د لاسرسۍ وړ لېنکونه

تازه خبر
چهارشنبه ۱۳ وری ۱۳۹۹ کابل ۰۳:۰۷

افغانستان

د افغانستان د لویو سړکونو د جوړولو تړون لاسلیک شو

د ترانسپورټ وزارت سرپرست یما یاري

د افغانستان د ټرانسپورت وزارت د سړک جوړولو له خصوصي شرکتونو سره د شاوخوا پنځه میلیارډه افغانیو په ارزښت د افغانستان د یو شمېر سړکونو جوړول لاسلیک کړل.

په داسې حال کې چې د افغانستان د ترانسپورټ وزارت ناامني او د بودیجې کمښت په هېواد کې د سړک جوړونې پروژو پر وړاندې اصلي ستونزه ګڼي خو بیا یې هم د سړک جوړونې له څو کورنیو او بهرنیو شرکتونو سره نوي تړونونه لاسلیک کړل.

دغه تړونونه چې شاوخوا پنځه میلیارده افغانۍ ارزښت لري د چهارشنبې په ورځ د ترانسپورت وزارت د سرپریت وزیر یما یاري او په کابل کې د سړک جوړونې د شرکتونو د استازو ترمنځ لاسلیک شول.

د افغانستان د ټرانسپورت سرپرست وزیرپه دې اړه جوړې شوې خبري غونډې ته وویل: "موږ مکلف یو چې د دوشي - بامیان لویه لاره د بدیلې لویې لارې په توګه، د سالنګ تونل د بندولو او ترمیم لپاره چمتو کړو، زمونږ بله پروژه په جلال آباد کې شاوخوا نهه کیلومتره سړکونه دي، بله پروژه بیا له فیروزکوه څخه تر هرات پورې لس کیلومتره سړک جوړول دي."

د دې تړون پر بنسټ، به د دوشي سړک –بامیان د دوهمې او پنځمې برخې د جوړولو چارې، چې لګښت یې د نړیوال بانک لخوا ورکول کیږي، د دوو کلونو په موده کې، د غور – هرات سړک د حکومت په پیسو په 18 میاشتو کې او د جلال آباد ښار سړکونه چې ۹ کیلو متره کېږي هم په 15 میاشتو کې بشپړې شي.

په ورته وخت کې په ولسي جرګه کې د غور د خلکو استازي وايي چې دا پروژې باید په شفاف ډول پلې شي.

وکیل عبدالظاهر: "له بده مرغه، ځیني شرکتونه تړونونه دوهم لاس ته سپاري، دا موږ لیدلي دي، دا د لویو پروژو کارونه له ستونزو سره مخ کوي، اړونده وزارت باید ترې څارنه وکړي، ترڅو دوی خپله په ښه کیفیت کار وکړي، او نورو شرکتونو سره تړونونه ونه تړي. "

خو د ترانسپورت وزارت دغه تورونه ردوي.

د ورځې تازه خبرونه دلته ولولئ

ننګرهار کې ځیني کارګران: اولادونه به مو له لوږې ومري

ارشیف

که څه هم په جلال‌اباد ښار کې د کرونا ویروس له وېرې پخوانۍ ګڼه ګوڼه نه‌ترسترګو کېږي او لوی کاروبارونه درېدلي او د ښار ډېره برخه‌یې تړل شوې، خو ډېری خلک لا هم هره ورځ د ښار واټونو او چوکونو ته د کار روزګار د پیدا کولو او خپلې کورنۍ ته د نفقې د ګټلو لپاره د کار په تمه راوځي.

دغه خلک وایي، له کومې ورځې چې ښار تړل شوی، له هغې راهیسې یې مزدوري ورکه شوې او اندېښمن دي چې که خپل ورځنی ژوند همداسې مخ پر وړاندې یوسي، نو د کرونا پر ځای به‌یې اولادونه له لوږې ومري.

دوی وایي، حکومت بې له دې چې د خوار او غریب په اړه فکر وکړي او د دوی ژوند وسنجوي، په ښار یې بندیزونه لګولي دي.

د دوی په خبره، مخکې له دې چې ښار او کار وتړل شي، باید د نادارو خلکو د کار او نفقې لپاره‌یې له مخکې چمتووالی نیولی وی.

یو تن وویل: "زموږ دا دوهمه هفته وشوه چې دلته راځم او کار نه‌وي، ۱۰ کسان راترغاړه دي، کار روزګار نه‌شته بس دغلته وږي تږي ناست یوو او یو بل ته ګورو نو نور به څه وکړو؟"

د ننګرهار والي وایي چې هېڅ‌څوک له لوږې نه‌مري، خو د ښار په تړلو سره غواړي چې د سلګونه خلکو د مړینې مخه ونیسي.

د ننګرهار والي شاه محمود میاخېل وایي، سمه ده چې ناچاري او ستنونزې به وي، خو دا چې د کرونا د مرګوني ویروس مخنیوی شوی وي، مجبور دي چې د ښار ځینې هټۍ او د ګڼې ګوڼې ډک ځایونه بند کړي.

د یادونې وړ ده چې په ننګرهار سربېره له تېرو څو ورځو راهیسې د هېواد په مرکز او ولایتونو کې د خوراکي توکو د کمښت او بیو لوړېدو په اړه اندېښنې داسې مهال زیاتې شوي چې څه موده وړاندې جمهور رئیس محمد اشرف غني خلکو ته ډاډ ورکړی و چې افغانستان د هېڅ ډول لومړنیو موادو له کمښت سره مخ نه‌دی.

سرچینه: د ملي امنیت د جندر برخې ټپي شوې رئیسه مړه شوه

ارشیف

د افغانستان د ملي امنیت ریاست یوه سرچینه ازادي راډیو سره په خبرو کې تأییدوي چې د دغه ریاست د جندر رئیسه جنرال شرمیلا فروغ مړه شوې ده.

دغه سرچینې ونه‌غوښتل چې د موضوع د حساسیت له کبله خپل نوم واخلي، خو زیاته‌یې کړه چې په دې اړه به د دغه ریاست له‌خوا ډېر ژر اعلامیه خپره شي.

ویل کېږي چې جنرال شرمیلا فروغ تېره ورځ د یو مقناطیسي ماین په چاودنه کې چې د دې په موټر کې ځای پر ځای شوی و سخته ټپي شوه چې نن‌یې ساه ورکړه.

سرچینې وویل چې د پېښې د عاملینو د نیولو لپاره د دوی هڅې روانې دي، خو په ډاګه‌یې نه‌کړه چې دا د چا کار کېدلای شي.

امنیتي چارواکي: لغمان او ننګرهار کې ۶ وسله‌وال طالبان وژل شوي

ارشیف

په ختیځ کې د ملي اردو چارواکي په ننګرهار او لغمان کې د ۶ وسله‌والو طالبانو د وژل کېدو خبر ورکوي.

د ۲۰۱ سېلاب قول اردو مسؤلان ادعا کوي چې په تېرو دوو اوونیو کې په ننګرهار او لغمان کې د وسله‌والو طالبانو له لوري د افغان ځواکونو پر پوستو ۱۰ وسله‌والې حملې شوي چې د دوی له‌خوا په شا تمبول شوي دي.

د یادې قول اردو ویاند هارون یوسفزي وویل، د ننګرهار په شېرزادو کې وسله‌وال له افغان ځواکونو سره په نښته کې د یادې ډلې د یو قوماندان چې په منصور مشهور و، وژل شوی او پنځه ملګري یې ټپیان شوي دي.

هغه زیاته کړه په ورته مهال د لغمان په علیشنګ او الینګار ولسوالیو کې هم د افغان ځواکونو او وسله‌والو طالبانو ترمنځ نښته شوې چې پر مهال‌یې ۵ وسله‌وال طالبان وژل شوي او ۶ نور ټپیان شوي دي.

ښاغلي یوسفزي وویل: "تېرو دوو اوونیو کې د وسله‌والو طالبانو ۱۰ ډله‌ییز بریدونه په شا تمبول شوي، طالبانو په تېرو دوو اوونیو کې د ننګرهار په شېرزادو او د لغمان په الینګار ولسوالیو کې د امنیتي او دفاعي ځواکونو په پوستو بریدونه کړي چې افغان زړورو سرتېرو ورسره جګړه پیل کړه چې په شېرزادو کې د طالبانو یو قوماندان وژل شوی او پنځه ټپیان شوي او د لغمان په علیشنګ او الینګار کې پنځه طالبان وژل شوي او شپږ نور ټپیان دي."

وسله‌والو طالبانو تر اوسه په دې اړه څه نه‌دي ویلي.

'ننګرهار روغتون کې مړ شوی کس په کرونا ویروس اخته نه‌و'

د ننګرهار نقشه

د ننګرهار عامې روغتیا مسؤلین وایي، د هغه ناروغ د معایناتو نتیجه منفي راغلې چې د کرونا ویروس شکمنې نښې یې درلودې او تېره ورځ په روغتون کې مړ شو.

د ننګرهار د عامې روغتیا ویاند ظاهر عادل نن سې شنبه د وري په ۱۲مه ازادي راډيو ته وویل چې یاد ناروغ ۶۵ کلن وو او د شکر او زړه د ناروغۍ له امله‌یې ساه ورکړې.

دا کس د ننګرهار اوسېدونکی وو.

د ښاغلي عادل په خبره، د دغه ۶۵ کلن سړي معاینات د مارچ په ۲۸مه کابل ته لېږل شوي وو چې تېره شپه ناوخته‌یې پایله له دوی سره شریکه شوه. ده وویل د ناروغ سړي مړی نن د هغه کورنۍ ته وسپارل شو.

مخکې خلکو اندېښنه څرګنده کړې وه چې ښايي دغه ناروغ د روغتیایي کارکوونکو د بې‌غورۍ او په وخت د تشخیص نه‌کېدو له امله مړ شوی وي.

په ننګرهار کې تر اوسه د کرونا ویروس په تړاو ۷ پېښې ثبت شوي چې ۶یې منفي او یوه‌یې مثبته ده.

تخار کې د غیر مسئوله وسله‌والو نښته کې ۳ ملکیان وژل شوي

د تالقانو ښار یوه څنډه- ارشیف

د تخار ولایت په کلفګان ولسوالۍ کې د غیر مسئوله وسله‌والو په نښته کې ۳ ملکیان وژل شوي دي.

د تخار د امنیه قوماندانۍ ویاند عبدالخلیل اسیر د سې شنبې په ورځ ازادي راډيو ته وویل چې تېر ماښام د کلفګان ولسوالۍ په خان دستمال سیمه کې د دوو غیر مسؤله قوماندانانو د کسانو ترمنځ په نښته کې ۳ ملکي کسان ووژل شول.

ښاغلي اسیر زیاته کړه چې دولتي ځواکونه د دغو غیر مسؤله وسله‌والو د نیولو په هدف سیمې ته لېږل شوي، خو غیر مسؤل کسان له سیمې تښتېدلي دي.

ده وویل چې د کلفګان ولسوالۍ د خان دستمال سیمې اوسېدونکو د اعتراض په توګه د بدخشان-تخار لویه لاره د ټرافیکو پر مخ وتړله د او د دې پېښې د عاملینو د مجازات غوښتنه‌یې وکړه.

چارواکي: کندز کې ۶ طالبان او یو د ملي اردو سرتېري وژل شوي

ارشیف

د کندز په دشت ارچي ولسوالۍ کې په وسله‌واله نښته کې د ملي اردو د یوه سرتېري او ۶ طالب وسله‌والو د وژل کېدو خبر ورکړل شوی دی.

ځايي چارواکي وايي چې تېره شپه وسله‌والو طالبانو د دشت ارچي ولسوالۍ په قولق سیمه کې د دولتي ځواکونو پر پوستو حمله وکړه چې د سهار تر درې نیمو بجو روانه وه.

د دشت ارچي ولسوال نصرالدین سعدي د سې شنبې په ورځ «۱۳۹۹ کال د وري ۱۲» ازادي راډيو ته وویل چې تېره شپه ۱۲ بجې د طالبانو حمله پیل شوه او په نتيجه کې يې یو د ملي اردو سرتېری ووژل شو او درې نور ټپيان شول او همداراز ۶ وسله‌وال طالبان ووژل شول.

ده زیاته کړه: "د شپې پر ۱۲ بجو دښمن پر امنیتي ځواکونو حمله وکړه چې تر درې څلورو بجو يې دوام وکړ، په دې حمله کې زموږ د امنیتي ځواکونو یو کس شهید شو او درې ټپیان دي او د مخالف لوري ۶ کسان ووژل شول."

ښاغلي سعدي زیاته کړه چې نوي ځواکونه د مرستې لپاره ورسېدل او طالبان له سیمې ووتل.

طالبانو تر اوسه په دې اړه رسنیو ته څه نه‌دي ویلي.

ارزګان چارواکي: د ښاروالۍ عواید ۶۰ فیصده زیات شوي

د ارزګان نقشه

د ارزګان چارواکي وایي، تېر لمریز کال د مرکز ترینکوټ د ښاروالۍ عواید، د وړم کال په نسبت، شااوخوا ۶۰ فیصده زیات وو.

د ترینکوټ ښاروال نعمت‌الله بختیار پرون دوشنبه ازادي راډیو ته وویل، د دوی د تېر کال عواید په تېره یوه لسیزه کې تر بل هر کال زیات وو.

هغه زیاته کړه: "د ۱۳۹۷ ل کال په وروستیو شپږو میاشتو کې د ترینکوټ ښاروالۍ عواید ۳۴ سلنه زیات شوي و چې په ۱۳۹۸ل کال کې د ښاروالۍ په عوایدو کې ۶۵ فیصده زیاتوالی راغی. په تېرو ۱۰ کلونو کې د ترینکوټ ښاروالۍ عواید له ۱۰ تر ۱۱ میلیونو افغانیو نه‌وو اضافه شوي."

د ترینکوټ ښـاروال وایي، دوی پـه ۱۳۹۸ل کال کې نـږدې ۲۰ میلیونه افغانۍ عواید راټول کړي دي. ښاروال د عوایدو د زیاتېدو یو علت د تعرفو د سیستم معیاري کـول، د فزیکي پیسو پر ځای په انلاین بڼه مالي خدمات، له هټۍوالو د تېرو ۷ کلونو د مالیې ټولول، لـه دولتي او غیر دولتي ادارو د پورونـو ټولول او نور فعالیتونه وګڼل.

له پاکستان راستنېدونکي کسان تورخم کې قرنطین کېږي

تورخم دروازه

د ننګرهار والي وایي، هر هغه کس چې له تورخم دروازې دغه ولایت ته اوړي، له دوو تر درېیو اوونیو په تورخم کې قرنطین کېږي.

شاه محمود میاخېل پرون مازیګر په یوه وېډیویي پیغام کې وویل، تورخم دروازه تړلې ده او پاکستان چا ته اجازه نه‌ورکوي چې افغانستان ته واوړي.

هغه زیاته کړه: "هر څوک چې له پېښوره تورخم ته راځي، له ۱۴ تر ۲۱ ورځو په تورخم کې پاتې کېږي. دوی ته مو خیمې او مشخص ځایونه ټاکلي دي. ډاکتران، روغتیایي خدمات او امکانات ورته زموږ له‌خوا برابر شوي دي."

پاکستان، د کرونا ویروس د خپرېدو د مخنیوي په هدف تورخم دروازه د مارچ پر ۱۶مه، د مسافرو پر مخ وتړله.

د مسافرو ترڅنګ پر دغه دروازه تجارتي موټرو ته هم د تګ راتګ اجازه نه‌ورکول کېږي چې دې کار سوداګرو ته سخت مالي زیانونه اړولي دي.

د پکتیکا، خوست، غزني او ننګرهار له زندانونو ۱۳۷ بندیان خوشې شوي

ارشیف

د پکتیکا، خوست، غزني او ننګرهار له زندانونو پرون ۱۳۷ تنه بندیان خوشې شول.

چارواکي وایي، دغه بندیان په زندانونو کې د کرونا ویروس د خپرېدو د مخنیوي په موخه خوشې شوي دي. د ولسمشر د فرمان له مخې، له دې جملې ۱۶ بندیان د پکتیکا له زندانه خوشې شول.

د پکتیکا والي مجیب‌الرحمن څمکني پرون دوشنبه «۱۳۹۹ کال د وري ۱۱» په مرکز ښرنه کې رسنیو ته وویل: "د ولسمشر د فرمان پر اساس، نن دوشنبه په پکتیکا کې ۱۶ تنه محبوسین او یو معجوز د ولسمشر د لومړي فرمان پر اساس خوشې کېږي."

د دې ترڅنګ د خوست له زندانه ۳۲ او د غزني ولایت له زندانه د ښځو او ماشومانو په ګډون ۲۸ بندیان خوشې شول.

د ننګرهار چارواکو پرون د ۶۱ بندیانو د خوشې کېدو خبر ورکړ.

په هرات کې هم چارواکي وایي له یکشنبې ۱۴۱ تنه بندیان خوشې شوي او په پام کې ده تر ۵۰۰ پورې بندیان د دغه ولایت له زندانه خوشې شي.

حکومت تېره پنجشنبه د کرونا ویروس د خپرېدو د مخنیوي لپاره، د ښځو، ماشومانو او ناروغانو په ګډون د افغانستان له زندانونو د شاوخوا ۱۰ زره بندیانو د خوشې کېدو فرمان ورکړ.

حکومت ویلي هغه بندیان به چې د کورني او بهرني امنیت پر خلاف جرایم کړي، نه‌خوشې کېږي.

افغانستان کې پر کرونا ویروس د اخته کسانو شمېر ۱۷۰ ته ورسېد

کابل کې پر کرونا ویروس ۱۰ تنه اخته شوي.

په افغانستان کې پر کرونا ویروس د اخته کسانو شمېر ۱۷۰ ته ورسېد.

د روغتیا وزارت ویاند وحید مایار پرون ناوخته رسنیو ته وویل چې په کرونا ویروس د خلکو د اخته کېدو ډېرې پېښې په هرات کې ثبت شوې دي.

هغه زیاته کړه: "په تېرو ۲۴ ساعتونو کې د کرونا ویروس ۱۳۶ مشکوکې پېښې د هرات په البراتوار کې ثبت شوې چې له هغې جملې ۲۵ مثبتې پېښې تثبیت شوې دي. په ټول هېواد کې د مثبتو پېښو شمېر ۱۷۰ ته ورسېد."

تر هرات وروسته کابل په دوهم کتار کې راغلی چې په کرونا ویروس د اخته کسانو شمېر په‌کې ۱۰ ته رسېږي. کرونا ویروس یا (کوویډ-۱۹) تر اوسه په افغانستان کې د درېیو کسانو د مړینې سبب شوی دی.

د آمو سیند د سویلي سواحلو د ویجاړۍ په اړه اندېښنې رامنځته شوي

د امو سیند یوه څنډه ارشیف

د پسرلي په پیل او د آمو سیند د اوبو له زیاتېدو سره سم، د دغه سیند د سویلي سواحلو د ویجاړۍ په اړه اندېښنې هم زیاتې شوي دي.

د آمو سیند سویلي څنډې نه دي تحکیم شوي او په همدې علت هر کال لسګونه جریبه ځمکه د اوبو سره لاهو کېږي او تر ډېره په رېګ ځایونو بدلېږي.

سږ کال هم د آمو سیند د جنوبي سواحلو اوسېدونکي اندېښمن دي چې زراعتي ځمکې یې د اوبو د پورته کېدو له ګواښ سره مخ دي.

د سیمې اوسېدونکي وايي چې د ازبکستان هېواد د آمو سیند شمالي څنډې تحکیم کړي، نو د اوبو ټول لنګر د یاد سیند سویلي څنډې ته د افغانستان په لور دی او ورځ تر بلې یې د تخریب کچه ډېریږي.

د هغوی په خبره چې په سیند کې د ازبکستان د پوځي کښتیو ګزمې هم د آمو سیند د سواحلو تخریب ته مرسته کوي.

د شورتپې ولسوالۍ د آرق باتور کلي اوسېدونکی حاجي مجید وايي چې د آمو سیند له حمل میاشتې تر سرطان میاشتې طغیان لري او اوبه یې زیاتېږي.

هغه زیاتوي: " هر کال سلګونه جریبه ځمکه تخریب کوي. تر اوسه یې زمونږ دوه کلي له سیند سره یو ځای کړي دي. هر ورځ د افغانستان خاوره له سیند سره لاهو کېږي او د ازبکستان قلمرو ته ور زیاتیږي."

په همدې حال کې، د بلخ د والي ویاند منیر فرهاد ازادي راډیو ته ووېل چې د آمو سیند د څنډو د لا زیات تخریب د مخنیوي په موخه دوی یو لړ لومړني اقدامات ترسره کړي، خو په خبره یې چې دا د هغوی له وسه پورته ده چې د آمو سیند د سواحلو د تخریب مخنیوی وکړي.

د آمو سیند د پامیر غرونو د یخچالونو په اوبو کېدو سره پیلېږي او د آرال دریاچې ته ور ختمېږي.

دا سیند د څه باندې زر کلیومترو په فاصلې سره د ازبکستان، تاجکستان او ترکمنستان هېوادونو سره د افغانستان طبیعي پولې جوړوي.

د هرات، بغلان، بامیان او د بلخ له زندانونو لسګونه زندانیان خوشې شول

ارشیف

د افغانستان جمهوري ریاست د روان کال د حمل میاشتې په اوومه نېټه د کرونا ویروس د خپرېدو د مخنیوي په موخه د ۱۰ زره زندانیانو د بخښنې فرمان صادر کړ.

د دې فرمان په اساس له هرات څخه تر دې دمه د پنځو ښځو په ګډون ۱۴۴ تنه زندانیان له بند څخه خلاص شوي او په پام کې ده چې ۳۵۰ تنه نور هم آزاد شي.

د هرات د عمومي محبس مدیر میوند صمدي ازادي راډیو ته ووېل چې دا کسان د سرقت، ترافیکي پېښو او اخلاقي فسادو په جرمونو تورن و.

د بغلان د مرکزي محبس مدیر سمنوال محمد اسلم کوهستاني وايي چې له دغه زندان څخه د دوشنبې په ورځ ۷۶ تنه زندانیان آزاد شول.

په مرکزي بامیان ولایت کې هم د دوه ښځو په ګډون ۳۹ تنه زندانیان د دوه ورځو په ترځ کې له قید څخه آزاد شوي.

د بامیان والي مرستیال عتیق الله عتیق ازادي راډیو ته ووېل چې په پام کې ده له ۲۰۰ نور زیات زندانیان هم له بند څخه خوشې شي.

بلخ ولایت کې هم د ښځو، ماشومانو او نارینه و په ګډون په مختلفو جرمونو لسګونه تورن زندانیان د ولسمشر له لوري د بندیانو د عفو د فرمان د تطبیق د کمېسیون له لوري خلاص شول.

د بلخ والي ویاند منیر فرهاد ووېل چې په آزاد شویو کسانو کې ۱۶ ښځې، ۱۰ ماشومان شامل دي.

په هرات کې یو شمېر ښځینه محبوسینو د تېرې یک شنبې په ماښام په دې دلیل چې نوم د بخښنې په دغه فرمان کې نه وو شامل شوي په تاوتریخوالي لاس پورې کړ او د زندان یوې برخې ته یې اور ورته کړ چې له امله یې د زندان ۵ ساتونکي ټپیان شول.

د هرات والي ویاند جیلاني فرهاد د یاد خبر په پخلي سره وايي چې وضعیت اوس تر کنترول لاندې دی.

د یادولو ده، چې د کرونا ویروس د مخ نیوي په منظور د ولسمشر اشرف غني له لوري د لس زره زندانیانو د عفو په فرمان کې هغه کسان شامل دي، چې د قید موده یې له پنځو کلونو کمه وي، عمر یې له ۵۵ کلونو ډېر وي او د کووید-۱۹ ناروغۍ له جدي ګواښ سره مخ وي.

چارواکي: هلمند، زابل او بادغیس کې امنیتي ځواکونو ته مرګ ژوبله اوښتې

ارشیف

د افغانستان په یو شمېر ولایتونو کې د طالبانو په بریدونو کې افغان امنیتي ځواکونو ته مرګ ژوبله اوښتې ده .

د زابل د والي ویاند ګل اسلام سیال آزادي راډیو ته وویل چې تېره شپه په ارغنداب ولسوالۍ کې وسله والو طالبانو د امنیتي ځواکونو پر پوستو بریدونه کړي چې شپږ افغان سرتېري په کې وژل شوي دي.

هغه زیاته کړه: "دا چې زموږ امنیتي ځواکونه په فعال دفاعي حالت کې وو د وسله والو طالبانو دا لوی برید یې په شا وتمباوه او په متقابله جګړه کې یې طالبانو ته درنه مرګ ژوبله واړوله، له بده مرغه په دې جګړه کې ۶ افغان امنیتي سرتېري وژل شوي دي."

ښاغلي سیال د طالبانو د تلفاتو دقیق شمېر یاد نکړ.

بلخوا د هلمند د والي ویاند عمر ځواک نن آزادي راډیو ته ویلي چې تېره شپه د کجکي ولسوالۍ په مربوطاتو کې د وسله والو طالبانو په بریدونو کې دوه افغان سرتېري وژل شوي او دوه نور ټپیان دي.

د بادغیس د والي ویاند نجم الدین برهاني هم آزادي راډیو ته د امنیتي ځواکونو پر یوې پوستې د طالبانو د برید خبره کړې ده.

د ښاغلي برهاني په خبره دا برید د بادغیس ولایت د مقر ولسوالۍ په مربوطاتو کې شوی چې د ده په خبره یو پولیس افسر په کې وژل شوی او ۲ نور سرتېري ټپیان دي.

دغه چارواکي طالبانو ته هم د مرګ ژوبلې د اړولو ادعا کوي.

طالبانو تراوسه په دې اړه څه نه دي ویلي.

کورنیو چارو وزارت: هرات کې ۴۰۰۰ کیلوګرامه چاودېدونکي مواد کشف شوي

ارشیف

د افغانستان د کورنیو چارو وزارت وایي په هرات ولایت کې ۴۰۰۰ کیلوګرامه چاودېدونکي مواد کشف شوي دي.

د دغه وزارت په یوې خبرپآڼه کې راغلي چې دا امونیم نایتریت په یوه باروړونکي موټر کې ځای پرځای شوي و.

د غه موټر د غوریان ولسوالۍ په مربوطاتو کې د پولیسو لاس ته لویدلی، خو د کورنیو چارو وزارت په خبرپاڼه کې یې د وخت په اړه څه نه دي ویلي.

د دغه وزارت چارواکي وایې د دې موادو په کشفولو سره په هرات ولایت کې د لسګونو ترهګریزو پېښو مخه ونیول شوه .

د کورنیو چارو وزارت په وینا له امونیم ناتریت څخه د ډیری وسله والې ډلې په ځانګړي ډول طالبان د سړک غاړي ماینونو په جوړلو او نورو تخریبي فعالیتونو کې کار اخلي.

د افغانستان د انځرو حاصلات به ۴۲ زره مټریک ټنو ته زیات شي

ارشیف

د افغانستان د کرنې او مالدارۍ وزارت د انځرو د پروسس او بسته‌بندۍ طرحه وروستۍ کړه.

د دغه وزارت ویاند اکبر رستمي نن ازادي راډیو ته وویل، دغه طرحه به سږ کال عملي شي چې د دې طرحې پر بنسټ به د انځرو حاصلات له ۲۵ زره مټریک ټنو ۴۲ زره مټریک ټنو ته زیات شي.

دغه وزارت وایي، دوی په پام کې لري چې په مرکز او ولایتونو کې د تازه او وچو انځرو د پروسس مرکزونه جوړ کړي او همدارنګه په راتلونکو پنځو کلونو کې به څه باندې ۳۲۵۰ هکټاره ځمکه کې د انځرو باغونه جوړ شي.

انځر د افغانستان له مهمو صادراتو یادېږي چې د کرنې او مالدارۍ وزارت په وینا افغانستان ته لسګونه میلیونه ډالر عواید لري.

افغانستان تېر کال څه باندې ۷۰ میلیونه ډالرو په ارزښت د انځرو صادرات لرل.

اوس‌مهال د هېواد په ۱۶ ولایتونو کې انځر تولیدېږي چې ډېر یې په لوېدیځو ولایتونو کې دي.

نور راوښيه

XS
SM
MD
LG