د لاسرسۍ وړ لېنکونه

تازه خبر
یکشنبه ۲۴ لیندۍ ۱۳۹۸ کابل ۰۶:۰۷

افغانستان

افغانستان او ویسټ انډیز د کرکټ لوبه کوي

اسوشیتدپرس خبري اژانس په حواله، د هند په لکنهو کې سیالي به د وېسټ انډیز لپاره اسانه نه وي.

د افغانستان د کرکټ ملي لوبډله چې راشد خان یې په سر کې دی ، سبا، د نومبر په ۲۷مه، له وېست انديز سره ټیسټ لوبه لري.

اسوشیتدپرس خبري اژانس په حواله، د هند په لکنهو کې سیالي به د وېسټ انډیز لپاره اسانه نه وي.

وېسټ انډیز که څه هم په دریو ورځنیو سیالیو کې افغانستان ته ماته ورکړه خو افغانستان بېرته ځان را ټول کړ.

افغانستان په شل اوره سیالیو کې يې یوازې یوه وبایلله او دوه سیالۍ یې له ویست اندیزه وګټلې.

د افغانستان او ویسټ انډیز ترمنځ ټسټ مچ به ډېر مینه وال په لوبغالي کې او د هند له سپورټي ټلوېزوني چینلونو وګوري.

د ورځې تازه خبرونه دلته ولولئ

خوست کې د ښځو لپاره تعلیمي او روغتیايي امکانات ډېر شوي

ارشیف

په خوست کې د ښځو د حقونو یوشمېر فعالانې وايي چې په هغه ولایت کې د ښځو لپاره تعلیمي او روغتیايي امکانات زیات شوي دي.

په خوست ښار کې پرون د ښځو د حقونو یوشمېر فعالانو د ملګرو ملتونو د بشري حقونو د نړیوال منشور د اعلان د کلیزي په مناسبت په غونډه کې په خپل ولایت کې د ښځو لپاره پر امکاناتو او ستونزو خبرې وکړې.

د خوست د ښځو ریاست مشرې، شافعه نورزۍ ازادي راډیو ته وویل: "خوشبختانه، په خوست کې ورځ تر بلې د ښځو د بشري حقونو وضعیت ښه کېږي. د ښځو تعلیم زیات شوی او ډېرې ښځې حتی د کارونو غوښتونکې دي."

د خوست د ښځو چارو رئیسې ازادي راډیو ته وویل چې په خوست کې د ښځو د حقونو په اړه د خلکو د معلوماتو سطحه د پخوا په پرتله لوړه شوې ده.

یوشمېر فعالانو ازادي راډیو ته وویل چې په خوست کې د هغو نارینه و شمېر زیات شوی چې د ښځو انساني حقونه مني او درناوی ورته کوي.

'امریکا غواړي روانه اونۍ له افغانستانه د ۴ زره سرتېرو ویستلو اعلان وکړي'

امریکا حاضردمه په افغانستان کې د ۱۲ زره او ۱۳ زره ترمنځ پوځیان لري.

یوه امریکايي رسنۍ وايي، د ټرمپ اداره غواړي چې روانه اوونۍ له افغانستان څخه د څه باندې ۴ زره امریکايي پوځیانو د ایستلو اعلان وکړي.

د دغو ځواکونو له ایستلو وروسته به په افغانستان کې د ۸ زره او ۹ زره ترمنځ امریکايي پوځیان پاتې شي.

این بي سي نیوز تلویزیون د بې نومو امریکايي چارواکو په قول همداراز ویلي چې امریکا دا اعلان څو ورځې وروسته له دې کوي چې د افغانستان لپاره د امریکا ځانګړي استازي زلمي خلیلزاد په قطر کې له طالبانو سره له څو میاشتې ځنډه وروسته د سولې خبرې بیا پیل کړې.

امریکا حاضردمه په افغانستان کې د ۱۲ زره او ۱۳ زره ترمنځ پوځیان لري.

این بي سي نیوز وايي چې امریکايي چارواکو ورته نه دي ویلي چې امریکا به دقیقاً کله له افغانستانه د خپلو پوځیانو ایستل پیل کړي خو ویلي یې دي چې دا کار به په څو میاشتو کې وشي.

په مزارشریف کې د قیصاري له وسله والو سره د پولیسو نښته روانه ده

پولیسو د قیصاري کور محاصره کړی دی

د بلخ پولیس وايي چې په مزارشریف ښار کې د ملي جنبش د یوه پخواني قوماندان نظام الدین قیصاري د غیرمسوولو وسله والو او امنیتي ځواکونو ترمنځ نښته روانه ده.

له مزارشریف ښاره د ازادي راډیو د خبریال د راپور له مخې، نښته تېره شپه لس بجې وروسته له دې پیل شوه چې پولیسو د قیصاري او د هغه د وسله والو کسانو د نیولو هڅه وکړه.

په دې نښته کې دواړه خواوې له درنو او سپکو وسلو کار اخلي.

تراوسه د مرګ ژوبلو په اړه معلومات نشته خو د پېښې ځای د ښار په یوه ګڼه ګوڼه ساحه کې دی.

ویل کېږي چې پولیسو غوښتل چې قیصاري او د هغه وسله وال کسان له یوه غضب شوي کوره وباسي.

پولیسو په مزار شریف کې د نظام الدین قیصاري "کور محاصره کړی"

د جنبش اسلامي ګوند یوه پخواني قومندان نظام الدین قیصاري

د افغانستان په شمالي ولایت بلخ کې امنیتي ځواکونو د جنبش اسلامي ګوند یوه پخواني قومندان نظام الدین قیصاري کور محاصره کړی دی.

ښاغلي قیصاري ته یوې نږدې سرچینې ازادي راډیو ته وویل، د بلخ پولیسو د مزار شریف ښار په زراعت سیمه کې د هغوی یوه قرارګاه محاصره کړې او غواړي چې د ښاغلي قیصاري د کسانو له خوا رامنځته شوې امنیتي پوستې له سیمې لرې کړي.

خو د بلخ د پولیسو ویاند عادل شاه عادل وايي، د ښاغلي قیصاري وسله والو هغه کور کې امنیتي پوسته جوړه کړې وه چې په قزاقستان کې د افغانستان سفیر فرهاد عظیمي پرې حقوقي دعوا لري.

ښاغلي عادل وویل چې پولیس د موضوع د حل لپاره سیمې ته رسېدلي او دغه وسله وال یې له سیمې وتلو ته اړ کړي.

بلخ کې د عبدالله عبدالله پلوي مظاهره کوونکو د ټاکنیز روڼوالي غوښتنه وکړه

په دې مظاهره کې د اجراییه ریاست دویم مرستیال محمد محقق چې د ثبات او همپالنې د انتخاباتي ټیم غړی دی برخه درلوده.

د عبدالله عبدالله په مشرۍ د ثبات او همپالنې انتخاباتي ډلې پلویانو نن په مزار شریف ښار کې لاریون وکړ او د ولسمشرۍ د ترسره شویو انتخاباتو د نتایجو په اعلان کې یې د شفافیت غوښتنه وکړه.

لاریونوالو چې د ولسمشرۍ د کاندید عبدالله عبدالله عکسونه یې لېږدول، د انتخاباتو له کمیسونه غوښتنه کوله چې د درغلیو مخه دې ونیسي. په سیمه کې د ازادۍ راډیو خبریال وايي، لاریونوالو نن د څو ساعتونو لپاره د بلخ د پوهنتون په وړاندې سړک د ترافیکو پر مخ تړلی وو.

په دې مظاهره کې د اجراییه ریاست دویم مرستیال محمد محقق چې د ثبات او همپالنې د انتخاباتي ټیم غړی دی برخه درلوده.

ښاغلي محقق لاریونوالو ته په وینا کې له نړیوالې ټولنې وغوښتل چې د انتخاباتو په پروسه کې دې د شفافیت ملاتړ وکړي. نوموړي له انتخاباتي کمیسونونو هم غوښتنه وکړه چې پاکې او ناپاکې رایې دې سره بېلې کړي.

د ثبات او هم پالنې ټیم د انتخاباتو کمیسیون تورنوي چې هڅه کوي شا او خوا درې سوه زره هغه رایې چې دا ټیم یې تقلبي او ناسمې رایې بولي د پاکو رایو په توګه وشمیري. خو د انتخاباتو خپلواک کمیسیون په دې اداره کې د درغلیو او شفافیت د نشتوالي تورونه ردوي او وايي، دا رایې تر هغې چې څیړل شوې نه وي په یو مخ نه شې باطلولی.

په مزار شریف کې وروستی لاریون داسې مهال کیږي چې تېره شپه ښاغلي عبدالله له خپلو پلویانو وغوښتل څو په هغو اوو ولایتونو کې د رایو بیا شمېرلو اجازه ورکړي چې ددې ډلې د ملاتړو له خوا په کې د انتخاباتو سیمه ییز دفترونه تړل شوي دي.

هرات کې د ټاکنیزو شکایتونو ولایتي دفتر کې یو کارکوونکی وژل شوی

د هرات سیمه ییز چارواکي وايي، د انتخاباتي شکایتونو ولایتي دفتر مالي معتمد لطف الله حلیمي نن سهار د خپل کار په دفتر کې په ډزو وژل شوی دی.

ددغه دفتر کمیشنر ګل محمد طارق ازادي راډیو ته وویل، حلیمي د کلاشینکوف په ډزو وژل شوی دی.

د هرات د مرکزي روغتون سرطبیب محمد عارف جلالي ازادي راډیو ته وویل چې د وژل شوي کارمند جسد د دوی روغتون ته وروړل شوی دی.

د هرات د والي ویاند جیلاني فرهاد ازادي راډیو ته ویلي تر اوسه د حلیمي د قتل علت او انګېزه روښانه نه ده.

تراوسه چا د هغه د وژلو مسولیت نه دی منلی. د انتخاباتو ولایتي دفترونه په کلکو امنیتي تدابیرو ساتل کیږي او دا نه ده معلومه چې بریدګر څنګه له وسلې سره د شکایاتو کمیسون دفتر نه ننوتی دی.

د افغانستان حکومت د حج لپاره اداري چارې او د خلکو نوم لیکنه برښنايي کوي

د افغانستان د مخابراتو او معلوماتي ټکنالوجۍ او د حج او اوقافو وزارتونو سرپرستان فهیم هاشمي او حکیم منیب.

د افغانستان د مخابراتو او معلوماتي ټکنالوجۍ او د حج او اوقافو وزارتونو سرپرستانو ترمنځ د حج د پروسې د برښنايي کېدو هوکړه لیک نن شنبې (قوس ۲۳مه) لاسلیک شو چې ورسره به دغه پروسه شفافه او ګړندۍ شي.

د افغانستان د مخابراتو او معلوماتې ټکنالوجۍ سرپرست وزیر فهیم هاشمې په کابل کې د هوکړه لیک لاسلیکولو پر وخت وویل، په دې سره به حاجیانو ته زیاتي اسانتیاوې برابرې شي.

د ښاغلي هاشمې په خبره د حج پروسې په برښنايي کېدلو سره به د حاجیانو نوم لیکنه او نورې اداري چارې په انلاین ډول ترسره کیږي.

هغه وویل: "د حج پروسې برښنايي کېدل، شفافیت او په دې برخه کې د اسانتیاوو رامنځته کېدل به له مونږ سره مرسته وکړي چې هم عدالت پلی شي او هم حاجي صاحبان د یوه کوچنې کار لپاره ادارې ته مراجعه ونه کړي."

د حج او اوقافو سرپرست وزیر عبدالحکیم منیب هم وویل، د حج پروسې په برښنايي کېدو سره به د نوم لیکنې اوږده او جنجالي پروسه اسانه او چټکه شي او ورسره به د حج په پروسه کې د شفافیت د نشتون اندېښنې هم ختمې شي.

هغه وویل: "زیارت کوونکي کولی شي چې د انټرنټ له لارې ان په خپل کور او کلي کې د حج ادا کولو لپاره خپل نومونه ولیکي."

وړاندې تردې د حج لپاره د نوملیکنې پر پیچلي بهیر خلکو سختې نیوکې درلودې او ادعا یې کوله چې له ټولو سره یوشان چلند نه کېږي.

مخکې تر دې په افغانستان کې یو شمېر نورې اداري چارې هم برښنايي شوې دي او په ځينو یې کار روان دی.

د نغلو برښنا بند څلورم توربین له ۱۲ کلن ځنډ ورسته بیا فعال شو

د برښنا شرکت د معلوماتو پر بنسټ، دا مهال په ۲۴ ساعتونو کې د نغلو بند ټول څلور توربینه ۱۰۰ میګاواټه برېښنا تولیدوي.

د افغانستان برېښنا شرکت مسوولین وايي، د دغه توربین په فعالېدلو سره د هېواد د برښنا په شبکو ۲۵ میګاواټه برېښنا نوره ورزیاته شوه.

د دغه شرکت ویاند وحید الله توحیدي نن ازادي راډیو ته وویل چې په دې سره پنځه زره کورنۍ له برېښنا څخه برخمنې شي.

هغه وویل: "په نغلو بند کې یو توربین په ۲۵ میګاواټه ظرفیت سره د نړیوال بانک په مالي ملاتړ او او د برښنا شرکت د کارکوونکو له خوا یو توربین بیا فعاله او ګټې اخیستنې ته وسپارل شو."

د ښاغلي توحیدي په وینا، د دې توربین په رغولو د نړیوال بانک ۳،۵ ملیونه دالر لګښت راغلی دی.

ښاغلي توحیدي دغه شان وايي، دغه شان د برښنا د دې توربین تر څنګ په سروبي ولسوالۍ کې یو سب سټیشن هم ګټه اخیستنې ته وسپارل شو چې په خبره یې ۲۷ کلیو ته برښنا ورکوي.

د برښنا شرکت د معلوماتو پر بنسټ، دا مهال په ۲۴ ساعتونو کې د نغلو بند ټول څلور توربینه ۱۰۰ میګاواټه برېښنا تولیدوي.

د غزني په قره باغ ولسوالۍ کې د محلي اردو ۲۳ سرتېري وژل شوي

د غزني ولایت په قره باغ ولسوالۍ کې د سیمه ییزې اردو ۲۳ سرتېرې وژل شوي او ۹ تنه نور له وسله والو طالبانو سره تللي دي.

د غزني ولایتي شورا مرستیال امان الله کامراني د شنبې په ورځ ازادي راډیو ته وویل، تیره شپه د قره باغ ولسوالۍ په لیونۍ بازار سیمه کې د سیمه ییزې اردو په بیس کې ۲۳ تنه سرتیرې وژل شوي او ۹ تنه نور له وسله والو سره تللي دي.

دی وايي د یوه ټانګ ترڅنګ د بیس ټول تجهیزات هم وسله والو ته تسلیم کړل شوي دي.

کامراني زیاتوي داسې انګېرل کیږي چې دغه ۹ تنه نفوذي کسان وو.

د غزني محلي اداره په دې اړه له څه ویلو څخه ډډه کوي.

د طالبانو ویاند ذبیح الله مجاهد ویلي چې ددوي وسله والو تېره شپه د محلي اردو پر قرارګاه برید کړی او ۳۲ سرتېري یې وژلي دي.

د بدخشان په مایمي ولسوالۍ کې ناروغ واورین پړانګ مړ شو

دغه پړانګ د هوا تر سړېدو او درنې واورې اورېدو وروسته له غرونو يوه کلي ته تللى و.

د بدخشان په مايمي ولسوالۍ يو کمیابه واورین پړانګ چې سخت ناروغ و، پرون مړ شو.

دغه پړانګ د هوا تر سړېدو او درنې واورې اورېدو وروسته له غرونو يوه کلي ته تللى و.

د بدخشان والي محمد ذکريا سودا تېره شپه ازادۍ راډيو ته وويل، دوى په تمه وو چې د بدخشان مرکز ته د پړانګ د انتقال لپاره هوا صافه شي.

"هوا ورېځ وه، د بدخشان مرکز ته يې د انتقال امکان نه و، ځکه نو مړ شو. موږ په پام کې درلوده نن شنبه د هوا له ښه کېدو سره دغه پړانګ د بدخشان مرکز ته راولېږدوو."

تېر کال بيا د بدخشان په زېباک ولسوالۍ کې يو واورين پړانګ چې نسل يې په ورکېدو دى، د يوه غيرمسوول وسلوال له خوا ووژل شو. پړانګ وروسته له هغې ووژل شو چې لومړى يې د خلکو پر څارويو حمله وکړه.

د سولې ولسي حرکت نن هرات ته رسېږي

د سولې ولسي حرکت غړي نن هرات ولايت ته رسېږي او هلته به هم له خلکو د سولې غوښتنه وکړي.

د دغه حرکت وياند بسم الله وطندوست نن شنبه ازادۍ راډيو ته وويل، دوى پرون د نيمروز په دلارام ولسوالۍ کې هم لاريون وکړ.

"پرون جمعه دوى دلارام ته په رسېدو سره په بازار کې لاريون وکړ. هلته يې له ولسونو وغوښتل چې نور بايد د جګړې په وړاندې چوپ پاتې نه شي. نن شنبه چې هرات ته رسېږي، پر لويه لار چې کومې سيمې پرتې دي لکه شينډنډ، ادرسکن او فراه رود، په هغو سيمو کې به هم لاريون وکړي او وروسته به هرات ښار ته داخلېږي."

د سولې ولسي حرکت ټولو ٣٤ ولايتونو ته خپل سفر تېره سې شنبه له هلمنده پيل کړ.

د دغه حرکت غړو تېر کال له هلمنده تر کابل او بيا تر بلخ ولايت پورې د سولې له پاره پلى مزل وکړ.

د حرکت غړي به اوس تر هرات وروسته بادغيس، غور او نورو ولايتونو ته ورځي.

د سولې ولسي حرکت څه باندې يونيم کال مخکې په هلمند کې تر يوې چاودنې وروسته پيل شو. په هغه چاودنه کې ګڼو کسانو ته مرګ ژوبله اوښتې وه.

د کونړ مناګي برښنا بند څو ورځو کې پرانستل کېږي

ارشیف

د کونړ چارواکي وايي د مناګي د برښنا بند د رغونې چارې بشپړې شوي او په څو ورځو کې به رسماً پرانيستل شي.

د کونړ د والي مرستيال ګل محمد بيدار پرون جمعه ازادۍ راډيو ته وويل، پر پېچ سيند د جوړ شوي دغه بند د ازمېښت مرحله پاتې ده.

هغه وویل: "د مناګي د برېښنا بند چې درې نيم ميګاواټه برښنا تولیدوي، شپږ کاله يې وخت ونيوه، اوس يې کار کاملاً خلاص دى او يوازې د ټيسټ مرحله يې پاتې ده. په راروانو ١٥- ٢٠ ورځو کې به يې افتتاح کوو. که خداى کول برښنا به د کونړ مرکز او ولسواليو ته ورسېږي".

د افغانستان حکومت په ٢٠١٣ میلادي کال کې ويلي وو چې د مناګي بند به د لسو مليونو امريکايي دالرو په ارزښت په څلورو کلونو کې جوړ شي.

د کونړ د والي مرستيال وايي، پر کونړ سيند د څاګي په نوم د بل بند سروې او ډيزاين هم چې ٣٥٠ ميګاواټه برېښنا به توليدوي، په څه باندې يوه کال کې بشپړ شي.

غزني کې د سړک غاړې ماین چاودنې ۱۰ ولسي وګړي وژلي

په غزني کې د ملکي وګړو پر یوه موټر د ماین د چاودنې په پېښه کې ۱۶ ملکي وګړو ته مرګ ژوبله اوښتې ده.

د غزني د والي ویاند عارف نوري نن آزادۍ راډیو ته وویل، دا کسان په یوه فلاینګ کوچ موټر کې له دایکندي ولایت څخه غزني ته راتلل چې د جغتو-غزني پر لاره د طالبانو له خوا اېښودل شوی ماین پرې وچاودېد.

هغه وویل: "۱۰ ملکي وګړي د ۴ ښځو او یوه ماشوم په ګډون شهیدان شوي او شپږ تنه نور ملکیان د درېیو مېرمنو په ګډون ټپیان شوي چې دمګړۍ د غزني په ملکي روغتون کې تر علاج لاندې دي."

پرون د ننګرهار ولایت د خوږیاڼیو ولسوالۍ په کرم خېلو سیمه کې هم د یوه ماین په چاودنه کې چې چارواکي وايي، طالبانو ځای پرځای کړی و، یو ماشوم ووژل شو او څلور تنه نور ملکي وګړي ټپیان شول.

زلمی خلیلزاد د افغانستان د سولې په تړاو خبرو لپاره اسلام اباد ته تللی

د افغانستان د سولې لپاره د امریکا ځانګړی استازی زلمی خلیلزاد اسلام اباد ته تللی او د پاکستان د بهرنیو چارو له وزیر شاه محمود قریشي سره یې د افغانستان د سولې پر هڅو خبرې کړې دي.

د پاکستان د بهرنیو چارو وزارت د خبرپاڼې له مخې ښاغلي قریشي ویلي چې پاکستان به د افغانستان د سولې هڅو تسهیل ته دوام ورکړي.

خلیلزاد وروسته له هغه اسلام اباد ته سفر کوي چې تېره ورځ امریکايي استازو په قطر کې له طالبانو سره خبرې د لنډې مودې لپاره ودرولې.

دا خبرې وروسته له هغه ودرېدې چې طالبانو په بګرام کې د طالبانو پر پوځي اډې برید وکړ.

د افغانستان حکومت د تلې ۲۹مه د ازبکي ژبې ملي ورځ ونوموله

د افغانستان حکومت د تلې ۲۹ مه نېټه رسما د ازبکي ژبې د ملي ورځې په توګه نومولې ده.

جمهوري ریاست په یوه خبرپاڼه کې چې پرون خپره شوه ویلي چې ولسمشر اشرف غني پرون پنجشنبې له یوشمېر ازبک فرهنګیانو او د فرهنګي او ټولنیزو بنسټونو له مشرانو سره په کتنه کې په کلیزه کې د دې ورځې د نومولو او د ازبکي او ترکمني ژبو د مرکز د پرانیستو وړاندیز منظور وکړ.

د زنان راه ابریشم د فرهنګي مرکز مشرې فوزیې آرال حبیبي چې په پرونۍ غونډه کې حاضره وه آزادۍ راډیو ته وویل:

"لومړی وړاندیز، د هېواد په کلیزه کې د تلې ۲۹مه د ازبکي ژبې د ورځې نومول او دوهم وړاندیز په کابل کې د ازبکي او ترکمني ژبې د یوه مرکز پرانیستل، د ولسمشر له خوا منظور شول."

د افغانستان د اساسي قانون له مخې ازبکي، ترکمني، بلوچي، پشه يي، نورستاني پامیري او یوشمېر نورې د افغانستان رایجې ژبې او پښتو او دري رسمي ژبې بلل شوې دي.

نور راوښيه

XS
SM
MD
LG