د لاسرسۍ وړ لېنکونه

تازه خبر
دوشنبه ۱۰ سلواغه ۱۴۰۱ کابل ۰۸:۲۹

خبرونه

په فارياب کې تېر کال ٣٨ ماشومان وژل شوي دي

د بشري حقونو خپلواک کميسيون وايي په فارياب کې د تېر کال د ناامنيو ډېرى قربانيان ماشومان دي.

په فارياب کې د بشري حقونو خپلواک کميسيون ولايتي رئيس ذبيح اله جواد ازادۍ راډيو ته وويل، تير ميلادي کال د ماشومانو مرګ ژوبله زياته وه:

”تېر کال په فارياب کې ١١٨ ماشومانو ته مرګ ژوبله اوښتې چې له دې جملې ٨٠ ماشومان ټپيان شوي او ٣٨ نور وژل شوي دي. له بده مرغه د ملکيانو، په ځانګړي ډول ماشومانو د زيان د جبران او د قربانيانو له کورنيو سره د مرستې لپاره بنيادي پروګرام نه شته.“

په فارياب ولايت کې په وروستيو کې د ناامنيو پېښې زياتې شوي دي.

د بشري حقونو خپلواک کميسيون ولايتي دفتر وايي د جګړې ښکېلو لوريو د ملکيانو او ماشومانو د خونديتوب لپاره لازم اقدامات نه دي کړي.

د ورځې تازه خبرونه دلته ولولئ

ايران کې د دفاعي وسايلو يوه فابريکه باندې بريد شوی

د ایران دفاع وزارت وایي، د دې هېواد په اصفهان ولایت کې د دفاعي وسایلو د تولید یوه فابریکه بې‌پیلوټه الوتکو چې پر چاودېدونکو موادو سمبالې وي، په نښه کړې ده.

په هغه خبرپاڼه کې چې، پرون یکشنبې دې وزارت خپره کړې ویل شوي چې د دې فابریکې ځینې برخې ویجاړې شوي دي.

په دې اړه چې دغه بې‌پیلوټه الوتکې د کوم هېواد وې، نور جزیات نه‌دي ورکړل شوي او نه هم تر اوسه چا د دغه برید مسولیت اخیستي خو له‌دې مخکې د دا ډول بریدونو پړه پر اسرایل اچول شوې ده.

مارټين ګريفيټس نن ملګروملتونو ته د افغانستان په اړه راپور وړاندې کوي

د ملګرو ملتونو د بشري مرستو د همغږۍ د ادارې مشر مارټین ګریفیټس

د ملګروملتونو د بشري مرستو د همغږۍ د ادارې مشر مارټین ګریفیټس به نن ملګروملتونو ته افغانستان ته د خپل وروستي سفر په اړه راپور وړاندې کړي.

مارټین ګریفیټس کابل ته په سفر کې چې نږدې یوه اوونۍ یې دوام وکړ، له طالب چارواکو سره په لیدنو کتنو کې په غیردولتي مؤسسو کې پر ښځینه کارکونکو د لګول شوي بندیز د لیرې کولو پر موضوع ډېر تمرکز کړی و.

د ملګروملتونو د سرمنشي ویاند سټیفین دوجاریک وړمه ورځ خبریالانو ته وویل، چې دا غونډه به د نیویارک په وخت د سهار په یولسو بجو چې په افغانستان کې اته‌نیمې بجې کېږي، ترسره شي چې په‌کې د ماشومانو د ژغورنې د ادارې اجرایه رئیس جانتي سورپیو او د ماشومانو د وجهي صندوق مرستیال عمر عبدي هم برخه واخلي.

دې غونډې ته به افغانستان ته له مارټین ګریفيټس سره د مل پلاوي بله غړې، د پاملرنې مؤسسې مشره سوفیا پینیرو انلاین ګډون وکړي.

طالبانو په غیردولتي مؤسسو کې پر ښځینه کارکونکو بندیز داسې مهال لګولی چې د ملګروملتونو د بشري مرستو د همغږۍ ادارې یا اوچا په وینا په افغانستان کې سږ۲۰۲۳ کال له ۲۸ ملیونه زیات وګړي بشري عاجلي مرستو ته اړتیا لري.

اوچا: افغانستان کې د خوارځواکۍ کچه لوړ حد ته رسېدلې ده

يو خوارځواک ماشوم، انځور - ارشيف

د ملګروملتونو د بشري مرستو د همغږۍ اداره یا اوچا وایي، په افغانستان کې د خوارځواکۍ کچه خطرناک لوړ حد ته رسېدلې او د دې هېواد ۴ ملیونه وګړي یې اغېزمن کړي دي.

اوچا پرون په یوه ټویټ کې ویلي، چې ۸۷۵ زره ماشومان په شدیدې ځوارځواکۍ او ۲،۳ ملیونه ماشومان هم په معتدلې حادې خوارځواکۍ اخته دي.

اوچا همدارنګه ویلي، چې ۸۴۰ زره امیندوارې او شیدې ورکونکې ښځې هم په خوارځواکۍ اخته دي.

اوچا ویلي، دوامداره مالي تمویل خورا مهم دی چې د خوارځواکۍ درملنه او مخنیوی یې یقيني شي.

امينه محمد: که ښځې د کار اجازه ولري مرستندويه مؤسسې به ټولو افغانانو ته مرستې ورسوي

د ملګرو ملتونو د سرمنشي مرستياله امينه محمد

د ملګروملتونو د سرمنشي مرستیاله امینه محمد وایي، کورنۍ او نړیوالې غیردولتي مرستندویه موسسې په تر ټولو ښه موقف کې دي چې ټولو افغانانو ته خدمتونو ته ورسوي.

نوموړې ويلي، که د بشري چارو ښځینه کارکونکي د کار کولو اجازه ولري چې د ښځو او نجونو ځانګړیو اړتیاوو لپاره کار وکړي.

امینه محمد چې د طالبانو له‌خوا د افغان ښځو او نجونو د کار او زده‌کړې د بندیزونو د لیري کولو د هڅو په ترڅ کې د جنوري په شلمه افغانستان ته څلور ورځنی سفر پای ته رسولی، دغه څرګندونې پرون یکشنبې په یوه ټویټ کې کړي دي.

تر دې څلور ورځې وړاندې هغې په یوه بل ټویټ کې پر نړیوالې ټولنې غږ کړی و چې، باید په افغانستان کې د ښځو او نجونو د حقونو لپاره متحده شي.

طالبانو د تېر کال په ډسمبر کې ښځې په غیردولتي مؤسسو کې له کار کولو منع کړې او له هغې مخکې یې د ښځو او نجونو پر مخ د پوهنتونونو، د منځنیو ښوونځيو او لېسو دروازې تړلې وې.

هند له نیوزیلنډ سره د شل اوریزو لوبو لوبلړۍ ۱ـ۱ برابره کړه

د هند او نیوزیلنډ له لوبې یو انځور

کوربه هندوستان په لکنو ښار کې د ۶ وېکټو په توپیر دویمه شل اوریزه سیالي له نیوزیلنډ وګټله او په دې سره یې روانه لوبلړۍ برابره کړه.

نیوزیلنډ لومړۍ توپ وهنه وکړه او د ۸ لوبغاړو په سوځېدو یې د ۱۰۰ منډو هدف وټاکه.

هند هم ورکړل شوی هدف د ۲۰م اور په پنځم توپ ترلاسه کړ او یوازې ۴ لوبغاړي یې وسوځېدل.

د دې لوبې لپاره ویشتنځای سخت جوړ شوی و او یوازینی مخکښ توپ وهونکی سوریا کومار یادو چې تر شلو زیاتې، ۲۶ ناسوځېدلې منډې یې وکړې او د لوبې غوره لوبغاړی ونومول شو.

د دواړو لوبډلو توپ اچونکي ښه وځلېدل، خو هندی ارشدیپ سینګ یوازینی توپ اچونکی و چې ۲ لوبغاړي یې وسوځول.

د دې لوبلړۍ لومړۍ لوبه نیوزیلنډ ګټلې وه او په پلان کې ده چې د لوبلړۍ درېیمه لوبه د فبرورۍ میاشتې په لومړې نېټه ترسره شي.

د یادونې ده چې په دې لوبلړۍ کې د دواړو هېوادونو ځيني نوموتي لوبغاړي نه لوبېږي.

د سویلي افریقا لوبډلې له انګلستان لوبلړۍ وګټله

د انګلستان او سویلي افریقا د نننۍ لوبې یو انځور

د سویلي افریقا او انګلستان ترمنځ د کرکټ نړیوالې شورا د سوپر لیګ سیالیو دویمه یو ورځنۍ لوبه هم کوربه هېواد په ۵ وېکټو وګټله.

سویلي افریقا د انګلستان د ۳۴۳ منډو هدف د ۵ وېکټو په سوځېدو سره په ۴۹،۱ اور کې ترلاسه کړ او په دې سره یې د ۳ یو ورځنیو لوبو لومړنۍ دوه لوبې وګټلې.

په دې سیالۍ کې د انګلستان لپاره لوبډلمشر جاس بټلر، هیري بروک او معین علي نیمې سلیزې ووهلې او هدف ته د رسېدو په پار د کوربه هېواد لوبډلمشر ټیمبا بهوما سلیزه ووهله، هغه ۱۰۹ منډې وکړې، خو د ډیوېډ میلر ۵۸ او د مارکو یانسین ۳۸ ناسوځېدلو منډو سویلي افریقا بریا ته ورسوله.

بهوما د دې لوبې غوره لوبغاړی ونومول شو.

سویلي افریقا د دې دواړو لوبو په ګټلو سره ۲۰ نومرې ترلاسه کړې چې ټولټال نومرې یې ۷۹ ته ورسېدې او په دې سره یې د کرکټ نړیوالې شورا د سوپرلیګ په سیالیو کې نهم مقام ترلاسه کړ.

د ۲۰۲۳ زېږدیزکال د کرکټ نړیوال جام سیالیو ته چې په هند کې به ترسره شي تر دې دمه د افغانستان په ګډون ۷ لوبډلو نېغ په نېغه لار موندلې ده او یوه بله لوبډله هم چانس لري چې نېغ په نېغه لار پیدا کړي.

د یادونې ده چې د اتم مقام ترلاسه کولو لپاره اوس مهال سویلي افریقا، ویسټ اینډیز او سریلانکا مقابله کوي، خو که سویلي افریقا د فبرورۍ په لومړۍ نېټه له انګلستان درېيمه یو ورځنۍ سیالي هم وګټي، نو دې مقام ته به ورسېږي.

کرکټ؛ د هندوستان کم عمره نجونو نړیوال جام وګاټه

د هندوستان تر ۱۹ کلنو کم عمره نجونو لوبډله

د هندوستان تر ۱۹ کلنو کم عمره نجونو په سویلي افریقا کې د ۷ وېکټو په توپیر سره انګلستان ته ماتې ورکړه او په دې سره یې د شل اوریزو سیالیو نړیوال جام وګاټه.

انګلنډ چې لومړۍ پاڼې یې کړې وه د ټولو لوبغاړو په سوځېدو سره یې د ۶۹ منډو هدف ټاکلی و.

هند د ۳ لوبغاړو په سوځېدو سره په ۱۴م اور کې هدف ترلاسه کړ او اتلولي یې وګټله.

دغه سیالۍ چې د کرکټ نړیوالې شورا له لوري په لومړي ځل په سویلي افریقا کې ترسره شوې ۱۶ هېوادونو په کې برخه درلوده.

په دې سیالیو کې هندۍ لوبغاړې شوېتا سیهراوت تر ټولو توپ وهونکو مخکښه وه او په ۷ لوبو کې یې ۲۹۷ منډې کړې وې.

دغه راز په توپ اچونکو کې بیا اسټرلیایۍ ایلن کلارک تر نورو زیاتې ۱۲ وېکټې اخستې وې.

د یادونې وړ ده چې د کرېکټ له نړیوالې شورا سره افغانستان یوازینی بشپړ غړیتوب لرونکی هېواد و چې په دې سیالیو کې لوبډله نه درلوده.

په کونړ کې د یوه کور د چت پرېوتو پېښه کې ۳ کسان مړه شوي

ارشیف

د کونړ په شیګل ولسوالۍ کې تر سخت اورښت وروسته د یوه کور د چت د پرېوتو په پېښه کې ۳ وړې نجونې مړې شوې دي.

په کونړ کې د طبیعي پېښو پر وړاندې د مبارزې ادارې یوه کارکوونکي احسان الله نن یکشنبه ازادي راډیو ته ویلي، دغه چت سهار وختي درې بجې پرېوتی، چې په نتیجه کې یې د ښځو او ماشومانو په ګډون ۶ نور کسان ټپیان شوي دي.

د طبیعي پېښو پر وړاندې د مبارزې لپاره د دولت وزارت چې د طالبانو په کنټرول کې دی، وايي په تېرو درېیو اوونیو کې د بېلابېلو پېښو په نتیجه کې د مړو شمېر ۱۶۶ کسانو ته رسېدلی دی.

نن او سبا هم د افغانستان په مرکزي سیمو کې د اورښتونو اټکل شوی دی.

ایټالیا کې پر افغان ښځو د لګول شویو محدودیتونو پر خلاف لاریون شوی

په ایټالیا کې د پي ټي ایم د اروپا څانګې د لاریون کوونکو پلویانو انځور

د پښتون ژغورنې غورځنګ یا پي ټي ایم اروپايي څانګې په لسګونه پلویانو پر افغان نجونو او ښځو د تعلیم او کار د محدودیتونو خلاف په ایټالیا کې لاریون وکړ.

د پي ټي ایم یوه غړي عبدالله احسان ازادي راډیو ته ویلي، د لاریون برخه والو له طالبانو غوښتنه وکړه چې د نجونو او ښځو د تعلیم، تحصیل او کار حق دې نه ځنې اخیستل کېږي.

لاریونوالو له نړیوالې ټولنې هم وغوښتل چې په دې برخه کې دې پڅ چلند نه کوي، بلکې خپل دریځ دې قاطع او روښانه کړي.

دا لاریون داسې وخت کېږي چې د طالبانو د لوړو زده کړو وزارت پرون شنبه نادولتي پوهنتونونو ته هم امر وکړ چې د کانکور په راروانو ازموینو کې نجونو او ښځو ته د ګډون حق ورنه کړي.

شاوخوا ۵۰۰ ورځې کېږي چې نجونې په افغانستان کې تر شپږم ټولګي پورته نور تعلیم نه شي کولای، تېره میاشت ښځې او نجونې پوهنتونو ته له تګ هم منع شوې او په نادولتي موسسو کې د ښځو پر کار هم بندیز ولګېد.

د ارزګان په چورې کې یو ځوان ځان وژلی

د افغانستان په عمومي نقشه کې د ارزګان ولایت موقعیت

د ارزګان په چورې ولسوالۍ کې د یوه ځوان د ځانوژنې خبر ورکړل شوی دی.

د ارزګان لپاره د طالبانو د والي ویاند احسان الله حماس ازادي راډیو ته ویلي، دغه پېښه پرون ناوخته په جنوبي قلعه راق سیمه کې شوې ده.

ویل شوي دغه ځوان ځان د کلاشینکوف په ډزو سخت ټپي کړی، وروسته یې د سختو ټپونو له کبله ساه ورکړې ده.

د طالبانو د والي ویاند وايي، د پېښې انګېزه معلومه نه ده، خو په سیمه کې ځینو کسانو ویلي، دغه ځوان وروسته له هغې ځان وژنه وکړه، چې د تره لور ده ته په نکاح نه کړای شوه.

نور راوښيه

XS
SM
MD
LG