د لاسرسۍ وړ لېنکونه

تازه خبر
جمعه ۲۲ لیندۍ ۱۳۹۸ کابل ۰۲:۳۴

خبرونه

د چک جمهوريت د يوه هيئت الوتکې ته د الوتنې اجازه ورنه کړل شوه

د چک جمهوريت د کرنې وزير

د چک جمهوریت د کرنې د وزیر په مشرۍ یو چکي هییت وروسته له هغې روسیې ته خپل رسمي سفر رالنډ او بیرته خپل هېواد ته شتون شو چې له مسکو د روسیې کازان سیمې ته د الوتنې اجازه ورنه کړل شوه.

د چک جمهوریت د بهرنیو چارو وزیر توماش پیتریچیک پرون وویل، تر اوسه یې له مسکو څخه په دې اړه چې ولې دې الوتنې ته اجازه نه ده ورکړل شوې هیڅ سپیناوی نه دی ترلاسه کړی.

چارواکو ویلي چې د چکي چارواکو دا هییت نژدې لس ساعته د مسکو په هوايي ډګر کې منتظر و خو کازان ته د سفر اجازه ورنه کړل شوه.

کازان د روسیې د تاتارستان جمهوریت دی چې نیمايي وګړي یې تاتاران دی او نیم نور یې روسان دي. دا جمهوریت په دې وروستیو کې د هغو اعتراضونو شاهد دی چې په مسکو کې د مرکزي چارواکو په ضد دي.

تر اوسه څرګنده نه ده چې د چکانو دې هییت ته ولې کازان ته د سفر اجازه ورنه کړل شوه. د روسیې او چک اړیکو کې په وروستیو کې په څو مواردو ناندرې راپورته شوي دي.

د ورځې تازه خبرونه دلته ولولئ

ننګرهار کې چاودنې یو ماشوم وژلی او څلور تنه یې ټپیان کړي

د ننګرهار په خوګیاڼو ولسوالۍ کې چاودنې یو څلور کلن ماشوم وژلی او ۴ تنه یې ټپیان کړي دي.

د ننګرهار د والي ویاند عطالله خوګیاڼي نن رسنیو ته په یوه استولي پیغام کې ویلي چې دغه چاودنه نن ماسپښین یوه بجه د خوګیاڼو ولسوالۍ په کرم خېلو سیمه کې شوې ده.

په پیغام کې راغلي چې چاودنه د وسله والو طالبانو لخوا د ځای پرځای شوي ماین د چاودنې له امله رامنځته شوې ده.

د پېښې ټپیان د خوګیاڼو ولسوالۍ په روغتون کې تر درملنې لاندې دي.

روسیې په متقابل اقدام کې د جرمني دوو ډیپلوماتانو ته د وتلو امر کړی

د روسیې د بهرنیو چارو وزارت د جرمني سفیر ګیزا اندریاس وان ګیر احضار کړی و.

روسیې په یوه متقابل اقدام سره اعلان وکړ چې دوه جرمني ډیپلوماتان به وباسي.

د روسیې د بهرنیو چارو وزارت د جرمني سفیر ګیزا اندریاس وان ګیر احضار کړی او ورته یې ویلي چې دا دوه ډیپلوماتان اووه ورځې وخت لري چې له دغه هېواده ووځي.

جرمني تېره اوونۍ دوه روسي ډیپلوماتان وروسته له هغه وایستل چې د ډسمبر په څلورمه د فدرال څارنوال دفتر وویل، کافي دلایل شته چې په برلین کې د یوه ۴۰ کلن سړي زلیم خان خانګوشویلي د وژلو امر یا د روسیې حکومت او یا هم د چیچنیا جمهوریت ادارې ورکړی دی.

دا کس د اګست میاشتې په پای کې په برلین کې په یوه پارک کې په ډزو ویشتل شوی وو.

دی پخوا د چچنیايي جلاغوښتونکو په لیکو کې جنګېدلی وو او وروسته يې په ګرجستان کې پناه اخیستې وه. ښاغلی خانګوشويلي څو کاله وروسته له خپلې کورنۍ سره جرمني ته د پناه غوښتلو لپاره تللی وو.

په کابل کې د شطرنج د دوستۍ جام سیالۍ پیل شوې

په دغو سیالیو کې د افغانستان له ټولو ولایتونو څخه شااوخوا ۸۲ ښځینه او نارینه لوبغاړو ګډون کړی دی.

د شطرنج فدارسیون د مسوولینو په وینا په دغو سیالیو کې د شطرنج د نړیوالو قوانینو په پام کې نیولو سره ۷ پړاوه په سویسي سیسټم سیالۍ ترسره کیږي.

دغه سیالۍ به اووه ورځې دوام وکړي.

د کرنې وزارت: سږکال افغانستان کې د زعفرانو حاصل څه باندې ۱۸ ټنه و

د افغانستان د کرنې او مالدارۍ وزارت شمېرې ښيي چې روان کال په هېواد کې د زعفرانو حاصلات ۱۸،۳ مټریک ټنو ته رسیږي.

د دغه وزارت ویاند اکبر رستمي ازادي راډیو ته وویل، د تېر کال په پرتله سږکال د زعفرانو د حاصل کچه ۲،۳ ټنه زیات شوی.

نوموړی زیاتوي چې د زعفرانو کښت ځمکه پنځه زره جریبه زیاته شوې او روان کال د افغانستان ۹۰ په سلو کې زعفران له هېواده بهر صادر شوي دي.

افغانستان د ګرځندويۍ له درکه سږکال ۳۳ میلیونه افغانۍ عواید ترلاسه کړي

چارواکي وايي، روان کال کې شااوخوا ۲۰۰۰ ګرځندویانو له درېیو ولایتونو بامیان، بدخشان او هرات څخه لیدنه کړې.

افغانستان روان لمریز کال د ګرځندويۍ صنعت له درکه ۳۳ میلیون افغانۍ عواید ترلاسه کړي.

د افغانستان د اطلاعاتو او فرهنګ وزارت ویاند صابر مومند ازادي راډیو ته وویل، چې روان کال کې شااوخوا ۲۰۰۰ ګرځندویانو له درېیو ولایتونو بامیان، بدخشان او هرات څخه لیدنه کړې.​

ښاغلي مومند زیاته کړه: ​"د عوایدو په برخه کې مو ۲۷ میلیونه افغانۍ هدف ټاکل شوی و، خو موږ۳۳ میلیونه افغانۍ عواید ترلاسه کړي، یعنې موږ له ټاکل شوي هدف پنځه میلیونه زیات عواید ترلاسه کړي."

د هغه په خبره، د تېر کال په پرتله روان کال افغانستان ته د ګرځندویانو راتګ زیات شوی دی.

د اقتصادي چارو کارپوهان وايي، مخ په وده هېوادونو کې توریزم ځانګړی اهمیت لري او د ناخالصو ملي عوایدو اصلي عنصر بلل کیږي.

د دوی په باور د ګرځندوی جلب په هېواد کې اوسېدونکو ته د کار زمینه برابروي.

د اقتصادي چارو کارپوه قادر جیلاني ازادي راډیوته وویل، په افغانستان کې د ګرځندویانو پر وړاندې امنیت تر ټولو جدي ستونزه ده او تراوسه حکومت په دې برخه کې چندانې پام نه دی کړی.

هغه وویل: "ّپه لرغونو ځایونو کې حکومت باید پوستې واچوي، ترڅو امنیت یې خوندي شي. په بهر کې د افغانستان په ټولو سفارتونو کې افغانستان ته د ګرځندویانو د جلب په هدف هغه هېواد کې معلومات ورکړل شي."

نوموړی حکومت ته وړاندیز کوي چې د ګرځندوی صنعت د پراختیا لپاره خصوصي سکتور ته ځانګړی پام وشي، څو افغانستان هغه ظرفیتونه چې لري یې وتوانېږدي، د دې صنعیت له لارې خپل ملي عوایدو زیات کړي.

د ټاکنو کمېسیون نن پرېکړه کوي چې قسمي یا لومړنۍ پایلې اعلان کړي

سرچینې چې د موضوع د حساسیت له کبله نه‌غواړي نوم‌یې واخیستل شي ازادي راډیو ته وویل، دغه کمېسیون د وخت او د پایلو د ډول په اړه نن بحث کوي.

د ټاکنو خپلواک کمېسیون یوې سرچینې ازادي راډیو ته وویل، د ټاکنو د لومړنیو یا هم قسمي پایلو د اعلان لپاره ټول چمتووالی نیول شوی دی.

سرچینې چې د موضوع د حساسیت له کبله نه‌غواړي نوم‌یې واخیستل شي ازادي راډیو ته وویل، دغه کمېسیون د وخت او د پایلو د ډول په اړه نن بحث کوي.

بل‌خوا بیا د ټاکنو خپلواک کمېسیون یو ویاند میرزا محمد حق‌پرست وايي، کمېسیون د پایلو اعلان ته بشپړ چمتو دی، خو په دې اړه د کمېسیون رهبرۍ رسما پرېکړه نه‌ده کړې او په دې اړه غونډه روانه ده.

د ټاکنو خپلواک کمېسیون داسې مهال د ولسمشرۍ ټاکنو د لومړنۍ پایلو اعلان ته چمتووالی ښيي چې د هېواد لومړۍ مېرمن رولا غني وايي، کمېسیون باید نور جرأت وکړي او پایلې اعلان کړي.

مېرمن غني له افغانانو مننه وکړه چې د ټاکنو د پایلو اعلان ته‌یې ډېر صبر وکړ

په ورته وخت کې پر ټاکنو د څار بنسټونه وايي، افغانان د معتبرو رأیو پر بنسټ د ولسمشرۍ ټاکنو د پایلو اعلان غواړي.

د ازادو او عادلانه ټاکنو بنسټ مشر یوسف رشید د پنج‌شنبې په ورځ یوه خبري غونډه کې د ټاکنو خپلواک کمېسیون له‌خوا د ولسمشرۍ ټاکنو د پایلو په نه‌اعلان نیوکه وکړه او زیاته‌یې کړه، کمېسیون د دې پروسې په مدیریت کې پاتې راغلی.

ښاغلی رشید وايي: "د ټاکنو بهیر ډېر اوږد شو، له بده مرغه تر اوسه لومړنۍ پایلې نه‌دي اعلان شوي او کمېسیون هم تر اوسه په دې نه‌پوهېږي چې لومړنۍ که قسمي پایلې اعلان کړي. دا د دې بهیر لپاره په حقوقي او تخنیکي لحاظ لویه ضربه ده، دوام‌یې په ګټه نه‌دی او خلک هم ترې نور ستړي شوي دي."​

ښاغلي رشید همدا ډول د ټاکنیزو شکایتونو کمېسیون تر پوښتنې لاندې راوست چې خپل قانوني چارې یې له یاده ویستي او یوازې د څارونکو په توګه عمل کوي.

خو د ټاکنیزو شکایتونو کمېسیون بیا دا تور نه‌مني او وايي، ټول کارونه‌یې د قانون پر بنسټ مخته روان دي.

د افغانستان د ولسمشرۍ ټاکنې د میزان یا تلې میاشتې په شپږمه وشوې، خو کمېسیون سره له دې چې دوه ځله‌یې د لومړنۍ پایلو د اعلان ژمنه کړې، تر اوسه نه‌دی توانېدلی په دې برخه کې عملي ګام پورته کړي.

طالبانو د جوزجان فیض‌اباد ولسوالۍ کې ۴۰ یرغمل کسان خوشې کړي

د افغانستان په عمومي نقشه کې جوزجان ولایت

طالبانو د جوزجان ولایت د فیض‌اباد ولسوالۍ هغه ۴۰ اوسېدونکي خوشې کړي چې درې ورځې مخکې یې په سیمه کې د ولسي پاڅونوالو له یوه مشر سره د همکارۍ په تور له ځان سره بیولي وو.

د فیض‌اباد ولسوال الف شاه عطایي نن ازادي راډیو ته تأیید کړه چې دغه ۴۰ تنه نن خوشې شوي، خو ۴ تنه نور تر اوسه له طالبانو سره یرغمل دي.

د پاڅون کوونکو مشر الله بیرن چې د شبرغان او مزار شریف ترمنځ د لویې لارې د امنیت چارې یې سمبالولې، درې ورځې مخکې د شبرغان-اندخوی پر لاره په یوه ټرافیکي پېښه کې مړ شو.

دغو کسانو غوښتل د هغه د جنازې په مراسمو کې ګډون وکړي چې طالبانو برمته کړل.

په لومړي سر کې د جوزجان چارواکو د فیض‌اباد ولسوالۍ د شاوخوا سلو اوسېدونکو د تښتولو خبر ورکړی و.

ایران پر خپلې یوې دولتي ادارې انټرنټي حمله شنډه کړې

ایراني رسنیو دا خبر د دې هېواد د مخابراتو وزیر محمد جواد آذري جهرمي له قوله ورکړی دی.

ایران وایي، پر یوې دولتي الکترونیکي ادارې یې سایبري یا انټرنټي حمله شنډه کړې ده.

ایراني رسنیو دا خبر د دې هېواد د مخابراتو وزیر محمد جواد آذري جهرمي له قوله ورکړی دی.

هغه ویلي، دغه سایبري حمله په لوړه کچه تنظیم شوې وه، خو بیا هم چارواکي په دې اړه پلټنه کوي چې دقیقه اندازه‌یې معلومه کړي.

ښاغلي جهرمي هغه دولتي اداره نه‌ده په ډاګه کړې چې دغه حمله پرې شوې او نه‌یې هم د دې حملې تور په کوم هېواد پورې کړی، خو ژمنه‌یې کړې چې په دې اړه به وروسته یو راپور خپور کړي.

دا نه‌ده روښانه چې ایا دغه وروستۍ پېښه د متحده ایالاتو او ایران ترمنځ د سایبري حملو د روانې لړۍ یوه برخه ده او که څنګه؟

تهران له دې مخکې د جون په ۲۴مه هم د ایران پر ځینو اهدافو د سایبري حملو د شنډولو ادعا کړې وه.

فرانسې او نیجر د "جي پنځه" سرمشریزه د راتلونکي کال لومړیو ته وځنډوله

د فرانسې او نیجر مشرانو نن موافقه وکړه چې د "جي پنځه" په نوم ډلې سرمشریزه به د ۲۰۲۰ کال لومړیو ته وځنډوي.

ټاکل شوې وه د افریقا د وچې د ساحل سیمې پنځو هېوادونو بورکینافاسو، موریتانیا، مالي، چاد او نیجر د مشرانو دغه سرمشریزه روانه میاشت په فرانسه کې جوړه شي.

د فرانسې د ولسمشر امانوئل مکرون دفتر وویل، دغه وړاندیز د نیجر له ولسمشر سره په ګډه شوی دی.

په دې اړه پرېکړه وروسته له هغې کېږي چې پرون له مالي پولې سره نږدې د نیجر پر یوې پوځي اډې په حمله کې شااوخوا ۷۱ سرتېري ووژل شول.

د نیجر دفاع وزارت په یوه بیان کې ویلي چې په دغه حمله کې یو زیات شمېر ترورېستان له‌منځه وړل شوي او د پوځ ۱۲ تنه هم ټپیان شوي او یو شمېر نور لادرکه دي.

د دغې حملې مسئولیت تر اوسه کومې ډلې نه‌دی اخیستی، خو له اسلامي دولت ډلې (داعش) او نورو سخت دریځو ډلو سره تړلي وسله‌وال اکثره وختونه د دا ډول حملو مسئولیت اخلي.

فرانسې وروسته له هغې چې په ۲۰۱۲ کال قومي توریګ یاغیانو او جهادیانو د مالي د شمال دوه درېیمه برخه خاوره لاندې کړه، جنوب پلو ته د دې ډلو د پراختیا د مخنیوي لپاره په سیمه کې مداخله وکړه.

نن بریتانیا کې خلک په عمومي انتخاباتو کې ګډون کوي

په لندن کې د رأی ورکونې یو مرکز

نن بریتانویان په عمومي انتخاباتو کې ګډون کوي چې نتیجه به‌یې د برېکزېټ یا له اروپایي ټولنې د بریتانیا وتلو لپاره برخلیک ټاکونکې وي.

د رأی ورکولو مرکزونه د سهار په اوو بجو پرانیستل کېږي او د شپې تر ۱۰ بجو به د رأی ورکوونکو پر مخ پرانیستي وي.

کاندیدان په بریتانیا کې د ۶۵۰ انتخاباتي حوزو له لارې هڅه کوي چې مرکزي پارلمان ته لاره ومومي.

په بریتانیا کې د نظرپوښتنې شپږو مؤسسو روانه میاشت وموندله چې خلک تر ډېره د صدراعظم بورېس جانسون محافظه‌کار ګوند چې غواړي له اروپایي ټولنې بریتانیا وباسي، له نورو غوره بولي.

په دوهم ځای کې د جرمي کوربین په مشرۍ کارګر ګوند دی چې تر اوسه‌یې له اروپایي ټولنې د بریتانیا د وتلو لپاره د شرطونو موافقه څو ځلې ځنډولې ده.

خو د دغو نظر شمېرنو له مخې ښایي دغه دواړه لوی ګوندونه ونه‌شي کولای چې د پارلمان لږ تر لږه ۳۲۶ څوکۍ چې په یوازې سر د حکومت جوړولو لپاره ورته اړتیا ده، خپلې کړي.

خو په هر صورت هر هغه ګوند چې ډېرې رأیې ګټي هغه به دې ته اړوي چې له کوچنیو ګوندونو سره یو ائتلافي حکومت جوړ کړي.

د ترسره شویو نظرپوښتنو له مخې پر برېکزېټ سربېره د رأی ورکوونکو لپاره د روغتیایي خدمتونو، جنایي جرمونو، اقتصاد او د مهاجرت موضوعات هم مهم دي.

د ادبیاتو نوبل جایزې پر ګټونکي اتریشي لیکوال انتقادونه

د بالکان په سیمه کې زیات وګړي په دې باور دي چې ۷۷ کلن هندکې د هغو جنګي جنایتونو په اړه چې صربانو په سیمه کې د کورنۍ جګړې پر مهال کړي وو، د عفوې دريځ غوره کړی و.

د نوبل د ادبیاتو د جایزې د ګټونکي اتریشي لیکوال، پیتر هندکې په وړاندې د اعتراض په ترڅ کې بوسنیا او هرزګوېنا او کوسوو ویلي چې نه‌غواړي هغه دې هېوادونو ته ورشي.

د بالکان په سیمه کې زیات وګړي په دې باور دي چې ۷۷ کلن هندکې د هغو جنګي جنایتونو په اړه چې صربانو په سیمه کې د کورنۍ جګړې پر مهال کړي وو، د عفوې دريځ غوره کړی و.

د سرایوو کورني پارلمان پرون یوه لایحه تصویب کړه چې پر اساس‌یې هندکې غیر مطلوب وګړی معرفي شوی.

د بوسنیا د پارلمان غړو همداراز د سویډن د نوبل اکاډمي غندلې چې سږ کال‌یې د ادبیاتو جایزه هندکې ته چې په بوسنیا کې د مسلمانانو له ډله‌ییزې وژنې انکار کوي، ورکړې ده.

امریکا د ایران پر ځینو ټرانسپورټي شرکتونو بندیزونه ولګول

د امریکا د بهرنیو چارو وزیر مایک پامپیو پرون پر دغو شرکتونو د بندیزونو اعلان وکړ.

دا ځل د ایران د ټرانسپورت زیات شرکتونه چې یمن ته‌یې پوځي وسایل او د ډله‌یېزې وژنې وسلې لېږدولې، په نښه شوي دي.

د امریکا د بهرنیو چارو وزیر مایک پامپیو پرون پر دغو شرکتونو د بندیزونو اعلان وکړ.

هغه وویل: "تر څو چې د ایران له شره ډک فعالیت روان وي، د زیات فشار راوستلو ته به دوام ورکوو. زه د ایران د ټرانسپورت پر درېیو شرکتونو د بندیزونو خبر اعلانوم چې له یمن سره‌یې د ډله‌ییزې وژنې لپاره د وسلو د پروګرام په صادرولو کې مرسته کوله."

پامپیو همداراز وویل، دوی هیله لري چې د بندیانو هغه تبادله چې په وروستیو کې د واشنګټن او تهران ترمنځ وشوه، د دواړو خواوو ترمنځ د خبرو پیل ته لاره هواره کړي.

د امریکا د خزانې وزارت د عبدالحسین خدري پر شرکت بندیز لګولی او ویلي يې دي چې د ایران سپاه پاسداران انقلاب ځواکونو له دغه شرکت څخه په یمن کې شیعه حوثي وسله‌والو ته د پوځي وسایلو لېږدولو لپاره کار اخیست.

بغلان او ارزګان کې د پولیو دوه نوې پېښې ثبت شوي

په دې سره په ټول افغانستان کې د پولیو پېښې ۲۵ ته ورسېدې.

د افغانستان په شمال او جنوبي ولایتونو بغلان او ارزګان کې د ماشومانو د ګوزڼ یا پولیو دوه نوې پېښې ثبت شوي چې په دې سره په ټول افغانستان کې د پولیو پېښې ۲۵ ته ورسېدې.

د بغلان د عامې روغتیا رئیس محب‌الله حبیب تېر ماښام ازادي راډیو ته وویل چې د ماشومانو د ګوزڼ یا فلج نوې پېښه د بغلان په ډنډ غوري ولسوالۍ کې ثبت شوې ده.

ښاغلي حبیب وویل، دا هغه ولسوالي ده چې طالبانو په‌کې له یوه کال راهیسې ماشومانو ته د پولیو ضد واکسین مخه نیولې.

هغه زیاته کړه: "موږ پر دې کار کوو چې څنګه طالبانو ته قناعت ورکړو چې واکسین ته اجازه ورکړي، ترڅو د دې پېښو د زیاتېدو مخنیوی وکړو. که‌یې مخنیوی ونه‌شي، په افغانستان او شااوخوا سیمه کې د وضعیت د خرابېدو وېره شته."

له ۲۰۱۱ میلادي کال راهیسې، دا اول وار دی چې د پولیو یوه مثبته پېښه په بغلان کې ثبېږي.

په عین حال کې د ارزګان چارواکي وایي، د پولیو یوه نوې پېښه په خاص ارزګان ولسوالۍ کې ثبت شوې ده.

د ارزګان د عامې روغتیا رئيس، خان اغا میاخېل ازادي راډیو ته ویلي چې دا پېښه د طالبانو تر کنټرول لاندې ده، سیمه کې ثبت شوې ده.

د پولیو تر ټولو زیاتې پېښې د افغانستان په جنوبي درېیو ولایتونو ارزګان، هلمند او کندهار کې ثبت شوي دي. ارزګان کې نهه، په هلمند کې پنځه او په کندهار کې څلور پېښې ثبت شوې دي.

پولیو په نوره نړۍ کې له‌منځه تللې او یوازې په افغانستان، پاکستان او نایجریا کې د ماشومانو ژوند ته لا هم ګواښ بلل کېږي. په مالیزیا کې په دې وروستیو کې د پولیو یوه پېښه ثبت شوې ده.

نیجر کې د وسله‌والو برید کې ۷۱ دولتي سرتېري وژل شوي

د دغې حملې مسؤلیت تر اوسه کومې ډلې نه‌دی اخیستی

د نیجر د دفاع وزارت وایي چې د مالي له پولې سره نږدې د دې هېواد پر یوې پوځي اډې په حمله کې شااوخوا ۷۱ سرتېري وژل شوي دي.

دفاع وزارت په یوه بیان کې ویلي چې په دغه حمله کې چې پرون شوې، یو زیات شمېر ترورېستان له‌منځه وړل شوي او د پوځ ۱۲ تنه ټپیان شوي او یو شمېر نور لادرکه دي.

د دغې حملې مسؤلیت تر اوسه کومې ډلې نه‌دی اخیستی، خو له اسلامي دولت ډلې او نورو سخت دریځو ډلو سره تړلي وسله‌وال اکثره وختونه د دا ډول حملو مسؤلیت اخلي.

میلي: پنتاګون پر دې غور کوي چې افغانستان کې لږ شمېر سرتېري پرېږدي

له جنرال میلي څخه د کانګرس په دې استماعیه غونډه کې د وکیلانو یوه غوښتنه دا وه چې له هغه واوري ایا پنتاګون د افغانستان د اتلس کلنې جګړې په اړه د امریکا خلک تېر ایستلي دي؟

د امریکا د وسله‌والو ځواکونو لوی درستیز جنرال مارک میلي وایي، پنټاګون پر دې غور کوي چې په افغانستان کې لږ شمېر سرتېري پرېږدي.

ښاغلي میلي پرون د امریکا کانګرس ته په خبرو که څه هم په دې اړه چې څه شمېر سرتېري په پام کې ده په افغانستان کې پاتې شي، زیات جزئیات ورنه‌کړل، خو دا یې ومنله چې په دې هېواد کې له ترورېزم سره د مبارزې لپاره د لږو امریکایي سرتېرو پرېښودل یو اغېزناک اقدام دی.

هغه زیاته کړه، "موږ پر ډېرو غوراویو غور کوو چې یو یې هم دا دی."

په اوس وخت کې شاوخوا ۱۳ زره امریکایي سرتېري په افغانستان کې دېره دي چې شااوخوا ۵ زره‌یې د ترورېزم پر وړاندې مبارزه مخ ته وړي.

له جنرال میلي څخه د کانګرس په دې استماعیه غونډه کې د وکیلانو یوه غوښتنه دا وه چې له هغه واوري ایا پنټاګون د افغانستان د ۱۸ کلنې جګړې په اړه د امریکا خلک تېر ایستلي دي؟

د اسوشیټډ پرس خبري اژانس د راپور له مخې دغه‌راز د جنرال میلي ترڅنګ ټاکل شوې وه چې په افغانستان کې د امریکایي ځواکونو عمومي قوماندان جنرال سکاټ مېلر پرون د ورځې ناوخته د کانګرس غړو ته د تړلو دروازو تر شا غونډه کې په افغانستان کې د روانې جګړې په اړه معلومات ورکړي او د هغوی پوښتنې ځواب کړي.

نور راوښيه

XS
SM
MD
LG