د لاسرسۍ وړ لېنکونه

تازه خبر
پنجشنبه ۲۱ لیندۍ ۱۳۹۸ کابل ۰۵:۴۲

افغانستان

طالبان: خوندي ځای ته د طالب بندیانو رسېدو پورې برمته استادان نه‌خوشې کوو

ذبیح‌الله مجاهد چې ځان د طالبانو ویاند بولي ازادي راډیو ته په یوه استولي پیغام کې دا خبره کړې ده.

طالبان وایي تر هغه به د افغانستان-امریکايي پوهنتون دوه تښتول شوي استادان خوشې نه‌کړي چې انس حقاني او دوه نور طالبان چې پرون‌یې د افغانستان حکومت د خوشې کولو اعلان وکړ، یوه خوندي ځای ته انتقال شوي نه‌وي.

ذبیح‌الله مجاهد چې ځان د طالبانو ویاند بولي نن (عقرب ۲۲مه) ازادي راډیو ته په یوه استولي پیغام کې دا خبره کړې ده.

ولسمشر محمد اشرف غني پرون د امریکايي پوهنتون د دغو استادانو د خوشې کولو په بدل کې له بګرام زندان څخه د انس حقاني او د طالبانو ډلې دوو نورو غړو عبدالرشید عمري او مالي خان د ازادولو اعلان وکړ.

ښاغلي غني وویل، دغه پرېکړه‌یې له نړیوالو شریکانو او په ځانګړې توګه له امریکا سره په مشوره او له طالبانو سره د سولې مخامخ خبرو پیلېدو په هدف کړې ده.

تر اوسه څرګنده نه‌ده چې د طالبانو دغه بندیان اوس چېرته دي، خو تېره ورځ یوې سرچینې چې نه‌یې غوښتل نوم‌یې واخیستل شي، ازادي راډیو ته وویل چې دا کسان د بګرام له زندان څخه لېږدول شوي دي.​

د ورځې تازه خبرونه دلته ولولئ

ننګرهار کې چاودنې یو ماشوم وژلی او څلور تنه یې ټپیان کړي

د ننګرهار په خوګیاڼو ولسوالۍ کې چاودنې یو څلور کلن ماشوم وژلی او ۴ تنه یې ټپیان کړي دي.

د ننګرهار د والي ویاند عطالله خوګیاڼي نن رسنیو ته په یوه استولي پیغام کې ویلي چې دغه چاودنه نن ماسپښین یوه بجه د خوګیاڼو ولسوالۍ په کرم خېلو سیمه کې شوې ده.

په پیغام کې راغلي چې چاودنه د وسله والو طالبانو لخوا د ځای پرځای شوي ماین د چاودنې له امله رامنځته شوې ده.

د پېښې ټپیان د خوګیاڼو ولسوالۍ په روغتون کې تر درملنې لاندې دي.

د کرنې وزارت: سږکال افغانستان کې د زعفرانو حاصل څه باندې ۱۸ ټنه و

د افغانستان د کرنې او مالدارۍ وزارت شمېرې ښيي چې روان کال په هېواد کې د زعفرانو حاصلات ۱۸،۳ مټریک ټنو ته رسیږي.

د دغه وزارت ویاند اکبر رستمي ازادي راډیو ته وویل، د تېر کال په پرتله سږکال د زعفرانو د حاصل کچه ۲،۳ ټنه زیات شوی.

نوموړی زیاتوي چې د زعفرانو کښت ځمکه پنځه زره جریبه زیاته شوې او روان کال د افغانستان ۹۰ په سلو کې زعفران له هېواده بهر صادر شوي دي.

افغانستان د ګرځندويۍ له درکه سږکال ۳۳ میلیونه افغانۍ عواید ترلاسه کړي

چارواکي وايي، روان کال کې شااوخوا ۲۰۰۰ ګرځندویانو له درېیو ولایتونو بامیان، بدخشان او هرات څخه لیدنه کړې.

افغانستان روان لمریز کال د ګرځندويۍ صنعت له درکه ۳۳ میلیون افغانۍ عواید ترلاسه کړي.

د افغانستان د اطلاعاتو او فرهنګ وزارت ویاند صابر مومند ازادي راډیو ته وویل، چې روان کال کې شااوخوا ۲۰۰۰ ګرځندویانو له درېیو ولایتونو بامیان، بدخشان او هرات څخه لیدنه کړې.​

ښاغلي مومند زیاته کړه: ​"د عوایدو په برخه کې مو ۲۷ میلیونه افغانۍ هدف ټاکل شوی و، خو موږ۳۳ میلیونه افغانۍ عواید ترلاسه کړي، یعنې موږ له ټاکل شوي هدف پنځه میلیونه زیات عواید ترلاسه کړي."

د هغه په خبره، د تېر کال په پرتله روان کال افغانستان ته د ګرځندویانو راتګ زیات شوی دی.

د اقتصادي چارو کارپوهان وايي، مخ په وده هېوادونو کې توریزم ځانګړی اهمیت لري او د ناخالصو ملي عوایدو اصلي عنصر بلل کیږي.

د دوی په باور د ګرځندوی جلب په هېواد کې اوسېدونکو ته د کار زمینه برابروي.

د اقتصادي چارو کارپوه قادر جیلاني ازادي راډیوته وویل، په افغانستان کې د ګرځندویانو پر وړاندې امنیت تر ټولو جدي ستونزه ده او تراوسه حکومت په دې برخه کې چندانې پام نه دی کړی.

هغه وویل: "ّپه لرغونو ځایونو کې حکومت باید پوستې واچوي، ترڅو امنیت یې خوندي شي. په بهر کې د افغانستان په ټولو سفارتونو کې افغانستان ته د ګرځندویانو د جلب په هدف هغه هېواد کې معلومات ورکړل شي."

نوموړی حکومت ته وړاندیز کوي چې د ګرځندوی صنعت د پراختیا لپاره خصوصي سکتور ته ځانګړی پام وشي، څو افغانستان هغه ظرفیتونه چې لري یې وتوانېږدي، د دې صنعیت له لارې خپل ملي عوایدو زیات کړي.

د ټاکنو کمېسیون نن پرېکړه کوي چې قسمي یا لومړنۍ پایلې اعلان کړي

سرچینې چې د موضوع د حساسیت له کبله نه‌غواړي نوم‌یې واخیستل شي ازادي راډیو ته وویل، دغه کمېسیون د وخت او د پایلو د ډول په اړه نن بحث کوي.

د ټاکنو خپلواک کمېسیون یوې سرچینې ازادي راډیو ته وویل، د ټاکنو د لومړنیو یا هم قسمي پایلو د اعلان لپاره ټول چمتووالی نیول شوی دی.

سرچینې چې د موضوع د حساسیت له کبله نه‌غواړي نوم‌یې واخیستل شي ازادي راډیو ته وویل، دغه کمېسیون د وخت او د پایلو د ډول په اړه نن بحث کوي.

بل‌خوا بیا د ټاکنو خپلواک کمېسیون یو ویاند میرزا محمد حق‌پرست وايي، کمېسیون د پایلو اعلان ته بشپړ چمتو دی، خو په دې اړه د کمېسیون رهبرۍ رسما پرېکړه نه‌ده کړې او په دې اړه غونډه روانه ده.

د ټاکنو خپلواک کمېسیون داسې مهال د ولسمشرۍ ټاکنو د لومړنۍ پایلو اعلان ته چمتووالی ښيي چې د هېواد لومړۍ مېرمن رولا غني وايي، کمېسیون باید نور جرأت وکړي او پایلې اعلان کړي.

مېرمن غني له افغانانو مننه وکړه چې د ټاکنو د پایلو اعلان ته‌یې ډېر صبر وکړ

په ورته وخت کې پر ټاکنو د څار بنسټونه وايي، افغانان د معتبرو رأیو پر بنسټ د ولسمشرۍ ټاکنو د پایلو اعلان غواړي.

د ازادو او عادلانه ټاکنو بنسټ مشر یوسف رشید د پنج‌شنبې په ورځ یوه خبري غونډه کې د ټاکنو خپلواک کمېسیون له‌خوا د ولسمشرۍ ټاکنو د پایلو په نه‌اعلان نیوکه وکړه او زیاته‌یې کړه، کمېسیون د دې پروسې په مدیریت کې پاتې راغلی.

ښاغلی رشید وايي: "د ټاکنو بهیر ډېر اوږد شو، له بده مرغه تر اوسه لومړنۍ پایلې نه‌دي اعلان شوي او کمېسیون هم تر اوسه په دې نه‌پوهېږي چې لومړنۍ که قسمي پایلې اعلان کړي. دا د دې بهیر لپاره په حقوقي او تخنیکي لحاظ لویه ضربه ده، دوام‌یې په ګټه نه‌دی او خلک هم ترې نور ستړي شوي دي."​

ښاغلي رشید همدا ډول د ټاکنیزو شکایتونو کمېسیون تر پوښتنې لاندې راوست چې خپل قانوني چارې یې له یاده ویستي او یوازې د څارونکو په توګه عمل کوي.

خو د ټاکنیزو شکایتونو کمېسیون بیا دا تور نه‌مني او وايي، ټول کارونه‌یې د قانون پر بنسټ مخته روان دي.

د افغانستان د ولسمشرۍ ټاکنې د میزان یا تلې میاشتې په شپږمه وشوې، خو کمېسیون سره له دې چې دوه ځله‌یې د لومړنۍ پایلو د اعلان ژمنه کړې، تر اوسه نه‌دی توانېدلی په دې برخه کې عملي ګام پورته کړي.

طالبانو د جوزجان فیض‌اباد ولسوالۍ کې ۴۰ یرغمل کسان خوشې کړي

د افغانستان په عمومي نقشه کې جوزجان ولایت

طالبانو د جوزجان ولایت د فیض‌اباد ولسوالۍ هغه ۴۰ اوسېدونکي خوشې کړي چې درې ورځې مخکې یې په سیمه کې د ولسي پاڅونوالو له یوه مشر سره د همکارۍ په تور له ځان سره بیولي وو.

د فیض‌اباد ولسوال الف شاه عطایي نن ازادي راډیو ته تأیید کړه چې دغه ۴۰ تنه نن خوشې شوي، خو ۴ تنه نور تر اوسه له طالبانو سره یرغمل دي.

د پاڅون کوونکو مشر الله بیرن چې د شبرغان او مزار شریف ترمنځ د لویې لارې د امنیت چارې یې سمبالولې، درې ورځې مخکې د شبرغان-اندخوی پر لاره په یوه ټرافیکي پېښه کې مړ شو.

دغو کسانو غوښتل د هغه د جنازې په مراسمو کې ګډون وکړي چې طالبانو برمته کړل.

په لومړي سر کې د جوزجان چارواکو د فیض‌اباد ولسوالۍ د شاوخوا سلو اوسېدونکو د تښتولو خبر ورکړی و.

بغلان او ارزګان کې د پولیو دوه نوې پېښې ثبت شوي

په دې سره په ټول افغانستان کې د پولیو پېښې ۲۵ ته ورسېدې.

د افغانستان په شمال او جنوبي ولایتونو بغلان او ارزګان کې د ماشومانو د ګوزڼ یا پولیو دوه نوې پېښې ثبت شوي چې په دې سره په ټول افغانستان کې د پولیو پېښې ۲۵ ته ورسېدې.

د بغلان د عامې روغتیا رئیس محب‌الله حبیب تېر ماښام ازادي راډیو ته وویل چې د ماشومانو د ګوزڼ یا فلج نوې پېښه د بغلان په ډنډ غوري ولسوالۍ کې ثبت شوې ده.

ښاغلي حبیب وویل، دا هغه ولسوالي ده چې طالبانو په‌کې له یوه کال راهیسې ماشومانو ته د پولیو ضد واکسین مخه نیولې.

هغه زیاته کړه: "موږ پر دې کار کوو چې څنګه طالبانو ته قناعت ورکړو چې واکسین ته اجازه ورکړي، ترڅو د دې پېښو د زیاتېدو مخنیوی وکړو. که‌یې مخنیوی ونه‌شي، په افغانستان او شااوخوا سیمه کې د وضعیت د خرابېدو وېره شته."

له ۲۰۱۱ میلادي کال راهیسې، دا اول وار دی چې د پولیو یوه مثبته پېښه په بغلان کې ثبېږي.

په عین حال کې د ارزګان چارواکي وایي، د پولیو یوه نوې پېښه په خاص ارزګان ولسوالۍ کې ثبت شوې ده.

د ارزګان د عامې روغتیا رئيس، خان اغا میاخېل ازادي راډیو ته ویلي چې دا پېښه د طالبانو تر کنټرول لاندې ده، سیمه کې ثبت شوې ده.

د پولیو تر ټولو زیاتې پېښې د افغانستان په جنوبي درېیو ولایتونو ارزګان، هلمند او کندهار کې ثبت شوي دي. ارزګان کې نهه، په هلمند کې پنځه او په کندهار کې څلور پېښې ثبت شوې دي.

پولیو په نوره نړۍ کې له‌منځه تللې او یوازې په افغانستان، پاکستان او نایجریا کې د ماشومانو ژوند ته لا هم ګواښ بلل کېږي. په مالیزیا کې په دې وروستیو کې د پولیو یوه پېښه ثبت شوې ده.

میلي: پنتاګون پر دې غور کوي چې افغانستان کې لږ شمېر سرتېري پرېږدي

له جنرال میلي څخه د کانګرس په دې استماعیه غونډه کې د وکیلانو یوه غوښتنه دا وه چې له هغه واوري ایا پنتاګون د افغانستان د اتلس کلنې جګړې په اړه د امریکا خلک تېر ایستلي دي؟

د امریکا د وسله‌والو ځواکونو لوی درستیز جنرال مارک میلي وایي، پنټاګون پر دې غور کوي چې په افغانستان کې لږ شمېر سرتېري پرېږدي.

ښاغلي میلي پرون د امریکا کانګرس ته په خبرو که څه هم په دې اړه چې څه شمېر سرتېري په پام کې ده په افغانستان کې پاتې شي، زیات جزئیات ورنه‌کړل، خو دا یې ومنله چې په دې هېواد کې له ترورېزم سره د مبارزې لپاره د لږو امریکایي سرتېرو پرېښودل یو اغېزناک اقدام دی.

هغه زیاته کړه، "موږ پر ډېرو غوراویو غور کوو چې یو یې هم دا دی."

په اوس وخت کې شاوخوا ۱۳ زره امریکایي سرتېري په افغانستان کې دېره دي چې شااوخوا ۵ زره‌یې د ترورېزم پر وړاندې مبارزه مخ ته وړي.

له جنرال میلي څخه د کانګرس په دې استماعیه غونډه کې د وکیلانو یوه غوښتنه دا وه چې له هغه واوري ایا پنټاګون د افغانستان د ۱۸ کلنې جګړې په اړه د امریکا خلک تېر ایستلي دي؟

د اسوشیټډ پرس خبري اژانس د راپور له مخې دغه‌راز د جنرال میلي ترڅنګ ټاکل شوې وه چې په افغانستان کې د امریکایي ځواکونو عمومي قوماندان جنرال سکاټ مېلر پرون د ورځې ناوخته د کانګرس غړو ته د تړلو دروازو تر شا غونډه کې په افغانستان کې د روانې جګړې په اړه معلومات ورکړي او د هغوی پوښتنې ځواب کړي.

د بدخشان په راغستان کې د کان ښویېدنې کارګران وژلي

په راغستان ولسوالۍ کې د کان ښویېدو پر مهال ګېر شوي کارګران

په بدخشان کې سیمه‌ییز چارواکي وايي، په راغستان ولسوالۍ کې د سرو زرو د یوه کان د ښویېدو له امله ۵ کارګران مړه شوي او لسګونه نور لادرکه دي.

د بدخشان د والي ویاند نېک محمد نظري پرون د ډسمبر په ۱۱مه، ازادي راډیو ته وویل چې په دغې ولسوالۍ کې یو شمېر خلک د سرو زرو په لټه کې په کار لګیا وو چې واوره ورباندې راښویېدلې او هغوی یې لاندې کړي دي.

د هغه په وینا، ۳۵ کارګران لا هم لادرکه دي.

چارواکو ویلي چې په سیمه کې هره ورځ له ۴۵ تر ۵۰ کسانو کار کاوه.

د بدخشان د کوهستان ولسوالۍ په شوکوه کلي کې هم تېر کال د سرو زرو یو کان ښویېدلی وو.

'امنیتي پېښو د افغانستان برښنا شرکت ته سږکال ۹ میلیارده افغانۍ زیان اړولی'

د افغانستان د برښنا شرکت ریيس امان الله غالب

د افغانستان د برښنا شرکت وايي، دغه سکتور په ۱۳۹۸ لمریز کال کې له شاوخوا ۳۵۰ ناوړو امنیتي پېښو سره مخ شوی چې کابو ۹ میلیارده افغانۍ زیان یې اړولی دی.

ددغه شرکت ریيس امان الله غالب د چهارشنبې په ورځ په کابل کې د افغانستان د ۳۴ ولایتو د برشنا ریيسانو په غونډه کې وویل، په دغو زیانونو کې د مخالفینو له خوا د برښنا مزو پرې کېدل، د ستنو ویجاړېدل او د برښنا د سیستم ګډوډول شامل دي.

نوموړي دا هم وویل، د برښنا شرکت ولایتي رییسان به په دغه درې ورځنۍ غونډه کې خپلې ستونزې او وړاندیزونه شریک کړي، څو د دوې د نظریاتو په پام کې نیولو سره مرکزي اداره د نوي کال لپاره نوي پلانونه ترتیب کړي.

ده داهم وویل، په روان کال کې یې د برښنا شاوخوا ۸۰۰ زره نوي مشتریان جذب کړي او ۴۰۰ زره نوي میټرونه به وپیري.

'د ټاکنو کمېسیون دارلانشا د لومړنیو پایلو راپور د کمېشنرانو بورډ ته سپارلی'

عبدالله عبدالله او یو شمېر نور نوماندان د لومړنیو پایلو د اعلانېدو مخالف دي او وايي لومړی باید پاکې او ناپاکې رأیې سره بېلې شي.

د افغانستان د ټاکنو کمېسیون یوه ویاند میرزا محمد حق پرست وايي، ددغه کمېسیون دارلانشا د ولسمشرۍ ټاکنو د لومړنیو پایلو راپور د کمېشنرانو بورډ ته سپارلی دی.

ښاغلي حق پرست ازادي راډیو ته وویل، کمېشنران ددغه راپور په ارزولو لګیا دي.

هغه زیاته کړه: "په راپور باندې د کمېسیون رهبري کار کوي خبرې ورباندې روانې دي. که چېرې ستره ستونزه په راپور کې نه وه، د نن ورځې تر ماښامه به د کمېسیون رهبري د پایلو د اعلان په اړه پرېکړه کوي."

خو د ټاکنو کمېسیون غړی مولانا محمد عبدالله بیا وايي، د ۲۴ زرو محلونو قسمي پایلې به ډېر ژر اعلان شي.

د ټاکنود قانون په اساس، کله چې د رأی اچونې له مرکزونو د ټاکنو کمېسیون ته معلومات ورسېږي، مخکې له دې چې په اړه یې شکایتونو وڅېړل شي، کمېسیون کولای شي د ولایتونو په کچه قسمي پایلې اعلان کړي.

لومړنۍ پایلې بیا د قسمي پایلو له جمع بندۍ او د ټولو رایو تر شمېرل کېدو وروسته د ټاکل شوي مهال وېش له مخې اعلانېږي.

په ورته وخت کې د عبدالله عبدالله په مشرۍ د ثبات او همپالنې ټاکنیز ټیم خبرداری ورکوي، که چېرې کمېسیون د دوی غوښتنی په پام کې ونه نیسي او لومړنۍ پایلې اعلان کړي، پر وړاندې به یې بې تفاوته پاتې نه شي. خو په دې اړه یې نور جزئیات نه دي ورکړي.

د ولسمشرۍ د کاندیدانو شورا هم د ټاکنو کمېسیون له خوا د هرډول پایلو د اعلان مخالفت کړی. خو دغه کمېسیون ویلي د قانون له مخې پایلې اعلانوي او که څوک شکایت لري د ټاکنیزو شکایتونو کمېسیون ته دې مراجعه وکړي.

د غزني د سوداګرۍ او صنایعو خونه: پانګونه او سوداګري په ټپه ولاړه ده

د غزني ښار یوه څنډه

د غزني ولایت د سوداګرۍ او صنایعو خونه وايي، په دې ولایت پانګه‌ونه او سوداګري په ټپه ولاړه ده.

د دې خونې ريیس عبدالمتین قلندرزي ازادي راډیو ته وویل، که څه هم په دې وروستیو کې د دې ولایت امنیتي وضعیت یو څه ښه شوی دی، خو د ټاکنیزو جنجالونو او د سولې د پېچلو خبرو له کبله، په دې ولایت کې کار روزګار، سوداګري او پانګه‌ونه نسبت تېر وخت ته خرابه شوې ده.

دی زیاتوي، په دې وخت کې ان دولتي پروژې درېدلي او په غزني د بهرنیو ملاتړ کوونکو موسساتو د غړیو شمېر او فعالیت پیکه شوی دی.

ښاغلی قلندرزی وايي، د غزني اوسېدونکي خوښ وو چې د اسلامي هېوادونو د ثقافت په مرکز د بدلېدو په درشل کې به یې ژوند او کار روزګار ښه شي، خو اوس له بېکارۍ او تر خوا یې اقتصادي ستونزو سره لاس او ګرېوان دي.

د افغانستان متشبثینو ​بورډ: ۸ لویې دولتي فابریکې غیرفعاله دي

ارشیف

د افغانستان د متشبثینو بورډ ريیس وايي، اوس‌مهال ۸ لویې دولتي فابریکه غیر فعاله دي، خو حکومت ورته پام نه کوي.

رحم الدین حاجي اغا ازادي راډیو ته وویل، دا کارخووني د کابل، هرات او بغلان په ګډون د افغانستان په بېلابېلو ولایتونو کې دي.

هغه وايي: "حکومت څو ځل وویل چې دا فابریکې باید په خصوصي سکټور وپلوري، دا ټولې اته لویې فابریکې دي چې فعالیت نه لري. "

دی وايي، که چېرې دا فابریکې فعالې شي، نه یوازې دا چې افغانستان به د تولید په برخه کې ښه پرمختګ ولري، بلکې نږدې ۲ سوه زره کسانو ته به هم د کار زمینه برابره شي.

په ورته وخت کې د اقتصادي چارو شنونکی سیف الدین سیحون وايي، په پرمختللې نړۍ کې نن سبا د صنایعو پرمختګ د پراختیا او پر ځان بساینې لپاره اساسي شرط ګڼل کېږي.

د ښاغلي سیحون له قوله، په افغانستان کې سلګونه زره کسان بې‌کاره دي او اړتیا ده چې د دې ستونزې د حل لپاره ورته فابریکې فعالې شي.

موږ هڅه وکړه په دې اړه د صنعت او سوداګرۍ وزارت نظر واخلوو، مګر بریالي نه شوو.

کرزی: د امریکا پیسو افغانستان کې د فساد له ودې سره مرسته کړې

پخوانی افغان ولسمشر حامد کرزی

پخواني افغان ولسمشر حامد کرزي ویلي له افغانستان سره د امریکا متحده ایالتونو سلګونه میلیونه ډالرو مرستو په دغه هېواد کې د اداري فساد په وده کې مرسته وکړه.

کرزي ویلي د هغو پیسو حساب کتاب نه و چې افغانستان ته راتللې.

هغه دا خبرې پرون له اسوشیټیډ پریس خبري اژانس سره په یوه مرکه کې کړې ده.

کرزي د واشنګتن پُسټ ورځپاڼې د هغه رپوټ په ځواب کې غږیدلی چې ویلي یې دي د امریکا د دریو ولسمشرانو ادارو د افغانستان د جګړې په اړه خپلو خلکو ته حقایق نه دي ویلي.

د کرزي نوم هم په دغو سندونو کې راغلی او ویل شوي څوارلس کاله د یوه داسې دولت مشر و چې فساد یې کاوه او د خپلو ګټو لپاره یې منابع کارولې.

کرزي ناسمې کړنې رد کړې خو دا یې نه ده رد کړې چې چارواکې یې په فساد کې ښکېل و.

کرزي ویلي له دې خوښ دی چې دا رپوټ خپور شوی او د امریکایانو سترګې یې خلاصې کړې چې لږ تر لږه اوس یې حکومت د افغانستان په وړاندې خپله رویه بدله کړې ده.

عبدالله د ولسمشرۍ ټاکنو لومړنیو پایلو اعلان نه مني

د افغانستان اجراییه رییس او د ولسمشرۍ ټاکنو کاندید عبدالله عبدالله

عبدالله عبدالله ویلي که د ټاکنو کمیسیون د دوی د قانوني غوښتنو له رسیدګي پرته لومړنۍ پایلې اعلان کړي نه یې مني او په وړاندې یې بې تفاوته نه پاتې کیږي.

هغه دا خبره نن په خپله فیسبوک پاڼه لیکلې ده.

د افغانستان اجراییه رییس او د ولسمشرۍ ټاکنو کاندید عبدالله عبدالله داسې وخت دا خبره کړې چې د ټاکنو کمیسیون ویلي ژر به د ټاکنو لومړنۍ پایلې اعلان کړي.

د انتخاباتو کمیسیون یوه ویاند مرزامحمدحقپرست پرون ازادي راډیو ته وویل چې د انتخاباتو کمیسیون او انتخاباتي شکایتونو کمیسیون ناسته درلوده او تر یوه معقول تصمیم وروسته هر څومره ژر چې ممکن وي پایلې اعلان کړي.

د انتخاباتو کمیسیون ویلي چې د ۲۷ ولایتونو د رایو بیا شمېرنه بشپړه شوې خو په پاتې نورو ۷ ولایتونو کې دوی ته د بیا شمېرنې اجازه نه ده ورکړل شوې.

د عبدالله عبدالله په مشرۍ د ثبات او همپالنې ټیم وايي چې د انتخاباتو کمیسیون دې درې لکه د دوی په خبره تقلبي رایه باطله او د دوی غوښتنو ته رسیدګي وکړي.

اخوا په افغانستان کې د اروپايي ټولنې سفیر پیري مایډون پرون د انتخاباتو د پایلو په ځنډنۍ کېدو انتقاد وکړ.
هغه وویل خلکو څه باندې دوه میاشتې د ټاکنو پایلو ته انتظار ایستلی او د پایلو نه اعلان د خلکو له حقونو سرغړونه ده.

د افغانستان د ولسمشرۍ ټاکنې د میزان په شپږمه وشوې او دوه واره یې د لومړنیو پایلو اعلان ځنډیدلی دی.

کندهار د چرګانو غوښې د تولید له اړخه پر ځان بسيا شوی

ارشیف

چارواکي وايي، کندهار د چرګ غوښو د تولېد له اړخه په ځان بسيا شوی دی.

د کندهار د کرنې او مالدارۍ رياست چارواکي وایي، په دې ولایت کې هره ورځ د چرګانو له فارمونو څخه دېرش ټنه د چرګ غوښه توليديږي، چې له دې اړخه کندهار په خپل ځان بسيا شوی دی.

په عین وخت کې کندهار کې د چرګانو د غوښو د تولید د مرکزونو مسوولين وایي له ګاونډیو هېوادونو د چرګانو د واردولو مخه نېول شوې ده.

افغانستان تر ډېره د چرګانو غوښته به ګاونډیو هېوادونو واردوله خو اوس په کور دننه د هېواد په ډیری سیمو کې د چرګانو فارمونه شته دي چې د خلکو اړتیا پوره کولی شي.

نور راوښيه

XS
SM
MD
LG