د لاسرسۍ وړ لېنکونه

تازه خبر
یکشنبه ۲۴ لیندۍ ۱۳۹۸ کابل ۰۵:۱۳

خبرونه

د طالبانو پلاوی ایران ته تللی

ارشیف

د طالبانو د سیاسي دفتر یو پلاوی ایران ته تللی او هلته‌یې د ایران د بهرنیو چارو له وزیر جواد ظریف سره کتلي دي.

دا خبره په قطر کې د دې ډلې د سیاسي دفتر ویاند سهیل شاهین په خپل ټویټر باندې لیکلې ده.

هغه وايي: "نن د (نومبر ۲۶مه) د ا.ا. امارت سیاسي مرستیال او د سیاسي دفتر مشر محترم ملا برادر اخند او ورسره هيئت‌یې د ایران د اسلامی جمهوریت د خارجه وزیر جواد ظریف او ورسره هيئت سره په تهران کې وکتل، دواړو خواوو د افغانستان د مسئلې په سوله‌ییز حل او د سولې د پروسې په هکله تفصیلي خبرې وکړې."

هغه لیکلي چې پرون سې شنبه د طالبانو د مرستیال او د سیاسي ډلې د مشر ملا برادر په مشرۍ پلاوي د ایران د بهرنیو چارو له وزیر جواد ظریف سره د افغانستان د سولې پر مسئله خبرې کړي.

د ایران د بهرنیو چارو وزارت تر اوسه پورې تهران ته د طالبانو د دغه پلاوي د سفر په اړه کومه تبصره نه‌ده کړې.

له دې مخکې هم د سپټمبر په میاشت کې د طالبانو یو پلاوی تهران ته تللی و.

د افغانستان حکومت تهران ته د طالبانو د تازه سفر په اړه تر اوسه کوم غبرګون نه‌دی ښودلی، خو پخوا یې ویلي و چې د سیمې او نړۍ هېوادونو ته د سفر پر ځای دې طالبان راساً له افغان حکومت سره خبرې وکړي.

دوی د طالبانو دا سفرونه بې‌ګټې بللي و.

د امریکا دفاع وزارت د نومبر په ۱۹مه په یوه اعلامیه کې ایران تورن کړی و چې حزب‌الله، شیعه عراقي وسله‌والو ډلو، د یمن حوثیانو، ځیني فلسطیني ډلو، طالبانو او بحریني شیعه وسله‌والو ته مالي سرچینې برابروي، سیاسي ملاتړ ترې کوي او روزنه ورکوي.

ایران تل د امریکا دا تورونه رد کړي دي.

د ورځې تازه خبرونه دلته ولولئ

ایراني چارواکي د یوې بلې سایبري حملې شنډولو خبره کوي

د ايران د مخابراتو وزير وویل، دا وار د دې انټرنټي حملې هدف د دولت د استخباراتو په اړه جاسوسي کول وو.

د ايران د مخابراتو وزير محمد جواد اذري جهرمي نن يکشنبه اعلان وکړ چې دغه هېواد تر يوې اوونۍ په لنډه موده کې دويمه سايبري يا انټرنټي حمله شنډه کړې ده.

ښاغلي جهرمي وویل، دا وار د دې انټرنټي حملې هدف د دولت د استخباراتو په اړه جاسوسي کول وو.

د ايران د مخابراتو وزير نن په يوه لنډکي ټويټ کې ويلي چې دغه سايبري يا انټرنټي حمله تشخيص او د ايران د انټرنټي خونديتوب سپر په مرسته شنډه کړاى شوې ده.

نوموړي د نورو جزئیاتو له ورکولو پرته وویل، هغه استخباراتي ادارې هم تشخيص شوي چې دا حمله يې کړې او هکران هم څارل شوي دي.

د ايران د مخابراتو وزير تېره چهارشنبه هم ويلي وو چې يوې "لويې" او د کوم بل دولت انټرنټي حملې د ايران د برښنا زېربنا په نښه کړې ده.

ښاغلي جهرمي تر هغه یوه ورځ وړاندې د ایران پر بانکونو د سایبري برید راپورونه ردکړي وو.

که څه هم ايران پر خپلو ډېرو زېربناوو انټرنټ قطع کړى، خو څو څو ځلې يې د انټرنټي حملو د شنډولو خبره کړې ده.

خوست کې د ښځو لپاره تعلیمي او روغتیايي امکانات ډېر شوي

ارشیف

په خوست کې د ښځو د حقونو یوشمېر فعالانې وايي چې په هغه ولایت کې د ښځو لپاره تعلیمي او روغتیايي امکانات زیات شوي دي.

په خوست ښار کې پرون د ښځو د حقونو یوشمېر فعالانو د ملګرو ملتونو د بشري حقونو د نړیوال منشور د اعلان د کلیزي په مناسبت په غونډه کې په خپل ولایت کې د ښځو لپاره پر امکاناتو او ستونزو خبرې وکړې.

د خوست د ښځو ریاست مشرې، شافعه نورزۍ ازادي راډیو ته وویل: "خوشبختانه، په خوست کې ورځ تر بلې د ښځو د بشري حقونو وضعیت ښه کېږي. د ښځو تعلیم زیات شوی او ډېرې ښځې حتی د کارونو غوښتونکې دي."

د خوست د ښځو چارو رئیسې ازادي راډیو ته وویل چې په خوست کې د ښځو د حقونو په اړه د خلکو د معلوماتو سطحه د پخوا په پرتله لوړه شوې ده.

یوشمېر فعالانو ازادي راډیو ته وویل چې په خوست کې د هغو نارینه و شمېر زیات شوی چې د ښځو انساني حقونه مني او درناوی ورته کوي.

هند کې د تابعیت نوي قانون پرضد اعتراضونه روان دي

په هند کې د هغه نوي قانون پر ضد مظاهرې روانې دي چې پر اساس یې د درېیو هېوادونو مذهبي اقلیتونو ته د هند د تابعیت حق ورکول کېږي.

د امریکا متحده ایالاتو له دې امله ټولو امریکايي وګړو ته خبرداری ورکړی چې هند ته سفر ونه کړي. امریکا او تر هغه مخکې بریتانیا خپلو وګړو ته خبرداری ورکړ چې هند ته د سفر پرمهال له احتیاطه کار واخلي.

د هند د تابعیت قانون د تعدیل پر اساس، د افغانستان، بنګله دېش او پاکستان سیکانو، هندوانو او مذهبي اقلیتونه چې تر ۲۰۱۵ کال وړاندې هند ته تللي او مېشت شوي، د هند د تابعیت ورکول کېږي. مسلمانان له دې قانونه مستثنی شوي دي.

د هند په یوشمېر ختیځو ایالتونو کې ډېر خلک وېره لري چې له بنګله دېشه به د کډوالو سترې جوپې ورشې او پرله پسې مظاهرې کوي. د هند حکومت په اسام ایالت کې د مظاهرو له امله تر سبا پورې پر انټرنټ بندیز لګولی دی.

د بشري حقونو د ملاتړ یوشمېر ډلې او د اپوزېسیون ګوندونه هم پردې قانون اعتراض کوي او وايي چې د صدراعظم نریندرا مودي هندو نشلنست ګوند په دې ډول د هند ۲۰۰ میلیونه مسلمانان منزوي کوي. خو مودي دا تورونه رد کړي دي.

'امریکا غواړي روانه اونۍ له افغانستانه د ۴ زره سرتېرو ویستلو اعلان وکړي'

امریکا حاضردمه په افغانستان کې د ۱۲ زره او ۱۳ زره ترمنځ پوځیان لري.

یوه امریکايي رسنۍ وايي، د ټرمپ اداره غواړي چې روانه اوونۍ له افغانستان څخه د څه باندې ۴ زره امریکايي پوځیانو د ایستلو اعلان وکړي.

د دغو ځواکونو له ایستلو وروسته به په افغانستان کې د ۸ زره او ۹ زره ترمنځ امریکايي پوځیان پاتې شي.

این بي سي نیوز تلویزیون د بې نومو امریکايي چارواکو په قول همداراز ویلي چې امریکا دا اعلان څو ورځې وروسته له دې کوي چې د افغانستان لپاره د امریکا ځانګړي استازي زلمي خلیلزاد په قطر کې له طالبانو سره له څو میاشتې ځنډه وروسته د سولې خبرې بیا پیل کړې.

امریکا حاضردمه په افغانستان کې د ۱۲ زره او ۱۳ زره ترمنځ پوځیان لري.

این بي سي نیوز وايي چې امریکايي چارواکو ورته نه دي ویلي چې امریکا به دقیقاً کله له افغانستانه د خپلو پوځیانو ایستل پیل کړي خو ویلي یې دي چې دا کار به په څو میاشتو کې وشي.

د امریکا د سنا یوه کمېټه پر روسیې د بندیزونو په اړه بحث پیلوي

د امریکا د سنا جرګې یو پلاوی به د روسیې پر ضد د بندیزونو په اړه بحث پیل کړي.

دا بحث وروسته له هغه کېږي چې د روانې میاشتې په لومړیو کې پر یوې لانجمنې لایحې له رأی اخیستلو ډډه وشوه.

د امریکا د سنا جرګې د بهرنیو اړیکو کمېټه به پر دې لایحې چې د کریملین له یرغله د امریکا د امنیت دفاع نومېږي، بحث وکړي.

دا لایحه چې د امریکا د دواړو ګوندونو، جمهوري غوښتونکي او ډیموکرات غړیو وړاندې کړې، د نورو هیوادونو په ډیموکراتیکو پروسو کې د لاسوهنې، په سوریه کې د «ناوړه اقداماتو» او پر اوکراین د یرغل په خاطر پر روسیې د بندیزونو غوښتنه کوي.

جرمني: روسیې د چیچنیايي بېلتون پال ورسپارلو غوښتنه نه وه کړې

هیکو ماس وویل، هیچا د دغه هېواد له حکومته غوښتنه نه وه کړې چې څلوېښت کلن زیلیم خان خانګوشویلي وروسپاري.

د جرمني د بهرنیو چارو وزیر دا خبره رد کړه چې ګنې مخکې تر دې چې په دغه هېواد کې یو چیچنیايي بېلتون غوښتونکی ووژل شي، روسیې د هغه د ورسپارلو غوښتنه کړې وه.

هیکو ماس وویل، هیچا د دغه هېواد له حکومته غوښتنه نه وه کړې چې څلوېښت کلن زیلیم خان خانګوشویلي وروسپاري.

خانګوشویلي چې د اګست په ۲۳ مه نېټه په برلین کې ووژل شو، مخکې تر دې چې جرمني ته پناه یوسي د روسیې په چیچنیا جمهوریت کې له نورو بېلتون غوښتونکو سره اوږه په اوږه د روسي پوځیانو پر ضد جنګېدلی و.

د نوموړي د قتل په تور یو روسی له پېښې لږ وروسته ونیول شو او د جرمني څارنوالانو ویلي چې ممکن دا قتل د روسیې د حکومتي ادارو په امر شوی وي.

د روسیې ولسمشر ولادیمیر پوتین د روان دسمبر په نهمه په یوه خبري غونډه کې خانګوشویلي یو وژونکی وباله او ویې ویل چې مسکو د هغه د ورسپارلو غوښتنه کړې وه.

لیبیا کې د حکومت مخالف قومندان خلیفه حفتر او دولتي ځواکونو جګړه

ارشیف

د لیبیا په پلازمېنه طرابلس کې د یاغي قوماندان خلیفه حفتر او د لیبیا د حکومت د پلوي ملېشو ترمنځ سخته جګړه روانه ده.

تر دې دوې ورځې وړاندې قوماندان حفتر چې د لیبیا د ملي اردو په نوم د خپلسرو ځواکونو مشري کوي، ویلي و چې د طرابلس جګړه پیل شوې ده.

اووه میاشتې پخوا د خلیفه حفتر جنګیالیو د طرابلس په جنوب کې یو ښار نیولی و.

د حفتر په مشرۍ د لیبیا ملي اردو وايي چې د طرابلس په جنوب کې طاوغار ښار د دوی په کنټرول کې دی خو په طرابلس کې مېشت حکومت چې نړیوالې ټولنې په رسمیت پېژندلی، دا ادعا نه مني.

دې جګړو دا خطر پیدا کړی چې لیبیا په یوه بله هغسې کورنۍ جګړه کې ونښلي چې په ۲۰۱۱ میلادي کال کې د معمر قذافي د حکومت د پرځېدو سبب شوه.

د قذافي له وژل کېدو وروسته لیبیا په دوو برخو ووېشل شوه چې یوه یې په طرابلس کې د ملګروملتونو له ملاتړه برخمنه کمزورې اداره ده او بله یې د دغه هېواد ختیځه سیمه ده چې د لیبیا له ملي اردو سره تړاو لري.

اروپايي ټولنه د البانیا زلزله ځپلو سره د مرستې لپاره غونډه جوړوي

په البانیا کې تېره میاشت د شدیدې زلزلې له امله ۵۱ تنه مړه شول.

اروپايي اتحادیې ویلي چې د راتلونکي کال د جنورۍ په میاشت کې به د البانیا له زلزله ځپلو سره د مرستې او بیا رغونې لپاره د مرسته کونکو هېوادونو استازو غونډه جوړه کړي.

د اروپايي کمېسون مشرې اورسولا ون دیر لین پرون د ډسمبر په ۱۴مه وویل چې په البانیا کې د اوږدې مودې بیارغونې لپاره مرستې ته متعهد دي.

په البانیا کې تېره میاشت د شدیدې زلزلې له امله ۵۱ تنه مړه شول. دغې زلزلې چې شدت یې د رېشتر ۶ اعشاریه ۴ درجې و، ګڼ شمېر کورونه او عامه تاسیسات ویجاړ کړل.

په البانیا کې د زلزلې له امله ۱۳ زره وګړي بې کوره شوي او ۱۴ زره ودانۍ ړنګې شوې دي.

د البانیا حکومت له نړیوالې ټولنې د مالي مرستې غوښتنه کړې، څو په ۲۰۲۰ میلادي کال کې ویجاړ شوي تاسیسات ورغوي. البانیا د دې لپاره له نړیوالو ۱۱۷ ملیونه ډالر غوښتي دي.

په مزارشریف کې د قیصاري له وسله والو سره د پولیسو نښته روانه ده

پولیسو د قیصاري کور محاصره کړی دی

د بلخ پولیس وايي چې په مزارشریف ښار کې د ملي جنبش د یوه پخواني قوماندان نظام الدین قیصاري د غیرمسوولو وسله والو او امنیتي ځواکونو ترمنځ نښته روانه ده.

له مزارشریف ښاره د ازادي راډیو د خبریال د راپور له مخې، نښته تېره شپه لس بجې وروسته له دې پیل شوه چې پولیسو د قیصاري او د هغه د وسله والو کسانو د نیولو هڅه وکړه.

په دې نښته کې دواړه خواوې له درنو او سپکو وسلو کار اخلي.

تراوسه د مرګ ژوبلو په اړه معلومات نشته خو د پېښې ځای د ښار په یوه ګڼه ګوڼه ساحه کې دی.

ویل کېږي چې پولیسو غوښتل چې قیصاري او د هغه وسله وال کسان له یوه غضب شوي کوره وباسي.

شمالي کوریا د سوهي اوږد واټن ویشتونکي توغندي ساحه کې بله ازموینه کړې

شمالي کوریا د شنبې په ورځ وویل، دوی د سوهې د اوږده واټن ویشتونکیو توغندیو په ساحه کې یوه بله "مهمه ازموینه" په "بریالیتوب" ترسره کړې چې ورسره به ددې هېواد "باوري ستراتیژیکه اټمي دفاع" نوره هم پیاوړې شي.

د شمالي کوریا رهبر کیم جانګ اون تېر کال د جنوبي کوریا له ولسمشر مون جې این سره په غونډه کې منلې وه چې پیونګ یانګ کې د سوهي د ازموینو تاسیسات د اعتماد د رامنځ ته کولو په خاطر بندوي.

د شمالي کوریا د دفاعي علومو د ملي اکاډمۍ ویاند ویلي، د جمعې په ورځ یې د سوهې د سټلایټ توغولو له ډګر یو بله مهمه بریالۍ ازموینه ترسره کړې.

په دې اعلان کې دا نه ده روښانه شوې چې د جمعې په ورځ دا ازموینه د څه شي وه.

څو ورځې مخکې شمالي کوریا ویلي و یو "ډیره مهمه ازموینه" یې په دې سیمه کې ترسره کړې. هغه مهال داسې شکونه وو چې په دې ازموینه کې به فضا ته توغیدونکو سپوږمکۍ یا د لرې واټن ویشتونکیو توغندیو لپاره له نوي انجن کار اخیستل شوی وي.

شمالي کوریا چې د ټرمپ سره د درې غونډو وروسته پر دې هېواد د بندیزونو له نه لرې کیدو نهیلې شوې، خبرداری یې ورکړی چې واشنګټن دې د کال تر پای ته رسېدو مخکې د بندیزونو په برخه کې له جوړجاړي سره رامخې ته شي.

پولیسو په مزار شریف کې د نظام الدین قیصاري "کور محاصره کړی"

د جنبش اسلامي ګوند یوه پخواني قومندان نظام الدین قیصاري

د افغانستان په شمالي ولایت بلخ کې امنیتي ځواکونو د جنبش اسلامي ګوند یوه پخواني قومندان نظام الدین قیصاري کور محاصره کړی دی.

ښاغلي قیصاري ته یوې نږدې سرچینې ازادي راډیو ته وویل، د بلخ پولیسو د مزار شریف ښار په زراعت سیمه کې د هغوی یوه قرارګاه محاصره کړې او غواړي چې د ښاغلي قیصاري د کسانو له خوا رامنځته شوې امنیتي پوستې له سیمې لرې کړي.

خو د بلخ د پولیسو ویاند عادل شاه عادل وايي، د ښاغلي قیصاري وسله والو هغه کور کې امنیتي پوسته جوړه کړې وه چې په قزاقستان کې د افغانستان سفیر فرهاد عظیمي پرې حقوقي دعوا لري.

ښاغلي عادل وویل چې پولیس د موضوع د حل لپاره سیمې ته رسېدلي او دغه وسله وال یې له سیمې وتلو ته اړ کړي.

بلخ کې د عبدالله عبدالله پلوي مظاهره کوونکو د ټاکنیز روڼوالي غوښتنه وکړه

په دې مظاهره کې د اجراییه ریاست دویم مرستیال محمد محقق چې د ثبات او همپالنې د انتخاباتي ټیم غړی دی برخه درلوده.

د عبدالله عبدالله په مشرۍ د ثبات او همپالنې انتخاباتي ډلې پلویانو نن په مزار شریف ښار کې لاریون وکړ او د ولسمشرۍ د ترسره شویو انتخاباتو د نتایجو په اعلان کې یې د شفافیت غوښتنه وکړه.

لاریونوالو چې د ولسمشرۍ د کاندید عبدالله عبدالله عکسونه یې لېږدول، د انتخاباتو له کمیسونه غوښتنه کوله چې د درغلیو مخه دې ونیسي. په سیمه کې د ازادۍ راډیو خبریال وايي، لاریونوالو نن د څو ساعتونو لپاره د بلخ د پوهنتون په وړاندې سړک د ترافیکو پر مخ تړلی وو.

په دې مظاهره کې د اجراییه ریاست دویم مرستیال محمد محقق چې د ثبات او همپالنې د انتخاباتي ټیم غړی دی برخه درلوده.

ښاغلي محقق لاریونوالو ته په وینا کې له نړیوالې ټولنې وغوښتل چې د انتخاباتو په پروسه کې دې د شفافیت ملاتړ وکړي. نوموړي له انتخاباتي کمیسونونو هم غوښتنه وکړه چې پاکې او ناپاکې رایې دې سره بېلې کړي.

د ثبات او هم پالنې ټیم د انتخاباتو کمیسیون تورنوي چې هڅه کوي شا او خوا درې سوه زره هغه رایې چې دا ټیم یې تقلبي او ناسمې رایې بولي د پاکو رایو په توګه وشمیري. خو د انتخاباتو خپلواک کمیسیون په دې اداره کې د درغلیو او شفافیت د نشتوالي تورونه ردوي او وايي، دا رایې تر هغې چې څیړل شوې نه وي په یو مخ نه شې باطلولی.

په مزار شریف کې وروستی لاریون داسې مهال کیږي چې تېره شپه ښاغلي عبدالله له خپلو پلویانو وغوښتل څو په هغو اوو ولایتونو کې د رایو بیا شمېرلو اجازه ورکړي چې ددې ډلې د ملاتړو له خوا په کې د انتخاباتو سیمه ییز دفترونه تړل شوي دي.

هرات کې د ټاکنیزو شکایتونو ولایتي دفتر کې یو کارکوونکی وژل شوی

د هرات سیمه ییز چارواکي وايي، د انتخاباتي شکایتونو ولایتي دفتر مالي معتمد لطف الله حلیمي نن سهار د خپل کار په دفتر کې په ډزو وژل شوی دی.

ددغه دفتر کمیشنر ګل محمد طارق ازادي راډیو ته وویل، حلیمي د کلاشینکوف په ډزو وژل شوی دی.

د هرات د مرکزي روغتون سرطبیب محمد عارف جلالي ازادي راډیو ته وویل چې د وژل شوي کارمند جسد د دوی روغتون ته وروړل شوی دی.

د هرات د والي ویاند جیلاني فرهاد ازادي راډیو ته ویلي تر اوسه د حلیمي د قتل علت او انګېزه روښانه نه ده.

تراوسه چا د هغه د وژلو مسولیت نه دی منلی. د انتخاباتو ولایتي دفترونه په کلکو امنیتي تدابیرو ساتل کیږي او دا نه ده معلومه چې بریدګر څنګه له وسلې سره د شکایاتو کمیسون دفتر نه ننوتی دی.

دوو افغان لوبغاړو په موی تای سیالیو کې خپلو ازبکستاني سیالان مات کړل

ارشیف

د ازبکستان په پلازمېنه تاشکند کې د موی تای نړېوالو لوبو په دوام افغان لوبغاړو خپل دوه ازبکستاني سیالان مات کړل.

په دغو سیالیو کې د افغانستان، قزاقستان، تاجیکستان، او ازبکستان ورزشکاران ګډون لري چې د قوس په شلمه پيل شوي او نن (قوس ۲۳مه) پای ته رسېږي.

د افغانستان د بدني روزني ریاست د رسنیو برخې مسوول مجیب قاری زاده نن له ازادي راډيو ته وویل، د افغانستان له لوري جواد کریمی او ابراهیم هزاره هغه دوه خپل ازبکستاني سیالان یې مات کړل او پایلوبې ته یې لاره ومونده.

له افغانستانه پنځه لوبغاړي دغو بین المللي سیالیو ته ورغلي دي.

د افغانستان حکومت د حج لپاره اداري چارې او د خلکو نوم لیکنه برښنايي کوي

د افغانستان د مخابراتو او معلوماتي ټکنالوجۍ او د حج او اوقافو وزارتونو سرپرستان فهیم هاشمي او حکیم منیب.

د افغانستان د مخابراتو او معلوماتي ټکنالوجۍ او د حج او اوقافو وزارتونو سرپرستانو ترمنځ د حج د پروسې د برښنايي کېدو هوکړه لیک نن شنبې (قوس ۲۳مه) لاسلیک شو چې ورسره به دغه پروسه شفافه او ګړندۍ شي.

د افغانستان د مخابراتو او معلوماتې ټکنالوجۍ سرپرست وزیر فهیم هاشمې په کابل کې د هوکړه لیک لاسلیکولو پر وخت وویل، په دې سره به حاجیانو ته زیاتي اسانتیاوې برابرې شي.

د ښاغلي هاشمې په خبره د حج پروسې په برښنايي کېدلو سره به د حاجیانو نوم لیکنه او نورې اداري چارې په انلاین ډول ترسره کیږي.

هغه وویل: "د حج پروسې برښنايي کېدل، شفافیت او په دې برخه کې د اسانتیاوو رامنځته کېدل به له مونږ سره مرسته وکړي چې هم عدالت پلی شي او هم حاجي صاحبان د یوه کوچنې کار لپاره ادارې ته مراجعه ونه کړي."

د حج او اوقافو سرپرست وزیر عبدالحکیم منیب هم وویل، د حج پروسې په برښنايي کېدو سره به د نوم لیکنې اوږده او جنجالي پروسه اسانه او چټکه شي او ورسره به د حج په پروسه کې د شفافیت د نشتون اندېښنې هم ختمې شي.

هغه وویل: "زیارت کوونکي کولی شي چې د انټرنټ له لارې ان په خپل کور او کلي کې د حج ادا کولو لپاره خپل نومونه ولیکي."

وړاندې تردې د حج لپاره د نوملیکنې پر پیچلي بهیر خلکو سختې نیوکې درلودې او ادعا یې کوله چې له ټولو سره یوشان چلند نه کېږي.

مخکې تر دې په افغانستان کې یو شمېر نورې اداري چارې هم برښنايي شوې دي او په ځينو یې کار روان دی.

نور راوښيه

XS
SM
MD
LG