د لاسرسۍ وړ لېنکونه

تازه خبر
سه شنبه ۸ تله ۱۳۹۹ کابل ۰۲:۲۱

افغانستان

چارواکي: قیصاري له بلخه جوزجان ته تښتېدلی

په بلخ کې امنیتي ځواکونه د قیصاري د کور د کلابندۍ پرمهال. انځور - ۲۰۱۹/۱۲/۱۶

د بلخ ولایت امنیتي چارواکو تأیيد کړه چې د افغان امنیتي ځواکونو تر عملیاتو وروسته د جنبش ګوند یو سخت دريځی مشر نظام‌الدین قیصاري له تښتېدلو وروسته اوس هم په جوزجان ولایت کې دی.

د بلخ د ملي امنیت ریاست مرستیال سید شاه سادات نن دا خبره رسنیو ته وکړه.

د بلخ امنیه قوماندان اجمل فائز ویلي چې تر اوسه‌يې له قیصاري سره اړوند ۴۵ وسله‌وال کسان او ګڼ شمېر جنګي مهمات ورسره نیولي دي.

د امنیت ریاست په داسې حال کې په جوزجان کې د قیصاري حضور تأییدوي چې تېره شپه اجمل فائز ازادي راډيو ته ويلي وو چې قیصاري یو "ملي خاین" دی او که د افغانستان په هر ځای کې وي امنیتي ځواکونه به‌یې ونیسي.

د بلخ امنیتي چارواکو ویلي چې د نظام‌الدین قیصاري پر کور د هوايي حملو امر یې له کابله ترلاسه کړی و.

دا په داسې حال کې ده چې د جوزجان چارواکي د دغې موضوع په اړه بې‌خبري ښيي.

د ورځې تازه خبرونه دلته ولولئ

بامیان کې د کچالو او پیازو ۱۶ سړې خونې ګټې اخیستنې ته وسپارل شوې

د بامیان ولایت نقشه

په بامیان و لایت کې د کچالو او پیازو ۱۶ صفر انرژۍ سړې خونې ګټې اخیستنې ته وسپارل شوې.

د افغانستان د کرنې او مالدارۍ وزارت ویاند اکبر رستمي نن ازادي راډیو ته وویل، چې دغه خونې د بامیان په کهمرد ولسوالۍ کې د کرنیز محصولاتو د مدیریت پروژې پر مټ د نږدې اته میلیونه افغانیو په لګښت جوړې شوې دي.

هغه زیاته کړه: "په بامیان ولایت کې د کچالو او پیازو د ساتنې ۱۶ صفر انرژۍ سړې خونې ګټې اخیستنې ته وسپارل شوې، ټاکل شوې چې په راتلونکې یوه میاشتې کې به په دغه ولایت کې ۱۳۹ نورې سړې خونې هم ګټې اخیستنې ته وسپارل شي، چې هره خونه کې به ۱۲ ټنه کچالو ساتلو ظرفیت لري."

د ښاغلي رستمي په خبره، روان کال په بامیانو ولایت کې د کچالوو درې لکه اتیا زره ټنه حاصلات تر لاسه شوي دي.

یاد وزارت په پلان کې لري، چې په بامیان، میدان وردګ، غور، کابل، بادغیس او یو شمېر نورو هغه ولایتونو کې چې کچالو په کې زیات کرل کېږي شااوخوا ۲۵۰۰ سړې خونې جوړې کړي.

ولسمشر غني د افغانستان د خونو فدراسیون پرانیست

افغان ولسمشر محمد اشرف غني

جمهور رئیس محمد اشرف غني د افغانستان د خونو فدراسیون رسماً پرانیست.

له ارګه په خپره شوې خبر پاڼه کې راغلي، ښاغلي غني په دې پرانیست غونډه کې وویل، چې افغانستان د خونو فدارسیون په پرانیستلو سره د اقتصاد یوه واحده ژبه او ادرس پیدا کړ.

د افغانستان د خونو فدراسیون عمومي رئیس محمد اسماعیل غضنفر وویل، خصوصي سکټور له پاشلتیا تېر شوی او اوس د خونو فدراسیون په جوړېدو سره یې د افغانستان د هوساینې لپاره تر یوه چتر لاندې استوار ګامونه واخیستل.

د خونو فدارسیون کې د کرنې او مالدارۍ تولیداتو، د ښځو د سوداګرۍ او صنایعو، د دوکاندارنو او کسبګرو، د پانګونې او سوداګرۍ، د کانونو او صنایعو او په افغانستان کې د نړیوالې سوداګرۍ خونې غړیتوب لري.

د اقتصادي فعالیتونو انسجام، د کار ایجاد او د بې وزلۍ راکمول، د متشبثینو او سوداګرو ښځو پیاوړتیا، د پانګونې جلبول، پر ځان د اتکا تمرکز، د مسلکي او فني زده کړو برابرول، د سوداګریزو شخړو حلول، د باور د فضا پیاوړي کول، د کورنیو تولیداتو وده او د خصوصي سکټور، دولت او نړیوالو شریکانو ترمنځ د متقابلې همکارۍ هڅې د دغه فدراسیون د جوړولو موخه یاده شوې.

'د افغانستان-خېبر پښتونخوا ټولې لارې به د اوونۍ څلور ورځې پرانیستل شي'

ارشیف

پاکستاني چارواکو اعلان کړی چې په خېبر پښتونخوا کې به له افغانستان سره ټولې لارې د اوونۍ څلور ورځې پرانیزي.

د پاکستان د کورنيو چارو وزارت د دوشنبې په ورځ (د سپټمبر په ۲۸مه) ويلي چې د شنبې، سې شنبې، چهارشنبې او پنجشنبې په ورځو به دا لارې د پلي تګ راتګ لپاره پرانیستې وي.

ازادي راډيو ته په رسېدلي دغه بيان کې ويل شوي چې د تورخم لار به يوازې د هغو افغانانو لپاره پرانیستې وي چې پاسپورټ او ویزه ولري.

دا نه‌دي ويل شوي چې دا لارې به څه وخت خلاصې شي.

د افغانستان او پاکستان ترمنځ خلک د تورخم ترڅنګ د غلام خان، انګور اډې، خرلاڅو او مومندو پر لارو تګ راتګ کوي.

دا پرېکړه وروسته له هغه شوې چې څو موده مخکې پاکستان د کرونا ویروس د مخنیوي په هدف له افغانستان سره لارې تړلې وې.

پاکستان په افغانستان کې د خپلو کارګرو لپاره د ویزې اسانتیا غواړي

د پاکستان د ملي اسامبلې رئیس اسد قیصر

د پاکستان د ملي اسامبلې رئیس په افغانستان کې د پاکستاني وګړو لپاره د کار د ویزو د اسانتیا او په افغانستان کې پاکستاني قونسلي چارواکو ته په افغان زندانونو کې د پاکستاني بندیانو د لاسرسي غوښتنه کړې ده.

دا معلومات د پاکستان د ملي اسامبلې پر رسمي ټويټرپاڼه د دوشنبې په ماښام خپاره شوي.

د معلوماتو له مخې د پاکستان د ملي اسامبلې رئیس اسد قیصر دا غوښتنې د افغانستان د ملي مصالحې عالي شورا له رئیس عبدالله عبدالله سره په اسلام‌اباد کې د دوشنبې په ورځ د لیدو پر مهال مطرح کړي.

د افغانستان د ملي مصالحې عالي شورا ویاند فریدون خوځون د دوشنبې په ورځ په دې اړه ازادي راډيو ته وویل چې ښاغلي عبدالله او ښاغلي قیصر په دې کتنه کې پر دوه اړخیزو اړیکو خبرې وکړې.

ده زیاته کړه: "زموږ تمه دا ده چې دا سفر به وکړای شي د دواړو هېوادونو ترمنځ اړیکې پراخې کړي. هغه ژمنې چې وشوې په صادقانه توګه عملي شي."

ټاکل شوې ده د افغانستان د ملي مصالحې عالي شورا رئیس عبدالله عبدالله نن د سې شنبې په ورځ د پاکستان د صدراعظم عمران خان، ولسمشر عارف علوي او لوی درستیز قمر جاوېد باجوه سره وویني.

ارګ: د بیان ازادي او اطلاعاتو ته لاسرسی به خوندي وساتل شي

د افغانستان د ولسمشر ویاند صدیق صدیقي

افغانستان د ولسمشر ویاند وايي حکومت خلکو ته ډاډ ورکوي چې د بیان ازادي او اطلاعاتو ته لاسرسی به د نورو لاسته راوړنو په څېر خوندي وساتل شي.

صدیق صدیقي د اطلاعاتو د لاسرسي د نړیوالې ورځې په مناسبت په یوه ویډیويي پیغام کې دا خبرې کړي.

هغه زیاته کړه: "موږ خپلو خلکو ته ډاډ ورکوو چې د بیان ازادي او اطلاعاتو ته لاسرسی، حساب کتاب او ځواب وینه به زموږ د خلکو د اساسي حقونو په توګه پر خپل ځای وي او حکومت د تېرو نولسو کلونو د ارزښتونو ساتنې ته متعهد دی."

د سېپټېمبر اته ویشتمه د ملګرو ملتونو له خوا اطلاعاتو ته د لاسرسي نړیواله ورځ یاده شوې.

هدف یې دا ښودل شوی چې حکومتونه او مسوولین د اطلاعاتو شریکولو ته وهڅول شي.

د افغان دولت مرکچي ټيم نن هم د کړنلارې په لانجمنو مسئلو خبرې کوي 

د افغان حکومت پلاوی د سولې خبرو باندې بحث پر مهال

د قطر په پلازمېنه دوحه کې د افغانستان د دولت مرکچي ټيم وايي نن به هم د کړنلارې په لانجمنو مسئلو له طالبانو سره خبرې وکړي.

د مرکچي ټیم او تماس ډلې غړي نادر نادري په یوه کنفرانس کې وویل: "زموږ کوښښ همدې کې دی چې بحثونه په دغو دوو لانجمنو مسئلو باندې خلاص شي. نن به هم ان‌شاءالله مجلسونه ولرو. تعهد مو همدا دی چې ګډه لاره ورته پیدا کړو او لاړ شو اصلي بحث ته، اصلي بحث افغانانو ته اوربند دی، د تاوتریخوالي کموالی دی او دا چې جنګ بند شي او افغان وژنه ودرېږي."

د افغانستان د دولت او طالبانو مرکچیان د سپټمبر له ۱۲مې په دوحه کې خبرې کوي، خو د کړنلارې په اړه په ځینو لانجمنو مسئلو سره موافقې ته نه‌دي رسېدلي.

د دولت پلاوی که څه هم رسماً نه‌وايي چې لانجمنې مسئلې کومې دي، خو طالبان وايي چې له افغانستان ورغلی پلاوی د اساس په توګه د حنفي فقې له ټاکلو او د خبرو لپاره له امریکا سره د طالبانو د تړون د اساس ګرځولو مخالفه دي.

'د افغان سولې مذاکراتو پر مهال دې پر ځینو شرخوښو عناصرو پام وساتل شي'

عبدالله عبدالله د پاکستان دبهرنیو چارو وزیر شامحمود قریشي سره د خبرو پرمهال.

د پاکستان د بهرنیو چارو وزیر شاه محمود قریشي د افغانستان د سولې له بهیر د خپل هېواد د ملاتړ ډاډ څرګند کړی.

د بهرنیو چارو د وزارت د اعلامیې له مخې ښاغلي قریشي د افغانستان د ملي مصالحې د عالي شورا له رییس عبدالله عبدالله سره په لیدنه کې زیاته کړې چې پاکستان د افغانانو په مشرۍ او مالکیت د سولې د خبرو ملاتړ کوي.

قریشي ویلي پاکستان ته د عبدالله عبدالله سفر به د دواړو هېوادونو د اړیکو او د افغان سولې د بهیر په اړه د ګډ تفاهم د رامنځته کولو په برخه کې یو نوی باب پرانېزي.

هغه پرته له دې چې جزییات ورکړي دا هم ویلي چې د افغانستان د سولې د خبرو پر مهال باید په سیمه کې په ځینو شرخوښو عناصرو هم پام وساتل شي چې د سولې او ثبات مخالفه دي.

د افغانستان د ملي مصالحې د عالي شورا رییس عبدالله عبدالله په درې ورځني سفر پاکستان ته تللی او تمه ده سبا له صدراعظم عمران خان سره وګوري.

عبدالله هیله ښودلې چې دا سفر یې د دواړو هېوادونو اړیکې لا پسې غښتلي کړي او په مټ یې د سولې په برخه کې د همکاریو نوی باب پرانیستل شي.

ارزګان کې ۲۱ طالب وسله‌وال وژل شوي

د ارزګان نقشه

د ارزګان امنیه قوماندان وايي په دهراوود ولسوالۍ کې د افغان ګډو ځواکونو له‌خوا ۲۱ طالب وسله‌وال وژل شوي.

شفیق‌الله سحر ازادي راډیو ته وویل، طالبانو پرون د دهراوود په لنډیانۍ سیمه کې د افغان پوځیانو پر پوستو ډله‌ییز برید کړی و چې د ده په خبره افغان پوځیانو یې سخت ځواب ورکړ.

هغه زیاته کړه: "زموږ د امنیتي او دفاعي ځواکونو او د هوايي ځواک د ملاتړ له لارې ۲۱ طالبان وژل شوي او ۱۷ کسان‌یې ټپیان دي. طالبان بېرته په شا شوي دي. اوس امنیتي او دفاعي ځواکونه او ملاتړ ځواک په لوړ مورال اماده دي چې د خپل ولس او وطن دفاع وکړي."

قوماندان سحر وايي، د یاد برید پر مهال افغان ځواکونو ته کوم زیان نه‌دی رسېدلی.

وسله‌والو طالبانو څه نه‌دي ویلي.

د بامیان چارواکي: طالبانو په یوه برید کې ۹ افغان سرتېري وژلي

ارشیف

د بامیان ولایت امنیتي چارواکي وايي چې د طالبانو په یوه برید کې ۹ افغان سرتېري وژل شوي دي.

د بامیان د امنیه قومندانۍ ویاند محمد رضا یوسفي ازادي راډيو ته وویل چې طالبانو د شېبر ولسوالۍ په باغک کلي کې له یوې اوونۍ بریدونه کول چې بلآخره نن پای ته ورسېدل.

یوسفي تاییدوي چې د طالبانو په دې برید کې ۹ افغان سرتېري وژل شوي، دوه تنه یې ټپيان او یو تن یې د طالبانو په لاس اسیر شوی دی.

د بامیان امنیه قومنداني وايي چې طالبان د افغان پوځیانو په ځوابي برید کې له سیمې وتلي دي.

طالبانو بیا ادعا کړې چې په شېبر ولسوالي کې یې څو پوستې هدف ګرځولي او لسګونه افغان سرتېري یې وژلي دي.

افغان چارواکي: سږ کال د پنبې حاصلاتو کې زیاتوالی راغلی

ارشیف

د افغانستان د کرنې، اوبولګولو او مالدارۍ ریاست چارواکي وایي، د نیمروز ولایت د پنبې د کروندو ارزونې ښیي، چې سږني حاصلات به یې پنځه زره ټنو ته ورسېږي.

د دغه وزارت ویاند اکبر رستمي نن ازادي راډيو ته وویل،چې تېر کال د دې ولایت د پنبې حاصلات ۵۶۰ ټنه وه خو اوس نږدې لس چنده زیاتوالی ښيي.

هغه زیاتوي: "سږکال د نیمروز ولایت په دوه زره او ۲۵۰ هکټاره ځمکه پنبه کرل شوې، چې له دغو کرونو څخه به څه باندې پنځه زره ټنه مالوچ راټول شي، دا په داسې حال کې ده، چې تېر کال د نیمروز ولایت د پنبې حاصلات ۵۶۰ ټنه و."

نوموړي یې لامل، پر بزګرانو د پنبې اصلاح شوي تخونه، کیمیاوي سرې، د اړتیا وړ درملو او نورو اړین وتوکو وېشل ګڼي او وايي، ترڅنګ یې کروندګرو ته د پنبې ننداریزې قطعې هم جوړې شوي دي.

نیمروز، پروان، کنړ، ارزګان، فاریاب، هرات، بغلان، جوزجان، کندز، لغمان، تخار، کاپیسا، ننګرهار، بلخ، سمنګان، سرپل، هلمند او کابل هغه ولایتونه دي، چې په کې پنبه کرل کېږي.

ارګ: د ګمرکونو برخه کې اساسي اقدامات تر لاس لاندې دي

د کندز ګمرک

د افغانستان جمهوري ریاست وايي، د ګمرکونو په برخه کې اساسي اقدامات تر لاس لاندې لري.

جمهوري ریاست نن په یوه بیان کې ویلي، چې جمهور رییس غني تېره شپه ناوخته په دې اړه په جوړه شوې ناسته کې ټينګار کړی چې باید په ګمرکونو او عایداتي ادارو کې مقرري د ازادې سیالۍ له لارې وشي.

د بیان پر بنسټ جمهور رییس په ګمرکونو او بندرونو کې د قوانینو د تطبیق، د افغانستان عایداتي سرچینو ته د جدې پاملرنې غوښتنه کړې ده.

دا په داسې حال کې ده چې تردې وړاندې په عایدتي منابعو کې د پراخ فساد ادعا شوې ده.

عبدالله عبدالله د پاکستان د بهرنیو چارو وزیر سره وکتل

عبدالله عبدالله د پاکستان د بهرنیو چارو وزیر شامحمود قریشي سره لیدلي.

د افغانستان د ملي مصالحې د عالي شورا رییس عبدالله عبدالله پاکستان ته په رسېدو د دغه هېواد د بهرنیو چارو له وزیر شاه محمود قریشي سره وکتل.

د دغو خبرو جزییات تر دې دمه نه دي راوتلي.

ښاغلي عبدالله مخکې په خپل ټوېټر هیله ښودلې وه چې دا سفر یې د دوو ګاونډيو هېوادونو په اړیکو په خاصه توګه په افغانستان کې یوې با عزته او دایمي سولې ته د رسېدو په برخه کې د همکاریو نوی باب پرانېزي.

اخوا د پاکستان په چارو کې د افغان ولسمشر ځانګړی استازی محمد عمر داوودزی چې په دې سفر کې د ښاغلي عبدالله ملګرتیا کوي ازادي راډیو ته وویل: "د پخوا په نسبت وضعیت بدل شوی دی، د لومړي ځل لپاره د افغانستان د جګړې دوه اړخونه چې افغانان دي، دوحه کې مخامخ خبرو ته ناست دي، پاکستان هم هر ډول لازمې اشارې او علامې څرګندوي او د سولې بهیر کې همکارۍ ته جدي دی."

په افغانستان کې د ناټو او اروپايي ټولنې لوړپوړیو استازیو پاکستان ته د عبدالله عبدالله سفر ستایلی او ویلي یې دي چې د دغو هېوادونو د اړیکو د ټینګښت ملاتړي دي او سیمه باید د افغانستان د سولې او ثبات لپاره همکاري وکړي.

عبدالله عبدالله داسې وخت پاکستان ته تللی چې په دوحه کې د افغانستان د دولت او طالبانو ټیمونه خبرې کوي خو په ځينو لانجمنو مسلو سره ایسار دي.

تمه ده ښاغلی عبدالله په دې سفر کې د پاکستان له صدراعظم عمران خان او نورو لوړپوړو چارواکو سره هم وګوري.

عبدالله عبدالله اسلام‌اباد ته ورسېد 

عبدالله عبدالله د پاکستان له صدراعظم، ولسمشر، بهرنیو چارو وزیر او یو شمېر نورو لوړپوړو چارواکو سره ګوري.

د افغانستان د ملي مصالحې عالي شورا مشر عبدالله عبدالله په درې ورځني سفر اسلام‌اباد ته ورسېد.

په دغه سفر کې د پاکستان په چارو کې د افغان ولسمشر ځانګړی استازی محمد عمر داوودزی او یو شمېر نور افغان چارواکي د ښاغلي عبدالله ملګرتیا کوي.

داوودزي له سفره مخکې د حامد کرزي هوايي ډګر کې ازادي راډیو ته وویل چې د سفر مثبتو پایلو ته هیله‌من دی.

هغه زیاته کړه: "د پخوا په نسبت وضعیت بدل شوی دی، د لومړي ځل لپاره د افغانستان د جګړې دوه اړخونه چې افغانان دي، دوحه کې مخامخ خبرو ته ناست دي، پاکستان هم هر ډول لازمې اشارې او علامې څرګندوي او د سولې بهیر کې همکارۍ ته جدي دی."

ټاکل شوې ښاغلی عبدالله دې سفر کې د پاکستان له صدراعظم، ولسمشر، بهرنیو چارو وزیر او یو شمېر نورو لوړپوړو چارواکو سره وګوري.

عبدالله عبدالله اسلام‌اباد ته ولاړ

ډاکتر عبدالله عبدالله

د افغانستان د ملي مصالحې عالي شورا مشر عبدالله عبدالله په درې ورځني سفر اسلام‌اباد ته ولاړ.

په دغه سفر کې د پاکستان په چارو کې د افغان ولسمشر ځانګړی استازی محمد عمر داوودزی او یو شمېر نور افغان چارواکي د ښاغلي عبدالله ملګرتیا کوي.

داوودزي له سفره مخکې د حامد کرزي هوايي ډګر کې ازادي راډیو ته وویل چې د سفر مثبتو پایلو ته هیله‌من دی.

هغه زیاته کړه: "د پخوا په نسبت وضعیت بدل شوی دی، د لومړي ځل لپاره د افغانستان د جګړې دوه اړخونه چې افغانان دي، دوحه کې مخامخ خبرو ته ناست دي، پاکستان هم هر ډول لازمې اشارې او علامې څرګندوي او د سولې بهیر کې همکارۍ ته جدي دی."

ټاکل شوې ښاغلی عبدالله دې سفر کې د پاکستان له صدراعظم، ولسمشر، بهرنیو چارو وزیر او یو شمېر نورو لوړپوړو چارواکو سره وګوري.

نن د سپټمبر ۲۸مه اطلاعاتو ته د لاسرسي نړیواله ورځ ده

افغان خبریالان

د سپټمبر ۲۸مه، اطلاعاتو ته د لاسرسي نړیواله ورځ ده.

د دې ورځې بنسټ ملګرو ملتونو څلور کاله وړاندې کېښود او هدف‌یې اطلاعاتو ته د لاسرسي له حقه ملاتړ او د مسؤلو ادارو هڅونه ده.

افغانستان یو له هغو هېوادونو دی چې د رسنیو د مسؤلینو او خبریالانو په خبره اطلاعاتو ته په‌کې لاسرسی ستونزمن دی.

د پژواک خبري اژانس مشر دانش کړوخېل ازادي راډیو ته وویل: "د حکومت ډېری ادارې هغه معلومات چې اغېزمن وي له رسنیو سره نه‌شریکوي، زه په جریان کې یم چې د ډېریو رسنیو تحقیقي راپورونه چې د خلکو په ژوند مثبت اغېز لري هغه د اسنادو او اطلاعاتو ته د نه‌لاسرسي له امله نیمګړي پاتې دي."

له دې ټولو انتقادونو سره سره افغان حکومت هوډ ښودلی چې اطلاعات په وخت رسوي.

افغان حکومت اطلاعاتو ته د لاسرسي قانون جوړ کړی چې د محتوا له پلوه ډېر ستایل شوی، خو په عملي برخه‌یې انتقادونه کېږي.

نور راوښيه

XS
SM
MD
LG