د لاسرسۍ وړ لېنکونه

تازه خبر
جمعه ۲۹ چنګاښ ۱۴۰۳ کابل ۰۹:۴۲

نړۍ

د م م سرمنشي: د اقليم بدلون پر وړاندې مبارزه سیاسي اراده غواړي

د ملګرو ملتونو سرمنشي انتونيو ګوتيريش
د ملګرو ملتونو سرمنشي انتونيو ګوتيريش

د ملګرو ملتونو سرمنشي وايي، د اقليم د نړيوال بدلون پر وړاندې د مبارزې لپاره نورې سياسي ارادې ته اړتيا ده.

انتونيو ګوتيريش خبردارى ورکړ، چې بشريت د طبيعت پر وړاندې جګړه ترسره کوي، چې بايد ودرول شي.

ګوتيريش دا خبرې پرون په داسې حال کې وکړې، چې په پام کې ده نن په مادريد کې د اقليمي بدلون نړيواله سرمشريزه پيل شي، چې دوې اوونۍ به دوام کوي.

د ملګرو ملتونو سرمنشي وويل، انسانان له څو لسيزو راهيسې له ځمکې سره په جنګ اخته دي.

د انتونيو ګوتيريش په خبره ځمکه هم له دوامدارو او وژونکو طبيعي افتونو، وچکالۍ او د سمندرونو د سطحې د لوړېدو له ستونزې سره په جنګ بوخته ده.

د ٢٠٠ هېوادونو مرکچيان به هڅه وکړي چې د پاريس د تړون د عملي کېدو لپاره پر اصولو موافقه وکړي.

دوى به پر دې هم هوکړه کوي، چې په نېستمنو هېوادونو کې د اقليم د اړوندو زيانونو د مخنيوي لپاره د جبران لارې چارې ايجاد کړي.

د پاريس تړون د اقليمي بدلون په وړاندې د مبارزې لپاره د ملګرو ملتونو په چوکاټ کې يوه موافقه ده، چې مسوده يې په ٢٠١٥م کال کې جوړه شوې ده.

د اوکراين پوځ وايي، په ختيځه سيمه دونيڅک کې پرون دوه اوکراييني سرتېري د جنګي ماموريت پر مهال وژل شوي دي. پوځ دا خبر د خپل فېسبوک پر پاڼه خپور کړى دى.

د ورځې تازه خبرونه دلته ولولئ

ټرمپ د امریکا ولسمشرۍ لپاره خپله کاندیداتوري ومنله

د عکاس منځ کې ډونالډ ټرمپ
د عکاس منځ کې ډونالډ ټرمپ

د جمهوري غوښتونکو د ملي مجمع په وروستۍ ورځ ډونالډ ټرمپ د ولسمشرۍ لپاره خپله کاندیداتوري ومنله.

ټرمپ پنځه ورځې مخکې د یوې کمپاینې غونډې پر مهال په برید کې په ښي غوږ ټپي شوی و.

ټرمپ په میلواکي کې د وینا پر مهال د برید شېبه یاده کړه چې څنګه په ښي غوږ په مرمۍ ولګېد او که یې خپل سر نه وای تاو کړی نو ښايي دلته به نه وای.

هغه د خپلو پلویانه مننه وکړه چې د برید پر مهال ونه خوځېدل او تر پایه د ده لپاره ولاړ وو.

ډونالډ ټرمپ د جمهوري غوښتونکي ګوند د ملي مجمع په وروستۍ ورځ د امریکا د ولسمشر جوبایډن پر سیاستونو کلکې نیوکې وکړې او ویې ویل چې په ګډه به د امنیت، هوساینې او ازادۍ نوی باب خپلو خلکو ته پرانېزي.

په پاکستان کې پر خواله رسنیو بندیز لا هم دوام لري

ارشیف
ارشیف

په پاکستان کې پر خواله رسنیو بندیز، چې ظاهراً د عاشورا د ورځې په خاطر لګول شوی و، لا هم دوام لري.

د انټرنېټ څارونکې ویبپاڼو، نېټ بلاکس او همداراز ډاون ډیټیکټر پرون وویل چې په پاکستان کې له ایکسپاڼې یا پخواني ټویټر وروسته پر فېسبوک او انسټاګرام هم بندیز لګول شوی دی.

د پاکستان حکومت په دې اړه رسماً څه نه دي ویلي، خو داسي ښکارېده چې دا بندیز به یوازې د محرم په لسمه او یوولسمه وي، خو د خواله رسنیو کاروونکي وايي چې بندیز لا هم دوام کړی او دوی یوازی د "وي پي این" له لارې خواله رسنۍ لیدلی شي.

پر غزې د اسراييلي ځواکونو بريد کې نهه فلسطينيان وژل شوي

پر غزې د اسراییلي ځواکونو د برید له کبله یوه ټپي شوې مېرمن روغتون ته د درملنې لپاره لېږدول کېږي.
پر غزې د اسراییلي ځواکونو د برید له کبله یوه ټپي شوې مېرمن روغتون ته د درملنې لپاره لېږدول کېږي.

اسراییلي ځواکونو پرون چهارشنبې د غزې تړانګې د مرکزي برخې پر یو شمېر سیمو بریدونه وکړل چې د سیمه‌ییزو روغتیایي چارواکو په خبره په نتیجه کې یې لږترلږه نهه فلسطینیان وژل شوي دي.

په عین حال کې اسراییلي ټانکونو د غزې په جنوب رفح کې محدود وړاندې تګ کړی دی.

د رویترز خبري اژانس د راپور له‌مخې په غزه کې د روغتیا وزارت ویلي چې په تېرو ۲۴ ساعتونو کې د اسراییل په بریدونو کې لږترلږه ۸۱ فلسطینیان وژل شوي او ۱۹۸ نور ټپیان شوي دي.

د راپور له‌مخې دا وزارت د تلفاتو په اړه د شمېرو په اعلانولو کې د وسله‌والو او ولسي خلکو ترمنځ توپیر نه‌کوي.

په رفح کې روغتیایي چارواکو د اسراییل په یوه هوایي برید کې د دوو تنو د وژل کېدو خبر ورکړی او همدارنګه یې ویلي چې اسراییلي ټانکونو د ښار په شمالي برخه کې عملیات ترسره کړي او بېرته خپلو اصلي ځایونو ته ستانه شوي دي.

د اسراییل پوځ وویل، ځواکونو یې د رفح ښار اړوند سیمو کې د استخباراتو معلوماتو پر اساس دقیقو عملیاتو ته دوام ورکړی او زیاته یې کړه چې دوی یوه تروریستي څانګه او پر اسراییلي ځواکونو د برید یو ځای يې له‌منځه وړي دي.

اسراییل وروسته له هغې د حماس ډلې چې امریکا او اروپایي ټولنه یې د یوې ترهګرې ډلې په توګه پېژني، د له‌منځه وړلو ژمنه وکړه چې دې ډلې د تېر کال د اکټوبر په اوومه د اسراییل پر قلمرو برید وکړ، شاوخوا ۱۲۰۰ کسان یې ووژل او له دوه نیم سوو زیات یې یرغمل کړل.

په غزه کې روغتیایي چارواکو ویلي چې د اسراییل له‌خوا په بریدونو کې لږترلږه ۳۸ زره فلسطینیان وژل شوي دي.

ټرمپ به د ولسمشرۍ لپاره راروانو ټاکنو کې د خپل ګوند رسمي نوماندي ومني

د عکس ښي لور ته وېنس چې ټرمپ له لوري د ولسمشرۍ ټاکنو لپاره د مرستیال په توګه ټاکل شوی او چپ لور ته په خپله ډونالډ ټرمپ.
د عکس ښي لور ته وېنس چې ټرمپ له لوري د ولسمشرۍ ټاکنو لپاره د مرستیال په توګه ټاکل شوی او چپ لور ته په خپله ډونالډ ټرمپ.

د امریکا له پخواني ولسمشر ډونالډ ټرمپ څخه به نن هغه مهال د جمهوریپالو په کنګره کې تود هرکلی وشي چې دی د امریکا د ولسمشرۍ لپاره راروانو ټاکنو کې د دې ګوند له‌خوا رسمي نوماندي ومني او ملت ته چې په پنسلوانیا کې پر نوموړي د څو ورځې مخکې برید سیوری غوړولی، وینا وکړي.

تمه کېږي چې له پخواني ولسمشر ډونالډ ټرمپ څخه به نن په میلواوکي کې د جمهوري غوښتونکو د ګوند د کنګرې په وروستۍ ورځ د یوه اتل په توګه هرکلی وشي.

په پنسلوانیا کې د انتخاباتي کمپاین په یوه غونډه کې د یوه وسله‌وال له‌خوا د شنبې د ورځې په برید کې چې یو کس ووژل شو، نوموړی په ښي غوږ ټپي شو.

د فرانس‌پرېس خبري آژآنس د راپور له مخې په داسې حال کې یو شمېر جمهوري غوښتونکو هڅه کړې چې پر ټرمپ د برید ملامتي پر هغو ډیموکراټانو واچوي چې د ټرمپ ضد ویناوې کوي، خو په خپله میلیاردر ټرمپ ویلي چې د تهاجمي وینا نسخه یې بدله کړې او په نوې نسخه کې هیله‌من دی چې هېواد یو موټی کړي.

ټاکل شوې چې په امریکا کې د ولسمشرۍ لپاره انتخابات د نومبر میاشتې په پنځمه نېټه ترسره شي.

د ټرمپ پر وړاندې به د ډیموکراټانو د ګوند له‌خوا اوسنی ولسمشر جوبایډن سیالي کوي.

په روسیه کې د امریکایي خبریال "ایوان ګیرشکوویچ" د محاکمې بهیر بیا پیل شوی

په روسیه کې زنداني امریکایي خبریال ایوان ګیرشکوویچ
په روسیه کې زنداني امریکایي خبریال ایوان ګیرشکوویچ

په روسیه کې د زنداني امریکایي خبریال ایوان ګیرشکوویچ د محاکمې بهیر بیا پیل شوی دی.

د امریکایي والسټریټ ژورنال ورځپاڼې دغه خبریال چې د ۲۰۲۳م کال د مارچ په ۲۵مه د روسیې په یکاترینبورګ ښار کې نیول شوی، په جاسوسۍ تورن شوی، هغه تور چې والسټریټ ژورنال او د امریکا حکومت رد کړی او هغه یې سیاسي انګېزه بللې ده.

د یکاترینبورګ سیمه‌ییزې محکمې پرون چهارشنبې د هغه د محاکمې د بیا پیلېدو خبر ورکړ.

که ۳۲ کلن ګیرشکوویچ چې موراو پلار د پخواني شوروي اتحاد پر مهال امریکا ته کډوال شوي او دې هلته زېږېدلی، مجرم وپېژندل شي، د شلو کالو بند له سزا سره مخامخ دی.

پر نوموړې سربېره د ازادي راډیو خبریاله او د روسیې او امریکا دوه ګوني تابعیت لرونکې السو کورماشیووا بله امریکایي خبریاله ده چې په اوس وخت کې په روسیه کې زنداني ده.

نوموړې چې د تېر کال په اکټوبر کې په کازان ښارکې نیول شوې، پرې تورپورې شوی چې د روسیې د قانون له مخې یې د یوه بهرني اجنټ په توګه نوم نه‌دی ثبت کړی.

ارمنستان سره د ويزې د لغوه کولو لپاره د اروپايي ټولنې سفيرانو د خبرو پيلېدو وړانديز تاييد کړی

د اروپايي ټولنې بیرغ
د اروپايي ټولنې بیرغ

د اروپایي ټولنې ۲۷ سفیرانو له ارمنستان سره د ویزې د لغوه کولو لپاره د اروپایي کمېسیون د خبرو د پیلېدو وړاندیز تایید کړی دی.

یو شمېر سرچینو پرون چهارشنبې ازادي راډیو ته وویل، دغه وړاندیز به چې له ډېرې مودې راهیسې پرې بحث شوی، اوس د رسمي تصویب لپاره اروپایي شورا ته وړاندې شي او له هغې وروسته به اروپایي کمېسیون هغه ترغور لاندې ونیسي.

دغو سرچینو همدارنګه ویلي چې، د ارمنستان په اړه پرېکړه به هله نتیجه ورکړي چې دا هېواد ټول لازم معیارونه بشپړ رعایت او وړاندیزونه عملي کړي، ترڅو د اروپایي اتحادیې قلمرو ته د دې هېواد پر اتباعو د ویزې محدودیت لغوه شي.

د امریکا د ټاکنیز کمپاین حساس پړاو، خو بایډن د کرونا له کبله قرنطین شو

ارشیف: د امریکا ولسمشر جوبایډن که څه هم د ۲۰۲۱م کال په جنورۍ کې د کرونا ضد واکسین اخیستی و، خو بیا هم په دې ناروغۍ اخته شوی دی.
ارشیف: د امریکا ولسمشر جوبایډن که څه هم د ۲۰۲۱م کال په جنورۍ کې د کرونا ضد واکسین اخیستی و، خو بیا هم په دې ناروغۍ اخته شوی دی.

د امریکا ولسمشر جوبایډن په کوېډ۱۹ ناروغۍ اخته شوی او له‌دې سره یې په لاس ویګاس کې پلان شوې وینا هم لغوه شوې ده.

سپینۍ ماڼۍ پرون چهارشنبه وویل چې د بایډن د کرونا ویروس نښې نښانې خفیفې دي، خو د ګوښه‌والي لپاره خپل کور ته لېږدول شوی او له همغه ځایه به چارې مخته بیایي.

د بایډن ډاکتر ویلي، هغه ته ټوخی، د پوزې بهیدا او د ستړیا احساس پيدا شوی دی، خو تبه نه‌لري.

بایډن چې تل یې د روغتیایي وضعیت په اړه اندېښنې موجودې دي، داسې مهال کرونا کېږي چې امریکا کې ټاکنیز کمپاینونه حساس پړاو ته رسېدلي دي.

تازه د استازو جرګې شاوخوا شلو ډیموکراتو غړو له بایډنه غوښتي چې له راتلونکو ولسمشریزو ټاکنو لاس په سر شي، خو بایډن وایي، د خپل ګوند په استازیتوب ټاکنو ته درېږي.

د امریکا ولسمشریزې ټاکنې سږ کال د نومبر په پنځمه نېټه د جوبایډن او ډونالډ ټرمپ ترمنځ کېږي.

روسيې او اوکراين بنديان تبادله کړي

د روسیې له خوا خوشې شوي اوکرایني بندیان
د روسیې له خوا خوشې شوي اوکرایني بندیان

روسیې او اوکراین تایید کړه چې د متحده‌عربي اماراتو په منځګړیتوب یې د بندیانو نوې تبادله ترسره کړې ده.

د روسیې دفاع وزارت پرون چهارشنبې پر خپل ټیلیګرام چینل په یوه بیان کې وویل، د ۱۹۰ بندیانو د تبادلې په‌دې پړاو کې هریو لوري د یوبل ۹۵ بندیان آزاد کړل.

د اوکراین ولسمشر ولادمیر زیلینسکي هم د دغو بندیانو تبادله تایید کړې او په‌دې برخه کې یې د متحده‌عربي اماراتو د هڅو مننه کړې ده.

په تېرو نژدې دوو میاشتو کې د دواړو هېوادونو ترمنځ د بندیانو د تبادلې څو مرحلې ترسره شوي دي.

د اوکراین د هماهنګۍ کمېټې چې د بندیانو چارو ته رسېدګي کوي ویلي چې د ۲۰۲۲م کال د فبرورۍ له میاشتې راهیسې چې روسیې پر اوکراین یرغل کړی، تر اوسه یې له ۳۴۰۰ زیات کسان د روسیې له اسارته خلاص کړي دي.

ايران پر ډونالډ ټرمپ شوي بريد کې لاس لرل رد کړل

په ډونالډ ټرمپ د جولای ۱۳مه د ټاکنیز کمپاین پر مهال برید شوی و.
په ډونالډ ټرمپ د جولای ۱۳مه د ټاکنیز کمپاین پر مهال برید شوی و.

ایران هغه تورونه رد کړل چې د امریکا د پخواني ولسمشر ډونالډ ټرمپ د وژلو پلان یې طرح کړی.

"سي این این" تلوېزیون او پولیټیکو خپرونې پرون د یو شمېر سرچینو په وینا چې نومونه یې نه و یاد شویي خبر ورکړ چې امریکایي چارواکو څو اوونۍ مخکې تر دې چې پر ټرمپ ډزې وشي داسې راپورونه ترلاسه کړي و چې ایران د ټرمپ د وژلو پلان لري.

د ایران د بهرنیو چارو د وزارت ویاند ناصر کنعاني په یوه بیان کې چې د سې شنبې په ورځ خپور شو٬ ټینګار وکړ چې تهران د جولای د دیارلسمې نېټې په پېښه کې چې پر ټرمپ ډزې وشوې لاس نه درلود او نه هم داسې پلان لري چې ټرمپ ووژني.

کنعاني زیاته کړه چې د ایران اسلامي جمهوريت دا نیت لري چې ټرمپ د قاسم سلیماني د وژلو په جرم محاکمه شي.

د ایران د سپاه پاسداران انقلاب قوماندان قاسم سلیماني د ۲۰۲۰م کال په جنوري کې د ټرمپ په قومانده د امریکایي ځواکونو د هوایي برید په ترڅ کې ووژل شو.

په ګرجستان کې د ریښتر د ۴.۸ درجو په شدت زلزله وشوه

د ګرجستان نقشه
د ګرجستان نقشه

په ګرجستان کې نن د ریښتر د څلور اعشاریه اته درجو په شدت زلزله وشوه.

د ازادي راډیو د ګرجي ژبي د راپور له‌مخې د دې زلزلې مرکز د دیدوپلیس څکارو ښارګوټي لوېدیځ لور ته په پنځه کیلومترۍ کې و.

دا سیمه د ګرجستان له پلازمېنې تبلیسي څخه ۱۳۰ کیلومتره جنوب ختیځ ته پرته ده.

د امریکا د جیولوجي سروې د راپور له‌مخې بیا دا زلزله د ځمکې په تل کې نژدې ۲۹ کیلومتره ژوره شوې ده چې شدت یې ۴.۱ اټکل شوی دی.

دا زلزله چې نن په سیمه‌ییز وخت سهار شپږ بجې وشوه، په پلازمېنې تبلیسي کې یې هم ټکانونه احساس شول او تر اوسه یې د ځاني او مالي زیانونو راپورونه نه‌دي خپاره شوي.

نور راوښيه

XS
SM
MD
LG