د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۱:۴۵

خبرونه

د عمر البشير د ګوند د ړنګېدو او شتمنۍ د ضبطېدو امر وشو

عمر بشير

سوډان په دې هیواد د ليرې کړی شوي ډیکټاټور عمر البشیر د سیاسي ګوند د ړنګېدو او د دې ګوند د پانګو د ضبطېدو امر وکړ.

تر څو مياشتنيو ناکراريو وروسته د شمال ختیځې افریقا دې هېواد د ژمنه شوې ډیموکراسۍ پر لوري یو بل ګام واخیست.

په سوډان کې نویو چارواکو همدارنګه د بشیر د واکمنۍ د وخت هغه قانون هم لغوه کړی، چې په کې د ښځو د جامو او چلند لپاره ځانګړي مقرارت ټاکل شوي او سرغړوونکي په درو وهل کېدل.

د سو‌ډان د حکومت په یو فرمان کې راغلي چې د بشیر ”د ملي کانګرس ګونددې منحل او د سوډان د سیاسي ګوندونو له لیست څخه دې وایستل شي.“

همدارنګه یې زیاته کړې چې ددې ګوند د ټولو ملکیتونو او شتمنیو د مصادرې لپاره دې هم یوه کمیټه جوړه شي.

عمر البشیر او د ده افراطي ګوند د 1989 د جون له 30مې نیټې راهېسې د روان میلادي کال تر لومړیو په سوډان واکمني وکړه.

په تېره اپرېل مياشت کې په سوډان کې پراخو اعتراضونو نوموړی له واک څخه لرې کېدو ته اړ کړ.

د بشیر له لرې کیدو او له څو میاشتو ولسواکي پلوه مظاهرو وروسته د سوډان واکمن جنرالان په هیواد کې د سیاسي کړکیچ د هوارولو لپاره د اعتراض کونکو له مشرانو سره د واک د شریکولو په یوې هوکړې سلا شول.

د عمر البشیر د ګوند د منحلیدو فرمان د سوډان واکمنې شورا او د صدراعظم عبدالله حمدوک په مشرۍ کابینې له خوا ورکړل شوی.

د ورځې تازه خبرونه دلته ولولئ

واشنګټن پوسټ: سپینې ماڼۍ د افغانستان ۱۸ کلنې جګړې په اړه ناسم معلومات ورکړي 

ارشیف

واشنګټن پوسټ ورځپاڼې د امریکا د حکومت د محرمو اسنادو پربنسټ یو راپور خپور کړی چې ښيي سپینې ماڼۍ د افغانستان په ۱۸ کلنه جګړه کې د نیمګړتیاوو په اړه خلکو ته غلط معلومات ورکړي دي.

په اسنادو کې دا خبره افشا شوې چې د افغانستان جګړه- چې په نتیجه کې یې ۲۳۰۰ امریکايي سرتېري وژل شوي او نژدې یو تریلیون ډالر لګښت پرې شوی، نوره د ګټلو نه ده.

د واشنګټن پوست راپور وايي، د څه باندې دوه زره پاڼو لرونکي دا اسناد د هغو کسانو د مرکو او لیکنو په استناد- چې د افغانستان په جګړه کې یې ونډه درلوده، د شکایتونو او اعترافونو او نورو شواهدو په اساس برابر شوي دي.

په راپور کې په جریاناتو کې شاملو شاوخوا ۴۰۰ کسانو د افغانستان لپاره د واشنګټن پر بدلېدونکې ستراتیژۍ، د اغېزمن افغان پوځ د جوړېدو پر نیمګړتیاوو، د طالبانو د ځپلو د عملیاتو پر ناکامۍ او په افغان حکومت کې د فساد پرضد د مبارزې پر څرنګوالي انتقاد کړی.

طالبانو جوزجان کې د یوه کلي سل اوسېدونکي برمته کړي

د جوزجان ځايي چارواکي وايي، طالبانو نن د فیض اباد ولسوالۍ له کوګل تاش کلي شا او خوا سل اوسېدونکي له ځان سره وړي دي.

د فیض اباد ولسوال الف شاه ازادي راډیو ته وویل: "یو شمېر سپين ږیري او قومي مشران چې غوښتل يې د الله بیرن د جنازې په مراسمو کې ګډون وکړي، د دولت وسله والو مخالفینو له ځان سره د خان آقا کلي پر لور بیولي دي او هغوی اوسمهال له مخالفینو سره اسیر دي."

د فیض اباد ولسوال زیاته کړه، دا کسان د ولسي پاڅونوالو د یوه قومندان الله بیرن په جنازه کې د ګډون په هدف روان وو چې د طالبانو لاس ته ولوېدل. الله بیرن د ولسي پاڅونوالو قومندان وو چې په یوه ترافیکي پېښه کې مړ شو.

طالبانو تر اوسه په دې اړه څه نه دي ویلي.

چک جمهوریت کې یوه بریدګر شپږ کسان په ډزو ووژل

ډزې نن سهار شا او خوا اووه بجې د روغتون په یوه انتظار خونه کې وشوې.

د چک جمهوریت د اوستراوا ښار په یوه روغتون کې یوه بریدګر شپږ کسان په ډزو وژلي او وروسته یې ځان هم وژلی دی.

د چک جمهوریت صدراعظم اندرې ببیش دولتي تلویزیون ته وویل چې دا یوه داسي غمیزه ده چې هیڅ ورباندي نه پوهيږي.

ببیش وویل چې ډزې سهار شا او خوا اووه بجې په یوه انتظار خونه کې وشوې.

پولیس وايي دوی د مشکوک کس موټر وموند او کله چې دوی نږدې ورغلل، حمله کوونکي ځان هم په ډزو وواژه. دوی وايي حمله کوونکی دوه څلوېښت کلن وو.

دا له ۲۰۱۵ میلادي کال راهیسي د چک جمهوریت تر ټولو خونړۍ حمله ګڼل کیږي. په ۲۰۱۵ میلادي کال کې یوه سړي وروسته له هغه ځان وواژه چې اته کسان یې په ډزو ووژل.

امریکایی سناتور: که پاکستان طالبان ونه ساتي افغانستان کې جګړه څو اوونیو کې پای ته رسي

ښاغلي ګراهام د امریکا فاکس ټلویزیون ته ویلي، له طالبانو سره د مذاکراتو خبره ناسمه ده.

امریکايي سناتور لینډسې ګراهام وايي، که پاکستان په دغه هېواد کې طالبانو ته خوندي ځایونه ورنه کړي، په افغانستان کې جګړه په څو اوونیو کې پای ته رسیدلای شي.

ښاغلي ګراهام د امریکا فاکس ټلویزیون ته ویلي، له طالبانو سره د مذاکراتو خبره ناسمه ده.

ده ویلي چې د طالبانو پر ځای امریکا باید له پاکستان سره مذاکرات وکړي او که پاکستان طالبانو ته د خوندي ځایونو ورکول بند کړي، په افغانستان کې به جګړه په یوازي یو څو اوونیو کې پای ته ورسيږي.

ګراهام ویلي چې دی غواړي له پاکستان سره د ازادې سوداګرۍ د یوه تړون له لارې چې هغه په امنیتي برخه کې د دې هېواد له فعالیت سره تړلی وي، دا هېواد خپل چلند بدل کړي.
پاکستان تل د طالبانو د ملاتړ تورونه رد کړي.

د امریکا ولسمشر ډونالد ټرمپ په سپټمبر میاشت کې په کابل کې د طالبانو تر یوه ځانمرګي برید وروسته چې د یوه امریکايي په ګډون دوولس کسان ووژل، له طالبانو سره د سولې خبرې لغوه اعلان کړې.

خو د نومبر په نهه ویشتمه نېټه ټرمپ په بګرام هوايي اډه کې د خبرو پر مهال وویل چې له طالبانو سره بېرته خبرې پیلوي ځکه فکر کوي طالبان اوربند غواړي. دا خبرې د دواړو لوریو ترمنځ د ډسمبر په اوومه بېرته پیل شوې.

یوناما د بشري حقونو په مناسبت د ځوانانو له کمپاین سره یوځای شوه

د افغانستان له پاره د ملګرو ملتونو د مرستندویه اداره (یوناما) د بشري حقونو د ورځې په مناسبت نن د ځوانانو له نړیوال کمپاین سره یو ځای شوه.

د دې ادارې په خبرپاڼه کې راغلي چې "ځوانان د بشري حقونو ملاتړ کوي" په نوم نړیوال کمپاین د تغيیر راوستلو او بشري حقونو د خوندیتوب په برخه کې د ځوانانو رول روښانه کوي.

په اعلامیه کې راغلي چې د افغانستان په درېیو کې دوه برخې نفوس تر پنځه ویشتو کلونو کم عمر لري.

په ۲۰۱۹ میلادي کال کې ملګرو ملتونو د کوچنیانو د حقونو د کنوانسیون دېرشمه کلیزه ولمانځله چې افغانستان يې په ۱۹۹۴ میلادي کال کې غړی شو.

خبرپاڼه زیاتوي چې ملیونونه کوچنیان له خپلو اساسي حقونو بې برخې دي، دوی پر ښوونځیو او روغتونو په حملو کې اغېزمن کیږي او په جګړه کې له بیلابیلو ځورونو سره مخامخ کیږي.

یوناما په دې اعلامیه کې لیکلي چې ملګري ملتونه به په افغانستان کې د بشري حقونو خپلواک کمیسیون په ګډون د دې هېواد د بنسټيزو ادارو د پرمختګ لپاره همکاري ته دوام ورکړي.

همداراز ویل شوي چې د ملګرو ملتونو امنیت شورا د پرېکړې له مخې به یوناما د ملکیانو د خوندیتوب، د بشري حقونو اړوند ارزونې او راپور ورکولو په برخه کې کار ته دوام ورکړي.

د کندز په چهاردره کې ۲۱ امنیتي سرتېري او ۴ ملکي وګړي ټپیان شوي

د کندز د چهاردرې ولسوالۍ

د کندز په چاردرې ولسوالۍ کې د هاوان د لګېدو په دوو پېښو کې ۲۱ امنیتي سرتېري او ۴ ملکي وګړي ټپیان شوي دي.

د کندز د امنیه قوماندانۍ ویاند انعام الدین رحماني نن آزادۍ راډیو ته وویل چې تېر ماښام یو هاوان پر امنیه قوماندانۍ او یو بل د ملکي وګړو د استوګنې پر یوه سیمه ولګېدل.

هغه زیاتوي: "د هاوان د لومړۍ مرمۍ په چاودنه کې ۲۱ امنیتي سرتېري برسېرن ټپیان شول، د سردارانو په کوڅه کې د دوهم هاوان په چاودنه کې د کندز څلور اوسېدونکي ټپیان شول."

ښاغلی رحماني وايي چې د پېښې ټپیان روغتون ته لېږدول شوي دي او د هغوی وضعیت د ډاډ وړ دی.

د طالبانو ویاند ذبیح الله مجاهد ویلي دي چې د چاردرې ولسوالۍ پر امنیه قوماندانۍ دوی هاوانونه توغولي چې په نتیجه کې یې زیات شمیر حکومتي سرتېري وژلي او ۲۲ نور یې ټپیان کړي دي.

غزني کې د شهیدانو او معلولینو چارو آمر وژل شوی

د غزني د شهیدانو او معلولینو چارو امر وژل شوی.

وسله والو په غزني کې د شهیدانو او معلولینو چارو آمر وژلی.

په غزني کې وسله والو د دغه ولایت له پاره د شهیدانو او معلولینو سرپرست آمر نصر الله سیاسي وژلی دی.

د ولایت ویاند محمد عارف نوري وايي پر نوموړي د سه شنبې په ورځ سهار د غزني ښار په دریم پلان سیمه کې د بې غږه توپانچې په وسیله برید شوی دی.

نوري زیاتوي، وسله وال له سیمې څخه تښتېدلي دي.

تر اوسه پورې د دغې پېښې پړه چا پر غاړه نه ده اخیستې.

دا په داسې حال کې ده چې په دغه ولایت کې ډیری وخت دولتي کارمندان، امنیتي سرتېري او قومي مشران او دیني عالمان په نښه کېږي.

--

جاپان د اټومي لانجې په اړه تهران او واشنګټن سره مرسته کوي 

د جاپان صدراعظم شینزو ابې

د جاپان صدراعظم وایي، د ایران ولسمشر ته هغه هېوادته د ورتلو بلنه ورکوي څو د ایران د اټومي پروګرام پرسر د تهران او واشنګټن ترمنځ د کړکیچ له هواري سره مرسته وکړي.

د جاپان صدراعظم شینزو ابې وایي، هېواد یې د ایران د ولسمشرحسن روحانې کتنې ته تیاری نیسي ځکه غواړي چې د هغې اټومي لانجې په هوارولو کې پراخ رول ولوبوي چې د تهران او واشنګټن ترمنځ را ولاړه شوې ده.

ابې چې په توکیو کې په یوه خبري کنفرانس کې خبرې کولې دغه راز وویل چې دا هیواد همداشان غواړي چې په منځني ختیځ کې د کړکیچ له کمولو سره مرسته وکړي.

هغه زیاتوي: "له جاپانه د ایران د ولسمشر حسن روحاني پرکتنې خبرې روانې دي، نړیواله ټولنه له جاپانه چې له متحدو ایالتونو سره شراکت لري او په عین حال کې هم له ایران سره له اوږدې مودې راهیسې ښه اړیکی لري، تمه کوي چې وضعیت ته رسیدګي وکړي."

د اسوشیتید پرس خبري آژانس د راپور له مخې جاپان چې د تېلو په برخه کې په سلو کې اتیا د ایران په تېلو متکي دي، د دې هېواد صدراعظم په تېر جون میاشت کې هم ایران ته تللی و چې ایران او متحده ایالات دواړه دې ته وهڅوي چې د کړکېچ د کمولو لپاره په خپلو کې خبرې وکړې خو دغو هڅو یې نتیجه ور نه کړه.

د جاپان صدراعظم شینزو ابې که څه هم جاپان ته د ولسمشر روحاني د ورتلو په اړه نور جزیات ورنکړل خو د دې هېواد رسنیو ویلي چې دغه سفرد روانې میاشتې په وروستیو کې تنظیم شوی.

له مالېزیا څخه د روحاني د پلان شوې کتنې مخکې یا وروسته.

ټاکل شوې چې حسن روحاني د اسلامي هیوادونو د کنفرانس په سرمشریزه کې چې مالیزیا به یې کوربنه وي، ګډون وکړي.

د تهران او واشنګټن ترمنځ کړکیچ وروسته له هغې زیات شو چې د امریکا ولسمشر ډونالډ ټرمپ د تیرکال په مې میاشت کې د ایران او د نړۍ د قدرتونو ترمنځ د ۲۰۱۵ میلادي کال له اټومي تړون ووت او له هغې راهیسې یې پر ایران بیرته بندیزونه ولګول.

د واشنګټن بندیزونو تر ډېره د ایران د تېلو صنعت ډیر اغېزمن کړی دی.

دغه بندیزونه ایران نه پرېږدي چې پر بهرنیانو اومه تېل وپلوري، هغه چې د دې هېواد د عوایدو اصلي سرچینه بلل کیږي.

دغو بندیزونو ته په پام تهران هم په تدریجې ډول له هغو ژمنو په شا شوی چې په شوي اټومي تړون کې یې کړي دي.

د جاپان صدراعظم زیاته کړه چې جاپان به تر خپلې وسې هڅه وکړي چې د دوامداره خبرو له لارې په منځني ختیځ کې کړکېچ کم او وضعیت ثبات ومومي.

ښاغلي ابې وویل، د دې ترڅنګ چې جاپان به دې هېواد ته د تېلو لېږدولو د کشتیو امنیت تامینوي، د انرژۍ خوندي کولو ته په پام دا د جاپان دنده ده چې په سیمه کې د سولې او ثبات په ټینګښت کې خپل رول ولوبوي.

هرات کې کډوالو او امنیتي ځواکونو کورنیو ته د ځمکو نمرې ورکول کېږي

ارشیف

د افغانستان د کډوالو او راستنیدونکو چارو وزیر سید حسین عالمي بلخي وايي، په هرات کې ۲۵۰۰ نومرې مځکه کورنیو بې ځایه شویو کډوالو، راستنیدونکو او په افغان امنیتي او دفاعي ځواکونو کې د قرباني شویو کسانو کورنیو ته ویشل کیږي.

ښاغلي بلخي نن هرات ولایت ته د یو سفر په ترڅ کې وویل د استوګنې د کورونو د جوړولو لپاره به دا نومرې د زنده جان ولسوالۍ په سعادت ښارګوټي وویشل شي.

د نوموړې په وینا د مځکو دا ویش به په شپږ میاشتو کې ترسره شي.

د هرات د کډوالو او راستنیدونکو چارو د ریاست شمیرې ښيي چې همدا اوس په دې ولایت تر ۱۵۰ زرو زیاتې داخلي بې ځایه شوې کورنۍ له دوی سره ثبت دي.

طالبانو د ټاکنو کمېسیون ۸ کارکوونکي خوشي کړي

ارشیف

وسله والو طالبانو په پروان کې د ټاکنو د خپلواک کمېسیون اته برمته کړي کارکوونکې خوشې کړي.

د پروان ولایت د شینوارو ولسوال محمد اکوګل محمدي ازادي راډیو ته وویل، دا کسان دوه نیمې میاشتې مخکې وسله والو طالبانو نیولې وو.

د ښاغلي محمدي په وینا په دې موده کې ددې کسانو د خوشې کېدو لپاره لسګونه ځله قومي مشرانو د طالبانو سره د منځکړیتوب هڅه کړې ده.

د پروان د شینوارو ولسوال په وینا د خوشې شویو کسانو روغتیايي وضیعت د ډاډ وړ دی.

هغه دا نه دي ویلي چې دا کسان طالبانو خپله خوشې کړي او که د دوی له خوا ورسره کوم جوړجاړی شوی دی.

د پروان ولایت شینوارو ولسوالۍ کې د تلې په شپږمه نېټه د ولسمشرۍ د ټاکنو په ورځ طالبانو د ټاکنو د خپلواک کمېسیون لس قرادادي کارکونکي برمته کړي وو.

ایران: افغان دولت باید د سولې راتلونکو مذاکراتو کې اساسي رول ولري

ولسمشر غني ترکیه کې د ایران د بهرنیو چارو وزیر جواد ظریف سره د لیدنې پرمهال.

د ایران د بهرنیو چارو وزیر وایې د افغانستان دولت باید د سولي د راتلونکو مذاکراتو اساسي رول ولري.

محمد جواد ظریف د دوشنبه په ورځ د آسیا زړه – یا د استانبول پروسې د اتم کنفرانس په څنډو کې له افغان ولسمشر اشرف غني سره د لیدو پر مهال دا خبره کړې ده.

له ارګ څخه په یوې اعلامیې کې راغلي چې د ایران د بهرنیو چارو وزیر پدې لیدنه کې د افغانستان د ټولو لاسته راوړنو پر خوندیتوب ټینګار وکړ او ویویل چې غواړي په افغانستان کې جګړه پای ته ورسیږي.

اعلامیه زیاتوي ولسمشر غني د افغانستان امنیت او ثبات د ایران په ګډون د سیمي او نړۍ د امن لپاره ګټور وباله او ټینګار یې وکړ چې افغانستان به د هغو تروریستي ډلو پر ضد چې په افغانستان کې فعالیت کوي مبارزه وکړي.

ولسمشر غني دا هم ویلي چې سوله د افغان حکومت مهم لومړیتوب دی خو په وینا یې اساس به دا وي چې اوربند وشي او له هېواده بهر د طالبانو د پټنځایونو ستونزه هواره شي.

د ایران د بهرنیو چارو وزیر داسې مهال دا څرګندوني کړې چې په قطر کې د امریکایې پلاوي او طالب مرکچیانو ترمنځ خبرو نن څلورمه ورځ ده .

په دې خبرو کې د افغانستان د سولې لپاره د واشنګټن ځانګړی استازی زلمی خلیلزاد د طالبانو د سیاسي دفتر له استازو سره پر هغه څه بحث کوي چې د خلیلزاد مطبوعاتي دفتر په افغانستان کې د تاوتریخوالي کمول او بالاخره یو اوربند ته رسېدل بللي دي.

د تېرو دریو ورځو په خبرو کې تر اوسه د کوم پرمختګ راپور نه دی ورکړل شوی.

په سېپتمبر کې د امریکا او طالبانو ترمنځ د پخوانیو مذاکراتو تر لغو کېدو وروسته د طالبانو پلاوي دوه ځله په تهران کې له ایراني چارواکو سره لیدلي دي.

د حزب اسلامي ۵۰ مشرانو له حکمتیار څخه لار جلا کړه

د سولې د عالي شورا غړی او د حزب اسلامي مطرح غړی قاضي محمد امین وقاد.

راپورونه وایې یو شمېر افغان سیاسي او جهادي څېرو د ګلبدین حکمتیار په مشرۍ د حزب اسلامي څخه د بېلېدو پریکړه کړې ده.

قاضي محمد امین وقاد چې د سولې د عالي شورا غړی دی او د اسلامي ګوند له مطرحو مشرانو څخه شمېرل کېده وایي دی هم یو له هغو شاوخوا پنځوسو کسانو څخه دی چې دا پریکړه یې کړې ده.

ښاغلي وقاد تیره شپه له آزادي راډیو سره په خبرو کې د دې نوي جریان د پیلیدو خبره تایید کړه.

هغه زیاته کړه: "د پنځوسو په حدودو کې افغانستان شموله کسان دي چې حزبي سوابق لري، په جهاد کې پاته شوي، سولې ته یې کار کړی، په خپلو سیمو کې مطرح او د خلکو ملاتړ لري، دوی له ډیر انتظار وروسته چې بې برخلیک پاته شوي و او د حکمتیار سره یې اړیکې نه وې، دروازې ورباندي بندې وې، بلاخره مو پریکړه وکړه چې د فعلا لپاره د اتحاد شوراهای حزب اسلامي ترنامه لاندې یو مؤقت جریان پیل کړو."

ښاغلي وقاد زیاته کړه چې د دې موقت جریان د کړنلارې او مشرتابه په اړه یې پلاوی ټاکلی او راتلونکې اونۍ به یې اعلان کړې.

نوموړي دا د کوم شخص پر وړاندې منفي حرکت نه بلکې یو داسې پروګرام وباله چې د ده په خبره په افغانستان کې د خپلو خدماتو او فعالیتونو، له ملت سره د خواخوږۍ ښودلو او فرصت لاسته راوړنې لپاره یو ادرس ولري.

په هغه لست کې چې د ځینو خبریالانو لخوا خپور شوی د یو شمېر کسانو نومونه هم شته چې دا مهال د دولت برحاله غړي دي.

د ګلبدین حکمتیار په مشرۍ اسلامي ګوند تراوسه په دې اړه تبصره نه ده کړې.

د ناکامورا د خښولو مراسم سبا ترسره کېږي

د ناکامورا مړی د شنبه په ورځ له افغانستان څخه جاپان ته ولیږدول شو.

تمه ده د پې ایم اس په نوم د جاپانۍ خیریه موسسې مشر ډاکټر ټیټسو ناکامورا د خښولو مراسم سبا چهارشنبه ترسره شي.

نوموړی د تېرې چهارشنبه په ورځ د افغانستان په لویدیځ ښار جلال آباد کې د نامعلومو وسله والو په برید کې ټپي او بیا یې ساه ورکړه.

په هغې پیښې کې د ناکامورا پنځه نور افغان همکاران هم ووژل شول .

د ناکامورا مړی د شنبه په ورځ له افغانستان څخه جاپان ته ولیږدول شو.

دغه جاپاني ډاکټر چې په ۲۰۰۸ میلادي کال کې افغانستان ته راغلی وو ، د کرنې او اوبو لګولو د پراختیایې پروژو مسولیت درلود.

افغان ولسمشر محمد اشرف غني ویلي چې په ننګرهار او کونړ کې د ناکامورا پروژې به د هغه په نوم ونوموي.

د افغانستان په ختیځ کې خلکو نوموړی کاکا مراد باله.

د افغانستان خلکو د ناکامورا وژنه په کلکه وغندله.

تر اوسه د هغه برید مسولیت چا نه دی منلی.

طالبانو ویلي چې د نوموړي په وژنه کې لاس نلري.

د ننګرهار والي شاه محمود میاخیل د دې پېښي په تړاو د دوو مشکوکو کسانو د نیول کېدو خبر ورکړی.

ایران له امریکا سره د نورو بندیانو پر تبادلې چممتوالی ښودلی

ارشیف

ایران له امریکا سره د نورو بندیانو د تبادلې لپاره چمتو والی ښودلی.

د ایران د بهرنیو چارو وزیر محمد جواد ظریف د ډسمبر پر ۹ پر ټویټر پاڼه لیکلي: "روانه اونۍ د خپل برمته شوي وګړي ترلاسه کولو وروسته، د بندیانو تبادلې ته بشپړ چمتووالی لرو."

د ډسمبر پر ۷ دواړو هیوادونو یو د بل بندیان ژیو وانګ چې د امریکا د پرینستون پوهنتون فارغ التحصیل دی له ایراني ساینس پوه مسعود سلیماني سرهچې د امریکا په بند کې وو، د سویس په زوریخ ښار کې تبادله کړل.

دغه راز د ایران دولتي خبري آژانس ایرنا هم د حکومت د ویاند علي ربیعي په حواله راپور ورکړی چې وایې تهران تل له متحده ایالاتو سره د ټولو بندیانو د تبادلې لېواله دی.

واشنګټن له تهران څخه د ټولو هغو امریکاییانو د خوشې کېدو غوښتنه کړې چې د ایران په بند کې دي.

د ایران حکومت هم په اکتوبر کې امریکا ته د شلو ایرانیانو لست سپارلی وو چې د متحده ایالاتو سره د اقتصادي بندیزونو د سرغړاوي په تور بندیان دي.

شونې ده چې سانامارین د فنلنډ صدراعظمه شي

مارین د ترانسپورټ پخوانۍ وزیره او د فنلنډ د سوسیال دموکرات ګوند له لوړ پوړو چارواکو ده.

۳۴ کلنه سانامارین به نن په قوي احتمال د فنلنډ د صدراعظمې په توګه د دې هېواد د چارو مسولیت واخلي او د نړۍ تر ټولو ځوانه مشره به شي .

مارین د ترانسپورټ پخوانۍ وزیره او د فنلنډ د سوسیال دموکرات ګوند له لوړ پوړو چارواکو ده.

نوموړې د یکشنبې په ورځ د فنلنډ د صدراعظمۍ مقام خپل کړ.

په یوه غیر معمول بدلون سره به مارین له څلورو نورو هغو ګوندونو سره د ائتلافي حکومت مشري وکړي چې د ټولو مشرانې ښځي دي.

له هغوی څخه درې تنې شاوخوا دیرش کلنې دي.

نور راوښيه

XS
SM
MD
LG