د لاسرسۍ وړ لېنکونه

تازه خبر
سه شنبه ۲ زمری ۱۴۰۳ کابل ۱۰:۰۵

افغانستان

سوداګرۍ خونې له بهره د کبانو پر وارداتو د بندیز غوښته وکړه

کندز کې د کبانو فارم
کندز کې د کبانو فارم

په کندز کې د سوداګرۍ او پانګونۍ خونه له حکومته غواړي چې د بهرنیو کبانو پر وارداتو بندیز ولګوي.

د دې ادارې ویاند، مسعود وحدت پرون، د نومبر په ۲۲مه ، ازادي راډیو ته وویل چې د بهرنیو کبانو پر وارداتو بندیز به کورنیو فارمونو ته د ودې زمینه برابره کړي.

د کبانو د فارمونو جوړونکي وايي چې په کور هم د کبانو د خرڅلاو لپاره مناسب بازارونو لار نه لري.

د کندز په امام صاحب ولسوالۍ کې د کبانو یوه پالونکي، محمد طاهر ازادي راډیو ته ویلي چې د کبانو دساتنې لپاره د اوبو زخیرې هم کمې دي.

محمدطاهر زیاته کړه: "ما شپږ جریبه ځمکه فارم کړی او ۱۵ زره کبان لرم خو اوبه نشته او بازار هم خراب دی نو له لویې ستونزې سره مخامخ یو."

د رپوټونو په حواله، په کندز کې د روزنې ۱۳۰ فارمونه فعال شوي دي.

د ورځې تازه خبرونه دلته ولولئ

د طالبانو حکومت د کار لومړی ملي کنفرانس جوړ کړی

يو شمېر طالب مشران، انځور - ارشيف
يو شمېر طالب مشران، انځور - ارشيف

داسې مهال چې په افغانستان کې ښځې په اکثر دولتي ادارو کې د کار له حق څخه بې‌برخې شوي، د طالبانو د حکومت د کار او ټولنیزو چارو وزارت د کار لومړی ملي کنفرانس جوړ کړی.

په‌دې کنفرانس کې چې نن په کابل کې پرانیستل شو د سرپرست حکومت یوشمېر چارواکو او د خصوصي سکتور او یوشمېر نړیوالو موسسو استازي ګډون لري.

د کار او ټولنیزو چارو وزارت وايي، په‌دې کنفرانس کې به د بې روزګارۍ او خلکو ته د کاري فرصتونو د جوړولو د تګ‌لارو په اړه بحث وشي.

پر افغانستان د طالبانو له واکنمېدو وروسته نه یوازې ښځو ته په ډېری دولتي او نړیوالو موسسو کې د کار اجازه نه‌شته، بلکې نارینه هم له بې روزګارۍ څخه شکایتونه کوي.

سي‌پي‌جی: د طالبانو حکومت دې افغان ژورنالېست رحیم سعیدي له بنده خوشې کړي

US-NOBEL-JOURNALISM
US-NOBEL-JOURNALISM

د خبریالانو د خوندیتوب کمېټې "CPJ" د طالبانو پر سرپرست حکومت غږ کړی چې افغان ژورنالېست رحیم سعیدي ژر تر ژره له بنده خوشې کړي.

"CPJ" په یوه بیان کې د سعیدي د یوه پخواني همکار له قوله لیکي، نوموړی ژورنالېست چې د انار میډیا په نوم د یوټیوب چینل چلوونکی دی، د جولای په ۱۴مه له خپل خبریال زوی سیدوارث سعیدي او د حسیب په نوم له فلم اخیستونکي سره یوځای د طالبانو د استخباراتو له‌خوا نیول شوی دی.

د بیان له‌مخې حسیب او د سعیدي زوی له دوو ورځو وروسته خوشې شول خو رحیم سعیدي لاهم په نامعلوم ځای کې ساتل کېږي.

"CPJ" وايي، د طالبانو استخبارات باید سعیدي سمدستي او بې له کوم شرطه خوشې او په افغانستان کې د خبریالانو ځپل بند کړي.

د طالبانو حکومت تراوسه د سعیدي د نیولو په اړه څه نه‌دي ویلي.

متیو مېلر: متحده‌ایالتونه له طالبانو سره مرسته نه‌کوي

د امریکا د بهرنیو چارو وزارت ویاند متیو مېلر
د امریکا د بهرنیو چارو وزارت ویاند متیو مېلر

د امریکا د بهرنیو چارو وزارت ویاند متیو مېلر وایي، متحده‌ایالتونه له طالبانو سره مرسته نه‌کوي.

مېلر دغه څرګندونې پرون دوشنبه په خپل خبري کنفرانس کې د یوه خبریال د هغې پوښتنې په ځواب کې وکړې چې، ګواکې له افغانستان سره د امریکا له بشري مرستو طالبان هم مستفید کېږي.

پخوا تر دې سیګار، یا په افغانستان کې د امریکا پر مرستو د څار ادارې اندېښنه ښودلې وه، چې د امریکا د بشري مرستو یوه برخه طالبانو ته هم رسیږي.

سیګار تېره اوونۍ په یوه راپور کې وویل، د امریکا د بهرنیو چارو وزارت دوو څانګو په افغانستان کې بشري ادارو ته ورکړل شوې مرستې د خپلې تګ‌لارې خلاف، نه‌دي ارزولي او د راپور له‌مخې داسې بریښي چې ممکن ۲۹۳ میلیونه ډالر سخت‌دریځو ته رسېدلي وي.

سیګار ویلي و، طالبانو د امریکا د مرستو د جلب لپاره د بشري ادارو د جوړېدو په ګډون ګڼ تاکتیکونه کارولي دي.

د طالبانو حکومت تر اوسه د سیګار پر راپور تبصره نه‌ده کړې.

له کله چې طالبان د ۲۰۲۱ کال په اوړي کې واک ته رسېدلي، امریکا له افغانستان سره په بشري برخه کې سترمرسته کوونکی پاتې شوی او د سیګار د راپور له‌مخې نژدې درې میلیارده ډالره یې افغانستان ته لېږلي دي.

کرکټ بورډ: ای‌سي‌سي د افغانستان ملي لوبډله وستایله

ای سي سي د افغانستان ملي لوبډله وستایله
ای سي سي د افغانستان ملي لوبډله وستایله

د افغانستان کرکټ بورډ ادارې ویلي، د کرکټ نړیوالې شورا "ای‌سي‌سي" په وروستي نړیوال جام کې د افغانستان ملي لوبډلې سیالۍ ستایلي دي.

د دوشنبې په ورځ د جولای په ۲۲مه نېټه د کرکټ بورډ په خپاره شوي خبر کې ویل شوي دي، د ای‌سي‌سي په کلنۍ غونډه کې چې په سریلانکا هېواد کې ترسره شوه د نورو کرکټ ادارو د مشرانو ترڅنګ په‌کې د دې ادارې مشرتابه هم ګډون کړی و.

خبر زیاتوي: "په یاده ناسته کې د کرکټ نړیوالې شورا مشرتابه او ټولو غړیو هېوادونو له لوري په نړیوال جام کې د افغان لوبډلې د وروستیو لاسته راړنو ستاینه وشوه."

دغه راز په خبر کې راغلي دي چې، افغان لوري د سویلي افریقا، نیوزیلینډ او ویسټ اینډیز د کرکټ له مسولینو سره تر چمپینز ټراپۍ وړاندې د لوبلړیو د ترسره کولو خبرې هم کړې دي.

په‌دې خبر کې د سریلانکا او بنګله‌دېش له الف او پاکستان او متحده‌عربي اماراتو سره د نوولس کلنو ځوانانو په لوبلړیو هم خبرې شوې دي.

د ویلو ده چې د یادې ناستې بشپړ جزیات لا د کرکټ نړیوالې شورا له رسنیو سره نه‌دي شریک کړي.

پاکستان د يو بل کال لپاره د راجستر شويو افغان کډوالو د اوسېدو موده رسماً تصويب کړه

د پاکستان حکومت د یوه بل کال لپاره د افغان راجستر شویو کډوالو د اوسېدو د مودې د غځولو پرېکړه رسماً تصویب کړه.

د پاکستان د حکومت په خبرتیا کې چې د ازادي راډیو خبریال ته هم رسېدلې ویل شوي، د فدرال کابینې د پرېکړې په دوام دوی د ۲۰۲۵ کال د جون تر ۳۰مې د راجستر افغان کډوالو د اوسېدو موده غځوي.

پاکستان کې یو میلیون او درې سوه زره افغانان راجستر کارټونه لري، اته لکه نور کډوال بیا د افغان تابعیت کارتونه لري.

د پاکستان د حکومت د ادعا پر اساس څه باندې یو میلیون نور افغان کډوال هلته ناقانونه اوسیږي چې دوی یې ایستلو ته ژمن دي.

پاکستان د تېر کال له نومبر راهیسې شاوخوا شپږ نیم لکه افغانان له خپلې خاورې ایستلي دي.

بدخشان کې د پسانو رمه له غره لوېدلې او تلف شوې ده

په بدخشان کې د پسانو رمه چې شمېر یې یو نیم زرو ته رسېده له غره لوېدلې او تلف شوې ده.

بدخشان کې د طالبانو د اطلاعاتو او فرهنګ رییس ذبیح‌الله امیري ویلي چې، پېښه په نسی ولسوالۍ اړوند یوې غرنۍ سیمه کې شوې.

امیري ویلي دا یو نیم زر پسونه له یوه ۴۰۰ متري غره لاندې لویدلي او څښتنانو ته یې ټول ټال ۲۰ میلیونه افغانۍ تاوان اوښتی.

اټکل کېږي چې رمه به د شپې تیاره کې د لېوانو له لاسه تورېدلي وي او د تښتې په وخت له غره لاندې لوېدلې.

یوه ترکۍ موسسه له کابل ښاروالۍ سره د هوايي پلونو د ډیزاین په برخه کې همکاري کوي

د ترکيې ملي بيرغ
د ترکيې ملي بيرغ

یوه ترکۍ موسسه له کابل ښاروالۍ سره د هوايي پلونو د ډیزاین په برخه کې همکاري کوي.

د طالبانو ترکنټرول لاندې باختر اژانس د دوشنبې په ورځ خبر ورکړ چې، د کابل ښاروالۍ معین ډاکټر صدرالدین تاجک د ترکیې د تیکا موسسې له مشر فضل آکین اردوغان سره په کابل کې د هوايي پلونو د طرحې او پراختیايي پروګرامونو په اړه خبرې کړي.

دغه هوايي پلونه د ښار له ګڼې ګوڼې ډکو سیمو کې د خلکو لپاره د اسانتیا او د ترافیکي پېښو د مخنیوي په هدف جوړیږي.

اوچا: افغانستان کې د ماينونو قربانيان تر ډېره ماشومان دي

ارشیف: د پروان په غوربند کې دغه ماشوم د ناچاوده توکو د چاودنې له کبله خپله پښه له لاسه ورکړې ده.
ارشیف: د پروان په غوربند کې دغه ماشوم د ناچاوده توکو د چاودنې له کبله خپله پښه له لاسه ورکړې ده.

ملګري ملتونه وايي، د روان کال په لومړیو شپږو میاشتو کې په افغانستان کې ۲۹۲ کسانو ته د ماینونو او مهماتو په چاودنو کې مرګ‌ژوبله رسېدلې.

د ملګرو ملتونو د بشري چارو د همغږۍ دفتر "OCHA" په یوه راپور کې زیاته کړې چې د قربانیانو ۸۸ فیصده ماشومان دي.

له‌دې ډلې د راپور له‌مخې ۵۵ فیصده د لوبو پر مهال او ۱۵سلنه یې د اوسپنې د راټولولو پر مهال مړه او ټپیان شوي.

کابل، ننګرهار، هرات، غزني او کندهار د ماینونو د چاودنې له لحاظه تر ټولو زیان منونکي ولایتونه پېژندل شوي دي.

کابل کې د روسيې سفير: افغانستان سره پر افغانيو او روبل راکړه ورکړه کوو

د افغانستان لپاره د روسیې سفیر دیمیتري ژیرنوف
د افغانستان لپاره د روسیې سفیر دیمیتري ژیرنوف

په کابل کې د روسیې سفیر وايي چې، د امریکاله بندیزونو سره د مقابلې لپاره له افغانستان سره پر افغانۍ او روبل راکړه ورکړه کوي.

دیمیتري ژیرنوف پرون (یک‌شنبې) تاس خبري اژانس ته وویل، د افغانستان او روسیې ترمنځ سوداګري راکړه ورکړه په غوړېدو ده.

ده زیاته کړه، روسیه او افغانستان له بندیزونو سره مخامخ دي او په راکړه ورکړه کې له ډالرو څخه کار نه اخیستل یو انتخاب دی.

یوې زلزلې نن تر غرمې مخکې د افغانستان شمال ختیځ ولایتونه ولړزول

یوې زلزلې چې شدت یې د ریښتر په کچه ۴ اعشاریه ۶ درجې و، نن تر غرمې مخکې د افغانستان شمال ختیځ ولایتونه ولړزول.

د امریکا د جیالوژیکي سروې د راپور له‌مخې، د دې زلزلې مرکز د تخار ولایت په فرخار ولسوالي کې تر ځمکې ۲۰۶ کیلومتره لاندې و.

تر اوسه پورې د دې زلزلې له کبله د احتمالي مرګ‌ژوبلواو تاوانونو په اړه څه نه‌دي ویل شوي.

نور راوښيه

XS
SM
MD
LG