د لاسرسۍ وړ لېنکونه

تازه خبر
جمعه ۸ سلواغه ۱۴۰۰ کابل ۰۶:۱۶

نړۍ

هند تېرو شپږو کلونو کې د مسلمانانو په ګډون ۴۰۰۰ کسانو ته تابعیت ورکړی

هندی پاسپورټ

د هند د کورنیو چارو وزارت پرون چهارشنبه اعلان وکړ چې په تېرو ۶ کلونو کې یې نژدې ۴ زره مسلمانو او غیر مسلمانو پاکستانیانو، افغانانو او بنګالیانو ته د هندوستان تابعیت ورکړی دی.

د هند د کورنیو چارو وزارت یوه جګپوړي چارواکي دا خبره په داسې مهال وکړه چې د تابعیت په ورکړه کې د مسلمانانو د استثنا کولو په اعتراض کې د هند په بېلابېلو ښارونو کې سترې مظاهرې وشوې.

د هند له لوري د نوي تصویب شوي قانون پر اساس د افغانستان، پاکستان او بنګله‌دېش غیر مسلمانو وګړو ته د هند تابعیت ورکول کېږي.

د دغه هېواد د کورنیو چارو وزارت وايي، په وروستیو شپږو کلونو کې یې ۲ زره ۸۳۰ پاکستانیانو، ۹۱۲ افغانانو او ۱۷۲ بنګالیانو ته د هند تابعیت ورکړی دی چې د هغو په منځ کې سلګونه مسلمانان هم شامل دي.

د ورځې تازه خبرونه دلته ولولئ

شمالي کوریا ۲ مشکوک بالسټیک توغندي د سمندر پر لوري توغولي

آرشیف، د شمالي کوریا له لوري یو توغول شوی توغندی

شمالي کوریا دوه مشکوک بالسټیک توغندي د سمندر پر لوري توغولي چې په دې سره د هغو وسلو شمېر چې دې هېواد روانه میاشت ازمویلي، شپږو ته ورسېد.

د جنوبي کوریا پوځ پرون چهارشنبې (د سلواغې ۶مه) دا لنډ واټن ویشتونکي توغندي یاد کړل چې په خبره یې تر شل کیلو مترو پورې لوړ شوي او د ۱۹۰ کیلو مترو واټن له وهلو وروسته په ختیځ یا د جاپان په سمندرګې را پریوتي دي.

پر شمالي کوریا د بندیزونو له مخې دا هېواد د اټمي وسلو او لېرې واټن ویشتونکو توغندیو له ازموینو منع کړای شوی دی، خو یو شمېر کارپوهان وایي، پیونګ یانګ د نوېو توغندیو په ازموینې سره هڅه کوي چې د امریکا له متحدو ایالاتونو او جنوبي کوریا سره په راتلونکې خبرو کې یو برلاسی دریځ ولري.

د امریکا ساحلي ګارډ: ښايي د فلوریډا سواحلو کې ۳۹ کډوال وژل شوي وي

د فلوریډا په سواحلو کې یوه ډوبه شوې کښتۍ

د امریکا ساحلي ګارډ وایي، د دې وېره شته چې د فلورېډا سواحلو ته نژدې د یوې کښتۍ د ډوبېدو په پېښه کې به چې غیر قانوني کډوال یې لېږدول، تر ۳۹ پورې کسانو خپل ژوند له لاسه ورکړی وي.

ساحلي ګارډ ته وړمه ورځ وروسته له هغې خبرداری ورکړل شو چې یوې تجارتي کښتۍ یو کس چې د ډوبې شوې کښتۍ په یوې ټوټې پورې نښتی و، ژوندی وموند.

دغه ژغورل شوي کس ویلي، په کښتۍ کې نور ۳۹ تنه سپاره وو او هېڅ یوه هم د ژغورنې واسکټې نه درلودې.

د ساحلي ګارډ یوې افسرې جو ان بورډیان Jo-Ann Burdian خبریالانو ته وویل، دغې کښتۍ د جنوري په ۲۲مه نېټه له باهاماس څخه حرکت پیل کړی و او د سمندر په سختو څپو کې ډوبه شوه.

ساحلي ګارډ د دې پېښې په احتمالي ژوندي پاتې شوېو کسانو پسې د الوتکو او کښتیو په ذریعه د لټون عملیات پیل کړي دي.

جېمز وېب فضايي ټیلسکوپ د لمر په مدار کې خپل وروستي منزل ته ورسېد

جېمز وېب فضايي ټیلسکوپ له لمر سره نږدې

جېمز وېب فضايي ټیلسکوپ چې یوه میاشت وړاندې فضا ته استول شوی و، له ځمکې کابو یو میلیون او ۶ لکه کیلومتره لېرې د لمر په مدار کې خپل وروستي منزل ته ورسېد.

د ناسا د څېړونکو په وینا، دا ټیلسکوپ د خپل کوچني انجن په مرسته په وروستیو پنځو دقیقو کې په هغه ځای کې دېره شو چې د لمر په مدار کې د حرکت لپاره د جاذبې لازم تعادل لري.

دا ټیلسکوپ د امریکا په بالتیمور کې د دې ماموریت د کنټرول د مرکز د انجینرانو له لوري هدایت کېږي.

دوی وايي، دې مرکز ته یو شمېر راډیويي پیغامونه رسېدلي چې له هغو څخه څرګندېږي چې جېمز وېب ټیلسکوپ د لاکرانج ۲ په نوم ځای ته نژدې موقعیت غوره کړی دی.

د اسراییل ولسمشر اسحاق هرتزوګ متحده عربي اماراتو ته ځي

د اسراییل ولسمشر اسحاق هرتزوګ

ټاکل شوې ده چې د اسراییل ولسمشر اسحاق هرتزوګ راتلونکې اوونۍ متحده عربي اماراتو ته په دوه ورځني سفر لاړ شي.

دا سفر چې تاریخي بلل شوی، د دوو هېوادونو ترمنځ د اړیکو له عادي کېدو وروسته کېږي.

د ولسمشر هرتزوګ دفتر په یوه بیان کې ویلي چې متحده عربي اماراتو ته د ولسمشر هرتزوګ سفر به د دوو هېوادونو ترمنځ یو نوی تاریخي باب پرانېزي.

په پام کې ده چې د اسراییل ولسمشر د متحده عربي اماراتو له چارواکو سره د کتنو ترڅنګ په دوبۍ کې یو نندارتون هم وګوري.

د اسراییل او متحده عربي اماراتو ترمنځ کابو ۱۶ میاشتې پخوا اړیکې ټینګې شوې.

جرمني په دې غور کوي چې پر'ټیلګرام' اپلېکېشن بندیز ولګوي

ټیلګرام

د جرمني حکومت په دې غور کوي چې د ټیلګرام پر پیغام رسوونکي اپلېکېشن بندیز ولګوي.

د فرانس پرېس خبري اژانس د راپور له مخې، له ټیلګرام څخه په ځلونو د کرونا ضد واکسین په اړه د دسیسې د تیورۍ د خپروونکي چاینل او ان د وژلو د ګواښونو په توګه کار اخیستل شوی دی.

د فرانس پرېس پر اساس، ټیلګرام اپلېکېشن د کووېډ- ۱۹ د مخنیوي لپاره د جرمني د حکومت له پالیسۍ سره په مخالفت کې د یو شمېر تاوتریخجنو اعتراضونو په ترتیبولو کې هم مهم رول لرلی دی.

د جرمني د کورنیو چارو وزیرې نانسي فایسر وړاندیز کړی، که ټیلګرام د غیر قانوني چلندونو د پای ته رسولو په هلو ځلو کې همکاري ونه کړي، حکومت به دا اپلېکېشن بشپړ منع کړي.

هند کې ځینې کسان پاریدلي وو چې د رېلګاډي ډبو ته یې اور ورته کړ

ارشیف، عکس تزئیني بڼه لري

د هند په ختیځ کې یو شمېر پارېدلیو خلکو پرون چهارشنبې(د سلواغې ۶مه) په کاري فرصتونو کې د عدالت د نه رعایتېدو په اعتراض کې د رېلګاډي ډبو ته اور ورته کړ.

پولیسو له ډنډو او اوښکې بهیوونکي ګاز څخه په کار اخیستو اعتراض کوونکي تیت پرک کړل.

د روانې اوونۍ له پیله په بیهار ایالت کې د دې ادعا په خاطر چې د رېل په دولتي برخه کې د کارموندنې ازموینه عادلانه نه ده اخیستل شوې، له تاوتریخوالي ډک اعتراضونه کېږي.

په هند کې له ډېرو کلونو راهیسې بې روزګاري یوه لویه ستونزه ده او د ځايي رسنیو د راپورونو له مخې، تر ۱۰ میلیونه ډېرو کسانو په وروستۍ ازموینه کې چې د ۳۵ زره دندو لپاره واخېستل شوه، ګډون کړی وو.

ایران ۱۷ تنه په دې شک نیولي چې د ټوکو لپاره یې ویډیوګانې جوړولې

ارشیف، عکس تزئیني بڼه لري

د ایران پولیس وايي، ۱۷ تنه یې په دې شک نیولي چې د ټوکو او سرګرمیو لپاره یې ویډیوګانې جوړولې.

دې ویډیوګانو چې په ټولنیزو رسنیو کې یې زیات شهرت ترلاسه کړی وو، د ایران د پولیسو په وینا د تهران په واټونو کې وحشت خپراوه.

د تهران د پولیسو قوماندان جنرال حسین رحیمي پرون چهارشنبې(د سلواغې ۶مه) دولتي ورځپاڼې 'ایران' ته وویل، هغه کسان چې نیول شوي په پټو کمرو یې د تهران په واټونو کې له خلکو ارام اخیستی وو.

په دغو ویډیوګانو کې چې په خواله رسنیو کې خپرې شوي، ځینې کسان مثبت او ځینې په غوسه نظر څرګندوي.

د امریکا متحدو ایالاتونو بېلاروس ته خبرداری ورکړی

د امریکا د بهرنیو چارو وزارت ویاند نېډ پرایس

د امریکا متحدو ایالاتونو بېلاروس ته خبرداری ورکړی چې که پر اوکراین د روسیې له احتمالي یرغل سره مرسته وکړي نو قاطع ځواب به وویني.

د امریکا د بهرنیو چارو وزارت ویاند نېډ پرایس پرون سې شنبه (د سلواغې ۵مه) په یوه خبري غونډه کې وویل، بېلاروس ته په ډاګه ویل شوي چې که پر اوکراین د یرغل لپاره له خپل قلمرو څخه د کار اخیستو اجازه ورکړي، نو د امریکا او د متحدانو له چټک او قاطع غبرګون سره به مخامخ شي.

پر اوکراین د روسیې د احتمالي برید په اړه د لویدیځ اندېښنې وروسته له هغه زیاتې شوې چې مسکو د خپل دې ګاونډي د سرحد په اوږدو کې شااوخوا یولک ۲۷ زره سرتېري ځای پرځای کړل.

فرانسه او جرمني: که روسیه پر اوکراین برید وکړي بدې پایلې به ولري

د جرمني او فرانسې ګډ بیرغونه

فرانسې او جرمني روسیې ته خبرداری ورکړی دی چې پر اوکراین به برید بدې پایلې ولري.

د فرانسې ولسمشر ایمانویل مکرون پرون د جرمني له صدراعظم اولاف شولڅ سره په برلین کې خبري غونډې ته وویل، پاریس او برلین هېڅکله له خبرو سره مخالفت نه دی کړی، خو که روسیه پر اوکراین برید وکړي مسکو ته به ډېره ګرانه تمامه شي.

ښاغلي شولڅ بیا دې خبري غونډې ته وویل، پردې فکر کوي که روسیې برید وکړ څرنګه ځواب ورکړي. د ده په وینا دې برخه کې یې نظر سره ورته دی چې د روسیې نظامي تحرکاتو ته به جدي ځواب ورکړل شي.

تمه ده چې ولسمشر مکرون د جمعې په ورځ د روسیې له ولسمشر ولادیمیر پوتین سره د اوکراین په تړاو په ټیلیفون خبرې وکړي.

تر دې مخکې د امریکا متحد ایالاتونو او یو شمېر اروپایي هېوادونو ویلي و چې د اوکراین له پولو سره روسیې شااوخوا یو لک پوځیان ځای پرځای کړي دي چې دا وېره یې رامنځته کړې ده چې روسیه پر اوکراین حمله کوي.

ایران کې یو فرانسوی ګرځندوی د جاسوسۍ په تور په بند محکوم کړ

بنیامین بریر

په ایران کې یوې محکمې یو فرانسوی ګرځندوی د جاسوسۍ او د اسلامي نظام پرضد د تبلیغ په تور په اته کاله او اته میاشتې بند محکوم کړ.

د فرانسې د بهرنیو چارو وزارت پرون سې شنبه (د سلواغې ۵مه) وویل چې د بنیامین بریر محاکمه د منلو نه ده.

بریر د دوه زره شلم کال د مې په میاشت کې د ترکمنستان- ایران له پولي سره نیول شوی و.

د شپږ دیرش کلن بریر کورنۍ ټینګار کوي چې هغه بې ګناه دی او د بشري حقونو ډلو ایران تورن کړی دی چې له لویدیځ سره د خبرو پر مهال د امتیاز ترلاسه کولو په خاطر له بندیانو د یوې وسیلې په توګه کار اخلي یا هم پیسې پرې ترلاسه کوي.

په پاریس کې د بریر مدافع وکیل فیلیپ والنت په یوه بیان کې ویلي دي چې مؤکل یې د تړلیو دروازو شاته په مشهد کې محاکمه شو چې نه په کې قضایان بې پرې وو او نه هم محاکمه عادلانه وه.

یو پاکستانی خبریال حسین شاه لاهور ښار کې په ډزو ووژل شو

ارشیف،

یو پاکستانی خبریال حسین شاه چې له یوه سیمه ییز ټلوېزیون سره یې کار کاوه تېره شپه د پاکستان په لاهور ښار کې په ډزو ووژل شو.

پولیسو وویل، دوه وسله وال چې پر یوه موټر سایکل سپاره و، پر حسین شاه د لاهور پرېس کلب ته نژدې ډزې وکړې او د پېښې له ځایه وتښتېدل.

د پولیسو یوه جګپوړي چارواکي صفدر رضا کاظمي وویل، په دې اړه چې نوموړی د چا له خوا وژل شوی؟ څېړنه کوي.

تراوسه چا یا کومې ډلې د هغه د وژلو مسولیت نه دی اخیستی.

د حسین شاه له وژل کېدو وروسته یو شمېر قهر وړو خبریالانو په لاهور کې لاریون وکړ، د هغه وژل یې وغندل او د عاملانو د نیولو غوښتنه یې وکړه.

د پاکستان د خبریالانو ټولنې په ټول هېواد کې د مظاهرو غوښتنه کړې ده.

په پاکستان کې خبریالان له ډېرې مودې راهیسې په حملو کې په نښه شوي.

دا هېواد د خبریالانو د خوندیتوب د نړیوالې کمېټې او د نړیوال معافیت انډېکس له خوا په نړۍ کې نهم هېواد بلل شوی چې په کې په منظم ډول خبریالان وژل کېږي او قاتلان یې ازاد ګرځي.

بایډن: امریکا او اروپا اوکراین کې د روسیې پر وړاندې موافقې ته رسیدلي

د امریکا ولسمشر جو بایډن

د امریکا ولسمشر جو بایډن وایي، متحده ایالاتونه او اروپایي متحدان یې د اوکراین پولې ته نژدې د روسیې د "پوځي ګواښ" پر وړاندې بشپړې موافقې ته رسیدلي دي.

بایډن دا څرګندونې پرون له اروپایي متحدانو سره تر ویډیویي غونډې وروسته خبریالانو ته وکړې.

د بریتانیا صدر اعظم بورېس جانسن هم د امریکا، ایټالیا، پولنډ، فرانسې، جرمني او دغه راز اروپایي شورا، اروپایي کمېسیون او ناټو له چارواکو سره تر لیدو کتو وروسته ورته څرګندونې کړي دي.

دغو لویدیځو هېوادونو هوکړه کړې چې که پر اوکراین د روسیې د یرغل امکانات ډېریږي، دوی به غچ اخیستونکې لارې چارې سنجوي چې دې اقداماتو کې د بندیزونو یوه مجموعه هم شامله ده.

له دې وړاندې د ناټو غړو هېوادونو ویلي چې ختیځه اروپا کې یې ځواکونه د تیار سی حالت کې دي.

ریچارد نیفیو د هغو مرکچیانو له ډلې ووت چې ایران سره اټمي تړون ارزوي

ریچارد نیفیو

د تهران لپاره د امریکا یو لوړپوړی استازی د هغو مرکچیانو له ډلې ووت چې له ایران سره اټمي تړون ارزوي.

ریچارد نیفیو داسې حال کې له دې ډلې ووځي چې د دغه تړون بیا ژوندي کېدو ته هڅې ګړندۍ شوي، خو مرکچیان یې د نظر اختلاف لري.

د امریکا د بهرنیو چارو وزارت یوه لوړپوړي چارواکي د ازادې اروپا/ازادي راډیو ته ویلي چې ریچارد له دې وروسته د ایران لپاره د امریکا د ځانګړي استازي مرستیال نه دی.

دغه وزارت د خپل دې اقدام لامل څرګند نه کړ، خو والسټریټ ژورنال ویلي، ریچارد نیفیو له نورو امریکایي مرکچیانو سره د ایران د اټمي تړون په اړه د نظر اختلاف درلود.

د ایران او د نړۍ د سترو قدرتونو، چین، فرانسې، بریتانیا، روسیې او جرمني ترمنځ د اترېش په پلازمېنه ویانا کې د ایران د اټمي تړون د بیا فعالولو په اړه خبرې روانې دي، خو د پام وړ پرمختګ نه تر سترګو کیږي.

ایران: امریکا سره په دې شرط خبرو ته تیار یم چې ښه موافقه ترلاسه شي

د ایران د بهرنیو چارو وزیر حسین امیرعبداللهیان

ایران وایي، د ۲۰۱۵م زیږدیز کال اټمي موافقې د را ژوندي کولو لپاره د امریکا له متحدو ایالاتونو سره مخامخ خبرو ته په دې شرط تیار دی چې یوه ښه موافقه ترلاسه شي.

د ایران د بهرنیو چارو وزیر حسین امیرعبداللهیان پرون دوشنبې (د سلواغې ۴مه) په تهران کې په یوه خبري غونډه کې هغه راپورونه چې وایي، حکومت یې د اروپا په منځګړیتوب له امریکا سره خبرو ته اماده شوی، رد کړل.

عبداللهیان زیاته کړه: "که د خبرو په جریان کې دې مرحلې ته ورسېږو چې یوې ښې او له لوړو تضمینونو سره یوې موافقې ته د رسېدو لپاره اړتیاوې چې په یوه سطحه له امریکایانو سره خبرې وکړو، د بندیزونو د لېرې کولو لپاره د خبرو په کاري چوکاټ کې به دا مساله له پامه ونه غورځوو."

د ایران او د نړۍ د سترو قدرتونو، چین، فرانسې، بریتانیا، روسیې او جرمني ترمنځ د اتریش په پلازمېنه ویانا کې روانې خبرې د تیر کال په جون میاشتې کې پیل شوې وي، خو وروسته له هغې چې په دې کال کې تُندلاری ابراهیم ریسي د ولسمشرۍ انتخابات وګټل، په ټپه دریدلې وې.

واشنګټن په دغو خبرو کې په غیر مستقم ډول ګډون کړی خو ویل کېږي چې ایراني او امریکایي مرکچیانو د اروپایانو په منځګړیتوب خبرې مخ ته وړې دي.

ناټو ختیځه اروپا کې خپل ځواکونه د تیارسۍ په حالت کې راوستي

د ناټو ځواکونه

د ناټو غړیو هېوادونو هغو اندېښنو ته په پام چې د اوکراین له پولې سره د روسي ځواکونو د ځای پرځای کیدا پر سر زیاتې شوي، په ختیځه اروپا کې خپل ځواکونه د تیارسۍ په حالت کې راوستي.

مسکو دا یو پارونکی اقدام بللی دی.

ناټو ویلي چې ډنمارک، هسپانیا، فرانسه او هالنډ په پام کې لري یا هم دا مساله څیړي چې ځواکونه، الوتکې او کښتۍ ختیځې اروپا ته ولېږي.

د ناټو سرمنشي ینس سټولټنبرګ پرون دوشنبې(د سلواغې ۴مه) په یوه اعلامیه کې وویل چې دا تړون د خپلو متحدینو د ساتنې او دفاع لپاره هر ډول اقدام ترسره کوي.

د راپورونو له مخې د امریکا ولسمشر جو بایډن هم په ختیځه اروپا او بالتیک سیمه کې د امریکايي ځواکونو د غښتلي کېدو پر لارو چارو غور پیل کړی دی.

بایډن له خپلو د ملي امنیت له جګ پوړو چارواکو سره د شنبې او یکشنبې په ورځو په دې اړه پر لارو چارو بحثونه وکړل.

د نیویارک ټایمز د راپور له مخې یو انتخاب دا دی چې له زرو نه تر پنځو زرو پورې امریکایي سرتیري د ختیځې اروپا هېوادونو ته واستول شي.

د مسکو او لویدیځ ترمنځ کړکېچ وروسته له هغې زیات شو چې امریکایي او اروپایي چارواکو وویل چې روسیې له سل زرو زیات سرتیري له اوکراین پولې سره نژدې ځای پرځای کړي دي.

لویدیځ اندېښنه لري چې ښایي روسیه پر اوکراین برید وکړي، خو مسکو دغه اندېښنه بې ځایه بولي.

نور راوښيه

XS
SM
MD
LG