د لاسرسي لېنکونه

تازه خبر
چهارشنبه ۲۹ لړم ۱۳۹۸ کابل ۱۰:۳۸

د ۱۳۹۸ کال انتخابات

ټاکنو کمېسیون: د رأیو تفتیش او بیا شمېرنې وروسته لومړنۍ پایلې اعلانېږي

سادات وايي، نهایي کوښښ دا دی څو په هغه نېټه چې د عقرب ۲۳ ده، د ولسمشرۍ د ټاکنو لومړنۍ پایلې اعلان شي.

د افغانستان د ټاکنو خپلواک کمېسیون وايي، د رأیې ورکولو د څه باندې اتو زرو محلونو د رایو د بیا شمېرنې او تفتیش پروسه روانه ده او هڅه کوي چې د ټاکلي مهالویش سره سم د ولسمشرۍ د ټاکنو لومړنۍ نتیجه اعلان کړي.

د ټاکنو د خپلواک کمېسیون یوه ویاند ذبیح سادات دغه څرګندونې تېر ماښام وروسته له هغې ازادي راډیو ته وکړې چې د ولسمشرۍ یوه کاندید او اجرائیه ریس عبدالله عبدالله کابل کې د لویې جرګې په کیږدۍ کې خپلو پلویانو ته په وینا کې د دغو محلونو د رأیو د بیا شمېرنې او تفتیش پر وړاندې خپل مخالفت څرګند کړ او له دې کمېسیونه یې وغوښتل چې دغه بهیر سمدستي ودروي.

خو سادات وویل، دغه پرېکړه د دې کمېسیون د رهبرۍ په اکثریت شوې او له ټولو کاندیدانو غواړي څو په دې بهیر کې له کمېسیون سره همکاري وکړي.

ښاغلي سادات د یو شمېر لورو هغو اندېښنو ته په پام سره چې ښایي د ولسمشرۍ د انتخاباتو د لومړنیو پایلو نتیجه بیا وځنډیږي وویل، کمېسیون تر ډېره هڅه کوي چې په ټاکلي وخت دغه نتیجه اعلان کړي.

سادات زیاته کړه: "زموږ نهایي کوښښ همدا دی چې په هغه نېټه چې د عقرب ۲۳ ده، د ولسمشرۍ د انتخاباتو ابتدایي پایلې اعلان کړو خو مونږه مشروطې بللې وې چې د درملوګ کمپنۍ پر خپل وخت معلومات د رأیې ورکونکو راکړي، د کاندیدانو ناظرین همکاري وکړي په پروسه کې، ځینې نور شرطونه هم وو چې د هغو پر اساس موږ کولی شول، اما درملوګ په پنځه ورځني ځنډ د رأیې ورکوونکو معلومات مونږ ته راکړي خو اوس هم موږ نهایي کوښښ کوو څو وتوانېږو د عقرب په ۲۳ د ولسشمرۍ د ټاکنو ابتدایي پایلي اعلان کړوو."

د افغانستان د ولسمشرۍ انتخابات چې په څو ځلې په ځنډ د میزان د میاشتې په ۶ نېټه ترسره شوې، په پام کې ده لومړنۍ نتیجه یې د راتلونکې پنجشنبې په ورځ چې د عقرب ۲۳ ده اعلان او وروستۍ نتیجه یې د قوس په ۱۵ اعلان شي.

د ورځې تازه خبرونه دلته ولولئ

د ثبات او همپالنې پلویانو فاریاب کې د رایو بیا شمیرنې مخه ونیوله

ارشیف

د ثبات او همپالنې د انتخاباتي ټيم پلویانو نن په فاریاب ولایت کې د رایو د بیا شمیرنې د بهیر مخه ونیوله.

د ټاکنو د خپلواک کمېسیون ولایتي رئیس محمد بشیر حسام نن آزادۍ راډیو ته وویل ټاکل شوې وه چې دا بهیر سهار مهال پیل شي خو د عبدالله عبدالله په مشرۍ د ثبات او همپالنې د ټیم د پلویانو د اعتراض له کبله وځنډېد:

هغه زیاته کړه: "د ثبات او همپالنې ناظران رانغلل، هغوی د تحصن خېمه وهلې او راغونډ شوي، مونږ موضوع له مرکز سره شریکه کړه او هغوی راته وویل چې د تشدد د مخنیوي لپاره دا بهیر بند کړئ."

په همدې حال کې د ټاکنو د خپلواک کمېسیون نن په یوه خبرپاڼه کې اعلان وکړ چې په کابل، کندهار، هرات، لوګر، هلمند، پکتیا، پکتیکا، خوست، نورستان، فراه، کندز، دایکندي، زابل او غور ولایتونو کې د رایو د بیا شمېرنې او تفتیش ځنډېدلی بهیر بیا پیل شوی خو په خبرپاڼه کې د فاریاب د پېښې یادونه نه ده شوې.

د رایو د بیا شمیرنې بهیر تېره اوونۍ د ثبات او همپالنې په ګډون د څو ټاکنیزو ډلو د مخالفت له کبله وځنډېد.

د ټاکنو د خپلواک کمېسیون مشرې پرون په کابل کې خبریالانو ته وویل چې دا پرېکړه یې له ټولو ټاکنیزو ډلو سره د موافقې پر اساس کړې ده.

"د لومړنیو پایلو په اعلان کې ځنډ د ټاکنو کمېسیون نیمګړتیا نه‌ده"

د ټاکنو کمېسیون یوه ویاند ذبیح الله سادات

د افغانستان د انتخاباتو خپلواک کمېسیون د ولسمشرۍ انتخاباتو د لومړنیو پایلو د ځنډ پړه د یو شمېر نوماندانو، له کمېسیون سره پر همکارو کمپنیو او ځینو نورو بنسټونو اچوي.

د دغه کمېسیون یوه ویاند ذبیح‌الله سادات نن (عقرب ۲۳مه) ازادي راډیو ته وویل: "د خلکو اندېښنې پر ځای دي او حق لري چې انتقاد وکړي، خو بل اړخ ته که وګورئ، موږ په دې انتخاباتو کې ټکنالوژي وکاروله د دې لپاره اړونده کمپنۍ معرفي شوې وه. که هغه کمپنۍ خپل مسؤلیتونه پر وخت نه‌شي ترسره کولای، یا هم د کاندیدانو له لوري پوره همکاري نه‌کېږي او د پروسې پر وړاندې خنډ جوړېږي؛ نو دا د کمېسیون نیمګړتیا نه، بلکې د هغو نهادونو نیمګړتیا ده چې په لوی لاس غواړي دا پروسه نوره هم وځنډېږي."

یو شمېر کابل ښاریانو اندېښنه وښوده چې د انتخاباتو کمېسیون ورځ تر بلې د پایلو ځنډولو سره د خلکو باور زیانمنوي.

دا دوهم ځل دی چې د ولسمشرۍ انتخاباتو د لومړنیو پایلو اعلان ځنډېږي .

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

دغه کمېسیون پرون ناوخته وویل چې د تخنیکي ستونزو او نورو مسایلو له کبله نه‌شي کولای پر ټاکلي وخت دا پایلې اعلان کړي.

د ولسمشرۍ ټاکنو د لومړنیو پایلو د ځنډ په اړه نن د ټاکنو کمېسیون معلومات ورکوي

په پام کې وه دغه پایلې د میزان په ۲۷ اعلان شي، خو د تخنیکي ستونزو له امله د عقرب ۲۳مې ته وځنډېدې.

د افغانستان د ټاکنو خپلواک کمېسیون به نن د نومبر په ۱۴مه، د جمهوري ریاست د ټاکنو د ابتدايي پایلو په اعلان کې د بیا ځنډ په اړه معلومات وړاندې کړي.

د دغو ټاکنو لومړنۍ پایلې باید نن اعلان شوې وی، خو د ټاکنو خپلواک کمېسیون پرون اعلان وکړ چې د ابتدایي پایلو اعلان‌یې ځنډولی دی.

د دغه کمېسون یوه ویاند عبدالعزیز ابراهیمي پرون رسنیو ته وویل، د تخنیکي ستونزو او نورو مسئلو له امله دا کار له ټاکلي مهالوېش سره سم نه‌شي کېدلائ.

دا دوهم وار دی چې د میزان ۶مې ولسمشرۍ انتخاباتو لومړنۍ پایلې ځنډېږي.

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

د ټاکنو کمېسون مسئولینو ژمنه کړې چې نن (عقرب ۲۳مه) به د دې ځنډ په اړه جزئیات له خبریالانو سره شریک کړي.

د انتخاباتو خپلواک کمېسیون: د رأیو بیاشمېرنه ودرول شوه

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

د افغانستان د انتخاباتو خپلواک کمېسیون وايي، د ولسمشریزو انتخاباتو د رأیو د بیاشمېرنې او تفتیش بهیر ودرول شو.

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

ښاغلی ابراهیمي زیاتوي چې دغه بهیر د کمېسیون تر راتلونکي هدایت درېدلی، د هغو محلونو د تفتیش او بیاشمېرنې بهیر چې د رأیو صندوقونه‌یې پرانیستي دي او د تفتیش او څېړنې لاندې دي، له دغه امر مستثنی دی.

د انتخاباتي شکایتونو کمېسیون هم د دغه بهیر له درېدو هرکلی کوي.

د دغه کمېسیون کمېشنر او ویاند محمد قاسم الیاسي ازادي راډیو ته وویل، د ولسمشرۍ انتخاباتو د رأیو د تفتیش او بیاشمېرنې بهیر باید له یو یا دوو ورځو زیات وخت ونه‌نیسي.

د ټاکنو کمېسیون د ولسمشرۍ ټاکنو لومړنیو پایلو د ممکنه ځنډ خبر ورکړ

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

د افغانستان د ټاکنو خپلواک کمېسيون ​وايي فکر نه‌کوي چې وکړاى شي د ټاکنو لومړۍ نتيجې د لړم/ عقرب پر ٢٣مه اعلان کړي.

د دغه کمېسيون يوه وياند ذبيح سادات تېره شپه ازادي راډيو ته وويل، د ځينو ستونزو له کبله ښايي دغه اعلان وځنډېږي.

سادات زیاته کړه: "ستونزمنه به وي که موږ د ولسمشرۍ ټاکنو لومړنۍ نتيجه پر ٢٣مه نېټه اعلان کړو، خو کمېسيون بيا هم خپله نهايي هڅه کوي، څرنګه چې په ځينو ولايتونو کې مزاحمتونه ايجاد شول، اوس به دغه اعلان موږ ته ستونزمن وي."

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

کمېسيون وايي، د ځينو کانديدانو ډلو په څو ولايتونو کې د رأيو د بياشمېرنې او تفتيش د پروسې پر وړاندې خنډونه جوړ کړي دي.

د ټاکنو خپلواک کمېسيون وايي، په ٤ ولايتونو کې د رأيو د بياشمېرنې او تفتيش پروسه ختمه شوې ده، خو په ٩ ولايتونو کې دغه پروسه پيل شوې نه‌ده.

په پام کې ده له اتو زرو د ډېرو صندوقونو رأیې له سره وشمېرل شي، ترڅو هغه رأیې ترې بېلې شي چې د رأی ورکوونکو بایومټریک معلومات‌یې نه‌دي ثبت شوي.

د ټاکنو کمېسیون د رأیو بیاشمېرنې لپاره د تخنیکي وسایلو بسته بندي پيل کړه

آرشیف

د افغانستان د ټاکنو خپلواک کمېسیون نن اعلان وکړ چې د رأیو د بیا شمېرنې او تفتیش لپاره د تخنیکي وسایلو بسته بندي پر ټاکنو د څارونکو بنسټونو په حضور کې پیل شوې ده.

دغه کمېسیون نن شنبه (عقرب ۱۸مه) په یوه اعلامیه کې، له ټولو څارونکو او د ټاکنیزو ټیمونو له استازیو غوښتي چې د وخت کمی په نظر کې ونیسي او پر ټاکلي وخت څارنې ته حاضر وي.

بل‌خوا بیا د عبدالله عبدالله په مشرۍ د ثبات او همپالنې ټاکنیزې ډلې دا بهیر تحریم کړی دی.

دې ډلې په یوې خبرپاڼې کې ویلي، د ثبات او همپالنې ټيم خپلو ټولو ولایتي څانګو او څارونکیو ته امر کړی چې د بیا شمېرې په دې پروسه کې له ګډون څخه ډډه وکړي.

په اعلامیه کې ویل شوي، تر څو چې تکراري رایې، له وخته وړاندې او وروسته کارول شوې او هغه رأیې چې د رأی ورکوونکو پرځای د عکس له مخې عکس اخیستل شوی، تصفیه شوې نه وي، بیا شمېرنه دې نه پیلېږي.

د ټاکنو کمېسیون په وار وار اعلان کړی چې یوازې بیومټریک شوې رأیې ورته د اعتبار وړ دي. ددغه کمېسیون رئیسې حوا علم نورستانۍ پرون ازادي راډیو ته وویل، دوی پر خپلې پرېکړې ولاړ دي، خو دا رایې باید لومړی وکتل شي.

پرون د ټاکنو کمېسیون د کاندیدانو له استازو سره په همدې تړاو خبرې وکړې، خو پایله یې نه درلوده. نن به بیا د اختلاف د هواري لپاره سره کېني.

د ۲۴۲۳ محلونو د بیومټریک دستګاه یا د حافظې کارتونه ورک دي، کمېسیون غواړي ددغو محلونو رأیې یو ځل وګوري، خو یوشمېر کاندیدان وايي دا رأیې د طرزالعمل له مخې باطلې دي او کتلو ته یې اړتیا نشته.

ټاکنو کمېسیون ته د رأی ورکونکو د بیومټریک معلوماتو د تصفیې راپور رسېدلی

د ټاکنو کمېسیون مشرې حوا علم نورستانۍ ویلي، د بیومټریک معلوماتو پر اساس ۸۶۲۲۶ رایې معیاري نه دي

د افغانستان د ټاکنو خپلواک کمېسیون ویلي چې د رایو ورکونکو د بیومټریک معلوماتو د تصفیې رپوټ ورته رسېدلی دی.

د دې کمېسیون مشرې حوا علم نورستانۍ پرون وویل چې له یو میلیون او ۹ سوه او ۲۹ زره او ۳۳۳ رایې ورکونکو چې د بیومټریک معلوماتو پر اساس یې رایې اچولي، د یو میلیون او ۸۴۳ زره او ۱۰۷ تنو رایې د اعتبار وړ دي.

اغلې نورستانۍ ویلي، پاتې معلومات د ټاکلي معیار خلاف بلل شوي دي.

د هغې په وینا د بیومټریک معلوماتو پر اساس ۸۶۲۲۶ رایې معیاري نه دي او د غیرمعیاري رایو د برخلیک په اړه څه نه دي ویل شوي خو دا د ټاکنو د پایلو په اړه په بحثونو کې یوه لانجمنه مسئله ده.

د جمهوري ریاست ټاکنې د سپټېمبر په ۲۸مه ترسره شوې وې.

د رایو ورکونکو بیومټریک معلومات د تصفیې لپاره د درملوګ په نوم جرمني شرکت ته ورکړ شوي وو.

د ډیجیټال مرکز د مهرولاک پر ماتولو د تورنو کسانو دوسیه لویې څارنوالۍ ته رسېدلې

د میزان په ۲۸مه د ټاکنو کمېسیون د ډیجیټال سنټر مهرولاک ماتېدو د کاندیدانو نیوکې او اندېښنې راوپارولې او دوه ورځې د دغه کمېسیون کارونه وځنډول.

د افغانستان د لویې څارنوالۍ چارواکي وايي، ډېر ژر به د هغو کسانو پر دوسیو څېړنې پيل شي چې د انتخاباتو کمېسیون ډیجیټال مرکز د قفل ماتولو په تړاو دوی ته معرفی شوي دي.

د لویې څارنوالۍ ویاند جمشید رسولي ازادي راډيو ته وویل، دا موضوع په جدي ډول څیړل کیږي، خو لومړی باید د ټاکنو کمېسیون دوی ته ډاډ ورکړي چې دغه کسان د قانون پر اساس له دندوې لرې شوې دي.

ښاغلي رسولي وویل، څارنوالۍ د ټاکنو له کمېسیون څخه غوښتي چې تورن کسان له دندو لرې کړي.

د میزان په ۲۸مه د ټاکنو کمېسیون د ډیجیټال سنټر مهرولاک ماتېدو د کاندیدانو نیوکې او اندېښنې راوپارولې او دوه ورځې یې د دغه کمېسیون کارونه وځنډول.

د ټاکنو کمېسیون چارواکو د عقرب په څلورمه په همدې تور ددغه کمېسیون د دارالانشاء امنیتي سلاکار حمید احمدزی، د کمېسیون د غیر نظامي ساتونکو مسؤل لطف‌الرحمن او د پولیسو مأمور سید اصغر لویې څارنوالۍ ته معرفي کړل.

د ټاکنو کمېسیون چارواکو ویلي و چې د ودانۍ امنیت ساتونکي پولیس د سړې هوا له امله دهلېز ته ننوتي وو.

افشا شوی سند: د ولسمشرۍ ټاکنو ابتدايي پایلې د "عقرب په ۲۱مه اعلانېږي"

خو د ټاکنو کمیسیون مسئولان وايي، ددغې نېټې ټاکل یوه طرحه ده او نه شي ویلای چې دا د ټاکنو ابتدايي پایلو د اعلان دقیقه نېټه ده.

د افغانستان د ټاکنو له کمیسیون څخه افشا شوي سند له مخې چې ازادي راډیو ترلاسه کړی، ددغه کمیسیون اجرايي برخې په پام کې لري چې د ولسمشریزو ټاکنو ابتدايي پایلې د عقرب په ۲۱مه اعلان کړي.

د ټاکنو کمیسیون د دارالانشا د پلان رئیسې منعمه منصور ته په منسوب غږیز کلیپ کې هغې ویلي چې دا نېټه د ټاکنو کمیسیون د عملیاتي برخو د رئیسانو په مشوره ټاکل شوې ده.

یوې خپلواکې سرچینې ازادي راډیو ته ویلي چې ثبت شوی غږ د اغلې منعمې منصور ده.

خو د ټاکنو کمیسیون کمیشنره رحیمه ظریفي وايي، ددغې نېټې ټاکل یوه طرحه ده او نه شي ویلای چې دا د ټاکنو ابتدايي پایلو د اعلان دقیقه نېټه ده.

اغلې ظریفي زیاته کړه، د میزان شپږمې ولسمشریزو ټاکنو د ابتدايي پایلو د اعلان نېټې باندې کار روان دی.

د افغانستان د ولسمشریزو ټاکنو د مهالوېش له مخې په پام کې وه د ټاکنو پایلې د میزان په ۲۷مه اعلان شي، خو د هغه څه له امله چې تخنیکي ستونزې او په رایو کې د پراخې درغلۍ ادعاوې یادېږي، د پایلو اعلان تر نامعلومې نېټې ځنډېدلی دی.

د ټاکنو کمېسیون د دارالانشاء رئیس د ډېټا سنټر مهرولاک ماتېدل رد کړل

د ټاکنو کمېسیون هم پرون ناوخته په یوې اعلامیه کې د ټاکنو کمېسیون د نتایجو جمع‌بندۍ مرکز د قفل ماتېدل رد کړل او هغه‌یې د ټولنیزو رسنیو شایعات وبلل.

د افغانستان د انتخاباتو خپلواک کمېسیون د دارالانشا رئیس حبیب‌الرحمن ننګ هغه ادعاوې ردوي چې ګواکې د پولیسو ځانګړو ځواکونو د انتخاباتو کمېسیون د ډیجیټالي نتایجو د جمع‌بندۍ او ارزونې مرکز (ډیجیټال سنټر) مهرولاک مات کړی او ورننوتي دي.

ښاغلي ننګ پرون ناوخته (میزان ۲۹مه) ازادي راډیو ته وویل چې یو قفل هم نه‌دی مات شوی.

دی وايي: "بلو باکسونه او قفلونه له ټولو څارونکو سره شته، له هغوی سره هېڅ قفل نه‌دی خلاص شوی. موږ د طرزالعمل مطابق کارونه ترسره کوو. هېڅ داسې څه نه‌دي شوي چې د خلکو د تشویش سبب شي."

د عبدالله عبدالله په مشرۍ د ثبات او همپالنې انتخاباتي ټیم د دوشنبې په ورځ (میزان ۲۹مه) ادعا وکړه چې د ټاکنو کمېسیون ډیجیټال سنټر مهرولاک مات شوی.

د دغه ټیم یوه غړي علي احمد عثماني وویل، په دې کار کې د یوه ځانګړي ټاکنیز ټیم کسان هم شامل وو. ښاغلي عثماني د ټاکنو کمېسیون د امنیتي سلاکار او همداراز د دارالانشاء د مشر حبیب‌الرحمن ننګ د دندې د ځنډېدو غوښتنه وکړه.

د کورنیو چارو وزارت په ټاکنیز بهیر کې د پولیسو هر ډول مداخله رد کړې ده.

د ټاکنو کمېسیون هم پرون ناوخته په یوې اعلامیه کې د ټاکنو کمېسیون د نتایجو جمع‌بندۍ مرکز د قفل ماتېدل رد کړل او هغه‌یې د ټولنیزو رسنیو شایعات وبلل.

د دغه کمېسیون په اعلامیه کې ویل شوي چې امنیتي ساتونکي د سړې هوا له کبله د ټاکنیزو زده‌کړو ودانۍ دهلېز کې ځای پر ځای شوي او "د دې کار لپاره یوازې د ودانۍ عمومي دروازه د مسئول کس او ملي پولیسو د مسؤلینو په شتون کې پرانیستل شوې ده."

د ټاکنو کمیسیون مرکزي سرور ته د بیومټریک معلوماتو انتقال لا هم نه دی بشپړ شوی

د ټاکنو کمیسیون د میزان په ۲۲مه اعلان وکړ چې مرکزي سرور ته څه باندې یو میلیون او ۷۳۷ زره رایې انتقال شوي دي.

د افغانستان د ټاکنو خپلواک کميسيون وايي له بيومټريک دستګاوو، د مرکزي زېرمتون سيسټم ته د رايو د لېږد بهير لا هم نه دى بشپړ شوى.

خو د دغه کميسيون د دارالانشا رئيس حبيب الرحمن ننګ د دوشنبې په ورځ ازادي راډيو ته ويلي وو چې دا پروسه د سې شنبه تر ماښامه بشپړه شي.

بلخوا د انتخاباتو خپلواک کميسيون وياند عبدالعزيز ابراهيمي نن (چهارشنبه، میزان ۲۴مه) ازادي راډيو ته وويل، د رايو د انتقال پروسه لا هم روانه ده.

"تر پرون (سه شنبه) ناوخته پورې د يو مليون څلور لکه ٨٨ زره رايه ورکوونکو معلومات له بيومټريک دستګاوو، د ټاکنو خپلواک کميسيون مرکزي سرور ته لېږدول شوي دي. هڅه کېږي چې ژر تر ژره دا پروسه پاى ته ورسېږي."

د ټاکنو خپلواک کميسيون وياند وايي د ټاکنو په ورځ د ٢٦ زره ٥٦٨ محلونو له جملې د٢٢زره ٥٨٨ محلونو بيومټريک معلومات سرور ته انتقال شوي او د څه باندې ٣٩٠٠ نورو محلونو رايې د انتقال په حال کې دي.

دا په داسې حال کې ده چې د ټاکنو کمیسیون د تېرې دوشنبې په ورځ (میزان ۲۲مه) اعلان وکړ چې مرکزي سرور ته څه باندې یو میلیون او ۷۳۷ زره رایې انتقال شوي دي. ددغه کمیسیون کمیشنرې رحیمې ظریفي ویلي و چې دا رایې د ۲۲ زره ۵۸۸ محلونو دي.

د افغانستان د جمهوري رياست ټاکنې د تلې/ميزان پر ٦مه وشوې.

د دغه کميسيون د مهالوېش له مخې لومړنۍ نتيجه به د تلې پر ٢٧مه او نهايي نتيجه به د لړم/عقرب پر ١٦مه اعلان شي.

د انتخاباتو د کمیسیون د آی ټي چارو مسوول څارنوالۍ ته معرفي شوی

AFGHANISTAN -- An Afghan election commission worker prepares ballot boxes and election materials for the upcoming presidential election at the warehouse in Kabul, September 26, 2019

دافغانستان د انتخاباتو خپلواک کمیسیون مني چې د دې کمیسیون د آی ټي یا د تخنیکي چارو مشر څارنوالۍ ته معرفي شوی دی.

د انتخاباتو د خپلواک کمیسیون مشري حوا علم نورستاني له آزادي راډیو سره په خبرو کې وویل چې دوی له وړاندي په دې اړه خبر نه ول ، خو زیاتوي چې دا کار د انتخاباتي شکایتونو د کمیسیون لخوا شوی دی.

میرمن نورستاني وایې د دې اقدام دلیل تر اوسه روښانه نه دی او دوی یې په اړه پلټنې کوي بیا به پریکړه وکړي.

د انتخاباتو خپلواک کمیسیون تر دې وړاندي ویلي وو چې د انتخاباتي ډيټا سرور ستونزه جدي نه ده او ژر به حل شي.

د دې کمېسیون کمیشنر محمد حنیف دانشیار نن وویل، د دې ستونزې د حل لپاره د درملوک کمپنۍ دوه انجنیران کمېسیون ته را رسېدلي او د نن ورځي تر پایه به رامنځته شوې ستونزه حل کړي.

د انتخاباتو کمېسیون: انتخاباتي سرورونه هېڅ ډول ستونزه نه لري

د افغانستان د ټاکنو خپلواک کمېسون وايي، د بایومټریک دستګاوو د معلوماتو د اخذ او ساتنې مرکزي سېستم یا سرورونه هېڅ ډول ستونزه نه لري.

د کمېسيون مرستیال ویاند عبدالعزیز ابراهیمي پرون د اکټوبر په نهمه ازادي راډیو ته وویل چې د درملوک په نوم جرمني شرکت د مرکزي سېستم د سایبري (انټرنټي) او تخنیکي مصؤنیت مسئولیت لري.

ابراهیمي وایي: درملوک شرکت له کمېسيون سره د لاسلیک کړي تفاهم لیک پر اساس مکلفیت لري چې له هر ډول سایبري حملو دا سېسمتونه خوندي وساتي او تخنیکي ستونزې یې هم حل کړي.

عبدالعزیز ابراهیمي وویل چې د سرور د هک کېدو هڅه شوې وه، خو نه دی هک شوی او د انټرنټ د کمزوري کېدو له امله يې کارونه پڅ شوي وو، خو جدي خنډ نه دی پېښ شوی.

د کمېسيون مرستیال ویاند وویل چې د رأیو د پایلو ۲۲۴۴۶ فورمې مرکزي سرور ته داخلې شوې دي.

د هغه په وینا، د درملوک شرکت دوه انجنیران به د احتیاط له مخې په کابل کې وي، څو د ستونزو د پیدا کېدو په صورت کې اقدام وکړي.

نن له ولایتونو د ټاکنو مرکزي دفتر ته د حساسو انتخاباتي موادو لېږدول بشپړېږي

د افغانستان د ټاکنو کمیسیون مرستیال ویاند عبدالعزیز ابراهیمي وایي، د جمعې ورځې تر ماښامه (میزان ۱۲مه) د ۲۳ ولایتونو حساس ټاکنیز مواد کابل ته ورسېدل.

د افغانستان د ټاکنو خپلواک کمیسیون چارواکي، له پلان سره سم تمه ده نن شنبه (میزان ۱۳مه) د کابل مرکزي دفتر ته له ولایتونو د حساسو انتخاباتي موادو د لېږدولو بهیر بشپړ شي.

ددغه کمیسیون یوه ویاند عبدالعزیز ابراهیمي ازادي راډیو ته وویل، د پرون جمعې ورځې تر ماښامه د ۲۳ ولایتونو حساس ټاکنیز مواد کابل ته ورسېدل.

ښاغلي ابراهیمي همداراز وویل، "د جمعې تر ناوخته د بیومټریک شویو رایو ۲۰ زره او ۵۰۰ فورمې زموږ له اصلي سرور سره وصلې شوې او دا پروسه دوام لري."

د افغانستان ولسمشریزې ټاکنې د میزان په ۶مه ترسره شوې. د ټاکنو کمیسیون د شمېرو له مخې شااوخوا دوه میلیونه او ۷۰۰ زره کسانو په دغو ټاکنو کې برخه اخیستې ده.

د افغانستان د انتخاباتو پر شفافیت د ملګرو ملتونو امنیت شورا ټینګار

د ملګرو ملتونو د امنیت شورا یوه غونډه

د ملګرو ملتونو امنیت شورا د افغانستان د ولسمشریزو انتخاباتو د شفافیت د تأمین غوښتنه کړې ده.

دغې شورا د افغانستان له انتخاباتي کمېسیونونو څخه غوښتي چې د افغانانو د رأیو د کره شمېرنې او له دې چې د دغو انتخاباتو پایلې به په منصفانه، شفافه او ټوله‌ییزه توګه مشخصې کړي، ډاډ ورکړي.

دغې شورا دغه‌ شان له ټولو ښکېلو لوریو غوښتي چې له وخت مخکې پایلې اعلان نه‌کړي او نوماندان دې دغه بهیر او هغو اصولو ته چې دوی پرې لاسلیک کړی، درناوی وکړي.

د ملګرو ملتونو امنیت شورا د رأی ورکوونکو، د انتخاباتو کمېسیون کارکوونکو، انتخاباتي ناظرینو او امنیتي ځواکونو زړورتیا ستایلې او د هغوی کسانو اقدام‌یې غندلی چې غوښتل‌یې دغه بهیر له ستونزو سره مخ کړي.

افغانستان د میزان په ۶مه په ۳۴ ولایتونو کې د ولسمشریزو انتخاباتو شاهد و.

د افغانستان د ټاکنو خپلواک کمېسیون وايي چې د تخمیني شمېرو په اساس د افغانستان په ولسمشریزو انتخاباتو کې دوه نیم میلیونه کسانو ګډون کړی.

دغه کمیسیون ویلي چې د درغلیو ادعاوې به د انتخاباتي شکایتونو کمېسیون وڅېړي.

نن په کابل کې د ټاکنیزو شکایتونو د څېړنې کار پيلېږي

انتخاباتي کارکوونکی د یوه رأی ورکوونکي د راجسترولو پر مهال

د افغانستان د انتخاباتي شکایتونو کمېسیون وايي، نن به په پلازمېنه کابل کې د ټاکنیزو شکایتونو د څېړنې کار پيل شي.

د انتخاباتي شکایتونو د کمېسیون غړي قطب‌الدین رویدار د پنجشنبې په ورځ ازادي راډیو ته وویل: "زموږ ټول کارکوونکي بوخت دي، د شکایتونو ډولونه تصنیف یا طبقه‌بندي کوي، ان‌شاءالله دغه کټه‌ګوري به ژر خلاصه شي او نن ورځ به د شکایتونو د څېړنې کار پيل شي چې په ځینو ولایتونو کې دا کار پیل شوی دی."

اخوا د انتخاباتي شکایتونو د کمېسیون مرستیاله ویانده زرمینه کاکړ وايي، هغه وېډیوګانې به هم مستندې شي چې په ټولنیزو شبکو کې لاس په لاس کېږي.

په ورته وخت کې د افغانستان پر انتخاباتو د څار بنسټونه ټینګار کوي چې د شکایتونو کمېسیون باید په مسلکي او بې‌پرې ډول له هر ډول سیاسي فشار پرته دغه شکایتونه وڅېړي او پایلې يې په خپل وخت اعلان کړي.

د انتخاباتي شکایتونو کمېسیون وایي چې له انتخاباتو ۴۸ ساعته وروسته‌یې ۴۳۶۷ بېلابېل شکایتونه ثبت کړي دي.

د افغانستان د جمهوري ریاست انتخابات د میزان په شپږمه وشول، له انتخاباتي مهال‌ویش سره سم ټاکل شوې چې د دغو انتخاباتو لومړنۍ پایلې د میزان په ۲۷مه او وروستۍ پایلې یې د عقرب په ۱۶مه اعلان شي.

د ټاکنو کمیسیون یوځل بیا له بیومټریک پرته کارول شوې رایې بې اعتباره وبللې

د دغه کميسيون رئيسې حوا علم نورستانۍ ازادۍ راډيو ته وويل، له بيومټريک پرته د نورو رايو شمېرل امکان نه لري.

د افغانستان د انتخاباتو خپلواک کميسيون يو وار بيا ټينګار کوي چې د ولسمشرۍ د تېرو ټاکنو يوازې بيومټريک رايې د اعتبار وړ دي.

د دغه کميسيون رئيسې حوا علم نورستانۍ ازادۍ راډيو ته وويل، له بيومټريک پرته د نورو رايو شمېرل امکان نه لري.

اغلې نورستانۍ زیاته کړه: "د بيومټريک رايه موږ ته د منلو وړ ده. په ټاکنو کې مو دا روشد همدې لپاره ونه مانه چې هلته درغلي وه او د درغلۍ د مخنيوي يوازنۍ لاره همدا ټکنالوژي وه. دا استثنا د ټولو کمېشنرانو د ګډې پرېکړې پر اساس په پام کې نيول شوې ده".

پرون د مشرانو جرګې رئيس عبدالهادي مسلميار وويل، د کميسيون مشرتابه به اړ کړي چې غيربيومټريک رايې هم وشمېري. ښاغلي مسلمیار د ټاکنو کمیسیون د رئیسې پروړاندې د توندې ژبې له کارولو بخښنه وغوښته خو بیا یې هم ټینګار وکړ چې بیومتریک باید حتمي نه وي.

په عين حال کې د ټاکنو خپلواک کميسيون وايي کابل ته به د رايو د صندوقونو او انتخاباتي موادو انتقال تر راروانې شنبه ( تلې ١٣مه) بشپړ شي.

د ټاکنو د خپلواک کميسيون د مهالوېش له مخې، د ولسمشرۍ انتخاباتو لومړنۍ نتيجې به د تلې په ٢٧مه او نهايي نتيجې د لړمپه١٦مه اعلان شي.

د انتخاباتو کمېسیون: د ټاکنو روان بهیر به په پوره شفافیت مخته وړو

د افغانستان د انتخاباتو خپلواک کمېسیون وايي چې له ټاکنو وروسته اوسنی پیل شوی بهیر به په پوره شفافیت مخته وړي او له ټاکنیز مهالوېش سره سم به خلکو ته نتایج اعلان کړي.

د دغه کمېسیون غړو پرون په یو شمېر ولایتونو کې د رأیې ورکوونې په پروسه کې د خلکو د ګډون کچه اعلان کړه.

په ټاکنو کې د خلکو د ګډون کچه چې لا هم نه ده بشپړه شوې، د کمیسیون د یوه غړي مولانا محمد عبدالله له خوا د نورو کمیشنرانو په حضور کې رسنیو ته اعلان شوې.

ده وویل: موږ ته تر اوسه پورې له یو شمېر مرکزونو دوه میلیونه او یو لک او شپږ نوي زره او ۴۶۳ رأیې را رسېدلي، دا رأیې د ۳۶۳۷ مرکزونو دي چې ۱۷۶۸۹ محلونه کېږي.

ښاغلي عبدالله وویل چې ژر به د نورو مرکزونو پایلې هم دوی ته ورسېږي.

د انتخاباتو خپلواک کمېسیون اعلان کړی چې له ۵۳۷۵ مرکزونو ۶۱۷ یې تړلي وو.

د افغانستان څلورم دور ولسمشریزې ټاکنې د شنبې په ورځ وشوې، خو انتخاباتي څارونکو د خلکو ګډون نسبت تېرو ټاکنو ته کم بللی دی.

"که هر کاندید د چوپتیا اصل په پام کې ونه نیسي، نغدي جریمه کېږي"

د افغانستان د ولسمشرۍ لپاره د کاندیدانو انتخاباتي مبارزه تېره شپه ۱۲ بجې پای ته ورسېده او نن او سبا د چوپتیا دوره ده.

د انتخاباتي شکایتونو د کمېسیون غړي محمد قاسم الیاسي پرون ازادي راډیو ته وویل چې که هر کاندید د چوپتیا اصل مراعات نه کړي، له پنځو زرو تر یو لک افغانیو نغدي جریمه کېدای شي.

د دغې دورې له پیلېد سره د ولسمشرۍ ټول کاندیدان مکلف دي چې خپل عکسونه او نور کمپایني بیلبورډونه له ښارونو لېرې کړي او د رأیې ورکولو د مرکزونو په سل مترۍ کې هم باید د هېڅ یوه کاندید عکس ونه لیدل شي.

ټاکل شوې بل سبا د شنبې په ورځ د ولسمشرۍ انتخابات ترسره شي.

د انتخاباتو د خپلواک کمېسیون په وینا، له نهه نیم ميلیونو زیات وګړي له دې کمېسیون سره د رأیې ورکوونکو په توګه ثبت شوي او د رأیې ورکولو په ورځ به په ټول هېواد کې د رأیې ورکولو ۴۹۴۲ مرکزونه د دوی پرمخ خلاص وي.

پکتیا کې یو قومي مخور او د عبدالله عبدالله د ټاکنیز ټیم غړی په ډزو وژل شوی

ښاغلی جلالي پرون سه شنبه (تلې دویمه) په ګردېز ښار کې په نښه شو.

ناپېژاندو کسانو د پکتیا کې یو قومي مشر وکیل جان محمد جلالي چې د عبدالله عبدالله په مشرۍ د ثبات او همپالنې ټاکنیز ټیم غړی و، په ډزو وژلی دی.

ښاغلی جلالي پرون سه شنبه (تلې دویمه) په ګردېز ښار کې په نښه شو.

د افغانستان اجراییه رئیس عبدالله عبدالله د هغه وژنه غندلې او له امنیتي ادارو یې غوښتي چې وژونکي یې ومومي.

د دغه قومي مخور د وژنې مسئولیت تردې مهاله چا نه دی منلی.

کندهار کې د اشرف غنی د کمپاین دفتر کې چاودنې درې کسان وژلي

چاودنه تېر ماښام د ځای پرځای شوي ماین له امله رامنځته شوې ده.

په کندهار ښار کې د محمد اشرف غني د انتخاباتي کمپاین پر دفتر د ماین په چاودنه کې درې کسان وژل شوي او اووه تنه نور ټپیان دي.

د کندهار د امنیه قومندانۍ ویاند جمال ناصر ازادي راډیو ته وویل، چې چاودنه تېر ماښام (تلې دویمه) د اتو بجو په شااوخوا کې د دولت ساز ټیم پر دفتر وشوه.

هغه وویل: د محمد اشرف غني د کمپاین دفتر چې د کندهار ښار په څوارلسمه امنیتي حوزه کې دی، پر دیوال یې یو ماین نښلول شوی و چې انفجار یې وکړ، په دغه پېښه کې د یو ماشوم په ګډون درې ملکیان ووژل شول."

د نوموړي په خبره، اووه تنه ټبیان هم چې یوه یې ښځه ده تول ملکیان دي.

تر اوسه د دغې پېښې مسوولیت چا په غاړه نه دی اخیستی.

مسؤلین: په فاریاب کې به د رأیو له ۱۱۲ مرکزونو یوازې ۶۳ پرانيستي وي

په فاریاب ولایت کې د انتخاباتو د خپلواک کمېسیون ساحوي دفتر وایي، ښایي د ولسمشرۍ انتخاباتو په ورځ په دې ولایت کې د رأیو له ۱۱۲ مرکزونو څخه ۶۳ یې پرانيستي او نور به یې تړلي وي.

د دغه دفتر مشر محمد بشیر حُسام نن ازادي راډیو ته وویل: ۶۳ مرکزونه به د انتخاباتو په ورځ پرانيستي وي، هغه هم په درېیو برخو وېشل شوي دي، په ۲۷ مرکزونو کې هېڅ ډول امنیتي ستونزه نشته، ۶ مرکزونه له متوسط امنیتي ګواښ او په ۲۸ مرکزونو کې امنیتي ګواښ ډېر بلل شوی دی، پاتې نور ۴۹ مرکزونه به تړلي وي.

ښاغلي حُسام دغه راز وویل چې حساس او غیر حساس انتخاباتي مواد فاریاب ته رسېدلي دي او ټاکل شوې چې سر له نن څخه ولسوالیو ته هم ولېږل شي.

د افغانستان ولسمشرۍ انتخابات د میزان یا تلې په ۶مه چې د سپټمبر له ۲۸مې سره سمه ده، تر سره کېږي.

د انتخاباتو کمېسیون: حکومت د بایومټریک دستګاوو ستونزه هواره کړې

د بایومټریک انتخاباتي دستګاه

د افغانستان د انتخاباتو خپلواک کمېسیون وایي، حکومت د بایومټریک دستګاوو ستونزه هواره کړې ده.

د دغه کمېسیون مرستیال ویاند ذبیح سادات تېر ماښام ازادي راډیو ته وویل چې اوس مهال دغه دستګاوې په ولایتونو کې د رأیو مرکزونو استولو ته د چمتو کېدو په حال کې دي.

ده وویل: څه باندې ۱۸ زره دستګاوې د مرکزي احصایې له خوا او ۱۷ زره نورې د حکومت له خوا اخيستل شوي او د انتخاباتو کمېسیون ته ورکړل شوي دي، نو کمېسیون اوس د بایومټریک دستګاوو په برخه کې هېڅ ستونزه نه لري.

تر دې وړاندې د افغانستان د انتخاباتو خپلواک کمېسیون ویلي وو چې حکومت د دغو دستګاوو په برابرولو او د انتخاباتي موادو د انتقال په برخه کې همکاري نه ده کړې.

ښاغلی سادات وایي، ستونزې ېې تر ډېره هوارې کړي او له ژمنې سره سم به پر ټاکلي وخت ولسمشریز انتخابات ترسره شي.

د افغانستان د ولسمشرۍ انتخاباتو ته د میزان یا تلې ۶مه نېټه ټاکل شوې ده.

د ولسمشر اشرف غني په ګډون اتلسو کسانو دغو انتخاباتو ته ځانونه کاندید کړي دي.

اروپايي اتحادیه وايي راروانې ټاکنې د ارزښتونو د دفاع معنی لري

ارشیف، د افغانستان په پارلماني ټاکنو کې رأی ورکونه

په افغانستان کې د اروپايي اتحادیې مأموریت ویلي چې د جمهوري ریاست راروانې ټاکنې د ارزښتونو د دفاع معنی لري.

په افغانستان کې د سپټمبر په ۲۸مه [د میزان شپږمه] د جمهوري ریاست انتخابات کېږي.

د اروپايي اتحادیې پر ټویټر پاڼه په یوه پیغام کې لیکل شوي چې افغانان به د ټاکنو له لارې له ډموکراسۍ د ملاتړ څرګندولو موقع ولري او د خپل هېواد د سیاسي رهبرۍ مشروعیت به ټینګ کړي.

په افغانستان کې د اروپايي اتحادیې مأموریت نن، د اګسټ په ۱۵مه، پر ټویټر لیکلي چې ټول ښکېل اړخونه دې ته منتظر دي چې په دوحه کې د امریکا او د وسله‌والو طالبانو د سیاسي استازو ترمنځ د خبرو پایله څه کېږي او دوی د اروپايي اتحادیې د بهرني سیاست د مشرې، فدریکا موګرېني د مارچ د ۲۶مې نېټې پر بیان ولاړ دي.

فدریکا موګرېني ویلي و چې "راځئ د سولې لپاره داسې هڅه وکړو لکه هېڅ انتخابات چې نه‌وي او راځئ د انتخاباتو داسې ملاتړ وکړو لکه د سولې پروسه چې هېڅ نه‌وي."

د افغانستان د جمهوري ریاست لپاره د ملي یووالي د حکومت د دواړو مشرانو په ګډون ۱۸ تنه کاندیدان دي.

نور راوښيه

XS
SM
MD
LG