د لاسرسۍ وړ لېنکونه

تازه خبر
دوشنبه ۲۵ لیندۍ ۱۳۹۸ کابل ۰۳:۰۷

خبرونه

لویه څارنوالۍ: سترې محکمې د خبريال زمان احمدي پر قضيې د بيا کتنې جلسه کړې

دغه خبريال په ٢٠١٢میلادي کال کې د بودا د مجسمو په اړه د يوې ليکنې له کبله چې اسلامي مقدساتو ته سپکاوى بلل شوى و، په بند محکوم شو.

د افغانستان لويه څارنوالي وايي سترې محکمې پرون د خبريال زمان احمدي پر قضيې د بيا کتنې لومړۍ جلسه وکړه.

دغه خبريال په ٢٠١٢میلادي کال کې د بودا د مجسمو په اړه د يوې ليکنې له کبله چې اسلامي مقدساتو ته سپکاوى بلل شوى و، په بند محکوم شو.

د لويې څارنوالۍ وياند جمشيد رسولي تېره شپه ازادۍ راډيو ته وويل، څارنوالۍ د يوې کمېټې په ټاکلو کې سره پر دې قضيې له سره غور وکړ او دوسيه يې سترې محکمې ته ولېږله.

د ښاغلي رسولي په خبره د افغانستان سترې محکمې پر دې قضيې د بيا کتنې جلسه پرون وکړه.

هغه وايي، پر دې قضيې د افغانستان اسلامي جمهوريت د سترې محکمې د بياکتنې جلسه شوې ده.

د ښاغلي احمدي د هغه د کورنۍ، خپلوانو او مدافع وکيل له خوا وړاندې شوي دلايل چې د لويې څارنوالۍ له خوا سترې محکمې ته راجع کړاى شوي وو، تاييد شوي دي.

د زمان احمدي هغه ليکنه، که څه هم خپره شوې نه ده، خو ده څه کم ٧ کاله په زندان کې تېر کړي دي.

د هغې ليکنې په تړاو چې خپره شوې نه ده، د يوه خبريال زنداني کېدل په ټولنيزو رسنيو کې ډېره مطرح شوي دي.

خبريالانو او مدني فعالانو ژر تر ژره د زمان احمدي د خوشې کېدو غوښتنه کړې ده.

د ورځې تازه خبرونه دلته ولولئ

ویسټ انډیز په یوه ورځنۍ لوبو لړۍ کې هند ته ماتې ورکړه

ارشیف

د ویسټ انډیز او هندوستان کرکټ ملي لوبډلو ترمنځ د یو ورځنۍ لوبو په لړ کې تېره ورځ ویسټ انډیز هندي لوبډلې ته په اته ویکټو ماتې ورکړه.

د دې سیالۍ پچه یا ټاس ویسټ انډیز وګاټه او هندي لوبډلې ته یې د توپوهني بلنه ورکړه.

هندوستان په ټاکلو ۵۰ آورونو کي د ۸ لوبغاړو په سوځېدو مقابلې لوبډلې ته د ۲۸۹ منډو هدف وټاکه.

ویسټ انډیز د ۲ لوبغاړو په سوځېدو سره ورکړل شوی هدف د لوبي په 48 ام اور کې پوره کړ او په دې سره یې هند ته په ۸ ویکټو ماته ورکړه.

د ویسټ انډيز او هندوستان کریکټ ملي لوبډلو ترمنځ د ۳ یو ورځنیو لوبو دوهمه سیالي د د روانې اونۍ د چهارشنبې او درېیمه یو ورځنۍ لوبه بیا د راتلونکې اونۍ د یکشنبې په ورځ ترسره کیږي.

د اسیايي اتلولیو په لوبو کې د افغانستان د موټای لوبغاړو ګډون

ارشیف

د افغانستان د موی ټای لوبغاړي د اسیا د اتلولۍ په سیالیو کې د ګډون په هدف متحده عربي اماراتو ته لاړل.

د افغانستان د بدني روزنې ریاست د معلوماتو له مخې په دې سیالیو کې د ۳۵ اسیايي هېوادونو نږدې درې سوه لوبغاړي برخه اخلي.

د دغه ریاست مسولین وايي چې اوه افغان لوبغاړي چې نجونې هم په کې شته په دې سیالیو کې برخه اخلي.

یادې سیالۍ نن د متحده عربي اماراتو په کوربه توب په ابوظبۍ ښار کې پیل شوې او د روانې میلادي میاشتې تر ۲۲ مې نېټې دوام کوي.

قزاقستان ته د پوهنتونونو د پهلوانۍ لوبډلې سفر

ارشیف

د افغانستان د پوهنتونونو د ورزشي فدراسیون د پهلوانۍ لوبډله، د نړېوالو لوبو لپاره قزاقستان ته ولاړه.

په دغه سیالیو د دوه افغان لوبغاړو ترڅنګ د نړۍ د بېلابېلو هېوادونو 68 نور لوبغاړي هم برخه لري.

د افغانستان د بدني روزنې مرستیال قاسم حمیدي نن ازادي راډيو ته وویل، چې د پهلوانۍ دغه سیالۍ به سبا په قزاقستان کې پیل شي او د روانې میلادي میاشتې تر ۲۴ مې نېټې به دوام وکړي.

پنجشېر، سرپل او جوزجان کې بیا شمېرنه بشپړه شوې

د رایو بیا شمېرې بهیر - ارشیف

د افغانستان په اوه ولایتونو کې چې پرون په کې د رایو بیا شمېرنه او څېړنه پیل شوې، په درې کې یې دا بهیر بشپړ شوی دی.

پنجشېر، سرپل او جوزجان د افغانستان له هغو اوه ولایتونو څخه دي چې د رایو بیا شمېرنه او څېړنه په کې تېره ورځ بشپړه شوه.

تخار، فاریاب، بدخشان او بغلان کې بیا د دغه هېواد د ټاکنو د خپلواک کمېسیون په وینا، دا بهیر له کومې ستونزې پرته روان دی.

د افغانستان د ټاکنو خپلواک کمېسیون د دارالانشا ريیس حبیب الرحمان ننګ د دوشنبې په ورځ ازادي راډیو ته وویل، دوی هڅه کوي چې له خپلو ټولو سرچینو په ګټې اخیستنې سره، په پاتې څلور ولایتونو کې هم د رایو بیا شمېرنه او څېړنه ژر بشپړه کړي.

هغه وویل: "په ۳ ولایتونو پنجشېر، سرپل او جوزجان کې د رایو تفتیش او بیا شمېرنه بشپړه شوې او په پاتې ولایتونو کې په نورمال ډول زموږ کارونه روان دي."

د افغانستان د ولسمشرۍ د انتخاباتو د رایو بیا شمېرنې او څېړنې بهیر د دغه هیواد په ټولو ۳۴ ولایتونو کې د تېرې لړم یا عقرب میاشتې په ۱۸مه نېټه پیل شو، خو د یو شمېر ټاکنیزو ډلو د اعتراض له کبله د همدې میاشتې تر ۲۶مې نېټې وځنډېد.

له دویم ځلي پیل وروسته بیا هم ، د ثبات او هم‌پالنې ټاکنیزې ډلې اجازه ور نه کړه چې په اووه ولایتونو کې کمېسیون خپل کارونه مخ‌ته یوسي.

د افغانستان د ټاکنو خپلواک کمېسیون ویلي، په اووه ولایتونو کې د رایو بیا شمېرنه او څېړنه به تر پنځو ورځو بشپړه شي.

د دغه کمیسیون په خبره، لومړنۍ پایلې به د دې بهیر تر بشپړېدو وریته اعلان کړي.

د ټاپې پروژې اړوند څلور هوکړه لیکونه لاسلیک کېږي

د ټاپې پروژه د ترکمنستان، افغانستان، پاکستان او هندوستان ګډه پروژه ده.

ټاکل شوې د ټاپې پروژې اړوند څلور هوکړه لیکونو لاس لیک شي.

د افغانستان د کانونو او پټرولیم وزارت ویاند عبدالقدیر متفي نن ازادي راډيو ته وویل، دغه هوکړه لیکونه د ځمکو د استملاک، له استملاک څخه استفاده او د ګازو د ټرانسپورټ په برخو کې دي.

د ښاغلي متفي په خبره، د ټاپې پروژې په اړه یو شمېر نړېوالو کمپنیو د پانګونې په برخه کې علاقمندي هم ښودلې ده.

هغه وايي: :"یو شمېر نړېوال ډونران په دې برخه کې علاقمنده شوې او د اسیا پراختیایي بانک هم ددې پروژې تمویل برخه کې شین څراغ ښودلی او دغه ملاتړې به په منظم ډول دددې پروژې سره همکاري کوي."

ښاغلي متفي وايي، د دې هوکړه لیکونو له امضا وروسته به د ټاپې پروژې کار پیل شي.

د ټاپې پروژه د ترکمنستان، افغانستان، پاکستان او هندوستان ګډه پروژه ده چې، د دې پروژې له لارې د ترکمنستان ګاز د افغانستان له لارې پاکستان او هندوستان ته انتقالیږي.

په افغانستان کې د ټاپي له پروژې کال تېریږي.

د دې پروژې د تخنیکي برخې مسوولین وايي، چې د ټاپې پروژې تخنیکي، چاپیریال او د ماین برخې سروي تکمیله شوې.

خو اقتصادي کار پوه قادر جیلاني بیا وايي، چې ددې پروژې کار په چټکې سره پر مخ روان نه دی او دې یوشمېر اندېښنې راپورته کړي دي.

د افغانستان او المان ترمنځ د پانګونې ګډه خونه پرانېستل شوه

د افغانستان د سوداګرۍ او پانګونې خونې ویاند جان اقا نوید

د افغانستان او المان ترمنځ د پانګونې ګډه خونه پرانېستل شوه.

د افغانستان د سوداګرۍ او پانګونې خونې ویاند جان اقا نوید نن ازادي راډيو ته وویل، دغه خونه د دواړو هېوادونو د یو شمېر سوداګرو لخوا د ښو سوداګریزو اړیکو د پیاوړتیا په هدف پرانستل شوې.

د ښاغلي نوید په خبره، افغانستان له هندوستان، ایران، ترکیه او یو شمېر نورو د منځنیو اسیا هېوادونو سره ګډې سوداګریزې خونې لري.

د افغانستان د سوداګرۍ او پانګونې خونې ویاند ددغه ډول خونو پرانېسته د سوداګریزو راکړو ورکړو په برخه کې اغیزمن ګام بولي.

د اقلیم په اړه اسپانیا کې غونډه بې پایلې پای ته رسېدلې

د مادرید د غونډې پرمهال هم د خبرو په تالار کې دننه او هم بهر د چاپېریال ساتنې د فعالانو له غوسې ډک اعتراضونه روان وو.

د ملګروملتونو په نوښت د اسپانیا په پلازمېنه مادرید کې د اقلیم په اړه له دوو اونیو راهیسې پیل شوې خبرې نن بې کومې نتیجې پای ته ورسېدې او په نړیوالو بازارونو کې د کاربن د پلور او پېر د اصولو د څرنګوالي په اړه مهمه پرېکړه ۲۰۲۰ میلادي کال ته پاتې شوه.

د نړۍ د نژدې ۲۰۰ هېوادونو پلاوو په دې نړیواله غونډه کې چې د خبرو په پایله کې یې د نړۍ هېوادونو د ځمکې د تودوخې په اړه په ډېرې سختۍ سره موافقه وکړه ګډون کړی و.

خو د هغه څه په اړه موافقې ته ونه رسېدل چې ساینسپوهان یې د بېړني حالت پر وړاندې د مقابلې لپاره مهم بولي.

په دې موافقو کې د مضرو ګازونو د مخنیوي او له هغو بېوزلو هېوادونو سره چې له اقلیمي بدلون څخه زیانمنېږي د مرستې په برخه کې لوړې غوښتنې او اعلامیې هم شاملې دي.

د مادرید د غونډې پرمهال هم د خبرو په تالار کې دننه او هم بهر د چاپېریال ساتنې د فعالانو له غوسې ډک اعتراضونه روان وو.

فعالانو- په تېره ځوانانو، د اقلیمي بدلون پروړاندې د حکومتونو د سوکه اقداماتو له کبله سخته غوسه څرګنده کړه.

ننګرهار او خوست کې د پاکستانیو روپیو نه کارولو کمپاین دوام لري

د افغانستان په دغو دوو سرحدي ولایتونو کې ورځنی کاروبار تر ډېره په پاکستاني روپیو چلېده.

په ننګرهار او خوست ولایتونو کې د پاکستاني روپیو د نه کارولو کمپاین پیل شوی دی.

د افغانستان په دغو دوو سرحدي ولایتونو کې ورځنی کاروبار تر ډېره په پاکستاني روپیو چلېده.

د افغان چارواکو په خبره د پاکستاني روپیو کارول نه یواځې د افغانيو ارزښت کماوه بلکې د افغانستان اقتصاد ته یې زیان رساوه.

د ننګرهار د والي ویاند عطاالله خوږیاڼي بیګا شپه ازادي راډیو ته وویل چې اوس د پاکستاني روپیو د نه کارولو لپاره عملي اقدامات پيل شوي.

هغه زیاتوي: "د عملي اقداماتو د پیل لومړۍ برخه دا وه چې د ننګرهار والي تېره ورځ امر وکړ چې هیڅ دولتي ادارې عام خلک او د ادارې کارکوونکي چې هغوی په جیبونو کې بهرني اسعار په ځانګړې ډول پاکستانۍ کلدارې وي نه شي کولای چې تګ راتګ وکړي هلته، په ټولو ادارو کې همدغه چاره ترسره شوه، دا به په ولسوالیو کې هم ترسره کېږي."

په ننګرهار ولایت سربېره خوست کې هم د افغانیو د ترویج لپاره کمپاین پیل شوی.

په دغو دواړو ولایتونو کې د اسعارو د تبادلې مارکیټونو او صرافانو ته نوي افغاني بانکنوټونه ورکړل شوي څو په مټ یې پاکستانۍ روپۍ ټوله شي.

نامعلومو وسله والو هرات کې ۳ پولیس وژلي

هرات ښار - ارشیف

په هرات کې پرون شپه ناوخته درې پولیس د نامعلومه وسله والو له خوا وژل شوي دي.

د هرات د امنیه قومندانۍ ویاند عبدالاحد ولي زاده ازادي راډیو ته تائید کړه چې دغو پولیسو د لسمې امنیتي حوزې په شاوخوا کې ګزمه کوله چې په موټر سایکل سپرو نامعلومه وسله والو پرې ډزې وکړې.

پولیسو په ځوابي ډزو کې دوه بریدګر هم وژلي دي.

اخوا د هرات د حوزوي روغتون سرطبیب محمد عارف جلالي ازادي راډیو ته وویل چې له دغې پېښې د دوی روغتون ته څلور ملکیان او یو پولیس ټپي وروړل شوي دي او درملنه یې روانه ده.

د یو بل خبر له مخې د هرات ښار په یوه کافۍ کې چاودنې درې پولیس او دوه ملکیان ټپیان کړي دي.

د هرات د امنیه قومندانۍ ویاند عبدالاحد ولي ازادي راډيو ته وویل چې پولیس د ښار په مرکز کې د کافي خانې د لیدلو او بررسۍ لپاره ورغلي و چې له ورننوتلو سره سم په کې د ماین چاودنه وشوه.

دوه کسان د همدې ماین چاودنې په تړاو نیول شوي هم دي.

ټاکنو کمېسیون: په ۷ ولایتونو کې د رایو بیا شمېرنې بهیر پیل شوی

ارشیف

د افغانستان د ټاکنو خپلواک کمېسیون وايي چې پرون یې په اوه ولایتونو کې د رایو د بیا شمېر او ابطال پروسه پیل کړه او د ورځې تر پایه یې په پنجشیر ولایت کې دا پروسه بشپړه هم کړه.

دا وروسته له هغه چې یکشنبه د عبدالله عبدالله په مشرۍ د ثبات او همپالنې ټاکنیز ټیم په اوه ولایتونو کې د رایو بیا شمېرنې ته اجازه ورکړه.

تر دې مخکې د افغانستان په ۲۷ ولایتونو کې د رایو بیا شمېرنه بشپړه شوې وه.

د عبدالله عبدالله ټاکنیزې ډلې په اوو ولایتونو (تخار، سرپل، بدخشان، جوزجان، فاریاب، بغلان او پنجشیر) کې د رایو بیا شمېرنې ته اجازه نه ورکوله او د انتخاباتو ولایتي کمیسیونونه یې ایسار کړي و.

دوی ټینګار درلود چې د ټاکنو کمېسیون دې لومړی د دوی په خبره دری لکه تقلبي رایې باطلې کړي.

کمیسیون په وار وار له دوی غوښتي و چې بیا شمېرنې ته دې اجازه ورکړي او بیا به د پاکو او ناپاکو رایو په اړه خپله پرېکړه کوي.

د ټاکنو کمیسیون ژمنه کړې چې په راتلونکو پنځو ورځو کې د رایو د بیا شمېرنې په بشپړېدو سره د ټاکنو لومړنۍ پایله اعلانوي.

السیسي: لیبیا کې حکومت د ملیشو له خوا ایسار دی

د مصر ولسمشر عبدالفتاح السیسي

د مصر ولسمشر عبدالفتاح السیسي وايي په ګاونډ لیبیا کې د ملګرو ملتونو له ملاتړ برخمن حکومت د ملیشو له خوا ایسار دی.

السیسي پرون په شرم شیخ ښار کې یوې ټلویزیوني وینا پر مهال وویل چې ولې د لیبیا حکومت خپلواکي نه لري او په خپله خوښه عمل نه کوي ځکه د ده په خبره طرابلس د ملیشو او تروریستانو په لاس کې دی.

ده وویل چې د لیبیا اوسنی کړکیچ مستقیماً په مصر باندې تاثیر کوي.

د السیسي له دغو خبرو دری ورځې مخکې د لیبیا د ملي پوځ په نوم د یوې وسله والې ډلې مشر خلیفه حفتر د لیبیا د حکومت پر ضد د یوې لا قوي مبارزې اعلان وکړ.

حفتر اته میاشتې مخکې د طرابلس د نیولو لپاره د عملیاتو امر کړی و.

وسله والو ملیشو بیا په طرابلس کې له حکومت سره مرسته کړې څو د خلیفه حفتر پر ضد وجنګیږي.

په لیبیا کې له ۲۰۱۱ میلادي کال راهیسې چې د دغه هېواد د کلونو دیکتاتور معمرقذافي ووژل شو سیاسي کړکیچ او لانجې روانې دي.

کرملین: د روسیې او امریکا د اړیکو ښه کېدو لرلید کمرنګه ښکاري

د کرملین ویاند دیمتري پسکوف

د روسیې جمهوري ریاست ماڼۍ کرملین ویلي چې د مسکو او واشنګتن د اړیکو د ښه کېدو لرلید کمرنګه ښکاري.

د کرملین ویاند دیمتري پسکوف وروسته له هغه پرون دا خبره کړې چې پنځه ورځې مخکې د روسیې د بهرنیو چارو وزیر سرګي لاوروف واشنګتن ته تللی و او هلته یې له خپل سیال مایک پمپيو او ولسمشر ډونالډ ټرمپ سره وکتل.

سپینې ماڼۍ او نورو امریکايي چارواکو ویلي چې ټرمپ او پمپيو د روسیې د بهرنیو چارو وزیر سرګي لاوروف ته د امریکا په راتلونکو ولسمشریزو ټاکنو کې د روسیې د لاسوهنو په باب خبرداری ورکړ.

د امریکا استخباراتي ادارو روسیه مخکې تورنه کړې وه چې د امریکا د ۲۰۱۶ میلادي کال په ولسمشرۍ ټاکنو کې یې مداخله کړې ده.

لاوروف وروسته بیا ویلي چې له ټرمپ او پمپیو سره په خبرو کې د انتخاباتو مسله نه ده یاده شوې.

د کرملین ویاند دیمتري پسکوف د روسیې له دولتي ټلویزیون سره په مرکه کې ویلي چې له ټرمپ سره د لاوروف لیدل ښه خبره وه خو کړکیچ په دې حد کې دی چې داسې لیدنې کتنې هم منفي حالات نه شي ښه کولای.

د امریکا یوې محکمې سناتور یوسف نورستاني د "عامه شتمنۍ په غلا" مجرم پېژندلی

د امریکا عدلي ادارو ویلي چې ښاغلي نورستاني په محکمه کې په خپل جرم اعتراف کړی دی.

د افغانستان د ټاکنو کمېسیون پخوانی رئیس او د مشرانو جرګې اوسنی غړی احمد یوسف نورستاني د امریکا متحده ایالاتو د فدرال محکمې له خوا په فریبکارۍ مجرم پېژندلی دی.

نورستاني د امریکا په جنوبي کلیفورنیا کې د ټولنیزې هوساینې یوې ادارې ته دروغ ویلي او په غیر قانوني توګه ۱۰۰ زره ډالر ترلاسه کړي دي.

نوموړی په داسې حال کې چې د ۲۰۱۵ او ۲۰۱۸ کلونو ترمنځ په افغانستان کې و او دولتي دنده یې درلوده، د امریکا فدرالې ادارې ته د خپل کار او سفر په اړه دروغ ویلي او د ټولنیزې هوساینې له ادارې یې مالي امتیازات ترلاسه کړي دي.

نورستاني په افغانستان کې خپل کاري عواید او سفر د امریکا له حکومت څخه پټ کړي.

د امریکا عدلیې ادارو ویلي چې ښاغلي نورستاني په محکمه کې له عامه شتمنۍ د غلا په جرم اعتراف کړی دی.

د کلیفورنیا محکمه به د راتلونکي کال په مارچ کې د افغانستان ددغه انتصابي سناتور په اړه خپل حکم وکړي.

د عدلیې ادارې په اعلامیه کې ویل شوي چې د عامه شتمنۍ د غلا په جرم یو څوک کېدای شي تر لسو کلونو زنداني او ۲۵۰ زره ډالر جریمه شي.

کابل کې د امریکا سفارت پر خپل ټویټر لیکلي چې فساد هېڅ پوله نه پېژني، هرڅوک چې په هر هېواد کې له صلاحیت څخه په ناوړه استفادې عمومي باور نقض کړي، باید عدالت ته راکاږل شي.

ایراني چارواکي د یوې بلې سایبري حملې شنډولو خبره کوي

د ايران د مخابراتو وزير وویل، دا وار د دې انټرنټي حملې هدف د دولت د استخباراتو په اړه جاسوسي کول وو.

د ايران د مخابراتو وزير محمد جواد اذري جهرمي نن يکشنبه اعلان وکړ چې دغه هېواد تر يوې اوونۍ په لنډه موده کې دويمه سايبري يا انټرنټي حمله شنډه کړې ده.

ښاغلي جهرمي وویل، دا وار د دې انټرنټي حملې هدف د دولت د استخباراتو په اړه جاسوسي کول وو.

د ايران د مخابراتو وزير نن په يوه لنډکي ټويټ کې ويلي چې دغه سايبري يا انټرنټي حمله تشخيص او د ايران د انټرنټي خونديتوب سپر په مرسته شنډه کړاى شوې ده.

نوموړي د نورو جزئیاتو له ورکولو پرته وویل، هغه استخباراتي ادارې هم تشخيص شوي چې دا حمله يې کړې او هکران هم څارل شوي دي.

د ايران د مخابراتو وزير تېره چهارشنبه هم ويلي وو چې يوې "لويې" او د کوم بل دولت انټرنټي حملې د ايران د برښنا زېربنا په نښه کړې ده.

ښاغلي جهرمي تر هغه یوه ورځ وړاندې د ایران پر بانکونو د سایبري برید راپورونه ردکړي وو.

که څه هم ايران پر خپلو ډېرو زېربناوو انټرنټ قطع کړى، خو څو څو ځلې يې د انټرنټي حملو د شنډولو خبره کړې ده.

خوست کې د ښځو لپاره تعلیمي او روغتیايي امکانات ډېر شوي

ارشیف

په خوست کې د ښځو د حقونو یوشمېر فعالانې وايي چې په هغه ولایت کې د ښځو لپاره تعلیمي او روغتیايي امکانات زیات شوي دي.

په خوست ښار کې پرون د ښځو د حقونو یوشمېر فعالانو د ملګرو ملتونو د بشري حقونو د نړیوال منشور د اعلان د کلیزي په مناسبت په غونډه کې په خپل ولایت کې د ښځو لپاره پر امکاناتو او ستونزو خبرې وکړې.

د خوست د ښځو ریاست مشرې، شافعه نورزۍ ازادي راډیو ته وویل: "خوشبختانه، په خوست کې ورځ تر بلې د ښځو د بشري حقونو وضعیت ښه کېږي. د ښځو تعلیم زیات شوی او ډېرې ښځې حتی د کارونو غوښتونکې دي."

د خوست د ښځو چارو رئیسې ازادي راډیو ته وویل چې په خوست کې د ښځو د حقونو په اړه د خلکو د معلوماتو سطحه د پخوا په پرتله لوړه شوې ده.

یوشمېر فعالانو ازادي راډیو ته وویل چې په خوست کې د هغو نارینه و شمېر زیات شوی چې د ښځو انساني حقونه مني او درناوی ورته کوي.

نور راوښيه

XS
SM
MD
LG