د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۲:۲۸

افغانستان

چارواکي: د وطني غالیو صادراتو کې ۳۰ سلنه کموالی راغلی

ارشیف

د افغاني فرشونو او غالیو اداره وايي، د وطني غالیو په صادراتو کې ۳۰ سلنه کموالی راغلی دی.

دغه اداره وايي، که څه هم حکومت په هېواد کې د غالیو صنعت ته ډېره پاملرنه نه‌لري، خو ټینګار کوي چې د پراختیا لپاره‌یې یوه غوره لار له افغاني غالیو د دولتي ادارو او بنسټونو استفاده ده.

د دې ادارې عمومي مسؤل عبدالقهار خوش‌خلق ازادي راډيو ته وویل: "موږ په کراتو ویلي چې په دولتي ادارو کې باید د بهرنیو ایراني او ترکي ماشیني غالیو پر ځای له افغاني غالیو استفاده وشي، له یوې خوا دغه غالۍ ښه کیفیت لري له بلې خوا اقتصاد سره به مرسته وشي."

نوموړي له حکومت څخه وغوښتل چې د افغاني غالیو لپاره په کور دننه او بهر بازار موندنه کوي.

خو د افغانستان د سوداګرۍ او صنعت وزارت د غالیو د صاداراتو کچه د قناعت وړ یادوي وايي، په تېرو نهو میاشتو کې د ۱۸ میلیونه ډالرو په ارزښت افغاني غالۍ بهر ته صادر شوې دي.

د دې وزارت د عامه اړیکو د برخې مسؤلې هدیې سیرت ازادي راډيو ته وویل، دوی افغاني غالیو ته د بازار موندنې په هدف ډېرې هڅې کړې دي.

سیرت زیاته کړه: "د افغاني غالیو صنعت‌کارانو ته ځانګړي ښارګوټي په پام کې نیول شوي او دا د دې څرګندويي کوي چې موږ په دې برخه کې خپلې هڅې کړې دي."

دا په داسې حال کې ده چې ولسمشر محمد اشرف غني تېر کال له کورنيو تولیداتو نه د ملاتړ او په دولتي ادارو کې ورنه د استفادې په اړه ټینګار کړی و.

د ورځې تازه خبرونه دلته ولولئ

واشنګټن پوسټ: سپینې ماڼۍ د افغانستان ۱۸ کلنې جګړې په اړه ناسم معلومات ورکړي 

ارشیف

واشنګټن پوسټ ورځپاڼې د امریکا د حکومت د محرمو اسنادو پربنسټ یو راپور خپور کړی چې ښيي سپینې ماڼۍ د افغانستان په ۱۸ کلنه جګړه کې د نیمګړتیاوو په اړه خلکو ته غلط معلومات ورکړي دي.

په اسنادو کې دا خبره افشا شوې چې د افغانستان جګړه- چې په نتیجه کې یې ۲۳۰۰ امریکايي سرتېري وژل شوي او نژدې یو تریلیون ډالر لګښت پرې شوی، نوره د ګټلو نه ده.

د واشنګټن پوست راپور وايي، د څه باندې دوه زره پاڼو لرونکي دا اسناد د هغو کسانو د مرکو او لیکنو په استناد- چې د افغانستان په جګړه کې یې ونډه درلوده، د شکایتونو او اعترافونو او نورو شواهدو په اساس برابر شوي دي.

په راپور کې په جریاناتو کې شاملو شاوخوا ۴۰۰ کسانو د افغانستان لپاره د واشنګټن پر بدلېدونکې ستراتیژۍ، د اغېزمن افغان پوځ د جوړېدو پر نیمګړتیاوو، د طالبانو د ځپلو د عملیاتو پر ناکامۍ او په افغان حکومت کې د فساد پرضد د مبارزې پر څرنګوالي انتقاد کړی.

طالبانو جوزجان کې د یوه کلي سل اوسېدونکي برمته کړي

د جوزجان ځايي چارواکي وايي، طالبانو نن د فیض اباد ولسوالۍ له کوګل تاش کلي شا او خوا سل اوسېدونکي له ځان سره وړي دي.

د فیض اباد ولسوال الف شاه ازادي راډیو ته وویل: "یو شمېر سپين ږیري او قومي مشران چې غوښتل يې د الله بیرن د جنازې په مراسمو کې ګډون وکړي، د دولت وسله والو مخالفینو له ځان سره د خان آقا کلي پر لور بیولي دي او هغوی اوسمهال له مخالفینو سره اسیر دي."

د فیض اباد ولسوال زیاته کړه، دا کسان د ولسي پاڅونوالو د یوه قومندان الله بیرن په جنازه کې د ګډون په هدف روان وو چې د طالبانو لاس ته ولوېدل. الله بیرن د ولسي پاڅونوالو قومندان وو چې په یوه ترافیکي پېښه کې مړ شو.

طالبانو تر اوسه په دې اړه څه نه دي ویلي.

امریکایی سناتور: که پاکستان طالبان ونه ساتي افغانستان کې جګړه څو اوونیو کې پای ته رسي

ښاغلي ګراهام د امریکا فاکس ټلویزیون ته ویلي، له طالبانو سره د مذاکراتو خبره ناسمه ده.

امریکايي سناتور لینډسې ګراهام وايي، که پاکستان په دغه هېواد کې طالبانو ته خوندي ځایونه ورنه کړي، په افغانستان کې جګړه په څو اوونیو کې پای ته رسیدلای شي.

ښاغلي ګراهام د امریکا فاکس ټلویزیون ته ویلي، له طالبانو سره د مذاکراتو خبره ناسمه ده.

ده ویلي چې د طالبانو پر ځای امریکا باید له پاکستان سره مذاکرات وکړي او که پاکستان طالبانو ته د خوندي ځایونو ورکول بند کړي، په افغانستان کې به جګړه په یوازي یو څو اوونیو کې پای ته ورسيږي.

ګراهام ویلي چې دی غواړي له پاکستان سره د ازادې سوداګرۍ د یوه تړون له لارې چې هغه په امنیتي برخه کې د دې هېواد له فعالیت سره تړلی وي، دا هېواد خپل چلند بدل کړي.
پاکستان تل د طالبانو د ملاتړ تورونه رد کړي.

د امریکا ولسمشر ډونالد ټرمپ په سپټمبر میاشت کې په کابل کې د طالبانو تر یوه ځانمرګي برید وروسته چې د یوه امریکايي په ګډون دوولس کسان ووژل، له طالبانو سره د سولې خبرې لغوه اعلان کړې.

خو د نومبر په نهه ویشتمه نېټه ټرمپ په بګرام هوايي اډه کې د خبرو پر مهال وویل چې له طالبانو سره بېرته خبرې پیلوي ځکه فکر کوي طالبان اوربند غواړي. دا خبرې د دواړو لوریو ترمنځ د ډسمبر په اوومه بېرته پیل شوې.

یوناما د بشري حقونو په مناسبت د ځوانانو له کمپاین سره یوځای شوه

د افغانستان له پاره د ملګرو ملتونو د مرستندویه اداره (یوناما) د بشري حقونو د ورځې په مناسبت نن د ځوانانو له نړیوال کمپاین سره یو ځای شوه.

د دې ادارې په خبرپاڼه کې راغلي چې "ځوانان د بشري حقونو ملاتړ کوي" په نوم نړیوال کمپاین د تغيیر راوستلو او بشري حقونو د خوندیتوب په برخه کې د ځوانانو رول روښانه کوي.

په اعلامیه کې راغلي چې د افغانستان په درېیو کې دوه برخې نفوس تر پنځه ویشتو کلونو کم عمر لري.

په ۲۰۱۹ میلادي کال کې ملګرو ملتونو د کوچنیانو د حقونو د کنوانسیون دېرشمه کلیزه ولمانځله چې افغانستان يې په ۱۹۹۴ میلادي کال کې غړی شو.

خبرپاڼه زیاتوي چې ملیونونه کوچنیان له خپلو اساسي حقونو بې برخې دي، دوی پر ښوونځیو او روغتونو په حملو کې اغېزمن کیږي او په جګړه کې له بیلابیلو ځورونو سره مخامخ کیږي.

یوناما په دې اعلامیه کې لیکلي چې ملګري ملتونه به په افغانستان کې د بشري حقونو خپلواک کمیسیون په ګډون د دې هېواد د بنسټيزو ادارو د پرمختګ لپاره همکاري ته دوام ورکړي.

همداراز ویل شوي چې د ملګرو ملتونو امنیت شورا د پرېکړې له مخې به یوناما د ملکیانو د خوندیتوب، د بشري حقونو اړوند ارزونې او راپور ورکولو په برخه کې کار ته دوام ورکړي.

د کندز په چهاردره کې ۲۱ امنیتي سرتېري او ۴ ملکي وګړي ټپیان شوي

د کندز د چهاردرې ولسوالۍ

د کندز په چاردرې ولسوالۍ کې د هاوان د لګېدو په دوو پېښو کې ۲۱ امنیتي سرتېري او ۴ ملکي وګړي ټپیان شوي دي.

د کندز د امنیه قوماندانۍ ویاند انعام الدین رحماني نن آزادۍ راډیو ته وویل چې تېر ماښام یو هاوان پر امنیه قوماندانۍ او یو بل د ملکي وګړو د استوګنې پر یوه سیمه ولګېدل.

هغه زیاتوي: "د هاوان د لومړۍ مرمۍ په چاودنه کې ۲۱ امنیتي سرتېري برسېرن ټپیان شول، د سردارانو په کوڅه کې د دوهم هاوان په چاودنه کې د کندز څلور اوسېدونکي ټپیان شول."

ښاغلی رحماني وايي چې د پېښې ټپیان روغتون ته لېږدول شوي دي او د هغوی وضعیت د ډاډ وړ دی.

د طالبانو ویاند ذبیح الله مجاهد ویلي دي چې د چاردرې ولسوالۍ پر امنیه قوماندانۍ دوی هاوانونه توغولي چې په نتیجه کې یې زیات شمیر حکومتي سرتېري وژلي او ۲۲ نور یې ټپیان کړي دي.

غزني کې د شهیدانو او معلولینو چارو آمر وژل شوی

د غزني د شهیدانو او معلولینو چارو امر وژل شوی.

وسله والو په غزني کې د شهیدانو او معلولینو چارو آمر وژلی.

په غزني کې وسله والو د دغه ولایت له پاره د شهیدانو او معلولینو سرپرست آمر نصر الله سیاسي وژلی دی.

د ولایت ویاند محمد عارف نوري وايي پر نوموړي د سه شنبې په ورځ سهار د غزني ښار په دریم پلان سیمه کې د بې غږه توپانچې په وسیله برید شوی دی.

نوري زیاتوي، وسله وال له سیمې څخه تښتېدلي دي.

تر اوسه پورې د دغې پېښې پړه چا پر غاړه نه ده اخیستې.

دا په داسې حال کې ده چې په دغه ولایت کې ډیری وخت دولتي کارمندان، امنیتي سرتېري او قومي مشران او دیني عالمان په نښه کېږي.

--

هرات کې کډوالو او امنیتي ځواکونو کورنیو ته د ځمکو نمرې ورکول کېږي

ارشیف

د افغانستان د کډوالو او راستنیدونکو چارو وزیر سید حسین عالمي بلخي وايي، په هرات کې ۲۵۰۰ نومرې مځکه کورنیو بې ځایه شویو کډوالو، راستنیدونکو او په افغان امنیتي او دفاعي ځواکونو کې د قرباني شویو کسانو کورنیو ته ویشل کیږي.

ښاغلي بلخي نن هرات ولایت ته د یو سفر په ترڅ کې وویل د استوګنې د کورونو د جوړولو لپاره به دا نومرې د زنده جان ولسوالۍ په سعادت ښارګوټي وویشل شي.

د نوموړې په وینا د مځکو دا ویش به په شپږ میاشتو کې ترسره شي.

د هرات د کډوالو او راستنیدونکو چارو د ریاست شمیرې ښيي چې همدا اوس په دې ولایت تر ۱۵۰ زرو زیاتې داخلي بې ځایه شوې کورنۍ له دوی سره ثبت دي.

طالبانو د ټاکنو کمېسیون ۸ کارکوونکي خوشي کړي

ارشیف

وسله والو طالبانو په پروان کې د ټاکنو د خپلواک کمېسیون اته برمته کړي کارکوونکې خوشې کړي.

د پروان ولایت د شینوارو ولسوال محمد اکوګل محمدي ازادي راډیو ته وویل، دا کسان دوه نیمې میاشتې مخکې وسله والو طالبانو نیولې وو.

د ښاغلي محمدي په وینا په دې موده کې ددې کسانو د خوشې کېدو لپاره لسګونه ځله قومي مشرانو د طالبانو سره د منځکړیتوب هڅه کړې ده.

د پروان د شینوارو ولسوال په وینا د خوشې شویو کسانو روغتیايي وضیعت د ډاډ وړ دی.

هغه دا نه دي ویلي چې دا کسان طالبانو خپله خوشې کړي او که د دوی له خوا ورسره کوم جوړجاړی شوی دی.

د پروان ولایت شینوارو ولسوالۍ کې د تلې په شپږمه نېټه د ولسمشرۍ د ټاکنو په ورځ طالبانو د ټاکنو د خپلواک کمېسیون لس قرادادي کارکونکي برمته کړي وو.

ایران: افغان دولت باید د سولې راتلونکو مذاکراتو کې اساسي رول ولري

ولسمشر غني ترکیه کې د ایران د بهرنیو چارو وزیر جواد ظریف سره د لیدنې پرمهال.

د ایران د بهرنیو چارو وزیر وایې د افغانستان دولت باید د سولي د راتلونکو مذاکراتو اساسي رول ولري.

محمد جواد ظریف د دوشنبه په ورځ د آسیا زړه – یا د استانبول پروسې د اتم کنفرانس په څنډو کې له افغان ولسمشر اشرف غني سره د لیدو پر مهال دا خبره کړې ده.

له ارګ څخه په یوې اعلامیې کې راغلي چې د ایران د بهرنیو چارو وزیر پدې لیدنه کې د افغانستان د ټولو لاسته راوړنو پر خوندیتوب ټینګار وکړ او ویویل چې غواړي په افغانستان کې جګړه پای ته ورسیږي.

اعلامیه زیاتوي ولسمشر غني د افغانستان امنیت او ثبات د ایران په ګډون د سیمي او نړۍ د امن لپاره ګټور وباله او ټینګار یې وکړ چې افغانستان به د هغو تروریستي ډلو پر ضد چې په افغانستان کې فعالیت کوي مبارزه وکړي.

ولسمشر غني دا هم ویلي چې سوله د افغان حکومت مهم لومړیتوب دی خو په وینا یې اساس به دا وي چې اوربند وشي او له هېواده بهر د طالبانو د پټنځایونو ستونزه هواره شي.

د ایران د بهرنیو چارو وزیر داسې مهال دا څرګندوني کړې چې په قطر کې د امریکایې پلاوي او طالب مرکچیانو ترمنځ خبرو نن څلورمه ورځ ده .

په دې خبرو کې د افغانستان د سولې لپاره د واشنګټن ځانګړی استازی زلمی خلیلزاد د طالبانو د سیاسي دفتر له استازو سره پر هغه څه بحث کوي چې د خلیلزاد مطبوعاتي دفتر په افغانستان کې د تاوتریخوالي کمول او بالاخره یو اوربند ته رسېدل بللي دي.

د تېرو دریو ورځو په خبرو کې تر اوسه د کوم پرمختګ راپور نه دی ورکړل شوی.

په سېپتمبر کې د امریکا او طالبانو ترمنځ د پخوانیو مذاکراتو تر لغو کېدو وروسته د طالبانو پلاوي دوه ځله په تهران کې له ایراني چارواکو سره لیدلي دي.

د حزب اسلامي ۵۰ مشرانو له حکمتیار څخه لار جلا کړه

د سولې د عالي شورا غړی او د حزب اسلامي مطرح غړی قاضي محمد امین وقاد.

راپورونه وایې یو شمېر افغان سیاسي او جهادي څېرو د ګلبدین حکمتیار په مشرۍ د حزب اسلامي څخه د بېلېدو پریکړه کړې ده.

قاضي محمد امین وقاد چې د سولې د عالي شورا غړی دی او د اسلامي ګوند له مطرحو مشرانو څخه شمېرل کېده وایي دی هم یو له هغو شاوخوا پنځوسو کسانو څخه دی چې دا پریکړه یې کړې ده.

ښاغلي وقاد تیره شپه له آزادي راډیو سره په خبرو کې د دې نوي جریان د پیلیدو خبره تایید کړه.

هغه زیاته کړه: "د پنځوسو په حدودو کې افغانستان شموله کسان دي چې حزبي سوابق لري، په جهاد کې پاته شوي، سولې ته یې کار کړی، په خپلو سیمو کې مطرح او د خلکو ملاتړ لري، دوی له ډیر انتظار وروسته چې بې برخلیک پاته شوي و او د حکمتیار سره یې اړیکې نه وې، دروازې ورباندي بندې وې، بلاخره مو پریکړه وکړه چې د فعلا لپاره د اتحاد شوراهای حزب اسلامي ترنامه لاندې یو مؤقت جریان پیل کړو."

ښاغلي وقاد زیاته کړه چې د دې موقت جریان د کړنلارې او مشرتابه په اړه یې پلاوی ټاکلی او راتلونکې اونۍ به یې اعلان کړې.

نوموړي دا د کوم شخص پر وړاندې منفي حرکت نه بلکې یو داسې پروګرام وباله چې د ده په خبره په افغانستان کې د خپلو خدماتو او فعالیتونو، له ملت سره د خواخوږۍ ښودلو او فرصت لاسته راوړنې لپاره یو ادرس ولري.

په هغه لست کې چې د ځینو خبریالانو لخوا خپور شوی د یو شمېر کسانو نومونه هم شته چې دا مهال د دولت برحاله غړي دي.

د ګلبدین حکمتیار په مشرۍ اسلامي ګوند تراوسه په دې اړه تبصره نه ده کړې.

د ناکامورا د خښولو مراسم سبا ترسره کېږي

د ناکامورا مړی د شنبه په ورځ له افغانستان څخه جاپان ته ولیږدول شو.

تمه ده د پې ایم اس په نوم د جاپانۍ خیریه موسسې مشر ډاکټر ټیټسو ناکامورا د خښولو مراسم سبا چهارشنبه ترسره شي.

نوموړی د تېرې چهارشنبه په ورځ د افغانستان په لویدیځ ښار جلال آباد کې د نامعلومو وسله والو په برید کې ټپي او بیا یې ساه ورکړه.

په هغې پیښې کې د ناکامورا پنځه نور افغان همکاران هم ووژل شول .

د ناکامورا مړی د شنبه په ورځ له افغانستان څخه جاپان ته ولیږدول شو.

دغه جاپاني ډاکټر چې په ۲۰۰۸ میلادي کال کې افغانستان ته راغلی وو ، د کرنې او اوبو لګولو د پراختیایې پروژو مسولیت درلود.

افغان ولسمشر محمد اشرف غني ویلي چې په ننګرهار او کونړ کې د ناکامورا پروژې به د هغه په نوم ونوموي.

د افغانستان په ختیځ کې خلکو نوموړی کاکا مراد باله.

د افغانستان خلکو د ناکامورا وژنه په کلکه وغندله.

تر اوسه د هغه برید مسولیت چا نه دی منلی.

طالبانو ویلي چې د نوموړي په وژنه کې لاس نلري.

د ننګرهار والي شاه محمود میاخیل د دې پېښي په تړاو د دوو مشکوکو کسانو د نیول کېدو خبر ورکړی.

قطر کې د امریکايي او طالب مرکچیانو تر منځ د خبرو دوام

ارشیف

د قطر په پلازمېنه دوحه کې د امریکايي او طالب مرکچیانو تر منځ خبرو نن د دریمې ورځې لپاره هم خبرو اترو دوام درلود.

په دې خبرو کې د افغانستان د سولې لپاره د واشنګټن ځانګړی استازی زلمی خلیلزاد د طالبانو د سیاسي دفتر له استازو سره پر هغه څه بحث کوي چې د خلیلزاد مطبوعاتي دفتر په افغانستان کې د تاوتریخوالي کمول او بالاخره یو اوربند ته رسیدل بللي دي.

په ننیو خبرو کې تر اوسه د کوم پرمختګ راپور نه دی ورکړل شوی.

پرون ځینو رسنیو د طالب ویاند سهیل شاهین له خولې وویل که له امریکايي لوري سره توافق لاسلیک شي نو طالبان به په امریکایانو بریدونه نه کوي.

خو وروسته ښاغلي شاهین پر خپل ټویټر وویل، د ده د خبرو موخه داده چې که له امریکا سره توافقنامه لاسلیک شي نودوی به بهرنیو سرتیرو ته له افغانستان څخه د وتلو لار ورکوي.

له وسله والو طالبانو سره تر دې مخکې هم د زلمي خلیلزاد په مشرۍ امریکايي هییت نهه پړاوه خبرې کړي چې په سيپټمبر میاشت کې ولسمشر ټرمپ په کابل د طالبانو د هغه برید له کبله لغوه کړې چې۱۲ افغانان او یو امریکايي په کې ووژل شول.

طالبانو ویلي اوسنۍ خبرې یې له هماغه ځایه پیل کړي کوم ځای چې دریدلې وې.

چارواکي: د ډاکتر ناکامورا د وژنې په تور دوه کسان نیول شوي

جاپانی ډاکتر ټیټسو ناکامورا له اوږدو کلونو راهېسې یې په ختیځ کې د اوبو لګولو، کرنې او روغتیا پر یو شمیر پروژو کار کاوه.

د ننګرهار ولايت چارواکي وايي، د ډاکټر ناکامورا په وژلو کې د لاس لرلو په تور دوه کسان نیول شوي او همدارنګه ددې پېښې د څېړنې په هدف له مرکز څخه یو پلاوی جلال اباد ته ورغلی دی.

د ننګرهار والي شاه محمود میاخیل نن د امنیې قومندانۍ په انګړ کې خبریالانو ته وویل، د ډاکټر ناکامورا د وژنې د عاملینو د موندلو په هدف د ولايتي ادارې په مشرۍ ګډو امنيتي ځواکونو هلې ځلې چټکې کړي او له مرکز نه هم تخنيکي ټيم د مرستې په موخه ور رسیدلی دی.

بلخوا د ننګرهار امنيه قوماندان محمد ايمل نيازي خبریالانو ته وویل چې د جاپاني مرستندویه کارکونکي ناکامورا د قتل په تړاو د پوليسو له لورې دوه کسان نيول شوي او پوښتنې ګرویږنې ترې روانې دي.

نوموړې د دې کسانو د هویت په اړه څه ونه ویل خو زیاته یې کړه چې د نیول شویو کسانو له کورونو یې وسلې او پوځي تجهیزات ترلاسه کړي.

جاپانی ډاکتر ټیټسو ناکامورا چې له اوږدو کلونو راهېسې یې په ختیځ کې د اوبو لګولو، کرنې او روغتیا پر یو شمیر پروژو کار کاوه، تیره چارشنبې په ننګرهار کې ناڅرګندو وسله والو له خپلو پنځو ساتونکو سره په ډزو وواوژه .

د لامبو وهنې معلول افغان لوبغاړي امریکا کې مډالونه ګټلي

ارشیف

د افغانستان د لامبو وهنې معلول لوبغاړي عباس کریمي د امریکا په ایالتي سیالیو کې د سرو زرو څلور مډالونه وګټل.

د افغانستان د لامبو وهنی فدراسیون رییس قاسم حمیدي ازادي راډیو ته وویل چې عباس کریمی په دریو ورځو کې اته ځلی د لامبو په بیلابیلو سبکونو یا ډولونو سره د لامبو پرواني ډوله ۵۰ متره سیالیو، د کرال ډوله لامبو په ۵۰ مترو او په ۱۰۰ مترو کې د فری سټایل ډول په کولو سره ګټونکی اعلان شو.

عباس کریمي له دې وړاندې هم په ګڼو بهرنیو سیالیو کې د افغانستان لپاره زیات شمېر مډالونه ګټلي دي.

د یادونې وړ ده چې لامبو دغه سیالي د امریکا متحده ایالاتو د تکزاس ایالت په کوربه توب تر سره شوې.

له فساد سره مبارزه کې د افغانستان د لاسته راوړنو ستاینه

د افغانستان لپاره د ملګرو ملتونو ځانګړي استازي تدامیچي یاماموتو

ملګري ملتونه وايي له فساد سره د مبارزې په برخه کې د افغانستان لاس ته راوړنې ستايي خو په دې برخه کې په لا زیاتو پرمختیاوو ټینګار کوي.

په کابل کې د ملګرو ملتونو مرستندویه دفتر یا یوناما دا خبره نن د فساد په وړاندې د مبارزې د نړیوالې ورځې په مناسبت یوه خبرپاڼه کې کړې ده.

په خبرپاڼه کې د افغانستان لپاره د ملګرو ملتونو ځانګړي استازي تدامیچي یاماموتو له خولې ویل شوي: "ملګري ملتونه د هغو حقوقي کړنلارو، پالیسیو او بنسټیزو پرمختګونو هرکلی کوي، چې له فساد سره د مبارزې لپاره په افغانستان کې رامنځ ته شوی چوکاټ پیاوړی کوي. "

د یماموتو له خولې وړاندې ویل شوي: ”ډیره مهمه ده چې اوس د قوانینو په عملي کولو تمرکز وشي او له فساد سره د مبارزې د هوډ څرګندولو په خاطر له هغو کسانو سره حساب کتاب وشي، چې سرغړونه کوي."

ملگري ملتونه وايي، د جزا د نوي قانون، اطلاعاتو ته د لاس رسي قانون، د فساد په وړاندې د مبارزې قانون او د ۲۰۱۷ کال د فساد پرضد ستراتیژۍ په ګډون د فساد په وړاندې د افغان حکومت د پورته شویو ګامونو ملاتړ کوي خو پر عملي کیدو یې هم ټینګار کوي.

د یوناما خبرپاڼه زیاتوي، ملګري ملتونه هغه ستونزمن امنیتي وضیعت درک کوي چې افغان قاضیان او څارنوالان په کې فعالیت کوي او د قضايي چارواکو هدفي وژنې غندي.

د ملګرو ملتونو په وینا په داسې حال کې د فساد پر ضد د مبارزې عدلي مرکز د درغلیو قضیې څیړي خو دا مرکز لا هم په لوړ کچ د درغلیو د موثرې څیړنې په برخه کې موثر پرمختګ نه لري.

د یوناما په وینا د اداري فساد د اړوندو څیړنو په اړه د نیونې او احضار یو شمیر امرونه او د ممنوع الخروج حکمونه نه دي عملي شوي او ډیر محکوم شوي باید ونیول شي او سزا پرې عملي شي.

ملګرې ملتونه د 2003 میلادي کال راهېسې هر کال د ډیسمبر 9مه د اداري فساد پر ضد د نړېوالې ورځې په نوم لمانځي.

نور راوښيه

XS
SM
MD
LG