې په جلال‌اباد ښار کې پرې ډزې وشوې د سختو ټپونو له امله ساه ورکړه.

له ده سره څو افغان ساتونکي او موټرچلوونکی هم وژل شوي وو.

هند هر کال د "ویبوشان، بوشان او پدماشري" په نوم عالي ملکي مډالونه د جنورۍ په ۲۶مه د دغه هېواد د جمهوریت د ورځې په مناسبت د ښوونې، روغتیا، ټولنیزو کارونو، هنر او موسیقۍ زیارکښو او فعالانو ته ورکوي.

د ۱۹۵۰ میلادي کال د جنورۍ له ۲۶مې هند خپل اساسي قانون پلی کړ او هر کال په همدې مناسبت د جمهوریت ورځ لمانځي او زیارکښ او فعالان ستايي.

دفاع وزارت: بلخ کې د ملکیانو د مرګ‌ژوبلې ادعا څېړل کېږي

د افغان ځواکونو هلیکوپټره د هوايي عملیاتو پر مهال - ارشیف

د افغانستان دفاع وزارت وایي، هغه ادعاوې په جدي توګه څېړي چې په بلخ کې د هوايي ځواک په بمبار کې ملکیانو ته مرګ‌ژوبله اوښتې.

دا خبره یاد وزارت پرون په یوه اعلامیه کې وکړه.

پرون د بلخ ولایت سلګونه اوسېدونکو مظاهره وکړه او ویل‌یې چې د شنبې شپې ناوخته د بلخ ولسوالۍ په بوکه نومي کلي کې د هوايي ځواک په بمبارۍ کې د یوې کورنۍ اووه غړي وژل شوي.

د مظاهره‌چیانو یوه تنظیموونکي خیبر امیري د پوځیانو هغه عملیات چې په‌کې ملکیانو ته مرګ‌ژوبله اوړي وحشت وباله.

د افغانستان دفاع وزارت وايي د ملکیانو د وژل کېدو ادعاوې په جدي او قانوني توګه تعقیبوي.

د بشري حقونو د څار نړیوال سازمان د جنورۍ په ۱۴مه په یوه راپور کې ویلي و چې په ۲۰۱۹ میلادي کال کې د هوايي بریدونو د زیاتېدو په نتیجه کې د افغان او امریکايي ځواکونو له‌خوا ملکیانو ته اوښتې مرګ‌ژوبله تر هغې مرګ‌ژوبلې زیاته وه چې د وسله‌والو مخالفینو په بریدونو کې اوښتې ده.

دوی د طالبانو بریدونه هم بې‌رحمانه وبلل او د جګړې په ښکېلو غاړو یې غږ کړی و چې د ملکیانو خوندیتوب په جدي توګه په پام کې ونیسي.

د کندز د زعفران په حاصلاتو کې زیاتوالی راغلی

د کندز د زعفرانو حاصلات

د کندز ولایت بزګران په دغه ولایت کې د زعفرانو له حاصلاتو خوښي څرګندوی او دغه راز دغه نبات یو ښه اقتصادی سرچينه بولي.

د کندز کروندګر وايي، چې د تېرکال په پرتله سږکال په دغه ولایت کې د زعفرانو په حاصلاتو کې د پام وړ زیاتوالی راغلی دی.

دوی خوښ دي او وايي، زعفران د بزګرانو د اقتصاد په پیاوړتیا کې مثبت رول لوبولای شي.

د کندز د قلعه زال ولسوالۍ یوتن بزګر الله بیردي په دې اړه وویل: "له یوکال راهیسې ما د زعفرانو کښت ته مخه کړي ده او په روان کال کې مې له نیم جریب ځمکې څخه څه باندې ۱۸۰ کلیوګرامه خالص زعفران ترلاسه کړل، په ټوله کې موږ د زعفرانو له حاصلاتو راضي یو."

د دوی په وینا، چې په نیم جریب ځمکه کې ۲۰۰ کیلوګرامه د زعفرانو پیاز کرل کېږې او که روزنې ته یې سمه رسېدنه وشي ورڅخه څه باندې دوه لکه افغانۍ ترلاسه کوی.

له دې سره سم د کندز د کرنې، اوبو لګونې او مالدارۍ ریاست چارواکي وايي، تېرکال په دغه ولایت کې په ۱۰ هيکـاره ځمکې کې زعفران کرل شوي وو چې ورڅخه څه باندې ۱۵ کیلوګرامه حاصل تر لاسه شو خو د دوی په خبره سږکال په ۲۰ هيکـاره ځمکه کې زعفران کرل شوي او ورڅخه څه باندې ۷۰ کیلوګرامه حاصل ترلاسه شوی دی.

د نوموړې ادارې رئیس عبدالهادې قرلق په دې اړه ازادي راډيو ته وویل: "موږ د صنعت او سوداګرۍ او د پانګونې او سوداګرۍ خونو ادارو په همغږې سره د ټولو زراعتې محصولاتو لپاره د بازارموندنې په برخه کې خپلې هڅې پیل کړي او هڅې کوو چې خپلو کرنیزو محصولاتو ته د هېواد دننه او بهره ښه مارکیټ پیدا کړوو."

د کندز د کرنې ریاست چارواکي، زعفران د دغه ولایت د کروندوګرو لپاره یو ښه اقتصادې سرچينه بولي او زیاتوي چې اوس مهال د دې ولایت په مرکز او دغه راز په امام صاحب، قلعۀزال، علي آباد، خان آباد، دشت ارچي او چهاردرې ولسوالیو کې زعفران کرل کېږې او بزګران هم د دغه نبات له حاصلاتو څخه خوښي څرګندوي.

د هسپانیا فوټبال لوبو پر سر کاپیسا کې یو کس خپل ورور وژلی

ارشیف

د نړیوالو فوټبال لوبو پر سر کاپیسا کې یو کس خپل ورور وژلی.

د کاپیسا ولایت پولیس ازادي راډیو ته وویل، تېره شپه د لسو بجو په شاوخوا کې د بارسلونا او النسیا ترمنځ د لوبې د پایلې له معلومېدو سره سم حشمت الله له خپل ورور امین اغا سره لفظي شخړه کړې او امین اغا یې په چاقو وهلی دی.

د کاپیسا د پولیسو ویاند عبدالشایق شورش په وینا ټپي د علي بابا کلي روغتون کې ساه ورکړې ده.

شورش وايي، دغه پېښه د دې ولایت د دویمې حصې په کاریزي سیمه کې پېښه شوې او قاتل له سیمه تښتېدلی دی.

هغه زیاتوي، پولیس د قاتل د نیولو په لټه کې دي.

د هرات اټک انرژي لوبډله د اتلانو فوټبال لیګ سیالیو اتله شوه

ارشیف

د هرات اټک انرژي لوبډلې د اتلانو فوټبال لیګ سیالیو اتلولي خپله کړه.

د افغانستان د فوټبال فدراسیون رسنیز مسوول شمس امیني نن ازادي راډیو ته وویل، چې دغه لوبډلې د څوارلسمې اونۍ په لوبو کې د ۳۸ امتیازونو په ګټلو ځان د اتلولۍ مقام ته ورساوه.

نوموړي وویل، چې اټک انرژي په ټوله کې ۱۴ لوبې کړي چې ۱۲ لوبې يې ګټلې او ۲ نورې یې مساوي کړي دي.

میدان وردګ کې د چرګانو ۵۰۰۰ فارمونه جوړېږي

ارشیف

د میدان وردګ ولایت د کرنې او مالدارۍ ریاست وايي، د چرګانو د صنعت د ودې او ساتنې په هدف سږکال د دغه ولایت په کچه ۵ زره د غوښنو چرګانو لوی او واړه فارمونه جوړېږي.

د دغه ریاست رئیس ولید احمد تسل نن ازادي راډيو ته وویل چې د دغو فارمونو ۶۰ سلنه پیسې د کرنې وزارت او ۴۰ سلنه یې د پانګه والو له لوري ورکول کېږي.

ښاغلی تسل وايي، دغه فارمونه به د کورنیو او په ځانګړي ډول د مېرمنو په اقتصاد کې د پام وړ رول ولوبوي.

د پښتون زرغون د ارشاد، حج او اوقافو مدیر وژل شوی

برید کوونکي د پېښې له ځایه تښتېدلي خو امنیتي ځواکونه یې د نیولو لټه کوي.

نامعلومو وسله والو د هرات د پښتون زرغون د ارشاد، حج او اوقافو مدیر نن (شنبه) سهار د دې ولسوالۍ په بازار کې وواژه.

د هرات د والي ویندوی جیلاني فرهاد وايي، برید کوونکي د پېښې له ځایه تښتېدلي خو امنیتي ځواکونه یې د نیولو لټه کوي.

هغه زیاتوي: "نن سهار د پښتون زرغون ولسوالي د ارشاد، حج او اوقاف مدیر د ولسوالۍ په مرکز کې هغه مهال د وسله والو کسانو له لوري وویشتل شو چې کار ته روان و."

تر اوسه پورې د دې برید مسوولیت چا پر غاړه نه دی اخیستی خو چارواکي باور لري چې دا ډول بریدونه وسله وال طالبان کوي.

نور راوښيه

XS
SM
MD
LG